Month: February 2020

Улс, Нийслэлийн Онцгой комиссын шийдвэрээр коронавирусийн халдвараас сэргийлэх зорилгоор цахим тоглоом, интернэт кафены газрын үйл ажиллагааг түр хугацаагаар зогсоосон.

Манай орны ихэнх гол мөрөн нуур битүү мөсөн бүрхүүл тогтсон хэдий ч ихэнх нутгаар олон жилийн дунджаас 1.1-6.7 градусаар дулаан байсантай холбогдуулан өнгөрсөн оны мөн үетэй харьцуулахад 10-55 см-ээр нимгэн байна.

Мөн ойрын өдрүүдэд хүйтний эрч эрс суларч байгаатай холбоотой гол мөрний нийт уртын дагууд мөсний зузаан харилцан адилгүй байгаа юм. Иймд:

-Цаг хожих, зам товчлох зэргээр мөсөн дээгүүр явах, авто тээвэр хийхгүй байх,

-Бага насны хүүхдийг гол, мөрөн, нуурын мөсөн дээр тоглуулахгүй байх,

-Аж ахуйн нэгж, байгууллагууд амралт зугаалгын арга хэмжээ зохион байгуулахгүй байж болзошгүй эрсдэлээс урьдчилан сэргийлэхийг Онцгой байдлын ерөнхий газраас анхааруулж байна.

Зам, тээврийн хөгжлийн яамны байранд 2018 оны наймдугаар сард хүн амины хэрэг гарч, ЗТХЯ-ны Хяналт шинжилгээ, үнэлгээ, дотоод аудитын газрын дарга Т.Гомбосүрэн амь насаа алдсан хэрэгт Б.Махбалыг буруутган шалгаж байгаа билээ. Өнгөрөгч оны арванхоёрдугаар сарын 13-ны өдөр Сүхбаатар дүүргийн эрүүгийн хэргийн анхан шатны шүүхээс уг хэрэгт нэмэлт мөрдөн байцаалт хийлгэхээр прокурорт шилжүүлсэн юм.

Б.Махбалыг суллана гэдэг мэдээлэл нь худлаа бөгөөд цагдаагийн байгууллагаас уг хэрэгт нэмэлт мөрдөн байцаалт хийгээд дууссан байна. Улмаар өнөөдөр /2020.02.07/ дээрх хэргийг Нийслэлийн прокурорын газар шилжүүлжээ.

Монгол Улсын Их Хурлын дарга Г.Занданшатар Канад Улсаас Монгол Улсад суугаа Элчин сайд хатагтай Катрин Ивкофыг өнөөдөр хүлээн авч уулзав.

УИХ-ын дарга Г.Занданшатар уулзалтын эхэнд Монгол Улсад суух Элчин сайдаар томилогдсонд нь баяр хүргээд, “Манай хоёр орны хооронд найрсаг дотно харилцаа амжилттай хөгжиж байна. Канад бол Монгол Улсын гуравдагч хөрш, хөрөнгө оруулалтын томоохон түнш мөн” гэв.

Уулзалтын үеэр талууд Монгол, Канад нь ардчилал, хүний эрх, эрх чөлөөг дээдэлсэн адил үнэт зүйлстэй бөгөөд хамтын ажиллагааг зөвхөн уул уурхайгаар хязгаарлахгүй эдийн засаг, худалдаа, хөрөнгө оруулалт зэрэг бусад салбарт өргөжүүлэн хөгжүүлэх сонирхолтой буйгаа харилцан тэмдэглэсэн юм.

Элчин сайд К.Ивкоф хоёр улсын харилцаа, хамтын ажиллагааг цаашид бүхий л чиглэлээр хөгжүүлэх, ялангуяа Канадын хөгжлийн тусламжийн хөтөлбөрийн хүрээнд хэрэгжүүлж буй төсөл хөтөлбөрийг үргэлжлүүлэн хэрэгжүүлэхийн төлөө ажиллахаа нотлоод энэ удаагийн парламент Монгол Улсын Үндсэн хуулийн нэмэлт, өөрчлөлтийг амжилттай хийсэнд баяр хүргэв.

УИХ-ын дарга Г.Занданшатар, “Монгол Улсын Үндсэн хуульд оруулсан нэмэлт, өөрчлөлтөөр засаглал хоорондын хяналт-тэнцлийг хангах, төрийн бодлого урт хугацаанд тогтвортой байх эрх зүйн үндсийг тавьсан. Сүүлийн 10 гаруй жил яригдсан энэ өөрчлөлтийн төслийг хоёр жилийн турш олон нийт, судлаачдын дунд хэлэлцүүлж боловсруулаад парламент зургаан сар тасралтгүй хэлэлцэн баталсан. Тогтолцооны шинэчлэлийг хийж, байгалийн баялгийг ард иргэдийн мэдэлд байлгах, үндэсний баялагийн сан байгуулах шинэ зохицуулалтыг оруулсан” гээд Үндсэн хуулийн нэмэлт, өөрчлөлтийн үзэл баримтлалын талаар товч мэдээлэл өглөө.

Элчин сайд хатагтай Катрин Ивкоф Канад Улсын Засгийн газрын санхүүжилтээр НҮБ-ын Хөгжлийн хөтөлбөртэй хамтран хэрэгжүүлж буй “Монгол Улсад мэргэшсэн, иргэн төвтэй төрийн албыг төлөвшүүлэх нь” төслийн талаар мэдээлэл өгч, санал солилцов. Уг төслийг 2018-2021 онд хэрэгжүүлэх юм.

УИХ-аас Төрийн албаны тухай хуулийг шинэчлэн баталсан. Төрийн бодлого, үйл ажиллагааны залгамж чанар, төрийн албаны мэргэшсэн тогтвортой байдлыг хангах үр дүнтэй механизм бүрдүүлэх, төрийн албанд чадахуйн зарчмыг хэвшүүлж төрийн албан хаагчийн ажлын гүйцэтгэл, үр дүнг үнэлэх, ёс зүй, сахилга, хариуцлагын тогтолцоог бэхжүүлэх чиглэлээр шинэчлэлийн томоохон алхам хийхэд дээр төсөл чухал дэмжлэг үзүүлснийг УИХ-ын дарга Г.Занданшатар цохон тэмдэглээд Канадын Засгийн газрын оруулж буй хувь нэмрийг өндрөөр үнэлж байна гэв.

Түүнчлэн уулзалтын хүрээнд талууд цаг үеийн бусад асуудлаар ярилцаж, санал солилцлоо.

Өнгөрсөн шөнө цагдаагийн байгууллагад “Манай нөхөр согтуу ирчихээд намайг болон аавыг маань зодоод байна” гэсэн дуудлага, мэдээлэл иржээ. Мэдээллийн дагуу цагдаагийн бие бүрэлдэхүүн очиход иргэн Б согтууруулах ундаа хэтрүүлэн хэрэглэсэн үедээ хадам аав 53 настай М болон эхнэрээ зодож гэмтэл учруулсан байжээ.

Цагдаагийн байгууллагаас Б-г гэр бүлийн хүчирхийлэл үйлдсэн хэргээр шалгаж байна.

БНХАУ-руу хувийн хэргээр зорчих Монгол Улсын иргэдийг 2020 оны гуравдугаар сарын 2-ныг хүртэл хилээр нэвтрүүлэхгүй. Энэхүү хязгаарлалтад дараах тохиолдол хамаарахгүй:

-БНХАУ руу албан ажлын зайлшгүй шаардлагаар зорчих холбогдох албан тушаалтан, ажилтныг Монгол Улсын хилээр 1 удаа нэвтрүүлнэ.

БНХАУ руу албан ажлаар зайлшгүй зорчих шаардлагатай монгол иргэд Буянт-Ухаа, Замын-Үүд дэх хилийн боомтод хилийн шалганы ажилтанд өөрийн зорчих зорилгыг нотолсон урилга, албан бичиг зэргийг өөрийн хүсэлтийн хамт өгч хураалгана. Өөрийн эрүүл мэндийг хамгаалах, буцах нислэг, галт тэрэгний цуцлагдах эрсдлийг анхаарч, хариуцлагатай хандах шаардлагатай.

-БНХАУ-д байнгын оршин суудаг, ажил хөдөлмөр эрхэлдэг, суралцдаг, эмчилгээ хийлгэх зайлшгүй шаардлагаар явах, Монгол Улсын иргэдийг хилийн боомтын нэвтрэх хөдөлгөөнийг хэвийн болтол буюу 3 дугаар сарын 2-ныг хүртэл эргэж ирэхгүй тохиолдолд баталгаа гаргуулж тухай иргэнийг 1 удаа агаарын болон төмөр замаар улсын хил нэвтрүүлэх/гаргах болно.

БНХАУ-д байнга оршин суудаг, сурч, ажилладаг, эмчилгээ шаардлагатай иргэдийн хувьд мөн энэ тухай нотлох баримтыг сайтар бүрдүүлж, хилийн шалганы ажилтанд хураалгах бөгөөд 3/2-ныг хүртэл буцаж ирэхгүй тухай тусгай баталгаа гаргаж өгөх үүрэг хүлээнэ.

-Монгол Улсын иргэнтэй гэр бүл болсон гадаадын иргэн, тэдгээрийн дундаас төрсөн 0-18 насны хүүхдийг улсын хилээр 1 удаа нэвтрүүлнэ.

Хэрэв хятад иргэнтэй гэрлэсэн бол БНХАУ-ын Нийгмийг Аюулаас Хамгаалах Яамны харьяа Иргэний хэргийн газраас эхнэр, нөхөр мөн болохыг нотолсон баримт бичиг авах шаардлагатай.

Он гарсаар улсын хэмжээнд эхний нэг сарын байдлаар 385 удаагийн аюулт үзэгдэл, ослын тохиолдол бүртгэгдэн, үүний улмаас 14 хүн амиа алдаж, 123 толгой мал, амьтан хорогдож, 1.4 тэрбум төгрөгийн бодит хохирол учирсан байна гэж ОБЕГ мэдээллээ.

Аврах, хор уршгийг арилгахад Онцгой байдлын байгууллагын болон бусад байгууллага, орон нутгийн нийт 2616 хүн, 536 техник хэрэгсэлтэй ажиллаж, 213 хүний амь нас, төр, байгууллага, аж ахуйн нэгж, иргэдийн 7.0 тэрбум төгрөгийн өмч хөрөнгийг авран хамгаалжээ.

Харин гамшигтай тэмцэх, хор уршгийг арилгах ажилд онцгой байдлын байгууллага болон орон нутгаас 19.1 сая төгрөг зарцуулсан байна.

Өнгөрсөн оны мөн үетэй харьцуулахад гамшиг, аюулт үзэгдэл, ослоос аварсан хүний тоо 711, эд хөрөнгө 19.1 тэрбум төгрөгөөр тус тус өссөн үзүүлэлттэй байна.

Тээврийн хэрэгслийн 7 дуудлагад 41 хүн, 10 техник хэрэгсэлтэй ажиллаж, автомашин, техник хэрэгслийн эд ангид хавчуулагдсан 6 хүнийг аварч, 2 цогцсыг цагдаагийн байгууллагад шилжүүлэн өгчээ. Цогцос гаргах 9 дуудлагад нийт 50 хүн, 9 техник хэрэгсэлтэй ажиллаж цогцсыг ослын голомтоос гаргаж цагдаагийн байгууллагад шилжүүлэн өгсөн байна.

2020 оны нэгдүгээр сарын байдлаар аюулт үзэгдэл, ослын улмаас 14 хүн нас баржээ. Энэ нь өмнөх оны мөн үетэй харьцуулахад 2 /1.7 хувь/-аар өссөн байна. Нийт нас барсан 14 хүний 12 буюу 86 хувь нь эрэгтэй бөгөөд үүний 11 буюу 92 хувь нь обьектын гал түймэрт өртсөн байна. Нас баралтын 93 хувийг обьектын гал түймэр, 7 хувийг бичил уурхайн осол эзэлж байна. Энэ нь өнгөрсөн оны мөн үетэй харьцуулахад обьектын гал түймэрт өртөж нас барсан хүний тоо 63 хувь өсч бичил уурхайн осолд өртөж нас барсан хүн 4 дахин буурсан байна.