Month: January 2021

Categories
гадаад мэдээ

ОХУ-д хоёр онгоц мөргөлдөж гурван хүн амиа алджээ

ОХУ-ын Санкт-Петербург хотоос 63 км-ийн зайд хоёр нисэх онгоц мөргөлдсөний улмаас гурван хүн газар дээрээ нас барж, нэг хүн гэмтжээ. Тус улсын Онцгой байдлын яамнаас мэдээлснээр осол нэгдүгээр сарын 8-нд гарсан бөгөөд Ленинград мужийн Ломоносов дүүргийн нутаг дэвсгэрт орших “Гостилитса” онгоцны буудлын талбай дээр бэлтгэлийн нислэг хийж байсан хоёр онгоц мөргөлдсөн байна. Урьдчилсан шалгалтаар “Сессна” гэх онгоцонд нэг л нисгэгч байсан ба бага зэргийн гэмтэл авчээ. Харин сүүлд ирж мөргөсөн “Paper” нэртэй онгоцонд нисгэгчээс гадна хоёр хүн зорчиж байсан бөгөөд гурвуулаа нас барсан байна.

Одоогоор цагдаагийн байгууллага ослын шалтгааныг тогтоохоор мөрдлөг хийж байгаа аж.

Categories
мэдээ утга-зоxиол

“Алтан өд-2020” наадмын бүртгэл эхэллээ

Утга зохиолын оны шилдэг бүтээл шалгаруулах “Алтан өд-2020” наадмын бүртгэл өнөөдөр (2021.01.11) эхэллээ. Тус наадам нь энэ жил 20 дахь удаагаа зохион байгуулагдах юм. Энэхүү наадмыг анх утга зохиолын төрөл зүйлийг жигд хөгжүүлэх зорилгоор зохион байгуулсан түүхтэй.

Ууган наадмын яруу найргийн том хэмжээний бүтээлд Ардын уран зохиолч Б.Лхагвасүрэн, богино хэмжээний бүтээлийн төрөлд Д.Нямсүрэн нар тус тус түрүүлж, “Алтан өд”-ийн эзэн болж байв.

Зохиолчид яруу найраг, хүүрнэл зохиолын богино хэмжээний бүтээл, хүүрнэл зохиолын томоохон хэмжээний бүтээл, жүжиг, киноны зохиол, хүүхдийн зохиол, утга зохиолын судлал, шүүмж, утга зохиолын орчуулга, баримтат, уран зохиолын бүтээл гэсэн төрлүүдээр оюуны бүтээлүүдээ уралдуулах боломжтой юм. Шалгаруулалтад дэвшүүлэх бүтээлийг энэ сарын 15-ны өдрийг хүртэл МЗЭ-ийн хорооны байранд хүлээн авах ажээ.

Categories
мэдээ нийгэм

​Улсын хэмжээнд 2020 онд 76 мянган эх амаржсан байна

Улсын хэмжээнд 2020 онд 75.7 мянган эх амаржсан байна. Энэ нь өмнөх оноосоо 2.5 хувиар буюу 1,907-гоор буурсан үзүүлэлт юм.

Амаржсан эхчүүдийн 55.6 мянга нь 6 ба түүнээс дээш удаа жирэмсний хяналтад хамрагдсан нь өмнөх оны мөн үеэс 1,700-гаар буурчээ. Нийт амаржсан эхчүүдийн 236 нь гэртээ төрсөн нь өмнөх оноос 7-гоор нэмэгдсэн байна.

Улсын хэмжээнд 2020 оны 12 дугаар сард 6,310 эх амаржиж, өмнөх сараас 278 (4.6%)-аар нэмэгджээ.

Харин 2020 онд улсын хэмжээнд нас баралтын 16 мянган тохиолдол бүртгэгдсэн байна. Нийт нас баралтын 4,463 нь эмнэлэгт, 11,461 нь гэрийн (бусад газарт) нас баралт байна. Нийт нас баралт өмнөх оноос 7.4 хувиар буурчээ.

Үндэсний статистикийн хороо
Categories
гадаад мэдээ

Индонезийн осолдсон нисэх онгоцны хар хайрцгийг олжээ

Албаны хүмүүсийн хэлснээр бол Ява тэнгист сүйрсэн “Боинг 737” онгоцны хар хайрцагны байгаа газрыг олж тогтоожээ. “Хөлгийн дотор байдаг хоёр хар хайрцагны байрлалыг хоёуланг нь олж тогтоосон. Ойрын үед гаргаж авна гэж найдаж байна” гэж Индонезийн Тээврийн аюулгүй байдлын зөвлөлийн тэргүүн Суржанто Тьяжоно хэлсэн байна. Хар хайрцгийг гаргаж авах ажиллагааг өнөөдөр зохион байгуулах аж. Ослын газар өргөн бүрэлдэхүүнтэй эрэн хайх аврах баг ажиллаж онгоцны үлдэгдэл, хүмүүсийн цогцсыг гаргаж авах ажлыг гүйцэтгэж байна. Онгоцонд 50 зорчигч, хөлгийн багийн гишүүн 12, нийт 62 хүн сууж явсан бөгөөд бүгд амь үрэгдсэн юм.

Categories
мэдээ нийгэм

IV цахилгаан станцын өргөтгөлийн нээлт болж байна

Дөрөвдүгээр цахилгаан станцын өргөтгөлийн нээлт болж байна. “ДЦС IV” ТӨХК-ийн турбогенератор №3-ын шинэчлэлтийн ажил дуусаж, ажиллагаанд залгалаа. Ингэснээр “ДЦС IV” ТӨХК-ийн цахилгаан эрчим хүч үйлдвэрлэх хүчин чадал 110 МВт-аар нэмэгдэх юм байна.

Categories
мэдээ улс-төр

Ч.Хүрэлбаатар: Би “Оффшорын мөнгө орж ирээгүй” гэж хэлсэн. Харин төсөв мөнгөгүй гэж хэлээгүй

Монгол Улсын Ерөнхийлөгч Х.Баттулга “Өрх бүрд нэг сая төгрөг”-ийн тэтгэлэг олгох бодлого, арга хэмжээг хэрэгжүүлэх “Коронавируст халдварын цар тахлаас үүдэлтэй амьдралын доройтол, нийгэм, эдийн засгийн бэрхшээлийг даван туулах онцгой арга хэмжээний тухай” УИХ-ын тогтоолын төслийг боловсруулж, өнгөрсөн долоо хоногт УИХ-ын дарга Г.Занданшатарт өргөн барьсан.

Тодруулбал оффшор бүсээс орж ирсэн мөнгөн хөрөнгийг Монголбанканд төрийн сангийн тусгай данс нээн байршуулахаар заасан байв. Тэгвэл Сангийн Сайд Ч.Хүрэлбаатар өнөө өглөө өөрийн сошиал хуудсандаа “Зөвхөн Төрийн сан төдийгүй Монголд оффшорын гэгдэх мөнгө огтхон орж ирээгүй гэдгийг баталж өглөө. Харин “оффшорын мөнгө” нэрээр Монголбанкаар мөнгө хэвлүүлж тараалгавал төгрөгийг ханш 2012-2016 онд 2 дахин унасан түүх давтагдана. Би төрийн санд “оффшорын мөнгө” орж ирээгүй гэж хэлсэн, харин төсөв мөнгөгүй гэж хэлээгүй. Коронагийн цар тахалтай, амаргүй энэ цаг үед төсвийн хатуу сахилга бат, татвар төлөгч нарын хичээл зүтгэлээр өндөр хүүтэй, богино хугацаатай зээл авахгүйгээр болж л бна. Цаашдаа ч болгоно” хэмээн жиргэжээ.

Categories
мэдээ нийгэм

Баянгол дүүргийн 18300 хүний шинжилгээний хариу гарснаас 8 хүнд коронавирус илэрлээ

ХӨСҮТ-ийн Тандалт, судалгааны албаны дарга А.Амбасэлмаа “1 сарын 10-ны өдөр 14261 хүнд PCR шинжилгээ хийхэд 13 хүнээс коронавирус илэрлээ. Бүгд УБ хотод бүртгэгдлээ. Тэнүүн-Огоо, Мөнххада, Ачтан эмнэлгийн голомттой холбоотой ойрын хавьтлуудын давтан шинжилгээгээр коронавирус илэрлээ.

Баянгол дүүргийн 20186 хүнийг шинжилгээнд бүрэн хамрууллаа. Өнөөдрийн байдлаар 18300 хүний шинжилгээний хариу гарснаас 8 хүнд коронавирус илэрлээ.

Categories
мэдээ цаг-үе

ХӨСҮТ: Улаанбаатарт 13 тохиолдол бүртгэгдэж, нийт халдварын тоо 1442 боллоо

Коронавируст халдварын нөхцөл байдлын талаар Эрүүл мэндийн яам ээлжит мэдээллээ хүргэж байна.

ХӨСҮТ-ийн Тандалт, судалгааны албаны дарга А.Амбасэлмаа “1-р сарын 10-ны өдөр 14216 хүнд PCR шинжилгээ хийхэд Улаанбаатарт 13 хүнээс вирус илэрлээ. Тэдгээр нь өмнөх батлагдсан тохиолдлуудын давтан шинжилгээгээр илэрсэн. Монгол Улсад бүртгэгдсэн нийт халдварын тоо 1442 боллоо”гэв.

Categories
мэдээ нийгэм

Өнөөдөр нэг, зургаагаар төгссөн дугаартай тээврийн хэрэгсэл хөдөлгөөнд оролцохгүй

Нийслэл дэх хөл хориог сулруулсантай холбоотойгоор өнөөдөр буюу нэгдүгээр сарын 11-ний даваа гарагаас QR код үйлчлэхгүй, дугаарын хязгаарлалтаар хөдөлгөөнд оролцоно гэж Нийслэлийн Засаг даргын орлогч Ж.Сандагсүрэн мэдээлсэн билээ. Өөрөөр хэлбэл, ажлын өдрүүдэд дугаарын хязгаарлалт үйлчилж, амралтын өдөр үйлчлэхгүй байх шийдвэр хэвээрээ юм.

  • Нэг, зургаагаар төгссөн дугаартай тээврийн хэрэгсэл Даваа гаригт;
  • Хоёр, долоогоор төгссөн дугаартай тээврийн хэрэгсэл Мягмар гаригт;
  • Гурав, наймаар төгссөн дугаартай тээврийн хэрэгсэл Лхагва гаригт;
  • Дөрөв, есөөр төгссөн дугаартай тээврийн хэрэгсэл Пүрэв гаригт
  • Тав, тэгээр төгссөн дугаартай тээврийн хэрэгсэл Баасан гаригт зорчино.
Categories
мэдээ эдийн-засаг

Дэлхийн банк Монгол Улсын нийт өр гурав дахин өссөнийг анхааруулжээ

Covid-19 цар тахал Монгол Улсын эдийн засагт нэгдүгээрт, төлбөрийн тэнцлийн сувгаар, хоёрдугаарт, орлогын сувгаар, гуравдугаарт, зээлийн сувгаар тус тус нөлөөлсөөр байна.

Дэлхийн банк Монгол Улсын эдийн засаг 2020 онд 5.2 хувиар агшсан гэж таамагласан нь өнгөрсөн оны зургадугаар сард гаргасан таамгаас 4.7 нэгж хувиар доошлуулсан үзүүлэлт юм. Энэ онд манай улсын эдийн засгийг 4.3 хувиар өснө гэж таамагласан нь өмнөх таамгаас 0.6 нэгж хувиар доошлуулсан дүн болов.

Эдийн засгийн идэвхжил буурч, нийгмийн халамжийн зарцуулалт нэмэгдсэнээр бүс нутгийн Засгийн газруудын өрийн хэмжээ өсч буйг онцлон тэмдэглэсэн байна. Тухайлбал: Монгол, Малайз, Лаос зэрэг орнуудын Засгийн газрын өрийн дотоодын нийт бүтээгдэхүүнд эзлэх хэмжээ 60 хувь давжээ.

Дэлхийн банкнаас Монгол Улс, БНХАУ-д төр, хувийн хэвшлийг багтаасан нийт өрийн хэмжээ дотоодын нийт бүтээгдэхүүнээс бараг гурав дахин өндөр болсныг анхааруулсан байна.