Month: March 2021

Ардчилсан намын Дотоод сонгуулийн хорооноос өнөөдөр /2021.03.27/ цаг үеийн асуудлаар мэдээлэл хийлээ.

Энэ үеэр тус намын Дотоод сонгуулийн хорооны дарга И.Мөнхжаргал мэдээлэхдээ “Сонгинохайрхан дүүрэгт АН-ын гишүүдийн бүртгэлийн асуудлаар сошиал хэрэгслүүдээр ташаа мэдээллүүд гарч байна. Монгол Улсын Үндсэн хуульд зааснаар Монгол Улсын иргэн улсынхаа нутаг дэвсгэрт чөлөөтэй зорчих, түр буюу байнгын оршин суух газраа чөлөөтэй сонгох эрхтэй байдаг. Тухайн оршин суугаа газрын намын гишүүнчлэлийн харьяагаар бүртгэгддэг. Сонгинохайрхан дүүрэг нь хүн ам нягтаршсан бүс нутаг. Үүнтэй холбоотойгоор АН-ын гишүүдийн бүртгэлийн асуудлууд яригддаг. Эдгээр нь цэвэр АН-ын дотоод асуудал. Ардчилсан нам орон нутгийн сонгууль, УИХ-ын ээлжит сонгуульд оролцсон. Ийм ч учраас Ардчилсан намын гишүүдийн бүртгэлд “царцаа нүүх” боломж байхгүй. Энэ нь албан ёсоор Сонгинохайрхан дүүрэг дээр бүртгэлтэй гишүүдийн мэдээлэл дээр оршин суугаа газраа харьяалалтай байгаа.

Хоёрдугаарт, нэр дэвшигч О.Амартүвшинтэй холбоотой мэдээлэл гарсан. Энэ нь цэвэр гүжирдлэгийн шинжтэй ташаа мэдээлэл юм. О.Амартүвшин нь 2016 оны тавдугаар сарын 7-ны өдөр АН-д элссэн. Гэтэл МАН-ын хүн мэтээр мэдээлэл тарааж байгаа нь сонгуультай холбоотой асуудал. АН-ын даргын сонгуульд нэр дэвшигчидтэй холбоотой ташаа мэдээллийг сөрөг хүчний зүгээс зохион байгуулалттайгаар тарааж байна гэж бид хардаж байна” гэлээ.

Тэрбээр “Covid-19-ийн халдварын тархалт нэмэгдэж байгаатай холбоотойгоор Улаан түвшинд шилжсэн Архангай, Баянхонгор, Булган, Увс, Дархан-Уул, Дорноговь, Өвөрхангай, Завхан, Төв, Хөвсгөл, Хэнтий зэрэг аймгуудад урьдчилсан санал хураалтыг эхлүүллээ. Маргааш бусад аймаг, дүүргүүдэд санал хураалт эхэлнэ. Санал хураалтын процесст хүмүүсийг олноор цуглуулах ажиллагаа болохгүй. Цагийн хуваарийн дагуу дуудагдаж ирсэн намын гишүүд саналаа өгнө. Санал тоолох ажиллагаа маргааш нэг цагт явагдана. Битүүмжлээд, лац ломбоо тавина. Санал хураалтыг урьдчилж тоолохгүй” гэдгийг хэлсэн юм.

2021 оны гуравдугаар сарын 26-нд нийслэлд дархлаажуулалтын 41 цэгт 96 багийн 674 эмч, ажилтан ажиллалаа. Нийслэлд 12.133 хүнийг коронавирусний вакцинд хамруулснаар нийт 260.961 хүнийг вакцинжуулалтад хамруулаад байна.

Мөн Өмнөговь аймгийн 10 суманд 430 иргэнийг вакцинжуулснаар ,нийт 8439 хүнийг дархлаажууллаа.

Монгол Улсын хэмжээнд гуравдугаар сарын 26-нд 12.563 хүн, нийт 269.400 хүнийг дархлаажуулалтад хамруулаад байна.

Коронавируст халдварын улмаас Монгол Улс төдийгүй дэлхий нийтээр цусны хомсдолд ороод байна. Дэлхий даяар донорын тоо 20-30 хувиар буурсан гэсэн судалгаа гарсан аж.

Тиймээс ДЭМБ-аас вакцин тариулсан бол 30 хоногийн дараагаас цусаа өгөх зөвлөмжийг гаргажээ. Үүнтэй холбоотойгоор цусны нөөц эрс багасах болсон тул ДЭМБ-аас өгч буй зөвлөмжөө өөрчилж 30 хоногийн хугацааг 28 болгон багасгаж, вакцин тариулсны дараах хариу урвал хөнгөн, дунд зэрэг илэрсэн бол 14 хоногийн дараагаас цусаа өгч болно гэж зөвлөөд байна.

Хэрэв бүх хүн вакцинд хамрагдчихвал цусаа өгөх доноргүй болж нөөцгүй болно гэж манай Цус сэлбэлт судлалын үндэсний төвөөс анхааруулжээ.

Мөн иргэн, аж ахуй нэгж, албан байгууллагад вакцинд хамрагдахаасаа өмнө цусаа өгч амьдрал бэлэглэхийг уриалжээ.

Өчигдөр /2021.03.26/ өглөөний 09:00 цагийн байдлаар батлагдсан коронавирусний 437 тохиолдлын 117 нь нэг газраас буюу ШШГЕГ-ын урьдчилан тусгаарлах байранд байсан хүмүүс гэдгийг Шадар сайд С.Амарсайхан хэлж байна. ШШГЕГ-ын урьдчилан тусгаарлах байранд байсан 285 иргэний 117-гоос нь халдвар илэрсэн аж.

Халдварын тоо огцом өссөн харагдаж буй ч нэг газраас, нэг дор олон тохиолдол илэрснийг анхаарч үзэх хэрэгтэйг тэрбээр хэлж байна. Гэхдээ эрсдэл маш өндөр байгаа энэ үед өвчлөлийн тоо огцом нэмэгдэж, хяналтаас гарвал хатуу хөл хориог дөрөвдүгээр сарын 5-ны өдөр гэлтгүй өнөө маргаашгүй тавихыг ч үгүйсгэхгүй гэв.

Сануулахад, Улаанбаатар төдийгүй орон нутагт халдварын тархалт нэмэгдэж байгаа тул УОК өчигдөр /2021.03.26/ хуралдан зарим шийдвэрийг гаргасан.

Нэгдүгээрт, Улаанбаатараас орон нутагт зорчих хөдөлгөөнийг 14 хоногийн хугацаанд бүрэн хориглох шийдвэр гаргаж байна. Хүнс шатахуун, эм эмнэлгийн хэрэгсэл, уул уурхайн бараа бүтээгдэхүүнээс бусад тохиолдолд хөдөлгөөнийг хориглоно гэсэн үг.

Хоёрдугаарт, халдварын тархалт өндөртэй байгаа Өмнөговь, Дорноговь, халдварын эрсдэл нэмэгдэж байгаа Архангай, Баянхонгор, Дархан-Уул, Дорноговь, Завхан, Төв, Хөвсгөл, Орхон, Хэнтий, Өвөрхангай, Увс аймгуудыг халдварын тархалтын “Улаан түвшин”-д гуравдугаар сарын 28-ны өдрийн 06:00 цагаас дөрөвдүгээр сарын 11-ний өдрийн 06:00 цаг хүртэлх хугацаанд шилжүүлэх шийдвэр гаргалаа.

Өнгөрсөн долоо хоногт Тээврийн цагдаагийн албаны жижүүрийн Шуурхай удирдлагын хэлтэст нийт 682 дуудлага мэдээлэл бүртгэгджээ. Үүнээс зам тээврийн ослын шинжтэй 504 дуудлага мэдээлэл ирсэн байна.

Бүртгэгдсэн ноцтой зам тээврийн ослын улмаас нийслэлд нэг, орон нутагт хоёр хүний амь нас хохирсон бол 10 хүн гэмтэж бэртжээ. Зам тээврийн ослын зургаа нь явган зорчигч мөргөж гэмтээсэн, гурав нь мөргөлдөх хэлбэрээр, нэг нь үл хөдлөх зүйл мөргөж, осолджээ.

Мөн алба хаагчдын хийсэн хяналт шалгалтын үеэр согтуугаар тээврийн хэрэгсэл жолоодсон нийт 229 зөрчил илрүүлсний 173 нийслэлд, 56 орон нутагт тус тус бүртгэгдэж хуулийн дагуу хариуцлага тооцсон байна. Бүртгэгдсэн ноцтой зам тээврийн осол, хэргээс дурьдвал,

Гуравдугаар сарын 22-ны өдрийн 22.00 цагийн орчимд Сонгинохайрхан дүүргийн 10 дугаар хороо Баянхошууны замд суудлын автомашины жолооч, явган зорчигч, бага насны хүүхдийг мөргөж амь насыг хохироосон хэрэг гарчээ.

Гуравдугаар сарын 23-ны өдрийн 13.00 цагийн орчимд Баянхонгор аймгийн Баян-Овоо сум хоёрдугаар баг “Нарны гүүр” гэх газар аймгийн төвөөс 36 км асфальтан замд суудлын автомашин онхолдож зорчигч гэмтэж, жолоочийн амь нас хохирсон байна.

ЭМЯ-аас коронавируст халдварын нөхцөл байдлын мэдээллийг хүргэж байна. /2021.03.27, 11:00 цаг/

Өнгөрсөн шөнө коронавирусний халдвартай 73 настай БНХАУ-ын иргэн Монгол Улсад нас баржээ. Ингэснээр Монгол Улсад коронавирусний халдвараар нас барсан хүний тоо 6 боллоо гэж ХӨСҮТ-ийн Дэд захирал Э.Тэмүүлэн мэдээллээ.

Сүүлийн 24 цагт 87 хүн эдгэрч, эмчлэгдсэн хүний тоо 4237 болжээ. 24 цагийн дотор шинээр бүртгэгдсэн 361 тохиолдол бүгд дотоодын халдвар байна. Үүнээс Улаанбаатар хотод 319 бүргэгдэж, нийслэлийн нийт өвчлөл 5606 болсон байна.