Month: April 2020

Монгол Улсын Их Хурлын дарга Г.Занданшатар ОХУ-аас Монгол Улсад суугаа Онц бөгөөд Бүрэн эрхт Элчин сайд И.К.Азизовыг хүлээн авч уулзах үеэрээ коронавирусийн цар тахалтай тэмцэхэд нь зориулж ОХУ-ын Бүгд Найрамдах Буриад Улс, Эрхүү мужид 1.0 сая ам.долларын мах махан бүтээгдэхүүнийг тусламж болгон илгээхээр Үндэсний Аюулгүй Байдлын Зөвлөл хэлэлцэн шийдвэрлэснийг дуулгалаа.

Үйлдвэрлэлийн аргаар бэлтгэсэн, эрүүл ахуйн олон улсын стандартыг хангасан бүтээгдэхүүнийг Улаанбаатар хот, Орхон аймгийн махны үйлдвэрүүдээс авч, хөргөлттэй авто тээврээр нийлүүлэх юм байна.

“Юугаараа баян, түүгээрээ дайл” гэж Монголын ард түмэн хэлэлцдэг. Тиймээс бид эрдэмтэн судлаачид эмийн чанартай гэж үздэг, экологийн хувьд цэвэр, монгол малын органик мах, махан бүтээгдэхүүнийг ах дүү Буриадын ард түмэн, Эрхүү мужийн иргэдэд тусламж болгон илгээх гэж байна. Мөнхийн хөрш, найрамдал нөхөрлөлийн нандин сайхан харилцаатай манай хоёр орон хүнд хэцүү нөхцөлд бие биедээ тусалж, дэмжсээр ирсэн сайхан уламжлалтай. Бидний энэ өчүүхэн тусламж коронавирусийн цар тахлаас сэргийлэх, тэмцэхэд нь бага боловч тус нэмэр болоосой гэж хүсэж байна” гэж УИХ-ын дарга Г.Занданшатар хэллээ. Тэрбээр ОХУ-ын их, дээд сургуулиудад суралцаж байгаа Монголын оюутан залуусыг эх орондоо буцахад нь бүх талын туслалцаа, дэмжлэг үзүүлж, хамтран ажилласан, мөн коронавирусийг илрүүлэх 500 тест илгээсэнд нь Оросын анд нөхөд, тэр дундаа Бүгд Найрамдах Буриад Улсын удирдлагад талархал илэрхийллээ.

Элчин сайд И.К.Азизов ах дүү Монгол Улсын энэхүү сайн санааны буцалтгүй тусламжид гүнээ талархан, баярлаж байна. Энэ мэдээг бид ОХУ, БН Буриад Улс, Эрхүү мужийн удирдлагад хойшлуулалгүй мэдээлэх болно гэв.

Тэрбээр Монгол Улсын Засгийн газар, ҮАБЗ, Улсын онцгой комисс, Эрүүл мэндийн яамнаас коронавирусийн цар тахлаас иргэдээ хамгаалах, урьдчилан сэргийлэх арга хэмжээг цаг алдалгүй, шуурхай авч хэрэгжүүлж, амжилттай ажиллаж байгааг онцлон тэмдэглэв. Түүнчлэн хэдийгээр хорио, хязгаарлалт тавигдсан байгаа ч Монгол Улсын Засгийн газрын хүсэлтээр ОХУ-аас 160 мянган тонн улаан буудай нийлүүлэхэд дэмжлэг үзүүлэх болно гэж мэдэгдлээ.

Уулзалтын үеэр УИХ-ын дарга Г.Занданшатар коронавирусийн нөхцөл байдал, авч хэрэгжүүлж буй арга хэмжээний талаар ярьж, Монгол Улсын парламент цахимаар хуралдаж, цар тахалтай тэмцэх хууль тогтоомж, шийдвэрүүдийг гарган хэрэгжүүлж байгаа талаар мэдээлэв.

Элчин сайд И.К.Азизов төрсөн өдөрт нь зориулан мэндчилгээ илгээсэнд талархсан ОХУ-ын Холбооны Хурлын Холбооны Зөвлөлийн дарга, хатагтай В.И.Матвиенкогийн талархлын цахилгааныг УИХ-ын дарга Г.Занданшатарт гардуулж өгөв.

Нийслэлийн прокурорын газраас Т.Билэгжаргалд холбогдох эрүүгийн хэргийг Сүхбаатар дүүргийн Эрүүгийн хэргийн анхан шатны шүүх 2020 оны 3 дугаар сарын 27-ны өдөр хүлээн авч, шүүх хуралдааныг 2020 оны 4 дүгээр сарын 21-ний өдрийн 10:00 цагт зарлажээ. Шүүх хуралдаанаар Сэтгэцийн эрүүл мэндийн үндэсний төвийн Шүүх сэтгэц эмгэг судлалын №220 дугаартай шинжээчдийн дүгнэлтэд “…Т.Билэгжаргал нь сэтгэцийн эмгэгтэй, хэрэг хариуцах чадваргүй” гэсэн байна. Иймд шүүгдэгч Т.Билэгжаргалд хийсэн шүүх сэтгэц эмгэг судлалын магадалгааг таван шинжээчийн бүрэлдэхүүнтэй дахин гаргах шаардлагатай гэж үзэн, шүүх хуралдааныг 2020 оны 5 дугаар сарын 13-ны 10:00 цаг хүртэл хойшлуулжээ. Өөрөөр хэлбэл, шүүхээс дахин шинжээч томилсон байна. Прокуророос Т.Билэгжаргалд Эрүүгийн хуулийн тусгай ангийн 20.7 дугаар зүйлийн 1, 11.4 дүгээр зүйлийн 1 дэх хэсгүүдэд зааснаар яллах дүгнэлт үйлджээ.

Нийслэлийн Засаг даргын Зөвлөлийн хуралдаан өнөөдөр болж байна. Хуралдааны эхэнд “Тогтоолд нэмэлт, өөрчлөлт оруулах тухай” асуудлыг Замын хөдөлгөөний төлөвлөлт, зохицуулалт, инженерчлэлийн газрын дарга С.Энхтөр танилцууллаа. Тэрбээр “Нийслэлийн хэмжээнд үйл ажиллагаа явуулж байгаа авто зогсоолуудыг нэгдсэн зохион байгуулалтай болгож, шинээр судлагдсан боломжит байршлуудад авто зогсоолыг иргэн, аж ахуйн нэгжтэй хамтран байгуулах, зогсоолын хүртээмжийг нэмэгдүүлэх нэн шаардлагатай байна. Нийслэл хотын замын хөдөлгөөний ачаалал, төрийн байгууллагын нягтаршил болон бусад онцлог байдлаас хамааран авто зогсоолын төлбөрийн хэмжээ, тээврийн хэрэгслийг зогсоолд байрлуулах боломжит цагийг харилцан адилгүй байдлаар зохион байгуулах нь зүйтэй юм. Мөн зогсоолын үйлчилгээний төлбөрийг зогсоолын төлбөрийн бүсээс хамааран харилцан адилгүй байхаар төлөвлөсөн бөгөөд үйлчилгээ эрхлэгч байгууллага нь төлбөртэй зогсоолоос олох орлогын 40 хувийг Авто замын санд төвлөрүүлэхээр тусгасан. Учир нь зогсоолын үйл ажиллагаа эрхлэх хүсэлтэй иргэн, аж ахуйн нэгж нь хэрэгжүүлэгч байгууллагатай гэрээ байгуулан холбогдох стандарт, нормын дагуу өөрийн хөрөнгөөр тухайн зогсоолын талбайд тохижуулах, шаардлагатай тоног төхөөрөмжийг суурилуулан үйл ажиллагааг явуулна” гэв.

Түүнчлэн зогсоолын сэлгэлтийг нэмэгдүүлэх зорилгоор автомашиныг нэг зогсоолд удаан хугацаагаар тавихгүй байх зохицуулалтыг хийж ажиллах аж. Цаашид энэхүү журмыг хэрэгжүүлснээр нийтийн болон хувийн эзэмшлийн зам талбайд тээврийн хэрэгслийн зогсоолын үйл ажиллагааны зохион байгуулалт, сэлгэлт сайжирч, хотын төвийн түгжрэлийг бууруулах боломж нэмэгдэх юм байна. Энэ үеэр Улаанбаатар хотын Ерөнхий менежер бөгөөд Захирагчийн ажлын албаны дарга Т.Гантөмөр “Нийтийн эзэмшлийн зам талбайн авто зогсоолын арчлалт, ашиглалтад анхаарах шаардлагатай. Нийслэлийн Авто замын хөгжлийн газар зогсоол орчмын газрын ногоон байгууламж, хайс, хашлага болон нийтийн эзэмшлийн зам талбайд ямар зохицуулалттай байхыг журмандаа тусгах нь зүйтэй” гэдгийг онцолж хэллээ. Нийслэлийн Хөгжлийн бодлогын асуудал хариуцсан нэгдүгээр орлогч Ж.Батбаясгалан “Тогтоолын төсөлдөө зөвлөлийн гишүүдийн хэлсэн саналыг нэмж тусгах хэрэгтэй. Авто замын хөгжлийн газар тэмдэглэлийн төслөө оруулж ирж танилцуулах шаардлагатай” гэв. Уг асуудлыг зөвлөлийн гишүүд хэлэлцэж, холбогдох албаныханд тогтоолын төсөлтэй холбоотой ажлыг илүү эрчимжүүлэх чиглэлийг тэмдэглэлээр үүрэг болголоо.

“Нэг хот- Нэг стандарт” болзолт уралдааныг дүгнэх тухай асуудлыг танилцууллаа

Хуралдаанаар дараа нь хэлэлцэх “Болзолт уралдаан дүгнэх тухай” асуудлыг НЗДТГ-ын Төрийн захиргаа, удирдлагын хэлтсийн дарга Ү.Ганболд танилцуулав. Нийслэлийн Засаг даргын А/1343 дугаар захирамжаар “Нэг хот-Нэг стандарт” болзолт уралдааныг зарласан. НЗДТГ-ын даргын 2020 оны А/10 дугаар тушаалаар байгуулагдсан Болзолт уралдааныг зохион байгуулах нийслэлийн ажлын хэсэг нь 2020 оны нэгдүгээр улиралд болзолт уралдааныг идэвхжүүлэх, албан хаагчдын мэдлэг ойлголтыг нэмэгдүүлэх, чадавхжуулах зорилгоор хороо бүрийн төлөөлөл болох 350 хэсгийн ахлагч, 171 хорооны зохион байгуулагч, хорооны Засаг дарга, дүүргүүдийн 105 удирдах албан тушаалтан, нутгийн захиргааны байгууллагуудын 60 удирдах албан тушаалтанд 52 удаагийн сургалтыг ажлын байран дээр нь зохион байгуулж, 232 төрлийн зөрчлийн хэрхэн таних, илрүүлэх талаар цахим гарын авлага боловсруулж, хороодын албан хаагч, хэсгийн ахлагч нарт хүргэж ажиллажээ.

Нийслэлийн ажлын хэсэг нь 2020 оны гуравдугаар сарын 30-ны өдрөөс дөрөвдүгээр сарын 22-ныг хүртэлх хугацаанд дүүргүүдээс нэр дэвшүүлсэн хороо, хэсгийн ахлагч нарын баг болон агентлагуудын үйл ажиллагаатай ажлын байранд нь очиж танилцах замаар үнэлгээ өгч ажилласан байна.

Нийслэлийн Хөгжлийн бодлогын асуудал хариуцсан нэгдүгээр орлогч Ж.Батбаясгалан “Нийслэлийн нутгийн захиргааны бүх байгууллагуудын шат шатны албан тушаалтнууд тайлан мэдээллээ гаргахдаа хариуцлагатай хандах хэрэгтэй. Хариуцсан ажилдаа эзэн байснаар дараагийн урамшуулах асуудлууд яригдана. Нөгөө талаар шагнал урамшууллын хажуугаар хариуцлагын тухай асуудлыг заавал хамт ярьж байх хэрэгтэй” гэдгийг холбогдох албан тушаалтнуудад онцгойлон анхааруулж хэлэв.

Зөвлөлийн гишүүд болзолт уралдаантай холбоотой саналаа хэлж, цаашид ажлыг илүү урагшлуулах чиглэлд анхаарах хэд хэдэн асуудлаар санал солилцоод “Нэг хот-Нэг стандарт” болзолт уралдааны нэгдүгээр улирлын дүнг дүгнэх тухай захирамжийн төслийг баталлаа.

Иргэдийн эрүүл, аюулгүй орчинд амьдрах эрхийг хангах, газрын ашиглалтыг сайжруулах, явган хүний зам талбайн хүрэлцээг нэмэгдүүлэх, автозамын түгжрэлийг бууруулах зорилгоор Нийслэлийн Засаг даргын А/513 дугаар захирамж гарсан. Захирамжийн хэрэгжилтийг хангах ажлын хүрээнд Сүхбаатар дүүргийн Газар зохион байгуулалтын албанаас зөрчил арилгахаар тусгагдсан байршлуудад газар чөлөөлөх ажлыг эхлүүллээ. Өнөөдөр дүүргийн 7 дугаар хороо 10 дугаар байрны урд талд нийтийн эзэмшилд баригдсан блокон хашаа, тоосгон гараашийг буулгахаар ажиллаж байна.

Баян-Өлгий аймагт өчигдөр 16 настай мотоцикл унаж явсан иргэнийг “УАЗ-469” машинтай жолооч мөргөсөн авто осол гарчээ. Тухайн автомашины жолооч хохирогчийг эмнэлэгт хүргэж өгөхдөө “ѳѳрѳѳ ойчсон байна” гэж худал хэлээд эмнэлгийн үүдний сандал дээр орхиж явжээ. Хохирогч ослын гэмтлээ даалгүй удалгүй нас баржээ. Харин жолооч осол үйлдсэнээ нуух зорилгоор хөдөө гэртээ очиж автомашины эвдэрсэн эд ангиа сольсон байжээ. Уг хэргийг Баян-Өлгий аймгийн цагдаагийн алба хаагчид илрүүлсэн аж.

Хуурайшилтын үе эхэлж байгаатай холбогдуулан Баянзүрх дүүргийн Онцгой байдлын хэлтсээс ой хээрийн түймрээс урьдчилан сэргийлэх ажлыг эрчимжүүллээ. Урьдчилан сэргийлэх арга хэмжээний хүрээнд дүүргийн Онцгой байдлын хэлтсийн албан хаагчид ногоон бүсийн байгаль хамгаалагч нартай хамтран дүүргийн ногоон бүсэд хөдөлгөөнт эргүүлийг 04 дүгээр сарын 01-ний өдрөөс эхлүүлсэн билээ.

Мөн хаврын хуурайшилтын улиралд ойн сангаас мод бэлтгэх, ойн дагалдах нөөцийг ашиглах, зугаалах, аялал зугаалгаар явах болон бусад үйл ажиллагааг гуравдугаар сарын 20-ны өдрөөс зургаадугаар сарын 10-ны хооронд хориглосон байдаг. Иймд иргэд та бүхэн хориглосон хугацаанд ногоон бүсэд аялж зугаалахгүй байхыг анхааруулж байна.