Month: April 2020

Нийслэлийн Эрүүл мэндийн газраас Монголын хувийн хэвшлийн эрүүл мэндийн байгууллагын нэгдсэн холбоо, ХӨСҮТ-тэй хамтран коронавируст халдвараас урьдчилан сэргийлэх, бэлэн байдлыг хангах, хариу арга хэмжээний үзүүлэх сургалтыг зохион байгуулжээ.

“Халиун толгой”, “Мөнгөн гүүр” эмнэлэгт зохион байгуулагдсан тус үзүүлэх сургалтанд хувийн хэвшлийн амбулаторийн болон хэвтүүлэн эмчлэх тусламж, үйлчилгээ үзүүлж буй 40 эрүүл мэндийн байгууллагын эмч, эмнэлгийн мэргэжилтэн оролцсон байна.

Энэ хүрээнд коронавируст “Ковид-19” халдвараас урьдчилан сэргийлэх, бэлэн байдлыг хангах, хариу арга хэмжээний үйл ажиллагаанд мөрдөх тушаал, шийдвэр, заавар, түр зөвлөмжүүдийг танилцуулж, авч хэрэгжүүлэх чиглэлээр мэргэжил арга зүйн зөвлөгөө өгчээ.

Мөн энэхүү сургалтыг цаашид өртөөчилсөн дадлага, сургалт байдлаар зохион байгуулж, эрүүл мэндийн байгууллагууд туршлага солилцох боломжтой бөгөөд халдварын сэжигтэй тохиолдлыг илрүүлэх, урьдчилан сэргийлэх ажлыг видео хичээл болгон эмнэлгүүдэд тараах аж.

Цаг үеийн асуудлаар НОБГ-ын Гамшгаас урьдчилан сэргийлэх хэлтсийн дарга, хурандаа Г.Нэргүй, НЭМГ-ын Нийгмийн эрүүл мэндийн хэлтсийн дарга О.Энхзаяа, Агаарын бохирдолтой тэмцэх газрын Агаарын чанар, хяналт, зохион байгуулалтын хэлтсийн дарга Г.Даваажаргал нар өнөөдөр нийслэлийн Хэвлэл мэдээллийн төвд цахимаар мэдээлэл хүргэлээ.

Цаг агаарын хэт хуурайшлын улмаас ой хээрийн түймэр гарах эрсдэл нэмэгдсэнтэй холбогдуулж Нийслэлийн Засаг дарга бөгөөд Улаанбаатар хотын Захирагч С.Амарсайхан өнжмөл шар өвсний түймэр гарахаас урьдчилан сэргийлэх тухай А/487 дугаар захирамж гаргасан юм. Захирамжийн дагуу нийслэлийн Онцгой байдлын газар, Цагдаагийн удирдах газар, нийслэлийн Байгаль орчны газар, Тээврийн цагдаагийн газрын газрууд хамтран нийслэлийн ногоон бүс орчимд хөдөлгөөнд эргүүл хийж гүйцэтгэж байна. Хөдөлгөөнт эргүүлд нийт 1200 албан хаагч 350 техник хэрэгсэлтэйгээр 224 байршилд ажиллаж байгаа бөгөөд ирэх зургаадугаар сарын 10 хүртэл ажиллана.

Өнгөрсөн долоо хоногийн хугацаанд өнжмөл өвсний гал түймэр 17 удаа гарснаас Ойн тухай хууль, Галын аюулгүй байдлын тухай хууль тогтоомж зөрчсөн 25 иргэнийг Зөрчлийн тухай хуулиар торгожээ. Ногоон бүсэд зөвшөөрөлгүй зорчсон 3900 орчим иргэдэд ойн түймэр гарахаас урьдчилан сэргийлэх заавар зөвлөмжийг өгч буулгасан байна. Хөдөлгөөнт эргүүлүүд ажиллаж эхэлснээр өнжмөл өвсний гал түймэр болон ой хээрийн түймэр өнгөрсөн оны мөн энэ үеэс 32 хувиар буурсан үзүүлэлт гарчээ.

ЭМЯ-ны Гадаад харилцаа, хамтын ажиллагааны хэлтсийн дарга Б.Янжмаа, “ХБНГУ-ын биотехнологийн компани “COVID-19” халдварын эсрэг вакциныг гаргаж авсан байна. Хүний бие дээр турших эмнэл зүйн туршилтыг эхлүүлэх зөвшөөрлөө Герман улсын эрх бүхий байгууллагуудаас авчээ. Туршилтын эхний шатанд 18-55 насны харьцангуй эрүүл 200 хүнийг хамруулах бөгөөд амжилттай болсон тохиолдолд эрсдэл өндөр бүлгийнхнийг хамруулж туршилтыг үргэлжлүүлэх юм байна. “BNT-162″ гэж нэрлэгдэж байгаа уг вакцины кандидатыг тус компани нь эм үйлдвэрлэлийн салбар дахь үндэстэн дамнасан корпорац болох Фрайзер компанитай хамтран гаргаж авсан гэж хэвлэлийн мэдээлэлд дурдсан байна” гэлээ.

Цаг уурын байгууллагын ирүүлсэн мэдээллээр 04 дүгээр сарын 21-ний өдрийн байдлаар Хөвсгөлийн уулсаас эхтэй Бэлтэс, Шишхэд, Хангай нурууны ар болон өврөөс усжих Идэр, Чулуут, Урдтамир, Богд, Буянт, Хожуул, Цагаантуруут, Онги, Хэнтий нуруунаас эхтэй Тэрэлж, Хэрлэн, Увс нуурын савын Хархираа, Баруунтуруун, Түргэн, Хариг зэрэг голууд 30-100 см зузаан мөсөн бүрхүүлтэй ба мөсний зузаан өмнөх арав хоногоос 10-50 см нимгэрч мөс өргөгдөн хэврэгшиж байна.

Иймд цаг хожих, зам товчлох зэргээр мөсөн дээгүүр явах, авто тээвэр хийхгүй байх, бага насны хүүхдийг гол, мөрөн, нуурын мөсөн дээр тоглуулахгүй байж, болзошгүй эрсдэлээс урьдчилан сэргийлэхийг Онцгой байдлын ерөнхий газраас анхааруулж байна.

Онцгой байдлын ерөнхий газрын даргын 2020 оны 03 дугаар сарын 30-ны өдрийн А/83 дугаар тушаалаар “Обьектын гал түймэр унтраах ажиллагаанд зориулсан хамгаалах тусгай хувцас.Ерөнхий шаардлага”CS 11-0439:2020, “Ой, хээрийн гал түймэр унтраах ажиллагаанд зориулсан хамгаалах тусгай хувцас.Ерөнхий шаардлага” CS 11-0440:2020, “Гал түймрээс хамгаалах хүн нэг бүрийн хэрэгсэл. Ерөнхий шаардлага” CS 11-0441:2020 байгууллагын стандартууд батлагдлаа.

Мөн 2020 оны 04 дүгээр сарын 15-ны өдрийн А/96 дугаар тушаалаар “Обьектын болон ой, хээрийн гал түймэр унтраах ажиллагаанд зориулсан хамгаалах тусгай хувцас, хүн нэг бүрийн хамгаалах хэрэгслийг хэрэглэх журам”, А/99 дүгээр тушаалаар “Хөдөлмөрийн аюулгүй байдал, эрүүл ахуйн зөвлөлийн ажиллах журам” тус тус батлагдлаа гэж Онцгой байдлын ерөнхий газраас мэдээллээ.

Reporters Without Borders буюу “Хил хязгааргүй сэтгүүл зүй” төрийн бус байгууллагаас жилд нэг удаа гаргадаг дэлхийн улсуудын хэвлэлийн эрх чөлөөний индексчлэл хэвлэгджээ. Уг жагсаалт нь тухайн улсад хэвлэн нийтлэх эрх зүй хэр зэрэг чөлөөтэй байж чадаж буйг илэрхийлдэг агаад дэлхийн 180 улсыг хамарсан дээрх үнэлэмжэнд Монгол улс 73-р байранд орсон байх юм. Хонг Конг 80-д, Израиль 88-д, Украйн 96-д, ОХУ 149-т гэх мэтчилэн Монгол улсын хойно жагссан хөгжил дэвшлээрээ манай улсаас хавьгүй илүү ч сэтгүүл зүйн хувьд хоцорч яваа улсууд арвин харагдлаа. Норвеги улс сэтгүүлчдэд хамгийн элгэмсэг ханддаг нээлттэй улс хэмээн уг жагсаалтыг тэргүүлсэн бол БНАСАУ хамгийн эцсийн байранд оржээ.

Халдварт өвчин судлалын үндэсний төвийн ерөнхий захирал Д.Нямхүү: “IV сарын 21-нд ХӨСҮТ болон орон нутгийн хэмжээнд тусгаарлагдсан иргэдээс сэжигтэй тохиолдол бүртгэгдээгүй. Сэлэнгэ, Дархан-Уул аймагт тусгаарлагдсан 26 хүнээс шинэ коронавирус илрээгүй. ХӨСҮТ-д 159 хүн хянагдаж байна. Алтанбулаг боомтоор орж ирж байгаа жолооч нарыг хянах зорилгоор Дархан-Уул аймгийн лабораторийг ажиллуулж, ХӨСҮТ-ээс нарийн мэргэжлийн хүн очиж ажиллаж байна. Ховд, Дорнод зэрэг аймгуудад мөн лаборатори бэлтгэгдсэн. Алтанбулаг боомтоос ачаа тээвэрлэн ирсэн жолоочийн хүүхэд аавтайгаа утсаар л ярьсан, уулзаагүй гэдгийг хяналтын журмаар шүүж үзсэн. Эргэлзэх хэрэггүй. Ажлаа хийж байгаа хүүхдийн хувьд ч хэцүү байна, зөв ойлгох хэрэгтэй. Мөн дархлаагаа дэмжих шаардлага байна” гэлээ.

Засгийн газрын хэрэгжүүлэгч агентлаг Соёл, урлагийн газраас сонирхогчдын болон мэргэжлийн уран бүтээлчдийн дунд “Хамтдаа сэргийлье” сэдэвт цахим постерийн уралдаан зарлалаа.

Тус уралдаан нь шинэ төрлийн “COVID-19” халдвараас хүн амыг урьдчилан сэргийлэх, уг халдварын хор хөнөөлийг ойлгуулах, өвчний эсрэг тэмцэж буй албан хаагчдад сэтгэлийн дэмжлэг үзүүлэх зорилготой.

Уралдаанд оролцогчид “Гэр гэртээ”, “Маскаа зүүцгээе”, “Супер баатрууд”, “Сонор сэрэмжээ бүү алдаарай”, “Масктай соёл” агуулгын хүрээнд оролцох боломжтой.

Бүтээлийг 2020 оны 4 дүгээр сарын 22-ноос 5 дугаар сарын 4-нийг хүртэл ariunzaya@culture.gov.mn цахим хаягаар /jpg, pdf файл/ хүлээн авна.

Бүтээл /фото, компьютер график/ нь хэвлэлийн шаардлага хангасан, 300 pixels, 297×420 mm хэмжээтэй, ямар программ дээр хийснээ тодорхойлсон, уран бүтээлчийн овог нэр, бүтээлийн нэр, холбоо барих утасны дугаарыг бичиж ирүүлсэн байх шаардлагатай.

Уралдааныг тусгайлан томилсон мэргэжлийн шүүгчид шүүн явуулах ба шалгарсан бүтээлийг 2020 оны 5 дугаар сарын 8-нд зарлаж, шагналыг 5 дугаар сарын 11-нд гардуулах юм.

Шалгарсан бүтээлүүдийг Улсын онцгой комисст хүлээлгэн өгч, олон нийтэд зориулсан сурталчилгааны постер болгон түгээн сурталчлах бөгөөд уралдаанд ирүүлсэн бүтээлүүдээр цахим үзэсгэлэн гаргаж олон нийтэд толилуулах аж.