Month: April 2020

Хачигт халдварын идэвхжлийн үе ирж байгаатай холбогдуулан иргэдэд дараах зөвлөмжийг хүргэж байна.

1. Иргэд хачгийн идэвхжлийн үед буюу 4-10 дугаар сард биедээ, ялангуяа толгойн үстэй хэсэгт хачиг орсон эсэхийг өдөр тутамд шалгаж байх;
2. Хөдөө явахдаа хачгийг илрүүлэхийн тулд тод өнгийн хувцас өмсч явах, хачиг илэрсэн тохиолдолд яаралтай авч хаях;
3. Хөдөө болон ойд явахдаа урт ханцуйтай хувцас, урт түрийтэй гутал, зузаан өмд өмсч, хачиг нэвтрүүлэхгүйн тулд өмдний шуумгийг гутлын түрийний дотуур хийх, боломжтой бол хачиг үргээгч бодисыг хувцасны ханцуй, өмд рүү цацаж хэрэглэх;
4. Хэрвээ эмнэлэгт хандах боломжгүй газарт хачигт хазуулсан бол хазсан хачиг дээр эмнэлгийн цэнхэр спиртээр 2-3 удаа арчилт хийж, 1-2 минут хүлээгээд хавчаараар 45 градусын налуу өнцгөөр зөөлөн татаж авна. Хачиг хазсан хэсэгт 1%-ийн повидон иодын уусмал (Тамедины уусмал)-ыг хөвөнд шингээж, цэвэр боолт хийнэ.
5. Хачигт хазуулсан тохиолдолд сэргийлэх зорилгоор эмчилгээ хийлгэх шаардлагатай тул яаралтай эмнэлэгт хандах нь зүйтэй.
6. Хачигт хазуулсанаас хойш 3-14 хоногийн дотор халуурах, толгой өвдөх, хачиг хазсан газарт цагираг хэлбэрийн улайлт үүсэх, үрэвсч шархлах, арьсан дээр гөвдрүүт тууралт гарах, огиулах, бөөлжих, нуруу, хүзүүний булчин хүчтэй өвдөх, эрвэгнэх, чичрэх, татах зэрэг шинж тэмдэг илэрвэл яаралтай эмнэлэгт хандах шаардлагатай.
7. Хачигт халдварын байгалийн голомтот ойн бүсэд ажиллаж, амьдарч байгаа иргэд хачигт энцефалит өвчнөөс сэргийлэх вакцин тариулах;
8. Ямаа, үхрийн түүхий сүү, цус зэргийг уухгүй байх, эдгээр амьтдын махыг сайтар болгож хэрэглэх нь халдвараас сэргийлнэ.

Дэлхий нийтэд тархаж байгаа “COVID-19” цар тахлаас сэргийлэх үүднээс олноор цуглах үйл ажиллагаанд хөл хорио тогтоох зайлшгүй шаардлага гарч 2020 оны нэгдүгээр сарын 27-оос эхлэн цэцэрлэг, сургуулийн үйл ажиллагааг түр хугацаагаар хаасантай холбогдуулан теле хичээлийг хоёрдугаар сарын 3-ны өдрөөс эхлэн бүх телевизүүдээр нэвтрүүлж эхэлсэн.

Сургуулийн өмнөх боловсролын хувьд теле хичээлийг анх удаа зохион байгуулж байгаа бөгөөд одоогийн байдлаар нэг хичээлийн үргэжлэх хугацааг 10 минутаар, 90 шинэ хичээлийг бэлтгэн 15 хичээлийн давталттай нийт 105 хичээлийг NTV телевизтэй хамтран ажиллаж орон даяар нэвтрүүлээд байна.

Боловсрол, соёл, шинжлэх ухаан, спортын яам, Боловсролын хүрээлэн, Багшийн мэргэжил дээшлүүлэх институт болон хичээл зааж буй багш нар хичээлийг бэлтгэх, зохион байгуулах ажлыг хамтран гүйцэтгэж байна. Бидний энэхүү үйл ажиллагаанд Хан-Уул дүүргийн 46, Сонгинохайрхан дүүргийн 170, Баянзүрх дүүргийн 146 дугаар цэцэрлэгүүд хамтран ажиллаж байгаа юм.

Бидний хувьд ихээхэн хэцүү цаг үед энэ жилийн Дэлхийн эрүүл мэндийн өдөр тохиож байна. Миний бие өнөөдрийн илгээлтээ өдөр, шөнийг ялгалгүй бидний эрүүл мэндийн төлөө зогсож байдаг сувилагч, эх баригч, техникийн ажилтан, түргэний эмч, эмийн санч, эмчлэгч эмч, жолооч, үйлчлэгч, захиргааны ажилтан зэрэг эрүүлийг хамгаалахын нийт ажилтнуудад зориулав. Өнөөдөр энэхүү цар тахлын хор хөнөөлтэй цагийн зүүтэй уралдан, өөрсдийн биеийг эрсдэлд оруулан тэмцэж буй Та бүхэндээ бид талархаад баршгүй.

2020 он бол Олон улсын сувилагч ба эх баригчдын жил бөгөөд үүнийг тохиолдуулан миний бие тэдний тусгай мэдлэг чадвар болон хичээл зүтгэлийг алдаршуулахыг хүсч байна. Сувилагч болон эх баригч нарын асаргаа, мэргэжлийн чадварт талархах шалтгаан хүн бүрт бий. Надад бас бий.

Эрүүлийг хамгаалах үйлсийн томоохон хэсгийг сувилагч нар нуруун дээрээ үүрдэг. Гэмтэх, халдвар авах болон сэтгэл зүйн дарамтад орох зэрэг эрсдлийн хажуугаар тэд хүнд хүчир ажлаа олон цагийн турш хийж гүйцэтгэдэг. Хүмүүний амьдралын эцсийн мөчид сувилагчид тэдэнтэй хамт байх тохиолдол түгээмэл.

Тэгвэл эх баригчид хүмүүний амьдралын эхлэл бүрт тэдэнтэй хамт байдаг. Цар тахлын энэ үед ч гэсэн бидний алаг үрсийг энэ дэлхийд аюулгүй угтан авах үүргээ тэд цалгардуулалгүй гүйцэтгэж байна.

Дэлхий дахины бүх сувилагч болон эх баригч нарт баярлалаа гэж хэлье. Энэ хэцүү цаг үед бид Та бүхэнтэйгээ хамт байж, Та бүхэндээ найдаж байгаа гэдгээ эрүүлийг хамгаалахын нийт ажилтнуудад мөн хэлэхийг хүсч байна. Бид Та бүхнээрээ бахархаж, Та бүхнээсээ үлгэр дууриалал авдаг. Та бүхнийхээ өмнө бид төлж баршгүй өртэй. Байршил үл хамаарч, өдөр бүр Та бүхний хийж буй өөрчлөлтөд дахин талархал илэрхийлье.

Улсын Их Хурлын гишүүн Х.Болорчулуун, А.Сүхбат, С.Бямбацогт нарын гишүүд бүрэн эрхийнхээ хүрээнд боловсруулсан “Импортын барааны гаалийн албан татварын хувь, хэмжээ батлах тухай тогтоолын хавсралтад өөрчлөлт оруулах тухай” тогтоолын төслийг өнөөдөр (2020.04.07) Улсын Их Хурлын дарга Г.Занданшатарт өргөн барилаа.

Уг тогтоолын төсөлд үр тариа, тэжээлийн ургамал, төмс, хүнсний ногооны үрийн үйлдвэрлэл, үүссэн нөхцөл байдалтай уялдуулан гаалийн албан татварын хувь хэмжээг “0” болгох, үр тариа, тэжээлийн ургамал, хүнсний ногооны үрийн үндэсний код батлахыг Засгийн газарт даалгах зэрэг зохицуулалтыг тусгасан байна.

Эрдэм шинжилгээний байгууллагаас хийсэн тариалангийн талбайн хөрсний төлөв байдлын шинжилгээгээр тариалангийн нийт талбайн 60 гаруй хувийн үржил шимийн агууламж нь дундаас бага хэмжээнд хүрч, элэгдэлд орсон. Жил бүрийн ургацын хэмжээ, чанар буурч, хүнсний ногоо тарих, арчлах, хураах, сортлох технологийн ажлуудын 60 гаруй хувийг гар аргаар гүйцэтгэдэг байна.

Хүнсний ногооны гол нэр төрлийн ногооны үрээс шар лууван, шар манжин, хүрэн манжингийн үрийн ихэнх хувийг, байцааны үрийн 40, сонгины үрийн 5, сармисны үрийн 30, ил талбайн хэмх, лоолийн 40 хувийг манай улс дотооддоо үйлдвэрлэдэг. Хүнсний ногооны үрийн хэрэгцээний тодорхой хувийг дотоодын үйлдвэрлэлээр хангаж байгаа ч бусад улсаас чанартай үрийг импортлох зайлшгүй шаардлага үүссэн байна. Улсын хэмжээнд улаанбуудайн үр жилд 3000 тоннын хэрэгцээтэй байдаг ч дотоодын үйлдвэрлэлээр 300 тонн буюу 10 орчим хувийг хангаж, 90 хувийг импортоор авдаг. Тэжээлийн ургамлын үрийг манай улс үйлдвэрлэдэггүй.

Эдгээр шалтгаан нөхцөлөөс үүдэн техник, тоног төхөөрөмжийг нэмэгдүүлэх, хөрсийг бордох, нөхөн сэргээх, талбайн хог ургамал, хортон шавжтай технологийн дагуу тэмцэх арга хэмжээнд хөрөнгө оруулалт хийх нөхцөлийг бүрдүүлэх зэргээр хүнсний ногоо, үр тарианы үйлдвэрлэлтэй холбоотой дотоодын зах зээлийг хамгаалах асуудлыг шийдвэрлэх зорилгоор тогтоолын төслийг боловсруулжээ.

Үүсээд байгаа онцгой нөхцөл байдлын үетэй холбогдуулан “Эртэч Монгол” хөтөлбөрийг цахим хэлбэрээр зохион байгуулах гэж байна. Энэхүү хөтөлбөрийн хүрээд есөн өдөр есөн багш сонирхолтой сэдвээр дөрөвдүгээр сарын 08-ны өдрөөс 17-ны өдрийн хооронд зохион байгуулах гэж байна.

Илтгэл танилцуулах багш нарыг танилцуулж байна.

Цахим сургалтад хэрхэн хамрагдах вэ?

Та энэхүү мэдээллийг олон нийтэд түгээж өөрийн зүгээс 50 маскийг хандивлаж “Эртэч Монгол” хөтөлбөрийн сургалтад хамрагдах боломжтой. Та маск хандивласан бол энэхүү бүлэгт хүсэлт илгээж сургалтад хамрагдана.
https://www.facebook.com/groups/2724979577628180/

Таны хандивласан маскийг бид хэрэгцээ шаардлагатай байгаа эмч, цагдаа, цэрэг, онцгой байдлын ажилтнуудад өгөхөөс гадна зорилтод бүлгийн хүүхэд багачууд, айл өрхөд хандивлах болно. Мөн олон улсын боловсрол хөгжлийн төвөөс 10.000 маск аянд хамрагдсан залуучуудаас таван шилдэг залууг шалгаруулж, Филиппин улсад 50 хувийн хөнгөлөлттэй суралцах боломжийг олгоно.

Нийслэлийн ИТХ-ын Тэргүүлэгчдийн ээлжит хурлаар “Иргэдийн амьдрах орчны аюулгүй байдлыг хангах, эрүүл мэндийг хамгаалах чиглэлээр авах зарим арга хэмжээний тухай” тогтоол баталсан.

Тогтоолоор нийслэлийн есөн дүүргийн ИТХ-ын дарга нарт “Коронавируст (COVID-19) халдвараас урьдчилан сэргийлэх ажилд бүхий л талаар дэмжлэг үзүүлэхийг үүрэг болголоо. Тэргүүлэгчдийн хурлаас дараах зөвлөмжийг гаргажээ.

Нийслэл хотын хэмжээнд өнгөрсөн оны 10 дугаар сарын 01-ээс эхлэн 2020 оны 04 сарын 01-ний өдөр хүртэл Засгийн газрын 62 дугаар тогтоолын хэрэгжилт, Таван толгой түлш ХХК-д үйлдвэрлэсэн сайжруулсан түлшний түгээлт борлуулалт, угаарын хийнээс урьдчилсан сэргийлэх ажлыг хэрэгжүүлэх хүрээнд өндөржүүлсэн бэлэн байдал зарлаж ажилласан бөгөөд үргэлжлүүлэн COVID-19 халдвараас урьдчилан сэргийлэх хүрээнд бэлэн байдалд ажиллаж байгаа юм. Өндөржүүлсэн бэлэн байдалд илүү цагаар үр дүнтэй ажилласан нийт 43 байгууллагын 2098 албан хаагчидад 855,9 сая төгрөгийн урамшуулалыг нийслэлээс олгосоныг Хотын дарга мэдээлэлдээ дурьдлаа.

Мөн өндөржүүлсэн бэлэн байдлын хугацаа өнгөрөгч 04 сарын 01-ний өдрөөр дууссантай холбоотойгоор цаашид түүхий нүүрсний хэрэглээнд хяналт тавих, сайжруулсан шахмал түлшний борлуулалт, нийлүүлэлтийн асуудлыг дүүргүүдийн Засаг дарга нар бүрэн хариуцан ажиллах аж. Засгийн газрын 62 дугаар тогтоолын хэрэгжилтийн хүрээнд нийт 135 мянган угаар мэдрэгчийг гэр хорооллын айл өрхүүдэд тараасан бөгөөд дараагийн ээлжийн 65 мянган угаар мэдрэгчийг ирэх долоо хоногт хүлээн авч айл өрхүүдэд тарааж дуусах юм. Түүнчлэн ирэх тавдугаар сараас эхлэн 2020-2021 оны өвөлжилтийн бэлтгэл ажлыг хангах үүргийг дүүргүүдийн Засаг дарга нарт даалгажээ.

Цаг уурын байгууллагын ирүүлсэн мэдээллээр дөрөвдүгээр сард агаарын дундаж температур нийт нутгаар олон жилийн дунджаас дулаан байх төлөвтэй байна.

Харин хур тунадасны хувьдДорноговь аймгийн өмнөд, Увс аймгийн зүүн, Хөвсгөл аймгийн баруун хэсэг, Завхан, Өмнөговь аймгийн ихэнх нутгаар олон жилийн дунджаас ахиу, Дорнод, Хэнтий аймгийн ихэнх нутгаар олон жилийн дунджаас бага, бусад нутгаар дунджийн орчим хур тунадас орох төлөв гарчээ гэж Онцгой байдлын ерөнхий газраас мэдээллээ.