Завхан аймгийн Улиастай сумын эрсдэл өндөртэй, ойрын хавьтлын иргэдэд түргэвчилсэн оношлуураар шинжилгээ хийхэд нэг иргэний хариу эерэг гарчээ.
Иймд аймгийн Нэгдсэн эмнэлгийн Халдвартын тасагт тусгаарлаж, дараагийн шатны арга хэмжээг авч эхэлсэн байна. Эцсийн хариу PCR шинжилгээгээр баталгаажна.
Эх сурвалж: Завхан аймгийн шуурхай штаб
Монгол Улсын Ерөнхийлөгч Халтмаагийн Баттулга өнөөдөр УИХ-ын дарга Г.Занданшатарт “Арга хэмжээ авах тухай” албан бичиг хүргүүлж, Үндсэн хуулийн цэцийн гишүүнийг чөлөөлж, дараагийн гишүүнийг томилох тухай УИХ-ын шийдвэрт бүхэлд нь хориг тавихаар шийдвэрлэснээ мэдэгдлээ.
“Монгол Улсын Үндсэн хуулийн Гучин гуравдугаар зүйлийн 1 дэх хэсгийн 1-д заасан “Улсын Их Хурлын баталсан хууль, бусад шийдвэрт бүхэлд нь буюу зарим хэсэгт нь хориг тавих…” бүрэн эрхийнхээ хүрээнд Монгол Улсын Үндсэн хуулийн цэцийн гишүүнийг чөлөөлж, дараагийн гишүүнийг томилох тухай Улсын Их Хурлын шийдвэрт бүхэлд нь хориг тавихаар шийдвэрлэснээ үүгээр мэдэгдэж байна.
Монгол Улсын Их Хурлын тухай хуулийн 5 дугаар зүйлийн 5.1 дэх хэсэгт “Улсын Их Хурал бүрэн эрхийнхээ хүрээнд хууль, Улсын Их Хурлын бусад шийдвэр гаргах бөгөөд Улсын Их Хурлын бусад шийдвэр тогтоолын хэлбэртэй байна” гэж заасан бол Монгол Улсын Их Хурлын чуулганы хуралдааны дэгийн тухай хуулийн 45 дугаар зүйлийн 45.4 дэх хэсэгт “Энэ хуулийн 45.3-т заасны дагуу ёсчилсон хууль, тогтоолыг Тамгын газар ажлын 2 өдрийн дотор Монгол Улсын Ерөнхийлөгчийн Тамгын газарт илгээнэ”, 45 дугаар зүйлийн 45.5 дахь хэсэгт “Энэ хуулийн 45.4-т заасны дагуу илгээсэн хууль, тогтоолыг Монгол Улсын Ерөнхийлөгчийн Тамгын газар хүлээж авсан өдрөөс хойш ажлын 5 өдөрт багтаан Монгол Улсын Ерөнхийлөгч тухайн хууль, тогтоолыг бүхэлд нь буюу түүний зарим хэсэгт хориг тавих эсэх асуудлыг шийдвэрлэнэ” гэж тус тус хуульчилжээ.
Түүнчлэн Монгол Улсын Үндсэн хуулийн Жаран тавдугаар зүйлийн 1 дэх хэсэгт “Үндсэн хуулийн цэц есөн гишүүнээс бүрдэнэ. Тэдгээрийн гурвыг Улсын Их Хурал, гурвыг Ерөнхийлөгч, гурвыг Улсын дээд шүүхийн санал болгосноор Улсын Их Хурал зургаан жилийн хугацаагаар томилно” гэж заасан бөгөөд бүрэн эрхийн хугацаа нь дууссан Монгол Улсын Үндсэн хуулийн цэцийн гишүүн Д.Солонго, Ш.Цогтоо нарыг Улсын дээд шүүхээс санал болгож томилуулсан тул тухайн шүүх дараагийн гишүүнийг санал болгохдоо хэнийг нь чөлөөлөхийг Улсын Их Хуралд тодорхой мэдэгдэх, улс төрийн үзэмжээр хандахаас сэргийлэх, улмаар улс орны тусгаар тогтнол, иргэдийн эрх, эрх чөлөөний баталгаа болсон Үндсэн хуулийн цэцийг хууль зүйн зөрчил, маргаангүйгээр байгуулах шаардлагатай гэж үзэж байна.
Энэ хүрээнд Улсын дээд шүүхээс тодруулга авахаар хандаад байна. Иймд Монгол Улсын Ерөнхийлөгчийн үндсэн бүрэн эрхэд хүндэтгэлтэй хандаж, холбогдох арга хэмжээг авна уу” гэжээ.
УИХ-ын чуулганы хуралдаанаар Байнгын хорооны бүрэлдэхүүнд өөрчлөлт оруулах тухай асуудлыг хэлэлцлээ.
Тодруулбал, УИХ-ын гишүүн Ж.Эрдэнэбатыг Үйлдвэржилтийн байнгын хорооны гишүүнээр томилжээ. УИХ-ын гишүүн бүр мэргэшлийнхээ дагуу 1-2 байнгын хороонд харьяалагддаг. Энэ дагуу өнгөрсөн долоо хоногт УИХ-ын гишүүний тангараг өргөсөн Ж.Эрдэнэбатыг тус байнгын хорооны гишүүнээр томилсон байна.
Мэргэжлийн сумогийн харү башёгийн 12 дахь өдрийн барилдаанууд өчигдөр/2021.03.25/ Токио хотын Рёогокү Кокүгикан ордонд явагдлаа.
Одоогоор башёг тэргүүлж буй комүсүби Такаяасү энэ өдөр Хокүтофүжиг давж, арван даваа, хоёр унаатай болон башёг ганцаараа тэргүүлсэн хэвээр үлдлээ. Харин түүний араас удаалж буй озэки Асанояама комүсүби Митакэүмиг давж, есөн даваа, гурван унаатай болжээ. Тэгвэл озэки цолоо эргүүлэн авах хүсэлтэй Тэрүнофүжи Г.Ган-Эрдэнэ энэ өдөр тун чухал барилдааныг хийсэн. Тэрбээр Тамаваши Б.Мөнх-Оргилыг давж, есөн даваа, гурван унаатай болон озэки цолны болзлоо хангалаа. Түүний хувьд сүүлийн гурван башё дараалан нийт 33 даваа авав. Гэхдээ сүмогийн холбоо есөн даваатай хүнд озэки цол өгөх хүсэлгүй байдаг тул Тэрүнофүжи Г.Ган-Эрдэнэ үлдсэн гурван өдрийн барилдаанаасаа дахин нэг даваа авч, 10 даваатай болох шаардлагатай.
Бусад Монгол бөхчүүдийн хувьд өчигдөр Кирибаяама Б.Лхагвасүрэн Оношог, Ичиножо А.Ичинноров Мидорифүжиг тус тус давсан бол Хошорюү С.Бямбасүрэн Акисэяамад, Чиёошома Г.Мөнхсайхан Котоновакад тус тус өвдөг шорооджээ.
Нийслэлийн хүн амын хаврын улирлын махны хангамж, нийлүүлэлт, үнийг тогтвортой байлгах зорилгоор арилжааны банкны шаардлага хангасан 17 аж ахуйн нэгж нийт 11 мянган тонн махны нөөцийг бүрдүүлээд байна.
Нөөцийн махыг 2021 оны гуравдугаар сарын 25-ны өдрөөс эхлэн хүнсний 400 гаруй дэлгүүрээр худалдан борлуулах бэлтгэл ажлыг Улаанбаатар хотын Захирагчийн ажлын албатай хамтран зохион байгуулж байна.
Энэ жилийн хувьд цар тахлын нөхцөл байдалтай уялдуулан иргэдийн орлогыг бууруулахгүй байх зорилгоор 2020 онд худалдаалж байсан үнээр буюу хонины ястай махыг килограмм нь 6700 төгрөг, үхрийн ястай мах 7700 төгрөг, ямааны мах 6200 төгрөгөөр борлуулах нөхцөлийг бүрдүүллээ.
Махны чанарын хувьд холбогдох стандартын шаардлагыг хангасан мах бэлтгэсэн. Цаашид нөөцийн махны худалдан борлуулах үйл ажиллагаанд Улаанбаатар хотын Захирагчийн ажлын алба хяналт тавьж ажиллана.
Иргэд та бүхэн нөөцийн мах худалдан авахдаа заавал НӨАТ-ын баримтаа хэвлүүлэн авах хэрэгтэй болохыг Хүнс, хөдөө аж ахуй, хөнгөн үйлдвэрийн яамнаас зөвлөж байна.
Монгол Улсын Үндсэн хуулийн гучин гуравдугаар зүйлийн 1 дэх хэсгийн 8 дахь заалт, Монгол Улсын Ерөнхийлөгчийн тухай хуулийн 15 дугаар зүйлийн 15.2, Эрүүгийн хуулийн 6.14 дүгээр зүйлийн 1 дэх хэсгийг тус тус үндэслэн Монгол Улсын Ерөнхийлөгч Халтмаагийн Баттулга уучлал үзүүлэх тухай зарлиг гаргалаа.
Гуравдугаар сарын наймны Олон улсын эмэгтэйчүүдийн эрхийг хамгаалах өдрийг тохиолдуулан анх удаа хөнгөн гэмт хэрэг үйлдсэн нярай болон олон хүүхэдтэй 21 ээжид, мөн гуравдугаар сарын 22-ны Наурызын баярыг тохиолдуулан зурагт, зуух, гар утас хулгайлсан гэх мэт анх удаа хөнгөн гэмт хэрэг үйлдсэн нэр бүхий казах иргэдэд уучлал үзүүлж, эдлээгүй үлдсэн хорих ялаас бүрэн чөлөөлөв.
Төрийн банк нь технологийн шинэчлэлт хийж байгаа тул өнөөдөр орой буюу 2021 оны 03 дугаар сарын 26-наас 27-ны өдөрт шилжих шөнийн 00:00 цагаас эхлэн 2021 оны 03 дугаар сарын 28-ны өдрийн 12:00 цагийн хүртэл /36 цаг хүртэлх хугацаанд/ Төрийн банкны цахим банк, АТМ, салбар нэгжүүд ажиллахгүй болохыг анхааруулж байна.
Технологийн шинэчлэлт хийгдсэнээр харилцагчийн мэдээллийн аюулгүй байдал сайжирч, дансны дугаарлалт олон улсын нэгдсэн дугаарлалт/IBAN/-д шилжих бөгөөд цаашид системийн найдвартай, тасралтгүй байдлыг хангах боломжийг бүрдүүлэх юм.
Бэлчээрийн менежментийг сайжруулах, хөдөөгийн эдийн засгийн уур амьсгалын өөрчлөлтөд мэдрэг байдлыг бууруулах чиглэлээр Монгол Улсын Засгийн газраас авч хэрэгжүүлж буй ажлыг дэмжих Азийн Хөгжлийн Банк (АХБ)-ны хөтөлбөрт нэмэлт болгож “Уур амьсгалын ногоон сан” (УАНС) 175 сая ам.долларын санхүүжилт баталжээ.
УАНС-ийн 130 сая ам.долларын хөнгөлөлттэй зээл, 45 сая ам.долларын буцалтгүй тусламжаас бүрдэх уг санхүүжилт нь нийт 560 сая ам.долларын төсөвтэй “Аймаг, сумын бүсчилсэн, ногоон хөгжлийн хөрөнгө оруулалтын хөтөлбөр”-ийг хэрэгжүүлэх нэмэлт эх үүсвэр болох юм. АХБ, Европын Хөрөнгө Оруулалтын Банк, Европын Холбоо болон хувийн хэвшил хамтран санхүүжүүлэх энэхүү хөтөлбөрийн хүрээнд нутаг дэвсгэрийн ногоон хөгжил, хот-хөдөөг холбон хөгжүүлэх загварыг бий болгож, улмаар аймаг, сумын төвийг тогтвортой, уур амьсгалын өөрчлөлтөд дасан зохицсон, нүүрстөрөгчийг ихээр шингээх чадвартай бэлчээрийн менежментийг дэмжих хөдөө аж ахуйн ногоон бизнесийн төв болгох зорилготой. Уг санхүүжилт нь АХБ-ны Монгол Улсад хэрэгжих төсөл, хөтөлбөрт УАНС-аас олгож буй хоёр дахь санхүүжилт болж байна.
АХБ-ны Зүүн Азийн газрын дарга Жеймс Линч “УАНС-аас дэмжлэг үзүүлж, хамтран санхүүжүүлж байгаад бид маш их талархаж байна. АХБ, УАНС-гийн хамтын түншлэл нь уур амьсгалын өөрчлөлтийн нөлөөллийг бууруулах, дасан зохицох чиглэлээр манай банкнаас гаргаж буй тууштай хүчин зүтгэлд түлхэц болж байгаа. Энэхүү хөтөлбөр нь Монгол Улсын өмнө тулгарч буй олон талт сорилтуудыг нутаг дэвсгэрийн хөгжлийн тэнцвэрийг хангах, Улаанбаатар хот руу чиглэсэн шилжилт хөдөлгөөнийг бууруулах, нүүрстөрөгчийг ихээр шингээдэг байгалийн нөөцийг нөхөн сэргээх замаар шийдвэрлэх цогц шийдлүүдийг санал болгох юм” хэмээн онцлон тэмдэглэв.
“Аймаг, сумын бүсчилсэн, ногоон хөгжлийн хөрөнгө оруулалтын хөтөлбөр” нь тогтвортой мал аж ахуйн салбарын менежментийг бэхжүүлж, бэлчээрийн доройтлыг арилган, ногоон эдийн засгийн төрөлжилтийг дэмжинэ. Мөн тогтвортой мал аж ахуйг нүүрстөрөгчийн ялгарал багатай, уур амьсгалын өөрчлөлтөд дасан зохицсон бизнесийн хөгжилтэй уялдуулж, орон нутагт хөдөө аж ахуйн бизнесийн нэмүү өртгийн сүлжээг бэхжүүлэхийн зэрэгцээ эмзэг бүлгийн малчдыг чадавхжуулан, бэлчээрийн менежментийн арга туршлагыг нь сайжруулж, ногоон ажлын байр бий болгох замаар КОВИД-19 цар тахлаас үүдэлтэй эдийн засгийн хямралыг даван туулахад нь дэмжлэг үзүүлнэ. Эхний ээлжинд Монгол Улсын баруун бүсийн 3 аймагт хэрэгжих тус хөтөлбөр нь уур амьсгалын санхүүжилт болон хувийн хэвшлийн хөрөнгө оруулалтын механизмыг дэмжих бөгөөд тэдгээрийг цаашид улсын хэмжээнд дэлгэрүүлэн хэрэгжүүлэх зорилготой юм.
УАНС нь тус санхүүжилтийг Удирдах зөвлөлийн 26 дугаар хурлаараа баталсан байна. Бүгд Найрамдах Солонгос Улсын Сонгдо хотод төвтэй УАНС нь хөгжиж буй орнуудад уур амьсгалын өөрчлөлтийн сорилтуудаа шийдвэрлэхэд нь туслах зорилготой байгуулагдсан дэлхийн хэмжээний сан юм. УАНС нь 2015 оноос хойш АХБ-ны 11 төсөлд нийт 648 сая ам.долларын санхүүжилт олгоод байна.
Хэнтий аймгийн Шуурхай штабын бүрэлдэхүүн өнөөдөр /2021.03.26/ Бор-Өндөр, Бор-Өндөр УБҮ-ийн удирдлагууд, хил залгаа Дархан, Баянмөнх сумын шуурхай штабын бүрэлдэхүүнтэй цахимаар хуралдаж, Бор-Өндөр суманд үүссэн нөхцөл байдлын талаар хэлэлцэж, аймгийн Онцгой комиссыг өнөөдөр 14:00 цагт хуралдуулахаар боллоо.
Нөхцөл байдлыг тодруулбал, Бор-Өндөр сумын урд байрлах Иргэний нисэхийн ерөнхий газрын харъяа Радио лакоторын станцад ээлж солигдохоор PCR болон Түргэвчилсэн оношлуураар шинжилгээ өгч Улаанбаатар хотоос ирсэн ажилтнуудаас өчигдөр /2021.03.25/ өглөө түргэвчилсэн оношлуураар шинжилгээ авахад “эерэг” хариу гарч “сэжигтэй тохиолдол” бүртгэгдсэн тул PCR-ийн шинжилгээг авч, онош тодруулах, ойрын хавьтал, маршрутыг тогтоох судалгааны баг, хариу арга хэмжээ авах баг ажиллаж байна. Тус сумын Онцгой комиссын шийдвэрээр 24 цагийн хөл хорио тогтоогоод байгаа аж.
Түргэвчилсэн оношлуураар “эерэг” хариу гарсан нь эцсийн хариу, Covid-19 батлагдлаа гэсэн үг биш юм. Бор-Өндөр суманд гарсан сэжигтэй тохиолдлоос болон хавьтлуудаас PCR шинжилгээ авч байгаа бөгөөд өнөөдөр аймгийн Нэгдсэн эмнэлгийн лабораторид хариу гарна гэж эх сурвалж мэдэгдлээ.
Иргэд та бүхэн шаардлагагүй бол хөл хөдөлгөөнтэй газраар зорчихгүй гэртээ байх, ариун цэврийн дэглэм сахиж, гэртээ ариутгал халдваргүйтгэл хийх, олон нийтийн газраар зорчихдоо амны хаалт тогтмол зүүж зай барихыг аймгийн Шуурхай штабаас анхааруулж байна.