Month: April 2020

Сонгинохайрхан дүүргийн шуурхай штабын /7013-2926/ дугаартай утсанд 1 дүгээр хорооллын 81 дүгээр сургууль дээр үйл ажиллагаа явагдаж байна гэсэн мэдээллийн дагуу 2020 оны 04 дүгээр сарын 22-ний орой 15 дугаар хороонд байрлах “Ирээдүй цогцолбор” сургуульд хяналт шалгалт хийлээ.

Шалгалтаар тус сургуулийн хичээлийн 2 дугаар байрны спорт зааланд сургалтын ахлах менежер захирлын зөвшөөрөлгүй нийт 9 хүүхдийг цуглуулж 1 цагийн 30000 /гучин мянган/ төгрөгөөр заалны үйл ажиллагаа явуулж байсан зөрчлийг таслан зогсоож, эрх бүхий байгууллагаас тогтоосон хорио цээр, хөдөлгөөний хязгаарлалтын дэглэмийг зөрчсөн тул Зөрчлийн тухай хуулийн холбогдох заалтын дагуу торгуулийн арга хэмжээ ногдууллаа.

Япон улсад сүүлийн 24 цагийн байдлаар 172 шинэ тохиолдол бүртгэгдсэн байна. Харин нас барлат 407 болсноос 13 нь “Даймонд” хөлөг онгоцны зорчигч байна. Тус улсын зүгээс халдварын тархалтыг хяналтдаа бүрэн авч чадаагүй байгаа учраас хөл хорио тогтоосон хугацааг үргэлжлүүлэн сунгаж магадгүй байгаа аж.

БНСУ-д өчигдөр шинэ тохиолдол 12, нас баралт 1 бүртгэгджээ. Франц, Итали, Испани зэрэг улсад шинээр бүртгэгдсэн нас баралтын тоо дахин нэмэгдсэн. Халдварын тархалт ОХУ, Турк зэрэг улсад өндөр хэвээр байна.

АНУ-ын Нью-Иорк хотод сүүлийн 24 цагийн хугацаанд 337 нас баралт шинээр бүртгэгдсэн байна. АНУ-д амьдарч байгаа Монгол Улсын нэг иргэн COVID-19 халдвар авчээ. Улмаар Эрүүл мэндийн яамтай 119 дугаарыг тусгай утсаар холбогдон эмнэлзүйн зөвлөгөө авч байгаа гэдгийг Эрүүл мэндийн яамны Тандалт, шуурхай удирдлагын хэлтсийн дарга Д.Нарангэрэл хэллээ.

Эрүүл мэндийн яамнаас коронавирустэй холбоотой ээлжит мэдээллээ хүргэх үеэр тусгаарлалтад буй хүмүүсийн болон бусад асуудлаар ЭМЯ-ны Эмнэлгийн тусламжийн газрын дарга Я.Буянжаргал мэдээлэл өглөө.

Тэрбээр “Өнөөдрийн байдлаар эмнэлгийн тусламж үйлчилгээ хэвийн явагдаж байна. Одоогийн байдлаар тусгаарлах байранд 750 иргэн ажиглалтад бий бөгөөд хамт 114 эмч, эмнэлгийн мэргэжилтэн тус иргэдэд тусламж, үйлчилгээ үзүүлэн ажиллаж байна.

21 хоногийн хугацаа нь дууссан ч биеийн байдал нь хүнд нэг иргэн ар гэрийнхнийх нь хүсэлтээр Цэргийн төв эмнэлэгт үлдэж, эрчимт эмчилгээний тасагт гэрээр тусгаарлагдах 14 хоногийн тусгаарлалтаа үргэлжлүүлж байгаа билээ. Энэ иргэнд вируслогийн шинжилгээгээр коронавирус илрээгүй.

Өчигдөр орой Замын-Үүдийн хилийн боомтоор БНХАУ-ын Хөх хотод эмчлэгдэж байсан булчин, гялтангийн идээт үрэвсэлтэй, үжилтэй маш хүнд иргэнээ хүлээж авсан. Тус иргэн нь хятадад 17 удаагийн жижиг мэс ажилбар хийлгэсэн ба биеийн байдал нь хүнд байгаа. Замын-Үүдийн нэгдсэн эмнэлэгт тусгаарлан, ажиглаж байна. Вируслогийн шинжилгээг нь ХӨСҮТ рүү илгээсэн ба нэгдүгээр төв эмнэлэг, ГССҮТ-ийн мэргэжлийн эмч нараас зөвлөгөө аваад явж байна.

Гэрийн тусгаарлалтад нийслэлийн хэмжээнд 856 иргэн ажиглагдаж байгаа билээ. 126 өрхийн эрүүл мэндийн төв ажиглах, зөвлөгөө хийх ажлыг эдгээр хүмүүст хийж буйг мөн хэлье.

Бид эмнэлгийн тусламж үйлчилгээний хувьд илрүүл, оношил, тусгаарла, эмчил гэсэн ДЭМБ-аас өгч буй зөвлөмжийн дагуу ажиллаж байна.

Мөн зорилтот болон эрсдэлт бүлгийн хүн амын дунд санамсаргүй түүврийн аргаар шинжилгээ хийж байгаа.

Тусгай үүргийн онгоцыг хүлээж авахдаа нислэгийн багт ажиллах эмчийг томилсон бөгөөд эрүүл мэндийн байгууллагууд, тусгаарлах байруудын бэлэн байдлыг хангаж, тэнд ажиллах эмч, эмнэлгийн мэргэжилтнүүдээ томилж, дадлагажуулсан. Бид бүх үйл ажиллагаагаа төрийн бусад бүх байгууллагуудтай хамтарч хийж буй билээ.

Бид байнга дадлага сургуулилт хийж ирсэн бөгөөд урьдчилсан байдлаар тавдугаар сарын эхний долоо хоногт дахин сургуулилт хийх чиглэл гарсан. Гэхдээ цагийн нөхцөл байдал, даалгавар нь яаж ирэхийг мэдэхгүй. Хээрийн эмнэлгийг дэлгэж ажиллуулан, бэлтгэлийг хангасан. 30-50 орчим хүнийг тусгаарлан халамж үйлчилгээ үзүүлэх боломж бий гэж тооцоолсон” гэв.

Өөрөөр хэлбэл, 92.5 хувь нь эрүүл мэндийн салбарт, үлдсэн 7.5 хувь нь бусад салбарт ажиллаж буй хэрэг. Хэрэв цар тахал хүн амын дунд тархвал хэнийг хэн орлох зэрэг бүх томилгоог хийсэн бөгөөд үүнтэй холбоотойгоор дадлагажуулах сургалт, үнэлгээгээ хийгдэж байгаа. ДЭМБ-ын аргачлалаар тархварын холбогдох бүх тооцооллоо гурав дахь удаагаа хийсэн. Одоогийн байдлаар тасарсан эм, эмнэлгийн хэрэгсэл байхгүй гэдгийг мөн тэрбээр нэмж хэлсэн юм.20

Монгол Улсад генерал цол олгож эхэлсний түүхт 76 жилийн ой өнөөдөр тохиож байна. Жил бүрийн дөрөвдүгээр сарын 28-ны өдөр төр, засгаас алтан мөрдэст генералууддаа хүндэтгэл үзүүлдэг уламжлалтай бөгөөд энэ жил дэлхий нийтээр тархсан шинэ короновирусын халдварын нөхцөл байдалтай уялдуулан хүндэтгэл ёслолын арга хэмжээг зохион байгуулах боломжгүй болсон. Өөрөөр хэлбэл, ЗХЖШ-аас алтан мөрдэстнүүдэд чиглэсэн зохион байгуулалтын олон арга хэмжээг төлөвлөж, бэлтгэл ажлаа бүрэн хангасан ч Монгол Улсын Засгийн газар, Улсын онцгой комиссоос улсын хэмжээнд гамшгаас хамгаалах өндөржүүлсэн байдлын зэрэгт шилжүүлсэнтэй холбогдуулан төлөвлөсөн хугацаандаа зохион байгуулах боломжгүй болсон юм.

Одоогоос 76 жилийн өмнө буюу 1944 оны дөрөвдүгээр сарын 28-ны өдөр БНМАУ-ын Ардын Сайд нарын Зөвлөлийн тогтоолоор цэргийн гарамгай 11 зүтгэлтэнд генерал хэмээх цэргийн дээд цол олгосон түүхтэй. Энэ цагаас хойш 185 цэргийн зүтгэлтэн энэ эрхэм цолыг хүртсэний дотор өдгөө 91 нь энх тунх байна. Үүнээс 27 нь төрийн цэргийн болон үндэсний аюулгүй байдлыг хангах чиг үүрэг бүхий байгууллагадаа үүргээ гүйцэтгээд ажиллаж байна. Генерал цолтнууд дотор маршал нэг, армийн генерал нэг, хурандаа генерал найм, дэслэгч генерал 20, хошууч генерал 110, бригадын генерал 41 байна. Үүнээс БНМАУ-ын баатар цолтон зургаа, Хөдөлмөрийн баатар гурав, дайн, байлдаанд оролцсон 34, төрийн өндөр албан тушаалыг хашсан 15, сансрын нисгэгч нэг, эрдмийн зэрэг цолтой 38, энхийг сахиулах ажиллагаанд үүрэг гүйцэтгэсэн болон олон улсын байгууллагад ажилласан 10, БНМАУ-ын төрийн тэргүүн 1, УИХ (АИХ)-ын гишүүн (депутат) 69, төрийн сайд 20, цэргийн дипломат 31 генерал цолтон байдаг ажээ. Энэ тоо баримт нь Монголын генералууд зөвхөн батлан хамгаалах, аюулгүй байдлыг хангах хэрэгт төдийгүй улс орны хөгжлийн бүхий л үе шатанд манлайлан оролцож байсныг илтгэх юм. Өнөөдөр хамгийн өндөр настай нь хурандаа генерал С.Лувсангомбо. 96 настай. Өдгөө энх тунх байгаа ганцхан хурандаа генерал билээ.

Энэхүү түүхт өдрийг тохиолдуулан Монгол Улсын ЗХЖШ-ын дарга, хошууч генерал Д.Ганзориг үе үеийн алтан мөрдэст генералууддаа мэндчилгээ дэвшүүлжээ. Мэндчилгээнд “Монгол Улсынхаа эрх чөлөө, тусгаар тогтнол, улс орныхоо бүтээн байгуулалт, хөгжил дэвшил, аюулгүй байдлын төлөө бие сэтгэлээ зориулж, эх орноо батлан хамгаалах хүндтэй бөгөөд хариуцлагатай үүргээ амжилттай биелүүлж яваа Төрийн цэргийн болон үндэсний аюулгүй байдлыг хангах чиг үүрэг бүхий байгууллагуудад алба хааж байгаа болон бэлтгэл, чөлөөнд буй генералууд Та бүхэндээ “Монгол генералын өдөр”-ийн баярын мэндийг Монгол Улсын ЗХЖШ-ын даргын зөвлөлийн нэрийн өмнөөс болон хувиасаа өргөн дэвшүүлье!

Өдгөөгөөс 76 жилийн өмнө буюу 1944 оны 4 дүгээр сарын 28-ны өдөр БНМАУ-ын Ардын Сайд нарын Зөвлөлийн тогтоолоор цэргийн гарамгай 11 зүтгэлтэнд “ГЕНЕРАЛ” хэмээх цэргийн дээд цолыг анх удаа олгосноос хойш жил бүрийн энэ өдрийг алтан мөрдэстнүүдийн өдөр болгон тэмдэглэж ирсэн нь эх орныхоо тусгаар тогтнол, халдашгүй бүрэн эрх, аюулгүй байдлын төлөө зүтгэсэн Та бүхнээр бахархах, хүндэтгэн дээдлэх, дайчин уламжлалыг тань үр хойчдоо өвлүүлэх, монгол бахархлыг түгээн дэлгэрүүлэхэд чиглэгддэг билээ.

Генерал цолтнууд Та бүхэн удирдан зохион байгуулах авьяас билиг, цэргийн хэргийн өргөн мэдлэг, чадвар, хүний мөс, ноён нуруу, үлгэрлэл, манлайллаараа тэргүүлэгчид бөгөөд төр, түмнийхээ энэ их хүндэтгэлийг нэр төртэй дааж яваа цэрэг эрс гэдгийг баярын энэ өдөр онцлон тэмдэглэх учиртай билээ.

Өнөөдөр Та бүхний залгамж халаа болсон цэрэг дайчид дэлхийн халуун цэгт ур чадвараараа гайхагдан, улс орныхоо бүтээн байгуулалтад хөдөлмөрч, бүтээлчээрээ шалгаран тодорч байгаа бол энх цагийн эгэл баатрууд маань аюул осол, хэрэг зөрчлөөс ард түмнээ хамгаалах, авран тэтгэх ариун үйлсээ нэр төртэй гүйцэтгэж байгааг дуулгахдаа баяртай байна.

Эх орон, ард түмнээ батлан хамгаалагчдын оргил нь болон гялалзсан алтан мөрдэст эрхэм генералууд Та бүхэндээ урт насалж, удаан жаргахыг хүсэн ерөөе” гэжээ.

Нийслэлийн Засаг даргын тамгын газар, нийслэлийн Авто замын хөгжлийн газраас хэрэгжүүлж буй 2020 оны томоохон шинэчлэлтийн ажлын нэг болох Баянбүрдийн тойргоос Эх Нялхсын уулзвар хүртэлх 1.09 км авто замын ажил (Аюулгүйн тойргийн хамт) -ыг “Улаанбаатар зам засвар, арчлалтын газар” ОНӨААТҮГ 2020 оны дөрөвдүгээр сарын 15-ны өдрөөс гүйцэтгэж байна.

Шинэчлэлтийн ажлын хүрээнд авто замын хойд тал буюу Баянбүрдийн тойргоос-Эх Нялхасын зүүн урд уулзвар хүртэлх 0.6 км авто замын тээврийн хэрэгслийн хөдөлгөөнийг 2020 оны дөрөвдүгээр 29-нөөс тавдугаар 11-ний хооронд хязгаарлаж, шугам сүлжээний сэтгэлгээ, хуучин хучилтыг дахин боловсруулах, хоёр үе асфальтбетон хучилт, хэвтээ тэмдэглэгээний ажлуудыг хийнэ.

Тухайн авто зам нь 1988-1989 онд баригдаж байсан бөгөөд өнөөдрийг хүртэл нийт замын уртад бүрэн шинэчлэлт хийгдэж байгаагүй. Шинэчлэснээр 3.75 м өргөн, зургаан эгнээ авто зам, хоёр талаараа явган хүниий зам шинээр баригдана. Мөн Баянбүрдийн тойргийн зорчих хэсгийг бүрэн шинэчилнэ.

Цаашид авто замын урд тал буюу Эх нялхсын зүүн урд уулзвараас Баянбүрдийн тойрог хүртэлх 0.6 км авто зам болон Баянбүрдийн тойргийн тээврийн хэрэгслийн хөдөлгөөнийг шат дараатай хязгаарлах болно.

Хөдөлгөөн хязгаарлах хугацаанд авто замын нэг урсгалыг хааж, эсрэг чиглэлд хөдөлгөөн зохион байгуулалтыг хийх тул зорчигч та бүхэн авто замын ачааллыг тооцон хөдөлгөөнд оролцохыг уриалж байна.

Манай улсад коронавирусийн халдварын тохиолдол нэмэгдсэн эсэх болон шинжилгээний хариунуудын талаар ХӨСҮТ-ийн ерөнхий захирал Д.Нямхүү мэдээллээ.

Тэрбээр “Дөрөвдүгээр сарын 27-гд ХӨСҮТ болон улсын хэмжээнд COVID-19 халдварын сэжигтэй тохиолдол бүртгэгдээгүй. Өчигдөр ХӨСҮТ-ийн хоёр лаборатори, Дархан-Уул аймгийн салбар лабораторид нийт 59 хүнд шинжилгээ хийснээс коронавирус илрээгүй.

Улсын хэмжээнд долоон лабораторийг бэлтгээд тус бүрд нь 1,000 оношлуур хүргэж, туршилт судалгаа хийгдээд явж байгаа. Салбар лабораториудын тоног төхөөрөмж, оношлуур бүгд ижил. Эгзэгтэй үед олон тоогоор шинжилгээ хийх боломжтой.

ХӨСҮТ эмчилгээг багаар хийх зохион байгуулалт хийсэн. Өчигдрөөс нэг баг эмчилгээ рүү орсон” гэдгийг хэллээ.

Говь-Сүмбэр аймагт дөрвөн хүн автомашинтайгаа шатаж амь насаа алдсан харамсалтай хэрэг өчигдөр гарчээ.

Тодруулбал өчигдөр 22.13 цагийн орчимд тус аймгийн Шивээговь сумын 2 дугаар багийн “Өехий” гэдэг газар /аймгийн төвөөс урд зүгт 20 км-т/ Улаанбаатар хотоос Дорноговь аймгийн Сайншанд сумын чиглэлд 1 зорчигчтой зорчиж явсан иргэн Б-ийн эзэмшлийн “Маяти-2” загварын ачааны автомашины араас иргэн О-ын эзэмшлийн 4 зорчигчтой “Бонго жи-2” загварын бага оврын ачааны автомашин мөргөсний улмаас шатаж байна гэсэн дуудлага Онцгой байдлын албанд иржээ.

Дуудлага мэдээллийн дагуу тус аймгийн Онцгой байдлын газрын Гал түймэр унтраах, аврах 37 дугаар ангийн алба хаагчид 20 км замыг туулан 22:28 цагт очиж, 5 минут ажиллаж галыг унтраасан байна. Уг гал түймэрт иргэн О /36 настай, эрэгтэй/, Г /37 настай, эрэгтэй/, О /38 настай, эрэгтэй/, М /40 настай, эрэгтэй/ нар автомашины төмөр эд ангид хавчуулагдан гал түймэрт өртөж нас барсан тул цогцсыг гаргаж цагдаагийн байгууллагад шилжүүлэн өгчээ.

Хэргийг Говьсүмбэр аймгийн цагдаагийн хэлтэст шалгаж байна. Иймд жолооч та бүхэн болзошгүй зам тээврийн осол, гэмтлээс өөрийн болон бусдын амь нас, эрүүл мэндийг хамгаалж, замын хөдөлгөөний дүрмээ баримтлан хөдөлгөөнд оролцохыг, хөдөө орон нутгийн замд хурд хэтрүүлэхгүй, хамгаалах бүсээ зүүж явахыг Тээврийн цагдаагийн албанаас анхааруулж байна.

Согтууруулах ундаа хэрэглэсэн үедээ загасчилж яваад голд живжээ.

Тодруулбал Сэлэнгэ аймгийн Зүүнбүрэн сумын Бэлчир багийн “Улаан жирээ” гэдэг газар /сумын төвөөс баруун урд зүгт 15 км-т/ тус аймгийн Сүхбаатар сумын харьяат иргэн Б, 60 настай, эрэгтэй Сэлэнгэ голд загасчилж яваад живсэн тухай дуудлага 2020.04.27-ны өдрийн 18:37 цагт Онцгой байдлын албанд иржээ.

Дуудлага мэдээллийн дагуу тус аймгийн Онцгой байдлын газрын алба хаагчид 04.27-ны өдрийн 20:24 цагт Зүүнбүрэн суманд очиж 04.28-ны өдрийн 06:00 цагаас эхлэн эрэн хайх ажиллагааг зохион байгуулж байна.

Дулааны улиралд Онцгой байдлын албанд иргэдээс ирдэг дуудлагын ихэнх хувийг гол усны ослын дуудлага зонхилдог байна. Иргэдийн санамсар болгоомжгүй байдал, бага насны хүүхдийг хараа хяналтгүй орхисноос, согтууруулах ундаа хэрэглэсэн үедээ гол усанд орох зэрэг шалтгаанаар гол усны осол гардаг.

Иймд амралт, аялал зугаалгын улирал эхэлсэнтэй холбогдуулан иргэд та бүхэн амралт, чөлөөт цагаа өнгөрүүлэхдээ гол, усны ойролцоо амарч зугаалахгүй байх, бага насны хүүхдэд тавих хараа, хяналтаа сайжруулах, голын эрэг дагуу хүүхдийг явуулахгүй, тоглуулахгүй байх, тээврийн хэрэгслийн жолооч нар баталгаатай зам, гүүрээр зорчиж гол усанд унах, осолдох эрсдлээс урьдчилан сэргийлэхийг Онцгой байдлын ерөнхий газраас анхаарууллаа.