Month: March 2021

Монгол цэргийн өдөр, Орчин цагийн Зэвсэгт хүчин үүсэн байгуулагдсаны 100 жилийн ойг тохиолдуулан эрхэлсэн албандаа амжилт гаргасан зарим алба хаагчдад Шадар сайдын нэрэмжит шагнал болон цол гардууллаа.

Монгол Улсын Шадар сайдын 2021 оны 03 дугаар сарын 12-ны өдрийн 21 дүгээр тушаалаар ОБЕГ-ын Гамшгийн шуурхай удирдлагын газрын хэлтсийн дарга, дэд хурандаа Л.Тамир, Гал түймэртэй тэмцэх газрын ахлах мэргэжилтэн, дэд хурандаа Н.Хишигбаатар, Гамшиг судлалын хүрээлэнгийн эрдэм шинжилгээний ажилтан, хошууч Ч.Мэндэлмаа, мөн хүрээлэнгийн лабораторийн техникч, ахлагч Отгон-Очирын Баттулга нарыг Онцгой байдлын албаны “Тэргүүний ажилтан” тэмдгээр шагналаа.

Харин Онцгой байдлын ерөнхий газрын даргын 2021 оны 03 дугаар сарын 18-ны өдрийн Б/234 дүгээр тушаалаар:

Дэд хурандаа цолоор, ОБЕГ-ын Гамшгийн шуурхай удирдлагын газрын ахлах мэргэжилтэн, хошууч Р.Батсайхан,

Хошууч цолоор, ОБЕГ-ын дэргэдэх Гамшиг судлалын хүрээлэнгийн эрдэм шинжилгээний ажилтан, ахмад С.Солонго,

Ахмад цолоор, Шуурхай удирдлага, зарлан мэдээллийн мэргэжилтэн, ахлах дэслэгч П.Үүрцайх, ОБЕГ-ын дэргэдэх 115 дугаар ангийн мэргэжилтэн, ахлах дэслэгч Н.Сайнжаргал, ДХИС-ийн Ахлагчийн сургуулийн багш, ахлах дэслэгч С. Мөнгөншагай нарыг,

Ахлах дэслэгч цолоор, ОБЕГ-ын Захиргааны удирдлагын газрын архив, нууцын эрхлэгч, дэслэгч Т.Мөнхчимэг,

Дэслэгч цолоор, Улсын Онцгой комиссын мэргэжилтэн Ж.Бундхорол, ОБЕГ-ын Гамшгаас урьдчилан сэргийлэх газрын мэргэжилтэн, ахлах ахлагч Б.Должинхорол, Шуурхай удирдлага, зарлан мэдээллийн төвийн мэргэжилтэн, ахлагч О.Цэдэндулам нарыг,

Дэд ахлагч цолоор, Шуурхай удирдлагын зарлан мэдээллийн төвийн Холбоо, зарлан мэдээлэл хариуцсан оператор Ү.Энхгэрэл нарыг тус тус шагналаа гэж Онцгой байдлын ерөнхий газраас мэдээллээ.

Оюутолгой компанийн нэг ажилтнаас коронавирусийн халдвар илэрсэн. Мөн нэг иргэн халдвар авсан байж болзошгүй сэжигтэй тохиолдол илрээд байгаа.

Иймд Өмнөговь аймагт тус уурхайн ажилчдыг шинжилгээнд хамруулах болон тандалт судалгааны ажил эхлээд байгаа билээ. Энэ талаарх мэдээллийг тус аймгийн Эрүүл мэндийн газраас өглөө.

Өмнөговь аймгийн Эрүүл мэндийн газрын Халдварт өвчний асуудал хариуцсан мэргэжилтэн Б.Бямбажав “Коронавирусийн халдварын голомтот бүс нутгаас хөдөө орон нутаг руу халдвар зөөвөрлөгдөж эхэлсэн. Энэ дагуу манай аймгагт хэд хэдэн тохиолдол бүртгэгдээд байна. Тодруулбал, “Оюутолгой” компанид коронавирусээр өвчилсөн иргэний ойрын хавьтал ирсэн тул шинжилгээ авч Улаанбаатар хот руу ХӨСҮТ-д сорьцыг хүргүүлсэн. Шинжилгээний хариугаар халдвар авсан нь батлагдсан. Үүнтэй холбоотойгоор орон нутаг болон Оюутолгой компанид тандалт судалгааны ажил хийж эхлээд байна. Ялангуяа, тус компанид ээлж солигдож ирсэн ажилчдыг халдвартай иргэний хавьтал эсэхийг тодорхойлж, гэрийн тусгаарлалтад ажиглаж, шинжилгээ авч байна.

2021 он гарсаар Өмнөговь аймгийн хэмжээнд 18550 хүнд коронавирусийн шинжилгээ хийсэн. Үүнээс 1831 нь Оюутолгой компанийн ажилтан байна. 

Эдгээр иргэнээс коронавирусийн халдвар илрээгүй. Харин сүүлийн 24 цагт аймгийн хэмжээнд 704 хүнийг шинжилгээнд хамруулсан. Мөн “Оюутолгой” батлагдсан тохиолдлын ойрын хавьтал 334 хүнийг тусаарласан. Эдгээр иргэнээс шинжилгээ авахад халдвар илрээгүй байна. Халдвар авсан байж болзошгүй иргэн тус компанийн гүний уурхайд ажилладаг бөгөөд тухайн иргэнээс гадна 3000 гаруй иргэн ажилладаг юм билээ. Иймд нэн тэргүүнд шинжилгээнд хамруулах шаардлагатай иргэдийг тандан судалж байна. Аймгийн хэмжээнд өдөрт 1200 сорьцод шинжилгээ хийх хүчин чадалтай лаборатори бий” гэв.

“Оюутолгой” компанийн ажилчдыг энэ сарын 18, 19-нд шинжилгээнд хамруулах юм байна. Харин халдвар авсан нь батлагдсан иргэн ХӨСҮТ-д хэвтэн эмчлүүлж байгаа бөгөөд биеийн байдал дунд зэрэг байгаа талаар Өмнөговь аймгийн онцгой комиссоос мэдээлсэн билээ. Түүнчлэн тус уурхайд коронавирусийн халдвар илэрсэнтэй холбоотойгоор нүүрс тээвэрлэлтийн үйл ажиллагаа буурах биг хандлагатай байгаа бөгөөд Гашуунсухайт-Ганцмод боомтоор нэвтрэх ачаа тээвэрт БНХАУ-ын тал хязгаарлалт тогтоогоод байгаа билээ.

Богино хугацаанд их мөнгөтэй болох гэсэн эсвэл мөнгөө өсгөх үүднээс сайтар нягтлалгүйгээр санхүүгийн харилцаанд орсноос хохирогч болсон иргэд, аж ахуйн нэгжийн тоо сүүлийн үед эрс ихэссэн.

Тэр тусмаа сүүлийн үед залилан мэхлэгч этгээдүүд иргэдийг итгэн үнэмшүүлэхийн тулд улам бүр боловсронгуй, нарийн арга ашиглах болсон. Жишээлбэл, хөрөнгө оруулалт мэтээр өнгөлөн “гоёсон” залилан нь иргэдэд бодит ажил хэрэг мэт төөрөгдөл үүсгэж мөнгө, цаг хугацаагаа алдах эрсдэлийг нэмэгдүүлж байна.Иймд, Санхүүгийн зохицуулах хорооноос иргэдийг залилан мэхлэх гэмт хэрэгт өртөхөөс урьдчилан сэргийлэх зорилгоор дараах зөвлөмжийг хүргүүлж байна. Энэ төрлийн гэмт хэргийг ялган танихад дараах сэжүүрүүд Танд тус болно.

Маш бага хэмжээний эрсдэл /эрсдэлгүй хөрөнгө оруулалт/-д өндөр өгөөж санал болгох:

Эрсдэл, өгөөж хоорондоо шууд хамааралтай үзүүлэлтүүд бөгөөд танд санал болгож буй өгөөж ихсэх тусам эрсдэл дагаад өсдөг. Иймээс өндөр өгөөж санал болгосон хөрөнгө оруулалтаас болгоомжилж дахин нэг нягтлаарай. Ингэхдээ тухайн хөрөнгө оруулалт нь эрсдэл багатай эсвэл эрсдэлгүй үед хэрхэн ийм өндөр өгөөж бий болгосныг шалгахаас гадна ижил төрлийн бусад хөрөнгө оруулалт ямар эрсдэлийн түвшинд хэдий хэмжээний өгөөж хүртээж буйг харьцуулан дүгнэх хэрэгтэй. Залилан үйлдэгчид хөрөнгө оруулагчдыг татах зорилгоор ихэвчлэн өндөр өгөөж санал болгодгийг мартаж болохгүй.

Шахалт үзүүлэх тактик:

• Хугацаа дуусах дөхөж байна. Амжиж хөрөнгө оруулаарай!
• Эхний 50 хөрөнгө оруулагчдад зориулсан тусгай санал. Энэхүү боломжийг бүү алдаарай!
• 2000 гаруй хүн хөрөнгө оруулалт хийгээд байна. Та юу хүлээж байна?
• Зөвхөн өнөөдөр хөрөнгө оруулбал тусгай хөнгөлөлт эдлэнэ.

Энэ мэт хязгаарлагдмал саналуудаас эхлээд хугацаатай бэлэг, хөнгөлөлт үзүүлэх зэрэг аргын гол нууц нь иргэдийг мөнгөө юу ч бодолгүйгээр, тооцоолол хийх хугацаа олголгүйгээр хөрөнгө оруулахад яаруулж буй хэрэг. Ер нь шахалтын иймэрхүү арга барилыг хөрөнгө оруулалтын залилан мэхлэх гэмт хэрэгт л голлож ашигладаг. Иймээс иргэн Та хөрөнгө оруулалт хийхийн өмнө эхлээд юунд хөрөнгө оруулалт хийж байгаагаа анхаарч нэг шалга. Хэрэв итгэлгүй байвал сэтгэл хөдлөлөөр хандсан хөрөнгө оруулалтаас шууд татгалзаарай.

Хуурамч бичиг, баримт:

Залилан мэхлэгчид таны итгэлийг олж авахын тулд өөрсдийгөө найдвартай, олон жилийн туршлагатай, удаа дараалан шагнал хүртсэн, хөрөнгө оруулалтаасаа их хэмжээний ашиг хүртдэг хэмээн итгүүлэхээр хуурамч бичиг, баримт ашиглан ятгаж магадгүй. Мөн өмнөх хөрөнгө оруулалтад нь сэтгэл хангалуун байгаа хэрэглэгч, үйлчлүүлэгчдийн сэтгэгдлээр итгэл, үнэмшлийг тань дээшлүүлэхийг оролдоно. Иймд, хөндлөнгийн буюу гуравдагч этгээдийн баталгаажуулалтын тусламжтайгаар үнэн бодит мэдээллээр таныг хангаж байгаа эсэхийг сайтар нягтлаарай.

Зөвшөөрөлтэй этгээд мөн үү…

Зарим хөрөнгө оруулалтын залилан нь таныг төөрөгдүүлэхийн тулд холбогдох байгууллагуудын зохицуултад байдаг гэж итгүүлэх аргыг ашиглаж магадгүй. Ийм тохиолдолд холбогдох зохицуулагч байгууллагаас нь лавлагаа хүсэх, цахим хуудсанд байршуулсан тусгай зөвшөөрөлтэй этгээдүүдийн жагсаалтыг шалгах хэрэгтэй. Санхүүгийн зохицуулах хороо нь үйлчлүүлэгчдийн эрх ашгийг хамгаалах зорилгоор зөвхөн мэргэжлийн оролцогчдод санхүүгийн зах зээлд үйл ажиллагаа эрхлэх тусгай зөвшөөрлийг олгодог. Иймд зохицуулалтгүй, зөвшөөрөлгүй хууль бусаар үйл ажиллагаа эрхэлж буй этгээдийн залилан мэхлэх үйл ажиллагааны хохирогч болохоос сэргийлж сайтар нягтлахыг дахин зөвлөе.

САНХҮҮГИЙН ЗОХИЦУУЛАХ ХОРОО

Улаанбаатар хотын Гэр хорооллыг хөгжүүлэх хөрөнгө оруулалтыг дэмжих хөтөлбөр төслийн захирал Ж.Сандагсүрэн өчигдөр төслийн I үе шат болох Баянхошуу болон Сэлбэ дэд төвд ажиллалаа.

Энэ хүрээнд төслийн зохицуулагч Д.Авирмэд болон инженерийн баг Баянхошуу, Сэлбэ дэд төвүүдэд хийж гүйцэтгэсэн бүтээн байгуулалтын ажлууд болон төсөл хэрэгжсэнээр гарч буй үр дүнгүүдийн талаар танилцуулсан юм.

Төслийн захирал Ж.Сандагсүрэн эхлээд Баянхошуу дэд төвд барьсан Дулааны даралт өргөх насос станцын барилга угсралтын ажлын гүйцэтгэлтэй танилцав.

Баянхошуу дэд төвийг төвлөрсөн дулаан хангамжид холбох ажлын хүрээнд Дулааны 11И магистрал шугам шинэчлэл өргөтгөлийн ажил, Дулааны даралт өргөх насос станц болон 3.3 км шинэ шугамыг ус дулаан дамжуулах нийт 14 төвийн хамт бүрэн хийж гүйцэтгэсэн.

Одоогоор Баянхошуу дэд төвд нийт 27 аж ахуйн нэгжийг төвийн төвлөрсөн дулаанд холбоод байгаа бөгөөд цаашид 20 мянган айл өрхийг төвлөрсөн дулаан хангамжид холбох боломж бүрдсэн юм.

Үүний дараа Баянхошуу, Сэлбэ дэд төвүүдийн нийгмийн барилга байгууламжууд болох 240 хүүхдийн цэцэрлэг, нэг цэгийн үйлчилгээ бүхий Бизнес инкубатор сургалтын төв, Мэдээлэл холбооны нэгдсэн үйлчилгээний төв, Орлогод нийцсэн загвар орон сууц, үерийн далан суваг, тохижилт, автозам, гүүр, 28 мВт хүчин чадалтай Дулааны станц, 1000 шоо метр хүчин чадалтай Усан сан болон цахилгааны 35/10кВт станцын барилга угсралтын ажлуудтай танилцлаа. Цаашид төслийн I үе шат бүрэн хэрэгжиж дууссанаар иргэдэд хүрэх үр дүнг нарийн тодорхойлон, улам илүү хүртээмжтэй байх тал дээр түлхүү ажиллах чиглэл өгөв.

Баянхошуу, Сэлбэ дэд төвийн бүтээн байгуулалтын барилга угсралтын ажлуудыг энэ оны зургадугаар сард бүрэн дуусгахаар төлөвлөн ажиллаж байгаа юм.

НЗДТГ-ЫН ХЭВЛЭЛ МЭДЭЭЛЭЛТЭЙ ХАРИЛЦАХ ХЭЛТЭС

Үндэсний Статистикийн Хорооноос гаргасан зарим сонирхолтой статистик мэдээллийг хүргэе.

– 2020 оны байдлаар Монгол улсад оршин суугаа хүн амын 1 603.3 мянга нь эрэгтэйчүүд байдаг. Тэдний 67 хувь нь хотод, 33 хувь нь хөдөө амьдардаг.

– Эрэгтэйчүүд дунджаар 29 насандаа гэрлэдэг бөгөөд тэдний 0.9 хувь нь өрх толгойлсон, дундаж наслалт 66 байна.

– Эрэгтэйчүүдийн 594.9 мянга нь ажилтай, сарын дундаж цалин 1 395.9 мянган төгрөг.