Нийслэлийн лавлагаа, мэдээллийн 1800-1200 тусгай дугаарт гуравдугаар сарын 16-ны өдөр иргэдээс нийт 349 дуудлага ирлээ. Нийт дуудлагын хүлээлгийн дундаж хугацаа 13 секунд, иргэнтэй ярьсан дундаж хугацаа 1.38 минут байна.

Иргэдээс ирүүлсэн дээрх дуудлагын 116 буюу 33.2 хувийг машин ачилт, 57 буюу 16.3 хувийг төрийн байгууллагын үйлчилгээ, хаяг, утас, байршлын талаарх асуулт эзэлсэн байна.

Нийслэлийн лавлагаа, мэдээллийн 1800-1200 тусгай дугаарт иргэдээс коронавирусийн эсрэг вакцинтай холбоотой асуулт хамгийн их ирж байна. Иймээс иргэдийн түгээмэл асууж байгаа асуултад хариулт өгье.

–Хүүхдэд коронавирусийн эсрэг вакцин хийх үү?

-Үгүй. Хүүхдэд вакциныг хэрхэн хийх талаар эмнэлзүйн туршилт судалгаанууд хийгдэж эхлээд байна.

–Вакцин хийлгэснээс халдвар аваад дархлаа тогтоосон нь илүү сайн биш үү?

-Үгүй. Халдвар аваад эдгэрсний дараа хүний биед тодорхой хэмжээний эсрэг бие үүсэх бөгөөд энэ дархлаа хэр удаан хугацаанд тогтвортой хамгаалах нь тодорхойгүй. Харин вакцинаар үүсэх дархлаа нь илүү найдвартай, аюулгүй. Мөн халдвар аваад хүмүүс хүндээр өвдөх, эдгэрсний дараа зарим шинж тэмдэг удаан хугацаанд үргэлжилдэг зэрэг хор уршигтай.

–Яагаад хоёр удаагийн тун хийлгэх ёстой вэ?

-Эхний тунг хийлгэсний дараа хүний дархлааны систем вирусийг таних чадвартай болдог. Гэхдээ хангалттай дархлаа тогтоогүй байдаг. Харин хоёр дахь тунг хийлгэсний дараа дархлааны хариу урвал улам хүчтэй болгодог. Тиймээс маш сайн дархлаатай болж, халдвараас сэргийлэхийн тулд хоёр тун хийлгэх ёстой.

–Вакцин эхний тун болон хоёр дахь тунд өөр өөр вакцин хийлгэж болох уу?

-Хоёр тун нэг ижил вакцин байх ёстой.

НИЙСЛЭЛИЙН ҮЙЛЧИЛГЭЭНИЙ НЭГДСЭН ТӨВ

Корпорэйт зочид буудалд тусгаарлалтад байсан 39 настай иргэн өнгөрсөн шөнө 23 цагийн үед буудлын цонхоор үсэрч амь насаа алдсан хэрэг гарчээ. Тус зочид буудалд чартер нислэгээр ирсэн иргэдийг тусгаарласан бөгөөд тухайн иргэн энэ сарын 12-ны өдөр Сөүл-Улаанбаатар чиглэлийн тусгай үүргийн нислэгээр ирсэн байжээ.

Энэ талаар ЦЕГ-ын Хэвлэл мэдээлэл олон нийттэй харилцах төвийн дарга Б.Баатархүү “Цагдаагийн байгууллагаас тусгаарлан ажиглах байрнуудын гадна орчны хамгаалалтыг зохион байгуулж байгаа. Бид нар гаднаас хүн нэвтрүүлэхгүй, дотроос хүн гаргахгүй байх ажлыг гүйцэтгэж байгаа. Нас барсан иргэний хувьд урьдчилсан үзлэгээр цонхоороо хөшиг буулгаж, буух гэсэн оролдого хийсэн байж болзошгүй нөхцөл байдал тогтоогдсон. Энэ бол эцсийн дүгнэлт биш. Мөрдөн шалгах ажиллагаа хийгдэнэ” хэмээн хэллэ

Монгол Улсын Их Хурлын гишүүн, Аюулгүй байдал, гадаад бодлогын байнгын хорооны дарга Б.Баттөмөр Кувейт Улсаас Монгол Улсад суугаа Онц бөгөөд Бүрэн эрхт Элчин сайд Мухаммад Аль-Мутайриг өнөөдөр (2021.03.17) хүлээн авч уулзаж, хоёр талын хамтын ажиллагааны талаар санал солилцов.

Хоёр орны хооронд дипломат харилцаа тогтоосны 45 жилийн ой өнгөрөгч онд тохиосон бөгөөд худалдаа, эдийн засаг, хүмүүнлэгийн бүхий л салбарт, түүний дотор парламентын хамтын ажиллагаа хөгжиж байгаад сэтгэл хангалуун байгаагаа УИХ-ын Аюулгүй байдал, гадаад бодлогын байнгын хорооны дарга Б.Баттөмөр, Элчин сайд Мухаммад Аль-Мутайри нар тэмдэглэв.

Байнгын хорооны дарга Б.Баттөмөр хамтарсан төсөл, хөтөлбөр хэрэгжүүлэх, худалдаа эдийн засгийн хамтын ажиллагааг улам өргөжүүлэх, хөрөнгө оруулалтыг нэмэгдүүлэх нь чухал байгааг онцолж, тухайлбал, Монголын бараа бүтээгдэхүүнийг Кувейт болон булангийн орнуудын зах зээлд гаргах, аялал жуулчлалыг хөгжүүлэх чиглэлд анхаарч ажиллахыг Элчин сайдаас хүслээ.

Монгол Улс, Кувейт Улстай тогтоосон хамтын ажиллагаандаа өндөр ач холбогдол өгдөг. Кувейт Улсын буцалтгүй тусламжаар хэрэгжүүлж буй төсөл хөтөлбөрүүд хуваарийн дагуу үргэлжилж байна. Тухайлбал, Кувейт Улсын Засгийн газраас Түлэнхийн төв эмнэлгийн барилгын ажлын гүйцэтгэлд 8 сая ам.доллар, Өндөрхаан нисэх онгоцны буудлыг шинэчлэх төсөлд 3.5 сая ам.долларын буцалтгүй тусламжийг үзүүлсэн. Мөн Кувейтийн сан Өндөрхаан-Норовлин-Дадал чиглэлийн авто замын төслийн ТЭЗҮ-ийг боловсруулахад зориулж 500 орчим мянган ам.долларын буцалтгүй тусламж үзүүлэх шийдвэрийг гаргасанд талархалтай байгаагаа тэрбээр илэрхийлэв.

Хоёр орны хувьд худалдаа, эдийн засаг, аялал жуулчлал гээд олон салбарт хамтран ажиллах өргөн боломж бий. Дипломат харилцаа тогтоосны 45 жилийн ойн хүрээнд олон үйл ажиллагаа зохион байгуулахаар төлөвлөсөн боловч цар тахлын нөхцөл байдлын улмаас зарим ажлууд хойшлогдсон. Аялал жуулчлал болон агаарын харилцааны төсөл, хөтөлбөрүүд яриа хэлэлцээрийн шатанд явж байгааг ноён Элчин сайд Мухаммад Аль-Мутайри хэллээ.

Уулзалтаар талууд хоёр орны харилцааг бүхий л салбарт дээшлүүлэхийн төлөө идэвх чармайлт гарган ажиллахаа нотлов гэж УИХ-ын Хэвлэл мэдээлэл, олон нийттэй харилцах хэлтсээс мэдээлэв.

Сонгинохайрхан дүүргийн Засаг дарга Н.Алтаншагай дүүргийн нийгмийн даатгалын хэлтэст ажиллалаа. Энэ жил нийгмийн даатгалын системийн хэмжээнд “Эерэг хандлага цахим хөгжүүлэлтийн жил” болгон зарласан. Нийгмийн даатгалын Ерөнхий газар, Хөдөлмөр нийгмийн хамгааллын яамнаас нийгмийн даатгал, тэтгэврийн дэвтрийг цахим хэлбэрт шилжүүлсэн. Тиймээс дүүргийн Засаг дарга цахим шилжилтийн ажил дүүргийн хэмжээнд үе шаттайгаар хэрхэн хэрэгжиж буй талаар болон дүүргийн Нийгмийн даатгалын хэлтсийн ажлын байрны орчин нөхцөлтэй танилцав.

Баянзүрх дүүргийн 26 дугаар хорооны нутаг дэвсгэрт коронавируст халдвар голомтлон тархах эрсдэл үүссэн тул өнөөдрөөс (2021.03.17) эхлэн гуравдугаар сарын 21-ний өдрийн 23:00 цаг хүртэл 5 хоногийн хугацаатай хатуу хөл хорио тогтоосон билээ.

Хөл хорио тогтоосон Баянзүрх дүүргийн 26-р хороо Засаг даргагүй байгаа аж. Энэ талаар Баянзүрх дүүргийн Засаг дарга Засаг дарга Н.Баярмөнх “БЗД-ийн 26-р хороон дарга тав хоногийн өмнө ажлаасаа чөлөөлөгдөх хүсэлт өгсөн. 26 дугаар хороо одоогоор Засаг даргагүй байна. Гэхдээ хорооны байранд Мэргэжлийн хяналт, цагдаа, эрүүл мэндийн байгууллагын төлөөллөөс бүрдсэн Түр штаб ажиллан, хөл хорио тогтоох үйл ажиллагааг хэвийн явуулж, иргэдтэй холбоотой ажиллаж байна. Төрийн ажил хэвийн үргэлжилж байгаа” гэсэн тайлбар өгөөд байна.

Баянзүрх дүүргийн 26-р хороонд тогтоосон тав хоногийн хязгаарлалтын хугацаанд тухайн хорооны авто замын хөдөлгөөнийг бүрэн хязгаарлах тул иргэд та бүхэн бусад авто замыг сонгож, хөдөлгөөнд оролцохыг Тээврийн цагдаагийн газраас анхааруулж байна.

Эрүүл мэндийн яамнаас коронавируст халдварын нөхцөл байдлын талаар мэдээллийг өгч байна. /2021.03.17/

Коронавирусийн хөнгөн хэлбэрээр өвчилсөн иргэдийг өнөөдрөөс эхлээд гэрээр эмчлэх төлөвлөгөө хэрэгжиж эхэлж байна гэв. Нийт өвчлөгсдийн 80-90 хувь нь хөнгөн хэлбэрээр өвдөж байна. Хөнгөн хэлбэрээр өвчлөгсдийг 10-14 хоногийн хугацаанд эмчлэхэд хэрхэн өөрчлөлт гарч байгаа вэ гэсэн судалгааг өнгөрсөн хугацаанд хийж, хуримтлуулсан. Хөнгөн хэлбэрийн тохиолдлуудаас маш цөөн тохиолдол нь хүндэрч байгаа. Иргэдийг гэрээр эмчлэхдээ тухайн хүний гэрийн орчин нөхцлийг анхаарч үзнэ. Ахмад настай иргэд, хууч өвчтэй хүмүүс, бага насны хүүхдүүд тухайн гэрт байдаг бол өвчтэй иргэнийг эмнэлэгт хэвтүүлэн эмчлэх аж.

Халдвар их тархсан тохиолдолд яах вэ гэдэг талаас яах вэ гэдэг талаас өчигдөр Шадар сайдтай ярилцсан. Өнөөдрийн байдлаар орны тоо, эмч нарын хүрэлцээ дутагдсан зүйл байхгүй. Одоогийн нөхцөл байдлаар халдварыг хяналтаасаа бүр алдсан зүйл бол байхгүй гэсэн мэдээллийг өглөө.