Month: April 2020

Ховд аймагт хууль бусаар 22 ширхэг тарвага агнан, тээвэрлэж явсан зөрчлийг илрүүлжээ.

Тодруулбал, Ховд аймаг дахь Цагдаагийн газрын Замын цагдаагийн тасгийн алба хаагчид Манхан сумын нутаг дэвсгэрт байрлах байнгын хяналтын постод үүрэг гүйцэтгэх хугацаандаа приус маркийн тээврийн хэрэгслийн жолооч Г.М хууль бусаар 22 ширхэг тарвага тээвэрлэж явжээ.

Ховд аймаг дахь Цагдаагийн газрын Замын цагдаагийн тасгийн алба хаагчид харьяаллын дагуу тус аймгийн Мэргэжлийн хяналтын газар, Зоонозын өвчин судлалын төвд шилжүүлэн өгсөн байна.

Нийслэлийн ИТХ-ын дарга Р.Дагва “Улаанбаатар хотын хөгжлийн корпораци ХК”-д ажиллах үеэр нийтийн тээврийн үйлчилгээг сайжруулах цогц төсөл хэрэгжүүлэхээр ажиллаж буйг тус компанийн гүйцэтгэх захирал С.Билэгсайхан хэллээ. Түүний танилцуулснаар 2020 онд нийт 23 төсөл хэрэгжүүлэхээр төлөвлөжээ.

Үүнээс нэн тэргүүнд нийслэлчүүдийн өмнө тулгамдаж буй нийтийн тээврийн үйлчилгээг сайжруулах цогц төсөл хэрэгжүүлэхээр ажиллаж байгаа аж. Энэхүү цогц төслийн хүрээнд нийтийн тээврийн парк шинэчлэл хийх төсөл, такси үйлчилгээг сайжруулах “Улаанбаатар такси-КАБ” төсөл, Авто зогсоолын төсөл, Сургуулийн автобус зэрэг төслийг хэрэгжүүлэх юм. Эдгээр төслүүдийг хувийн хэвшлийн хөрөнгө оруулалтаар хийнэ гэдгийг уулзалтын үеэр онцолж байлаа.

Нийслэлд хийгдэж буй авто замын бүтээн байгуулалт, засвар шинэчлэлтийн ажил энэ сарын 1-ээс эхлээд байна.

Тухайлбал, Сонгинохайрхан дүүргийн 4,19 дүгээр хороо буюу Баянхошууны эцсийн буудлаас хойш шинээр авто зам тавих ажил эхэлсэнтэй холбогдуулан Нийслэлийн засаг даргын орлогч, Зам тээврийн асуудал хариуцсан төслүүдийн удирдагч Б.Отгонсүх болон нийслэлийн холбогдох албаныхан өнөөдөр газар дээр нь очиж ажиллав.

Нийслэлийн Засаг даргын орлогч Б.Отгонсүх “2019 онд Улаанбаатар хотод замын хэд хэдэн томоохон бүтээн байгуулалтын ажлууд хийгдсэн. Үүнд Налайхын авто зам, Олимпын гүүр, Яармагийн гүүрийн ажлууд орно.

Харин 2020 онд энэ томоохон бүтээн байгуулалтын тохижилт, ногоон байгууламжийн ажлуудыг гүйцээж хийхээс гадна нийтдээ улсын болон нийслэлийн төсвөөс 52 км авто замыг хийхээр төлөвлөсөн.

Өнөөдөр бид Баянхошууны эцсийн буудлаас хойш шинээр тавигдаж буй 2.8 км замын ажилтай танилцаж байна. Замын засвар, шинэчлэлт, шинээр тавих ажлууд хуваарийн дагуу эрчимтэй явагдаж байна.

Нийслэлийн иргэдээс хотын захын хороололд хатуу хучилттай зам тавих хүсэлт их ирдэг. Иргэдээсээ ирсэн саналын дагуу Баянхошууны эцсээс хойш хийгдэж буй шинэ замын ажил ирэх есдүгээр сард хүлээлгэж өгөхөөр ажиллаж байна. Тус замын ажлын газар чөлөөлөлтөд 88 нэгж талбар хамрагдсан бөгөөд Нийслэлийн газар зохион байгуулалтын алба болон НАЗХГ-ынхан газар дээр нь ажиллаж байна.

“Нэг хот- Нэг стандарт” аяны хүрээнд хийж буй хөрөнгө оруулалт, бүтээн байгуулалтын ажлыг стандарт шаардлагын дагуу хийж гүйцэтгэх зорилт тавьсан. Өөрөөр хэлбэл, Улаанбаатар хотод нэг км зам тавигдсан ч стандартын дагуу хийгдэнэ. Шинээр тавигдаж буй замууд ногоон байгууламж, гэрэлтүүлэгтэй хийгдэх болно” гэв.

Дэлхийд хачгаар дамжин халдварладаг 25 халдварт өвчин бүртгэгдсэн байдаг. Монголд дараах 3 төрлийн өвчлөл бүртгэгдэж байна.

• Хачигт энцефалит
• Хачигт риккетсиоз
• Хачигт боррелиоз

Хачигт хазуулснаас хойш 1-14 хоногийн дараа халуурах, толгой өвдөх, тууралт гарах, ядрах, үе мөч, булчин өвдөх зэрэг шинж тэмдэг илэрвэл эмнэлэгт яаралтай хандаарай.

Ойрын өдрүүдэд нийт нутгаар хуурайшилт ихтэй байгаа бөгөөд иргэд хашаандаа шар өвс шатаасны улмаас зуслангийн бүсэд хэд хэдэн удаагийн гал түймэр гарсан. Иймд гал түймрийн аюулаас урьдчилан сэргийлэх ажлыг эрчимжүүлэх, төвлөрсөн хогийн цэгүүдэд гал гарч болзошгүй тул бэлэн байдалд ажиллахыг Улаанбаатар хотын Захирагчийн ажлын албанаас есөн дүүргийн Засаг даргын тамгын газарт даалгалаа.

Дэлхийн банкнаас санхүүжүүлж буй “Цахим эрүүл мэнд” төслийн хүрээнд орон нутаг болон дүүргийн эмнэлгүүдэд зөөврийн дижитал рентгэн аппаратыг гардуулж байна. Дэлхийн банкны төлөөлөгч “Монгол Улс зөвхөн цар тахлын үед төдийгүй цаашид ч энэ багаж хэрэгсэл, нөөцөө ашиглах урт хугацаандаа үр өгөөжөө өгөх үйл ажиллагаа болж буйд баяртай байна” гэлээ. Аймаг, дүүргийн нэгдсэн эмнэлгийн төлөөллүүдэд шаардлагатай тоног төхөөрөмжийг Эрүүл мэндийн сайд Д.Сарангэрэл гардууллаа.

Нийслэлийн засаг дарга бөгөөд Улаанбаатар хотын захирагч С.Амарсайхан цаг үеийн асуудлаар мэдээлэл хийлээ.

Тэрээр “Нийслэл хотын хувьд аль болох иргэдийнхээ аюулгүй байдлыг хангахын зэрэгцээ, гадагшаа дотогшоо гарч салхилах боломж нөхцөлийг нь бүрдүүлэх, ажил амьдралыг нь цаашид хэвийн үргэлжлүүлэх, аль болох хориг саад тавихгүй гэх байр суурь баримтлан ажиллаж байна.

Шинэ төрлийн коронавирусийн өвчлөлөөс урьдчилан сэргийлэх арга хэмжээний хүрээнд давхардсан байдлаар нийт 6790 алба хаагч 24 цагийн турш болон бусад хэлбэрээр ээлж цагаа зохицуулан ажиллаж буй. Өнөөдрийн байдлаар нийслэлийн орох гарах 9 товчоогоор 118 албан хаагч хяналт тавьж, бүртгэл хийж, зөвлөгөө өгөн ажиллаж байна. Өчигдөр өглөөний 8 цагаас өнөөдөр хүртэл 85418 иргэн Улаанбаатар хотоос орсон, гарсан. Нийт 24966 автомашин зорчсон тоон мэдээлэл байна.

Урин дулаан цаг ирж байна. Иргэд агаар салхинд гарахдаа нэг дор цугларч, эрсдэл гаргах нөхцөл байдал үүсгэж байна. Иргэд дотоодод халдвар тархаагүй болохоор бүх зүйлийг чөлөөтэй байлгах саналыг ирүүлж байгаа. Ажил амьдрал хэцүүдлээ гэх санал гомдлууд ихээхэн ирсэн. Тухай бүрт нь зохих ёсоор хариу өгч, иргэдийнхээ хүндрэл бэрхшээл байгаа орчин нөхцөл, ажил төрлөө урагшлуулъя гэсэн хүсэл зорилгыг маш сайн ойлгож байгаа. Өнгөрсөн хоёр сар хагасын хугацаанд маш сайн зохион байгуулалттай, тэвчээртэй, хүлээцтэй хандаж ирсний үр дүнд өнөөдөр бусад орнуудтай харьцуулахад дотооддоо халдвар тархаагүй байна. Энэ нь тархахгүй, гарахгүй гэсэн баталгаа биш. Тархах, гарах асар өндөр эрсдэлүүд байна. Одоо нян, бактери ид үрждэг цаг үе. Дотоодод халдвар гараагүй байсан ч биднээс үл шалтгаалах зүйлүүдээр дамжиж энэ оны 4, 5-р саруудад халдвар гарах магадлал өндөр байна. Тиймээс ирэх хоёр сард илүү их анхааралтай, сэрэмжтэй, иргэн бүр өөрийнхөө үүрэг хариуцлагыг биелүүлж ажиллах зайлшгүй шаардлагатай байна” гэв.

Нийслэлийн прокурорын газраас Эрүүгийн хууль (шинэчилсэн найруулга)-ийн тусгай ангийн 22.5-1, 22.4-2.4, Эрүүгийн хуулийн 268.1, 269.1-д зааснаар яллах дүгнэлт үйлдэж ирүүлсэн Ш.Мөнгөншагай нарын 15 хүнд холбогдох хэргийн гэм буруугийн шүүх хуралдаан Хан-Уул дүүргийн Эрүүгийн хэргийн анхан шатны шүүхэд 2020 оны 04 дүгээр сарын 13-ны өдрийн 09 цаг 30 минутад эхэлсэн.

Гэвч шүүгдэгч Ж.Цэцгээгийн өмгөөлөгч Б.Манлайжав нь ХӨСҮТ-ийн тандалт судалгааны төвийн эмчийн магадлагаагаар 14 хоног тусгаарлагдсан талаар хүсэлт ирүүлсэн. Мөн шүүгдэгч Б.Сайханцэцэгийн өмгөөлөгч П.Одонтунгалаг, Э.Халиунбаярын өмгөөлөгч А.Золжаргал нар нь хүндэтгэн үзэх шалтгаангүйгээр шүүх хуралдаанд ирээгүй тул шүүгдэгч нарыг өмгөөлөх эрхээр хангаж шүүх хуралдааныг хойшлуулахаар тогтжээ.

Шүүхээс: өмгөөлөгч П.Одонтунгалаг, А.Золжаргал нарыг Зөрчлийн хуулийн 15.7 дугаар зүйлийн 2-д /Хэрэг хянан шийдвэрлэх ажиллагааны оролцогч шүүхэд хүрэлцэн ирэх, эсхүл шүүхэд мэдүүлэг өгөхөөс татгалзсан, зайлсхийсэн, эсхүл шүүхийн иргэдийн төлөөлөгч, шүүхийн захиргааны ажилтны үйл ажиллагаанд саад учруулсан бол хүнийг гурван зуун нэгжтэй тэнцэх хэмжээний төгрөгөөр торгоно/ заасны дагуу тус бүрийг 300.000 төгрөгөөр торгож, шүүх хуралдааныг 2020 оны дөрөвдүгээр сарын 27-ны өдрийн 09 цаг 30 минутад товлолоо.