Month: January 2021

Хот орчмын батлагдаагүй шороон замууд, гарц гармуудыг бүрэн хааж 24 цагийн туршид хяналт тавин ажиллаж байна гэж Тээврийн цагдаагийн албанаас мэдээллээ.

Өнөө маргаашдаа Хэнтийн уулархаг нутаг, Орхон-Сэлэнгийн бэлчир орчмоор ялимгүй цас орж, ихэнх нутгаар жавартай хүйтэн хэвээр байна гэж Цаг уурын байгууллагаас мэдээллээ.

Нэгдүгээр сарын 6-ны 20:00 цагаас нэгдүгээр сарын 7-ны 20:00 цаг хүртэлх урьдчилсан мэдээллээр Төвийн аймгуудын нутгийн зүүн хойд хэсгээр цас орж, явган шуурга шуурна.

Ихэнх нутгаар хойноос секундэд 5-10 метр, говь, тал, хээрийн нутгаар секундэд 12-14 метр хүрч ширүүснэ.

Увс нуур болон Дархадын хотгор, Завхан голын эх, Хүрэнбэлчир орчим, Тэс, Байдраг голын хөндийгөөр шөнөдөө 41-46 градус, өдөртөө 30-35 градус байна. Алтай, Хангай, Хөвсгөл, Хэнтийн уулархаг нутаг, Идэр, Эг, Үүр, Орхон, Хараа, Ерөө, Туул, Тэрэлж, Хэрлэн, Онон, Улз голын хөндий, Дарьгангын тал нутгаар шөнөдөө 36-41 градус, өдөртөө 24-29 градус байна. Алтайн өвөр говиор шөнөдөө 21-26 градус, өдөртөө 13-18 градус, бусад нутгаар шөнөдөө 29-34 градус, өдөртөө 20-25 градус хүйтэн байна.

Улаанбаатарт шөнөдөө цас, өдөртөө ялимгүй цас орж, явган шуурга шуурна. Салхи хойноос секундэд 5-10 метр. Яармаг-Сонгины орчмоор 39-41 градус хүйтэн хонох бол бусад хэсгээр 31-33 градус, өдөртөө 26-28 градус хүйтэн байх төлөв гарчээ.

Багануур орчмоор өдөртөө ялимгүй цас орж, явган шуурга шуурна. Салхи хойноос секундэд 7-12 метр. Шөнөдөө 36-38 градус, өдөртөө 25-27 градус хүйтэн. Тэрэлж орчмоор цас орж, явган шуурга шуурч, салхи хойноос секундэд 6-11 метр. Шөнөдөө 34-36 градус, өдөртөө 25-27 градус хүйтэн байна.

2021 оны нэгдүгээр сарын 8-12-ныг хүртэлх цаг агаарын урьдчилсан төлөв

Нэгдүгээр сарын 8-нд Хөвсгөл, Хэнтийн уулархаг нутгаар, 9-нд Монгол-Алтай болон Хэнтийн уулархаг нутаг, Алтайн өвөр говиор, 10-нд говийн бүс нутгийн өмнөд хэсгээр ялимгүй цас орно.

Салхи 8-нд говь, талын нутгаар, 10,11-нд Алтайн уулархаг нутгаар секундэд 13-15 метр хүрч ширүүснэ. Увс нуур болон Дархадын хотгор, Завхан голын эх, Хүрэнбэлчир орчим, Тэс голын хөндий, Дарьгангын тал нутгаар шөнөдөө 40-45 градус, өдөртөө 28-33 градус хүйтэн. Алтай, Хангай, Хөвсгөл, Хэнтийн уулархаг нутаг, Эг, Үүр, Орхон, Сэлэнгэ, Хараа, Ерөө, Туул, Тэрэлж, Хэрлэн голын хөндийгөөр шөнөдөө 34-39 градус, өдөртөө 22-27 градус хүйтэн байх бол говийн бүс нутгийн цас багатай энгэр ээвэр газраар шөнөдөө 20-25 градус, өдөртөө 10-15 градус хүйтэн байна.

Бусад нутгаар шөнөдөө 28-33 градус, өдөртөө 17-22 градус хүйтэн байна. Нэгдүгээр сарын 10-наас ихэнх нутгаар хүйтний эрч суларна. Өнгөрсөн шөнө ихэнх нутгаар хүйтний эрч 1-16 градусаар нэмэгджээ.

2021 оны нэгдүгээр сарын 05-ны 08 цагаас нэгдүгээр сарын 06-ны 08 цаг хүртэлх цаг агаарын тойм

Өнгөрсөн хоногт Булган, Сүхбаатарын ихэнх нутаг, Хэнтийн өмнөд хэсэг, Өвөрхангай, Сэлэнгэ, Төв, Дорноговийн зарим газраар цас орсноос хамгийн их нь Сүхбаатарын Эрдэнэцагаанд 1.1 мм, Өвөрхангайн Хархорин, Сүхбаатарын Халзан, Сүхбаатар, Асгатд 0.9-1.0 мм, Хэнтийн Оргилд 0.8 мм, бусад хэсгээр 0.0-0.7 мм цас орсон байна.

Өнөөдөр өглөөний 08:00 цагийн цаг уурын өртөө, харуулын талбайн хэмжилтээр Завхан, Булган, Төв, Сэлэнгэ, Хэнтий, Сүхбаатарын ихэнх нутаг, Увс, Говь-Алтай, Баянхонгор, Өвөрхангай, Хөвсгөл, Дундговь, Дорноговийн хойд, Архангай, Дорнодын өмнөд хэсэг, Баян-Өлгий, Ховдын зарим газраар 1-15 см зузаан цасан бүрхүүлтэй байна. Үүнээс хамгийн их нь Сүхбаатарын Эрдэнэцагаанд 15 см, Хөвсгөлийн Цагаан-Үүр, Сүхбаатарын Асгатд 14 см, Баянхонгорын Байдраг, Сэлэнгийн Бугант, Сүхбаатарын Түмэнцогт, Сүхбаатард 13 см, Увсын Давст, Архангайн Түвшрүүлэх, Булганы Гурванбулагт 12 см, Сүхбаатарын Халзан, Дарьгангад 11 см, Баянхонгорын Галуут, Өвөрхангайн Бүрд, Хэнтийн Өлзийт, Батноров, Оргил, Баян-Овоо, Сүхбаатарын Наранд 10 см, бусад хэсгээр 1-9 см зузаан цастай.

Өнгөрсөн шөнө ихэнх нутгаар 1-16 градусаар хүйтэрч Увс нуур болон Дархадын хотгор, Завхан голын эх, Хүрэнбэлчир орчим, Идэр, Тэс, Эг, Үүр, Туул голын хөндийгөөр -40…-47 градус, Хангай, Хөвсгөл, Хэнтийн уулархаг нутаг, Орхон, Хараа, Ерөө, Тэрэлж, Хэрлэн, Улз голын хөндий, Дарьгангын тал нутгаар -34…-39 градус, говийн бүс нутгийн өмнөд хэсгээр -23…-28 градус, бусад нутгаар -29…-34 градус хоносон байна.

Улаанбаатар хот орчмоор шөнөдөө Яармаг-Сонгины орчмоор -41 градус, бусад хэсгээр -34 градус хүйтэн байна.

УОК-ын Шуурхай штабын дарга, Хурандаа Б.Ууганбаяр “УОК-ын Шуурхай штаб өчигдөр ХӨСҮТ-ийн чиглэл болгосны дагуу 18.00-02.00 цаг хүртэл “Ачтан элит” эмнэлгийн хавьтлуудыг тусгаарлах чиглэлээр ажиллалаа. Нийт 97 хүнийг “Тайж”, “Холлидэй” зэрэг зочид буудалд тусгаарласан. Шуурхай штабаас ажлын хэсэгтэй хамтарч, тусгаарлах байрны нөөцийг нэмэгдүүлэх чиглэлээр ажиллаж байна. Өнөөдөр хоёр байрыг тусгаарлан ажиглах зориулалтаа бэлтгэлээ.

УОК-ын шуурхай штаб байгууллагадаа шинэ жилийн баяр тэмдэглэсэн мэт мэдээлэл цацаж байна. Бид шинэ жилийн баяр тэмдэглээгүй. Өчигдөр амжилттай ажилласан алба хаагчдаа шагнасан” гэлээ.

ХӨСҮТ-ийн дэд захирал Д.Наранзул мэдээлэл, зөвлөгөө өгч байна.

Нийслэлийн хэмжээнд 2021 оны 01 дүгээр сарын 06-ны байдлаар, амбулаторийн 22.587 үзлэг хийгдсэнээс томуу, томуу төст өвчтэй 356 тохиолдол оношлогджээ. Энэ нь нийт үзлэгийн 1.6 хувийг эзэлж байгаа нь өнгөрсөн 7 хоногийн дундаж түвшнээс 0.3 хувиар нэмэгдсэн, өнгөрсөн оны мөн үеийн түвшнээс 7.9 хувиар буурсан үзүүлэлттэй байна.

Нийт өвчлөгсдийн 41.3 хувийг 0-1 нас, 19.1 хувийг 2-4 нас, 10.4 хувийг 5-9 нас, 3.6 хувийг 10-15 насны хүүхдүүд эзэлж байгаа юм. Хүүхдийн түргэн тусламжийн 555 дуудлага ирснээс 38.0 хувь нь томуу, томуу төст өвчний тусламж, үйлчилгээг авчээ.

Нийслэлийн харьяа эмнэлгүүдийн ачааллаас үзэхэд, хүүхдийн 1123 орон дээр 115 хүүхэд хэвтэн эмчлүүлж байна. Шинээр хэвтсэн өвчтөний 17 буюу 22.4 хувь нь томуу, томуу төст өвчтэй өвчтөнүүд байгаагаас 100.0 хувь нь хүүхдүүд байна. Хүнд өвчтэй хүмүүсийн 4 буюу 10.3 хувийг амьсгалын замын өвчтэй өвчтөнүүд эзэлж байгаа юм.

Томуу, томуу төст өвчин буюу амьсгалын замын цочмог халдвар, мөн коронавируст “Ковид-19” халдвараас урьдчилан сэргийлэх үүднээс эцэг эхчүүд бага насны хүүхдэдээ тавих анхаарал халамжаа сайжруулж, илчлэг сайтай хоол ундаар дархлааг нь дэмжих, дулаан хувцаслах, олон нийтийн газраар дагуулж явахгүй байх, амны хаалт тогтмол зүүлгэж хэвших, өвчилсөн тохиолдолд дур мэдэн эмчлэхгүй байх, ариун цэврийн дэглэм сайтар сахиж, шаардлагатай тохиолдолд эмнэлгийн байгууллагад хандахыг Нийслэлийн Эрүүл мэндийн газраас зөвлөж байна.

Ховд аймгийн Хар-Ус нуур орчим “Шувуун цуглаан” гэх газарт өнгөрсөн арваннэгдүгээр сард нэгэн хотон шувууны баруун далавч гэмтэн, нисэж чадахгүй байдалтай байсныг Ховд аймгийн Жаргалант сумын иргэн, биологич Ц.Ганболд олж шувууг эмчилжээ.

Борцгор хотон нь Амьтны тухай хуульд зааснаар “Нэн ховор” амьтдын жагсаалтад ордог ховор шувуу юм. Сонирхуулахад энэ нь түүний эмчилж байгаа хоёр дахь шувуу гэнэ. Амьтай бүхнийг хайрлан, энэрдэг Монгол хүний холч ухаантай Ц.Ганболддоо баярлалаа гэж БОАЖЯ-наас мэдээллээ.

УИХ-ын гишүүн асан Н.Номтойбаярт холбогдох эрүүгийн хэргийг Улсын Дээд шүүхийн Эрүүгийн хэргийн танхимын хяналтын шатны шүүх хуралдаанаар энэ сарын 8-нд буюу баасан гарагт хэлэлцэхээр товлосон байна. Гэхдээ түүний шүүх хурлыг нээлттэй хийх зүй ёсны шаардлага үүсээд байгаа юм.

Эргэн сануулбал, УИХ-ын гишүүн асан Н.Номтойбаярт Чингэлтэй дүүргийн эрүүгийн хэргийн анхан шатны шүүхээс нийтийн албанд томилогдох эрхийг таван жилийн хугацаатай хасаж, таван жил таван сар хорих ял оноосон юм. Мөн үүнийг Давж заалдах шатны шүүхээс хэвээр үлдээсэн. Ингэхдээ ХНХ-ын сайд, Хөдөлмөр эрхлэлтийн үндэсний зөвлөлийн даргаар ажиллаж байхдаа эрх мэдлээ урвуулж, тогтоол гарган, орон нутаг, нийслэлийн онцлог, хэрэгцээнд нийцүүлсэн нэгж төслийн төсөв өртгийг 200 сая төгрөгт багтаан, нээлттэй зарлах удирдамж баталсан зэргээр гэм буруутайд тооцсон байдаг.