Month: February 2020

Иймд иргэд автомашинаа камерын хяналттай, зориулалтын авто зогсоолд байрлуулах, автомашиндаа дохиолол суулгуулах зэргээр өөрөөс шалтгаалах урьдчилан сэргийлэх арга хэмжээ авахыг цагдаагийн байгууллагаас зөвлөж байна.

Хөвсгөл аймагт шинэ корона вирусын сэжигтэй тохиолдол илэрч, тухайн иргэнийг Халдвартын эмнэлэгт тусгаарлаад байгаа билээ. Шинжилгээний хариу маргааш буюу хоёрдугаар сарын 12-ны өдөр гарна. Үүнтэй холбогдуулан Хөвсгөл аймгийн Онцгой комиссын 2020 оны дөрөвдүгээр хуралдаан өнөөдөр болж, дараах шийдвэрүүдийг гаргажээ.

1. Шинэ коронавирусын халдварын болзошгүй эрсдэлээс урьдчилан сэргийлэх, тандалт, эмнэлгийн тусламж үйлчилгээ, хариу арга хэмжээний бэлэн байдалд эрсдэлийн түргэвчилсэн үнэлгээ хийхэд Эрсдэлийн түвшин “Өндөр” үнэлэгдсэн тул идэвхжлийн горимд шилжин ажиллах

2. Аймаг сумдад Согтууруулах ундаа худалдах, түүгээр үйлчлэх тусгай зөвшөөрөлтэй үйлчилгээний газар, караоке, баар цэнгээний газруудын үйл ажиллагааг 2020 оны 02 дугаар сарын 11-ний өдрөөс 2020 оны 03 дугаар сарын 02-ыг хүртэлх хугацаанд түр зогсоох

3. Аймгийн төвд коронавирусийн сэжигтэй тохиолдол 1 бүртгэгдэж тусгаарлагдсан тул Мөрөн сумын хэмжээнд үйл ажиллагаа явуулж буй хүн ам олноор цуглардаг хүнс, барааны зах болон “Шинэ мөрөн” худалдаа үйлчилгээний төвүүдийн үйл ажиллагааг 2020 оны 02 дугаар сарын 11-нээс 2020 оны 02 дугаар сарын 13-ыг хүртэлх 2 хоногийн хугацаанд түр зогсоох энэ хугацаанд объектуудад ариутгал халдваргүйтгэл хийлгэх, хог хаягдлаа цэвэрлэх, ил задгай хаяхгүй байх, хориглосон газар, цэг болон нийтийн эзэмшлийн зам талбайд хүнсний бүтээгдэхүүнийг ил задгай худалдаалах, үзэсгэлэн худалдаа гаргах, үйлдвэрлэл үйлчилгээ эрхлэхгүй байх

4. Шинэ коронавирусын халдварын болзошгүй эрсдэлээс урьдчилан сэргийлэх чиглэлээр ажиллаж буй “Шуурхай штаб”-ыг 24 цагаар гаргаж, холбогдох албадын дарга гишүүдэд үүрэг чиглэл өгч, хэвлэл мэдээллийн хэрэгслээр үнэн зөв мэдээлэл өгч ажиллах, эрсдэлийн түвшин нэмэгдэх үед хүний нөөцтэй байх, шинэчилсэн төлөвлөгөө боловсруулж ажиллах, сэжигтэй тохиолдлын нэгдүгээр хавьтлыг илрүүлж, хүн тээвэрлэж байгаа жолооч нар болон Өмнөговь аймгийн Гашуун сухайт, Цагаан хаданд ажиллаж байгаа болон ажиллаж байгаад ирсэн жолооч нарын нарийвчилсан судалгааг гаргах, холбогдох айлуудын орчимд хяналтын пост ажиллуулах, Аймгийн Онцгой комиссын даргын 01 дүгээр албан даалгаврын хэрэгжилтийг эрчимжүүлэн ажиллахыг бүх байгууллагуудын дарга нарт тус тус үүрэг болголоо.

Нийтийн албан тушаалтнууд Авлигын эсрэг хуульд заасны дагуу жил бүрийн 2 дугаар сарын 15-ны дотор өөрийн болон гэр бүлийн гишүүдийн хөрөнгө, орлогын мэдүүлгийг үнэн зөв гаргаж бүртгүүлэх үүрэгтэй бөгөөд хуулийн хугацаа дуусахад 5 хоног үлдээд байна.

2020 оны 02 дугаар сарын 11-ний өдрийн 11 цагийн байдлаар 39587 мэдүүлэг гаргагч ХАСХОМ-ээ https://meduuleg.iaac.mn цахим хуудсаар шинэчлэн мэдүүлээд байна. Барилга, хот байгуулалтын яам, Эрчим хүчний яам, Үндсэн хуулийн цэц, Архивын ерөнхий газар, Харилцаа холбооны зохицуулах хороо, Нийгмийн даатгалын ерөнхий газар, Соёл урлагийн газар, Цагдаагийн ерөнхий газар, Онцгой байдлын ерөнхий газар, Архангай, Дундговь аймгийн ЗДТГ мэдүүлгээ 100 хувь авч дууссан дүн мэдээтэй байна. Улсын хэмжээнд явц байдал 94.5 хувьтай байна.

Авлигатай тэмцэх газарт мэдүүлгээ бүртгүүлэх үүрэгтэй төрийн өндөр болон бусад 290 гаруй албан тушаалтны 179 нь мэдүүлгээ гаргаж бүртгүүлсэн. Тэдгээрийн 39 нь УИХ, Засгийн газрын гишүүн, 10 нь Төрийн нарийн бичгийн дарга, 20 нь агентлагийн дарга, 35 нь Элчин сайд, консул, 75 нь бусад албан тушаалтан байна.

Авлигатай тэмцэх газраас хөрөнгө, орлогын мэдүүлэг, цахим системийн үйл ажиллагаатай холбоотой асуудлаар заавар зөвлөмж өгч ажлын өдрүүдэд уртасгасан цагаар болон 2020 оны 2 дугаар сарын 15-ныг хүртэлх амралтын бямба гаригт ажиллах тул хуулийн хугацаанд мэдүүлгээ бүртгүүлж, хуульд заасан үүргээ хэрэгжүүлэхийг тус газраас анхааруулж байна.

Цагдаагийн ерөнхий газрын Мөрдөн байцаах албанаас залилах гэмт хэргээс урьдчилан сэргийлэх, иргэдэд эрх зүйн мэдлэг, санхүүгийн боловсрол олгох зорилгоор “Ятгах тусам Нягтал” арга хэмжээг энэ оны 01 дүгээр сарын 02-ны өдрөөс мөн оны 02 дугаар сарын 02-ны өдөр хүртэл нэг сарын хугацаанд Монгол банк, Монголын банкуудын холбоотой хамтран амжилттай зохион байгууллаа.

Нэгдсэн арга хэмжээний хүрээнд дараах ажил, арга хэмжээг зохион байгуулсан юм. Үүнд:

Нэгдсэн арга хэмжээний төлөвлөгөө, үүрэг ажлын чиглэлийг Цагдаагийн ерөнхий газрын тэргүүн дэд даргаар батлуулж, алба, нутаг дэвсгэр хариуцсан цагдаагийн байгууллагад хүргүүлж, хэрэгжилтэнд 7 хоног тутам хяналт тавьсан.

Улаанбаатар хотын 4 чиглэлийн төв зам дагуу самбар, “JCDесаих” ХХК-ийн 28 автобусны буудал, “ССТS” ХХК-ийн зам дагуух 20 самбар нийт 52 самбарт мэдээлэл байршуулсан.

Хүн, автомашин олноор зорчдог газарт байрлах LED дэлгэц, Улаанбаатар хотод байрлах нийтийн орон сууцны цахилгаан шатны дэлгэц, цахилгаан бараа худалдаалдаг дэлгүүрүүдийн дэлгэц болон үйлчилгээний газруудын дэлгэцүүдээр видео байрлуулсан.

Залилах гэмт хэргийн үйлдлийн арга, түүнээс хэрхэн урьдчилан сэргийлэх арга замыг тодорхойлсон 16 видео контент шинээр бүтээж нийтийн цахим сүлжээ болон 24 телевизээр түгээсэн.

Уг гэмт хэргээс урьдчилан сэргийлэх 2 төрлийн зөвлөмжийг 6,775 ширхэг хэвлүүлж төв орон нутгийн цагдаагийн байгууллагад хүргүүлсэнийг олшруулан олон нийтийн газар, нийтийн тээврийн хэрэгсэл, түгээлт, такси үйлчилгээ үзүүлдэг автомашинд наах ажил явагдсан.

Иргэдийн өдөр тутамын өргөн хэрэглээний бараа бүтээгдэхүүний хаяг, шошгонд “Ятгах тусам Нягтал” залилагчид боломж бүү олго гэсэн үгийг хэвлэж, худалдаанд гаргасан.

Үүрэн холбооны оператор компанийн нийт 2,568,214 хэрэглэгч нарт “Ятгах тусам Нягтал” залилагчид боломж бүү олго гэсэн агуулгатай зорилтот мессеж хүргэсэн.

“Залилах гэмт хэрэг”, “Санхүүгийн луйвар” гэсэн 2 зорилтод нэвтрүүлгийг хийсэн юм.

Арга хэмжээний хугацаанд буюу энэ оны 01 дүгээр сард залилах гэмт хэрэг өнгөрсөн оны мөн үеэс 15,3 хувиар буюу 98 хэргээр буурсан. Үүнээс нийслэлд үйлдэгдсэн гэмт хэрэг 17,1 хувиар буюу 92 хэргээр, орон нутагт үйлдэгдсэн гэмт хэрэг 14 хувиар буюу 6 хэргээр тус тус буурсан байна.

Монголчууд бид сар шинийн баяраараа шинэ ондоо сайн сайхныг бэлгэшээж шинэхэн төмөр хүлэг авч, унахыг хүсдэг. Та ч мөн ирж буй “Хотол төгс” хэмээх хулгана жилдээ азтай, одтой, өнгөтэй байх эхлэлээ тавьж зээлээр шинэхэн машин авахаар шийдсэн бол Танд зориулан доорх зөвлөгөөг хүргэж байна.

Монголчууд автомашиныг шинэ эсвэл хуучин гэж ангилдаг. Шинэ машин гэдэг нь “0” гүйлттэй машиныг хэлдэг бол хуучин машин гэдэгт Монголд явж байгаагүй ихэнх машиныг хамруулдаг.

Нэн түрүүнд Та шийдвэр гаргахаасаа өмнө сонголтоо зөв хийх хэрэгтэй. Өөрийн хэрэгцээ шаардлагад ямар машин тохирохыг сайтар бодож сонголтоо оновчтой хийх нь чухал.

• Моторын багтаамж,
• Бензин зарцуулалт,
• Машины ерөнхий хэмжээ,
• Суудал болон хаалганы тоо

гэх мэтчилэн олон хүчин зүйлийг тооцон үзэх шаардлагатай. Мөн санхүүгийн боломжоо ч бас тооцох ёстойгоо мартаж болохгүй. Хот дотор гэр бүлийн хэрэгцээнд ашиглах автомашин шаардлагатай байгаа бол бензин бага зарцуулдаг, хөдөлгүүрийн багтаамж багатай, жижгэвтэр машин хамгийн тохиромжтой хэмээн зөвлөж байна. Эсрэгээрээ хөдөө орон нутаг руу ихээр явах шаардлагатай бол туулах чадвар өндөр, моторын багтаамж ихтэй, тэнхлэг өндөртэй машин авсан нь хамгийн оновчтой.

Хэрэв таны сонирхлыг татсан, эсвэл сонгосон машин байгаа бол зарж буй газруудаар явж, хаанаас авахаа шийдэх нь зүйтэй. Монголд автомашин зардаг хувь хүн болон албан байгууллагууд харьцангуй ихэссэн бөгөөд тус бүрнээ өөр өөр үнийн дүн, нөхцөлтэйгөөр худалдаалагдаж байдаг.

Үүний дараа Та банканд хандах нь зүйтэй бөгөөд зээлийн эдийн засагч, эсвэл зээлийн мэргэжилтэнтэй уулзах юм. Гэхдээ банкны зээлийн мэргэжилтэнтэй уулзахаасаа өмнө зээлийн хүү, урьдчилгаа төлбөр, бүрдүүлэх материал, зарласан хөнгөлөлт урамшуулал зэргийг нь урьдчилан мэдчихвэл цаг зав, мөнгө санхүүд тань ашигтай. Одоогийн байдлаар ХХБанк автомашины зээлд хамрагдсан бүх харилцагчийн даатгалын төлбөрийг өмнөөс тань төлөх урамшуулалт аян зарласан байгаа бөгөөд дэлгэрэнгүйг http://bit.ly/2UHRycH энэ хаягаар үзэхийг зөвлөж байна.

Дараа нь банкны зээлийн ажилтнаасаа ямар бичиг баримт бүрдүүлэх шаардлагатайг тайлбарлуулж авах эсвэл http://bit.ly/2SwIZ1J холбоосоор танилцсан ч болно. Бичиг баримтаа бүрдүүлээд банканд хандахад л Таны зээлийн хүсэлт түргэн шуурхай шийдвэрлэгдэн шинэхэн төмөр хүлгээ унахад бэлэн болно.

Хамгийн сүүлд нь хэлэхэд тээврийн хэрэгслийн өмчлөгч бүр хуулийн дагуу жолоочийн хариуцлагын албан журмын даатгалд заавал хамрагдах ёстой. Энэ нь зам, тээврийн ослын улмаас бусдын амь нас, эрүүл мэнд, эд хөрөнгөд учирсан хохирлыг таны өмнөөс төлөх цаашлаад хохирогчийн эрхийг хамгаалах зорилготой чухал хэрэгцээтэй үйлчилгээ юм. Харин ХХБанкнаас автомашины зээлд хамрагдсан бүх харилцагчийнхаа даатгалын төлбөрийг 2-р сарын 29-ийг дуустал өмнөөс тань төлөх урамшуулалт аяныг зарлаад байгаа юм билээ.

Нэгдүгээр сарын 30-ны өдөр Баянгол дүүргийн 16-р хорооны нутаг дэвсгэрт иргэн Д-г үл таних гурван хүн айлган сүрдүүлж, эд зүйлийг дээрэмдсэн хэрэг гарчээ.

Дээрх хэргийг 17 настай Б, 17 настай М, 16 настай Э нар нь бүлэглэн үйлдсэнийг энэ сарын 05-ны өдөр илрүүлэн, гэмт этгээдүүдийг саатуулан шалгаж байна. Шалгалтын явцад дээрх этгээдүүд нь энэ төрлийн долоон гэмт хэргийг үйлдсэн болох нь тогтоогдоод байна.

Иймд эцэг эхчүүд бага насны хүүхдүүдээ шөнө оройн цагаар ганц нэгээр нь явуулахгүй байх, харанхуй орц гудамжаар явахдаа сонор сэрэмжээ дээшлүүлэх зэргээр болзошгүй эрсдэлээс урьдчилан сэргийлэх шаардлагатай байгааг цагдаагийн байгууллагаас анхааруулж байна.

Он гарсаар улсын хэмжээнд эхний нэг сарын байдлаар 385 удаагийн аюулт үзэгдэл, ослын тохиолдол бүртгэгджээ.

Үүний улмаас 14 хүн амь насаа алдаж, 123 толгой мал, амьтан хорогдож, 1.4 тэрбум төгрөгийн бодит хохирол учирсан байна. Онцгой байдлын алба хаагчид 213 хүний амь нас, төр, байгууллага, аж ахуйн нэгж, иргэдийн долоон тэрбум төгрөгийн өмч хөрөнгийг авран хамгаалжээ.

2020 оны нэгдүгээр сарын байдлаар аюулт үзэгдэл, ослын улмаас 14 хүн нас барсан. Энэ нь өмнөх оны мөн үетэй харьцуулахад 2 /1.7 хувь/-аар өссөн байна. Нийт нас барсан 14 хүний 12 буюу 86 хувь нь эрэгтэй бөгөөд үүний 11 буюу 92 хувь нь объектын гал түймэрт өртсөн байна.

Нас баралтын 93 хувийг объектын гал түймэр, 7 хувийг бичил уурхайн осол эзэлж байна. Энэ нь өнгөрсөн оны мөн үетэй харьцуулахад объектын гал түймэрт өртөж нас барсан хүний тоо 63 хувь өсч бичил уурхайн осолд өртөж нас барсан хүн 4 дахин буурсан байна.

Эрүүл мэндийн яамнаас шинэ коронавирусийн халдварын нөхцөл байдал, урьдчилан сэргийлэхээр хэрэгжүүлж буй ажлуудын талаар мэдээлэл өглөө.

Шинэ коронавирусийн халдвараар 1017 хүн нас бараад байна. Халдвар авсан хүний тоо 43027-т хүрсэн бол 3998 хүн эдгэрчээ.

ЭМЯ-ны Нийгмийн эрүүл мэндийн газрын дарга Д.Нарангэрэл: Шинэ коронавирусийн халдвар нэмэгдсээр байна. Сүүлийн өдрүүдэд олон улсын эрдэмтэд судалгаа шинжилгээгээ эрчимжүүлж, шинэ дүгнэлт, мэдээллүүд гараад байгаа. Тухайлбал, халдвар авсан нэг хүн дунджаар 5-6 хүнд халдвар тараах магадлалтай гэж судалгааны материалд дурдсан.

Түүнчлэн өвчний нууц үе буюу 2-14 хоногт ямар нэгэн шинж тэмдэггүйгээр халдвар тараах магадлалтай гэж үзсэн.

Дэлхийн эрүүл мэндийн байгууллагын мэргэжилтэн О.Ариунтуяа: Өнөөдрийн байдлаар 43,099 тохиолдол бүртгэгдэж, 1,018 хүн нас барлаа. Нэгдүгээр сарын 6-наас хойш ЭМЯ, ОБЕГ, МХЕГ хамтран дөрвөн удаагийн эрсдлийн үнэлгээ хийж, эрсдлийг бууруулах ажлыг зохион байгуулж байна.

Энэ долоо хоногт эмнэлгийн халдвараас сэргийлэх үүднээс эмнэлгийн байгууллагуудад танхимын сургалт зохион байгуулж байгаа. Энэ долоо хоногт 3,000 оношлуур нэмж ирнэ.