Уран барималч С.Отгонбаатартай ярилцлаа. Тэрээр хувиараа хүсэл мөрөөдлөө дагаж бусдад үлгэр жишээ болон уран бүтээлээ хийж буй юм.
-Сайн байна уу. Юуны өмнө манай уншигчдад өөрийгөө танилцуулахгүй юу?
-Сайн байна уу. Намайг С.Отгонбаатар гэдэг. Арван жилээ “Монгени” цогцолбор сургуулийг төгссөн. Тэгээд нэг жил өнжөөд СУИС-ийн Уран баримлын ангид орсон ч хоёрдугаар курсээсээ сургуулиа орхиж түүнээс хойш хувиараа уран бүтээл хийгээд явж байна.
-Хэзээнээс эхэлж уран баримлын төрлийг сонирхох болов?
-Анх “Монгени” цогцолбор сургуульд байхдаа л энэ чиглэлээр сурч эхэлсэн. Тэгээд л зургийн ангид орсон. Зургийн ангид орсон хүүхдүүд сонгон судлах хичээлээр заавал баримал, монгол зураг, керамикт зургийг сонгодог байсан юм. Баримлын хичээлд сууж баримал барьж үзээд маш их таалагдсан учраас энэ чиглэлээр цаашид дагнаж хичээллэхээр шийдсэн. Тэр үед хийсэн бүтээлээ хараад барималчин болохоор сэтгэл шулуудсан минь тэр байх.
-Одоогоор хичнээн баримал хийсэн байна вэ?
-Дадлагын хугацаанд хийсэн бүтээл гээд ер нь 30 гаруй баримал байгаа. Бүх бүтээлдээ сэтгэлээ шингээж хийдэг болохоор тэр бүр тоолдоггүй.
–Уран баримал хийхэд мэдээж их ажиллагаатай байх. Нэг бүтээлээ хэр хугацаанд хийж дуусгадаг вэ?
-Ямар баримал гэдгээсээ шалтгаалаад хугацаа нь харилцан адилгүй байдаг. Их чимхлүүр ажил орсон баримал дээр олон цаг зарцуулдаг. Харин жижиг хэмжээтэй баримлыг 7-10 хоногт хийж дуусгадаг.
-Дүрслэх урлаг дотроо уран баримлын аль төрлөөр уран бүтээлээ хийдэг вэ?
-Хөшөө, түүхэн дурсгал чиглэлээр дагнаж бүтээлээ хийдэг. Ер нь чөлөөт уран бүтээлч гэхэд болно доо.
-Олон улсын үзэсгэлэн, тэмцээнд оролцож байв уу?
-2018 оны тавдугаар сард Тайвань Монголын хамтарсан “Гранд арт” гэдэг үзэсгэлэнд оролцож байсан.
-Ер нь баримал хийхэд ямар материал ордог юм бэ?
-Баримал хийхэд төмөр утас, мод, баримлын шавар, замаск, вакс, гурил, зэс гээд маш их материал ордог. Би бүх материалаа урдаас авдаг. Том хэмжээтэй хөшөө хийхдээ зайлшгүй урдаас захиж авчирдаг.
-Уран бүтээлч хүнд хийсэн бүтээл бүр нь нандин байдаг байх. Тэдгээрээс нэгийг нь онцлоод яривал?
-Хамгийн хэцүү байсан бүтээл гэвэл оюутан байхдаа хийсэн “Хүн төрөлхтөн сэрдэг ээ” гэдэг удган модны зохиомжтой баримал байгаа. Энэхүү бүтээлийн утга санаа нь хүн төрөлхтөн байгаль эхтэйгээ салшгүй холбоотой гэдгийг харуулсан. Бүтээлд маань агуулагдсан шагай, гурвалжин дүрс гээд жижиг зүйл бүхэн өөрийн утга санааг илэрхийлдэг. Энэхүү бүтээлээ сар гаруй хугацаанд хийж дуусгаж байлаа.
-Бүтээлээрээ дамжуулж юуг илэрхийлэхийг хүсдэг вэ?
-Бусдын хараагүй зүйлийг хараасай гэж хүсдэг. Урлаг гэдэг өөрөө хүнийг соён гэгээрүүлэх зорилготой шүү дээ. Нүдийг нээж сэтгэлийг баясгадаг. Тийм учраас би нийгмээсээ түрүүлж алхахыг эрмэлздэг.
-Танд зөвлөгч багш бий юу?
-“Монгени” цогцолбор сургуульд байхад хичээл зааж байсан багш маань байгаа. 10 гаруй жил багшилсан мундаг хүн бий. Хүүхдүүдтэй тулж харьцаж, тэдний ертөнц рүү өнгийдөг. Хувь хүн талаас нь харж хүмүүжүүлдэг. Сургалт, хичээл гэхээс илүүтэйгүүр дотоод мөн чанарыг гаргаж ирэхийг зорьдог. Хүн хөдөлмөрлөж байж сайн сайханд хүрдэг, хүний ачийг ямагт санаж байхыг байнга зөвлөдөг. Мөн хүн муулж хулгай хийхгүй, өв соёлоо дээдэлдэг байхыг заадаг даа.
-Таны бүтээлийг харахад их хичээнгүйлж хийдэг бололтой?
-Би бүх бүтээлдээ сэтгэл, ур ухаанаа шингээдэг. “Чадна” гэдэг үгийг өөртөө байнга хэлж өөриймшүүлж байгаасай гэж боддог. Чадахгүй гэдэг үгийг өөртөө нааж битгий хойш суугаарай. Аливаа зүйлийг байнга туршиж өөрсдийгөө олж нээхийг зөвлөж байна.
-Таны бүтээлийг хүмүүс хэр сонирхож байна?
-Хүмүүст хэрэг болохуйц, тэдэнд үлдэхүйц бүтээл хийдэг болохоор их сонирхдог. Нийгэмд байр сууриа олчихсон, уран зураг, уран баримал сонирхдог хүмүүс их авдаг. Би хийсэн бүтээлээ ур хийцээс нь шалтгаалаад өөр өөр үнээр борлуулдаг.
-Залуу хүн том мөрөөдөлтэй байх. Цаашдын зорилгынхоо талаар хуваалцаач?
-Өөрийнхөө хязгаарыг давсан сайн бүтээл хийж олонд хүргэхийг эрмэлзэж байгаа. Ер нь бүтээлийн ур хийц, донж хэв маягаараа бусдыг манлайлсан дэлхийн хэмжээний уран барималч болохыг зорьдог. Мөн аливаад хариуцлагатай хүн байхыг хичээдэг.
Түүний уран бүтээлээс сонирхуулж байна.