Month: January 2021

Японы Олон Улсын Хамтын Ажиллагааны Байгууллага /ЖАЙКА/ нь Монгол-Япон эмнэлэгт коронавируст халдвараас урьдчилан сэргийлэх, бэлэн байдлыг хангахад шаардлагатай халдвар хамгааллын хэрэгсэл, ариутгалын бодис зэргийг өнөөдөр хүлээлгэн өглөө. Энэхүү ажлыг цахимаар зохион байгуулсан юм. Уг тусламж нь Монголын иргэдийн эрүүл мэндийг хамгаалахад хувь нэмрээ оруулна гэж ЖАЙКА байгууллагынхан үзэж байна.

АШУҮИС-ийн Монгол-Япон эмнэлэг япон маягийн буюу өвчтөн төвтэй эрүүл мэндийн тусламж үйлчилгээ үзүүлэх, Монгол Улсын эрүүл мэндийн салбарын хүний нөөцийг бэлтгэх сургалт, судалгааны түшиц эмнэлэг болох зорилгоор Япон улсын Засгийн газрын буцалтгүй тусламжаар 2019 оноос иргэддээ үйлчилж эхэлсэн. Монгол Улсад коронавирусний халдвар нэмэгдэж байгаа энэ үед тус эмнэлэг халдвар хамгааллын дэглэмийг сайтар хангасны үндсэн дээр нийслэлийн иргэддээ тусламж үйлчилгээ үзүүлж байгаа юм.

Хармагтайн бүлэг орд дахь төрийн мэдлийн алтны ордод 313 тэрбум төгрөгийн хөрөнгө оруулалт шаардлагатай гэсэн ТЭЗҮ боловсруулагджээ. ТЭЗҮ-ийг энэ сард батлуулна гэж ” “Эрдэнэс Силвер Ресурс” компаниас мэдээллээ.

Дөрөвдүгээр сараас ордын ашиглалтыг эхлүүлэхээр төлөвлөжээ. Хармагтайн орд дахь “Хойд бүргэд” алтны орд нь дэд бүтэц, усны нөөцөд ойрхон тул ашиглахад бүрэн бэлтгэгдсэн.

Ордын ашиглалтыг урьдчилсан байдлаар 11 жил гэж тооцсон. Нийт 313 тэрбум төгрөгийн хөрөнгө оруулалт хийж, 407.9 тэрбумын ашиг өгөх тооцоо гарсан гэж мэдэгдлээ.

Хармагтайн ордын 53,1 тонн алтыг Улсын нөөцөд бүртгэсэн талаар засгаас шинэ оны өмнө нь мэдээлж байсан. “Геологийн судалгааны төв” ТӨҮГ-ын геолог хайгуулын хэсэг 2018-2019 онуудад Хармагтайн ордод эрэл-үнэлгээний ажлыг “Хойд Бүргэд” хүдрийн биет, хувирлын бүсийн хэмжээнд хийсэн бөгөөд гадаргад илэрсэн алтны агуулгыг гүнд нь үнэлэх, 1975-1976 оны зураглалын ажил, 1978-1980 оны Хармагтайн ангийн эрэл, эрэл-үнэлгээний ажлуудын үед судлаачдын тогтоосон таамаглалыг баталгаажуулах зорилгоор нийт 24 цооногийн өрөмдлөг, геологийн ажлуудыг хийж гүйцэтгэжээ.

“Овоот хяр” хайгуулын тусгай зөвшөөрлийн талбайн зөвхөн нэг хэсэг болох “Хойд бүргэд” биетэд явуулсан нарийвчилсан хайгуулын ажлын үр дүнг нэгтгэж ордын исэлдсэн болон үндсэн хүдрийн биетүүдийн нөөцийн хүрээ, хязгаарт бодит (B) болон боломжит (С) зэргүүдээр 53.14 тн алтны нөөцийг нарийвчлан тогтоож, Монгол Улсын эрдэнэсийн санд бүртгүүлсэн. Цаашид Овоот хярын хүдэржилтийн бүсийн бусад хүдрийн биетүүдийн хүрээнд нарийвчилсан хайгуулын ажлыг өндөр бүтээмж, шахуу төлөвлөгөөтэй үргэлжлүүлэн хийж алт болон бусад ашигт эрдэсийн нөөцийг бүрэн гүйцэд тогтоох, уг нөөцийг ашиглах техник технологийн сонголтыг хийж, ТЭЗҮ-ийг боловсруулан эдийн засгийн эргэлтэд оруулна гэж УУХҮЯ-наас мэдэгдэж байсан юм.

Хөвсгөлийн Улсын тусгай хамгаалалтай газрын Онцгой бүс Чандмань Өндөр сумын Доншиг гэх газраас хууль бусаар мод бэлтгэсэн, Өвөрхангай аймагийн Бат-Өлзий сумын 4 дүгээр багийн нутаг дэвсгэрээс хууль бусаар нарс модыг зохих зөвшөөрөлгүйгээр бэлтгэн, тээвэрлэж явсныг тус тус илрүүлэн шалгаж байна гэж экологийн цагдаагийн албанаас мэдээллээ.

Монгол Улсын Эрүүгийн хуулийн тусгай ангийн 24.6 дугаар зүйл. Хууль бусаар мод бэлтгэх

1.Зөвшөөрөлгүйгээр ойд мод бэлтгэсэн, гарал үүслийн гэрчилгээгүйгээр мод, модон материалыг бэлтгэсэн, тээвэрлэсэн, худалдсан, худалдан авсан бол дөрвөн зуун тавин нэгжээс таван мянга дөрвөн зуун нэгжтэй тэнцэх хэмжээний төгрөгөөр торгох, эсхүл хоёр зуун дөчин цагаас долоон зуун хорин цаг хүртэл хугацаагаар нийтэд тустай ажил хийлгэх, эсхүл нэг сараас нэг жил хүртэл хугацаагаар зорчих эрхийг хязгаарлах ял шийтгэнэ.

2.Энэ гэмт хэргийг:
2.1.байнга тогтвортой;
2.2.бүлэглэж;
2.3.улсын тусгай хамгаалалттай газар нутгийн ойд;
2.4.төрийн албан хаагч үйлдсэн бол нэг жилээс таван жил хүртэл хугацаагаар зорчих эрхийг хязгаарлах, эсхүл нэг жилээс таван жил хүртэл хугацаагаар хорих ял шийтгэнэ.
3.Энэ гэмт хэргийг хуулийн этгээдийн нэрийн өмнөөс, хуулийн этгээдийн ашиг сонирхлын төлөө үйлдсэн бол хуулийн этгээдийг тодорхой төрлийн үйл ажиллагаа явуулах эрх хасаж хорин мянган нэгжээс нэг зуун хорин мянган нэгжтэй тэнцэх хэмжээний төгрөгөөр торгох ял шийтгэнэ гэж заасан байдаг.

Монгол Улсын Засгийн газар, Эрүүл мэндийн яам 2020 оны 7 дугаар сараас эхлэн КОВИД-19 халдвараас сэргийлэх вакцинд хүн амыг хамруулах талаар бүх чиглэлээр идэвхтэй ажиллаж эхэлсэн. Үүний нэг нь КОВАКС олон талт хамтын ажиллагааны механизм бөгөөд Монгол Улс уг механизмд хамрагдан хөгжлийн албан ёсны туслалцааны хүрээнд КОВИД-19 халдвараас сэргийлэх аюулгүй, үр дүнтэй вакцин авах хүсэл сонирхолтой байгаагаа 2020 оны 7 дугаар сарын 16-ны өдөр албан ёсоор илэрхийлсэн.

Улмаар “КОВИД-19 халдварын эсрэг вакцин хүлээн авах, түгээх, дархлаажуулалтыг зохион байгуулах үндэсний төлөвлөгөө”-ний хүрээнд хүн амын 60 хувийг вакцинжуулалтад хамруулахаас 20 хувийг КОВАКС-аас авахаар төлөвлөсөн байгаа.

2021 оны нэгдүгээр сарын 8-ны өдөр Эрүүл мэндийн яам, ДЭМБ, НҮБ-ын Хүүхдийн сан, Дэлхийн банк, Азийн хөгжлийн банк зэрэг олон улсын хамтрагч талуудтайгаа хамтран вакцин хүлээн авахад шаардлагатай бэлэн байдлыг үнэлэх нэгдсэн VIRAT/VRAF 2.0 аргачлалын дагуу өөрийн улсын вакцинжуулалтын бэлэн байдлыг цогц байдлаар үнэлсэн болно. Энэхүү үнэлгээний дүн Монгол Улс аль ч төрлийн вакциныг хүлээн авч хэрэглэх бэлэн байдлыг хангасан болохыг харуулсан.

Улаанбаатар-Дархан чиглэлийн авто замыг дөрвөн эгнээ болгох ажлын хоёрдугаар шатны ажил ирэх гуравдугаар сард эхэлнэ. Тус чиглэлийн замын тодорхой хэсгийг өнгөрсөн арваннэгдүгээр сарын 6-нд нээж байсан билээ. Нийт 202.42 км тавигдах тус замыг Европын сэргээн босголт хөгжлийн банкны зээлийн хөрөнгөөр барих юм. Энэ талаар Зам тээвэр, хөгжлийн сайд Л.Халтар холбогдох аймгийн удирдлагуудтай цахимаар холбогдон үүрэг чиглэл өгсөн байна.

Дархан-Уул аймгийн тухайд замын ажилтай холбогдуулан 10 газрын тавыг нь одоогоор чөлөөлөөд байгаа аж. Цаашид Хонгор сумын цэцэрлэгт хүрээлэнгийн блокон хашаа, Дархан хаалга, зам дагуух мод, “Дархан дулааны цахилгаан станц” ТӨХК-ийн тунгаасан усны шугам хоолой, Магнай, Шунхлай түгээх станцыг нүүлгэн шилжүүлэх ажлыг ирэх хоёрдугаар сарын 20-ны дотор хийхээр төлөвлөжээ. Газар чөлөөлөлтийг хийснээр Улаанбаатар-Дархан чиглэлийн авто замын хоёрдугаар шатны ажил эхлэх боломж бүрдэх юм.

Эрүүл мэндийн яамны 16:00 цагийн мэдээллээр судлаач Л.Дэлгэрзул амны хаалтын хэрэглээ, сонголт болон анхаарах зүйлсийн талаар зөвлөгөө өглөө.

Тэрбээр “Вирус буюу дэлхий дахинд цар тахал хэлбэрээр тараад буй коронавирус нь 0.1 мкм хэмжээтэй. Энэ нь элсний нэг ширхгээс 900 дахин бага гэсэн үг юм. Тиймээс агаар дээр хөвж буй хатуу болон шингэн биетүүдэд наалдах боломжтой байдаг. Өөрөөр хэлбэл, Улаанбаатар хотын агаарын бохирдолд ихээр байдаг PМ2.5 тоосонцор дээр коронавирус наалдах боломжтой гэсэн үг. Нэг PM2.5 тоосонцорт 250 ширхэг орчим РНХ агуулсан вирус наалдах боломжтой байдаг.

Шүлсний дуслууд дээр ч энэ хэмжээний вирус наалдаж, хүний бие рүү нэвтэрдэг бол хүний халдвар авах босго тун 200-500 ширхэг PHX вирус байдаг. Тиймээс бид амны хаалт зүүж заавал халдвараас хамгаалах хэрэгтэй” хэмээн хэллээ.

Өөрөөр хэлбэл, 200-500 ширхэг коронавирус агуулсан тоосонцор буюу 250 ширхэг РНХ агуулсан вирус тээсэн 2 ширхэг тоосонцор хүний биед нэвтэрвэл өвчлөх боломжтой гэсэн үг юм. “Одоогоор мэс заслын болон N95 амны хаалтууд түгээмэл байна. Хэрвээ та мэс заслын амны хаалтыг зүүж байгаад ханиаж найтаавал таны шүлс цацагдах хэмжээ 0.5 метр байдаг бол N95 амны хаалттай ханиавал шүлс 0.1-0.25 метр дотор цацагддаг. Харин хүн огт амны хаалтгүй байвал халдвар 1.5-6 метр хүртэлх зайд шүлсээр үсэрч дамжих боломжтой. АНУ-ын Өвчний хяналтын төвөөс гаргасан судалгаагаар мэс заслын болон N95 амны хаалтын хамгаалах чадварын талаар мэдээлжээ.

Тодруулбал, N95 амны хаалт нь мэс заслынхаа битүүмжлэл сайтай бөгөөд шүүлтүүрийн хувьд ч N95 амны хаалт нарийн ширхэглэлт тоосонцроос хамгаалах чадвар нь мэс заслын амны хаалтаас илүү гэсэн байна. Түүнээс гадна мэс заслын амны хаалтыг 2-3 цаг хэрэглээд зайлшгүй хаях шаардлагатай бол N95 амны хаалтыг өөрөө бохирлогдох, норох, гаднын шингэн цацагдах хүртэл хэрэглэж болдог юм. Мөн эрүүл мэндийн байгууллага зэрэг эрсдэлтэй орчинд ажиллаж буй хүмүүс аль болох боломжийнхоо хэрээр N95, N97, N100 зэрэг амны хаалтыг зүүхийг зөвлөж байна. Гэхдээ коронавирусийн халдвартай үед хавхлагатай амны хаалт зүүхгүй байхыг сануулж байна. Учир нь хавхлагатай N95 амны хаалтын хавхлагаар дамжиж вирус гадагшлах боломжтой.

Мөн том ширхэгт тоосонцор дээр наалдсан вирус 2 метрт хүрэхгүйгээр газарт унана. Харин бүр жижиг хэмжээтэй тоосонцор дээр вирус наалдсан бол агаарын хөдөлгөөнөөр тархдаг учир гараар хийсэн амны хаалтууд жижиг тоосонцроос хамгаалах боломжгүйг санах хэрэгтэй.

“Хэрэглэсэн амны хаалтаа нугалж, боогоод хогийн сав руу хийж байгаа нь маш буруу”

Хамгийн гол нь амны хаалт зүүх нь чухал ч зүүх хэрэглээ нь илүү чухал гэдгийг сануулъя.

Иймд,

• Амны хаалтын битүүмжлэлийг маш сайн хангах шаардлагатай,
• Амны хаалтын гадаргууд огтхон ч хүрч болохгүй,
• Амны хаалтыг 2-3 цаг зүүгээд солих,
• Хэрэглэсэн амны хаалтаа сэнжнээс нь барьж байгаа тагтай хогийн саванд шууд хаях ёстой.

Иргэдийн дунд маш буруу ойлголт байгаа нь хэрэглэсэн амны хаалтаа нугалж боогоод хогийн сав руу хийж байна.

Яг ДЭМБ-аас өгсөн зөвлөмжийн дагуу сэнжнээс нь барьж байгаад гадаргууд нь огтхон ч хүрэхгүйгээр тагтай хогийн сав руу шууд хийх нь зөв” хэмээн зөвлөлөө.

Нийслэлийн хэмжээнд цэргийн бүртгэл энэ сарын 13-наас 27-ныг дуустал нутгийн захиргааны байгууллагын анхан шатны нэгж болох хорооны Засаг даргын ажлын байранд явагдана.

Онцлоход “Ковид-19” цар тахал гарсантай холбогдуулан иргэдийг олноор нь цуглуулахгүйгээр цаасан суурьтай цэргийн бүртгэлийг явуулах тул иргэд оршин суугаа хороондоо очиж бүртгүүлэх шаардлагагүй, 2021 оны цэргийн бүртгэл хийлгэсэнд тооцно.

Шаардлагатай мэдээллийг оршин суух дүүргийнхээ Цэргийн штаб болон хороодын утас руу залгаж авах бүрэн боломжтой.

• 2.2. Цэргийн бүртгэл нь нэрийн ба тоон гэсэн төрөлтэй байна
• 2.2.1. Нэрийн бүртгэлийг сум /баг/, хороо
• 2.2.2. Тоон бүртгэлийг цэргийн штаб хөтөлнө.