2020 оны хоёрдугаар сарын 4-8-ныг хүртэлх цаг агаарын урьдчилсан төлөв:

Хоёрдугаар сарын 5-нд Алтай, Хангай, Хөвсгөлийн уулс, Орхон-Сэлэнгийн бэлчирээр, 6-нд баруун аймгуудын нутгийн зарим газар болон Хэнтийн уулархаг нутаг, Дорнод Дарьгангын тал нутгаар, 7-нд говийн аймгуудын нутгийн баруун хэсгээр ялимгүй цас орж, явган шуурга шуурна. Салхи 5, 6-нд говь, талын нутгаар секундэд 12-14 метр хүрч ширүүснэ.

Дархадын хотгор, Завхан голын эх, Идэр, Тэс, Онон, Улз, Халх голын хөндийгөөр шөнөдөө 37-42 градус, өдөртөө 25-30 градус, Увс нуурын хотгор, Хангай, Хөвсгөл, Хэнтийн уулархаг нутаг, Хүрэнбэлчир орчим, Эг-Үүр, Орхон, Сэлэнгэ, Хараа, Ерөө, Туул, Тэрэлж, Хэрлэн голын хөндийгөөр шөнөдөө 32-37 градус, өдөртөө 17-22 градус хүйтэн байна.

Говийн бүс нутгийн баруун хэсгээр шөнөдөө 16-21 градус, өдөртөө 3-8 градус, бусад нутгаар шөнөдөө 21-26 градус, өдөртөө 12-17 градус хүйтэн байна.

Хоёрдугаар сарын 4-5-нд нутгийн баруун хэсгээр, цаашдаа ихэнх нутгаар хүйтний эрч суларна.

ЦЕГ-аас цаг үеийн нөхцөл байдалтай холбоотойгоор мэдээлэл хийж байна. ЦЕГ-ын харьяа Мөрдөн байцаах албаны дэд хурандаа П.Эрдэнэбилэг, “УИХ-ын гишүүн асан Г.Батхүүгийн амь нас хохирсон хэрэгтэй холбогдуулж хохирогчийн өмгөөлөгч Ж.Батхуяг нэгдүгээр сарын 22-ны өдөр мэдээлэл хийх үеэрээ мөрдөн шалгах ажиллагааны баримтыг олон нийтэд мэдээлж, задруулж, бодит бус мэдээллийг тарааж хэрэг шалгахад саад учруулсан. Шүүх эмнэлгийн дүгнэлт, полиграфын магадлагаа, гар утсанд хийсэн шинжилгээ, хуурамч мессеж зэргийг прокурорын зөвшөөрөлгүй олон нийтэд тараасан. Цагдаагийн байгууллагаас мөрдөн шалгах ажиллагааны нууц задруулсан хэргээр хэрэг нээж шалгаж байна. Г гэгч этгээд хуурамчаар мессеж зохиож, 15 сая төгрөг авсныг тогтоосон. Мөн Г гэгч этгээд зургаан удаагийн үйлдлээр бусдаас 269,101.575 сая төгрөгийг бусдаас залилж авсан энэ үйлдэлд нь холбогдуулан Сүхбаатар дүүргийн Цагдаагийн газар шалган, хэргийг прокурорт хүргүүлсэн. 13 секундын бичлэг байгаа юу гэдэг одоогоор тогтоогдоогүй байна” гэлээ.

Тээврийн цагдаагийн алба өнгөрсөн амралтын өдрүүдэд 321 дуудлага хүлээн авснаас зам тээврийн ослын шинжтэй 237 зөрчлийг шалгажээ. Дээрх ослын улмаас долоон хүн бэртсэний хоёр нь хүүхэд байна.

Ослын улмаас нэг хүний амь хохирчээ. Тодруулбал, энэ сарын 1-ний 23.05 цагийн орчимд Төв аймгийн Мөнгөнморьт сумын Жаргалант багийн нутаг “Хар ямаат” гэх газар шороон замд “Зил-131” загварын ачааны машин онхолдож, 36 настай зорчигчийн амь хохирсон байна.

Эдгээр өдөр замын цагдаа нар согтуугаар жолоо барьсан 26 жолоочийг илрүүлж хуулийн дагуу хариуцлага тооцжээ.

Сургууль, цэцэрлэгийн сургалтыг гуравдугаар сарын 2-ныг хүртэл түр хугацаанд зогсоосонтой холбогдуулан хөл хорио тогтоосон тул үр хүүхдээ гадуур гаргахгүй, замын хөдөлгөөнд оролцуулахгүй байхыг Тээврийн цагдаагийн албанаас анхаарууллаа.

Эрүүл мэндийн яамнаас коронавирусийн дэгдэлтийн цаг үеийн асуудлаар мэдээлэл хийлээ.

ЭМЯ-ны Олон нийттэй харилцах, тандалт, шуурхай удирдлагын газрын дарга Д.Нарангэрэл мэдээллийн эхэнд “Польш улсад амьдарч буй иргэд, эмч нар 400 мянган маск, 100 ширхэг хувийн хамгаалах хэрэгслийг эмнэлгийн ажилтнуудад хандивласан. Монос групп Уханиас ирсэн оюутнуудын дунд дархлааг нь дэмжих витамин хандивласан. Мөн Монгол-Солонгосын коллежийн оюутнууд өөрсдөө оёсон маскаа ЭМЯ-д хандивласан гэх мэтчилэн хүнд хэцүү цагт төрийн болон төрийн бус байгууллагууд, иргэд хамтран ажиллаж байгаад ЭМЯ талархаж байна” гэсэн юм.

Монгол дахь ДЭМБ-ын мэргэжилтэн О.Ариунтуяа “Дэлхийн хэмжээнд шинэ коронавирусийн халдвар авсан 17,900 тохиолдол бүртгэгдэж, нас барсан тохиолдол 45-аар нэмэгдсэн ч нас баралтын түвшин 2.1 хувьтай хэвээр байна. БНХАУ-аас гадна ОХУ-2, Швед-1, Испани-1, Их Британид-2 коронавирусийн халдвар шинээр бүртгэгдлээ. БНХАУ-аас гадна эмнэлгийн ажилтан халдвар авсан анхны тохиолдол мөн өчигдөр Франц улсад бүртгэгдсэн. Мөн БНХАУ-аас гадна хилийн чанадад нас барсан анхны тохиолдол Филлиппинд бүртгэгдсэн.

БНХАУ-ын Ухань хотод аялаад эх орондоо очсон Швед улсын иргэн дөрөв хоногийн турш өөрийгөө гэртээ тусгаарлаад өвчний шинж тэмдэг илэрсэн даруйд нөхцөл байдлаа эмнэлгийн байгууллагад хандсан нь халдвар тарахаас сэргийлсэн сайн жишээ болсон байна. Иймээс Монгол Улсын иргэд сүүлийн 14 хоногийн хугацаанд голомттой бүс нутгаар аялсан бол өөрийгөө тусгаарлахыг зөвлөж байна. Хэрвээ амьсгалын замын өвчний шинж тэмдэг илэрсэн тохиолдолд 24 цагийн ажиллагаатай 80086829 холбогдохыг зөвлөж байна.

Шинэ коронавирусийн халдвар гарснаас хойш 34 хоног өнгөрсөн бөгөөд энэ хугацаанд Монгол Улсад халдвар илрээгүй нь олон байгууллагын хамтын ажиллагааны үр дүн гэдгийг онцолж хэлмээр байна” гэлээ.

ХӨСҮТ-ийн захирал Д.Нямхүү “Коронавирусийн голомтод бүсээс 2020 оны хоёрдугаар сарын 1-ний өдөр эх орондоо ирсэн оюутнуудаас коронавирусийн халдвар илрээгүй. Цаашид биеийн байдлыг хянаж, эмчийн үзлэг оруулж, дүрэм ёсоор 14 хоног хяналтад байлгаж байгаад, эмнэлгээс гаргана. Түүнчлэн оюутнуудыг онцгоцоор авч ирсэн 15 хүнийг ч ажиглалтад байлгаж байна.

Бямба гаригт Дорноговь аймгийн Замын-Үүд боомтоор нэвтэрсэн Эрээн амьдардаг гэх гурван иргэнийг сэжигтэй тохиолдол гэж үзсэн тул тусгаарласан бөгөөд тэдгээр хүмүүстэй ойр байсан таван хүнийг ажиглалтад авсан. Тэдгээр иргэдийн шинжилгээний хариу бүгд сөрөг буюу коронавирусийн халдвар аваагүй гэж гарсан. Одоогоор Монгол Улсад тус өвчин бүртгэгдээгүй” гэдгийг хэллээ.

ХӨСҮТ иргэдийн гараа сайн угаахаас гадна гар утсаа сайн ариутгахыг зөвлөж байна. Учир нь, хүн өдөрт 150 удаа гар утсандаа хүрдэг бөгөөд гар утасны дэлгэц нь нийтийн бие засах газраас ч илүү бохир байдаг гэсэн шинжлэх ухааны үндэслэлтэй судалгаа байдаг. Иймээс иргэдийг гар утсаа давхар сайтар ариутгахыг зөвлөж байна. Ингэхдээ нүдний шилний нэг удаагийн салфеткаар гар утасны дэлгэцээ арчиж болохоос гадна гар ариутгах бодисийг хөвөнд шингээж утаа ариутгах боломжтой гэв.

Иргэн Г.Буяндорж өнөөдөр Монгол Улсын Ерөнхийлөгчийн Тамгын газрын дарга З.Энхболдод “Нэр бүхий шүүгч, прокурорын авлига авсан баримт” гэх 65 хуудас материалыг өгч, хууль хяналтын байгууллагаар шалгуулах хүсэлтээ илэрхийллээ.

Тэрбээр “Би 1996 оноос хойш өнөөдрийг хүртэл бизнесийн салбарт ажиллаж байна. Би Монгол Улсын Ерөнхийлөгч Х.Баттулгад хандаж, хуулийн байгууллагын зарим нэг ажилтнуудын хууль бус ажиллагааны тухай, тэдний ажил, албан тушаалтай холбоотой авлига, хээл хахуультай холбоотой байж болзошгүй нотлох баримтуудыг бүрдүүлж, гомдол гаргаж байна.

Манай “Ноёд” группийн охин компани болох “Ноёд констракшн” компанийг хуулийн байгууллагын нэр бүхий хүмүүс зохион байгуулалттайгаар бүлэглэж, дээрэмдэж авсан. Үүний уршгаар би сүүлийн есөн жил хуулийн байгууллагаар шалгагдсан ч Монгол Улсын шүүх миний хэргийг цагаатгасан.

Миний компанийг дээрэмдэж, надаас 100 мянган ам.долларын авлига өгөхийг шаардсан зарим нэг прокуроруудын зохион байгуулалтай үйлдлийг онцлон хэлмээр байна. Нийслэлийн прокурорын газрын хяналтын прокурор байсан прокурортой холбогдох гомдол бий. Миний хэргийг шалгах явцад хэрэгт хяналт тавьж байсан прокурор нь надаас 100 мянган ам.доллар нэхэж, шантаажилж дарамталсан. Тэр үед би хэрэгт шалгагдаж байсан тул түүний санал болгосон буюу гэр бүлийн гишүүний өмгөөлөгч эмэгтэйтэй 100 мянган ам.долларын гэрээ хийсэн. Өөрөөр хэлбэл, 10 мянган ам.долларын урьдчилгаа, 90 мянган ам.долларыг хэрэг ашигтайгаар шийдэгдсэн тохиолдолд өгнө гэсэн гэрээ хийсэн. Гэрээ хийгдсэний дараа би мөнгийг өгөх бололцоогүй гэдгээ хэлсэн юм. Ингэж хэлснийхээ төлөө би Эрүүгийн хуулийн таван зүйл ангиар 5 удаа, 409 хоног буюу 1.2 жил цагдан хоригдсон. Үүний дараа надад холбогдох хэргийг шүүхэд шилжүүлж би 16 удаа шүүх хуралд орж, нийт компанийнхаа 25 тэрбум төгрөгийг алдсан.

Сүүлийн үед баялаг бүтээгч, бизнес эрхлэгч нараас бизнесийг нь булааж, дээрэмддэг, төрийн байгууллагын хүчээр айлгаж, сүрдүүлдэг, дарамталдаг ажиллагааны эсрэг төр засгаас тодорхой арга хэмжээ авч байгаа учраас Монголын төрд итгэх итгэл маань сэргэсэн. Иймд нэр бүхий прокуроруудыг хуулийн дагуу шалгаж, зохих хариуцлагыг нь хүлээлгэх байх хэмээн итгэж 65 хуудас нотлох баримтыг өгч, гомдол гаргаж байна” гэсэн юм.

Иргэн Г.Буяндорж авлига, хээл хахууль авсан гэх прокурор, шүүгчийг нэрлэсэн бөгөөд тэдгээр нь Салхитын мөнгөний ордод шалгагдаж буйтай адил буюу шүүгч, прокурор нар нь гэр бүлийн, ураг төрлийн харилцаатай байгаа хэмээн онцоллоо.

Ерөнхийлөгчийн Тамгын газрын дарга З.Энхболд “Хуучин Ерөнхийлөгч нь том хонгил, шүүгч, прокурор нь жижиг хонгил үүсгэж бизнесменүүдийг дарамталж байгаа бол одооноос эхлэн өргөдөл, гомдлоо өгч болно. Монгол Улсын Ерөнхийлөгч Ерөнхий прокурорыг томилдог хүний хувьд хурдан арга хэмжээ авна. Шүүгч нарын хувьд Салхитын мөнгөний ордын жишээ шиг хугацаа их шаарддаг хэдий ч энэ хэргийн шүүх хурал удахгүй болно. Та бүхэн тэндээс Салхитын хонгил ямар хэмжээнд хүрснийг харж болно. Иргэн Г.Буяндоржийн өргөдлийг авч байна. Судлаад холбогдох байгууллагад нь шилжүүлнэ” гэлээ.

Польш улсад ажиллаж, амьдарч байгаа эмч нар, иргэд амны хаалт цуглуулан эх орондоо илгээсэн 400,000 амны хаалт өнөөдөр ирж байгаа аж. ЭМЯ-ны Нийгмийн эрүүл мэндийн газрын дарга Д.Нарангэрэл “Амны хаалт 400 000 ширхэг, эмнэлгийн ажилчдад зориулсан хувийн хамгаалах хувцас 100 ширхгийг илгээсэн нь 20 минутын өмнө Чингис хаан олон улсын нисэх буудалд ирсэн. Амны хаалтыг өрхийн эмнэлгүүдээр дамжуулан зорилтод бүлгийнхэнд хүргэнэ. Мөн мэргэжлийн хяналт, онцгой байдал, цагдаагийн байгууллагынханд Эрүүл мэндийн сайдын тушаалаар тараана. Бидний ажлыг олон төрийн болон төрийн бус байгууллагууд дэмжиж байгаад баярлаж байна” гэлээ.

Автомашины тань улсын дугаарын сүүлийн тоо 2 болон 7-гоор төгссөн бол та хоёрдугаар сард багтаан татвар төлөх ёстой. Хэрвээ танд банк явах зав зай хомс буй бол санаа зоволтгүй. Авто тээврийн хэрэгсэл эзэмшигч, тээврийн хэрэгслийн албан татвар, төлбөрийг төлж буй татвар төлөгч нь өөрийн харьяаллын дагуу татварын албаны дансанд төлөх эсвэл ухаалаг утасны SMARTCAR аппликейшн болон тээврийн хэрэгслийн нэгдсэн цахим үйлчилгээний www.smartcar.mn, www.e-tax.mta.mn цахим хуудсаар дамжуулан, цаг хугацаагаа хэмнэж, авто тээврийн хэрэгслийн албан татвар, агаарын бохирдол, зам ашигласны төлбөрийг аль ч банкны онлайн гүйлгээний эрхтэй төлбөрийн карт, QPay үйлчилгээгээр дамжуулан төлбөрөө төлөх бүрэн боломжтой. Мөн ГЭРЭГЭ киоск машинаар дурын банкны картаар төлөх боломжтой.

Иргэн та авто тээврийн болон өөрөө явагч хэрэгслийн албан татвар, агаар бохирдлын төлбөр, авто зам ашигласны төлбөрийг онлайнаар төлсөн бол төлбөрийн баримтаа хэвлэж, тээврийн хэрэгслийн гэрчилгээндээ хавсаргаарай. Эсвэл өөрт ойрхон татвар хураах дурын цэгт төлбөрийн баримтаа шалгуулж, тамга даруулан баталгаажуулах боломжтой юм.

Сүхбаатар аймгийн Баруун-Урт сумын тавдугаар багийн Дэнж хорооллын наймдугаар гудамжинд иргэн Э-ийн нам даралтын зуух дэлбэрсэн тухай дуудлага энэ сарын 2-ны өдөр бүртгэгджээ. Тухайн өдөр Онцгой байдлын газрын зургаан аврагч, хоёр автомашинтай 1.2 км замыг туулан 00:37 цагт очиход БНХАУ-д үйлдвэрлэгдсэн “JV-161542005” загварын нам даралтын зуух дэлбэрснээс 27 настай эрэгтэй Б нь толгой хэсгээрээ түлэгдсэн байдалтай байсныг ар гэрийнхнийх нь хамт эмнэлгийн байгууллагад хүргэжээ.

Түүнчлэн Өмнөговь аймгийн Ханхонгор сумын Хондот багийн Зээг гэдэг газар тус сумын харьяат малчин 37 настай эмэгтэй А нь нэгдүгээр сарын 31-ны өдрийн 17:00 цагийн орчимд малдаа суудлын авто машинтай яваад сураггүй болсон тухай дуудлага иржээ. Дуудлагын дагуу тус сумын 27 хүн, эрэн хайх ажиллагааг зохион байгуулж энэ сарын 1-ний өдрийн 09:30 цагт гэрээс нь баруун урд зүгт 40 км-т төөрсөн байхад нь эсэн мэнд олсон байна.

Амралтын өдрүүдэд зам тээврийн ослын улмаас долоон хүн гэмтэж бэртэж, орон нутагт нэг хүний амь нас хохирсон байна.

Ноцтой ослоос дурдвал, 2020.02.01-ний өдөр 23:05 цагийн орчимд Төв аймгийн Мөнгөнморьт сумын Жаргалант багийн нутаг “Хар ямаат” гэх газар шороон замд ЗИЛ-131 маркийн автомашин онхолдож, зорчигч 36 настай, эрэгтэй Б нас баржээ.

Түүнчлэн хоёр өдөрт согтуугаар тээврийн хэрэгсэл жолоодсон 26 жолоочийг илрүүлж хуулийн дагуу хариуцлага тооцсон байна.

Сургууль, цэцэрлэгийн үйл ажиллагааг 3 дугаар сарын 02-ны өдөр хүртэл түр хугацаанд зогсоож хөл хорио тогтоосон байгаа тул нийт эцэг, эхчүүд та бүхэн үр хүүхдээ гадуур гаргахгүй, замын хөдөлгөөнд оролцуулахгүй байхыг анхаарууллаа.