Month: January 2021

Улсын Их Хурлын Жижиг, дунд үйлдвэрлэлийн дэд хороо өнөөдөр /2021.01.20/ хуралдаж, Дэд хорооны дарга, Улсын Их Хурлын гишүүн Ж.Бат-Эрдэнэ Дэд хорооны 2021 онд хэрэгжүүлэх ажлын төлөвлөгөөг батлах болон Жижиг, дунд үйлдвэрлэлийг дэмжих асуудлаар Засгийн газар болон холбогдох байгууллагуудад чиглэл өгөх Дэд хорооны шийдвэрийн төсөл боловсруулах үүрэг бүхий Ажлын хэсэг байгуулах гэсэн хоёр асуудал хэлэлцэхийг танилцуулав.

Эхлээд Жижиг, дунд үйлдвэрлэлийн дэд хорооны 2021 онд хийх ажлын төлөвлөгөөг батлах асуудлыг хэлэлцлээ. Хийх ажлын төлөвлөгөөтэй холбогдуулж Улсын Их Хурлын гишүүн Г.Ганболд, Ж.Батжаргал, Т.Энхтүвшин, Ж.Бат-Эрдэнэ, С.Ганбаатар нар санал хэллээ.

Улсын Их Хурлын гишүүн Г.Ганболд Дэд хорооны ажлын гол зорилго нь ирэх жилүүдэд жижиг, дунд үйлдвэрлэлийн чиглэлээр явуулах бодлого үйл ажиллагаанд дэмжлэг үзүүлэх учир жижиг, дунд үйлдвэрлэлийг хөгжүүлэхэд саад болж байгаа асуудлыг засах хуулийн төслүүд өргөн барих, мөн дэмжлэг үзүүлэх чиглэлүүдийг тодорхой болгож өгөх, сангийн эх үүсвэрийг нэмэгдүүлэх талаар талуудтай уулзалт зохион байгуулах зэрэг ажлуудыг тусгах саналаа хэлэв.

Улсын Их Хурлын гишүүн Ж.Батжаргал Дэд хороо жижиг, дунд үйлдвэрлэлийн бодлогыг тодорхой болгуулах, бойжуулах чиглэлийн эрх зүйн орчныг боловсронгуй болгох, түншлэлийн асуудлыг сайтар анхаарч, энэ асуудлууд руу тулж ормоор байна гэсэн санал хэллээ. Мөн томоохон төслүүдийг дагаж ямар жижиг дунд үйлдвэр хөгжих вэ гэдгийг тухайлан ярьж тодорхойлолтыг гаргах, дэмжлэгийг нь татгалзлалгүй өгдөг байх санал хэлсэн бол Улсын Их Хурлын гишүүн Т.Энхтүвшин жижиг, дунд үйлдвэрлэлийн үйл ажиллагаатай үйлдвэрлэлийн байранд нь очиж танилцах санал хэлэв. Улсын Их Хурлын гишүүн С.Ганбаатар Дэд хорооны хэрэгжүүлэх ажлын төлөвлөгөөнд тусгах 5 зүйл бүхий саналаа бичгээр гаргаж өгөв.

Дэд хорооны дарга, Улсын Их Хурлын гишүүн Ж.Бат-Эрдэнэ Жижиг, дунд үйлдвэрлэлийг дэмжих асуудлаар Засгийн газар болон холбогдох байгууллагуудад чиглэл өгөх Дэд хорооны шийдвэрийн төсөл боловсруулах үүрэг бүхий Ажлын хэсгээ байгуулаад, Ажлын хэсэг дээрээ жижиг, дунд үйлдвэрлэлийг хөгжүүлэх талаар гол бодлогоо маш тодорхой болгон, Засгийн газарт чиглэл өгөх талаар санал хэллээ. Ажлын хэсгийг Дэд хорооны дарга, Улсын Их Хурлын гишүүн Ж.Бат-Эрдэнэ ахалж ажиллахаар шийдвэрлэв.

Улсын Их Хурлын Агаарын бохирдлыг бууруулах асуудлын дэд хороо өнөөдөр /2021.01.20/ хуралдлаа. Хуралдаанаар Орчны бохирдлыг бууруулах үндэсний хорооны тайлан мэдээлэл сонсох асуудал хэлэлцэхээр төлөвлөснийг Дэд хорооны дарга, Улсын Их Хурлын гишүүн Б.Саранчимэг танилцуулав.

Хуралдааны эхэнд Орчны бохирдлыг бууруулах үндэсний хорооноос 2020 онд хийсэн ажлын талаар Байгаль орчин, аялал жуулчлалын сайд Д.Сарангэрэл танилцууллаа.

Тус хороо 2020 онд 5 зорилт бүхий 58 арга хэмжээг хэрэгжүүлэхэд үндсэн үйл ажиллагаагаа чиглүүлж, 77.3 тэрбум төгрөгөөр 24 арга хэмжээг хэрэгжүүлэн ажилласан байна. Ажлын үр дүнд 2020 оны 11 дүгээр сард Улаанбаатар хотын агаар дахь агаар бохирдуулах бодисын дундамж агууламжийг өмнөх оны мөн үеийн дундаж агууламжтай харьцуулахад PM10 тоосонцор 23 хувиар, PM2.5 тоосонцор 15 хувиар багассан үзүүлэлт гарсан байна. Нийт санхүүжилтийн 80 хувийг утаа буюу агаарын бохирдлыг бууруулахад зарцуулсныг сайд мэдээлэлдээ тэмдэглэв.

Мэдээлэлтэй холбогдуулж Улсын Их Хурлын гишүүн Ц.Туваан, Г.Ганболд, Г.Дамдинням, Б.Саранчимэг нар асуулт асууж, хариулт авлаа. Улсын Их Хурлын гишүүн Ц.Туваан 77.3 тэрбум төгрөгөөр 24 арга хэмжээ хэрэгжүүлсэн талаарх санхүүгийн задаргааг авч танилцах хүсэлтээ илэрхийлэхийн зэрэгцээ 2021 онд утаа, агаарын бохирдлыг бууруулахад үсрэнгүй ахиц гаргах ямар ажил төлөвлөж ажиллах талаар тодруулав. Мөн агаарын бохирдол буурсан гэж байгаа ч Улаанбаатарыг алсаас харахад саарал утаан дунд байгаа талаар хэллээ. Дээрх асуултад Байгаль орчин, аялал жуулчлалын сайд Н.Сарангэрэл ирэх 4 жилийн хугацаанд агаарын бохирдлыг 80 хүртэл хувиар бууруулна. Цаашид үр дүнтэй шийдэлд хүрэхийн тулд орон сууцжуулах асуудлыг бүрэн шийдвэрлэх хэрэгтэй. Одоо ойрын болон дунд хугацааны төлөвлөгөөг хэрэгжүүлж байна хэмээн хариуллаа.

Улсын Их Хурлын гишүүн Г.Ганболд “Нэг жилд агаарын бохирдолд 77.3 тэрбум төгрөг зарцуулах нь бага мөнгө биш. Гол нь энэ мөнгөөр үр дүнтэй ажил төлөвлөж, хиймээр байна. Өчигдөр Орчны бохирдлыг бууруулах үндэсний хороо 2021 онд хийх ажлын төлөвлөгөөгөө баталсан байна. Ямар ажил тусгахаа ярилцаад, шийдээд явахгүй бол энд бид суух ямар хэрэг байна вэ. Дэд хорооны хуралдаанаас гаргасан чиглэлийн дагуу ажлын төлөвлөгөөгөө дахиж батлаад явах ёстой” хэмээн байр сууриа илэрхийлсний хариуд Байгаль орчин, аялал жуулчлалын сайд Д.Сарангэрэл гишүүний энэхүү саналыг хүлээж авч байгаагаа хэлэв.

Дэд хорооны дарга, Улсын Их Хурлын гишүүн Б.Саранчимэг агаарын бохирдлоос гадна хөрс, усны бохирдлыг бууруулах ногоон хөгжлийн зорилго эн тэргүүний байх ёстойг тэмдэглээд хөрс, ус, орчны бохирдлыг бууруулахад чиглэсэн үр дүнтэй ажил хийх талаар саналаа хэлж, 2021 онд ямар ажлыг, хэчнээн төгрөгөөр санхүүжүүлэн хэрэгжүүлэх талаар тодруулан, хариулт авлаа.

Асуулт асууж, байр сууриа илэрхийлсэн гишүүд агаар, орчны бохирдлыг бууруулах чиглэлээр үр дүнтэй, оновчтой ажил төлөвлөж, хийх талаар саналаа хэлж байв. Ийнхүү Агаарын бохирдлыг бууруулах асуудлын дэд хорооны өнөөдрийн хуралдаанаар Орчны бохирдлыг бууруулах үндэсний хорооны тайлан, мэдээлэлтэй холбогдуулан гишүүд асуулт асууж, хариулт авснаар хуралдаан өндөрлөв гэж УИХ-ын Хэвлэл мэдээлэл, олон нийттэй харилцах хэлтсээс мэдээлэв.

Монгол Улсын Засгийн газрын гишүүн, Шадар сайд Я.Содбаатар Газрын тос боловсруулах үйлдвэрийг дэмжих тухай хуулийн төслийг өнөөдөр (2021.01.20) Улсын Их Хурлын дарга Г.Занданшатарт өргөн мэдүүллээ.

Монгол Улсын Засгийн газар 2016-2020 оны үйл ажиллагааны хөтөлбөртөө газрын тос боловсруулах үйлдвэр байгуулах зорилт дэвшүүлж, Засгийн газрын 2017 оны 59 дүгээр тогтоолоор Бүгд Найрамдах Энэтхэг Улсын Засгийн газрын хөнгөлөлттэй зээлээр Дорноговь аймгийн Алтанширээ сумын нутагт, жилд 1.5 сая тонн газрын тос боловсруулах хүчин чадал бүхий “Газрын тос боловсруулах үйлдвэр барих” төслийг хэрэгжүүлэхээр шийдвэрлэсэн.

Өнөөгийн байдлаар үйлдвэрийн инженерчлэл, зураг төсөл боловсруулах ажил үргэлжилж, технологийн байгууламжуудын лиценз эзэмшигчдийг сонгон шалгаруулах ажил хийгдэж байгаа. Технологийн бус байгууламжийн барилга угсралтын ажил гүйцэтгэх компанитай гэрээ байгуулж, барилгын ажлыг эхлүүлэх бэлтгэлийг хангаж байгаа юм байна.

Газрын тос боловсруулах үйлдвэр нь үндсэн 12 байгууламжтай байх бөгөөд үүнээс 7 нь патенттай технологи юм. Тус байгууламжуудын тендерт Axens, Technip, UOP, Halder Topsoe, Shell, Kinetics Technology зэрэг нефть-химийн салбарын дэлхийд тэргүүлэгч компаниуд оролцож байгаа аж.

Монгол Улсад анх удаа газрын тос боловсруулах иж бүрэн үйлдвэр байгуулж байгаа тул гаднын инженер, техникийн ажилтнууд үйлдвэрийн бүтээн байгуулалтад оролцох шаардлага үүсэж байна. Урьдчилсан тооцооллоор барилга угсралтын ажлын үед буюу 2021 онд 1000, 2022 онд 5000, 2023 онд 8000, 2024 онд 7000 орчим (давхардсан тоогоор) инженер, техникийн болон туслах ажилтан ажиллахаар байна. Иймд ажиллах хүч мэргэжилтэн гадаадаас авах, Монгол Улсад хөдөлмөр эрхлэхтэй холбогдсон зөвшөөрлийг шуурхай олгох асуудлыг хуулийн төсөлд тусгажээ.

Мөн үйлдвэрийн усны ордын нөхөн төлбөр, машин механизм, техник, тоног төхөөрөмж, дагалдах хэрэгсэл, түүхий эд, бараа материалын тээвэрлэлтийг хөнгөвчлөх, гаалийн бүрдүүлэлтийг хялбаршуулсан (түргэвчилсэн) горимоор зохицуулах асуудлыг төсөлд тусгасан байна.

Түүнчлэн газрын тос боловсруулах үйлдвэр нь түүхий эдийн хангамжийн хувьд тогтвортой, найдвартай эх үүсвэртэй байх үүднээс өөрийн гэсэн түшиц газар буюу газрын тосны ордтой болох эрх зүйн орчныг бүрдүүлэх шаардлагатай. Газрын тос боловсруулах үйлдвэрийн бүтээн байгуулалтын ажилд тулгамдаж буй асуудлуудыг Үндэсний аюулгүй байдлын зөвлөлийн 2020 оны наймдугаар сарын 17-ны өдрийн хуралдаанаар хэлэлцэж, газрын тос боловсруулах үйлдвэрийн бүтээн байгуулалтын ажлыг эрчимжүүлэх зорилгоор Газрын тос боловсруулах үйлдвэрийг дэмжих бие даасан хуулийн төслийг боловсруулж батлуулахыг Засгийн газарт даалгасны дагуу долоон зүйл бүхий хуулийн төслийг боловсруулжээ. Хуульд заасан харилцааг “Газрын тос боловсруулах үйлдвэрийг дэмжих, төрөөс үзүүлэх үйлчилгээг хялбаршуулах горим”-ын тухай журмаар нарийвчлан зохицуулахаар тусгасан байна.

Төсөл батлагдсанаар газрын тос боловсруулах үйлдвэр төлөвлөсөн хугацаандаа ашиглалтад орж, нэмүү өртөг шингэсэн бүтээгдэхүүн үйлдвэрлэн, хөрөнгө оруулалтын зардлыг богино хугацаанд нөхөж, зээлийн санхүүжилтийн эргэн төлөлтийг хугацаанд нь хийх боломж бүрдэх юм.

Монгол Улсын Засгийн газрын шийдвэрээр үйлдвэрийн гаднах дэд бүтцийн бүтээн байгуулалт болох 27 км салаа төмөр зам, 18.2 км цахилгаан дамжуулах агаарын шугам болон 17.5 км хүнд даацын авто замыг 2018-2019 онд барьж байгуулан ашиглалтад оруулсан. Мөн Дорноговь аймгийн Сайншанд хотод 550 айлын 10 орон сууц, оффис үйлчилгээний цогцолбор бүхий “Газрын тосны үйлдвэрийн хотхон”-ыг барьж эхэлжээ гэж УИХ-ын Хэвлэл мэдээлэл, олон нийттэй харилцах хэлтсээс мэдээлэв.

УИХ-ын чуулганы нэгдсэн хуралдаан яг одоо болж байна. Өнөөдрийн хуралдаанаар Ерөнхийлөгчийн сонгуулийн санал авах өдрийг товлох, санал авах төхөөрөмжийн асуудлыг хэлэлцэж байгаа юм.

Энэ үеэр УИХ-ын гишүүн Т.Доржханд өнөөдрийн нөхцөл байдлыг харахад, Улсын онцгой комиссын хариуцлагын талаар хөндөх зайлшгүй шаардлага үүсээд байгааг хэлсэн юм. Төв талбайд хүмүүс цуглаж, эсэргүүцэл илэрхийлж байгаа үед ийм асуудлыг хэлэлцэх нь зохисгүй байна гэсэн юм.

Мөн тэрбээр УОК-ын дарга, Шадар сайдыг огцруулахыг шаардаж албан бичиг хүргүүлэх талаараа ярих гэсэн боловч УИХ-ын дарга түүний микрофоныг хаалаа. Учир нь хэлэлцэж буй асуудалтай холбоогүй хэмээн үзэж байгаагаа ч мөн илэрхийлсэн юм.

“Өргөө” амаржих газраас өчигдөр халдвартай болох нь тогтоогдсон амаржсан эхийг ХӨСҮТ рүү шилжүүлэхдээ хүний эрхийн зөрчил гаргасан хэмээн өнөөдөр өглөөнөөс эхлэн иргэд талбай дээр жагсаал хийж байна. Жагсаалд оролцож буй иргэд энэ асуудал болон өнгөрсөн хугацаанд гаргасан хүний эрхийн зөрчлүүдэд хариуцлага хүлээж, УОК-ыг огцрохыг шаардаж байна.