Month: January 2021

Монгол Улс Ази, Номхон Далайн Худалдааны хэлэлцээр (АНДХХ)-ийн долоо дахь албан ёсны гишүүн улс болсон. Энэ оны эхний өдрөөс энэ хэлэлцээр хэрэгжиж эхлээд байна. Хэлэлцээрийн хүрээнд, Монгол Улсаас БНХАУ руу эскпорт хийх хамгийн эхний буюу 01 дугаартай АНДХХ-ийн гарал үүслийн гэрчилгээг МҮХАҮТ-ын гишүүн “Сүмбэр коммодит” ХХК-ний рапсанд олголоо.

Ингэснээр БТКУС-ийн 120051090 кодтой рапс хэлэлцээр хэрэгжихээс өмнө 6%-ийн гаалийн татвартай байсан бол хэлэлцээр хэрэгжсний дараа 100 хувийн гаалийн тарифын хөнгөлөлт эдлэх боломжтой болжээ.

Анх Ази, Номхон далайн бүс нутгийн хөгжиж буй орнууд болох Энэтхэг, Өмнөд Солонгос, Шри Ланка, Лаос, Бангладеш өөр хоорондоо худалдааны хөнгөлөлт үзүүлэх зорилгоор энэхүү хэлэлцээрийг байгуулсан. БНХАУ 2001 онд тус хэлэлцээрт нэгдэн оржээ.

Хэлэлцээрт багтсан бараа бүтээгдэхүүний хөнгөлөлтийг зөвхөн эдгээр орны гарал үүслийн гэрчилгээний үндсэн дээр эдлэх боломж олгодог нь энэ хэлэлцээрийн онцлог юм. Монгол Улс уг хэлэлцээрт нэгдсэнээр үндэсний аж ахуйн нэгжүүд 2.9 тэрбум гаруй хэрэглэгчтэй, эдийн засгийн хурдацтай өсөлттэй АНДХХ-ийн зургаан гишүүн улс руу нийт 10,667 нэр төрлийн бараанд 5-100 хувийн татварын хөнгөлөлт эдлэх боломжтой.

Мөн дэлхийн болон бүс нутгийн нийлүүлэлтийн сүлжээнд холбогдох, хөрөнгө оруулалт татахад илүү таатай нөхцөл бүрдэх юм байна. Тухайлбал, БНХАУ, БНЭУ гэсэн хоёр аварга зах зээлд нийт 5,000 гаруй нэр төлийн бүтээгдэхүүнийг 10-100 хүртэл хувийн татварын хөнгөлөлттэй нийлүүлэх боломж нээгджээ гэж МҮХАҮТ-аас мэдээлэв.

“Брент” төрлийн түүхий газрын тосны үнэ өнгөрсөн оны тавдугаар сараас хойш 20 ам.доллароор бараг 3 дахин өсөж, энэ оны эхнээс баррел нь 56 ам.долларт хүрээд байгаа талаар АМГТГ-аас өнөөдөр мэдээллээ.

Саудын Арабын улс болон ОПЕК-ийн бусад орнуудад мэдэгдэлгүйгээр өдрийн олборлолтоо гэнэт огцом 1 сая баррелиар бууруулахаа мэдэгдсэн нь энэ оны 1 дүгээр сарын эхээр газрын тосны үнэ нэмэгдэх бас нэг хүчин зүйл болжээ. Дэлхийн банк болон ОУВС-гаас 2021 онд дэлхийн эдийн засгийн төлөв байдлыг илүү өөдрөг байхаар төсөөлж байна. Учир нь “COVID-19”-ийн эсрэг вакцинжуулалтыг өнгөрсөн оны 12 дугаар сараас зарим улс орон амжилттай эхлүүлсэн нь халдварын цар тахлын улмаас сулараад байсан дэлхийн эдийн засаг сэргэх хандлага ажиглагдаж эхлэв. Мөн АНУ, БНХАУ, Европын холбооны орнуудын эдийн засгаа сэргээх, цар тахалд зарцуулах далайцтай багц арга хэмжээ, түүнчлэн АНУ-ын шинээр сонгогдож буй ерөнхийлөгчтэй холбоотой эерэг хүлээлтүүд “COVID-19”-ийн нөхцөлд буураад байсан газрын тосны үнэ өсөхөд түлхэц болж байна.

Газрын тосны үнэ олон улсын зах зээл дээр өсөхөд нефьт бүтээгдэхүүнийхээ 100 хувийг гадаадаас импортолдог Монгол Улсын хувьд шатахууны үнэ нэмэгдэх нөхцөлийг бүрдүүлж байна. Гэвч манай улс импортлогч ААН-үүдтэй зөвшөлцөн үнийг тогтвортой барьж ирсэн арга хэмжээг үргэлжлүүлэн хэрэгжүүлж цар тахлын нөлөөгөөр иргэдийн орлого буурч, ААН-үүд хямарсан энэ үед шатахууны дотоод дахь үнийг тогтвортой барьж, нэмэхгүй гэдгээ өнөөдөр мэдээлэв.

Орон нутаг руу буцах хүсэлтэй, УОК-т өргөдлөө өгсөн, нэр нь бүртгэгдсэн, хүндэтгэх шалтгаантай хүмүүсийн PCR шинжилгээний хариу сөрөг бол хотоос гарах боломжтой болжээ.

Энэ талаар УОК-ын дарга Я.Содбаатар хэлэхдээ “Монгол Улсын нийт 21 аймаг халдваргүй бүс болсон. Экспортын гол бүс нутаг болох Өмнөговь аймагт онцгойлон хяналт тавьж, дотоодын цэргийн алба хаагчдын хүчитгэсэн хамгаалалтыг ажиллуулж байна.

Орон нутаг руу нэн яаралтай явах, нутаг буцах шаардлагатай иргэдийн PCR шинжилгээний хариу сөрөг бол энэ долоо хоногоос эхлэн гаргаж байна. Гэхдээ УОК-т өргөдлөө өгсөн, нэр нь бүртгэгдсэн, хүндэтгэх шалтгаантай хүмүүсийг гаргана. Хотод бий болсон халдварын голомтын бүрэн зураглал гараагүй учир орон нутаг руу халдвар тархах эрсдэл бий. Тиймээс хөдөө орон нутаг руу явах иргэдийн хөдөлгөөнийг хязгаарласан хэвээр байлгаач гэсэн хүсэлтийг эрүүл мэндийн салбараас өгч байгаа юм. Тиймээс энэ долоо хоногтоо яаран бүгдийг нь гаргахгүй. Харин нэн яаралтай явах иргэдийн PCR шинжилгээний хариу сөрөг гарсан бол хотоос гарах эрх нь өнөөдрөөс нээгдэж байна” гэлээ.

Шүүхээс дуучин Э.Оюумааг бусдад албаны чиг үүрэг, бүрэн эрх, албан тушаалын байдалтай нь холбогдуулан хахууль өгсөн гэм буруутайд тооцож нийтийн албанд томилох эрхийг 2 жилийн хугацаагаар хасаж, 5.4 сая төгрөгөөр торгох ялаар шийтгэжээ.

Тодруулбал, нийслэлийн Прокурорын газрын хяналтын прокуророос яллах дүгнэлт үйлдэж ирүүлсэн Р.Энхтайван, Б.Мөнхтуяа, Э.Оюумаа нарт холбогдох эрүүгийн хэргийг Баянгол дүүргийн Эрүүгийн хэргийн анхан шатны шүүх 2021 оны нэгдүгээр сарын 15, 18-ны өдрүүдэд хянан хэлэлцээд:

• Шүүгдэгч Р.Энхтайваныг Нийслэлийн шийдвэр гүйцэтгэх газрын даргаар ажиллаж байхдаа “Нийтийн албан тушаалтан албан үүрэг, бүрэн эрх, албан тушаалын байдлаа урвуулан ашиглаж, бусдад давуу байдал бий болгосон, мөн Нийтийн албан тушаалтан хахууль өгөгчийн ашиг сонирхлын үүднээс албаны чиг үүргээ хэрэгжүүлэхийн тулд бусдаар дамжуулан хахууль авсан гэм буруутайд тооцож нийтийн албанд томилогдох эрхийг 2 жилийн хугацаагаар хасаж 2 жилийн хорих ял, мөн хуулийн тусгай ангийн 22.4 дүгээр зүйлийн 2 дахь хэсэгт зааснаар нийтийн албанд томилогдох эрхийг 5 жилийн хугацаагаар хасаж 2 жилийн хорих ялаар,
• Шүүгдэгч Б.Мөнхтуяаг Шүүхийн шийдвэр гүйцэтгэх ерөнхий газрын харьяа Банк, хадгаламж зээлийн хоршоодын төлбөр барагдуулах албаны ахлах шийдвэр гүйцэтгэгч байхдаа “Нийтийн албан тушаалтан хахууль өгөгчийн ашиг сонирхлын үүднээс албаны чиг үүргээ хэрэгжүүлэхийн тулд хахууль авах гэмт хэрэгт хамжигчаар оролцсон гэм буруутайд тооцож Эрүүгийн хуулийн тусгай ангийн 22.4 дүгээр зүйлийн 2 дахь хэсэгт зааснаар нийтийн албанд томилогдох эрхийг 5 жилийн хугацаагаар хасаж, 10,950,000 төгрөгийн торгох ялаар,

• Шүүгдэгч Э.Оюумааг “Бусдад давуу байдал бий болгох зорилгоор бусдад албаны чиг үүрэг, бүрэн эрх, албан тушаалын байдалтай нь холбогдуулан хахууль өгсөн” гэмт хэргийг үйлдсэн гэм буруутайд тооцож, Эрүүгийн хуулийн тусгай ангийн 22.5 дугаар зүйлийн 1 дэх хэсэгт зааснаар нийтийн албанд томилогдох эрхийг 2 жилийн хугацаагаар хасаж, 5,400,000 төгрөгийн торгох ялаар тус тус шийтгэсэн байна.

Мөн Р.Энхтайванаас хэрэг хянан шийдвэрлэх ажиллагааны зардалд 560,000 төгрөг, Авлигатай тэмцэх газрын мөрдөн шалгах хэлтэст хадгалагдаж байгаа 200 ам.доллар, Төрийн сангийн 100900033401 тоотод дансанд байгаа 4,435,650 төгрөгийг тус тус гэмт хэрэг үйлдэж олсон хөрөнгө орлогод тооцож улсын орлого болгож шийдвэрлэв.

Ховд аймгийн Жаргалант суманд өнгөрсөн онд олон улсын стандартад нийцсэн, авто вокзал барих ажил эхэлсэн бөгөөд энэ онд ашиглалтад оруулахаар төлөвлөжээ.

Олон улсын MNS 6300:2011 стандартад нийцсэн авто вокзал нь 5 давхар байна. Ингэхдээ үйлчилгээний танхим, хүүхэд хуурайлах өрөө, тээш хадгалах хэсэг, кофе шоп, эмчийн үзлэгийн өрөө, хөгжлийн бэрхшээлтэй иргэдэд зориулсан ариун цэврийн өрөө, тээвэрчид, зорчигчдод үйлчлэх зочид буудалтайгаас гадна 20 автобусны граж, техникийн үйлчилгээ, том оврын тээврийн хэрэгслийн оношилгоо хийх 12 м урт суваг, 100 гаруй машины ил зогсоол бүхий цогц үйлчилгээний төв байх аж.

Төр, хувийн хэвшлийн түншлэлийн хамтын ажиллагаа, авто тээврийн салбарт баримтлах бодлогыг хэрэгжүүлэх, зорчигчдод олон улсын стандартад нийцсэн авто тээврийн цогц үйлчилгээ үзүүлэх зорилтын хүрээнд “Зорчигч тээврийн Ховд” ХХК нь өөрийн хөрөнгөөр босоо тэнхлэгийн АН-4 авто замын дагуу энэхүү бүтээн байгуулалтыг гүйцэтгэж буй юм байна.

Энэ сарын 22-нд буюу баасан гаригт, мөн энэ сарын 31-нд БНСУ руу нэмэлт нислэг хийж, 320 орчим монгол иргэнийг эх оронд нь авчрах шийдвэр гарсан тухай Гадаад харилцааны яамны Консулын газрын захирал Л.Мөнхтүшиг мэдээллээ.

Энэхүү төлөвлөгөөг ГХЯ, УОК–ын Шуурхай штабтай хамтран дотоодын нөөцтэйгөө уялдуулан гаргаж, өнөөдөр олон нийтэд албан ёсоор зарлаж байгааг УОК–ын Шуурхай штабын хэвлэлийн хурлын үеэр тэрбээр тодотгоод, “Нэгдүгээр сарын 15-нд манай улсын иргэд хамгийн олноор оршин суудаг БНСУ руу нэг нислэг үйлдсэн. Одоо хийх хоёр нислэгтэй нийлээд энэ сард үндсэндээ гурван нислэг хийнэ. Харин хоёрдугаар сарын тусгай нислэгийн төлөвлөгөөний талаар нэгдүгээр сарын 27-ны өдөр албан ёсоор зарлана” гэв.

Сүүлийн хоёр сарын хугацаанд эх орондоо ирэх хүсэлтэй иргэдийн тоо огцом нэмэгдсэн бөгөөд өнөөдрийн байдлаар 8433 иргэн ийм хүсэлт гаргасан байна. Үүний 2659 нь яаралтай ирэх шаардлагатай хүмүүс байгаа аж. Бүсчлэн авч үзвэл, Ази тивээс 6315, Хойд америк тивээс 1478, Австрали тивээс 93, Африк тивээс 3, Европ тивээс 544 хүн хүсэлт гаргажээ.

Дэлхий даяар коронавируст халдвар тархаж эхэлсэнтэй холбоотойгоор Монгол Улс хилээ хааснаас хойш гадаадын 93 орноос тусгай онгоцоор 21 522, авто замаар ОХУ-аас 2417, БНХАУ-аас 4228 иргэнээ нийт 28195 иргэнээ манай улс татан аваад байгаа юм.

Хөлдөөсөн 29 тарвагыг ачаандаа нууж, хот руу оруулахыг завдсан иргэнийг илрүүлжээ.

Тодруулбал, Хөвсгөл, Булган аймгийн заагт байрлах Намнангийн арын постоор 29 ширхэг тарвагыг Улаанбаатар хот руу оруулахаар ачаан дотроо нууж явсныг Хөвсгөлийн Экологийн цагдаагийн алба хаагч нар илрүүлэн, хөлдүү тарвагыг эд мөрийн баримтаар хураан авч холбогдох ажиллагааг хийн ажиллаж байна.

Иргэн та хууль бусаар тарвага агнавал Монгол улсын “Зөрчлийн тухай хууль”-ийн 7.6 дугаар зүйлд заасны дагуу хууль бусаар олсон хөрөнгө, орлогыг хурааж, учруулсан хохирол, нөхөн төлбөрийг гэм буруутай этгээдээр гаргуулах бөгөөд хувь хүнийг 300.000, аж, ахуй нэгжийг 3.000.000 төгрөгөөр торгож, тарваганы экологи эдийн засгийн үнэлгээ болох эмийг 200.000, эрийг 170.000 төгрөгийг 2 дахин нэмэгдүүлэн тооцож, төлбөр оногдуулахыг анхаарна уу гэж Экологийн цагдаагийн албанаас мэдээллээ.

Үндэсний статистикийн хороо болон Дэлхийн банк хамтран “Коронавирусийн нөлөөллийг тодорхойлох өрхөд суурилсан судалгаа”-г үе шаттай хийж байгаа билээ. Тэгвэл 2020 оны арванхоёрдугаар сарын 3-15-ны хооронд зохион байгуулж, утсаар мэдээлэл цуглуулсан гурав дахь шатны судалгааны үр дүн гарчээ. Гурав дахь шатны судалгааны үр дүнг суурьшил (Улаанбаатар, аймгийн төв, сумын төв, хөдөө) болон хот, хөдөөг төлөөлөх чадвартай 1,147 өрхийн мэдээлэлд үндэслэн тооцсон аж.

Судалгаанд оролцогчдын 80% нь вакцин үнэ төлбөргүй хийлгэх, 61% нь төлбөртэй байсан ч хийлгэх хүсэлтэй. Мөн “КОВИД-19”-ийн баталгаатай вакциныг хийлгэх хүсэл хотын хүмүүстэй харьцуулахад хөдөө орон нутгийн хүмүүст их байгаа нь харагджээ.

Ядуу хүмүүсийн 86 хувь нь вакциныг үнэ төлбөргүй хийлгэх хүсэлтэй байна. Гэхдээ вакцин үнэ төлбөртэй байсан ч хийлгэх тэдний хүсэл нь ядуу бус хүмүүсийнхтэй ижил байна. Хүмүүс ойролцоогоор 25,000 орчим төгрөгийг КОВИД-19 вакцин хийлгэхэд зарцуулж чадна гэж хариулжээ. Улаанбаатар хотод амьдардаг болон ядуу бус хүмүүс вакцин тариулахад арай илүү мөнгө зарцуулах боломжтой гэж (27-30 мянган төгрөг) харин хөдөө орон нутгийн болон ядуу иргэд их мөнгө зарцуулах боломжгүй (19-20 мянган төгрөг) гэх хариулт өгчээ. Түүнчлэн КОВИД-19 вакцины баталгаатай эсэх, даган гарах гаж нөлөөний талаарх санаа зовнил нь хүмүүсийн вакцинд хамрагдах хүсэл эрмэлзлэлийг бууруулж буй нь мөн судалгаанаас харагдсан байна. Өөрөөр хэлбэл, нийт хүн амын хувьд коронавирусээс урьдчилан сэргийлэх арга хэмжээний талаарх мэдлэг харьцангуй өндөр байгаа ба судалгаанд хамрагдсан таван хүн тутмын дөрөв нь КОВИД-19-ийн эсрэг баталгаатай вакциныг үнэ төлбөргүй хийлгэх хүсэлтэй байсныг судалгааны үр дүн харуулав.

Ерөнхийлөгч Х.Баттулга өнөөдөр Оюу толгой төслийн тухай бүрэн мэдээллийг өнөөдрийн дотор ирүүлж, зохих журмын дагуу танилцуулах тухай албан тоотыг Засгийн газарт хүргүүлжээ.

Дотоод болон гадаадын эх сурвалжууд сүүлийн үед идэвхтэй мэдээллэж буй Оюу толгой төслийн асуудлаар Засгийн газарт албан тоот илгээсэн бөгөөд уг асуудлыг Үндэсний аюулгүй байдлын зөвлөлөөр хэлэлцүүлэхээр төлөвлөж байгаагаа онцолжээ.

Тэрбээр “Оюу толгой төслийн үйл ажиллагааг улс орны нийтлэг ашиг сонирхолд нийцүүлэх нь Монгол төрийн эрхэм үүрэг, та бидэнд өгсөн Монголын ард түмний захиас даалгавар юм. Иймд Оюу толгойн асуудлаар олон улсын арбитрын шүүхэд хянагдаж буй маргаан, холбогдох бусад асуудлаар Засгийн газрын баримталж буй байр суурь, явуулж буй бодлого болон холбогдох баримттай танилцаж Ерөнхийлөгчийн хяналт, дэмжлэгийг хэрэгжүүлэх төлөөллийг оруулж хамтран ажиллах хүсэлтийг 2020 оны 12 дугаар сарын 23-ны өдөр Засгийн газрын Хэрэг эрхлэх газарт зохих журмаар хүргүүлсэн боловч арга хэмжээ аваагүй, асуудалд туйлын хөшүүн, хойрго хандаж байгаа нь онцгой анхаарал татаж байна.

Монгол Улсын Үндэсний аюулгүй байдлын зөвлөлийг тэргүүлэх эрхийг хэрэгжүүлж, ард түмний өмнө үүрэг, хариуцлага хүлээдэг төрийн тэргүүнд ийнхүү хандаж байгаа дээрх ил тод бус, хууль ёсны зарчимд харшилсан үйл ажиллагаа нь улс орны эрх ашиг нэн тэргүүнд тавигдахгүй, ашиг сонирхлын зөрчил бүхий зарим хүмүүсийн шууд ба шууд бус нөлөөлөлд автсан, тийм нөхцөл үүссэн байж болзошгүйг бэлхнээ харуулж байна гэжээ. Иймээс 2021 оны нэгдүгээр сарын 18-ны өдрийн дотор Оюутолгойтой холбоотой бүрэн гүйцэд мэдээллийг ирүүлнэ үү гэж Монгол Улсын Ерөнхийлөгч Халтмаагийн Баттулгаас Монгол Улсын Ерөнхий сайд Ухнаагийн Хүрэлсүхэд илгээсэн албан тоотыг бүрэн эхээр нь хүргэж байна” гэжээ.

Албан бичигт,

Оюу толгой төслийн үйл ажиллагааг улс орны нийтлэг ашиг сонирхолд нийцүүлэх, үр өгөөжийг нь нэмэгдүүлэх чиглэлд ажиллах нь Монгол төрийн эрхэм үүрэг, та бидэнд өгсөн Монголын ард түмний захиас даалгавар, чин хүсэл юм. Өнгөрсөн жил бид байгалийн баялаг гагцхүү ард түмний мэдэл, төрийн хамгаалалтад байна гэсэн Үндсэн хуулийнхаа үзэл санаа, зарчмыг улам баталгаажуулж, газрын хэвлий, түүний баялгийг албан тушаалтнууд төрийн өөрийн өмчид хамаарах сандал, ширээ мэтийн адилаар захиран зарцуулдаг байдлыг халах, стратегийн ач холбогдол бүхий ашигт малтмалын ордын үр өгөөжийн дийлэнх нь ард түмэнд ногдож байх эрх зүйн үндсийг бүрдүүлэх тухай нэмэлт, өөрчлөлтийг Үндсэн хуулиндаа оруулсан. Монгол Улсын тогтвортой хөгжил, хөрөнгө оруулалт, аж ахуй эрхлэх орчны үзүүлэлт, гадаад харилцаа, олон улсын хамтын нийгэмлэг дэх байр суурь, нэр хүнд, эдийн засгийн аюулгүй байдалд нөлөөлж буй хүчин зүйлүүдийн дотор “байгалийн баялгийг шударгаар ашиглах, төр, нийтийн ашиг сонирхлыг нэн тэргүүнд баримтлан ажиллах” асуудал хамгийн чухал болсон энэ цаг үед Оюу толгойн орд ашиглалтын бугшсан их ээдрээг тайлж, зөв шийдэл олоход Монгол төрийн бүх салаа мөчир, бүтэц бүрэлдэхүүн хүчин чадлаа бүрэн дайчилж шуурхай ажиллах нь зүйд нийцнэ.

Монголын ард түмэн ч мөн үүнийг та биднээс хүсэн, хүлээж байна. Оюу толгой ордын ашиглалтад Монгол Улсын эрх ашгийг хангуулах чиглэлд Улсын Их Хурал, Засгийн газар, холбогдох төрийн болон мэргэжлийн байгууллагуудын явуулж буй үйл ажиллагааны хүрээнд онц чухал бөгөөд тулгамдсан асуудал, хүндрэлтэй нөхцөл байдал бий болсон талаар дотоод, гадаадын эх сурвалжууд мэдээлсээр байна. Тухайлбал,

• Оюу толгой төслийн хөрөнгө оруулагч талтай Засгийн газар хэлэлцээ хийж байгаа тухай;
• Оюу толгой төслийн хөрөнгө оруулагч талтай Засгийн газар олон улсын арбитрын шүүхэд маргаж буй тухай;
• Оюу толгой төсөлд хөрөнгө оруулагч гадаад улсад бүртгэлтэй хуулийн этгээдүүд өөр хоорондоо уг төслийн талаар олон улсын арбитрын шүүхэд маргаж буй тухай;
• Оюу толгой төсөлтэй холбогдуулан авлига, хээл хахууль өгч авсан, үндэслэлгүйгээр хөрөнгөжсөн гэдэг үндэслэл бүхий хэрэг хянан шийдвэрлэх ажиллагаанууд явагдаж байгаа тухай.

Эдгээр мэдээллээс үзэхэд Монгол Улсын эрх ашиг, Монголын ард түмний нийтлэг ашиг сонирхлыг хамгаалахад шууд хамаатай, төрийн нэгдмэл бодлого, байгууллага хоорондын нягт хамтын ажиллагаа шаардагдсан нөхцөл байдал үүссэн нь нэн тодорхой бөгөөд илэрхий байна.

Үндсэн хуульд Монгол Улсын Ерөнхийлөгч бол төрийн тэргүүн бөгөөд “Засгийн газарт чиглэл өгөх, гадаад харилцаанд улсаа бүрэн эрхтэй төлөөлөх, Монгол Улсын Үндэсний аюулгүй байдлын зөвлөлийг тэргүүлэх, улс орны дотоод, гадаад байдлын нэн чухал асуудлаар Улсын Их Хуралд мэдээлж, саналаа оруулах” зэрэг бүрэн эрхийг хэрэгжүүлэхээр хуульчилсан. Мөн Монгол Улсын Ерөнхийлөгчийн тухай хуулийн 3 дугаар зүйлийн 2 дахь хэсэгт “Ерөнхийлөгч төрийн тэргүүний хувьд Монгол Улсын тусгаар тогтнол, бүрэн эрхт байдлыг хангах ашиг сонирхлын үүднээс хууль тогтоох, гүйцэтгэх, шүүх эрх мэдлийг хэрэгжүүлдэг байгууллагууд зүй зохистой харилцан ажиллахад нь Үндсэн хууль болон бусад хуульд заасан бүрэн эрхийнхээ хүрээнд дэмжлэг нөлөө үзүүлнэ” гэж заасан байдаг.

Үүний хүрээнд миний бие хуульд заасан үүрэг, ард түмний захиас даалгаврыг биелүүлэх зорилгоор олон улсын арбитрын шүүхэд хянагдаж буй маргаан, холбогдох бусад асуудлаар Засгийн газрын баримталж буй байр суурь, явуулж буй бодлого, үйл ажиллагаа, түүний бэлтгэл ажил, явцын талаарх мэдээ, баримттай танилцах, зохих ажлын хэсэгт Ерөнхийлөгчийн хяналт, дэмжлэгийг хэрэгжүүлэх төлөөллийг оруулж хамтран ажиллах хүсэлтийг 2020 оны 03 дугаар сарын 17-ны өдөр, мөн 2020 оны 12 дугаар сарын 23-ны өдөр Засгийн газрын хэрэг эрхлэх газарт зохих журмаар хүргүүлсэн боловч ёс төдий хагас дутуу мэдээлэл ирүүлснээр өөр арга хэмжээ аваагүй, асуудалд туйлын хөшүүн, хойрго хандаж байгаа нь онцгой анхаарал татаж байна.

Гадаад харилцаанд улсаа бүрэн эрхтэй төлөөлөх, Монгол Улсын Үндэсний аюулгүй байдлын зөвлөлийг тэргүүлэх, улс орны дотоод, гадаад байдлын нэн чухал асуудлаар Улсын Их Хуралд мэдээлж, саналаа оруулах зэрэг бүрэн эрхийг хэрэгжүүлж, ард түмний өмнө үүрэг, хариуцлага хүлээдэг төрийн тэргүүнд ийнхүү хандаж байгаа дээрх ил тод бус, хууль ёсны зарчимд харшилсан үйл ажиллагаа нь улс орны эрх ашиг нэн тэргүүнд тавигдахгүй, ашиг сонирхлын зөрчил бүхий зарим хүмүүсийн шууд ба шууд бус нөлөөлөлд автсан, тийм нөхцөл үүссэн байж болзошгүйг бэлхнээ харуулж байна.

Хяналтгүй, ил тод бус, хаалттай, хуйвалдааны шинжтэй ийм үйл ажиллагааны үр дүнд Дубайн хэлэлцээр шиг асуудал үүсэж, улс орноороо хохирох аюултай. Миний бие Оюу толгойн асуудлыг Монгол Улсын Үндэсний аюулгүй байдлын зөвлөлөөр оруулж, хэлэлцүүлэхээр төлөвлөж байна. Иймд дурдсан асуудлуудын хүрээнд иж бүрэн, гүйцэд мэдээллийг өнөөдрийн дотор ирүүлж, зохих журмаар танилцуулна уу” гэжээ.

УОК-ын шуурхай штабаас цаг үеийн асуудлаар мэдээлж байна.

УОК-ын Шуурхай штабын дарга Б.Ууганбаяр “Иргэдээ татан авах нь дотоодын тусгаарлах байрны нөөц боломжоос шалтгаалдаг. Нийслэлд 39 тусгаарлан ажиглах байр бий. Энэ нь дотоодын халдварын хавьтал болон гадаадаас ирсэн иргэдээ тусгаарлахад ашигладаг. Өнөөдрийн байдлаар Улаанбаатарт 22 тусгаарлах байранд 959 иргэн байна.