Month: January 2021

Categories
амьдралын-өнгө мэдээ нийгэм

ДОРНОГОВЬ АЙМАГ САЙХАНДУЛААН СУМ Адуун сүрэгт хулангийн унага нийлжээ

Дорноговь аймгийн Сайхандулаан сумын малчин Г.Гүнсэндоржийн адуун сүрэгт хулангийн унага нийлжээ. Хуланг Монголын говийн эко системийг бүрэн илэрхийлэгч амьтан гэж мэргэжлийн судлаачид үздэг. Том толгойтой, урт чихтэй, шингэн сүүлтэй хул голдуу зүстэй хуланг монгол адуутай харьцуулахад биеийн галбир муутай харагддаг. Хулан Алтайн өвөр говь, Өмнөговь, Дорноговийн баруун хэсэг, Дундговийн урд хэсэгт идээшилдэг бөгөөд тархалт нь 1990-ээд онд эрс хумигдан 1994-1997 оны судалгаагаар Монголын өмнөд нутгаар нийт 33000-63000 толгой хулан тархсаныг тооцоолсон байна. 2003 онд шинэ судалгаагаар Монголын өмнөд нутгаар 177563 ам/км нутагт 20000 толгой хулан байгааг тооцоолсон аж.

Categories
гадаад мэдээ

Индонезийн Боинг 737 онгоцны унасан байршлыг тогтоожээ

Индонезийн Боинг 737 зорчигч тээврийн онгоц өчигдөр нийслэл Жакартагаас хөөрснийхөө дараа далайд унаж сүйрсэн байсан. Уг онгоцны унасан байршлыг тогтоожээ.

Sriwijaya Air компанийн агаарын хөлөг Баруун Калимантан мужийн Понтианак руу 62 хүн тээвэрлэж явсан ба хөөрснөөс хойш дөрвөн минутын дараа радараас алга болжээ. Осол болсон байршил руу шумбагчдыг тээвэрлэсэн 10 гаруй усан онгоцыг илгээгээд байна. Мөн онгоцны эд анги байж болох зүйлсийг шинжээчид олж, шинжилж байгаа аж.

Онгоцны эд анги байж болох зүйлсийг шинжээчид шинжилж байна

Жакартагийн нисэх буудлаас 20 км зайтай Лаки арлын орчимд онгоц унасныг тогтоосон байна. Ослын газарт аврагчдыг илгээсэн бөгөөд хүн амьд гарсан эсэх нь тодорхойгүй байна.

Осолдсон Boeing 737-500 загварын нисэх онгоц нь 27 жил ашиглагдаж байгаа хуучин онгоц гэнэ. Онгоцыг эзэмшигч Сривижаяа Айр компани нь 2003 онд байгуулагдсан, Индонезийн дотоод чиглэлүүдэд ихэвчлэн нислэг үйлддэг байна. Тус компани өмнө нь осол эндэгдэл гаргаж байсан түүхгүйг Aviation Safety Network олон улсын нислэгийн аюулгүй байдлын мэдээллийн сан харуулж байгаа юм.

Boeing 737-500 загвар нь саяхан программын доголдлын улмаас нисэхийг нь хориглож байсан 737 MAX загвараас хоёр үеийн өмнөх хуучин онгоц. 2018 онд Индонезийн Lion Air компанийн 189 хүнтэй 737 MAX загварын онгоц осолдсон нь дээрх доголдлоос болсон гэж үздэг юм. Иргэний агаарын тээврийн нисэх онгоцнуудыг 25 жил нисгээд ашиглалтаас гаргадаг. Хэдийгээр энэ үед онгоцыг ашиглах техникийн боломжтой байдаг ч засвар үйлчилгээний зардал нь шинэ нисэх онгоц авснаас өндөр болдог тул эдийн засгийн учир шалтгааны улмаас зогсооход хүрдэг байна.

Алга болсон иргэдийн ар гэрийнхэн нь Понтианакийн нисэх буудалд шинэ мэдээ сонсохоор хүлээн сууж байна

Индонезийн агаарын тээвэрлэгчид олон улсын нислэгийн аюулгүй байдлын стандартыг хангаж чаддаггүйгээрээ алдартай. 1990-ээд оны сүүлээр гарсан олон удаагийн ослын дараа 2007 онд Европын Холбоо Индонезийн компаниудын бүх нислэгийг хориглосноо дөнгөж 2018 онд цуцалсан юм. 2007-аас 2016 онд АНУ-ын засаг захиргаа Индонез улсын нислэгийн аюулгүй байдлын зэрэглэлийг хоёрдугаар категорт бууруулж байжээ.

Categories
гадаад мэдээ онцлох-нийтлэл туслах-ангилал

Дэлхий даяар коронавирусийн халдвар авсан хүний тоо 90 сая даваад байна

Дэлхий даяар коронавирусийн халдвар илэрсэн хүний тоо 90 сая давсан талаар worlodometers сайт мэдээлжээ.

Халдвар бүртгэгдсэн тоогоор

  • АНУ-22,1 сая
  • Энэтхэг-10,4 сая
  • Бразил-8 сая
  • Орос-3,3 сая
  • Их Британи-3 сая тохиолдолтойгоор эхний тавд бичигдэж байна.

Улс орнуудын нөхцөл байдлын талаарх товч мэдээ:

  • Их Британид нөхцөл байдал тун тааруу байгаа талаар ВВС мэдээллээ. Тус улсад бямба гарагт 60 мянган хүнээс халдвар илрүүлсэн ба 1035 хүн нас баржээ. Ингэснээр тус улсад бүртгэгдсэн нийт нас баралтын тоо 80 мянга даваад байна.
  • 85 настай Ромын пап Франциск ирэх долоо хоногт вакцин хийлгэхээр болжээ. Түүний дараа Ватиканы шашны бусад төлөөллүүдэд хийх гэнэ.
  • Дэлхийд халдварын тохиолдлоороо хоёрдугаарт, нас баралтын тоогоор гуравдугаарт бичигдэж буй Энэтхэг улс энэ сарын 16-наас вакцинжуулалтаа эхлүүлнэ. Тус улсын Ерөнхий сайд Нарендра Модигийн хэлснээр 1,3 тэрбум хүн амтай тус улс долоодугаар сар гэхэд 300 сая хүнээ вакцинжуулах төлөвлөгөөтэй байгаа юм. Тус улс Европын AstraZeneca болон өөрийн улсын Bharat Biotech компанийн Covaxin вакциныг хийхээр төлөвлөж байна.
  • Испани улс цар тахлын хажуугаар байгалийн гамшигтай тэмцэж байна. Их хэмжээний цас орсноос зам гүвээ хаагдаж, нислэгээ зогсоожээ. Зарим бүс нутагт түргэн тусламж саатаж, эмнэлгүүд цахилгаан эрчим хүчний доголдол гарч болзошгүй хэмээн болгоомжилж байна. Тус улсад нийт 2 сая гаруй халдвар авч, 51,8 мянган хүн нас баржээ.
Categories
мэдээ цаг-үе

Үндэсний цэцэрлэгт хүрээлэнг маргааш нээнэ

Цэцэрлэгт хүрээлэн дэх өвөл

Үндэсний цэцэрлэгт хүрээлэнгийн үйл ажиллагааг маргааш нээнэ хэмээн Нийслэлийн Засаг даргын орлогч Ж.Сандагсүрэн мэдээллээ. Тэрээр, “ҮЦХ-нд байрладаг үйчилгээний байгууллагууд ажиллахгүй, иргэд зөвхөн гэр бүлээрээ агаарт гарах нөхцөлийг бүрдүүлжээ.

Мөн салхинд гарах иргэдийн бөөгнөрөл үүсгэхгүйн тулд холбогдох мэргэжлийн байгууллагуудын хяналт дор тодорхой маршрутыг нээнэ. Гэхдээ хамт олноороо биш зөвхөн гэр бүлээрээ, хэт олон хүний бөөгнөрүүлэхгүйгээр хяналт тавин ажиллана” гэлээ.

Categories
мэдээ улс-төр

Ардчилсан намын ҮБХ цахимаар хуралдана

Ардчилсан намын үндэсний бодлогын хороо /ҮБХ/-ны ээлжит бус цахим хуралдаан өнөөдөр болно. Энэ сарын 8-нд буюу өнгөрөгч баасан гарагт Ардчилсан намын “Цахим зөвлөлдөх уулзалт” зохион байгуулагдсан бөгөөд УИХ-ын гишүүн С.Одонтуяа, Улсын баатар С.Бат-Үүл нарын 200 гаруй ҮБХ-ны гишүүн оролцсон юм.

Тус “Цахим зөвлөлдөх уулзалт”-д оролцсон ҮБХ-ны гишүүд үндсэн гурван асуудлын хүрээнд санал солилцсон бөгөөд ҮБХ-ны ээлжит бус цахим хуралдааныг яаралтай зохион байгуулах шаардлагатай гэж үзсэн байна. Тиймээс өнөөдөр ҮБХ-ны ээлжит бус хурал цахимаар зохион байгуулагдахаар боллоо. Энэ удаагийн ҮБХ-ны гишүүдийн ээлжит бус цахим хуралдаан Ардчилсан намын Үндсэн дүрмийн хүрээнд зохион байгуулагдаж байгаа аж.

Цахимаар хуралдах ҮБХ-ны хуралдаанаар дараах асуудлыг хэлэлцэнэ:

  • Намын байгууллагуудын хурлын үйл ажиллагаа, зохион байгуулалт, дэгийн тухай журамд “Цахим хурлын дэгийн тухай” нэмэлт оруулах тухай,
  • ҮБХ-ны гишүүдийн бүрэн эрхийг хүчинтэйд тооцох тухай,
  • Намын гишүүдийг татвараас чөлөөлөх тухай,
  • Сонгуульт гишүүдийн татвар бууруулах тухай,
  • Бусад
Categories
мэдээ нийгэм

“Сонгдо” эмнэлгийн ажилтнаас коронавирус илэрч, 160 хүнээс шинжилгээ авчээ

“Сонгдо” эмнэлгийн ажилтнаас коронавирус илэрсэн талаар ХӨСҮТ-ийн Тандалт, судалгааны албаны дарга А.Амбасэлмаа хэллээ.

Тэрбээр “Өнөөдөр шинээр илэрсэн 21 тохиолдлын нэг нь эрүүл мэндийн ажилтан, нэг нь гаднаас зөөвөрлөгдсөн тохиолдол байна. Харин үлдсэн 19 нь сүүлийн үед бүртгэгдээд буй кластер халдварын голомтын хавьтлууд байна.

Тодруулбал, 8 тохиолдол нь Баянгол дүүргийн 6 дугаар хорооны оршин суугчид. Түүнчлэн “Мөнххада” компанийн ажилтны гэр бүлийн 4 хүний шинжилгээнд коронавирус илэрсэн бол “Ачтан” эмнэлгээс гаралтай голомтын гэр бүлийн хавьтлуудын шинжилгээнд коронавирус илэрсэн байна.

Тухайн эмнэлгийн ажилтны гэр бүлийн хавьтлуудаас коронавирус илэрсэн нэг хүн нь “Сонгдо” эмнэлэгт лабораторийн эмчээр ажилладаг.

“Сонгдо” эмнэлэгт тухайн иргэний хавьтлууд нь байгаа учраас тус эмнэлгийн нийт эмч, ажилчдаас шинжилгээ авч эхэлсэн.

Өчигдөр эмч ажилчид болон үйлчлүүлэгч гээд нийт 160 хүнээс шинжилгээ аваад байгаа бөгөөд шинжилгээ хийх явц үргэлжилж байна” гэв.

Categories
мэдээ нийгэм

Афганистанаас ирсэн энхийг сахиулагчаас “COVID-19”-ийн халдвар илэрч, зөөвөрлөгдсөн тохиолдол 409 боллоо

Сүүлийн 24 цагийн хугацаанд коронавирусийн халдвар илрүүлэх зорилгоор хийсэн шинжилгээний хариуг ХӨСҮТ-өөс танилцууллаа.

ХӨСҮТ-ийн Тандалт, судалгааны албаны дарга А.Амбасэлмаа “Нэгдүгээр сарын 9-ний өдөр улсын хэмжээнд 22,993 хүнд PCR шинжилгээ хийхэд 21 хүнээс коронавирусийн халдвар илэрлээ.

Шинээр илэрсэн тохиолдлууд

-Нэг нь Афганистанаас ирсэн энхийг сахиулагчаас илэрсэн. Ингэснээр зөөвөрлөгдсөн тохиолдол 409 болж байна.

-ХӨСҮТ-ийн нэг сувилагчаас илэрсэн.

19 нь шинээр үүсээд байгаа кластер голомтоос бүртгэгдсэн. Үүнд: БГД-ийн 6 дугаар хорооны 65, 12 дугаар байрны хүмүүсийн хоёр дахь давтан шинжилгээнээс 8 хүнд халдвар илэрсэн Голомт идэвхтэй байгаа Мөнххада компанийн нэг ажилтны гэр бүлийн 4 хүнээс,

“Ачтан” эмнэлгийн нэг ажилтны гэр бүлийн хавьтлуудаас илэрсэн. Үүний нэг нь “Сонгдо” эмнэлгийн лабораторийн эмч ажилтай хүн байсан тул тус эмнэлгийн эмч ажилчид, зааланд үйлчлүүлж байсан 160 хүнээс шинжилгээ авсан. Шинжилгээ үргэлжилж байна. Ийнхүү улсын хэмжээнд COVID-19-ийн батлагдсан тохиолдол 1,429 боллоо. Үүнээс дотоодын халдвар 1,020 болж байна.

Сүүлийн 24 цагийн дотор Сэлэнгэ, Дархан-Уул, Говьсүмбэр, Орхон, Архангай, Дорноговь аймгийн голомтоос батлагдсан тохиолдол бүртгэгдээгүй.

Categories
амьдралын-өнгө мэдээ нийгэм

СЭЛЭНГЭ АЙМАГ: 178 иргэн эдгэрч, сувиллын хяналтад гурав, гэрийн ажиглалтад 53 иргэн шилжжээ

Шинэ он гарсаар Сэлэнгэ аймагт коронавирусийн халдварын тохиолдол нэмж бүртгэгдээгүй. Аймгийн нэгдсэн эмнэлгийн вируслогийн лабораторид хийсэн 128 хүний PCR шинжилгээний хариу бүгд сөрөг гарчээ.

Цар тахлын энэ цаг үед юу юунаас илүү иргэн хүний үүрэг, хариуцлага хамгаас чухал гэдгийг аймгийн Онцгой комиссоос онцгойлон анхааруулж байна. Өнөөдрийн байдлаар аймгийн нэгдсэн эмнэлгийн “Ковид”-ын тасагт 18 өвчтөн эмчлүүлж байгаа бөгөөд тэдний биеийн байдал хөнгөн байна. Гурван иргэний эмчилгээ дуусч, дараагийн шатны сувилалд шилжээд байгаа гэнэ. Нийт батлагдсан тохиолдлын ойрын хавьтлын 1486, дам хавьтлын 974 иргэнийг тусгаарлалт, ажиглалтын хяналтад авчээ. Эдгээр иргэдийг тусгаарлалт, ажиглалтын хугацаанд шинжилгээнд тогтмол хамруулж, тусгаарлалтын 14, гэрийн ажиглалтын 14, нийт 28 хоногийн хяналтын хугацааг гүйцээж байна. Түүнчлэн тусгаарлалт ажиглалтын хугацаа дууссан ойрын хавьтлын 1458 иргэнийг хяналтаас гаргажээ. Одоогийн байдлаар ойрын хавьтлын 28 иргэн тусгаарлалт, ажиглалтад хянагдаж байна. Сэлэнгэ аймгийн хэмжээнд ойрын өдрүүдэд нийслэл хотод эмчлүүлж эдгэрсэн иргэдээ татан авах ажлыг зохион байгуулж байна. Өнөөдрийн байдлаар нийт батлагдсан тохиолдлын 82 хувь буюу 178 иргэн эдгэрч, сувиллын хяналтад гурав, гэрийн ажиглалтад 53 иргэн шилжжээ. Аймгийн хэмжээнд бүрэн эдгэрсэн 122 иргэн хяналтаас гарлаа.

Categories
мэдээ спорт цаг-үе

Монголын баг “PUBG MOBILE” дэлхийн аваргын тэмцээнд өрсөлдөнө

Арабын Нэгдсэн Эмират Улсын Дубай хотын “Кока-Кола” цэнгэлдэх хүрээлэнд цахим спортын “PUBG Mobile” дэлхийн аварга шалгаруулах тэмцээн энэ сарын 21-24-ны хооронд болно.

Үүнд Монголын “ZEUS Esports” баг өрсөлдөхөөр Хүннү Эйр авиа компанийн онгоцоор Дохад буугаад байна. Тус багийн бүрэлдэхүүнд О.Бат-Оргил, С.Ундрах, Б.Золбоот, Н.Дулаанжаргал, Б.Тэнгис, Б.Билгүүн нар багтсан аж.

Монгол улсаа төлөөлөн оролцох ZEUS Esports багийн хувьд өнгөрсөн оны арваннэгдүгээр сард зохион байгуулагдсан “PUBG Mobile Club Open Fall Split 2020–WildCard Finals” тэмцээний аваргаар тодорч дэлхийн аваргад өрсөлдөх 24 багийн нэгээр тодорсон юм.

  1. Н.Дулаанжаргал “ABELY” – IGL
  2. Б.Тэнгис “ICY” – FRAGGER , SCOUT
  3. Б.Золбоот “ZYOL” – FRAGGER
  4. Б.Билгүүн “GODLESS” – ATTACKER
  5. ZELME – MANAGER , CONTENT MAKER нарын бүрэлдэхүүнтэй Дубай хотыг зорьсон.

Багийн үндсэн бүрэлдэхүүн:

  1. С.Ундрах “UNDAAK” багийн ахлагч
  2. О.Бат-Оргил “RONIN” аналист
  3. Намуун EDITOR DESIGNER
  4. “CRYSTAL” менежер
  5. YouTube Channel:
  6. FaceBook page
  7. Instagramm
Categories
гадаад мэдээ

Их Британийн хатан хаан нөхрийн хамт коронавирусийн эсрэг вакцин тариулжээ

Их Британийн хатан хаан II Элизабет болон түүний нөхөр Эдибургийн гүн нар өчигдөр коронавирусийн эсрэг вакцин тариулжээ. Вакциныг хааны гэр бүлийн хувийн эмч хийсэн талаар Букинхэмийн ордноос мэдээлжээ.

Өдгөө 94 настай хатан хаан, 99 настай Филипп хунтайж нар Виндзор дахь эдлэндээ амьдарч байгаа бөгөөд цар тахал эхлэх үед л тэд бараа бологч нарын хамт тийш нүүсэн байна. Хатан хаанд вакцин хийсэн талаар олон нийтэд мэдээлэхийг тэрбээр өөрөө хүссэн гэнэ. Учир нь Их Британид олон нийтийг дархлаажуулах аян эхлэх үед нийгэмд хааны гэр бүл ямар учир шалтгаанаар вакцин хийлгэхгүй байгаад иргэд гайхжээ. Тиймээс нийгэмд цаашид эргэлзээ төрүүлэхгүйн тулд вакцин хийлгэсэн гэж үзэж байгаа юм.

Одоогоор тус улсад “Covid-19”-ийн эсрэг вакцины эхний тунг 1,5 сая иргэнд хийсэн бөгөөд эхний ээлжид өндөр настай болон эмнэлгийн ажилтнуудад тарьжээ. Өнгөрсөн оны гуравдугаар сараас аравдугаар сар хүртэл хатан хаан олон нийтийн өмнө ил гараагүй аж. Харин аравдугаар сарын 15-ны өдөр буюу долоон сарын дараа ач хүү, хунтайж Уиллиамтай хамт цэргийн Портон-Даун лабораторит очиж ажилтнуудтай нь уулзсан байна. Тухайн үед хатан хаан амны хаалт зүүгээгүй байжээ.