Month: July 2020

Нийслэлийн Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны шүүхэд ерөнхий сайд асан С.Баяр, “Петровис” компанийг үүсгэн байгуулагч Ч.Давааням нарт холбогдох хэргийн шүүх хурал үргэлжилж байна. Оюутолгой төсөлтэй холбогдуулан тэднийг шүүх юм.

Хэргийг нийслэлийн Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны шүүх долдугаар сарын 6-наас хэлэлцэж эхэлсэн ч Ерөнхий сайд асан С.Баяр, Петровис компанийг үүсгэн байгуулагч Ч.Давааням нарын өмгөөлөгч П.Баасанжав, Б.Мөнхбат нар нь шүүх хуралдаан давхацсан үндэслэлээр энэхүү шүүх хуралд ирээгүй тул тэдний хэргийг тусгаарлаж, шүүх хурлын товыг зарлахаар болж шийдвэрлээд байсан билээ.

ЭМЯ-ны Гадаад харилцаа, хамтын ажиллагааны хэлтсийн дарга Б.Янжмаа, “ДЭМБ-аас мэдээлснээр өчигдөр дэлхий дахинд 202 мянга гаруй шинэ халдвар 4200 гаруй нас баралт бүртгэгдсэн байна” гэв.

Түүнчлэн ДЭМБ-ын ээлжит хэвлэлийн хурлын үеэр “Шинэ коронавируст халдварын эсрэг вакцин бүтээх үйл ажиллагаа идэвхтэй өрнөж байна. Хэд, хэдэн вакцин эмнэлзүйн гуравдугаар шатны туршилтад байна. Хэрвээ вакцин амжилттай болбол, аюулгүй байдлыг хангасан гэх гэрчилгээ олгон олон тоогоор үйлдвэрлэнэ. Ингээд дэлхий нийтийн хүртээл болгоход хугацаа шаардлагатай. Тиймээс 2021 он хүртэл вакциныг хүлээх хэрэгтэй болно. Тиймээс үүний наана улс орнууд халдвараас маш сайн сэргийлэх шаардлагатай. Халдварын гинжийг эмнэлгийн бус буюу нийгмийн эрүүл мэндийн арга хэмжээг хэрэгжүүлж таслах боломжтой” хэмээн анхааруулсан гэлээ.

Хөвсгөл нуурт нэр бүхий амралтын газар бохироо цутгаж байна гэх тайлбартай зураг олон нийтийн сүлжээнд цацагдсан.

Уг мэдээллийн дагуу өнгөрсөн баасан гарагт Хөвсгөлийн Улсын тусгай хамгаалалтын газрын хамгаалалтын захиргаа, Хөвсгөл нуур, Эгийн голын сав газрын захиргаа, Экологийн асуудал хариуцсан байцаагч, Хөвсгөл аймгийн онцгой байдлын газар, Хөвсгөл УЦУОШТ-ийн байгууллагуудын бүрэлдэхүүнтэй ажлын хэсэг газар дээр нь ажиллан шинжилдгээ авч нуурын ус бохирдолгүй ба үерийн улмаас үүссэн тунадас гэдгийг тогтоожээ.

Т.БАТЛХАГВА

Орхон аймаг дахь Цагдаагийн газрын тусгай дугаарын 102 утсанд энэ сарын 21-нд 21:40 цагт Баян-Өндөр сумын Баянцагаан багийн нутаг дэвсгэрт оршин суух иргэн Б-ийн хоёр настай хүү А “гэрээсээ алга болсон” гэсэн дуудлага мэдээлэл иржээ. Энэ дагуу Цагдаагийн газрын бүрэлдэхүүн шуурхай ажиллаж Дотоодын цэргийн 816 дугаар тусгай салбарын харуулчин, ахлах ахлагч Ц.Алтантулга хүүг гэрээсээ төөрсөн байдалтай байсныг шөнийн 22:00 цагийн үед Булган аймаг Хангал сум Бөхөнгийн давааны орчмоос олж тогтоон эцэг, эхэд нь хүлээлгэн өгсөн байна.

Үүнтэй холбогдуулан цагдаагийн байгууллагаас эцэг эх, асран хамгаалагч нарыг хүүхдэдээ тавих анхаарал халамжаа сайжруулахыг анхаарууллаа.

Нийслэлийн Онцгой байдлын газар, нийслэлийн Эрүүл мэндийн газар, нийслэлийн Мэргэжлийн хяналтын газар, нийслэлийн Байгаль орчны газраас хамтран цаг үеийн асуудлаар мэдээлэл хийлээ.

Энэ жил хур бороо болон гол мөрний усны түвшин олон жилийн дунджаас илүү байгаа гэдгийг НОБГ-ын Гамшгаас урьдчилан сэргийлэх хэлтсийн дарга, хурандаа Г.Нэргүй мэдээллийн эхэнд онцлов.

Тэрбээр “Он гарсаар нийслэлийн хэмжээнд 22 хүн усны ослоор эндсэний 7 нь бага насны хүүхэд байв.

Одоогоор Туул, Хэрлэн голын усны түвшин 10-20 сантиметрээр нэмэгдсэн байна.

НОБГ, Цагдаагийн газар, нийслэлийн Гэр бүл, хүүхэд, залуучуудын хөгжлийн газар Тэрэлж, Туул, Хэрлэн гол дагуу завьт эргүүл явуулж байгаа ч усанд осолдох, авто машинтайгаа усанд олноороо суух асуудал гарсаар байна.

Тухайлбал,

• Өчигдөр Баянзүрх дүүргийн 20 дугаар хороо, Гачууртын эцэс орчимд Туул голын усанд 25 настай эрэгтэй живсэн. Дуудлагын дагуу нийслэлийн Аврах ангийн бүлэг очиж, усанд осолдсон гэх газраас урсгал дагуу нэг километрийн зайд нас барсан байсныг олж, цагдаагийн байгууллагад хүлээлгэн өгсөн.
• Долдугаар сарын 14-ний өдөр Налайх дүүргийн Энгэр шандын задгайд эцэг эхтэйгээ амарч байсан 11 настай хүүхэд Туул голын усанд живсэн гэх дуудлагын дагуу ес дэх хоногтоо эрэн хайх ажиллагааг явуулж байна.

25 настай эрэгтэйн хувьд, аялж зугаалж байхдаа согтууруулах ундаа хэрэглэсэн гэсэн урьдчилсан дүгнэлт гарсан.

Иймд иргэд аялж, зугаалахдаа архи согтууруулах ундааг хэтрүүлэн хэрэглэхгүй байх, бага насны хүүхдэд тавих хараа хяналтаа чангатгах шаардлагатай” гэв.

НБОГ-аас өгсөн мэдээллээр “Ойрын өдрүүдэд тарваган тахал гарсантай холбоотойгоор хууль бус ан агнуурт шалгуур тавих тал дээр анхаарч иргэдэд мэдээлэл өгч байна. Мөн амьтны талаарх дуудлага сүүлийн өдрүүдэд 15 удаа ирсэн. Үүнд могойны гурав, өмхий хүрэнгийнх тав, бор гөрөөснийх нэг, сарьсан багваахайных хоёр ирсэн байна. НБОГ нь зэрлэг ан амьтан осолдож, гэмтсэн дуудлагыг хүлээж авдаг. Бэртэл гэмтэлтэйг нь эдгээгээд байгальд тавьдаг. Ногоон бүсэд үхсэн хоёр тарваганы дуудлага ирсэн. Тиймээс нийслэлийн иргэд сэрэмжтэй байх шаардлагатай байгаа. Үхсэн, хөдөлгөөн нь удааширсан тарвагатай таарвал манайд, мөн ЗӨСҮТ-д мэдэгдэж болно” гэлээ.

Дээрх хоёрт тарвагыг ЗӨСҮТ-д хүргүүлсэн бөгөөд шинжилгээгээр ямар нэгэн өвчин илрээгүй байна.

НЭМГ-аас Тарваганы мах, түүхий эдийг хот суурин газарт оруулахгүй, эмчилгээний зориулалтаар хэрэглэхгүй, мэрэгч амьтанд хүрэхгүй байхыг зөвлөлөө.

Монгол Улсын Шадар сайд, Улсын Онцгой комиссын дарга Я.Содбаатар болон УОК-ын гишүүдийн төлөөлөл /2020/07/22/ Иргэдийн онцгой комисс санаачлагын төлөөллийг хүлээн авч уулзлаа.

Иргэдийн онцгой комисст гадаад улс орнуудад гацсан Монгол Улсын иргэдээс гурван мянга орчим өргөдөл, санал хүсэлт ирсэн тухай Шадар сайдад танилцуулcан юм.

Улсын Онцгой комиссын дарга иргэдийн татан авалттай холбоотой мэдээлэл хүртээмжтэй, ил тод байх ёстой талаарх байр суурийг өнгөрөгч баасан гарагт хэвлэлийн хурлаар дамжуулан илэрхийлсэн. Тэр дундаа иргэний өгсөн өргөдөл ямар шатанд байгаа, тухайн иргэн хэзээний нислэгт багтах боломжтой зэрэг мэдээллээр хангахыг чиглэл болгосон.
Энэ дагуу БНСУ-д суугаа дипломат төлөөлөгчийн газраас эхлэн гадаад улс орнууд дахь Элчин сайдын яамд өөрийн шугамаар дээрх чиглэлийн мэдээллийг байршуулан ажиллаж эхлээд байна.

Хоёр тал харилцан санал солилцон, цаашид Улсын Онцгой комиссын гаргасан албан ёсны мэдээлэл дээр үндэслэн ард иргэдэд мэдээллийг хүртээмжтэй хүргэхэд хамтран ажиллахаар боллоо.

Иргэдийн онцгой комиссын төлөөлөл Улсын Онцгой комиссын дарга, гишүүдийг цаг гарган хүлээн авсанд талархлаа илэрхийлсэн юм гэж Улсын онцгой комиссын Шуурхай штабаас мэдээллээ.