Эх орондоо буцах хүсэлтэй иргэдийн бүртгэлийг Монгол Улсаас БНХАУ-д суугаа Дипломат төлөөлөгчийн газруу шинэчлэн, УОК-т хүргүүлэхээр ажиллаж байгаатай холбогдуулан нутаг буцах хүсэлтэй хүмүүсийн бүртгэлийг шинээр хийхээр болжээ.

Иймээс нутаг буцах хүсэлтэй иргэд ажлын өдрүүдийн 09.00-17.00 цагийн хооронд өөрийн оршин сууж буй хот, мужийг хамаарч буй ДТГ-т хандан 2021 оны 1 дүгээр сарын 13-ны өдрийн дотор бүртгүүлэх шаардлагатай юм байна.

• Бээжин дэх ЭСЯ: 18515969636
• Хөххот дахь ЕКГ: 17678002262
• Шанхай дахь ЕКГ: 13162982596
• Эрээн дэх КГ: 15647964334
• Манжуур дахь КГ: 17847012428

Тээврийн цагдаагийн албанаас Улаанбаатар хотоос орох, гарах хөдөлгөөний талаар мэдээлэл өгч байна.

Тээврийн цагдаагийн албаны Урьдчилан сэргийлэх хэлтсийн дарга, цагдаагийн хошууч Э.Энхболд “Өнөөдрөөс бүх нийтийн бэлэн байдлыг бууруулж байгаа ч эм, эмнэлгийн хэрэгсэл, малын тэжээл, хүнс, шатахуун тээврээс бусад хөдөлгөөнийг хотоос гарах, орохыг хязгаарласан хэвээр байгаа.

Улаанбаатараас орон нутаг руу явах боломжгүй, орон нутгаас ирээд гацсан иргэдийг гаргахгүй. Зөвшөөрөгдсөн шалтгаанаар зорчигчид болон халдвар бүртгэгдсэн аймгаас ирж буй иргэд бүгд PCR шинжилгээний хариутай байх шаардлагатай. Бусад аймаг, орон нутгаас ирэх иргэдийг эрүүл мэндийн асуумжаар нэвтрүүлнэ.

Нийслэлийн нутаг дэвсгэрт, шалган нэвтрүүлэх товчоодын гадна байршилтай Баянзүрх дүүргийн 20, Сонгинохайрхан дүүргийн 21, 32, Хан-Уул дүүргийн 13, 14 дүгээр хороонд амьдардаг болон үйл ажиллагаа эрхэлдэг иргэн, аж ахуйн нэгжийн ажиллагсдын нотлох баримтыг үндэслэн PCR шинжилгээний хариу шаардахгүйгээр товчоогоор нэвтрүүлнэ.

/Нотлох баримтад тухайн оршин суух нутаг дэвсгэрийн хаягтай иргэний үнэмлэх, аж ахуйн нэгж байгууллагын гэрчилгээ, газар эзэмших эрхийн гэрчилгээний нотариатаар баталгаажсан хуулбар, ажлын үнэмлэх, бусад шаардлагатай баримт багтана./

Товчоогоор нэвтрэх зөвшөөрөгдсөн тээвэр нь:

• Хүнсний бүтээгдэхүүн тээвэрлэлтийн үйл ажиллагаа /жолооч, туслах жолоочийн ажлын үнэмлэх, хүнс нийлүүлэх гэрээ, баримт/
• Шатахуун тээвэрлэлтийн үйл ажиллагаа /жолооч, туслах жолоочийн ажлын үнэмлэх, шатахуун тээвэрлэгч компанийн гэрээ, баримт/
• Эм, эмнэлгийн хэрэгсэл /жолоочийн ажлын үнэмлэх, холбогдох зөвшөөрөл/
• Эрүүл мэндийн үйлчилгээ /эмчийн магадлагаа/
• Мал, амьтны өвс тэжээл тээвэрлэлтийн үйл ажиллагаа /холбогдох зөвшөөрөл/
• Орон нутаг руу чиглэсэн оршуулгын үйл ажиллагаанд оролцох /Улсын Онцгой комиссын Шуурхай штабт хүсэлтээ гаргаж шийдвэрлүүлнэ/
• Бусад шаардлага, нөхцөлөөр иргэд, аж ахуйн нэгж байгууллагуудын зорчих хүсэлтийг хүлээж авахгүй бөгөөд зайлшгүй гэж үзвэл тухайн орон нутгийн Онцгой комисстой зөвшилцөнө” гэлээ.

Улаанбаатар-Дархан чиглэлийн авто замыг дөрвөн эгнээ болгох ажлын хоёрдугаар шатны ажил ирэх гуравдугаар сард эхэлнэ.

202.42 км тавигдах тус замыг Европын сэргээн босголт хөгжлийн банкны зээлийн хөрөнгөөр бий болгох юм.

Энэ талаар Зам тээвэр, хөгжлийн сайд Л.Халтар холбогдох аймгийн удирдлагуудтай цахимаар холбогдон үүрэг чиглэл өгсөн байна.

Дархан-Уул аймгийн тухайд замын ажилтай холбогдуулан 10 газрын тавыг нь одоогоор чөлөөлөөд байгаа аж. Цаашид Хонгор сумын цэцэрлэгт хүрээлэнгийн блокон хашаа, Дархан хаалга, Зам дагуух мод, “ДДЦС” ТӨХК-ийн тунгаасан усны шугам хоолой, Магнай, Шунхлай түгээх станцыг нүүлгэн шилжүүлэх ажлыг ирэх хоёрдугаар сарын 20-ны дотор хийх гэнэ. Газар чөлөөлөлтийг хийснээр Улаанбаатар Дархан чиглэлийн авто замын хоёрдугаар шатны ажил эхлэх боломж бүрдэх юм.

Өнгөрсөн хугацаанд автомашинууд QR кодоор зорчиж байсан бол өнөөдрөөс өндөржүүлсэн бэлэн байдлын зэрэгт шилжсэнтэй холбогдуулан дугаарын хязгаарлалттайгаар зорчиж эхэлсэн билээ.

Улсын хэмжээнд өнөөдрийн байдлаар Өмнөговь, Дундговь, Өвөрхангай, Баяхонгор, Говь-Алтай гэсэн 6 аймаг зудын эрсдэл өндөр, 10-аад аймгийн 80 гаруй суманд өвөлжилт хүндрэх нөхцөл байдал үүсжээ. Ихэнх аймагт өнгөрсөн 7 хоногт цасаар шуурсанаас мал бэлчих боломжгүй болжээ. Тухайлбал, Баянхонгор аймагт мал бэлчих боломжгүйгээс малчид малдаа 11 дүгээр сараас хойш зөвхөн тэжээл өгч байна.

Засгийн газраас өнгөрсөн 7 хоногт өвөлжилт хүндэрсэн таван аймагт хүргүүлсэн өвс, тэжээлийг аймаг бүрд малчдад олгохоор ажиллаж байгаа талаар ХХААХҮЯ-наас мэдээллээ. Энд Говь-Алтай аймгийн 10 сумын 4200 малчин өрхөд 1.1, Өвөрхангай аймгийн 19 сумын 16.300 малчин өрхөд 4.2, Баянхонгор аймгийн 20 сумын 1200 малчин өрхөд 3.1, Өмнөговь аймгийн 10 сумын 4000 малчин өрхөд 1, Дундговь аймгийн 15 сумын 7200 малчин өрхөд 1.8 тэрбум төгрөгийн бүрэн найрлагатай тэжээл олгож байна.

Дээрх ажлыг аймгуудын Онцгой комисс, Хүнс, хөдөө аж ахуйн газар хариуцан малчин өрхөд тусламж хүрсэн бүртгэлийг аппликэйшнээр дамжуулан тухай бүр баталгаажуулж, үүнд мөн тусламж үзүүлсэн Дэлхий банкнаас журам, дүрмийн дагуу хянаж байна.

Засгийн газраас эхний ээлжинд өвөлжилт хүндэрч буй 5 аймгийн 74 сумын 45 мянга гаруй малчин өрх тус бүрт 300 мянган төгрөгтэй тэнцэх хэмжээний хүчит тэжээлийн тусламж үзүүлж байгаа юм. Мөн отроор яваа малчин өрхөд 1200 тн тэжээл хүргэж байна.

Түүнээс гадна МУЗН-ээс зудын эрсдэл өндөр 6 аймгийн малчдад үзүүлэх хүмүүнлэгийн тусламжийн баг өнөөдөр нийслэл хотоос хөдөлж байна.

МУЗН цаг уурын урьдчилсан мэдээлэлд тулгуурлан энэ жил 2 мянган малчин өрхөд хүмүүнлэгийн тусламж үзүүлэхээр төлөвлөснөөс өнөөдөр эхний ээлжийн тусламжийн баг хөдөө, орон нутгий зорьж байна. Тусламжид 1260 малчин өрхөд олгох эрдэс тэжээлийн багц багтжээ. Тусламжийг өвөлжилт хүндрээд буй Өмнөговь, Дундговь, Өвөрхангай, Баяхонгор, Говь-Алтай аймгийн 42 суманд хүргэх аж. Энд мөн бэлэн мөнгөний тусламж орж буй бөгөөд малчдын дансанд шилжүүлж байна. Тусламжийн хувьд нэг өрхөд 410 мянган төгрөгийн тусламж үзүүлэх юм.

Тусламжийг аймгуудын Онцгой байдлын газар, МУЗН-ийн салбар хороо хамтран малчдад хүргэх аж. Тухайлбал, Баянхонгор аймгийн 19 сумын 240 малчин өрхөд малын эрдэс тэжээлийн багцыг хүргэнэ. Тус аймагт өвөлжилт хүндэрч 120 гаруй мянган толгой мал хорогдоод байна. Дундговь аймгийн хувьд 10 аймгийн нутагт нэг сая гаруй мал оторлож байна.

Уурхайн ээлж солих зохион байгуулалтын арга хэмжээний эхний шатанд ээлж солих аж ахуй нэгжүүдийн судалгааг авч эхэлжээ.

Улаанбаатар хотод цар тахал голомтлон халдварлаж байгаатай холбогдуулан Нийслэлийн эрүүл мэндийн газар шинжилгээний цэгүүдээ тусгай хуваарийн дагуу ажиллуулж байгаа ба шинжилгээний лабораториуд нь ачаалал ихтэй байна.

Цар тахал голомтлон халдварлаж буй энэ үед уурхай руу ажилчдыг илгээх нь аюулгүйн бүсэд халдвар дамжих эрсдэлтэй тул нийслэлд халдварын эрсдэл буурах нөхцөл байдлыг харгалзаж байна. Тун удахгүй ээлж солих арга хэмжээнд зориулж шинжилгээний цэгүүдийг хуваарилж өгөхөөр боллоо.

Улаанбаатар хотод коронавирусийн халдварын голомтууд шинээр гарч, шинээр илрэх халдварын тохиолдлын тоо нэмэгдсэн тул 2021 оны нэгдүгээр сарын 8-ны өдөр Уул уурхай, хүнд үйлдвэрийн яамнаас ээлж солих үйл ажиллагааг тодорхойгүй хугацаагаар хойшлуулж байгааг мэдэгдсэн юм.

Эх сурвалж: Уул уурхай, хүнд үйлдвэрлэлийн яам

Өнгөрсөн онд 23.1 мянган гэмт хэрэг бүртгэгджээ. Энэ нь 2019 оноос 8,460-аар буюу 26.8 хувиар буурсан үзүүлэлт гэж Үндэсний статистикийн хорооноос мэдээллээ.

Мөн 2020 оны арванхоёрдугаар сард 1,440 гэмт хэрэг бүртгэгдэж, өмнөх сараасаа 37.4%-аар тус буурсан байна.

Түүнчлэн 16, түүнээс дээш насны 10,000 хүнд ногдох бүртгэгдсэн гэмт хэрэг 2020 онд улсын дунджаар 108 болсон нь өмнөх оноос 26 хувиар буурсан байна.

Бүлэглэн үйлдсэн хэрэг 2020 онд 1,482 болж, 17.9%-аар, хүүхэд оролцсон хэрэг 24.1%-аар, мансуурсан үедээ үйлдсэн хэрэг 25.5%-аар тус, тус буурсан бол согтуугаар үйлдсэн гэмт хэрэг 4,855 болж, 11.1%-аар, эмэгтэй хүн оролцсон хэрэг 3,352 болж 7.5%-аар, гэр бүлийн хүчирхийллийн улмаас үйлдсэн хэрэг 1,138 болж 15.5%-аар өссөн үзүүлэлттэй байна.

Гэр бүлийн хүчирхийллийн улмаас үйлдэгдсэн 1,138 хэргийн 111 нь буюу 9.8% нь Монгол Улсын Эрүүгийн хуулийн 11.7 дугаар зүйл (Гэр бүлийн хүчирхийлэл үйлдэх гэмт хэрэг)–ээр зүйлчлэгджээ

Цар тахлын үед ЭМЯ-аас эмнэлгийн тусламж, үйлчилгээг нэмэгдүүлэх, дүүргүүд болон аймгуудад PCR шинжилгээний лабораторийг шинээр нэмж байгуулах, санхүүжилтийг шийдвэрлэх, бүх талын мэргэжил арга зүйгээр хангах ажлуудыг хийж байна. Энэ хүрээнд Эрүүл мэндийн сайдын тушаалаар Сүхбаатар дүүрэгт PCR шинжилгээний лаборатори ийнхүү ашиглалтад орлоо. Ингэснээр тус төв нь дүүргийнхээ ард, иргэдэд шаардлагатай үед цаг алдалгүй, шуурхай шинжилгээ хийх боломж бүрдэж байгаа юм.

Улсын хэмжээнд нэгдүгээр сарын 4-нөөс 10-ны өдрүүдэд нийслэлийн найман дүүрэг, 18 аймгийн 30 суманд нийт 239 удаагийн аюулт үзэгдэл, ослын дуудлага бүртгэгджээ.

Үүний 166 нь биологийн гаралтай аюулт үзэгдэл, 63 нь гал түймэр, ес нь хүний үйл ажиллагаатай холбоотой осол, нэг нь геологийн гаралтай аюулт үзэгдэл байсан аж.

Аюулт үзэгдэл, ослын улмаас дөрвөн иргэн нас барсан, харин гэмтэж бэртсэн тохиолдол бүртгэгдээгүй гэж Онцгой байдлын ерөнхий газраас мэдээллээ.