Month: July 2020

Сүүлийн өдрүүдэд нийт нутгаар хур бороо ихтэй байна. Өнгөрсөн амралтын өдрүүдэд буюу долдугаар сарын 17-19-нд Дорнод аймгийн зарим сумдын хэсэгт цаг агаар эрс муудаж, дуу цахилгаантай, хүчтэй аадар бороо үргэлжлэн оржээ.

Үргэлжилсэн их борооны улмаас Хилийн 0132 дугаар ангийн хариуцсан хэсгээр нийт 1630 тооны бог, бод мал улсын хилд тулсныг хилчид хил давуулалгүй тогтоосон байна. Хилчид ийнхүү байгалийн давагдашгүй хүчний эсрэг хуулиар хүлээсэн үүргээ амжилттай биелүүлж, ард иргэдэд учирч болох 655 сая төгрөгийн хохирлоос урьдчилан сэргийлжээ.

Улсын хилд тулсан малыг хилийн салбар болон харуулын байрлалд татан хамгаалалтад авч, хилийн дэглэмийн зөрчлөөс урьдчилан сэргийлэх арга хэмжээг авч, эздэд нь хүлээлгэн өгөөд байгаа юм.

Нийслэлийн прокурорын газраас Эрүүгийн хуулийн ерөнхий ангийн 3.1 дүгээр зүйлийн 2, 3.4 дүгээр зүйлийн 1 дүгээр зүйлийг журамлан мөн хуулийн тусгай ангийн 22.1 дүгээр зүйлийн 22.1-3 дахь хэсэг /Улс төрд нөлөө бүхий этгээд өөрт болон бусдад эдийн засгийн давуу байдал бий болгосон гэмт хэрэг үйлдэхэд зориуд хүргэж, хатгагчаар хамтран оролцсон/-т заасан гэмт хэрэгт Г.Солтан /Улсын Их Хурлын гишүүн асан/-д холбогдуулан яллах дүгнэлт үйлдэж ирүүлсэн 6 хавтас бүхий Эрүүгийн хэргийг тус шүүх 2020 оны зургаадугаар сарын 17-ны өдөр хүлээн авсан.

Шүүгдэгч Г.Солтанд холбогдох гэм буруугийн шүүх хуралдааныг 2020 оны долдугаар сарын 20-ны өдөр зарласан боловч түүний өмгөөлөгч шүүх хуралдаан давхацсан шалтгаанаар шүүх хуралдаанд хүрэлцэн ирээгүй, шүүх хуралдааныг хойшлуулах тухай хүсэлт ирүүлсэн бөгөөд шүүхээс шүүгдэгч Г.Солтаныг өмгөөлүүлэх эрхээр хангаж, шүүх хуралдааныг 2020 оны долдугаар сарын 29-ний өдрийн 09:00 цагт товлож, шүүгдэгч Г.Солтанд урьд авагдсан хувийн баталгаа гаргах таслан сэргийлэх арга хэмжээг хэвээр үлдээсэн гэж Баянзүрх, Сүхбаатар, Чингэлтэй дүүргийнЭрүүгийн хэргийн анхан шатны шүүхийн Тамгын газраас мэдээллээ.

Өчигдөр буюу 19-ны өдөр Дорнод аймгийн Хэрлэн сумын дугаар багийн 1 дүгээр гудамжинд иргэн Г-ын хашаанд нүхэн жорлонд хүүхэд унасан тухай дуудлагыг 20:35 цагт хүлээн авжээ.

Тус аймгийн Онцгой байдлын газрын алба хаагчид таван км зам туулан 20:42 цагт очиж гурван настай, эмэгтэй хүүхэд гурван метрийн гүнтэй нүхэн жорлонд унасан байсныг эсэн мэнд гаргаж авсан байна. Эцэг эхчүүд хүүхдэдээ тавих хараа хяналтаа сайжруулж, болзошгүй эрсдлээс хамгаалахыг Онцгой байдлын байгууллагаас зөвлөж байна.

Монгол Улсын хэмжээнд жилд дунджаар 500 гаруй хүн зам, тээврийн ослын улмаас амь насаа алдаж байна. Зам тээврийн ослоор амиа алдсан хүний 70 орчим хувь нь анхны тусламж авч амждаггүйн улмаас нас бардаг гэсэн олон улсын судалгаа байдаг. Иймд Улаанбаатар хотоос Өмнөговь аймгийн чиглэлд Төв аймгийн ногоон Довын даваа, Дундговь аймгийн Дэлгэрцогт, Луус, Хулд сум, Өмнөговь аймгийн Цогт-Овоо сумд дахь замын хажуугийн үйлчилгээний газрууд болон Төв, Дундговь, Өмнөговь аймгийн авто замд байрлах цагдаагийн хяналтын 5 цэгийг түшиглэн “Анхны тусламж”-ийн цэг байгуулжээ.

Ингэснээр олон нийтэд анхны тусламжийн мэдлэг олгох сургалтыг тэнд ажиллаж буй цагдаагийн албан хаагч, авто зам засвар арчлалтын компанийн, төлбөр хураах цэгийн албан хаагч, ажилчид, иргэд зэрэг нийт 198 хүнд зааж мөн осол, гэмтлээс урьдчилан сэргийлэх, гэмтсэн үед үзүүлэх анхан шатны тусламжийг хэрхэн зөв хийх талаарх гарын авлага өгсөн байна. Зам, тээврийн хөгжлийн яамнаас Эрүүл мэндийн яам, Тээврийн цагдаагийн алба, Монголын Улаан загалмайн нийгэмлэг, “Авто тээврийн үндэсний төв” ТӨҮГ, “Найс Ти Ви” ХХК, Монголын Бартаат замын холбоотой хамтран Монгол Улсын Замын хөдөлгөөний аюулгүй байдлын үндэсний зөвлөлийн 2019 оны 08 дугаар сарын 27-ны өдрийн 01 дүгээр тогтоолоор батлагдсан “Замын хөдөлгөөний аюулгүй байдлыг хангах үндэсний хөтөлбөр”-ийг хэрэгжүүлэх үйл ажиллагааны төлөвлөгөө болон Монгол Улсын Засгийн газрын 2018 оны 163 дугаар тогтоолоор батлагдсан “Осол, гэмтлээс сэргийлэх үндэсний хөтөлбөр”-ийг хэрэгжүүлж байгаа нь энэ юм гэж тус яамнаас мэдээллээ.

Цагдаагийн байгууллагаас холбогдох дүрэм журамд нийцүүлэн нийслэлийн нутаг дэвсгэрт тарвага тахал зөөвөрлөгдөн орж ирэхээс урьдчилан сэргийлэх, таслан зогсоох арга хэмжээг тогтмол хэрэгжүүлж байна. Нийслэл рүү орох Эмээлт, Өлзийт, Морингийн даваа, Өвөр гүнт, Хонхор дахь шалган нэвтрүүлэх товчоодод мэргэжлийн бусад байгууллагатай хамтран 24 цагаар хяналт шалгалт хийж байгаа юм. Шалгалтын явцад,

-Дамжин өнгөрч буй бүх тээврийн хэрэгслийг зогсоож, мэргэжлийн хяналтын байгууллагын ажилтныг тээврийн хэрэгсэл болон зорчигчийн ачаа тээшинд үзлэг, шалгалт хийх боломжийг бүрдүүлэн хамтран ажиллах,

-Тарвага түүний гаралтай түүхий эд илэрсэн тохиолдолд хураан авч, ЗӨСҮТ-д шинжлүүлэхээр хүлээлгэн өгч байгаагаас гадна тээврийн хэрэгсэлд ариутгал хийх, зорчигчдын очих хаягийг тодруулан бүртгэж, явуулах гэх мэт арга хэмжээг мэргэжлийн байгууллагуудтай хамтран хийж, хэв журмыг сахиулан ажиллаж байгаа юм.

ЦЕГ-ын Нийтийн хэв журам хамгаалах, олон нийтийн аюулгүй байдлыг хангах албаны Хяналтын хэлтсийн ахлах байцаагч, цагдаагийн хошууч Д.Оюунчимэг Автотээврийн шалган бүртгэх товчоо болон хяналтын цэгүүдээр дамжин өнгөрч буй тээврийн хэрэгслүүд болон зорчигчийн ачаа тээвэрт хийсэн шалгалтын дүнд илрүүлсэн нойтон тарваганы зөрчлийн тоон мэдээг өнөөдөр танилцууллаа.

2019 оны сүүлийн хагас жилд 25 удаагийн үйлдлээр 364 ширхэг нойтон тарвага,

2020 оны эхний хагас жилд 20 удаагийн үйлдлээр 109 нойтон тарвагыг шалгалтын явцад илрүүлэн ЗӨСҮТ-д хүлээлгэн өгсөн байна.

Илэрсэн зөрчлийг цаг хугацаа болон илрүүлсэн шалган бүртгэх товчоогоор нь авч үзвэл:

Энэ оны нэгдүгээр улиралд

Эмээлт дэх хяналтын цэгээр 15 удаагийн үйлдлээр 97 ширхэг

Морингийн даваанд нэг үйлдлээр хоёр нойтон тарвага

Өлзийт дэх хяналтын цэгээр нэг үйлдлээр хоёр нойтон тарвага тус тус тээвэрлэн явсныг илрүүлсэн.

Хоёрдугаар улиралд Эмээлт дэх хяналтын цэгээр 2 удаагийн үйлдлээр 3 нойтон тарвага илрүүлсэн бол энэ сард нэг удаагийн үйлдлээр таван нойтон тарвага тээвэрлэн явсныг илрүүлсэн байна.

Цар тахалтай холбоотойгоор эм эмнэлгийн хэрэгсэл, тэр дундаа амны хаалтыг аль болох шуурхай хилээр нэвтрүүлж байгаа. Тэгвэл Монгол Улсын иргэн Б Гашуун Сухайт боомтоор мансууруулах эм, сэтгэцэд нөлөөт бодис хууль бусаар нэвтрүүлэх гэж байсныг хууль хяналтын байгууллагууд илрүүлжээ. Тухайн иргэн мансууруулах эм, сэтгэцэд нөлөөт бодисыг амны хаалтны дунд нуун далдалж, улсын хилээр нэвтрүүлэхийг завдсан байна.

Хөвсгөл аймгийн Бүрэнтогтох сумын нутаг сумын төвөөс хойд зүгт 25 км, аймгийн төвөөс баруун хойд зүгт 9 км-т орших Эрчим багийн Гонгон-Олом гэдэг газар тус сумын харьяат иргэн 34 настай, эрэгтэй Г согтууруулах ундаа хэрэглэсэн үедээ Дэлгэр мөрөн голыг явганаар гаталж яваад живсэн тухай дуудлагыг 07.17-ны өдрийн 05:05 цагт хүлээн авчээ.

1.Цаг агаар:

Өнгөрсөн хоногт: Говь-Алтай аймагт бага зэрэг бороо орсон. Бусад нутгаар цаг агаар тогтуун байлаа.

Өнөөдөр: Ихэнх нутгаар солигдмол үүлтэй. Зүүн аймгуудын нутгийн хойд хэсгээр бороо орно. Салхи ихэнх нутгаар баруун хойноос 6-11 м/с, говь талын нутгаар 12-14 м/с хүрч ширүүснэ. Хангай, Хөвсгөл, Хэнтэйн уулархаг нутаг, Хүрэнбэлчир орчим, Туул, Тэрэлж, Хэрлэн, Онон, Улз, Халх голын хөндийгөөр 15-20 градус, Их нууруудын хотгор болон говийн бүс нутгийн өмнөд хэсгээр 29-34 градус, бусад нутгаар 21-26 градус дулаан байна.

Улаанбаатар хотод: Үүлшинэ, бороо орохгүй, салхи баруун хойноос 6-11 м/с, өдөртөө 22-24 градус дулаан байна.

Төлөв байдал: 21-нд баруун аймгуудын нутгийн баруун хэсгээр, 22-нд баруун болон төвийн аймгуудын нутгийн зарим газраар, 23, 24-нд нутгийн зарим газраар дуу цахилгаантай аадар бороо орно. Салхи 21-нд нутгийн зүүн хэсгээр 14-16 м/с, бусад хугацаанд борооны өмнө түр зуур ширүүснэ. Ихэнх нутгаар халж, Алтай, Хангай, Хөвсгөл, Хэнтэйн уулархаг нутаг, Хүрэнбэлчир орчим, Завхан голын эх, Тэрэлж голын хөндийгөөр шөнөдөө 4-9 градус, өдөртөө 21-26 градус, Их нууруудын хотгор Орхон-Сэлэнгийн сав газар болон говийн бүс нутгаар шөнөдөө 16-21 градус, өдөртөө 30-35 градус, бусад нутгаар шөнөдөө 11-16 градус, өдөртөө 26-31 градус дулаан байна. 24-нд нутгийн хойд хэсгээр бага зэрэг сэрүүснэ.

2.Гал түймэр:

ААН, байгууллагын өмчид гарсан: Хөвсгөл аймгийн Бүрэнтогтох сумын Туяа багийн “Овоотын-Үзүүр” гэдэг газар /аймгийн төвөөс баруун хойд зүгт 25 км-т, сумын төвөөс зүүн зүгт 20 км-т/ “Энержи” ХХК-ийн эзэмшлийн “Шинши” загварын 2 ачааны автомашин шатаж байна гэсэн дуудлагыг 07.19-ний өдрийн 13:55 цагт хүлээн авсан. Тус аймгийн Онцгой байдлын газрын Гал түймэр унтраах, аврах 27 дугаар ангийн алба хаагчид 25 км зам туулан 4:34 цагт очиж 54 минут ажиллаж унтраасан.

Хувийн өмчид гарсан: Дорноговь аймгийн Замын-Үүд сумын 3 дугаар багийн “Жинчин”-гийн 1 дүгээр гудамжинд иргэн Б-ын 5 ханатай гэр шатаж байна гэсэн дуудлагыг 07.19-ний өдрийн 15:20 цагт хүлээн авсан. Тус аймгийн Онцгой байдлын газрын Гал түймэр унтраах, аврах 17 дугаар ангийн алба хаагчид 2.5 км зам туулан 15:23 цагт очиж 5 минут ажиллаж унтраасан.

Нийслэлийн Сонгинохайрхан дүүргийн 12 дугаар хорооны “Задгай”-д иргэн Д-ийн “Сонота-6” загварын суудлын автмашин шатаж байна гэсэн дуудлагыг 07.19-ний өдрийн 18:28 цагт хүлээн авсан. Тус дүүргийн Онцгой байдлын хэлтсийн Гал түймэр унтраах, аврах 26 дугаар ангийн алба хаагчид 4.5 км зам туулан 18:38 цагт очиж 5 минут ажиллаж унтраасан.

3.Зам тээврийн осол:

Дорноговь аймгийн Даланжаргалан сумын Олон-Овоод багийн “Олон-Овоо” гэдэг газар /сумын төвөөс хойд зүгт 5 км, Айраг сумын төвөөс хойд зүгт 30 км-т/ 2 автомашин мөргөлдөж автомашины төмөр хийцэд хүн хавчуулагдсан тухай дуудлагыг 07.19-ний өдрийн 08:02 цагт хүлээн авсан. Тус аймгийн Онцгой байдлын газрын алба хаагчид 30 км замыг туулан 08:38 цагт очиход Хэнтий аймгийн Бор-Өндөр сумын төвөөс Улаанбаатар хотын чиглэлд 5 зоригчтой зорчиж явсан “Алион” загварын суудлын автомашин, “Хонда инсайт” загварын суудлын автомашинтай мөргөлдөж Дорноговь аймгийн Айраг сумын харьяат иргэн Ж /61 настай, эрэгтэй/, Ц /58 настай, эмэгтэй/, Н/56 настай, эмэгтэй/, Г /56 настай, эмэгтэй/ нар гэмтсэн байсан тул Дорноговь аймгийн Нэгдсэн эмнэлэгт, Дорноговь аймгийн Даланжаргалан сумын харьяат иргэн О /60 настай, эмэгтэй/, Э /60 настай, эрэгтэй/, Б /58 настай, эрэгтэй/ нар нас барсан тул цогцсыг гаргаж Цагдаагийн байгууллагад шилжүүлэн өгсөн.

4. Байгаль цаг агаарын аюулт үзэгдэл:

Баян-Өлгий аймгийн Улаанхус сумын Хулжаа багийн “Шар нохойт” гэдэггазар /сумын төвөөс баруун хойд зүгт 70 км-т/ тус сумын нутгаар 07.19-ний өдрийн 10:30 цагт салхины хурд 20 м/с хүрсний улмаас иргэн З, С нарын 6 ханатай гэр нурсан, мөн 5 том хүн бэртэж гэмтсэн. Мэдээллийг мөн өдрийн 17:30 цагт тус сумын харьяат иргэн Х аймгийн Онцгой байдлын газарт ирүүлсэн.

5.Эрэн хайх, аврах ажиллагаа:

Увс аймгийн Малчин сумын Баянхайрхан багийн “Хар тэрмис” гэдэг газар / аймгийн төвөөс урд зүгт 133 км, сумын төвөөс баруун урд зүгт 53 км-т/ Тус сумын харьяат 13 иргэн Хяргас нуурын эргээс 2 км зайтай амарч байгаад иргэн Б /71 настай, эрэгтэй/ 07.19-ний өдрийн 03:00 цагт майхнаасаа гарч яваад сураггүй болсон тухай дуудлагыг мөн өдрийн 10:40 цагт хүлээн авсан. Тус аймгийн Онцгой байдлын газрын дарга, хурандаа Б.Баттулгаар ахлуулсан алба хаагчид эрэн хайх ажиллагааг зохион байгуулж 07.19-ний өдрийн 13:20 цагт “Хар тэрмис” гэдэг газраас хойд зүгт 7 км-т тус багийн “Малчин-Уул” гэдэг газраас эсэн мэнд олсон.

Нийслэлийн Налайх дүүргийн 1 дүгээр хорооны Энгэр шандын Задгай-д Туул голын эрэг дээр 3 хүүхэд тоглож байгаад Т/11 настай, эрэгтэй/ Туул голд живсэн тухай дуудлагыг 07.14-ний өдрийн 13:01 цагт хүлээн авсан. Тус дүүргийн Онцгой байдлын хэлтсийн Гал түймэр унтраах, аврах 28 дугаар анги, нийслэлийн Аврах ангийн алба хаагчид 07.19-ний өдрийн 07:00 цагаас эхлэн тус дүүргийн 1 дүгээр хорооноос “Баянзүрхийн гүүр”, “Минж үржүүлэг”, “Энгэр шанд”, “Баянзүрх хайрхан”, “Могойтын дэнж” гэдэг газар хүртэл 100 км-т завьтай урсаж, 80 удаа шумбалт хийж эрэн хайх ажиллагааг зохион байгуулсан боловч үр дүнд хүрээгүй тул мөн өдрийн 21:40 цагт түр зогсоосон. 07.20-ны өдрийн 08:30 цагаас эрэн хайх ажиллагааг дахин эхлүүлсэн.

Хөвсгөл аймгийн Бүрэнтогтох сумын Эрчим багийн “Гонгон-Олом” гэдэг газар /сумын төвөөс хойд зүгт 25 км, аймгийн төвөөс баруун хойд зүгт 9 км/ Тус сумын харьяат иргэн Г /34 настай, эрэгтэй/ согтууруулах ундаа хэрэглэсэн үедээ Дэлгэр мөрөн голыг явганаар гаталж яваад живсэн тухай дуудлагыг 07.17-ны өдрийн 05:05 цагт хүлээн авсан. Тус аймгийн Онцгой байдлын газрын алба хаагчид, ар гэрийнхэн 07.19-ний өдрийн 06:30 цагаас “Гонгон-Олом” гэдэг газраас “Хилэнтийн гүүр” гэдэг газар хүртэл 25 км-т завьтай урсаж, 1-2 метрийн гүнд 20 удаа шумбалт хийж, эрэн хайх ажиллагааг зохион байгуулсан боловч үзэгдэх орчин хязгаарлагдсан тул 07.19-ний өдрийн 22:23 цагт түр зогсоосон. 07.20-ны өдрийн 06:00 цагт эрэн хайх ажиллагааг дахин эхлүүлсэн.

Дорнод аймгийн Хэрлэн сумын 2 дугаар багийн “Пионер” хорооллын 1 дүгээр гудамжинд иргэн Г-ын хашаанд нүхэн жорлонд хүүхэд унасан тухай дуудлагыг 07.19-ний өдрийн 20:35 цагт хүлээн авсан. Тус аймгийн Онцгой байдлын газрын алба хаагчид 5 км зам туулан 20:42 цагт очиж У/3 настай, эмэгтэй/ 3 метрийн гүнтэй нүхэн жоролонд унасан байсныг эсэн мэнд гаргасан.

6.Мэдээлэл:

Гамшиг, аюулт үзэгдэл, ослын талаар: Хэнтий аймгийн Галшар сумын Сангийн далай багийн “Шувууны-Өндөр дов” гэдэг газар /аймгийн төвөөс урд зүгт 120 км-т, сумын төвөөс зүүн хойд зүгт 30 км-т/ Тус багийн харьяат малчин Н-ийн 5 ханатай гэр 07.19-ний өдрийн 15:00 цагийн орчимд шатсан. Мэдээллийг 07.19-ний өдрийн 21:35 цагт тус сумын Засаг даргын Тамгын газрын дарга Ш.Цэвэлсүрэн аймгийн Онцгой байдлын газарт ирүүлсэн.

ОНЦГОЙ БАЙДЛЫН ЕРӨНХИЙ ГАЗАР

Улсын Их Хурлын 2020 оны хаврын ээлжитчуулганаар хэлэлцэж баталсан хууль тогтоомжийн талаарх танилцуулга, инфографикийг уншигч та бүхэнд цувралаар хүргэж байгаа билээ. Энэ удаа Архив, албан хэрэг хөтлөлтийн тухай хууль (шинэчилсэн найруулга)-ийн танилцуулга, инфографикийн хамт хүргэж байна.

АРХИВ, АЛБАН ХЭРЭГ ХӨТЛӨЛТИЙН ТУХАЙ ХУУЛЬ (ШИНЭЧИЛСЭН НАЙРУУЛГА)-ИЙН ТАНИЛЦУУЛГА

Нийгмийн хөгжлийн чиг хандлага, архивын үйл ажиллагааг боловсронгуй болгох, хуулийг хэрэгжүүлэх явцад гарч буй зөрчил, дутагдлыг арилгах шаардлагын хүрээнд Архив, албан хэрэг хөтлөлтийн тухай хуулийн шинэчилсэн найруулгыг Монгол Улсын Засгийн газраас 2019 оны 10 дугаар сарын 08-ны өдөр Улсын Их Хуралд өргөн мэдүүлсэн бөгөөд Архив, албан хэрэг хөтлөлтийн тухай хуулийн шинэчилсэн найруулгын төсөл болон холбогдох бусад хуулийн төслүүдийг Улсын Их Хурал 2020 оны 04 дүгээр сарын 24-ний өдөр баталж, уг хуулийг 2020 оны 12 дугаар сарын 01-ний өдрөөс эхлэн дагаж мөрдөнө.

Архивын салбарын харилцааг зохицуулсан анхны хууль болох Архивын тухай хууль 1998 онд батлагдаж, өнгөрсөн 22 жилийн хугацаанд 8 удаа нэмэлт, өөрчлөлт орсон байна.

Архив, албан хэрэг хөтлөлтийн тухай хуулийн шинэчилсэн найруулгаар архив, албан хэрэг хөтлөлт нь арга зүй, зохион байгуулалтын хувьд нэгдмэл байх, архивын ашиглалт хуулийн хүрээнд нээлттэй, шуурхай байх, албан хэрэг хөтлөлтийн болон архивын сан хөмрөгийн бүрдүүлэлт тогтмол үнэн зөв, бүрэн байх эрх зүйн орчинг хуулиар бүрдүүлсэн бөгөөд дараах зарчмын шинжтэй асуудлыг хуульд тусгасан. Үүнд:

• албан хэрэг хөтлөлтийн үйл ажиллагааг анх удаа хуулийн хэм хэмжээгээр зохицууллаа;
• архивын баримт зэрэглэлийг холбогдох хуулийн заалттай уялдуулж, хуулийн шалгуур хангасан архивын баримтыг хосгүй үнэт баримтад хамааруулахаар зааж, нэн үнэт, үнэт, ердийн гэсэн зэрэглэлд хамааруулах архивын баримтыг хэрхэн тодорхойлох үндэслэлийг;
• Үндэсний архивын сан хөмрөгийн баримт болон архивын хосгүй үнэт, нэн үнэт, үнэт баримтыг салбарын харьяалал, өмчийн хэлбэр, мэдээлэл агуулагчийн төрөл, хадгалагдаж байгаа байршлаас үл хамааран тэдгээрт улсын нэгдсэн тоо бүртгэл хөтлөхөөр тусгаж, нэгдсэн тоо бүртгэлд орох баримтын мэдээллийг хэрхэн авах талаар;
• Үндсэний төв архив, салбар архив, төрөлжсөн архив, байгууллагын архивын эрх зүйн байдлыг нарийвчилан тодорхойлж, төрийн архивын чиг үүрэг, түүнийг байгуулах, өөрчлөх, татан буулгах үндэслэл, зарим төрийн архив салбар архивтай байхаар;
• Үндэсний архивын сан хөмрөгийн эх үүсвэрийг бүрдүүлэгч болох байгууллагын архивын анхан шатны баримт бүрдүүлэх, нөхөн бүрдүүлэх, үйл ажиллагаанд тавигдах шаардлаг, хуулиар хүлээх үүргийг;
• өмчийн хэлбэрээс үл хамааран байгууллага бүр архивтай байх, тэдгээр нь албан хэрэг хөтлөлтийн явцад үүссэн архивын баримтыг хуульд заасан хугацаанд түр хадгалах, ашиглуулах, байнга хадгалах архивын баримтыг төрийн архивын хадгалалтад шилжүүлэх үндсэн чиг үүргийг хэрэгжүүлэх талаар;
• архивын баримтын үнэ цэнэ, дахин давтагдашгүй шинж чанарыг харгалзан архивын баримтыг хадгалах үйлчилгээг тусгай зөвшөөрөлтэйгээр эрхлүүлэх, тусгай зөвшөөрлийг архив, албан хэрэг хөтлөлтийн асуудал хариуцсан төрийн захиргааны байгууллага олгодог байхаар;
• архивын ерөнхий газрын дэргэд ажилладаг баримт нягтлан шалгах орон тооны бус комиссын чиг үүргийг Архивын ерөнхий газрын гүйцэтгэх үндсэн чиг үүрэгт оруулж тусгасгаар архив, албан хэрэг хөтлөлтийг мэргэжил арга зүйн нэгдсэн удирдлагаар хангах тус газрын эрх, үүрэг бүрэн хангагдахаар;
• архив судлал, баримт судлалыг хөгжүүлэх, архивын баримтыг эрдэм шинжилгээ, судалгааны эргэлтэд оруулах, олон нийтэд сурталчлах, архив, албан хэрэг хөтлөлтийн чиглэлээр ажиллаж байгаа хүний нөөцийн чадавхыг сайжруулах, мэргэшүүлэх асуудлаар гарч байгаа хэрэгцээ, шаардлагыг харгалзан үзэж Сургалт, судалгааны төвийг Архив, албан хэрэг хөтлөлтийн асуудал эрхэлсэн төрийн захиргааны байгууллагын дэргэд ажиллуулахаар;
• төрийн болон байгууллагын архивын чиг үүрэгт архивын баримтыг цахим хэлбэрт шилжүүлэх, мэдээллийн сан бүрдүүлэх, архивын ашиглалтын үйл ажиллагаанд цахим үйлчилгээ нэвтрүүлэх, цаасан суурьтай болон цахим архивын баримтын хүчин төгөлдөр байдлыг;
• цахим архивын санг төлбөртэй болон төлбөргүй хадгалах үйлчилгээний талаарх зохицуулалтыг;
• Үндэсний архивын сан хөмрөгт төрийн чиг үүргийг хууль, эсхүл гэрээний үндсэн дээр хэрэгжүүлж байгаа хуулийн этгээдийн архивын баримтыг хамруулахаар;
• төрийн архивын үндсэн чиг үүрэгт хамаарах хөмрөгийн баримтын агуулга, бүрэлдэхүүн, байршлыг цахим мэдээллийн санд оруулахаар;
• төрийн архивын ажилтны нийгмийн баталгааг хангах зэрэг асуудлыг хуульчиллаа.