Month: July 2020

Нийслэлийн Хан-Уул дүүргийн 8 дугаар хорооны Сонсголонгийн гүүрний зүүн талд тус бүр гурван морь холбож хөтөлсөн гурван морьтой хүн Туул гол гаталж байгаад нэг нь морьтойгоо живсэн тухай дуудлагыг долоодугаар сарын 28-ны өдрийн 20.22 цагт хүлээн авчээ. Улмаар Нийслэлийн Аврах ангийн алба хаагчид 23 км зам туулан 21.01 цагт очиход Төв аймгийн Алтанбулаг сумын Алтан-Овоо багийн Хустайн нуруугаас Налайх дүүргийн 6 дугаар хорооны нутаг болох Тэрэлж рүү морьд хүргэхээр явж байсан Архангай аймгийн Цэнхэр сумын харьяат иргэн 25 настай, эрэгтэй Д, нийслэлийн Баянгол дүүргийн 21 дүгээр хорооны харьяат иргэн 22 настай, эрэгтэй Г нар эсэн мэнд гол гаталж, 17 настай, эрэгтэй Г морьтойгоо живж нас баржээ.Иргэн Г-гийн цогцсыг осолдсон газраас баруун зүгт 200 метрээс гаргаж тус дүүргийн Цагдаагийн 2 дугаар хэлтсийн жижүүрийн бүрэлдэхүүнд шилжүүлэн өгсөн.

Т.БАТЛХАГВА

Маргааш буюу Пүрэв гарагт АНУ-ын сансар судлалын агентлаг NASA цоо шинэ Perseverance судалгааны станцаа Ангараг гараг руу илгээх гэж байна.

Энэ нь Ангараг гарагт газардсан NASA-гийн хамгийн том, хамгийн ухаалаг станц болох юм. Энэ зун Ангараг гараг руу гурван хөлөг нисэж байгаагаасхэдхэн хоногийн өмнө Арабын Нэгдсэн Эмиратын Hope, Хятадын Тянвэн-1 хөлгүүд дэлхийгээс хөөрсөн ба NASA-гийн хөлөг бусад хөлгүүдийн нэгэн адил 480 сая километр замыг долоон сарын хугацаанд туулж, ирэх оны хоёрдугаар сард Ангарагт хүрнэ.

Perseverance станц нь Ingenuity нэртэй жижиг нисдэг тэрэг тээвэрлэж яваа юм. Энэ нь анх удаа харь гарагийн тэнгэрт нисдэг тэрэг хөөргөх оролдлого ажээ.Зургаан дугуйтай, SUV автомашины хэмжээтэй, 1,040 кг жинтэй Perseverance бол NASA-гийн Ангарагт илгээсэн тав дахь өөрөө явагч станц бөгөөд хамгийн өндөр технологитой нь. Тиймээс өртөг нь $3 тэрбум орчим болжээ. Үүнээс гадна хөрсний дээж цуглуулах робот гар, Ангарагийн чичиргээ, доргилтыг хэмжих микрофонууд, зураг авах олон тооны камераар тоноглогдсон байна. Мөн өөр нэг чухал багаж нь Ангарагийн агаар мандал дахь нүүрстөрөгчийн давхар ислээс хүчилтөрөгч гаргаж авах төхөөрөмж юм.

Perseverance станцын нэг гол зорилго нь Ангарагийн хөрснөөс амьд организмийн ул мөрийг хайх юм. Өнөөдрийн хүйтэн, хуурай Ангараг гараг хэдэн тэрбум жилийн өмнө дулаан чийглэг орчинтой байсан гэж судлаачид үздэг.

Т.БАТЛХАГВА

Монгол Улсын Засгийн газар, Улсын онцгой комисын шийдвэрийн дагуу долоодугаар сард нийт 16 удаагийн тусгай үүргийн нислэгийг үйлдэж, гадаадад байгаа монгол иргэдээ татан авах ажиллагааг зохион байгуулж байна.

Өнөөдөр буюу 07 дугаар сарын 29-ний өдрийн хуваарийн дагуу Улаанбаатар-Сөүл чиглэлийн тусгай үүргийн онгоц 12:05 цагт хөөрлөө.

Тус нислэгээр 165 иргэн эх орондоо ирэх бөгөөд 20:20 цагт “Буянт-Ухаа” олон улсын нисэх буудалд газардах хуваарьтай байна гэж Улсын онцгой комиссын Шуурхай штабаас мэдээллээ.

УИХ-ын гишүүн асан Г.Солтанд холбогдох эрүүгийн хэргийн гэм буруугийн шүүх хуралдаан Банязүрх дүүргийн Эрүүгийн хэргийн анхан шатны шүүхэд өнөөдөр 09:00 цагт эхэллээ.

Нийслэлийн прокурорын газраас Эрүүгийн хуулийн ерөнхий ангийн 3.1 дүгээр зүйлийн 2, 3.4 дүгээр зүйлийн 1 дүгээр зүйлийг журамлан мөн хуулийн тусгай ангийн 22.1 дүгээр зүйлийн 22.1-3 дахь хэсэг /Улс төрд нөлөө бүхий этгээд өөрт болон бусдад эдийн засгийн давуу байдал бий болгосон гэмт хэрэг үйлдэхэд зориуд хүргэж, хатгагчаар хамтран оролцсон/-т заасан гэмт хэрэгт Г.Солтан /Улсын Их Хурлын гишүүн асан/-д холбогдуулан 2020 оны гуравдугаар сарын 30-ны өдөр яллах дүгнэлт үйлдэж ирүүлсэн 6 хавтас бүхий Эрүүгийн хэргийг тус шүүх 2020 оны зургаадугаар сарын 17-ны өдөр хүлээн авсан юм.

Улсын Их Хурлын 2020 оны хаврын ээлжитчуулганаар хэлэлцэж баталсан хууль тогтоомжийн талаарх танилцуулга, инфографикийг уншигч та бүхэнд цувралаар хүргэж байгаа билээ. Энэ удаа “Зарим газар нутгийг улсын тусгай хамгаалалтад авах, хилийн заагт өөрчлөлт оруулах тухай” Улсын Их Хурлын тогтоолын танилцуулга, инфографикийн хамт хүргэж байна.

“ЗАРИМ ГАЗАР НУТГИЙГ УЛСЫН ТУСГАЙ ХАМГААЛАЛТАД АВАХ, ХИЛИЙН ЗААГТ ӨӨРЧЛӨЛТ ОРУУЛАХ ТУХАЙ”

УЛСЫН ИХ ХУРЛЫН ТОГТООЛЫН ТАНИЛЦУУЛГА

Монгол Улсын Засгийн газраас 2019 оны 11 дүгээр сарын 11-ний өдөр өргөн мэдүүлсэн “Зарим газар нутгийг улсын тусгай хамгаалалтад авах, хилийн заагт өөрчлөлт оруулах тухай” Улсын Их Хурлын тогтоолын төслийг Улсын Их Хурлын 2020 оны 05 дугаар сарын 07-ны өдрийн чуулганы нэгдсэн хуралдаанаар хэлэлцэн баталлаа.

Улсын Их Хурлын 1998 оны 29 дүгээр тогтоолоор баталсан “Тусгай хамгаалалттай газар нутгийн үндэсний хөтөлбөр”-ийн 3.4-т “Байгалийн унаган төрхийг хадгалах, экологийн тэнцлийг хангах, байгалийн баялгийг арвижуулах, байгаль, түүх, соёлын өвийг хамгаалах зорилгоор байгалийн бүс, бүслүүрийн үндсэн шинж, иж бүрдлийг төлөөлсөн, экологийн онцгой ач холбогдол бүхий газар нутгаар тусгай хамгаалалттай газар нутгийн сүлжээг өргөжүүлж, нийт нутаг дэвсгэрийн 30-аас доошгүй хувьд хүргэнэ” гэж тодорхойлсны дагуу “Зарим газар нутгийг улсын тусгай хамгаалалтад авах, хилийн заагт өөрчлөлт оруулах тухай” Улсын Их Хурлын тогтоолоор 6 аймгийн 14 сумын нутаг дэвсгэрийг хамарсан нийт 9 газар нутгийг шинээр болон өргөтгөлөөр улсын тусгай хамгаалалтад авлаа. Тогтоол батлагдсанаар Монгол Улсын тусгай хамгаалалттай газар нутгийн хэмжээ 20.94 хувь боллоо.

Хэнтий аймгийн Дадал, Биндэр сумын зарим хэсгийг хамруулж Онон-Балжийн, Баянхонгор аймгийн Галуут сумын нутагт орших Хангайн нурууны байгалийн цогцолборт газрын өргөтгөл хийснээр байгаль хамгаалагчийг нэмэх, Завхан аймгийн Дөрвөлжин сумын нутагт орших Хомын тал, Увс аймгийн Ховд, Бөхмөрөн сум, Баян-Өлгий аймгийн Ногооннуур, Алтанцөгц сумын нутагт орших Ачит нуур-Дэвэлийн арлын, Хэнтий аймгийн Батширээт, Биндэр сумын нутагт орших Гутайн даваа-Хөмүүл голын эхийг байгалийн цогцолборт газраар тусгай хамгаалалтад авснаар шинээр хамгаалалтын захиргаа байгуулах эрх зүйн үндэслэл бүрдэж байна.

Тогтоолд тусгагдсан байгалийн нөөц газрын болон дурсгалт газрын ангиллаар улсын тусгай хамгаалалтад авч буй 4 газрын хамгаалалтын үйл ажиллагааг Тусгай хамгаалалттай газар нутгийн тухай хуульд заасны дагуу тухайн аймаг, сумын Засаг даргын бүрэн эрхийн хүрээнд хэрэгжүүлж ажиллана.

Тусгай хамгаалалттай газар нутгийн тухай хуульд заасны дагуу шинээр болон өргөтгөлөөр байгалийн цогцолборт газрын ангиллаар улсын тусгай хамгаалалтад авч буй 5 газар нутгийн хилийн заагийг тогтоолын хавсралтуудаар баталсан болно.

Ховд аймгийн Жаргалант сумын Буянт багийн “Задгай”-д Барилгын ажил хийж байсан “Ганбүрэн” ХХК-ийн ажилчид овоолсон шороог экскаватораар ”Хово” загварын өөрөө өргөгчид ачиж байхад овоолгоноос нурсан шороонд хүүхэд дарагдаж амь насаа алджээ. Тодруулбал 2020.07.28-ны өдрийн 18:15 цагт тус аймгийн Онцгой байдлын газрын алба хаагчид 3 км зам туулан 18:20 цагт очиж Буянт багийн 16 дугаар гудамжны иргэн Э /6 настай хүүгийн цогцсыг гаргаж аймгийн Цагдаагийн газрын жижүүрийн бүрэлдэхүүнд шилжүүлэн өгсөн байна.