Month: January 2021

2020 оны арваннэгдүгээр сарын байдлаар импортоор орж ирсэн зарим гол бүтээгдэхүүнийг өмнөх оны мөн үетэй харьцуулан үзье. Энэ хугацаанд 545.1 мянган тонн автобензин импортолсон нь 2019 оны мөн үеийн дүнгээс 73.6 мянган тонноор их байна.

Дизель түлшний импортын хувьд 916.8 мянган тонн болж 2019 оны мөн үеийн гүйцэтгэлээс 72.5 мянган тонноор, үнийн дүнгээр 385.6 сая ам.доллар болж өнгөрсөн оны мөн үетэй харьцуулахад 226.5 сая ам.доллароор тус тус буурчээ. 2019 оны эхний 11 сард нэг тонн дизель түлшний импортын дундаж үнэ 618.7 ам.доллар байсан бол 2020 онд 420.6 ам.доллар болж 198.1 ам.доллар буюу 32.0 хувиар буурсан байна.

Арваннэгдүгээр сарын байдлаар 48963 суудлын автомашин, 19235 ачааны автомашин импортоор орж иржээ. Өнгөрсөн оны мөн үетэй харьцуулахад суудлын автомашины импорт 17650-аар, ачааны автомашины импорт 2525-аар тус тус буурчээ.

ЭМЯ, Шуурхай штабаас цаг үеийн асуудлаар мэдээлэл хийлээ. Энэ үеэр Шуурхай штабын дарга Б.Ууганбаяр “Өнөөдөр олон нийтийн дунд Улаанбаатар хотод 0 зогсолт хийнэ гэсэн мэдээлэл гарсан. Коронавирусийн халдвартай холбогдуулан өргөн хүрээнд шинжилгээ авах ажлыг зохион байгуулж байгаа. Баянзүрх дүүрэгт халдвар гарсантай холбогдуулан тус дүүрэгт “Нэг өрх – Нэг иргэн” шинжилгээ хийх ажлыг зохион байгуулсан. Тэгвэл одоо бид нийслэлийн хэмжээнд байгаа нийт 413 мянган өрхөөс шинжилгээ авах ажлыг зохион байгуулахаар судалгаа хийж байна. Харин удирдлагын төвшинд Улаанбаатар хотод 0 зогсолт хийх асуудал яригдаагүй. Өөрөөр хэлбэл, Улаанбаатар хотод 0 зогсолт хийхгүй гэдгийг дахин хэлье. Ийм учир ард иргэд 0 зогсолт хийнэ гэж сандарч, үймэхгүй байхыг зөвлөж байна” гэлээ.

Мэргэжлийн сумо бөхийн, 69 дэх Их аварга Хакүхо М.Даваажаргал коронавирусээр халдварласан байна. Мэргэжлийн сумо бөхийн энэ сарын 10-нд эхлэх тэмцээн явагдах эсэх нь эргэлзээтэй байсан ч 2021 оны анхны башёг зохион байгуулахаар боллоо.

Сумо бөхийн холбооны хэвлэл, мэдээллийн ояката Шибатаяма: “2021 оны нэгдүгээр сарын тэмцээнийг зохион байгуулна. Токиод халдварын тоо нэмэгдсээр байгаа тул Засгийн газар, Токио хотын захиргааны шийдвэр гарсны дараа үзэгчтэй хийх эсэхийг шийднэ. Тэмцээний өмнө холбооны бүх ажилтан, бөх, үсчин, засуул нарыг PCR шинжилгээнд хамруулна. Энэ шинжилгээний хариуг үндэслэж, энэ сарын 9-нд барилдааны оноолтыг гаргана.

Их аварга Хакүхогийн дэвжээний бүх хүнийг шинжилгээнд хамруулсан. Миягино ояката, бусад 16 бөхийн хариу сөрөг гарлаа. Тус дэвжээний бөхчүүдэд өөрийгөө тусгаарлах үүрэг өгсөн. Одоогоор уг дэвжээний бөхчүүдийг Хацү башёд барилдуулах эсэхийг хэлэх боломжгүй. Учир нь тэд нэгдүгээр хавьтлын хүмүүст тооцогдож байгаа. Минато дэвжээний засуул халдвар авсан. Гэхдээ тэдний дэвжээний бөхчүүдийн хариу бүгд сөрөг гарсан” гэж мэдээлжээ. Өнгөрсөн жилийн Намрын тэмцээний өмнө Тамаонои дэвжээнд халдвар голомтлон гарч, 24 бөх халдвар авахад тус дэвжээний бөхчүүдийг барилдуулаагүй ч банцүкэг нь буулгаагүй юм.

Өнгөрсөн онд болон энэ оны эхээр амьсгалын замын өвчлөл 5 дахин буурсан үзүүлэлт гарчээ.

Амьсгалын замын эмгэгийн үед хэрэгжүүлж буй Нийгмийн эрүүл мэндийн интервенци буюу хөл хорио, гар угаах, амны хаалт зүүх, зай барих дэглэмийн үр дүн гэдгийг Эрүүл мэндийн сайдын зөвлөх О.Чимэдсүрэн ЭМЯ-наас хийсэн мэдээллийн үеэр танилцууллаа.

Амьсгалын тогтолцооны өвчин 10 мянган хүн ам тутамд 2017-2019 онд 66 хүн эмнэлэгт хэвтдэг байсан бол энэ жилийн хувьд 12 хувь буюу 6 дахин буурсан байна. Мөн эмнэлэгт хэвтэн эмчлүүлэгчдийн хувь 10 дахин буурсан байна. Энэ дотроо амьсгалын замын болон уушгины хатгалгаа буурсан.

Түүнчлэн Засгийн газар, ЭМЯ-наас “COVID-19”-тэй эрэгцэн томуу, томуу төст өвчин идэвхжихээс урьдчилан сэргийлэн 2020 онд томуугийн вакцинд 600 мянга орчим зорилтот бүлгийн иргэдийг хамруулсан нь ихээхэн үр дүн гэж үзэж байна.

НӨАТ-ын 2020 оны дөрөвдүгээр улирлын төлбөрийн баримтаа энэ сарын 8-ны дотор багтаан бүртгүүлэхийг татварын байгууллагаас мэдээлж байна. Иргэд өнгөрсөн оны сүүлийн улирлын буюу 10 дугаар сарын 1-нээс 12 дугаар сарын 31-ний хооронд худалдан авалт хийсэн баримтаа И-Баримт-ын системд бүртгүүлснээр дөрөвдүгээр улирлын урамшууллаа авах боломжтой.

Өмнөх улирлын НӨАТ-ын худалдан авалтын буцаан олголтын мөнгийг дараа улирлын эхний сард багтаан иргэдийн бүртгэлтэй данс руу шилжүүлдэг хуультай. Тиймээс заасан хугацаанд худалдан авалтын төлбөрийн баримтаа нэгдсэн системд бүртгүүлээгүй тохиолдолд худалдан авалтад төлсөн албан татварын 20 хүртэл хувийг буцаан олгохгүй юм.

Налайх дүүргийн Онцгой комиссын өнөөдрийн шийдвэрээр, тус дүүрэгт хөдөө орон нутаг болон нийслэлийн бусад дүүргийн харьяат иргэнийг PCR шинжилгээний бичгээр нэвтрүүлэх болжээ.

Дүүргийн Онцгой комиссын шийдвэрээр, зөвхөн PCR шинжилгээ өгсөн иргэнийг “Оргил налайх” товчоогоор нэвтрүүлэх шийдвэр гарсныг өмнө нь мэдээлсэн. Тэгвэл дээрх шийдвэрт ийнхүү өөрчлөлт оруулж нийслэлээс тус дүүргийг зорих Налайх дүүргийн харьяат иргэн иргэний үнэмлэхээ үзүүлснээр товчоогоор саадгүй нэвтрэхээр боллоо.

Иймд Улаанбаатараас Налайх чиглэлд зорчих Налайх дүүргийн харьяат иргэн иргэний бичиг баримт, ажлын үнэмлэх, хөдөө орон нутгийн болон бусад дүүргийн харьяат иргэн заавал PCR шинжилгээний бичигтэй байх шаардлагатай юм. PCR шинжилгээний бичиг 72 цагийн хугацаанд хүчинтэй байх ажээ.