Month: September 2020

“Apple” компани өнгөрсөн шөнө өөрийн шинэ бүтээгдэхүүнүүдээ танилцуулах ээлжит арга хэмжээг “Time Flies” нэртэйгээр онлайн байдлаар зохион байгууллаа. Тус компани жил бүрийн есдүгээр сард шинэ бүтээгдэхүүн үйлчилгээгээ танилцуулдаг уламжлалтай. Энэ удаад тус компани хоёр төрлийн iPad, хоёр төрлийн Apple Watch ухаалаг бугуйн цаг, онлайн үйлчилгээнүүдийг багцалсан “Apple One” шинэ үйлчилгээ, iPadOS 14, iOS 14, WatchOS 7, TVOS 14 үйлдлийн системүүдийн шинэ хувилбаруудыг танилцуулжээ. Харин өндөр хүлээлт үүсгээд байсан шинэ загварын iPhone ухаалаг утсаа аравдугаар сарын 13, 14-ний аль нэгэнд танилцуулахаар болсон байна.

ШИНЭ “IPAD AIR”, НАЙМДУГААР ҮЕИЙН “IPAD”

Шинэ “iPad Air”

• Эхлэх үнэ 599 ам.доллар
• “iPad Pro” загвар шиг нүүр нь бүхэлдээ зөвхөн дэлгэцнээс тогтох хийцтэй
• 9 инчийн “Liquid Retina” дэлгэц нь 2360 х 1640 нягтаршилтай
• Арын камер нь “iPad Pro” загвартай адил 12 мегапиксель бол нүүрний камер нь 7 мегапиксель “FaceTime HD” камертай
• “Touch ID” товчийг нүүрнээс шилжүүлж, ирмэг дээр байдаг “Sleep/Wake” товчтой нэгтгэсэн
• “5 nm A14 Bionic” чип нь “6 core CPU”, “4 core GPU”, “16 core neural engine” процессоруудыг багтаасан
• Тэнгэрийн хөх, ногоон, мөнгөлөг, хар саарал, алтлаг таван өнгөний сонголттой

Наймдугаар үеийн “iPad”

• Эхлэх үнэ 329 ам.доллар
• Шинэ “A12 Bionic” чипээр тоноглогдсон
• Өмнөх загварууд шиг дэлгэцний дээд, доод талдаа өргөн хүрээтэй, “Touch ID” товчийг нүүрэндээ байрлуулсан

Apple Watch Series 6, Apple Watch SE

Apple Watch Series 6 загвар-үндсэн загварын шинэ хувилбар

• Эхлэх үнэ 399 ам.доллар
• Цусан дахь хүчилтөрөгчийн хэмжээг хянах мэдрэгч нэмэгдсэн
• Хөх хөнгөн цагаан, алтлаг болон саарал зэвэрдэггүй ган хийцийн сонголтууд нэмэгдсэн
• Анх удаа “Red” загвар нэмэгдсэн
• “iPhone 11” загварынхтай ижил “S6 dual core” процессортой
• Байгалийн гэрэлтэй орчинд дэлгэц нь 2.5 дахин тод харагддаг
• Байнгын ажиллагаатай “altimeter” буюу далайн түвшнээс дээш өндөр хэмжигч системтэй болсон
• “Solo Loop” нэртэй түгжээгүй, сунадаг силикон материалтай оосор долоон өнгөний сонголт нэмэгдсэн
• “Solo Loop”-ын сүлжмэл материалтай хувилбар таван өнгөний сонголттой
• Байгаль орчинд ээлтэй байх үүднээс шинэ “Apple Watch” загваруудын хайрцганд “USB” цэнэглэгч кабель дагалдуулахаа больсон

Apple Watch SE- хямд үнэтэй загвар

• Эхлэх үнэ 279 ам.доллар
• “Series 5” загвартай адил S5 процессортой, дэлгэц нь үргэлж асаалттай байх “always on” горимгүй зэрэг сул талтай
• Байгаль орчинд ээлтэй байх үүднээс шинэ “Apple Watch” загваруудын хайрцганд “USB” цэнэглэгч кабель дагалдуулахаа больсон
• Нэг “iPhone”-оос гэр бүлийнхнийхээ цагнуудыг нэгдсэн байдлаар удирдах “Family Setup” тохиргоо нэмэгдсэн. Гэхдээ тохиргоо “Series 4” загвар болон түүнээс хойшх загваруудын зөвхөн “Cellular” хувилбаруудад үйлчилнэ.

“Apple One” үйлчилгээнүүд ба “Fitness Plus” үйлчилгээ

“Apple One” үйлчилгээ

• “Apple Music”, “Apple TV Plus”, “Apple Arcade”, 50GB-ийн “iCloud” storage зэрэг үйлчилгээнүүд хамгийн хямд төлбөртэй буюу сарын 14,9 ам.доллараас эхэлнэ
• Зургаа хүртэл тооны хүн хувааж ашиглах боломжтой гэр бүлийн “The Family Plan” багц болон 200 GB-ийн багтаамжтай “iCloud storage” үйлчилгээ сарын 19,9 ам.долларын үнэтэй
• Зургаа хүртэл хүн хувааж ашиглах боломжтой “Apple News Plus”, “Fitness Plus”, 2TB багтаамжтай “iCloud storage” үйлчилгээнүүдийг багтаасан “The Premier” багц хамгийн үнэтэй нь бөгөөд сарын 29.9 ам.доларын үнэтэй

“Fitness Plus” үйлчилгээ

• “Fitness Plus” нь “iPhone”, “iPad”, “Apple TV”, “Apple Watch” төхөөрөмжүүд дээр ажилладаг эрүүл мэндийн цоо шинэ үйлчилгээ
• Йога, дугуй, бүжиг зэрэг 10 төрлийн дасгалтай энэ үйлчилгээнд долоо хоног бүр шинэ дасгалууд нэмэгдэнэ
• Худалдаанд гарах үнэ 9,9 ам.доллар
• Бүтэн жилийн төлбөр 79,9 ам.доллар

Дээрх бүтээгдэхүүн үйлчилгээнүүдээс гадна тус компани үйлдлийн системүүдийн шинэ хувилбарууд болох “iOS14”, “iPadOS14”, “watchOS7”, “tvOS 14” үйлдлийн системүүдээ өнөөдрөөс /2020.09.16/ зах зээлд гаргаж байна.

БНХАУ-ын Гадаад хэргийн сайд Ван И Монгол Улсад айлчилж байгаа билээ. Айлчлалын үеэр Ван И сайд Төрийн гурван өндөрлөгт бараалхана гэсэн мэдээ байгаа. УИХ-ын дарга Г.Занданшатартай уулзах үеэр ямар асуудал хөндөж ярилцах талаар УИХ-ын Тамгын газрын Хэвлэл мэдээлэл, олон нийттэй харилцах хэлтсийн дарга С.Батбаатараас тодрууллаа.

-БНХАУ-ын Гадаад хэргийн сайд Ван И УИХ-ын дарга Г.Занданшатарт бараалхана гэсэн. Хэдэн цагт уулзалт болох вэ? Ямар асуудал яригдах бол?

-Хэвлэл мэдээллийн зарим хэрэгсэл, тухайлбал сайтуудад Ван И сайд УИХ-ын дарга Г.Занданшатарт бараалхана гэсэн мэдээлэл гарсан байсан. Ийм уулзалт болохгүй. Хөтөлбөрт УИХ-ын даргатай уулзах арга хэмжээ тусгагдаагүй.

Нийслэлийн Эрүүл мэндийн газраас нийслэлийн Түргэн тусламжийн төвтэй хамтран “Угаарын хийн хордлогын эрсдлийг бууруулах нь” сэдэвт сургалт зохион байгууллаа. Тус сургалтад Налайх дүүргийн Эрүүл мэндийн төв болон Өрхийн эрүүл мэндийн төв, мөн Гачуурт, Хонхор тосгоны Эрүүл мэндийн төвийн эмч, эмнэлгийн мэргэжилтнүүд хамрагдсан юм.

Энэ хүрээнд “Угаарын хийн хордлого, түүнээс сэргийлэх талаар авч хэрэгжүүлж байгаа арга замууд” сэдвээр НЭМГ-ын мэргэжилтэн Ш.Тэгшбаяр, “Угаарын хийн хордлогын үед үзүүлэх яаралтай тусламж” сэдвээр нийслэлийн Түргэн тусламжийн төвийн дэд захирал С.Ариунболд нар хичээл зааж, эрүүл мэндийн байгууллагын эмч, эмнэлгийн мэргэжилтнүүдэд мэдлэг, дадлага олгосон байна.

Монголын үндэсний бөхийн холбоо, Их Эе зохион байгуулах ажлын хэсгээс нийт аймгийн бөхийн холбоод, дэвжээд, бөхчүүдийн анхааралд мэдэгдэл гаргасан байна. Мэдэгдэлд есдүгээр сарын 19-нд товлогдсон МҮБХ-ны 5-р Их эеийн хурал тодорхой шалтгааны улмаас хойшлогдсоныг уламжилж, хурлын товыг жич зарлана гэжээ.

Улаанбаатар-Сөүл-Улаанбаатар чиглэлийн транзит тусгай үүргийн онгоц өнөөдөр 10:40 цагт “Буянт-Ухаа” олон улсын нисэх буудлаас хөөрлөө.

\Уг агаарын хөлгөөр АНУ, Шинэ Зеланд, Малайз, БНСУ-аас нийт 255 иргэн эх орондоо ирэх юм.

Эдгээр иргэний

58 нь бага насны хүүхэдтэй гэр бүл,

37 нь өндөр настан,

29 нь эрүүл мэндийн шалтгаантай,

хоёр нь жирэмсэн-асран хамгаалагчтай,

134 нь бусад шалтгаантай иргэн байна.

Иргэдийг ХӨСҮТ, Цэргийн төв эмнэлэг болон “Сүнжин Гранд”, “Хавана” зочид буудалд тусгаарлана гэж Улсын онцгой комиссын Шуурхай штабаас мэдээллээ.

Гадаад улсуудаас иргэдээ татан авч буй ээлжит тусгай үүргийн уг нислэг өнөөдөр Улаанбаатарт 19:09 цагт газардах хуваарьтай байна.

Нийслэлийн Онцгой комисс өчигдөр /09.15/ хуралдлаа. Хуралдааны эхэнд Нийслэлийн 2020-2021 оны өвөлжилтийн бэлтгэлийг хангах зарим арга хэмжээний талаар Улаанбаатар хотын Ерөнхий менежер бөгөөд Захирагчийн ажлын албаны дарга Т.Гантөмөр танилцуулав. Мөн хуралдаанаар Хан-Уул дүүргийн 11 дүгээр хороо Зайсан толгойн зүүн хэсгийн 17 хотхоны 1700 гаруй айл өрхийн дулаан хангамжийн асуудал болон Сэлбэ дэд төвийн 28мВт дулааны станцын ажлын явцын талаар хэлэлцсэн юм.

Нийслэлийн Засаг дарга бөгөөд Улаанбаатар хотын Захирагчийн үүрэг гүйцэтгэгч Ж.Батбаясгалан “Өвөлжилтийн бэлтгэл ажлыг хангахад холбогдох мэргэжлийн байгууллагууд анхаарч ажилла. Сэлбэ дэд төвийн дулааны станцын барилгын ажлыг эрчимжүүлэхэд шаардлагатай байгаа хөрөнгө мөнгөний асуудлыг шийдвэрлэж ажиллах нь зүйтэй. Хан-Уул дүүргийн 11 дүгээр хороо, Зайсан толгойн зүүн хэсгийн 1700 гаруй айл өрхийг дулаан эрчим хүчээр хангаж, дулааны алдагдалгүй өвөлжих нөхцөлийг бүрдүүлэхэд холбогдох мэргэжлийн байгууллагууд онцгой анхаарч ажиллах хэрэгтэй. Дулаан түгээх чинь өөрөө хуультай. Дулааны сүлжээ байгууллагууд өдөр, шөнөгүй ажиллаж, засвар үйлчилгээгээ үзүүлчихээд эргээд өнөөдөр 9 дүгээр сарын 15-наас эхлээд дулаан өгөх гэхээр дунд нь дахиад борлуулдаг байж таарахгүй. Олон түмэнд дулаан түгээнэ гэж авчихаад дунд нь бизнес хийдэг энэ байдлаа одоо зогсоох хэрэгтэй. Шаардлагатай бол хуулийн байгууллагад хандах нь зөв. Ард иргэдийн гудамж талбайгаар олон түмэнд дулаан түгээнэ гэж шугам татчихаад дулаанаа түгээхгүй гэж байгаа аж ахуйн нэгж байвал Нийслэлийн Засаг даргын Тамгын газрын дарга, Захирагчийн ажлын алба энд хатуу хариуцлага тооцож ажилла. Өнөөдрөөс эхлэн айл өрхүүдийг дулаанаар хангах ажил эхэлж байна. Дулаан түгээлттэй холбоотой гарч буй хүндрэл бэрхшээл юу байгаа талаар холбогдох мэргэжлийн байгууллагууд олон нийтэд нээлттэй мэдээлж ажиллах хэрэгтэй” гэв.

Халдвар хамгааллын дэглэмээ сахиулж үйл ажиллагаагаа явуулахыг анхаарууллаа

Дараа нь хуралдаанд Нийслэлийн Засаг даргын 2020 оны А/930 дугаар захирамжаар түр хязгаарласан зарим аж ахуйн нэгж байгууллагын үйл ажиллагааг нээх саналын талаар Нийслэлийн Онцгой комиссын нарийн бичгийн дарга Д.Оюунбат “Хуралдааны төгсгөлд Хотын Захирагчийн үүрэг гүйцэтгэгч Ж.Батбаясгалан “Мэргэжлийн бүх байгууллагууд захирамжид заасан аж ахуйн нэгжүүдийн үйл ажиллагааг хэвийн горимд шилжүүлэх чиглэлд бэлтгэлээ хангаж ажилла. Гэхдээ өндөржүүлсэн бэлэн байдлын горимоо дагаж мөрдөх шаардлагатай гэдгийг аж ахуйн нэгж байгууллагуудад онцгойлон анхааруулах шаардлагатай. Халдвар хамгааллын дэглэмийг сахиж, үйл ажиллагаа явуулна. Холбогдох мэргэжлийн байгууллагууд энд хяналтаа тавьж ажиллана” хэмээсэн юм.

Барилга, хот байгуулалтын сайд Б.Мөнхбаатар БНТУ-аас Монгол Улсад суугаа Онц бөгөөд Бүрэн Эрхт Элчин Сайд Ахмет Язалыг хүлээн авч уулзлаа.

Уулзалтын эхэнд Барилга, хот байгуулалтын сайд Б.Мөнхбаатар цаг зав гарган ирж уулзаж буйд талархал илэрхийлэн, хоёр орны түүхэн харилцаа, хамтын ажиллагаа сүүлийн жилүүдэд идэвхтэй өрнөж, хамрах хүрээ нь барилга, орон сууц, нийтийн аж ахуйн салбарт улам өргөжиж байгаад сэтгэл хангалуун байгаагаа илэрхийллээ.

Мөн талууд хэрэгжиж буй төсөл, хөтөлбөрүүдийн талаар мэдээлэл солилцож цаашдын хамтын ажиллагааг барилга, хот байгуулалтын салбарт улам хөгжүүлэх талаар санал нэгдэв.

Японы Ерөнхий сайд Абэ Шинзогийн Засгийн газар бүрэн бүрэлдэхүүнээрээ огцорлоо гэж тус улсын Засгийн газрын хэрэг эрхлэх газар мэдээлжээ.

Японы парламент шинэ Ерөнхий сайдад нэр дэвшигчийг батлах санал хураалтыг удахгүй явуулна. Шинэ Ерөнхий сайдаар эрх баригч Либерал-Ардчилсан намын шинэ дарга Сүга Ёшихидэ болох ёстой. Үүний дараа Сүга Засгийн газрынхаа бүрэлдэхүүнийг танилцуулна.

Шинэ Засгийн газрын ихэнх гол албан тушаалд өмнөх Засгийн газрын бүрэлдэхүүнд багтаж байсан сайд нар үлдэх төлөвтэй байна. Тухайлбал, Гадаад хэргийн сайд Мотэги Тошимицу, Сангийн сайд Таро Асо, Төрийн газар, дэд бүтэц, тээвэр, аялал жуулчлалын сайд Акаба Казүёши, мөн Олимп, Паралимпын асуудал эрхэлсэн сайд Хашимото Сейко болон Улс орны эдийн засгийг сэргээх асуудал эрхэлсэн сайд Нишимура Ясүтоши нар суудлаа хадгалж үлдэнэ. Засгийн газарт ОХУ-тай эдийн засгийн харилцаа холбоог хөгжүүлэх асуудлыг хариуцдаг Эдийн засаг, худалдаа, аж үйлдвэрийн сайд Кажияма Хироши мөн дахин томилогдоно.

Харин Батлан хамгаалахын сайд Таро Коно удахгүй болох халаа сэлгээгээр албан тушаалаа орхиж, түүний оронд Абэ Шинзогийн дүү Нобуо Киши томилогдохоор болсон байна. Тэрбээр өмнө нь Гадаад хэргийн дэд сайдын албыг хашиж байжээ. Коног Захиргааны хэрэг, харилцаа холбооны сайдаар томилох ёстой байсан боловч эцэст нь түүнд төрийн албыг шинэчлэх үүрэг бүхий төрийн сайдын албан тушаалыг өгөхөөр шийдсэн байна.

ХӨСҮТ-ийн ерөнхий захирал Д.Нямхүү “Сүүлийн хоёр өдөрт 940 хүнд шинжилгээ хийхэд бүгдэд нь коронавирус илрээгүй.