Month: April 2020

Коронавирусээр халдварласан хүнд илэрч байгаа шинэ шинж тэмдгийг ДЭМБ-аас өчигдөр танилцуулсан байна. Шинэ шинж тэмдэг нь хүүхдүүдэд их илэрч байгаа бөгөөд улаан ягаан, хөх өнгийн халуу дүүгэх эмзэглэлтэй арьсны өөрчлөлт хөл гарын хуруу, хамрын үзүүр дээр гарч байгаа аж. Үүнийг “COVID-19”-ийн эхний шинж тэмдэг гэж үзэж байгааг ЭМЯ-ны өнөөдрийн ээлжит хэвлэлийн хурлын үеэр Олон нийттэй харилцах тандалт, шуурхай удирдлагын хэлтсийн дарга Д.Нарангэрэл мэдээлсэн юм. Мөн коронавирусийн халдвар тархах явц нь эдгэрэх явцаас хавьгүй удаан байгааг онцлоод өвчтөнүүд 21-45 хоног хэвтэн эмчлүүлж байгаа дэлхийн жишиг байгааг дурдав.

Хэнтий аймгийн Биндэр сумын Онон багийн “Цагаан нуга” гэдэг газар /аймгийн төвөөс хойд зүгт 160 км-т, сумын төвөөс хойд зүгт 4 км-т/ тус сумын харьяат иргэн Ц /37 настай, эрэгтэй, согтууруулах ундаа хэрэглэсэн/ 04.12-ны өдрийн 23:00 цагийн орчимд сумын төв дэх ээжийнхээсээ гэрлүүгээ явна гэж гараад сураггүй болсон тухай дуудлагыг 04.21-ний өдрийн 08:00 цагт хүлээн авчээ. Тус аймгийн Онцгой байдлын газрын Эрэн хайх аврах салбарын алба хаагчид, орон нутгийн иргэд эрэн хайх ажиллагааг мөн өдрийн 10:00 цагт эхлүүлсэн. 04.21-ний өдрийн байдлаар тус сумын Онон багийн “Намын даваа” гэдэг газраас “Хурхын боом” гэдэг газар хүртэл нийт 55 км-т “Онон” голын эрэг дагуу эрэн хайх ажиллагааг зохион байгуулсан боловч үр дүнд хүрээгүй тул 19:00 цагт түр зогсоосон ба 04.22-ны өдрийн 08:00 цагт эрэн хайх ажиллагааг эхлүүлээд байгаа аж.

АНУ-ын зарим мужид хөл хорионы дэглэмийг сулруулахаар зэхэж байгааг нөлөө бүхий судлаачид эрсдэлтэй алхам хэмээн дүгнэж байна. Тодруулбал, Харвардын их сургуулийн эрдэмтдийн үзэж буйгаар тус улс нэг өдөрт хийх шинжилгээний чадавхиа ирэх сард 3 дахин нэмэгдүүлж чадаагүй нөхцөлд иргэдийн аюулгүй байдлыг хангалттай хамгаалж чадахгүй аж. Одоогоор тус улс өдөрт дунджаар 146 мянга, нийт 3.6 сая хүнийг шинжилгээнд хамруулаад байна. Харин хөл хориог 5 дугаар сарын дунд үед сулруулахын тулд өдөрт 500-700 мянган хүнээс шинжилгээ авах хүчин чадалтай болсон байх шаардлагатай гэж дээрх сургуулийн эрдэмтэд үзжээ. Өөрөөр хэлбэл дээрх тооны иргэдийг шинжилгээнд хамруулсны дүнд халдвар авсан хүмүүсийг халдваргүйгээс нь тусгаарлах боломж бүрдэх аж.

Одоогоор шинжилгээнд хамруулсан иргэдийн 20 орчим хувиас халдвар илэрчээ. Харвардын их сургуулийн Дэлхийн эрүүл мэндийн хүрээлэнгийн захирал Ашиш Жа “эерэг хариуны эзлэх жин өндөр байх тусам илрүүлээгүй өвчлөгсөд их байгааг илтгэнэ. Иймээс үүнийг бууруулах чиглэлд ажиллах нь зүйтэй. Учир нь эдийн засгийг нээлттэй байлгах нэг үндэс бол халдвартай иргэдийг олж, тэднийг тусгаарлах явдал юм” гэжээ.

БНФУ-ын эмнэлгүүдэд эм, эмнэлгийн хэрэгсэл, үүний дотор амьсгалын аппарат, эмч нарт амны хаалт дутагдалтай байна. Өнгөрсөн долоо хоногт тус улс 81 сая амны хаалт импортолсон ч долоо хоногийн хэрэгцээ 45 саяыг давав. Одоогоор өдөрт 35 мянга орчим хүнийг оношилж байгаа бөгөөд Засгийн газар цаашид үүнийг 150 мянгад хүргэх, 6 дугаар сар гэхэд 30 мянган амьсгалын аппаратыг эмнэлгүүдэд нийлүүлэх зорилт тавин ажиллаж байна.

Халдвартай хүний тоо буурах хандлага ажиглагдаж, эрчимт эмчилгээнд орсон, эмнэлэгт хэвтсэн хүний тоо цөөрч байгаа ч асрамжийн газруудад өндөр настнууд нас барах нь их хэвээр байна.

ХБНГУ-д халдвар болон үхлийн тоогоор тэргүүлж буй Бавари муж улсад дэлгүүр худалдааны газар, нийтийн тээвэр, таксигаар үйлчлүүлж буй иргэд ирэх долоо хоногоос эхлэн амны хаалт зүүхээр болов. Үүний өмнө Саксон, Тюринг муж улсын Иена хотод амны хаалт зүүх журам гарчээ.

Их Британи-д өнгөрсөн 7 хоногоос эхлэн нас баралт тогтвортой буурч байгаа ч эмнэлгүүд хамгаалалтын хувцас хэрэгслийн хомстолд орж байна. Улсын хэмжээнд эмнэлгүүд дэх хамгаалалтын хувцас хэрэгслийн өдрийн хэрэгцээ 150 мянга орчим бөгөөд ойрын хугацаанд Турк улсаас 400 мянга, Мьянмараас 140 мянга, Хятадаас 180 мянган нэгж хувцас нийлүүлэгдэх аж.

БНЭУ эдийн засгийн хямралын үед “ашиг хонжоо хайгчид”-аас сэргийлэх зорилгоор гадаадын хөрөнгө оруулалтын тухай хуулиа чангатгав. Тодруулбал, тус улсын Худалдааны сайд “хил залгаа улсад бүртгэлтэй, эсвэл холбоотой ААН Энэтхэгийн компанид хөрөнгө оруулах асуудлыг Засгийн газар шийднэ” гэв. Ийм эрх зүйн зохицуулалт Пакистан, Бангладешийн ААН-д үйлчилж байсан.

Япон улс-ын экспорт 3 дугаар сард сүүлийн 3 жил байгаагүйгээр буурав. Тодруулбал, энэ хугацаанд экспорт 11.7 хувь буурч 6.36 их наяд иенд хүрсэн нь тус улсын эдийн засагт хүнд цохилт болох төлөвтэй. Байгалийн хий, нүүрсний дэлхийн зах зээл дээрх үнийн уналтаас үүдэн импорт ч 5 хувь багасчээ. Тус улсын АНУ руу хийсэн экспортын хэмжээ хамгийн ихээр буюу 16.5 хувь унасан нь сүүлийн 9 жил болоогүй үзэгдэл аж.

БНСУ-ын Засгийн газраас 4 дүгээр сарын 19-ний өдөр “зай барих” дэглэм 5 дугаар сарын эхэн хүртэл үргэлжлэх боловч сүм, фитнес болон сургалтын төв зэрэг олон хүн цуглардаг газруудын үйл ажиллагааг халдвар, хамгаалалтын нарийн дүрэм, журмын дор дахин эхлүүлэх талаар мэдэгдэв. Түүнчлэн элсэлтийн шалгалт, цэрэг татлага зэргийг явуулахаар болсон байна.

Нөхцөл байдал бүрэн хяналтад орж, тайвшрах үе ирээгүйг Ерөнхий сайд нь онцолсон бөгөөд сургууль, цэцэрлэгийн үйл ажиллагааг эхлүүлэх эсэхийг байдал хэрхэн өөрчлөгдөхөөс шалтгаалж 5 дугаар сарын 05-ны өдөр шийдвэрлэх аж.

ОХУ-д коронавирусний халдвар өдөрт дунджаар 14-17 хувийн өсөлттэй байгаа бөгөөд тогтоон барьж байгаа хэмээн Хорио цээрийн алба мэдээлж байгаа ч улсын хэмжээнд бүртгэгдэж буй тархалт идэвхтэй хэвээр байна. Москва хотод өвчний тархалт эрчимтэй нэмэгдэж, шинж тэмдэггүй хэлбэрийн халдвар авсан хүний тоо нийт өвчлөлийн 50 хувьд буюу 32 гаруй мянга болсон тул хотын захиргаа хотод тогтоосон хязгаарлалтын дэглэмийг 5 дугаар сарын 01-ний өдөр хүртэл сунгахаар болов.

ОХУ-ын Аж үйлдвэр, худалдааны сайд Михайл Мурашко эрүүл мэндийн системд шаардлагатай тоног төхөөрөмжийг шуурхай хангах зорилгын хүрээнд ирэх долоо хоног гэхэд нийт 300 ширхэг уушги орлуулах амьсгалын аппарат үйлдвэрлэхээр төлөвлөж байгаагаас одоогоор 200 гаруй нь бэлэн болсон хэмээн мэдээллээ. Улсын хэмжээнд коронавирустэй тэмцэж байгаа 60 эмнэлэгт нийт 45,000 ор нэмэлтээр бий болгохоор ажиллаж байна. ОХУ-ын Иркутск, Владимир, Удмур, Коми, Забайкальскийн бүс нутагт коронавирусний халдвараас урьдчилан сэргийлэх хариу арга хэмжээг шат ахиулах шаардлагатай гэж үзжээ.

Тус улсын Засгийн газраас нийт 56 тэрбум рубль /675 сая ам.доллар/-ийг цар тахлын дэгдэлтийг хязгаарлахад зориулан зарцуулаад байгаа бөгөөд үүнээс 33 тэрбумыг уг вирусээр халдварласан иргэдэд зориулж эмнэлгийн ор нэмж байгуулах, шаардлагатай тоног төхөөрөмжийг бэлтгэхэд, 17.7 тэрбумыг орчин үеийн эмнэлгийн тоног төхөөрөмж болон гар амьсгалын аппарат, яаралтай тусламжийн үйлчилгээнд зориулан зарцуулсан байна.

Орон нутгийн эмнэлгүүд өвчтөн хүлээн авах орны тоог яаралтай нэмэгдүүлж байгаа бөгөөд Засгийн газар орон нутагт 32.4 тэрбум рублийн тусламж олгож, шаардлагатай уушгины төхөөрөмжөөр 3 сарын дотор хангахаар болов.

Засгийн газраас хэрэгжүүлж буй “өөрийгөө тусгаарлах” дэглэм нь эдийн засагт 17.9 их наяд рублийн хохирол учруулаад байгаа бөгөөд уг арга хэмжээ нь 3 сарын хугацаанд үргэлжилсэн тохиолдолд иргэдийн бодит орлого 5-50 хувь, ДНБ-ий хэмжээ 21 хувиар буурч,15 сая хүртэл ажлын байр хаагдах эрсдэлтэй байна гэсэн тооцоо “Деловая Россия” байгууллага гаргажээ.

ОХУ-ын “Олон нийтийн санал бодлыг тандах судалгааны төв” 4 дүгээр сарын 16-ны өдөр 18 ба түүнээс дээш насны 1600 иргэнтэй утсаар холбогдож судалгаа явуулжээ. Судалгаанд хамрагдагсдын 80 орчим хувь нь коронавирусний халдвараас “урьдчилан сэргийлж” байгаа бол 10 гаруй хувь нь “огт арга хэмжээ аваагүй” гэжээ. Харин үлдсэн 12 орчим хувь нь “энэ талаар бодоогүй” гэж хариулсан байна.

БНХАУ-д “Covid-19” өвчин гарснаас хойш сүүлийн үеийн дэвшилтэд техник технологи болон цахим орчинг хөгжүүлэх төсвийг нэмэгдүүлж, 5G сүлжээг идэвхтэй ашиглаж байна.

ТЕГ

Хөхмөрөн мужид энэ сард “Covid-19” өвчний халдварын тархалт нэмэгдэх болсноос Үндэсний эрүүл мэндийн хорооноос эмчилгээний баг илгээн амьсгалын болон хүчил төрөгчийн аппаратын дэмжлэг үзүүлж байна. Тус мужид ОХУ-аас халдвар зөөвөрлөгдөн ирэх нь нэмэгдсээр байгаа тул үүнд анхаарч, хорио цээрийн дэглэмийг чанд сахихыг нутгийн удирдлагад үүрэг болгов.

Монголбанкнаас Цагдаагийн ерөнхий газар, арилжааны банкуудтай хамтран хэрэгжүүлсэн “Ятгах тусам нягтал” аяны үргэлжлэл болгон “Нягтлах тусам аюулгүй” аяныг 2020 оны 4 дүгээр сарын 20-ны өдрөөс 06 дугаар сарын 20-ны өдрийг дуустал зохион байгуулахаар боллоо. Энэ удаагийн аяныг хэрэгжүүлэхэд Монголбанк, Цагдаагийн ерөнхий газрын мөрдөн байцаах алба, Хаан банк зэрэг байгууллагууд оролцож, бусад холбогдох байгууллагууд хамт зохион байгуулж байна.

Монголбанк нь энэхүү аянд “Олон нийтийн санхүүгийн суурь мэдлэгийг дээшлүүлэх хөтөлбөр” -ийн хүрээнд оролцож байгаа бөгөөд санхүүгийн гэмт хэрэгт өртөхөөс сэргийлсэн мэдлэг мэдээллийг түгээх, энэ төрлийн гэмт хэрэг, зөрчил гаралтыг багасгах зорилготой юм. Иймд олон нийтийн сүлжээ, цахим орчинд иргэдийг зөв мэдээ мэдээллээр хангаж байх юм. Тус аяны эхний шат буюу “Ятгах тусам нягтал” аян нь 2020 оны 1 сарын 1-нээс 2 сарын 1 хүртэл хэрэгжих хугацаанд “залилах” гэмт хэрэг улсын хэмжээнд урьд оны мөн үетэй харьцуулахад 15.3 хувь буурсан үр дүнтэй байна. Түүнчлэн иргэдийн мэдлэг, хандлага, залилах гэмт хэргийн гаралтад гарсан өөрчлөлт, өмнө нь зохиогдож байсан нөлөөллийн бусад арга хэмжээний үр дүнгээс үзвэл, залилах гэмт хэрэг 2020 оны 2, 3, 4 дүгээр сард буурах төлөвтэй болжээ. Гэсэн ч иргэдийн эрх зүйн мэдлэгийг дээшлүүлэх, залилах гэмт хэргийн нөхцөл байдал, үйлдлийн арга, хор уршгийг иргэдэд тайлбарлан таниулах, гэмт халдлагад өртөж хохирохгүй байх сэрэмжлүүлэх мэдээ, мэдээлэл, сургалтыг тогтмол өгч байх шаардлагатай тул дахин хоёр дахь шатны аяныг эхлүүлэхээр болоод байна.

Жолоочийн цээжин тус газар хутгалж хэргийн газраас оргон зайлсан гэмт этгээдүүдийг ТЦА-ны алба хаагчид шуурхай илрүүлэн дайчлан баривчиллаа.

Баянгол дүүргийн 20 дугаар хорооны нутаг дэвсгэрт 2020 оны 04-р сарын 16-ны шөнийн 23:50 минутад үл таних залуус “Toyota Рrius” маркийн тээврийн хэрэгслийн жолоочийн цээжин тус газарт хутгалж, гэмтэл учруулан автомашиныг дээрэмдээд зугтсан хэрэг үйлдэгдсэнийг Тээврийн цагдаагийн алба хаагчид шуурхай илрүүлэн сэжигтэн А, Б нарыг дайчлан баривчилжээ.

Гэмт этгээдүүд хэрэг үйлдэхдээ ашигласан хутга, бусад эд мөрийн баримтыг Баянгол дүүрэг дэх Цагдаагийн газрын хоёрдугаар хэлтэст хүлээлгэн өгч ажилласан байна.

Хэргийн газраас оргон зайлж эрэн сурвалжлагдаж байсан сэжигтэй этгээдүүдийг цаг алдалгүй шуурхай илрүүлэн дахин гэмт хэрэг үйлдэхээс урьдчилан сэргийлж мэргэжлийн өндөр ур чадвар гарган ажилласан алба хаагчиддаа ажлын амжилт хүсье. Иймд шөнө оройн цагаар ганц нэгээрээ зорчихдоо өөрийн аюулгүй байдлыг хангаж, таньж мэдэхгүй хүмүүсийг тээврийн хэрэгсэлдээ суулгахгүй байхад иргэд анхаарах шаардлагатай байна.

Улсын онцгой комиссын 4-р сарын 21-ний өдрийн хуралдаанаар Улаанбаатар, Дархан, Сэлэнгэ аймгаас орох, гарах хөдөлгөөнийг 2020 оны 04-р сарын 21-ний 21.00 цагаас 4-р сарын 25-ны өдрийн 06.00 цаг хүртэл түр зогсоох шийдвэр гаргасан. Энэ шийдвэртэй холбогдуулан Архангай аймгаас дээрх аймаг, хот руу зорчих хөдөлгөөнийг 4-р сарын 21-ний 23.00 цагаас 25-ны 06.00 цаг хүртэл түр хязгаарлалаа. Аймаг дотроо болон Дархан-Уул, Сэлэнгэ аймгаас бусад аймаг, сум руу зорчих болон ачаа тээврийн хөдөлгөөн хэвийн байна. Иймд Архангай аймгаас гарсан тээврийн хэрэгслийг Улаанбаатар хот болон Дархан-Уул, Сэлэнгэ аймаг руу оруулахгүй тул тээврийн хэрэгслийн жолооч нар замд гарахгүй байж, ажлаа зохицуулахыг анхааруулж байна.