Month: April 2021

Categories
мэдээ нийгэм цаг-үе

ЭМЯ: Коронавирусийн 486 тохиолдол бүртгэгдэж, хоёр иргэн нас барлаа

Коронавируст халдварын нөхцөл байдлын талаар Эрүүл мэндийн яамнаас ээлжит мэдээллээ хүргэж байна.

ЭМЯ-ны Хэвлэл мэдээлэл, олон нийттэй харилцах зөвлөх Б.Ууганбаяр “Сүүлийн 24 цагт 11876 хүнд PCR шинжилгээ хийхэд 486 хүнээс халдвар илэрлээ. Эдгээрийн 391 нь Улаанбаатар хотод, орон нутагт 93 байна.

Тодруулбал, Сэлэнгэ 16, Дархан 15, Орхон 17, Төв 26, Хөвсгөл 2, Баянхонгор 3, Булган 1, Ховд 13 тохиолдол байна.

Ингэснээр Улсын хэмжээнд нийт батлагдсан тохиолдол 9387 боллоо.

Мөн 58, 66 настай хоёр хүн нас барсан. Ингэснээр коронавирусийн улмаас нас барсан иргэдийн тоо 10 болов.

Сүүлийн 24 цагт 146 хүн эмчлэгдэж, нийт 5216 буюу 56 хувь нь эдгэрээд байна.

Өнөөдрийн байдлаар 1990 хүн эмчлэгдэж буйгаас биеийн байдал:

Хөнгөн: 1713

Хүндэвтэр: 232

Хүнд: 37

Маш хүнд: 8 хүн байна” гэв.

Categories
мэдээ нийгэм цаг-үе

Өнөөдөр дархлаажуулалтын 40 цэг ажиллана

Өнөөдөр дархлаажуулалтын 40 цэгт 90 багийн 650 эмч ажилтан ажиллаж 10 мянган хүнийг дархлаажуулна.

Categories
мэдээ онцлох-нийтлэл туслах-ангилал улс-төр

Шадар сайд С.Амарсайхан огцорч, ёс зүйн хариуцлага хүлээх ёстой

Шадар сайд, Улсын онцгой комиссын дарга С.Амарсайханы эхнэр Ч.Ичинхорлоо ХӨСҮТ-д сахиураар очоод нэг хоносны дараа тус төвийн орчныг голж, улмаар гэртээ гарсан тухай шуугиан олны анхаарлыг татаж байна. ХӨСҮТ-ийн “Улаан бүс” рүү орсон хүн тэндээ 14 хоног тусгаарлагдах ёстой байтал Шадар сайдын эхнэр шууд гэр рүүгээ явчихжээ. Засгийн газрын шийдвэрийг танилцуулах хурлын үеэр Шадар сайдаас сэтгүүлч энэ талаар тодруулахад тэрээр гэнэтийн асуултад цочирдож, ээрч мууран тодорхойгүй хариулт өгсөн. Тэрээр “Халдвар хамгааллын дэглэм баримтлагдаж явж байгаа. Шинжилгээгээ өгөөд явж байгаа. Шинжилгээний хариу нь сөрөг гарсан. Үүн дээр ямар нэгэн зөрчил, дутагдал гаргаж байгаа асуудал байхгүй учраас тийм зүйл байхгүй. Сахиураар очсон, өөрөө урвал өгсөн учраас буцаж тусгаарлагдсан. Шинжилгээ өгөөд хариу нь сөрөг гарсан учраас одоо ямар нэгэн байдлаар ХӨСҮТ-тэй холбоотой асуудал байхгүй ээ гэж ойлгож болно” гэсэн хариулт өгснийг бүгд сонссон. ХӨСҮТ рүү орсон хүн тусгаарлагдахгүйгээр шууд гэр рүүгээ явчихна гэдэг бол цар тахал дэгдсэн энэ үед онцгой бүсэд сахилга, хариуцлагыг маш ноцтой зөрчсөн хэрэг. Шадар сайдын эхнэр Ч.Ичинхорлоо ч өөрөө энэ талаараа мэдэгдэл хийж “Энэ асуудал олон нийтэд буруу зөрүү ойлголт өгч, дургүйцлийг нь төрүүлэх хэмжээний том асуудал болно гэж бодолгүй яарч тэвдэн явсандаа хүлцэл өчье” гэсэн нь буруутай үйлдлээ хүлээн зөвшөөрсөн явдал юм.

Эмнэлгийн халдвар хамгааллын дүрэм бол цусаар, хүний амь насаар бичигддэг гэж ярьдаг. Энэхүү дүрмийг хэрвээ хэн нэгэн зөрчвөл хүн нас бардаг, бүх юм балардаг гэж үздэг учраас ийнхүү онцгойлон дагаж мөрдсөөр ирсэн. “А” зэрэглэлийн, тахалтай, “Улаан бүс”-ээр ороод маргааш нь юу ч болоогүй мэт гараад явчихаж байгаа нь Монгол Улсын эсрэг хийсэн үйл ажиллагаа юм. Төрийн сайд ингэж улсынхаа эсрэг үйл ажиллагаа яавч явуулж болохгүй.

Өнөөдөр Монгол Улсын нөхцөл байдал хүндэрч, халдвараа алдчихаад байгаа нь яг л ийм хариуцлагагүй үйл ажиллагаанаас үүдэлтэй. Өнгөрсөн жилийн нэгдүгээр сарын сүүлчээр Уханьд маш аюултай ханиад гарчээ гэдгийг мэдэнгүүтээ л Монгол Улс хилээ хаачихсан. Нэг хэсэгтээ бүх юмыг хяналтдаа байлгаж, дотооддоо халдвар аваагүй цөөхөн орны нэг гэгдэж байтал яг л энэ мэт сахилга бат алдсан, хариуцлагагүй үйлдэл хийснээс болж төмөр зам дагаж коронавирусийн халдвар Монгол Улсад орж ирсэн. Төмөр замчдын тэмцээн, Оросын мэргэжилтнүүд ирж очсон гэх дэглэм зөрчсөн үйл ажиллагаануудаас болж Монголд ковид дэлгэрсэн. “Энхсаран” сувилал дээр мөн хариуцлагагүй үйл ажиллагаанаас болж халдвар алдагдсан. Дэлхий нийтээрээ халдвар аваад эмчилгээ хийлгээд гарсан хүнийг долоо хоног ажиглана гэж байсан ч манайхан заавал 21 хоног, тэрнээс ч урт хугацаагаар хорих ёстой гэж зүтгэцгээсэн. Тусгаарлалтын байранд байгаа хүн 14 хоноод л уйдаж эхэлдэг, тэр хүмүүс дээр халдвартай байж болзошгүй гэж үзсэн хүмүүсийг нэмж оруулж, хоорондоо холилдсоноос тэндхийн бүх юм хяналтаас гарч, тахал тарчихсан. Монголд ковид дэлгэрсэн, тархсан энэ бүх үйлдэл ерөөсөө хариуцлага, сахилга бат алдагдсантай холбоотой.

Шадар сайдын сэтгүүлчийн гэнэтийн асуултад хариулт өгч байгаа биеийн хэлэмж, дуу хоолойны өнгө нь энэ хүнийг чадвар муутай, энэ албанд тэнцэх хүн биш гэдгийг нотолчихлоо. Юмныхаа голыг олж ярихгүй, тойруулж бултсан л хүн байх юм. Тас нясхийстэл шууд, шулуун шударга, товч бөгөөд тодорхой ярьдаг хүн сайдын алба хашдаг баймаар.

Зүй нь бол “Манай хадам аав, ээж хоёр хүртэл ковид тусчихсан шүү дээ. Би тийш, тэдэн рүү ерөөсөө очдоггүй. Юун эхнэрээ дотогш оруулах. Дүрэм бол дүрэм, журам бол журам. Би одоо эмч нарт найдаад л байж байна” гээд яриад байж байх хүн Шадар сайд байх ёстой. Тэгтэл эхнэрээ ХӨСҮТ рүү оруулаад л, гаргаад л, тэрийгээ түмэн олноос нуугаад л, хаагаад л. Ийм хүн төрийн өндөр албанд огт хэрэггүй, С.Амарсайхан Шадар сайдаар ажиллаж чадах ч үгүй юм байна.

С.Амарсайханыг шууд огцруул. Угтаа “Аав, ээж хоёр минь ХӨСҮТ-д байгаа. Би очиж ч чадахгүй, эргэж чадахгүй байж байна” гээд л тасхийтэл хэлчихдэг тийм Шадар сайд байсан бол түүнтэй хэн, юу ярих юм бэ.

Ер нь тэгээд чадвар муутай ийм хүн дайн дажин шиг ийм хүнд үед Шадар сайдын албыг хашихдаа эхнэрээ л ХӨСҮТ рүү оруулж гарахаас өөр юу ч хийх вэ дээ. Хийж чадах ажил нь л энэ. Гэтэл өнгөрсөн оны аравдугаар сарын сүүлчээр нэгэн бүсгүй БНСУ-аас ирээд зочид буудалд тусгаарлагдаж байхдаа уйлан хайлан лайв хийж, аавтайгаа салах ёс хийх боломж олгоно уу хэмээн УОК, ЭМЯ, Засгийн газраас аврал эрэн гуйсан билээ. Тэр бүсгүй “Аавтай минь намайг уулзуулаач. Аавтайгаа салах ёс хийхийг зөвшөөрөөч. Би хамгаалалтын хувцас өмсөж байгаад аавыгаа сүүлчийн удаа хармаар байна. Аавдаа ганцхан л үнсүүлэх гэж эх орондоо ирсэн. Аав минь хорт хавдраар бүх элгээ тайруулсан ч хавдар нь бүх биеэр нь тарчихсан. Зөвхөн надтай л уулзахыг хүлээж тарчилж байсан. Намайг хүлээж 80 кг-аас 60 кг болтлоо турсан. Өдөрт хоёрхон халбага юм иддэг байсан. Надтай л уулзах гэж аав минь хүлээсээр байгаад өөд болчихлоо. Намайг аавтай минь амьдад нь уулзуулсангүй. Харин одоо намайг аавтайгаа салах ёс хийхэд туслаач. Би хамгаалалтын хувцас өмсөж оччихоод л буцаад ирж тусгаарлагдъя” гэж хориод минутын турш уйлж, хүн болгоны өр өвдтөл гуйсан боловч түүнийг төр засгийнхнаас хэн ч тоогоогүй. Эгэл жирийн тэр нэг бүсгүйд хайр энэрэлгүй хатуу загнасан мөртлөө цар тахалтай, нийтээрээ өндөржүүлсэн бэлэн байдалд шилжчихсэн энэ үед сахилга батыг хэрэгжүүлж, цар тахлын үеэр бүхнийг дээрээс нь доош, доороос нь дээш бат хянаж байх ёстой хүний эхнэр ингэж дураараа аашилна гэдэг бол Монголд ямар ч баталгаа байхгүйн шинж. Дарга л байвал юу ч хийж болдог гэдэг феодлын үеийн гэмээр зан монголчуудын дунд бий. Энэ бол тэрний нэг жишээ боллоо.

Байдал угаас бишдэж, улам уруудаж байгааг мэдэцгээж байгаа. Цаашид ийм хүнээр УОК-ыг удирдуулаад явах нь зохисгүй учир Шадар сайд С.Амарсайханыг хугацаа алдалгүй огцруулах хэрэгтэй байна. Энэ байдлаараа дахин жаахан хугацаа алдвал Монгол Улс ковидоос гадна сахилга, хариуцлагагүй энэ байдлаас болж, улс орон маань бүхэлдээ уналтад орох нь. Хэн дуртай нь, юу дуртайгаа хийдэг, хэн дуртай хүний эхнэр “Улаан бүс”-ээр чөлөөтэй орж гардаг сахилга, хариуцлагагүй байдал хавтгайрсан болохоор энэ улсын бүх юм тэг заагаад эхэллээ. Иймээс Засгийн газар, Ерөнхий сайд, Ерөнхийлөгч та бүгд нийлээд Шадар сайд С.Амарсайханыг даруйхан огцруулах хэрэгтэй байна. Шударга ёсны төлөө явдаг гэдэг Ерөнхийлөгч Х.Баттулга түүнийгээ нотолж, хариуцлага алдсан Шадар сайдыг огцруулахад хүчтэй байр суурийг илэрхийл. Залуу Ерөнхий сайд Л.Оюун-Эрдэнэ ч үүнд анхаарал хандуулж, Шадар сайдаа яаралтай огцруулж, хариуцлага тооц.

Шадар сайд, УОК-ын дарга С.Амарсайханыг яаралтай огцруулж, ёс зүйн хариулцлага хүлээлгэхгүй бол цар тахлын үед явуулж байгаа энэ бүх үйл ажиллагаанууд чинь үндсээрээ утгагүй болж эхэллээ.

Categories
мэдээ нийгэм

“Иргэд орон нутаг руу баталгаат бус замаар шинжилгээгүй зорчиж, нөхцөл байдлыг хүндрүүлж байна” гэв

Нийслэлийн Онцгой комиссын Шуурхай штабын орлогч дарга Э.Эрдэнэбаатар хот хооронд зорчихтой холбоотой асуудлаар мэдээлэл өглөө.

-Улаанбаатар хотоос орон нутаг руу зорчих хөдөлгөөнийг хэрхэн зохицуулж байгаа вэ?

-Улаанбаатар хотоос гарах зорчигч тээврийн хөдөлгөөнийг Нийслэлийн Засаг даргын 2021 оны гуравдугаар сарын 27-ны А/221 дүгээр захирамжаар зохицуулан ажиллаж байна. Зөвхөн хүндэтгэх үзэх буюу буяны ажил, эрүүл мэндийн шалтгаантай иргэд, ачаа тээврийн зориулалтаар хүнс, шатахуун, эм, эмнэлгийн хэрэгсэл тээвэрлэх болон уул уурхайн ээлж солилцох ажилчдыг ПСР шинжилгээ, тухайн аймгийн Онцгой комиссын Шуурхай штабаас өгсөн зөвшөөрлийг үндэслэн авто тээврийн шалган нэвтрүүлэх товчоодоор гаргаж байгаа.

Мөн гуравдугаар сарын 26-ны УОК-ын 10 дугаар хурлын тэмдэглэлээр Өмнөговь, Дорноговь аймаг руу буяны ажил болон хүнс, шатахуун тээвэрлэлт, хадлан тэжээл, уул уурхайн ээлж солилцохоор зорчих хөдөлгөөний зөвшөөрлийг УОК-ын Шуурхай штабаас олгоно. Бусад аймгийн хувьд НОК болон аймгийн Онцгой комиссын зөвшөөрлийг үндэслэн авто тээврийн шалган нэвтрүүлэх товчоодоор гаргах үйл ажиллагааг зохион байгуулж байна.

Улаанбаатар хот руу орох иргэдийн хөдөлгөөний хувьд ногоон бүс буюу халдвар илрээгүй бүс нутгаас ирж байгаа бол асуумжаар нэвтрүүлнэ.

Харин өвчлөл бүртгэгдсэн, халдварын тархалтын улаан түвшинд шилжсэн аймгуудаас иргэдийг түргэвчилсэн оношлуурын шинжилгээг үндэслэн нэвтрүүлж байна. Учир нь улаан түвшинд шилжсэн аймгууд ПСР-ын шинжилгээ авах лабораторигүй.

Харин нийслэлийн ойр орчмын буюу Багануур, Багахангай, Налайх дүүрэг, Хан-Уул дүүргийн 12, 13, 14 дүгээр хороо, Сонгинохайрхан дүүргийн 21, 32 дугаар хорооны нутаг дэвсгэрт амьдарч байгаа иргэдийг иргэний үнэмлэхийн гэрийн хаягийг үндэслэж нэвтрүүлнэ. Мөн аж ахуйн нэгжийн байгууллагын ажилчдыг тухайн байгууллагын тусгай зөвшөөрөл буюу ажлын байрны тодорхойлолт, тухайн ажилтны ажлын үнэмлэхийг үндэслэж, асуумжаар нэвтрүүлж байгаа.

-Иргэд баталгаатай бус замаар нууцаар зорчих асуудал гардаг. Үүнд хэрхэн хяналт тавьж ажиллаж байна вэ?

-Авто тээврийн шалган нэвтрүүлэх товчоодоос гадна хотын эргэн тойрон дахь баталгаат бус маршрутын зам дээр хяналт тавьж ажиллаж байгаа. Иргэд хөдөө, орон нутаг руу баталгаат бус замаар ПСР шинжилгээгүй зорчиж, нөхцөл байдлыг хүндрүүлж байна. Оршуулгын үйл ажиллагаанд явах иргэдийн хяналтыг сайжруулж, тухайн орон нутгийн зөвшөөрлөөр иргэдэд зөвшөөрөл олгох ажлыг зохион байгуулж байгаа. Буяны ажлын хүрээнд орон нутаг руу, тэр дундаа халдварын улаан бүс рүү явж байгаа иргэдийг зөвхөн хоёр автомашинтай, 5-7 хүний бүрэлдэхүүнтэй явах зөвшөөрөл олгоно.

-Хот хооронд нийтийн тээвэр явж байгаа юу?

-Хот хооронд явах нийтийн тээврийн үйл ажиллагаа зогссон. Хувийн тээврийн хэрэгсэлтэй иргэд хулгайгаар зорчихоос гадна иргэдийг тээвэрлэж байна. Бид энэ чиглэлээр “Драгон”, “Лавай”, “Тэнгэр” худалдааны төвүүд дээр байнгын хяналт тавьж, тэндээс иргэд тээвэрлэж байгаа жолооч нарыг авто тээврийн шалган нэвтрүүлэх товчоод дээр зогсоож, буцаах ажлыг зохион байгуулан ажиллаж байгаа.

НЗДТГ-ЫН ХЭВЛЭЛ МЭДЭЭЛЭЛТЭЙ ХАРИЛЦАХ ХЭЛТЭС

Categories
мэдээ эдийн-засаг

DAX Цахим Хөрөнгийн бирж олон улсын жишиг, стандарт руу шилжиж, өргөн цар хүрээтэй ажиллах боломжтой боллоо

Ард Санхүүгийн Нэгдлээс Ард Аппликэйшн болон DAX буюу Цахим Хөрөнгийн Биржид гарч байгаа шинэчлэлт, өөрчлөлтийн талаар мэдээлэл хийлээ. Тус мэдээлэлд Ард Санхүүгийн Нэгдлийн охин компанийн удирдлагууд оролцсон юм.

Ч.Ганзориг: DAX-ын шинэлэг, дэвшилтэт хувилбарын тусламжтайгаар арилжаанд илүү хялбараар оролцоорой

Ард Экс компанийн Гүйцэтгэх захирал Ч.Ганзориг: Digital Assets Exchange буюу DAX нь Ард Санхүүгийн Нэгдлийн хөрөнгө оруулалттай Цахим Хөрөнгийн Бирж бөгөөд 2020 оны 12 дугаар сарын 14-ний өдрөөс эхлэн өнөөдрийг хүртэлх гурван сар гаруйн хугацаанд үйл ажиллагаагаа тогтвортой, амжилттай явуулж ирлээ. Түүнчлэн Олон улсын платформуудын жишгээр арилжаагаа цахимаар явуулдаг ба блокчэйн технологид суурилсан криптовалютыг чөлөөтэй арилжаалах боломжийг олгодог. Бид үйл ажиллагаа явуулж эхэлснээс хойш давхардсан тоогоор нийт 860 мянга орчим харилцагчийн 578 тэрбум төгрөгийн үнийн дүнтэй арилжаа хийсэн байна. Энэ тоо юуг илтгэж байна гэхээр манай улсын зах зээлд криптовалютын арилжаанд оролцож, хөрөнгө оруулах сонирхолтой иргэд их байгааг илтгэж байна. Үнэндээ, бид анх DAX-ыг зах зээлд нэвтрүүлэхдээ ийм өндөр үр дүн гарна гэж тооцоогүй. Гэтэл бидний хүлээлтээс хэд дахин давсан арилжааг хийсэн. Тиймээс өнөөдөр DAX нь өөрийн вэб сайт дээр суурилсан хувилбараа нэвтрүүлж байгааг харилцагчдадаа дуулгахад таатай байна. Үүнтэй зэрэгцэн DAX нь өчигдрөөс буюу дөрөвдүгээр сарын 1-нээс Ард аппликэйшний цэсээс хасагдаж байгаа. Тиймээс dax.mn хэмээх өөрийн вэб сайт дээр ажиллах юм. Өөрөөр хэлбэл, өмнө нь Ард Аппликэйшн руу нэвтэрсний дараа тус аппликэйшн дотор байрлах DAX цэсээр арилжаанд ордог байсан бол одоо ийнхүү тусдаа вэб хуудастай болсныг танилцуулж байгаа юм. Ийнхүү DAX нь тусдаа вэб хуудастай болсноор цаашид олон улсын криптовалютын биржүүдийн ажилладаг жишиг, стандарт руу шилжиж, илүү өргөн цар хүрээтэй ажиллах боломжтой болохоос эхлүүлээд олон давуу тал бий болж байна. Бид энэхүү шилжилтийг дагаад харилцагчдад аль болох хялбар байдлаар арилжаанд оролцох боломж олгох шийдлүүдийг ашиглалаа. Энэ дашрамд дурдахад, биткойн, криптовалютын орлого, зарлагыг өчигдрөөс нээж байгаа юм. Үүний үр дүнд иргэд биткойноо манай биржид орлого байдлаар хийж зарж бэлэн мөнгө болгох, мөнгөө Ард Аппликэйшн ашиглаж аль нэг банкныхаа дансанд татан төвлөрүүлэх боломжтой. Эрхэм харилцагч та бүхэн DAX-ын шинэлэг, дэвшилтэт хувилбарын тусламжтайгаар арилжаанд илүү хялбараар оролцоорой. Нийт харилцагчдыг dax.mn дээр байрлах видео болон зурган зааврын дагуу вэб сайт хувилбар руу шилжиж арилжаандаа оролцохыг хүсье” гэв

Г.Тэлмэн:Ард Аппликэйшн хэрэглэгчдийн тоо 1.000.000-д, АрдКойн эзэмшигчдийн тоо 600 мянга гаруйд хүрээд байна

Инйхүү шинэчлэгдсэн Цахим Хөрөнгийн Биржийн талаар танилцуулсны дараа Ард Кредит компанийн Гүйцэтгэх захирал Г.Тэлмэн мэдээлэл өгсөн юм. Тэрээр хэлэхдээ, Ард Кредит нь 2011 онд Монгол Улсад үүсгэн байгуулагдаж, холбогдох хууль тогтоомж, Санхүүгийн Зохицуулах Хороо, Монголбанкнаас олгосон тусгай зөвшөөрлийн хүрээнд үйл ажиллагаагаа явуулж буй нээлттэй хувьцаат компани билээ. Манай компани 2020 оны тавдугаар сард Монголбанкнаас Цахим мөнгө гаргах тусгай зөвшөөрөл авсан бөгөөд уг чиглэлээр тусгай зөвшөөрөл авсан анхдагч банк бус санхүүгийн байгууллага болсон юм. Ард Кредит нь Монголбанкнаас олгосон Цахим мөнгө гаргах тусгай зөвшөөрлийн хүрээнд АрдКэш цахим мөнгийг гүйлгээнд гарган Ард Аппликэйшнээр дамжуулан санхүүгийн бүхий л төрлийн бүтээгдэхүүн, үйлчилгээг харилцагчдадаа хүргэхийг эрмэлзэн ажиллаж ирлээ. Бид өнгөрсөн хугацаанд төр засгаас хэрэгжүүлж буй Цахим үндэстэн болох, цахим шилжилтийг эрчимжүүлэх, санхүүгийн хүртээмжийг нэмэгдүүлэх, иргэдэд хүргэх үйлчилгээний өртгийг бууруулах бодлогыг дэмжсээр ирсэн бөгөөд уг чиглэлээр хувийн хэвшлийн байгууллагуудыг манлайлан ажиллаж, бодлогыг амьдралд хэрэгжиж биеллээ олоход онцгой хувь нэмэр оруулан ажиллаж байна. Тухайлбал, харилцагчдын дунд хамгийн эрэлттэй байгаа бүтээгдэхүүн болох АрдКойныг Ард Санхүүгийн Нэгдэл зах зээлд нэвтрүүлсэн бөгөөд одоогоор Ард Аппликэйшн хэрэглэгчдийн тоо 1,000,000-д, АрдКойн эзэмшигчдийн тоо 600 мянга гаруйд хүрээд байна. Бид энэ жил харилцагчдынхаа тоог нэг саяд хүргэхийг зорьж байсан. Энэхүү зорилгодоо энэ оны нэгдүгээр улиралдаа багтаан хүрсэндээ баяртай байна. УИХ-ын 2020 оны 24 дүгээр тогтоол бий. Уг тогтоолыг дагалдан гарсан Монгол Улсын Засгийн газрын 2020-2024 оны үйл ажиллагааны хөтөлбөрийн 3.7.3-т Монгол Улсын Засгийн газрын 2020-2024 оны үйл ажиллагааны хөтөлбөрт, иргэн хуулийн этгээдэд сүүлийн үеийн дэвшилтэт технологид суурилсан байдлаар хиймэл, оюун ухаан, блокчейн технологид суурилсан төлбөрийн, татварын, биржийн үйл ажиллагааг нэвтрүүлэхээр заасан байдаг. Тиймээс ч бид цар тахал дэгдсэн энэ үед зайнаас үйлчилгээ авах боломжийг харилцагчдадаа олгож байгаа нь томоохон үр дүн гэж дүгнэж байгаа гэв.

Цахим мөнгөний журамд ойрын хугацаанд өөрчлөлт оруулах хэрэгтэй

Тэрээр, Үндэсний төлбөрийн системийн тухай хууль 2018 оны нэгдүгээр сарын 1-нээс хэрэгжиж эхэлсэнтэй хобоотойгоор цахим төлбөр тооцоонд банкнаас бусад хуулийн этгээд оролцох боломж нээгдсэн гэдгийг онцлож яриагаа үргэлжлүүллээ. Тэрээр хэлэхдээ, манай хамт олон тус хуулийг хэрэгжиж эхлэхээс өмнө Ард Аппликэйшныг хэрэглээнд нэвтрүүлсэн. Тус хуульд нийцүүлэн Монголбанкнаас Ард Кредит компани цахим мөнгө гаргах тусгай зөвшөөрөл авсан. Тиймээс бид АрдКэш буюу цахим мөнгийг гаргасан. Ард Аппликэйшн буюу санхүүгийн бүх төрлийн үйлчилгээ авах боломжтой үйлчилгээ Ард Санхүүгийн Нэгдлийн өмч. Үүнд Ард Кредит компани цахим мөнгө гаргаж АрдКэшыг нэвтрүүлснээр нэг оролцогч нь болсон. Тэгэхээр манай 1 сая харилцагчид цахим төлбөр тооцоонд хэсэгчилсэн байдлаар, тодорхой хэмжээнд оролцож байгаа. АрдКойн нь Ард Санхүүгийн Нэгдлийн охин компаниудаас бүтээгдэхүүн, үйлчилгээ авсан харилцагчдад олгодог, блокчейн технологид суурилсан урамшууллын лоялти оноо бөгөөд бид оноогоо бусдад шилжүүлэх, арилжих зэрэг төрөл бүрийн боломжийг харилцагчдад олгох платформыг хөгжүүлсэн юм. Манай харилцагчид үйлчилгээ авснаараа, Ард Аппликэйшнд бүртгүүлснээрээ тус оноог өөртөө цуглуулдаг. Мөн манайхаас бүтээгдэхүүн үйлчилгээ авахдаа оноогоо ашиглан хөнгөлөлт эдлэх боломжтой. Хэдийгээр Ард Санхүүгийн Нэгдэл болон түүний охин компаниуд Монголд төдийгүй Дэлхий нийтэд шинэлэг бүтээгдэхүүн, үйлчилгээг нэвтрүүлэхээр зорин ажиллаж байгаа хэдий ч хууль, дүрэм, журмын зохицуулалт, техник технологийн дэвшилтэй хөл зэрэгцэн алхаж чадахгүй байгаагийн улмаас харилцагчдаас Ард Аппликэйшны гүйлгээний хязгаар, АрдКойн лоялти онооны талаар багагүй гомдлууд ирсээр байна.Учир нь Үндэсний төлбөрийн системийн тухай хууль болон Монголбанкны Цахим мөнгөний журамд өдөрт нэг харилцагч нэг удаадаа сая төгрөг шилжүүлэх боломжтой бөгөөд өдрийн дээд хязгаарыг 3 сая төгрөг байхаар тогтоож, үндсэн дансны үлдэгдэл 50 сая төгрөг байхаар тусгасан. Энэхүү журмыг 2-3 жилийн өмнө баталсан. Тиймээс манай харилцагчид биднээр дамжуулж төв банк болон холбогдох байгууллагуудад шаардлага хүргүүлж байгаа юм. Өнөөдөр хэрэгжиж байгаа журам харилцагчдын шаардлагыг хангахгүй байна гэдгийг хэлж байна. Харилцагчдаас ирүүлж буй гомдлууд нь гагцхүү эрх бүхий байгууллагаас тавьсан шаардлага, одоо хүчин төгөлдөр мөрдөгдөж буй журамд үйл ажиллагаагаа нийцүүлэхтэй холбоотойгоор үүсэж байгаа тул бид Ард Аппликэйшнд мөрдөгдөж буй гүйлгээний хязгаар нь иргэд, харилцагчдын шаардлагад нийцэхгүй байгаа, журамд нэмэлт, өөрчлөлт оруулах шаардлага бий болоод байгаа талаар саналыг 2020 оны 8 болон 12 дугаар саруудад Төв банкинд уламжлан хамтран ажиллаж байна. Тиймээс цаашид энэ журам удахгүй өөрчлөгдөнө гэдэгт итгэж байна.

Б.Гантиг: Криптовалют, блокчейны салбар Дэлхийн хөгжлөөс хоцрох биш хөл нийлүүлэн алхах ёстой

Монгол Улсын Засгийн Газрын 2020-2024 оны үйл ажиллагааны хөтөлбөрт иргэн хуулийн этгээдэд сүүлийн үеийн дэвшилтэт технологид суурилсан байдлаар үйл ажиллагаа явуулахыг бодлого байдлаар дэмжихээр тусгасантай холбогдуулан цаашид төр засаг, төрийн эрх бүхий байгууллагууд баялаг бүтээгч, дотоодын аж ахуйн нэгжээ Дэлхийтэй хөл нийлүүлэн, манлайлан алхахад бодлогоор дэмжин Монгол Улсын бизнес эрхлэгчид, харилцагч, хэрэглэгч, нийт ард түмнээ санхүүгийн эрх чөлөөнд хүргэсэн эрх чөлөөт улсын баян иргэд болоход дэмжлэг үзүүлнэ хэмээн найдаж байгаагаа илэрхийлмээр байна. Бид өөрсдийн сайн мэдэх уламжлалт лоялти оноог блокчейн технологи ашиглан шинэ түвшинд хүргэхийг зорьж байна. Бид хэрэглэгчиддээ эрх чөлөө, хөрвөх чадварыг өгч, маш том боломж нээж байна. Өнөөдөр АрдКойн 1 сая гаруй Монголчуудад хүрчихсэн байна. Дэлхий даяар криптовалют, блокчейны салбар хөгжлийн шинэ түвшинд хүрчихсэн байгаа энэ үед Олон улсад гаргана. Дэлхийн улс орнууд энэ салбарт томоохон хөрөнгө оруулалт, өөрчлөлт шинэчлэлтийг хийж байна. Тиймээс бид Дэлхийн хөгжлөөс хоцрох биш, хөл нийлүүлэн алхах ёстой. Ингэхдээ стандартын дагуу, шат шатаар өгссөөр олон сая хэрэглэгчдэд хүргэхийг зорьж, өдөр бүр хичээнгүйлэн ажиллаж байна. АрдКойны хувьд 2021 онд нэлээд их ажил хийхээр төлөвлөж, Олон улсын зах зээлд гарахаар ажиллаж байна.

П.ЗАЯА

Categories
мэдээ нийгэм цаг-үе

Л.Энх-Амгалан: Хичээл сонголтоор барьцаалж сургалтын төлбөрийг бүрэн авахгүй байх түр журам баталсан

БШУ-ы сайд Л.Энх-Амгалан “Хувьсах зардал болон сургалтын төлбөрийн асуудлаар хэвлэлийн хурал хийж байна.

Тэрээр, “Улсын хэмжээнд 5-10 сая түүнээс дээш төлбөр авдаг 24 сургууль байна. Эдгээр сургуулиудад хувьсах зардал тусгаагүй.

Харин 5 саяас доош төлбөртэй сургуулиудад хувьсах зардлыг гурван нөхцлийн хүрээнд олгосон. Нэгдүгээрт, цахим хичээлийн ирцийн бүртгэлээр хянах, Хоёрдугаарт сургалтын үйл ажиллагааг тасралтгүй явуулсан эсэх тайлан. Гуравдугаарт, Сургалтын төлбөрт хөнгөлөлт үзүүлснийг харгалзан үзсэн байгаа.

Мөн шинээр түр журам батлагдсан. Энэхүү журам өмчийн хэлбэр харгалзахгүй бүх шатны сургуулиудад хүргэсэн. Үүнд сургалтын төлбөрийг уян хатан нөхцлөөр авах. Төлбөр төлөгдөөгүйн улмаас цахим болон танхмын хичээлийг хязгаарлахгүй байх юм. Хичээл сонголтоо барьцаалж сургалтын төлбөрийг 100 хувь авахгүй байхад энэ журам үйлчилнэ. Үүнийг зөрчсөн сургуулиудад яам хатуу хариуцлага тооцно. Ийм зөрчил гаргасан тохиолдол оюутан, сурагчид мэдэгдэх ёстой. Хувьсах зардал олгохгүй”

МСҮТ-ийн үйл ажиллагаа БШУЯ-нд хамаардаггүй. Хөдөлмөр нийгмийн хамгааллын яаманд харъяа байдаг. Энэ жил МСҮТ танхимаар хичээллээгүй уяир 200 мянган төгрөгийн тэтгэлэг нь хүүхдийн мөнгө руу татагдаж буй” гэв.

Categories
гадаад мэдээ

А.Навальный өлсгөлөн зарлажээ

Өдгөө шоронд хоригдож буй Oросын сөрөг хүчний удирдагчдын нэг А.Навальный өлсгөлөн зарлажээ. Биe нь муудсан тэрээр хорих ангийн удирдлагуудаас эмнэлгийн тусламж хүссэн ч татгалзжээ. Тэрээр “Би эмчид үзүүлж, эм уух эрхтэй. Нурууны өвдөлт хөл рүү шилжсэн. Хөл хэсэгчлэн мэдээ алдаж байна. Надад эм өгөөгүй” гэж захидалдаа бичжээ. Үүний дараа түүний хоригдож байгаа анги руу гаднаас эмч оруулахыг шаардсан хөдөлгөөн өрнөсөн талаар мэдээлжээ. А.Навальный өнгөрсөн оны наймдугаар сард онгоцонд явж байхдаа биe нь гэнэт муудсан. Германы эмч нар түүнийг новачок бодист хордсон гэж мэдээлсэн. Берлинд эмчлүүлсэн тэрбээр өнгөрсөн нэгдүгээр сард нутаг буцсан ч түүнийг саатуулсан билээ.

Д.ЦЭРЭНДОЛГОР

Categories
мэдээ нийгэм цаг-үе

БНСУ-аас 156 иргэн эх орондоо ирлээ

Улсын Онцгой комиссын шийдвэрийн дагуу энэ сард нийт 12 удаагийн тусгай үүргийн нислэгээр эх орондоо ирэх хүсэлтэй иргэдийг татан авахаар төлөвлөсөн.

Энэ дагуу өчигдөр буюу дөрөвдүгээр сарын нэгэнд Сөүл-Улаанбаатар чиглэлийн тусгай үүргийн онгоц 19:30 цагт “Буянт-Ухаа” олон улсын нисэх буудалд газардлаа.

Тус нислэгээр нийт 156 иргэн ирсэн бөгөөд иргэдийг “Кемпински”, “Туушин”, “Зүчи”, “Кентавр”, “Мөнххустай” зочид буудалд тусгаарлалаа гэж УОК-ын Шуурхай штабаас мэдээллээ.

Categories
мэдээ нийгэм цаг-үе

Улсын хэмжээнд 323690 иргэнийг вакцинжуулалтад хамруулжээ

Монгол Улсын хэмжээнд өчигдөр 12240 иргэн, дархлаажуулалт эхэлснээс хойш нийт 323690 иргэнийг вакцинжуулалтад хамруулаад байна.

No description available.

Categories
мэдээ улс-төр цаг-үе

Ерөнхий сайд Нийслэлийн нийтийн тээврийн үйл ажиллагаатай танилцаж байна

Монгол Улсын Ерөнхий сайд Л.Оюун-Эрдэнэ болон Нийслэлийн Засаг дарга бөгөөд Улаанбаатар хотын захирагч Сумъяабазар нар Нийслэлийн нийтийн тээврийн үйл ажиллагаатай танилцаж байна.

Энэ үеэр Ерөнхий сайд Л.Оюун-Эрдэнэ “Сул зогсож байгаа автобуснуудаа эргэлтэд оруул. Энэ зүйлийг, Засгийн шийдвэрийг дагахгүй байгаа төрийн албан хаагч байж болохгүй. Шаардлагатай бол ажлаас нь чөлөөл” гэв.

Зорчигч тээврийн нэгтгэл нь ээлжийн жолооч нартай, нэг жолооч нь өдрийн найман цагаар ажилладаг. Одоогоор парк шинэчилэлт хийхээс гадна засварын баазуудаа шинэчлэх хэрэгтэй байна гэж албанынхан хэллээ.

“Богд хаан” төмөр замыг барих ажлын хэсэг гарсан бөгөөд уг төмөр замаар Railbus явуулах саналтай байгаагаа Ерөнхий сайд онцоллоо.