Month: November 2020

Categories
мэдээ нийгэм цаг-үе

АНХААР: Дорноговь аймгийн батлагдсан тохиолдлуудын МАРШРУТ

Дорноговь аймагт арваннэгдүгээр сарын 19-ний өдөр коронавируст халдвар (Ковид-19)-ын цар тахлын батлагдсан нэг тохиолдол бүртгэгдэж, улмаар өчигдөр буюу 2020.11.20-ны байдлаар батлагдсан тохиолдол зургаа болсон.

Халдвартай иргэний дам хавьтлын байршлыг тогтоох зорилгоор аймгийн Засаг даргын захирамжийн дагуу Айраг, Даланжаргалан, Сайншанд, Өргөн, Эрдэнэ, Замын-Үүд сумдын нутаг дэвсгэр дэх бүх төрлийн худалдаа, үйлчилгээний байгууллагуудын үйл ажиллагааг бүрэн зогсоож, тэг зогсолт хийсэн. Халдварын тархалт тэлж байгаа тул Дорноговь аймагт бүртгэгдсэн халдвар авсан иргэдийн маршрут, зураглалыг олон нийтэд мэдээлж байгаа ба дараах газраар явсан бол өөрийгөө ажиглан тусгаарлаж, шаардлагатай бол шинжилгээ өгөхийг сануулж байна.


Цаг үеийн нөхцөл байдалтай холбогдуулан шуурхай арга хэмжээ авч хэрэгжүүлж буй Засаг даргын захирамж:

  • Аймаг, сумын доторх болон орох, гарах иргэн, тээврийн хэрэгслийн хөдөлгөөнийг бүрэн зогсоох,
  • Өвчлөлийн тархалтын байдлыг тогтоох, илрүүлэх хүртэлх хугацаанд халдвар, хамгааллын дэглэмийг чанд мөрдөн, гэрээсээ гарахгүй байх, мэргэжлийн байгууллага, албан хаагчдаас тавьж буй шаардлагыг бүрэн биелүүлж, иргэний журамт үүргээ биелүүлэх,
  • Хүнсний гол нэрийн бүтээгдэхүүн, эм эмнэлгийн хэрэгсэл, түлээ нүүрсийг хүргэлтийн үйлчилгээгээр шуурхай зохион байгуулах,
  • Коронавируст халдвар (Ковид-19)-ын цар тахал илэрсэнтэй холбогдуулан авах хариу арга хэмжээний төлөвлөгөөг тодотгож, шуурхай арга хэмжээ авч ажиллах.
Categories
мэдээ цаг-үе

НОК: Өнөөдрөөс эхлэн 07:00-17:00 цагийн хооронд хүнсний түгээлт хийнэ

НОК: Түгээлтийн машиныг 07:00-17:00 цагийн хооронд зорчихыг зөвшөөрлөө : Тал нутгийн цахим мэдээлэлийн сайт

Улаанбаатар хотын хэмжээнд өнөөдрөөс эхлэн 07:00-17:00 цагуудад хүнсний чиглэлийн автомашин дугаарын хязгаарлалтгүйгээр явахаар болжээ.

Хүнсний томоохон үйлдвэрийн 2,000, хүнсний импортын 2,000 автомашин нийслэлийн хэмжээнд 3731 дэлгүүрүүдэд хүнсний түгээлтийг өдрийн цагаар хийж ажиллахаар болжээ. Хүнсний 8 нэрийн дэлгүүрүүдийн хувьд дээрх хугацаанд бараагаа татаж амжаагүй бол өөрсдийн гэрээтэй бөөний төвүүд дээрээс өөрсдийн машинаараа бараа таталтаа хийх боломжтой юм.

Categories
мэдээ нийгэм

​Сүхбаатар дүүргээс зорилтот бүлгийн 100 өрхөд хүнсний багцын тусламж үзүүлжээ

Сүхбаатар дүүргийн Засаг даргын Тамгын газраас өчигдөр Монголын Улаан загалмайн нийгэмлэгтэй хамтран 1-20 дугаар хорооны зорилтот бүлгийн 100 өрхөд хүнсний багцын тусламж үзүүлжээ.

Сүхбаатар дүүргийн ЗДТГ-аас “Коронавирусийн халдварт өвчний тархалтын үеийн хариу арга хэмжээний төлөвлөгөө”-ний хүрээнд өрхийн орлого багасаж хоол, хүнсний дутагдалд орж болзошгүй болсон айл өрхүүдэд ийнхүү нэг удаагийн дэмжлэг үзүүлсэн” хэмээн мэдээллээ.

Эдгээр тусламж, дэмжлэг авч буй эдгээр өрхүүд нь хүнсний эрхийн бичиг болон халамжийн чиглэлээр төрөөс олгодог тэтгэвэр, тэтгэмж зэрэг бусад үйлчилгээнд хамрагдаж байгаагүй боловч хөл хорионы улмаас цалин, орлогогүй болсон айлууд аж.

Categories
мэдээ нийгэм

​Ерөнхийлөгчийн нэрэмжит тэтгэлгийн материалыг цахимаар хүлээн авна

Монгол Улсын Ерөнхийлөгчийн нэрэмжит тэтгэлэг олгоно

Шилдэг оюутанд олгох Монгол Улсын Ерөнхийлөгчийн нэрэмжит тэтгэлгийн материал хүлээн авах хугацааг энэ сарын 25 хүртэл сунгаж, цахимаар хүлээн авахаар болсон байна.

Энэ жилийн тэтгэлгийн материалыг арваннэгдүгээр сарын 15-ны дотор шуудангаар хүлээн авах байсан ч коронавирусийн эрсдлээс сэргийлэх үүднээс Засгийн газар, УОК-оос ирэх сарын 1 хүртэл “Бүх нийтийн бэлэн байдлын зэрэг”-т шилжүүлэх шийдвэр гаргасан билээ. Тиймээс энэ сарын 25 хүртэл Монгол Улсын Ерөнхийлөгчийн Тамгын газрын press@president.mn мэйл хаягаар хүлээн авч эхэлжээ. Монгол Улсын Ерөнхийлөгчийн нэрэмжит тэтгэлгийг амжилттай сурч хөдөлмөрлөн, үлгэр жишээ онцгой амжилт гаргасан дотоодын дээд боловсролын сургалтын байгууллагын бакалаврын хөтөлбөрийн өдрийн ангийн оюутан, коллеж, МСҮТ-ийн 30 хүртэлх суралцагчид олгодог байна.

Categories
булангууд мэдээ онцлох-нийтлэл туслах-ангилал шинжлэх-ухаан-технологи

СУДЛААЧ: Хэрвээ бид энэ 14 хоногт хатуу хөл хорионы дэглэмийг маш сайн барьж чадвал дахин сунгах шаардлагагүй

Сүүлийн хэдэн өдөр ажиллуулж байсан загварыг Монголын нөхцөлд тохируулан шинэ модель хийв. Шинэ загварын гол зорилго нь хөл хорионы хугацаанаас ирээдүйд халдварын тоо хэрхэн өөрчлөгдөж байгааг харах юм. Энд дараах 4-н нөхцөлийг авч үзсэн.
а. Хөл хорио огт тогтоогоогүй байсан бол яах вэ?
b. 11 сарын 11-нээс 16 хооронд 5 хоног,
c. 11 сарын 11-нээс 12 сарын 1-ний хооронд 19 хоног,
d. 11 сарын 11-нээс 12 сарын 15-ны хооронд 33 хоног хатуу хөл хориог тогтоовол юу болох талаар тус бүр нөхцөлийг бодож үзсэн юм.
Үр дүн товчоор
а. Монгол улсын бүх хүн ам халдвар аваад сүргийн дархлаа үүсэх байжээ.
b. 5 хоног хатуу хөл хорио тогтоогоод буцаагаад цуцалсан бол халдварын хурд огцом буурч байгаа хэдий ч нууц үе дээрээ явж байсан хүмүүс буцаад олон нийтдээ нийлж буцаад халдвар тарна. Ойролцоогоор 14 мянган хүн халдвар авах байжээ.
с. 19 хоног хатуу хөл хорио тогтоовол дараа жилийн 7 сарын үед 1300 орчим хүн нийт халдвар авах байдал харагдаж байна.
d. 33 хоног буюу одоо гарсан шийдвэр дээр нэмэж 14 хоног хатуу хөл хорио тогтоовол өмнөх тохиолдолтой адилхан байна.
Дүгнэвэл: Хэрвээ бид энэ 14 хоног хатуу хөл хорионы дэглэмийг маш сайн барьж чадвал дахин сунгах шаардлагагүй харагдаж байна. Нууц үе дунджаар 5-6 хоног болохоор ирэх долоо хоног хамгийн чухал ба шинээр халдвар хүн авахгүй байх хэрэгтэй юм. Одоогийн байдлаар загвар 94.5 хувь таарч байна.
Жичи анагаах ухааны их сургуулийн туслах профессор Б.Сувд, судлаач Н.Мөнх-Эрдэнэ, Ч.Ариунболд нартай хамтран ажилласан ба ЭШ өгүүлэлд хэвлүүлэхээр бэлдэж байна. Нарийн аргачлалыг хэвлэгдэхээр уншаарай! Ам загатнаад биччихлээ. Магадгүй ирээдүйд гарах шийдвэрт хэрэгтэй юм шиг санагдаад.
Жич: Уг бичвэр нь албан ёсны бус бөгөөд дан ганц шинжлэх ухааны сонирхолдоо хөтлөгдөн тооцоолж үзсэн тоон загварчлалын үр дүн болно.

FB:Нийгмийн эгэх хариуцлага


Categories
гадаад мэдээ

​Түүхэнд анх удаа ээж охин хоёр хамтдаа онгоц жолооджээ

Дэлхийн нисэхийн түүхэнд анх удаа ээж охин хоёр хамтдаа нэг онгоц жолооджээ. Ээж Сьюзи, охин Донна Гаррет нар нэг баг болж, Америкт дотоодын нислэг үйлдсэн байна.

Уг үйл явдал өнгөрсөн жил болсон ч саяхнаас нийгмийн сүлжээгээр энэ талаарх мэдээ хурдацтай тархсан байна. Сьюзи “Би охинтойгоо ажиллах их дуртай. Миний туулсан амьдралыг хүүхэд маань бас адилхан туулж явааг харах үнэхээр сайхан байна. Охин маань SkyWest /авиа компани/ гэр бүлийн нэг гишүүн. Энэ бол охинд маань тохирсон сайхан мэргэжил. Охинтойгоо хамт ажиллах үнэхээр сайхан санагддаг ” гэжээ.

Сьюзи Гаррет нисгэгчээр 30 гаруй жил ажилласан байна. Түүнийг нисгэгч болж байх үед тэрбээр анхны эмэгтэй нисгэгчдийн нэг байв. Түүний нөхөр Даг мөн л нисгэгч аж. Тэд охин хүү хоёртой бөгөөд хүүхдүүд нь багаасаа авиа салбарт өсөж торнин, энэ ертөнцөд хүүхэд насаа өнгөрөөжээ.

Categories
мэдээ нийгэм

2021 онд жижиг, дундын салбарт 15 орчим тэрбум төгрөгийн зээл олгоно

Жижиг, дунд үйлдвэрийг дэмжих үндэсний хөтөлбөрийг батлав |

Жижиг, дунд үйлдвэрлэлийг хөгжүүлэх сан (ЖДҮХС)-гаас МАН-ын гишүүд зээл авах боломжгүй болсноос хойш шалгуур өндөрсөж, олон удаагийн сонгон шалгаруулалттай болсон.

Жижиг, дунд үйлдвэрийн газрын дарга Я.Эрдэнэсайханы “Төсөл сонгон шалгаруулалт дөрвөн үе шаттай явагдах ёстой. Ирсэн 1579 төслөөс хоёрдугаар шатандаа 400 орчим аж ахуйн нэгж тэнцсэн. Өөрөөр хэлбэл, 1100 төсөл хоёрдугаар шатандаа хасагдсан гэсэн үг. Гуравдугаар шатанд газар дээр нь очиж нарийвчилсан үнэлгээ хийгээд оноо тавихаар 250 гаруй аж ахуйн нэгж тэнцсэн байх жишээтэй. Эндээсээ бид Улаанбаатар хотын хэмжээнд төсөв сонгон шалгаруулах хорооны хурлаа хийнэ. Хорооны хурлын дараа барьцаа хөрөнгө үнэлэх тусгай зөвшөөрөл бүхий 30 гаруй байгууллагаар хөрөнгийг нь үнэлүүлээд, гэрээ байгуулна. Үүний дараа санхүүжилт нь олгох асуудал яригдана гэсэн үг. Журмаараа ондоо багтааж зээл олгох ёстой. Манай ажилтнууд зээл олгохоор ажлын өдрүүдэд уртасгасан цагаар, амралтын өдрүүдэд ч амрах завгүй ажиллаж байна. Үлдсэн хугацаанд бас шийдвэрүүд гарна. Арваннэгдүгээр сардаа амжвал хуралдах байх. Ирэх онд олон улсын донор байгууллагуудын хөрөнгөөр 15 орчим тэрбум төгрөгийг жижиг, дундын салбарт зээл олгоно” хэмээв.

Categories
мэдээ нийгэм цаг-үе

​Иргэд ипотекийн зээлийн төлбөрөө цахимаар хойшлуулах боломжтой

Монголбанк - Монгол Улсын Төв Банк.

Монголбанкнаас Ковид-19 цар тахлын үед эдийн засаг, банк, санхүүгийн салбарт үзүүлэх сөрөг нөлөөг бууруулах, иргэдийн санхүүгийн дарамтыг зөөлрүүлэх зорилгоор шаардлагатай боломжит арга хэмжээг олон улсын туршлага, холбогдох хууль тогтоомжид нийцүүлэн хэрэгжүүлж байна.

Энэ арга хэмжээний хүрээнд Төрөөс хэрэгжүүлж буй орон сууцны ипотекийн хөнгөлөлттэй зээлийн төлбөрийг 2021 оны долдугаар сарын 1-ний өдрийг хүртэл түр хугацаанд хойшлуулахаар Монголбанк, Сангийн яам, Монголын ипотекийн корпораци, Орон сууцны санхүүжилтийн корпораци ХХК болон арилжааны банкууд хамтран дараах зөвшилцөлд хүрлээ. Үүнд:

1. Орон сууцны ипотекийн 8, 6 болон таван хувийн хүүтэй зээл авсан иргэн зээлийн эргэн төлөлтийн хуваарьт өөрчлөлт оруулах хүсэлт гаргаснаар зээлийн үндсэн болон хүүний төлбөрийг 2021 оны долдугаар сарын 1-ний өдрийг хүртэлх хугацаанд хойшлуулж, тухайн хугацаагаар зээлийн эргэн төлөлтийн хуваарийг шинэчлэх

2.Зээлдэгч зээлийн эргэн төлөлтийг хойшлуулах хүсэлтээ 2021 оны нэгдүгээр сарын 30-ны өдрөөс өмнө харилцагч банкиндаа цахим хэлбэр (цахим хуудас, имэйл, гар утасны банкны апликэшн, утас зэрэг)-ээр гарган төлбөрөө хойшлуулах боломжтой.

3. Зээлийн төлбөр хойшлуулснаар зээлдэгчийн зээлийн ангилалд өөрчлөлт орохгүй бөгөөд хойшлуулсан хугацаанд хүү тооцогдохгүй. Төрөөс хэрэгжүүлж буй орон сууцны ипотекийн хөнгөлөлттэй зээлийн төлбөрийг хойшлуулахтай холбоотой гарч буй түгээмэл асуултад өгсөн хариултыг https://www.mongolbank.mn/documents/news/communication/Mortgage-11.20.2020-last-version-1.pdf энэ холбоосоор орж уншина уу.

Categories
амьдралын-өнгө мэдээ нийгэм

ӨВӨРХАНГАЙ АЙМАГ, АРВАЙХЭЭР СУМ: Түймэрт өртсөн өрхөд гэр олгов

Өвөрхангай аймгийн Засаг даргын нөөц хөрөнгөөс Арвайхээр сумын 11 дүгээр багийн иргэн н.Болдынд таван ханатай гэр олгожээ. Ам бүл наймуул амьдардаг Болдын гэр түймэрт өртсөн бөгөөд аймгийн Засаг даргад хүсэлт тавьсны дагуу гэр олгосон аж. Уг айлд “Арвин” худалдааны төвийн захирал З.Цогтсүрэн нийгмийн хариуцлагынхаа хүрээнд хоол хүнсний тусламж үзүүлсэн байна. Мөн галын аюулд өртсөн IV багийн иргэн П.Дондолсүрэнд гэр орноо сэргээн засварлахад нь дэмжлэг үзүүлж, тодорхой санхүүжилтийг олгоод байна. Халдварт өвчлөлөөс урьдчилан сэргийлэх хөл хорио тогтоосон энэ нөхцөлд гэртээ бага насны хүүхдээ хараа хяналтгүй үлдээх, тог цахилгаанаа хэрэглээнээс салгалгүй орхих, үнс нурмаа цогтой гаргах зэргээс болгоомжилж, гал түймрийн осол аюулаас урьдчилан сэргийлэхийг аймгийн засаг захиргаанаас анхааруулсан байна.

Categories
мэдээ нийгэм

​Хүнсний дэлгүүрүүд “Оdo order” аппликэйшныг ашиглаж бараагаа татаж байна

SuperKacc Үнэгүй ПОС Unegui POS, Tov nomiin san, Ulaanbaatar (2020)

Хөл хорионы чанг дэглэмийн үед хүнсний хангамжийн асуудал нэн тэргүүнд яригдаж байгаа билээ. Тэгвэл үүнийг хялбар аргаар буюу цахим хэлбэрээр шийдэх нь хамгийн зөв алхам болоод байна. Өнөөдрийн байдлаар 3000 давсан хүнсний дэлгүүр “Оdo order” нэгдсэн захиалгын апп ашиглаж Номин, Таван богд, Наран, Тэсо, БОСА, Дельта фүүдс, Баясах, Мах импекс, Алтан тариа, Өгөөж, Газар шим, НВЦ, Очир дагинас тэргүүтэй 100 гаруй компаниудын барааг ямар ч үнийн нэмэгдэлгүй захиалан авч байна. Зөвхөн бараа захиалахаас гадна олон төрлийн хямдрал, урамшуулалд хамрагдах шинэ гарсан бүтээгдэхүүнтэй танилцах гээд олон боломжийг агуулсан уг апп-р өнгөрсөн хугацаанд нийт 17000 гаруй захиалгыг дамжуулж 9 тэрбум орчим төгрөгийг борлуулалт хийгджээ. “Odo order” аппликейшнд одоогоор 130 мянган төрлийн барааг орсон бөгөөд захиалга бүхэн 100% хүргэгдэж байгаа аж.

Мөн хот, орон нутаг гээд хаана ч үл хамааран бараа нийлүүлэгч аж ахуйн нэгжүүдийг үнэ төлбөргүй системдээ нэгдэх боломжтойгоос гадна бүх сургалт мэдээллээ онлайнаар өгч байна. “Оdo shop” нь ард иргэдийн захиалгыг түүнд хамгийн ойр байх хүнсний дэлгүүрт хүргэдэг бөгөөд захиалга авсан дэлгүүр нь шуурхай хүргэдэг шинэлэг үйлчилгээ нэвтрүүлсэн нь цаг үеээ болсон хэрэгтэй шийдэл боллоо хэмээн хүнсний дэлгүүр эрхлэгчид болон иргэд баяртай хүлээн авч байна. Уг үйлчилгээнд эхний ээлжинд 200 дэлгүүр нэгдэн ажиллаж байгаа бөгөөд ирэх сардаа багтаан 1000 дэлгүүрийг эгнээндээ нэгтгэхээр төлөвлөж байгаа юм.

“Оdo shop” аппликэйшн татах http://onelink.to/r28pxe эсвэл app store, play store дээрээсээ odo shop нэрээр хайлт хийхэд болно.