Month: April 2020

“Дэлхийн номын өдөр”-ийг
тохиолдуулан Монгол Улсын Үндэсний номын сан, Монгол Улсын Шинжлэх ухааны
Академитай хамтран зохион байгуулж буй “ЭРДЭМ НОМЫН ЧУУЛГАН” шинэ ном хандивлах, танилцуулах ажиллагаа 2020.04.20-24-ний өдрүүдэд болно. Ингэхдээ өдөр бүрийн 10:00
цагаас Монгол Улсын Үндэсний номын сан болон Монгол улсын Шинжлэх ухааны академийн
пэйж хуудсаар “Номын
танилцуулга”-ыг Live-аар
хүргэх юм.

Өнөөдөр ШУА-ийн Тэргүүлэгчдийн
газар, Техник технологийн салбар, Анагаах ухааны салбарынхны танилцуулга
боллоо. Энэ үеэр Академич Ш.Болд, Техник
технологийн салбарын бага чуулганы эрдэмтэн нарийн бичгийн дарга, доктор
Г.Пүрэвдорж нар салбар салбарын шинэ номоо танилцууллаа. Тэд мөн номын сангийн
хуулийн дагуу Монгол улсын үндэсний төв номын санд шинэ номны дээжээс гардуулж
өгсөн юм. Нийтдээ 24 ширхэг номыг энэ өдөр хандивлалаа.

Маргаашаас ШУА-ийн харьяа хүрээлэнгүүд хуваарийн дагуу өдөр бүр мэдээллээ
хийж, шинэ номоо хандивлана. Энэ арга хэмжээний хүрээнд ШУА, харьяа
хүрээлэнгүүд нийттээ 170 нэр төрлийн 300 орчин номыг тус номын санд хандивлах
юм.

Төр, нийгмийн нэрт зүтгэлтэн, ардчилсан хөдөлгөөний анхдагчдын нэг С.Зориг агсны төрсөн өдөр тохиож, хамтран зүтгэгчид нь түүний хөшөөнд өнөөдөр цэцэг өргөн хүндэтгэл илэрхийллээ. Цэцэг өргөх үеэр АН-ын дарга С.Эрдэнэ, “С.Зориг өнөөдөр амьд байсан бол 58 нас хүрэх байлаа. Ид хийж бүтээх нас нь байв. Энэ хүний үйл хэрэг өдгөө 30 жилийн ойтойгоо золгож байна. Ардчилсан хувьсгал, Ардчилсан нам байгуулагдсан 30 жилийн ойтой энэ хүний 58 насны өдөр давхцаж байгаа юм. 1990 оны ардчилсан хөдөлгөөнийг манлайлж, эмх цэгцтэй, аюулгүй байдлыг хангаж зохион байгуулж Монголын түүхэнд хувьсгал хийсэн. Энэ чадвар хүн бүрт заяахгүй. Түүний үйл хэрэг цаашид ч цэцэглэж Монгол Улс улам хүчирхэг улс болж хөгжинө гэдэгт эргэлзэхгүй байна” хэмээв. С.Зориг нь 1998 оны 10 дугаар сарын 2-нд бусдын гарт амиа алдсан юм.

Энэ оны IV сарын 8-нд Сөүл-Улаанбаатар чиглэлийн тусгай үүргийн нислэгээр ирсэн зорчигчдын тээшийг өнөөдөр 14:00 цагаас Чингис Хаан олон улсын нисэх буудлын баруун талд байрлах Карго төвд олгож эхлэх аж. Зорчигчийн ачааг авах хүн тээшийн дугаар бүхий хуудас, өөрийн болон тухайн зорчигчийн иргэний үнэмлэхийн хуулбарын хамт очиж тээшээ авах бөгөөд бичиг баримт дутуу бол тээш олгох боломжгүй тухай МИАТ ТӨХК-иас анхааруулжээ.

Нийслэлийн Авто замын хөгжлийн газраас Гурвалжингийн гүүрийг энэ сарын 22-27-нд засварлахаар болсон тухай мэдээллээ. Уг гүүр нь 108 метр урт, 28.5 метрийн өргөнтэй төмөр бетон хийцтэй бөгөөд гүүрний хоёр хэсэгт хэв гажилт үүссэн, эвдрэл ихтэй байгаа аж. Үүнтэй холбоотойгоор хөдөлгөөнийг хэрхэн зохион байгуулах талаар Тээврийн цагдаагийн албанаас “Дөрөвдүгээр сарын 22-ны 22:00 цагаас 27-ны 06:00 цаг хүртэл Гурвалжингийн гүүрийг засварлахтай холбогдуулан хөдөлгөөнийг түр хугацаагаар өөрчлөн зохион байгуулна. Ингэхдээ нэг урсгалд эсрэг хөдөлгөөнөөр зохион байгуулах юм байна. Гурвалжингийн гүүр нь 1989 онд ашиглалтад орж байжээ.