Month: December 2020

Гол, нуурын мөс цөмрөх аюулаас сэрэмжлэхийг Ховд аймгийн Ус цаг уур орчны шинжилгээний төвөөс анхааруулж байна.

Энэ оны 12 дугаар сарын 30-ны өдрийн байдлаар Ховд гол 42 см мөсөн бүрхүүлтэй буюу 10-20 тн даацтай байна. Харин Хар-Ус нуур 64 см мөсөн бүрхүүлтэй буюу 10-20 тн даацтай, Булган гол 31 см мөсөн бүрхүүлтэй буюу жижиг суудлын автомашин явахад даах чадвартай байгаа аж. Мөн Буянт голын мөсний зузаан 52 см буюу 10-20 тн даах чадвартай байгаа юм.

Ойрын өдрүүдэд мөсний даац хүн, мал, машин тэрэг явахад аюулгүй хэмжээнд бүрэн хүрч бэхжээгүй байна гэж мэргэжлийн байгууллагууд дүгнэжээ. Иймээс малчид, тээвэрчид гол, нуурын мөсөн дээгүүр зам товчлох, цаг хожих зэргээр тээвэрлэлт хийхгүй байхыг анхаарууллаа. Мөн иргэдийг амралтын өдрүүдэд салхинд гарч зугаалах, загас агнуур хийхдээ мөс цөмрөх аюулаас сонор сэрэмжтэй байхыг онцгойлон анхааруулж байв.

Сэлэнгэ аймгийн хэмжээнд өнөөдрийн байдлаар тусгаарлалт, ажиглалтын хугацаа дууссан ойрын хавьтлын 1390 иргэнийг хяналтаас гаргажээ.

Тус аймгийн нэгдсэн вируслогийн лабораторид 196 хүнд PCR шинжилгээ хийхэд хариу бүгд сөрөг гарчээ. “Ковид-19” халдварыг илрүүлэх түргэвчилсэн оношлуурын шинжилгээнд Сүхбаатар суманд 19567, бусад суманд 24586 нийт 44153 иргэн хамрагдсан байна.

Аймгийн Нэгдсэн эмнэлгийн ковидын тасагт эмчлүүлж буй 21 өвчтөний биеийн байдал хөнгөн, эмчилгээ хэвийн үргэлжилж байгаа аж. Аймгийн хэмжээнд батлагдсан нийт 217 тохиолдлын ойрын хавьтлын нийт 1486, дам хавьтлын 974 иргэнийг тусгаарлалт, ажиглалтын хяналтад авч ажилласан байна. Эдгээр иргэдийг тусгаарлалт, ажиглалтад байх хугацаанд гурван удаагийн шинжилгээнд хамруулж, тусгаарлалтын 14, гэрийн ажиглалтын 14 нийт 28 хоногийн хяналтын хугацааг гүйцээжээ. Одоогийн байдлаар ойрын хавьтлын нийт 96 иргэн тусгаарлалт, ажиглалтад хянагдаж байгаа гэнэ.

Өнөөдрийн байдлаар аймгийн хэмжээнд нийт ажиглалтын хоёр, тусгаарлах нэг байранд 48 иргэн хяналт ажиглалтад байна. Түүнчлэн нийт өвдсөн иргэдээс 78.3 хувь нь буюу 170 иргэн эдгэрч гэрийн ажиглалтад шилжжээ.

Засгийн газрын хуралдаанаар Хармагтайн ордын 53.1 тонн алтыг улсын нөөцөд бүртгэх шийдвэр гаргажээ. Тодруулбал, “Геологийн судалгааны төв” ТӨҮГ, Төрийн өмчит “Эрдэнэс сильвер ресурс” ХХК-ийн геологчдын хамтарсан баг Өмнөговь аймгийн Цогтцэций суманд “Хармагтайн” бүлэг ордын “Овоот хяр” хайгуулын тусгай зөвшөөрлийн талбайн “Хойд бүргэдэй” хүдрийн биетэд 53.1 тн алтны нөөц буйг тогтоосон байна. Нарийвчилсан хайгуулын хээрийн ажлыг 2020 оны арваннэгдүгээр сарын 30-ны өдөр дуусгаж, тогтоогдсон алтны нөөцийг Эрдэс баялгийн мэргэжлийн зөвлөлөөр хэлэлцүүлэн улсын нөөцөд бүртгүүлээд байна.

Үлдсэн хүдрийн биетүүдэд шаардлагатай судалгааг үргэлжлүүлэн хийснээр нөөц 60 хувь хүртэл нэмэгдэх төсөөлөл гарчээ. Тус орд газарт хайгуулын ажлыг үргэлжлүүлэн хийж, алт болон бусад ашигт эрдсийг бүрэн гүйцэд тогтоох ажлыг улсын төсвийн хөрөнгөөр 2021 онд хийж гүйцэтгэх нь зүйтэй гэж үзэв.

“Эрдэнэс Монгол” компанийн Төлөөлөн удирдах зөвлөл өнөөдөр хуралдан, гурван дэд захирлын томилгоог баталсан байна.

Тэгвэл АТГ-аас хувийн ашиг сонирхлын урьдчилсан мэдүүлгийг хянасан талаар хариу өгснөөр уг томилгоог хийжээ. Санхүү эдийн засаг хариуцсан дэд дарга Л.Хосбаяр, Захиргаа хариуицсан дэд дарга Ц.Цолмон, Салбарын үйл ажиллагаа хариуцсан дэд захирлаар Л.Энхболдыг томилсон байна.

АТГ-аас Л.Энхболдын тухайд хоёр утгатай хариу өгсөн аж. Тодруулбал, түүний ХАСУМ-ийг хянаад “Л.Энхболдыг уг албан тушаалд томилоход ашиг сонирхлын зөрчил үүсэхгүй. Гэхдээ эрүүгийн хэрэгт холбогдон шалгуулж байгаа” гэсэн агуулга бүхий албан бичгийг “Эрдэнэс Монгол”-д илгээсэн байна. Харин тэргүүн дэд захирлын албан тушаалд Харвардын их сургуульд бакалаврын зэрэг хамгаалсан Ж.Тана томилогдох нь тодорхой болжээ.

Өнөөдөр \2020.12.30\ 14:00 цагийн орчимд Энхтайваны өргөн чөлөө, Сүхбаатар дүүргийн 1 дүгээр хорооны нутаг дэвсгэр, Монгол Улсын Боловсролын их сургуулийн урд замд “Hyundai aero BUS” маркийн автобусны жолооч, 45 настай, эрэгтэй М нь замын хайс, хашлага болон мод мөргөсөн зам тээврийн осол гаргасан байна.

Уг автобус дотроо долоон зорчигчтой хөдөлгөөнд оролцож байсан бөгөөд гэмтэж бэртсэн хүн байхгүй ажээ. Иймд жолооч та бүхэн зам орчны нөхцөл байдалд хурдаа тохируулан хөдөлгөөнд оролцохыг Тээврийн цагдаагийн албанаас анхааруулж байна.

Нийслэлийн авто тээврийн шалган нэвтрүүлэх есөн товчоонд Онцгой, Эрүүл мэнд, Цагдаа, Мал эмнэлэг, мэргэжлийн хяналтын 88 ажилтан, алба хаагч үүрэг гүйцэтгэж байна.

Өнгөрсөн 24 цагийн хугацаанд товчоодоор 905 автомашин нэвтэрч, 911 тээврийн хэрэгсэл гарчээ. Энэ хугацаанд нийт 2990 зорчигчид эрүүл мэндийн хяналт хийсэн бөгөөд сэжигтэй тохиолдол илрээгүй гэж Нийслэлийн эрүүл мэндийн газраас мэдээллээ.

Засгийн газраас гаргасан шийдвэрийг танилцуулсны дараа Эрүүл мэндийн сайд Т.Мөнхсайхан сэтгүүлчдийн асуултад хариуллаа.

-Буяны компаниудад ямар чиглэл өгсөн бэ. Халдвартай хүн нас барвал яах вэ? гэсэн асуултанд

Т.Мөнхсайхан “Халдвартай нь тогтоогдсон хүн нас барсан үед ямар байдлаар оршуулгын үйл ажиллагааг явуулах вэ гэдгийг журмаар зохицуулсан. Ямар уутыг хэдэн давхар хийгээд, яаж зохицуулах үйл ажиллагааг хэрхэн хийхийг нарийн заасан. Нас барсан иргэн халдвартай нь тогтоогдоогүй байсан учраас оршуулах үйл ажиллагаа хэвийн явсан. Оршуулгад оролцсон хүмүүсээс шинжилгээ авахад нас барсан иргэний гэр бүлийн хүнээс халдвар илэрсэн. Өөр хүмүүсээс халдвар илрээгүй. Тиймээс энэ асуудлыг цаашдаа дахин битгий хөндөөсэй гэж хүсч байна” гэлээ.

Сонгинохайрхан дүүргийн эрүүл мэндийн төвийн Баянхошуу амбулатори өнөөдөр ашиглалтад орлоо.

Энэхүү эмнэлэг анх 1989 онд 35 ортой ашиглалтад орж үйл ажиллагаагаа явуулдаг байсан бол 150 ортой тус дүүргийн Баянхошуу бүсийн иргэдэд үйлчлэхээр үүд хаалгаа нээж байна.

Өргөтгөлийн ажил хийхээс өмнө тус эмнэлэгт 1500 гаруй хүн хэвтэн эмчлүүлдэг байсан бол шинэ байр ашиглалтад орсноор 6000 хүн хэвтэн эмчлүүлэх боломж бүрдэж, эмнэлэгт хэвтэхийн тулд хүлээдэг байдал 2-3 дахин буурна гэдгийг тус дүүргийн удирдлагууд хэлж байна. Мөн олон улсын стандартад нийцсэн тоног төхөөрөмжийг ашиглан иргэдэд чанарын өндөр түвшинд түргэн шуурхай эмнэлгийн тусламжийг үзүүлэх боломж нээгдэж байгаа талаар Сонгинохайрхан дүүргийн Засаг дарга Н.Алтаншагай онцолсон юм.

Энэхүү эмнэлэг нь Сонгинохайрхан дүүргийн Баянхошуу бүсийн наймдугаар хорооны 120 мянга гаруй иргэнд үйлчлэх юм. Мөн хүүхэд, эмэгтэйчүүд, дотор, мэдрэл, мэс засал, нүд, шүд, чих хамар хоолой, нөхөн сэргээх, уламжлалт эмчилгээ, өсвөр үеийн дархлаажуулалт зэрэг нарийн мэргэжлийн эмчийн үзлэг болон ЭХО, ЭКГ, Рентген, Клиник, Биохимийн лабораторийн шинжилгээ үйлчилгээг тус хорооны иргэд дэргэдээсээ авах боломжтой болж байна.