Month: January 2021

Нийтийн орон сууцанд амьдардаг оршин суугчдын хувьд бусдын амгалан тайван байдлыг алдагдуулбал Зөрчлийн тухай хуулиар иргэнийг 100 мянга, аж ахуй нэгжийг нэг сая хүртэлх төгрөгөөр торгох заалттай. Өөрөөр хэлбэл шөнийн 22:00-06:00 цагийн хооронд шашны зан үйл хийх, бөөлөх, барилгын хана нурааж чимээ гаргах, хүүхэд үймүүлэх, архидан согтуурах бусдын амгалан тайван байдлыг алдагдуулбал дээрх торгуулийг Цагдаагийн байгууллагаас ногдуулах аж.

Түүнчлэн хүүхэд үймүүлж бусдын амгалан тайван байдалд халдаж байгаа дуудлага мэдээлэл цагдаагийн байгууллага олноор ирдэг байна. Тэгэхдээ хүүхэдтэй холбоотой дуудлага мэдээлэл дээр цагдаагийн байгууллага торгууль ногдуулдаггүй харин сануулга өгөөд явдаг талаар цагдаагийн газраас мэдээлэл өглөө.

Цагдаагийн байгууллагаас 2021 он гарсаар өнөөдрийн хугацаанд дээрх зөрчлөөр 334 хүнийг нийт 33 сая төгрөгөөр торгосон байна.

НӨАТ-ын азтан шалгаруулах сугалаа шударга явагдаж байна уу, үнэхээр IT ажилтан 36 удаа азтан болсон уу, эсвэл түүний хамаарал бүхий хүн байнга азтан болж байна уу гэх мэт иргэдээс ирүүлж буй гомдолд тулгуурлаж хяналт, шалгалтын ажил эхлүүллээ. Өнөөдөр супер азтан шалгаруулдаг бөмбөлөгт асуудал байгаа эсэхийг тодруулж, бүгд нэг жинтэй байна уу, үүнийг хэрхэн хянадаг вэ гэдгийг “Стандарт хэмжил зүйн газар”, “Харилцаа холбоо мэдээллийн технологийн газар”, “Гааль, татвар, санхүүгийн мэдээллийн технологийн төв”- ийн холбогдох албаны хүмүүстэй хамт шалгалаа. Тус бөмбөлгүүд “Боловсрол суваг” телевизийн студид лацтай хадгалагддаг бөгөөд эхний хяналт, шалгалтаар бөмбөлгийн жинд өөрчлөлт ороогүй байна. Харин маргааш супер азтан болсон хүмүүс, IT ажилтан болон түүний хамаарал бүхий хүмүүсээс азтан тодорсон эсэхийг шалгах болно. Бид хяналт, шалгалтын үйл явцыг та бүхэнд хүргэхээс гадна, дүгнэлтийг эргэн мэдээлэх болно хэмээн ШӨХТГ-аас мэдээллээ.

Дорноговь аймгийн Замын-Үүд сумыг коронавирусийн халдваргүй “Эрүүл бүс” болсныг өнөөдөр (2021.01.14) Улсын онцгой комиссоос зарлалаа. Улсын онцгой комиссын мэдэгдэлд “Дорноговь аймгийн Замын-Үүд суманд коронавируст халдварын сүүлийн тохиолдол бүртгэгдсэнээс хойш өнөөдрийн байдлаар 30 хоносон тул “Эрүүл бүс” болгон зарлаж тус сумаас зорчих иргэдийн асуумж, шаардлагатай тохиолдолд түргэвчилсэн оношлуураар шинжилгээ авч нийслэл болон бусад аймаг, орон нутагт нэвтрүүлнэ үү” хэмээжээ.

Дорноговь аймгийн хэмжээнд нийт 32 тохиолдол бүртгэгдсэн бөгөөд үүний 27 нь Замын-Үүд сумаас илрээд байв.

Дундговь аймгийн Гамшгийн эрсдэлийг бууруулах орон нутгийн зөвлөлийн 2021 оны анхдугаар хуралдаан болж, ажлын төлөвлөгөөгөө баталлаа.

Гамшгийн эрсдэлийг бууруулах орон нутгийн зөвлөлийг аймгийн Иргэдийн төлөөлөгчдийн хурлын дарга тэргүүлж, орон нутгийн гамшгийн эрсдэлийг бууруулах чиглэлээр бодлогын зөвлөмж гаргах, төрийн захиргааны байгууллагуудад чиглэл өгөх, дэмжлэг үзүүлж салбар дундын зохицуулалтыг хангах үндсэн үүрэгтэйгээр ажилладаг юм.

Энэ онд гамшгийн эрсдэлийн үнэлгээг нарийвчлан хийх, малчдын амьжиргааг дэмжих, бэлчээрийн ургамал тариалах, коронавируст халдварын цар тахлаас урьдчилан сэргийлэх гэсэн чиглэлээр үйл ажиллагаа явуулна гэж Дундговь аймгийн Онцгой байдлын газраас мэдээллээ.

Нийслэлийн Баянзүрх дүүргийн 17-р хороо, Баянгол дүүргийн 4 дүгээр хороонд өнөө өглөөний 06.00 цагаас хэсэгчлэн хөл хорио тогтоож, хороодын иргэдийг тандалт, илрүүлгийн шинжилгээнд хамруулах ажлыг эхлүүллээ.

Шинжилгээг Баянзүрх дүүргийн 17 дугаар хороо нийт 10 цэгт зохион байгуулж байгаа бөгөөд Хорооны Иргэд нийтийн танхим, 79-р сургуулийн Ахлах сургууль 1-р байр, 021-р худаг, Өргөн гудамжны “Баян” дэлгүүр болон явуулын зургаан байршилд авч байна. 17 дугаар хороо гэр хорооллын бүс бөгөөд тус хороонд дөрвөн айлын голомттой 20 гаруй хүнээс коронавирус илэрсэн байна. Тандалт, илрүүлгийн шинжилгээг эмнэлгийн 129 ажилтан хийж байгаа бөгөөд сургуулийн багш, дүүргийн Иргэдийн төлөөлөгчдийн хурлын ажлын албаны ажилтнууд бүртгэлийг хийж байгаа юм.

Баянзүрх дүүргийн хэмжээнд лавлах мэдээллийн 1900-1063 утсыг ажиллуулж иргэдэд мэдээлэл зөвлөгөө өгч байгаа юм. Мөн энэхүү утсаар хүнс, түлшний туслалцаа авах хүсэлтэй иргэдийн хүсэлтийг хүлээн авч “Улаан загалмай” нийгэмлэгийн ажилтнууд тусламжийн бараа хүргэж өгч байгаа талаар Баянзүрх дүүргийн эрүүл мэндийн төвийн дарга Ж.Энхзул хэллээ.

Мөн өнөөдөр Баянгол дүүргийн дөрөвдүгээр хороонд хязгаарлалт тогтооосон. Тус хорооны нөхцөл байдлын талаар Баянгол дүүргийн эрүүл мэндийн төвийн дарга З.Балдандугар “4 дүгээр хороо нийт 14 мянга гаруй хүн амтай. Эдгээрээс 5000 гаруй иргэнийг 48 цагийн хугацаанд шинжилгээнд хамруулна. Хэсэгчилсэн хөл хорио тогтоосон 17-18 байр байна. Харин тусгаарлалтад ороогүй Баянгол дүүргийн иргэд нэг өрх, нэг иргэн шинжилгээнд хамрагдана. Энэ бүсэд хүнсний дэлгүүр, эмийн сан ажиллаж байна” хэмээлээ.