Month: July 2020

Тарваган тахал, коронавируст халдвар COVID-19-ийн өнөөгийн эрсдэлтэй нөхцөл байдалтай холбогдуулан тарваган тахлын өндөр эрсдэлтэй аймгуудын нэг Архангай аймагт ЗӨСҮТөвийн ерөнхий захирал, доктор Н.Цогбадрах энэ сарын 22-ны өдөр ажиллалаа.

Аж ахуйн нэгж, байгууллагад :

• Албан хаагчдын биеийн халууныг өглөө бүр үзэж, өвчний шинж тэмдэг илэрвэл гэрт нь буцаах
• Үйлчилгээг цахимжуулан хүний бөөгнөрөл үүсгэхгүй байх
• Хүн хоорондын зай барих тэмдэглэгээ хийх
• Санал хүсэлт, өргөдлийг утсаар болон цахимаар авах
• Хурал, уулзалтыг богино цагаар, цөөн хүнтэй хийх
• Хурлын үеэр өрөөнд цэвэр агаар оруулах
• Хурлын дараа хатуу гадаргууг сайтар цэвэрлэх
• Спиртэн суурьтай гар халдваргүйжүүлэгч байлгах
• Микрофоныг спиртэн суурьтай уусмалаар арчих эсвэл нэг удаагийн уут хэрэглэх
• Цахилгаан шатны товчлуур, явган болон урсдаг шат, хаалганы бариул, компьютер, утас зэргийг өдөрт 2-оос доошгүй удаа сайтар арчиж цэвэрлэх
• Халуун аарц, чацаргана, зөгийн балтай ус, цайгаар ажилчиддаа өгөх
• Хоолны газарт ажилчдыг цөөн тоогоор ээлжлэн үйлчлэх
• Ажлын байрны дарамт, стресс үүсгэхгүй, дасгал хөдөлгөөн хийх
• Урьдчилан сэргийлэх зөвлөмжийг албан тасалгаанд ил тод байрлуулах
• Ариун цэврийн өрөөнд саван, гар халдваргүйжүүлэгч, гарын цаас байлгах
• Ариун цэврийн өрөөнд чийгтэй цэвэрлэгээг 4-өөс доошгүй удаа хийх
• Халуурах, ханиах, цээжээр өвдөх зэрэг шинж тэмдэг илэрвэл 119, 80086829 дугаарт хандах
• Сэжигтэй тохиолдол илэрвэл түр тусгаарлах өрөө бэлтгэсэн байх

Монгол Улсын Эрүүл мэндийн яам, Нийгмийн эрүүл мэндийн үндэсний төв, Дэлхийн эрүүл мэндийн байгууллагын хамтарсан судалгааны баг Сэлэнгэ аймагт хоёр өдөр ажиллалаа.

Хамтарсан багийнхан “Коронавируст халдвар /COVID19/-ийн талаарх хүн амын ойлголт, мэдлэг, хандлага, дадал” судалгааг Сэлэнгэ аймгийн иргэдээс авсан байна. Судалгааг нийт 350 иргэнээс асуумжаар авчээ. Судалгаанд оролцсон иргэд тус өвчний талаарх эрсдэлийн талаарх ойлголт, эрүүл мэндийн тусламж үйлчилгээ, мэдээллийн эх сурвалж зэргийг тодорхойлон бөглөж өгсөн байна. Хамтын хүчээр халдвараас сэргийлэхэд бүх нийтийн оролцоо, мэдлэг, ойлголт хамгаас чухал гэдгийг энэхүү судалгааны үр дүн харуулна хэмээн аймгийн ЭМГ-ын дарга Ж.Од хэллээ. Энэхүү багийн судалгааны ажил орон даяар үргэлжлэн явагдах юм байна.

ЗӨСҮТ-ийн дэд захирал Б.Амгаланбаяр “Манай улсын 17 аймгийн 137 суманд тарваган тахлын байгалийн голомттой гэж тогтоогдлоо. 2020 оны эхний долоон сарын байдлаар 9 сэжигтэй тохиолдол бүртгэгдсэнээс нь гурав нь лабораторийн шинжилгээгээр тогтоогдож, нэг нь нас барьсан. Улсын хэмжээнд тарваган тахлын дархлаажуулалт хийж байгаа бөгөөд 41 мянга орчим иргэнийг тарваган тахлын дархлаажуулалтад хамруулаад байна. Энэ долоо хоногт нэмж 10 мянган хүнийг дархлаажуулна. Ихэвчлэн 15-17 насны эрэгтэй хүүхдүүд тарваган тахлын халдварт өртөж байгаа учир эцэг, эхчүүд хүүхдэдээ мэдээлэл өгч, хавх занга, урхи хэрэглэж тарвага агнахгүй байхыг анхааруулмаар байна”.

Нийслэлийн Боловсролын газраас 2020-2021 оны хичээлийн жилийн хамран сургах тойргийг баталсан байна.

Батлагдсан хамран сургах тойргийг үндэслэн хичээлийн шинэ жилийн элсэлтийг наймдугаар сарын 15-25-нд цахимаар зохион байгуулахаар төлөвлөөд байгаа юм.

Хамран сургах тойрог /БҮРЭН ЭХЭЭРЭЭ/:

Долоодугаар сарын 22-ны өдрийн байдлаар Хэнтий нурууны баруун хажуугийн Туул, Хангай нурууны арын Идэр, өврийн Чигэстэй, Увс нуурын савын Чигж, Баруунтуруун, Хангилцаг, Хархираа, Түргэн, Алтай нуруунаас эхтэй Ховд, Булган, Турган зэрэг голуудын усны түвшин өмнөх өдрийнхөөс 5-25 см нэмэгдэж, Туул, Ховд, Хариг, Түргэн, Хархираа зэрэг голууд үерийн түвшинг 5-20 см даван үерлэж байна.

Ойрын өдрүүдэд баруун болон төвийн нутгуудаар түр зуурын усархаг аадар бороо орох тул дээр дурьдсан голууд болон гол мөрний сав дагуу суурьшиж, нутагшиж буй ард иргэд, аж ахуйн нэгж, аялаж зугаалж яваа хүмүүсийг үерийн аюулаас урьдчилан сэргийлэхийг онцгойлон анхааруулж зөвлөмж хүргэж байна.

Үүнд:

– Гэр, хашаа, саравч, орон байраа гуу жалга, голын ойролцоо барьж суурьшихгүй байх.

– Бага насны хүүхдийг гол усны ойролцоо тоглуулахгүй байх, хүүхдэд тавих хараа, хяналтаа сайжруулах.

– Үерийн ус зайлуулах суваг шуудуу татах, далан хашлага барих зэргээр өөрийн болон бусдын амь нас , эрүүл мэнд, эд хөрөнгийг болзошгүй гамшиг ослоос урьдчилан сэргийлэх.

– Голын усны түвшин нэмэгдэж, үерийн байдалд шилжсэн үед гармаар зорчихгүй зориулалтын гарцтай газраар зорчих.

– Хот суурийн газрын үерийн далангийн ус зайлуулах хоолойгоор ус чөлөөтэй урсах нөхцлийг бүрдүүлэхийг орон нутгийн холбогдох байгууллага анхааралдаа авч урьдчилан арга хэмжээ авахыг зөвлөж байна.

Монгол Улсын Засгийн газрын 2020 оны 07 дугаар сарын 16-ны өдрийн хуралдаанаар бүх шатны боловсролын байгууллагууд /ерөнхий болон дээд боловсролын сургууль, цэцэрлэг/-ын үйл ажиллагааг эхлүүлэх талаар холбогдох судалгааг гаргаж, үнэлгээ хийх тухай өгсөн чиглэлийн дагуу kоронавируст халдварын салбар дундын 10 дахь шатны эрсдэлийн үнэлгээг ХӨСҮТ-д зохион байгуулж байна.Эрсдэлийн үнэлгээг ЭМЯ, БШУЯ, ХӨСҮТ, ОБЕГ, МХЕГ, ТЕГ, ЦЕГ, НЭМГ, НЗДТГ зэрэг байгууллагын төлөөллөөс бүрдсэн ажлын хэсэг хийж байгаа юм. Шадар Сайдын 2017 оны А/08 тоот тушаалаар батлагдсан “Эрсдэлийн үнэлгээний аргачлал”-ын дагуу хийж, үнэлгээний дүнг Улсын онцгой комисст танилцуулна гэж Онцгой байдлын ерөнхий газраас мэдээллээ.

Эрүүл мэндийн яамнаас коронавируст халдварын эргэн тойронд өрнөж буй тандалт судалгааны тоймоос хүргэж байна. Япон улсын эрдэмтдийн хийсэн голомтын судалгаагаар диско бараар үйлчлүүлэхэд коронавируст халдварт өртөх эрсдэл хамгийн өндөр гэсэн судалгаа гарчээ. Учир нь хүн хоорондын зай барих ямар ч боломжгүй, хүмүүс маш ойрхон зайнаас харьцдаг ба харанхуй, бүгчим зэрэг нь халдвар амархан тархахад нөлөөлөх юм гэнэ.

АНУ-ын Жонс Хопкинсын их сургуулийн эрдэмтэд Ковид-19-ийн тархалтад хүн хоорондын зай барих арга хэмжээний нөлөөллийг судалжээ. 26 мужийн өвчлөлийн мэдээлэлд дүн шинжилгээ хийхэд 20 мужид хүн амын хөдөлгөөн багассанаар халдварын тохиолдол буурч байгааг тогтоожээ. Энэхүү судалгаа нь Ковид-19-ийг бууруулах үр дүнтэй арга бол зай барих гэдгийг баталсан бөгөөд коронавирусийн эсрэг вакциныг өргөн хүрээнд хийх хүртэл хэрэгжүүлсээр байх шаардлагатайг эрдэмтэд зөвлөжээ.

Иран улсын Техран анагаах ухааны их сургуулийн эрдэмтэд Ковид-19 зөвхөн уушгийг өвчлүүлээд зогсохгүй бүдүүн, нарийн гэдэс, элэг, бөөр, арьс, зүрх, цөс, тархи зэрэг бусад эрхтнүүдийг гэмтээдгийг тогтоожээ. Зарим эмгэг өөрчлөлтүүд нь САРС, МЕРС өвчний шинж тэмдэгтэй давхцаж байгаа бөгөөд судлаачид эмчлэгч эмч нар анхаарах шаардлагатай гэж зөвлөжээ.

Испани улсын эрдэмтэд нийт хүн амын дундах Ковид-19-ийн эсрэг сүргийн дархлааг тодорхойлох зорилгоор 35883 айл өрхийг санамсаргүй түүврийн аргаар сонгон авч судалжээ. Судалгаагаар нийт хүн амын 5%-д нь эсрэг бие үүссэн ба Ковид-19-ийн эсрэг бие илэрсэн ч дахин халдварлахгүй гэх баталгаагүй, эсрэг бие хэдий хугацаанд хамгаалдаг нь тодорхой бус байна гэж эрдэмтэд үзжээ. Тиймээс ч цар тахлын дараагийн давлагаанаас сэргийлэхийн тулд нийгмийн эрүүл мэндийн арга хэмжээг тогтмол хэрэгжүүлэх хэрэгтэйг онцолжээ.

Их Британийн Кембриджийн их сургуулийн эрдэмтэд Ковид-19-тэй эхээс төрсөн 58 нярайн 4 буюу 6.8% нь халдвар авсныг баталжээ. Төрснөөс хойш 1-ээс 2 өдрийн дараа шинжилгээ авсан тул төрсний дараа халдвар авсан байх магадлалтай гэж үзжээ. Халдвартай эхийн эхэс болон сүүнээс коронавирус илрээгүй байна.

Герман, Австрали зэрэг орны эрдэмтэд олон улсын аялал жуучлал болон цар тахлын хамаарлыг судалсан эдийн засгийн судалгаагаар жуулчдын тоо дунджаар 1%-иар нэмэгдэхэд Коронавируст халдвар авсан иргэд 1.2%-иар, нас баралт 1.4%-иар ихсэж байна гэсэн тооцоолол гарчээ.

Т.БАТЛХАГВА