Бүтэнбаярын Сүндэръяа буюу сошиал орчинд “Сүнээ” нэрээр танигддаад буй билээ. Тэрээр саяхан УИХ-ын гишүүн Ц.Анандбазарын бэлгийн хүчирхийлэлтэй холбоотой баримт дэлгэж, цагдаад гомдол гарган “METOO” хөдөлгөөн эхлүүлээд байгаа юм.
Тэрээр СУИС-ийг бүжигчин, бүжгийн багш мэргэжлээр 2015 онд төгссөн. Оюутан байхдаа “Sunee’s Ballet” нэртэй сургалтын төвөө нээж өдгөө дөрвөн ч салбартай болсонг харахад чамгүй сэргэлэн нэгэн аж.
Тэрээр “Монголын балетын сургалтын түвшинд, тодорхой хэмжээний амжилтад хүрч чадсан” хэмээн тодорхойлдог. “Sunee’s Ballet” сургалтын төвөө нээсний дараагаас “Ханын материал”-ын асрамжийн төвийн хүүхдүүдэд үнэгүй балет зааж байсан гэдэг.
Жирийн л нэгэн балетчин эмэгтэй чухам яагаад олны анхааралд өртөж “Сүнээ” гэж дуудагдах болов?
Яг жилийн өмнөөс өөрийн @Sunee1105 твиттер хуудсандаа хэний ч мэдээгүй засгийн газрын хэвлэлийн албанд ч хүрээгүй мэдээллүүдийг жиргэж эхэлснээр олны анхааралд өртөж эхэлсэн гэж хэлж болно. Өмнө нь Э.Оюунболдын допингийн асуудал болон коронавирусийн талаарх мэдээллийг ч түрүүлж мэдээлж байсан удаатай. Энэ мэт саваагүй жиргээнээнүүдээс болж “Монгол Улсын төрийн болон албаны нууцыг хамгаалах нийтлэг журмыг” зөрчсөн хэрэгт буруутгагдаж байсан. Үүгээр ч зогсохгүй нэр бүхий их хурлын гишүүдтэй нэр холбогдож ёс бус харилцаа байхгүй гэдэгтээ бат зогссоор ирсэн нэгэн. Сүнээгийн ээдрээтэй асуудлууд ар араасаа тасралтгүй гарч олон нийтийн сүлжээнд нэлээд асуудалд өртөөд буй.
Харин саяхан УИХ-ын гишүүн Ц.Анандбазарын бэлгийн хүчирхийлэлд өртсөн гэх мэдээллийг өгч, цагдаад гомдол гаргаад байгаа юм. “Эрх мэдэлтэй халдашгүй, дархан эрхтэй, тэрбумтан, хүчирхэг араатантай ганцаараа тэмцээд дийлэхгүй байна. Надад туслаач” хэмээн шүгэл үлээж “Metoo” хөдөлгөөнийг эхлүүлээд байна.
Уг хэргээс үүдэлтэй Ц.Анандбазартай холбоотой болон ажлын байрны бэлгийн дарамтад өртөж байсан мянга мянган хохирогчид “Metoo” хөдөлгөөнд нэгдээд байгаа юм.
“Me too” хөдөлгөөн хэрхэн эхэлсэн бэ?
Кино найруулагч Харви Вайнштейн охид бүсгүйчүүдэд бэлгийн дарамт учруулдаг байсан хэргийг олон нийтэд илчилсэн энэхүү хөдөлгөөн Холливудын жүжигчин “Алисса Милано” твиттер хуудаснаа бэлгийн хүчирхийлэлд өртсөн найзынхаа тухай бичсэнээр эхэлжээ. Үүний дараагаар жүжигчин “Эшли Жадд, Анжелина Жоли, дуучин Тайлор Свифт, жүжигчин, загвар өмсөгч Роуз МакГоун” зэрэг олны танилууд бэлгийн дарамтын талаар үзэл бодлоо хуваалцан, хөдөлгөөнийг идэвхтэй өрнүүлэхэд уриалсан юм.
Алисса Милано твиттертээ “Бэлгийн дарамт, хүчирхийлэлд өртөж байсан бүх бүсгүйчүүд энэхүү жиргээний дор “MeToo” (Би ч бас) гэж бичээрэй. Ингэснээр бид хүчирхийлэл ямар аймшигтай том асуудал болоод байна вэ гэдгийг бусдад бага ч гэсэн ойлгуулах юм бил үү” хэмээн бичиж энэхүү хөдөлгөөнийг улам идэвхжүүлжээ. Тэрхүү жиргээний дор хүчирхийлэлд өртөж байсан олон мянган охид бүсгүйчүүд “Би ч бас” хэмээн бичиж, өөрт тохиолдсон аймшигт хэргүүдийн талаар ам нээхээс гадна хүчирхийлэлд өртсөн, бэлгийн дарамтад орж байсан хохирогчдод дэм үзүүлэх зорилгоор өөр бусад хүмүүс ч идэвхтэй жиргэж байлаа.
Твиттерээс өгсөн мэдээллээр тухайн жиргээг бичсэнээс ердөө 24 цагийн дотор хагас сая хүн Алиссагийн жиргээнд хариу бичсэн байна.
Энэхүү жиргээ цаашлаад бэлгийн дарамт, хүчирхийллийн эсрэг “MeToo” нэртэй хөдөлгөөн болон хувирч дэлхийн 85 гаруй орныг хамарч дэлхий нийтээр хүчирхийллийн асуудлыг хурцаар хэлэлцэж эхэлсэн. Францад BalanceTonPorc, Италид, QuellaVoltaChe, Хятадад #我也是, Вьетнамд TôiCũngVậy гэх зэргээр улс бүр тухайн хэл рүү хөрвүүлсэн “MeToo”, эсвэл өөр хувилбарын хаштагуудыг үүсгэн цахим орчинд хүчирхийллийн тухай айж, ичилгүйгээр ярих тохиромжтой орчин бүрдүүлж чадсан билээ.
Өмнө нь хорио цээртэй мэт байсан хүчирхийллийн сэдвийг ийнхүү ил гаргаж, хүчирхийлэгчдийг олон нийтээр жигшин зэвүүцэж, хүчирхийллийн даван туулагчдад сэтгэлийн дэм өгөх хөдөлгөөн дэлхийн олон оронд хүчтэй өрнөж байна.
“Мetoo” хөдөлгөөнийг монголд анх З.Номуундарь, Ч.Наранзаяа гэх бүсгүйчүүд хүчирхийлэлд өртсөнөө илэрхийлэн эхлүүлж байсан. Харин Б.Сүндэръяагийн эхлүүлсэн хөдөлгөөн нь Монголын хоёрдох удаагийн “Metoo” хөдөлгөөн юм.
