Month: April 2020

COVID-19 вируст халдварын тархалтын эсрэг гадаад орнуудын хэрэгжүүлж буй арга хэмжээний тухай мэдээллийг ДТГ-уудаас ирүүлсэн мэдээ болон интернэтийн эх сурвалж дээр үндэслэн 2020.04.03-ны 08.00 цагийн байдлаар шинэчлэн ажлын хэрэгцээнд хүргүүлж байна.

Дэлхийд COVID-19-ын халдвар авагсдын тоо 1 саяыг давлаа.

– Тайланд, Гүрж: Онц байдал зарлаж, хөл хорио тогтоосон

– ОХУ: 03/30-с зарласан цалинтай амралтыг 04/30 хүртэл сунгасан

– Казахстан: Дотоодын төмөр замын хөдөлгөөнийг зогсоосон

– Мальдив: Хил дээр виз олголтыг зогсоосон

– Тайланд: 04/03-с улс даяар хөл хорио тогтоосон

– Филиппин: Хөл хорионы үеэр эмх замбараагүй байдал үүсгэсэн иргэдийн эсрэг галт зэвсэг хэрэглэхийг хууль сахиулах байгуулагуудад зөвшөөрсөн

– Япон: 04/03-аас Албани, Армени, Израиль, Индонез, Их Британи, Эквадор, Египет, Австрали, Канад, БНСУ, Умард Македон, Кипр, Грек, Хорват, Косово, Конго, Кот д’Ивуар, Сингапур, Словак, Серби, Тайланд, Чех, БНХАУ (Хонконг, Макао, Тайвань), Чили, Доминика, Турк, Шинэ Зеланд, Панам, Унгар, Бахрейн, Филиппин, Финланд, Бразил, Болгар, Бруней, АНУ, Вьетнам, Босни-Херцеговин, Боливи, Польш, Малайз, Молдов, Марокко, Монтенегро, Маврики, Латви, Литва, Румынд сүүлийн 14 хоногт зорчсон бүх улсын иргэдийг нэвтрүүлэхгүй

– Гүрж: 03/30-04/21 хооронд хөл хорио тогтоосон

– Кипр: 04/04 хүртэл 28 улсын чиглэлийн нислэгийг зогсоосныг 14 хоногоор сунгасан

– Португал: Онц байдлыг 04/17 хүртэл сунгаж, иргэдийг оршин суугаа захиргааны нэгжээс ажлын бус шаардлагаар гарахыг хориглосон. 04/09-04/13: Бүх нисэх буудлыг хааж, хуваарьт нислэгүүдийг зогсооно

– Саудын Араб: Мекка, Медина хотуудад 24 цагийн хөл хорио тогтоосон

БНСУ-ын Халдварт өвчин судлалын төвийн 10:00 цагийн мэдээллээр тус улсын хэмжээнд коронавирусаар халдварласан тохиолдол дөрөвдүгээр сарын 03-ны 00.00 цагийн байдлаар 86-аар нэмэгдэж, нийт 10062-д хүрсэн байна. Шинээр Сөүл хотод 16, Дэгү хотод 9, Инчон хотод 1, Гуанжү хотод 1, Кёнги мужид 23, Канвон мужид 2, Умард Чүнчон мужид 1, Өмнөд Чүнчон мужид 1, Умард Чолла мужид 1, Өмнөд Чолла мужид 1, Умард Гёнсан мужид 5, Өмнөд Гёнсан мужид 1, хилийн хорио цээрийн бүсээс 22 тохиолдол нэмэгдсэн байна. Одоогийн байдлаар 443273 (+11530) иргэнийг шинжилгээнд хамруулж, үүнээс 414303 (+10421) иргэний хариу сөрөг гарч, 18908 (+1023) иргэний хариу хүлээгдэж байна. Нийт 6021 (+193) иргэн бүрэн эдгэрсэн бол 174 (+5) иргэн нас барсан. Одоогоор 3867 (-112) иргэн тусгаарлагдсан байна.

Дэлхийн хэмжээнд нийт 1015466 (+80035) тохиолдол бүртгэгдэж, бүрэн эдгэсэн 212229 (+18230), нас барсан 53190 (+6716) байна. Шинээр бүртгэгдсэн улс: Малави

2020 оны дөрөвдүгээр сарын 3-ны өдрийн 10.30 цагийн байдлаар Хятадын 31 мужид шинэ коронавирусын халдварт хатгалгаагаар өвчилсөн тохиолдол 82802 (+80) хүрчээ. Бүрэн эдгэсэн 76785 (+332), нас барсан 3331 (+10), шинж тэмдэггүй өвчлөлийн тохиолдол 1422 (+55) байна. Гадаад улсаас Хятадад зөөвөрлөгдсөн 870 (+64) тохиолдол байна.

Нийслэлийн Засаг даргын захирамжаар нийтийн эзэмшлийн гудамж, талбайд иргэдийн аюулгүй байдлыг алдагдуулж байгаа газрыг илрүүлэн судлах ажлын хэсгийг байгуулан ажиллаж байгаа билээ. Ажлын хэсэг нийслэлийн есөн дүүргийн хэмжээнд нийтийн эзэмшлийн гудамж, талбайд үзлэг судалгаа хийсэн. Судалгаагаар 5423 зөрчил илэрсэн байна. Үүнээс барилгын үйл ажиллагаа явуулж буй 379 барилга орчны аюулгүй байдал алдагдсан гэх зөрчил илэрчээ. Өнөөдрийн байдлаар 284 барилгын зөрчлийг хянаж, арилгах чиглэлээр ажиллаж байна.

Энэ ажлын хүрээнд Хотын стандарт, орчны аюулгүй байдал, хяналт, зохицуулалтын газрын орлогч дарга О.Оджаргал, тус газрын Орчны аюулгүй байдлын хэлтсийн дарга Н.Билэгсайхан, нийслэлийн Мэргэжлийн хяналтын газрын ахлах байцаагч Г.Гантөмөр болон бусад холбогдох албаныхан өнөөдөр Баянзүрх дүүргийн 1 дүгээр хороонд очиж ажиллалаа. Энэ үеэр Хотын стандарт, орчны аюулгүй байдал, хяналт, зохицуулалтын газрын орлогч дарга О.Оджаргал “Орчны аюулгүй байдлын стандартыг хангах албан мэдэгдлийг барилгын үйл ажиллагаа явуулдаг аж ахуйн нэгж, байгууллагуудад хүргүүлсэн. Албан мэдэгдлийн хугацаа ирэх тавдугаар сарын 1-ний өдөр дуусна. Аж ахуйн нэгжүүдийн зөрчлийг арилгахын тулд Хотын стандарт, орчны аюулгүй байдал, хяналт, зохицуулалтын газраас эмхэтгэл, тавигдах шаардлагыг гаргасан. Энэ шаардлага, стандартыг барьж ажиллавал барилгын компаниуд орчны аюулгүй байдлаа бүрэн хангах боломжтой юм. Өнөөдөр Баянзүрх дүүргийн 1 дүгээр хороонд ажиллаж, барилгын компаниудын удирдлагуудтай уулзан мэдэгдэл, эмхэтгэлийг өгч байна” гэлээ.

Иргэдийн зорчих хөдөлгөөнийг хаасан, орчны аюулгүй байдлыг алдагдуулсан гурван барилга, байгууламжид судалгаа явуулахад нэг өдрийн дотор 15 мянган иргэн автомашинтай болон явганаар барилгын дэргэдүүр зорчих хөдөлгөөн хийдэг байна. Иймд орчны болон хөдөлмөрийн аюулгүй байдал, явган хүний зам, автомашины орох, гарах хэсэг, барилгын материал тээвэрлэдэг автомашины дугуйг ариутгаж, халдваргүйжүүлэх зэрэг үүргийг барилгын компаниудад өгчээ.

Говь-Алтай аймгийн Тонхил сумын Бүс-Уул багийн “Бөөн чулуут” гэдэг газарт дөрөвдүгээр сарын 02-ны өдрийн 11:23 цагт 3.9 магнитутын хүчтэй газар хөдлөлт болжээ. Тус аймгийн Онцгой байдлын газраар дамжуулан тус сумын Засаг даргын Тамгын газрын дарга М.Хүүхнээгээс тодруулахад иргэдэд чичирхийлэл мэдрэгдсэн, хохирол учраагүй гэж ОБЕГ-аас мэдээллээ.

Боловсролын үнэлгээний төвөөс Элсэлтийн ерөнхий шалгалтад бэлтгэгчдэд зориулан help.eec.mn “Цахим зөвлөх” хуудсыг ажиллуулж байна. Та тус цахим зөвлөх хуудсанд хандсанаар:

• Элсэлтийн ерөнхий шалгалтад бэлтгэгчдэд зориулсан теле зөвлөмж хичээлүүд үзэх;
• 12 дугаар ангийн сурагчдад зориулсан цахим хичээлүүд үзэх;
• Элсэлтийн ерөнхий шалгалтын журам, бусад заавар зөвлөмжүүдтэй танилцах;
• Түгээмэл асуулт хариулт хэсгээс өөрт тулгамдаж буй асуултад хариулт авах;
• 2018, 2019 оны Элсэлтийн ерөнхий шалгалтын 11 хичээлийн жишиг даалгаварууд (түлхүүр үгтэй)-ыг ашиглан мэдлэг чадвараа сорих;
• Цаг үеийн мэдээ мэдээллийг нэг дороос цаг алдалгүй авах боломжтой юм.

Шинэ коронавирусний халдвар тархахаас урьдчилан сэргийлэх, урин дулааны улирал эхэлж байгаатай холбогдуулан орчны халдвар хамгаалал, эрүүл ахуйн нөхцөлийг сайжруулах, болзошгүй эрсдэлээс урьдчилан сэргийлэх зорилгоор Хан-Уул дүүргийн “Хунт хайрхан”, “Баяндэмбэрэл” ХХК-ууд нийтийн эзэмшлийн зам талбай, орон сууцны хороолол, гэр хорооллын нарийн гудамж, хогийн цэгүүд, айл өрхийн бохирын цооног, нүхэн жорлон, үерийн далан суваг шуудуу нийт 87 иргэн, ААНБ-ын 4749 м2 талбайд хийсэн ариутгалд хяналт тавин ажиллаж байна. Тус дүүрэгт ариутгах, халдваргүйжүүлэх ажил эрчимтэй үргэлжилж байна.

Япон улсаас монгол иргэдээ татан авах ОМ502 дугаартай нислэг Токиогоос өнөөдөр 10:33 цагт хөөрчээ. Улаанбаатарт 15:57 цагт буух төлөвлөгөөтэй байна. Уг тусгай нислэгээр 266 зорчигч ирж буй бөгөөд үүнээс 14 нь нярай хүүхэд байгаа аж. Мөн 1,284 килограмм ачаа тээвэрлэж байгаа гэж Зам, тээврийн хөгжлийн яамнаас мэдээллээ.

Түүнчлэн гадаадаас монгол иргэдээ татах тусгай нислэгүүдэд нисгэгч, үйлчлэгчид гээд нислэгийн багийн нийт есөн хүнээс гадна МХЕГ-ын улсын байцаагчид, ХӨСҮТ-ийн эмч нар ажиллаж байна. Тэд нислэг гүйцэтгэснийхээ дараа зорчигчдын адил 21 хоног тусгаарлагдаж, давтан шинжилгээнд хамрагдах юм. Зорчигчдыг “Хараацайн жигүүр”, “Автобус-5”, “Эрдэм транс”, “Тахилт транс” зэрэг компанийн 8 автобус эмнэлэг, тусгаарлах байрууд руу тээвэрлэхээр бэлэн байдлыг хангаад байгаа аж. Зам, тээврийн салбарын нийт 24 мянган ажилтан, албан хаагчдаас 16 мянга нь өндөржүүлсэн бэлэн байдлын тусгай горимд шилжин 24 цагаар жижүүрлэн ажиллаж байна.

Монгол Улсын Амьтны тухай хуулийн 9.2.8 зааснаар жил бүрийн дөрөвдүгээр сарын 1-нээс зургаадугаар сарын 15-ныг хүртэлх хугацаанд буюу үржлийн үед нь загас агнахыг хориглодог. Загас үржлийн үедээ олон тооны түрс шахдаг ч 1,000 түрс тутмын нэг нь л жараахай болдог аж. Бүх загасны үржих хугацаа харилцан адилгүй тул Амьтны тухай хуульд зарим цөөн зүйлийн загасыг агнахыг хориглосон хугацааг өөрөөр тогтоосон байдаг.

Тухайлбал, тус хуулийн 9.2.3-аас 9.2.8 хүртэлх хэсэгт зааснаар:

• Дархадын цагаан загасыг жил бүрийн наймдугаар сарын 1-ний өдрөөс аравдугаар сарын 20-ны өдөр хүртэл;
• Буйр нуурын загасыг жил бүрийн тавдугаар сарын 15-ны өдрөөс наймдугаар сарын 1-ний өдөр хүртэл;
• Омоль загасыг жил бүрийн наймдугаар сарын 30-ны өдрөөс аравдугаар сарын 30-ны өдөр хүртэл;
• Зарам загасыг жил бүрийн есдүгээр сарын 5-ны өдрөөс дараа оны нэгдүгээр сарын 30-ны өдөр хүртэл;
• Алтайн сугас загасыг жил бүрийн зургаадугаар сарын 15-ны өдрөөс наймдугаар сарын 31-ний өдөр хүртэл;
• Бусад загасыг жил бүрийн дөрөвдүгээр сарын 1-ний өдрөөс зургаадугаар сарын 15-ны өдөр хүртэл хугацаанд барихыг хоригложээ.

Зөрчлийн тухай хуулийн 7.6 зүйлийн 4 дэх хэсэгт зааснаар агнуурын бүс нутгаас бусад газарт, эсхүл амьтныг агнах хориотой үед, эсхүл хориглосон хугацаанд, эсхүл хориглосон арга хэрэгслээр амьтныг барьсан, агнасан, тээвэрлэсэн бол зөрчил үйлдэхэд ашигласан эд зүйл, хууль бусаар олсон хөрөнгө, орлогыг хурааж, учруулсан хохирол, нөхөн төлбөрийг гаргуулж хүнийг гурван зуун нэгжтэй тэнцэх хэмжээний төгрөгөөр, хуулийн этгээдийг гурван мянган нэгжтэй тэнцэх хэмжээний төгрөгөөр торгох хуулийн заалттай аж.