Month: January 2021

ЭМД-ын сангаас 141 ерөнхий нэршлийн болон 541 худалдааны нэршлийн эмэнд 30-70 хувийн хөнгөлөлт үзүүлнэ. “Эрүүл мэндийн даатгалын сангаас үнийн хөнгөлөлт олгох зайлшгүй шаардлагатай эмийн нэр, төрөл, үнийн дээд хязгаар, хөнгөлөлтийн хэмжээ”-ний ШИНЭЧЛЭСЭН жагсаалтыг та бүхэнд танилцуулж байна.

ШӨХТГ-аас НӨАТ-ын сугалаатай холбоотой хийж буй хяналт шалгалт үргэлжилж байна. Тус газраас шалгалтыг НӨАТ-ын мэдээлэл технологийн үйл ажиллагаа, сугалаагаар их хэмжээний мөнгө хожсон болон бага хэмжээний мөнгөн дүнгээр олон удаа азтан болсон тохиолдол гарсан эсэх гэсэн 3 чиглэлээр хийж байгааг ШӨХТГ-ын дарга Б.Бат-Эрдэнэ мэдэгдэж, энэ талын шалгалтаар НӨАТ-тай холбоотой асуудалд цэг тавина гэдгээ илэрхийлж байна.

ШӨХТГ-аас НӨАТ-тай холбоотой ажилладаг 170 орчим албан хаагчийг шалгаж байна. Мөн хуучин ажиллаж байсан 70 орчим хүн байгаа аж. НӨАТ-ын сугалаатай холбоотой гомдол мэдээлэл анх 2018 оны есдүгээр сард нэгэн иргэн 36 удаа азтан болсон талаар олон нийтийн сүлжээнд бичиж байжээ.

Мөн азтан тодруулах явцад ашигладаг бөмбөг нь хөнгөн байх тусам илүү хурдан дээш гарч ирдэг гэсэн хардлага, сэрдлэг 2016 оноос хойш байсаар байгаа аж. Тиймээс ШӨХТГ-аас НӨАТ-ын мэдээлэл технологийн ажилтнууд технологио ашиглан олон удаа азтан болж, хоёр удаа 20 сая төгрөг авч байсан уу гэдгийг шалгаж байгаагаа мэдэгдлээ.

Шалгалтыг цагдаагийн байгууллагатай хамртан хийж, Харилцаа холбоо, мэдээллийн технологийн газар (ХХМТГ), “Transparency International Mongolia” байгууллага болон иргэний төлөөлөл оролцож байна.

Нийслэлийн Засаг дарга бөгөөд Улаанбаатар хотын захирагч Д.Сумъяабазар өнөөдөр Япон Улсаас Монгол Улсад суугаа Онц бөгөөд бүрэн эрхт Элчин сайд Кобаяши Хироюкийг хүлээн авч уулзлаа.

Уулзалтын үеэр Засаг дарга Д.Сумъяабазар хоёр улсын хооронд хамтран хэрэгжүүлэх төсөл, хөтөлбөрийн тоо, төрлийг нэмэгдүүлэх хүсэлтэй байгаагаа уламжлав. Талууд Улаанбаатар хотын цаашдын хөгжлийн асуудлаар санал солилцож, тулгамдаж буй асуудлуудад Япон Улсын сайн туршлага, технологийг нэвтрүүлэх чиглэлд хамтран ажиллахад бэлэн буйгаа цохон тэмдэглэсэн юм. Улмаар Элчин сайдын зүгээс энэхүү саналыг дэмжиж ажиллахаа илэрхийлэв.

Уулзалтад Япон Улсын Элчин сайдын яамны Улс төрийн хэлтсийн дарга Кояма Исао, Нийслэлийн Зам, тээврийн асуудал хариуцсан төслүүдийн удирдагч Б.Одсүрэн, Нийслэлийн Засаг даргын Тамгын газрын Гадаад харилцаа, хамтын ажиллагааны хэлтсийн ахлах мэргэжилтэн Ө.Анузаяа нар байлцав.

Мөн талууд Ковид-19 цар тахлын үед Монгол Улсын Засгийн газар болон УОК-ын зүгээс гаргаж буй удирдамж, зөвлөмжийг чанд баримтлан хэрэгжүүлэхийг уриалж, уулзалтыг заавар, зөвлөмжийн дагуу зохион байгууллаа.

Эх сурвалж: Нийслэлийн ЗДТГ-ын Хэвлэл мэдээлэл, олон нийттэй харилцах хэлтэс

Баянгол дүүргийн 6-р хорооны 65, 43А, Puma-12 дугаар байрны хамгаалалтыг буулгажээ.

БГД-ийн 6-р хорооны “Puma-12”, 43А, 65 дугаар байрны оршин суугчдаас коронавируст “Ковид-19” халдвар илэрч, нэгдүгээр сарын 04-ний өдрөөс эхлэн тус байруудыг цагдаагийн албан хаагчид бүрэн хамгаалалтад авсан.

Тэгвэл өнөөдөр дээрх байруудын оршин суугчдаас гурван удаагийн PCR шинжилгээ авсан бөгөөд иргэдийн шинжилгээний хариу бүгд сөрөг гарч, хамгаалалтыг буулгасан байна. Тус байруудад ариутгал, халдваргүйжүүлэлт удахгүй хийгдэнэ гэдгийг БГД-ийн Онцгой комиссоос мэдээллэв.

Нийслэлийн Засаг Даргын нөөц хөрөнгөөр шийдвэрлэн нийслэлийн Аврах анги 105-д хүлээлгэн өгсөн “Старекс” автомашиныг алба хаагчид иж бүрэн тоноглож, аюулт үзэгдэл, техникийн холбогдолтой ослын дуудлагаар үүрэг гүйцэтгэхэд бэлэн болголоо.

Тус автомашиныг яаралтай түргэн тусламж үзүүлэх зориулалтаар тоноглосон бөгөөд суурин болон зөөврийн хүчилтөрөгчийн баллон, дамнуурга, эвхэгддэг дамнуурга, зүрхний цахилгаан массажны болон амьсгалын зам чөлөөлөх аппарат, вакум дамнуурга, хяналтын мониторинг, мөчдийн чигний иж бүрдэл, нурууны чиг, яаралтай түргэн тусламжийн иж бүрдлийн цүнх зэргийг байршуулан бэлэн байдлыг хангалаа гэж нийслэлийн Онцгой байдлын газраас мэдээллээ.

Өнөөдрийн байдлаар нийслэлд үйл ажиллагаа явуулж байгаа 136 мянга гаруй аж ахуйн нэгж өөрийн QR кодыг үүсгэсэн байна. Нэг сарын хугацаанд нийслэлийн 1 сая 463 мянга гаруй иргэн энэхүү QR кодыг уншуулжээ.

Ижил төрлийн худалдааны хоёр байгууллага дээр дүн шинжилгээ хийж үзэхэд нэг байгууллага нь 32 мянган удаа уншуулсан байхад нөгөөх нь ердөө 121 удаа уншуулсан тохиолдол илэрчээ. Энэ нь зарим байгууллага QR код уншилтад хариуцлагагүй хандаж байгааг харуулж байна хэмээн НЗДТГ-аас мэдээллээ.

Ерөнхий сайд асан Ж.Эрдэнэбат нарт холбогдох хэргийг хянан хэлэлцэх хуралдаан Улсын Дээд шүүхийн Эрүүгийн хэргийн танхимд эхэллээ. Шүүх хуралдааныг zoom апп ашиглан цахимаар хийж байгаа юм. Дээд шүүх уг хэргийг энэ сарын 8-ны өдөр хянан хэлэлцэхээр товлосон ч шүүгдэгч Д.Түвшинжаргалын өмгөөлөгч Б.Мөнхбат нь эрүүл мэндийн шалтгаанаар шүүх хуралдааныг хойшлуулах хүсэлт гаргаснаар хүсэлтийг хүлээн авч өнөөдөр болж байна.. Ерөнхий сайд асан Ж.Эрдэнэбатыг албан тушаалаа урвуулан ашигласан үндэслэлээр анхан болон давж заалдах шатны шүүхээс зургаан жилийн хорих ял оноож, төрийн албанд ажиллах эрхийг мөн зургаан жилээр хасах шийтгэл оногдуулсан юм. Харин шүүгдэгч нар шүүхийн шийдвэрийг хүлээн зөвшөөрөөгүй Дээд шатны шүүхэд гомдол гаргасан юм.