Month: February 2020

Монгол Улсын Шадар сайд, Улсын онцгой комиссын дарга Ө.Энхтүвшин, Онцгой байдлын ерөнхий газрын тэргүүн дэд дарга, бригадын генерал Г.Ариунбуянгаар ахлуулсан “Шуурхай бүлэг” өнөөдөр Хөвсгөл аймагт ажиллаж байна.

Энэ үеэр аймгийн Онцгой комиссын өргөтгөсөн VII хуралдааныг зохион байгуулж, Хөвсгөл аймгийн Засаг дарга Л.Ганболд өвөлжилтийн нөхцөл байдал болон шинэ коронавирусийн халдвараас урьдчилан сэргийлэх талаар авч хэрэгжүүлж буй арга хэмжээний талаар мэдээлэл хийлээ.

Тус аймагт энэ жил 23 сум, нэг тосгоны 127 багт 9792 хот айлын 17648 малчин өрхийн 6040,4 мянган толгой мал өвөлжиж байна.

Архангай, Төв, Баянхонгор, Хэнтий аймгийн нутагт Галт, Жаргалант, Рашаант, Улаан-Уул, Чандмань-Өндөр, Цэцэрлэг, Шинэ-Идэр, Баянзүрх, Хатгал, Алаг-Эрдэнэ, Цагаан-Үүр, Төмөрбулаг зэрэг 12 сумын 227 өрхийн 743 малчин отроор өвөлжиж байгаагаас өндөр настан 36, хөгжлийн бэрхшээлтэй 35, жирэмсэн эх 7, хүүхэд 199 байна.

Аймгийн нийт нутгаар цасан бүрхүүл тогтож, эрт цас унасан нутгаар мөсдөж, өвөлжилт хүндрэх төлөвтэй байгааг Засаг дарга онцоллоо.

Харин шинэ коронавирусийн халдвараас урьдчилан сэргийлэх чиглэлээр салбар дундын мэдээлэл солилцох, хариу арга хэмжээг шуурхай зохион байгуулах эрсдэлийн түвшингээ тодорхойлон “Өндөржүүлсэн бэлэн байдлын идэвхжлийн горим”-д шилжин ажиллаж байна.

Засаг дарга Л.Ганболд, Монгол Улсын Засгийн газар, Сангийн яамнаас батлагдсан төсөвтөө багтаж өр авлага үүсгэхгүйгээр ажиллахыг чиглэл болгож байгаа хэдий ч цаг үеийн нөхцөл байдал, зайлшгүй санхүүжүүлэх шаардлагатай доорх зардлуудад төсөв хөрөнгө дутагдаж хүндрэл үүсч байгааг “Шуурхай бүлэг”-т танилцууллаа.

Тухайлбал,

– Шинэ коронавирусийн болзошгүй эрсдэлээс хүн амыг урьдчилан сэргийлэх, бэлтгэл бэлэн байдлыг хангах зорилгоор эрүүл мэндийн болон төрийн бусад байгууллагын албан хаагчдад нэн хэрэгцээтэй байгаа эм, эмнэлгийн хэрэгсэл, тоног төхөөрөмж, хувийн хамгаалах хэрэгсэл, ариутгал халдваргүйжүүлэлтийн бодис зэргийг авахад шаардлагатай байгаа 245,7 сая төгрөгийн хөрөнгийн эхс үүсвэрийг шийдэх,

– Жаргалант, Шинэ-Идэр, Галт, Төмөрбулаг, Цэцэрлэг, Тариалан, Их-Уул зэрэг сумдад цас ихээр орж дагтаршин мөстөж, хүйтний эрч тогтвортой хадгалагдаж, өвөлжилт хүндэрч байгаа тул аймгийн улсын нөөцийн салбарт он дамжин хадгалагдаж байгаа өвс, тэжээлийг хөнгөлөлттэй үнээр малчид, иргэдэд олгох,

– Бүрэнтогтох, Жаргалант сумдын Засаг даргын Тамгын газрын автомашинуудын ашиглалтын хугацаа дууссан, цас зудтай нөхцөлд төрийн үйлчилгээг иргэдэд түргэн шуурхай хүргэхэд шаардлага хангахгүй болсон тул шинэчлэх шаардлагатай байгааг уламжиллаа.

Шуурхай бүлгийн бүрэлдэхүүнд НҮБ-ын Монгол дах суурин төлөөлөгч Топан Мишра, Дэлхийн эрүүл мэндийн байгууллагын Монгол дахь суурин зохицуулагч Сергей Диордица нар ажиллаж, орон нутгийн өвөлжилтийн нөхцөл байдал, шинэкоронавирусийн халдвараас урьдчилан сэргийлэх чиглэлээр авч хэрэгжүүлж буй арга хэмжээтэй танилцаж байна.

Энэ үеэр Шадар сайд, Улсын онцгой комиссын дарга Ө.Энхтүвшин “Аймгийн засаг дарга сум, багийн Засаг дарга болон холбогдох албан тушаалтнуудад цаг үеийн асуудлаар тухай бүр үүрэг чиглэл өгч, хоорондоо уялдаа холбоотой нэгдсэн удирдлагаар хангаж ажиллах, аймаг, орон нутгийн хүн амд шинэ коронавирус болон шувууны томуугийн H5N1 халдвараас урьдчилан сэргийлэх, эрүүл ахуйн дэглэмийг баримтлах талаар зөвлөгөө, мэдээлэл өгөхөд онцгой анхаарах, ХӨСҮТ-өөс гаргасан стандартын дагуу аймаг, орон нутагтаа оёдлын цех, үйлдвэрүүдтэй хамтран ажиллаж, амны хаалт үйлдвэрлэх, халдвараас урьдчилан сэргийлэх, тэмцэх арга хэмжээнд шаардагдах санхүүжилтын асуудлыг тухай бүр шуурхай шийдвэрлэж Засаг даргын нөөц хөрөнгөөс гаргах зэрэг үүрэг, чиглэлийг аймаг, орон нутгийн удирдлагуудад өглөө.

Шуурхай бүлэг өнөөдөр Галт, Цагаан-Уул, Цэцэрлэг сумдад ажиллана гэж Онцгой байдлын ерөнхий газраас мэдээллээ.

Нийслэлийн Засаг дарга бөгөөд Улаанбаатар хотын Захирагч С.Амарсайхан өнөөдөр Бүгд Найрамдах Казахстан улсаас Монгол Улсад суугаа Онц бөгөөд Бүрэн эрхт Элчин сайд Жалгас Адилбаевтай уулзлаа. Уулзалтад Казахстан Улсын Элчин сайдын яамны элчин зөвлөх Айдар Абишев болон Улаанбаатар хотын ерөнхий менежер Т.Гантөмөр, нийслэлийн Газар зохион байгуулалтын албаны дарга А.Энхманлай, НЗДТГ-ын Гадаад харилцаа, хамтын ажиллагааны хэлтсийн дарга Д.Чинзориг, Улаанбаатар хотын ЗАА-ны Хотын тохижилт цэцэрлэгжүүлэлтийн хэлтсийн дарга М.Гансэлэм нар байлцав.

Элчин сайд Жалгас Адилбаев хүлээн авч уулзсанд нийслэлийн Засаг даргад талархал илэрхийлээд, хоёр улсын хамтын ажиллагааг өргөжүүлж ажиллахад бэлэн байгаагаа дуулгалаа. Тэрбээр “Өнгөрсөн онд Ерөнхий сайд У.Хүрэлсүхийг Казахстан улсад айлчлахад улс төрийн болон түүхэн ач холбогдолтой олон хэлэлцээрт гарын үсэг зурагдсан. Энэ бүхнийг ажил хэрэг болгож хэрэгжүүлэхэд бэлэн байна. Улаанбаатар хотод Нур-султан хотын нэрэмжит гудамж байгуулах ажлыг эрчимжүүлэх шаардлагатай байна. Мөн Улаанбаатар хоттой аялал жуулчлалын чиглэлээр хамтарч харилцан үр ашигтай ажиллах бодолтой байна” гэлээ.

Хотын Захирагч С.Амарсайхан хоёр хот ах дүүгийн харилцаа тогтоох хэлэлцээрт гарын үсэг зурсан явдал нь хамтын ажиллагаа, худалдаа эдийн засгийг шинэ түвшинд гаргаж чадна гэдэгт итгэлтэй байгаа хэмээгээд “Казахстан улстай 1992 онд дипломат харилцаа тогтоосноос хойш улс төр, худалдаа эдийн засаг, соёл боловсрол зэрэг олон салбарт харилцаа хамтын ажиллагаа өргөжсөөр ирсэн. Хотуудын хамтын ажиллагааг өргөжүүлэхэд аялал жуулчлалын салбарт түлхүү анхаарч байгааг дэмжиж байна. Казахстан улсын хот төлөвлөлт, бүтээн байгуулалт, ногоон байгууламж, иргэдийг орон сууцжуулах бодлого, түүний хэрэгжилт зэрэг олон асуудал бидний сонирхлыг татаж байгаа. Энэ асуудлаар харилцан туршлага солилцох саналтай байна” гэв.

Улаанбаатар хотын Ерөнхий менежер бөгөөд Захирагчийн ажлын албаны дарга Т.Гантөмөр өнгөрсөн оны арваннэгдүгээр сард Нур-султан хотод айлчилж Улаанбаатар хотод нэрэмжит гудамж байгуулах асуудлаар холбогдох албаныхантай уулзсан байна. Ирэх хавраас Улаанбаатар хотын Бага тойрууд Нур-султан хотын нэрэмжит гудамж байгуулах ажлыг эхлүүлэх гэж буй талаар хотын Захирагч хэллээ.

Талууд 2020 онд хэрэгжүүлэх төсөл хөтөлбөрүүдэд хэрхэн ажиллах талаар санал солилцоод аялал жуулчлалын чиглэлээр хоёр хот хамтарч ажиллахаар боллоо.

Улс орон даяар гамшгаас хамгаалах өндөржүүлсэн бэлэн байдлын зэрэгт хэсэгчлэн шилжүүлсэн энэ үед иргэд халдвараас сэргийлэхийн тулд иргэдийг амны хаалт тогтмол зүүхийг анхааруулсаар байна.

Говь-Алтай аймгийн Шарга сумын “Ээвийн гарам” гэдэг газар Улаанбаатараас Ховд аймгийн чиглэлд 16 тонн шатахуун тээвэрлэж явсан ачааны автомашин “Ээвийн гол”-ын мөсөнд цөмөрчээ. Энэ тухай дуудлагыг өчигдөр 09:20 цагт Онцгой байдлын газар хүлээн авч, дуудлагын дагуу аймгийн Онцгой байдлын газрын Эрэн хайх, аврах бүлгийн алба хаагчид болон ИНЕГ-ын харьяа “Алтай нисэх буудал”-ийн нийт 10 хүн 85 км замыг туулан очин гурван цаг 35 минут ажиллаж автомашиныг татаж гаргажээ. Цаг хожих, зам товчлох зэргээр мөсөн дээгүүр явах, авто тээвэр хийхгүй байх, бага насны хүүхдийг гол, мөрөн, нуурын мөсөн дээр тоглуулахгүй байж болзошгүй эрсдэлээс урьдчилан сэргийлэхийг анхааруулж байна.

Цагдаагийн байгууллагаас жил бүр зохион байгуулдаг “Сар шинэ” нэгдсэн арга хэмжээ улсын хэмжээнд үргэлжилж байгаа. Булган аймгийн Цагдаагийн газрын Замын цагдаагийн тасгаас улсын хэмжээнд зохион байгуулагдаж байгаа тус нэгдсэн арга хэмжээний хүрээнд, мөн “Мод тээвэрлэхийг журамлах тухай” Булган аймгийн Засаг даргын 2020 оны 01 дүгээр сарын 14-ний өдрийн А/04 дугаартай захирамжийн биелэлтийг хангаж гудамж, замд хяналт шалгалтыг эрчимжүүлэн ажиллаж байна.

Хяналт шалгалтаар хууль бусаар мод бэлтгэсэн долоон гэмт хэрэг илрүүлэн тээврийн хэрэгслүүдийг түр саатуулан, шалгалтын ажиллагааг явуулж байна.

-БНАСАУ-ЫН ХӨДӨЛМӨРИЙН НАМЫН ТӨВ ХОРООНЫ 7 ДАХЬ УДААГИЙН 5 ДУГААР БҮГД ХУРАЛДААНЫ ТУХАЙ ТОВЧ МЭДЭЭ-

Намын бүх гишүүд, ард иргэд, цэргийнхэний их хүлээлт, анхаарлын дор Солонгосын Хөдөлмөрийн Намын Төв Хорооны 7 дахь удаагийн 5 дугаар бүгд хуралдаан Жүчэ 108(2019) оны 12 дугаар сарын 28-наас 31-ний хооронд Намын төв хорооны төв байранд болж өнгөрлөө.

Солонгосын Хөдөлмөрийн Намын дарга, нөхөр Ким Жөн Ун намын төв хорооны Улс төрийн товчооны бүрэн эрхийн дагуу чуулганы нэгдсэн хуралдааныг удирдан явууллаа.

Солонгосын Хөдөлмөрийн Намын дарга, нөхөр Ким Жөн Ун өнөөгийн нөхцөл байдал, хувьсгалт хөгжлийн эрэлт хэрэгцээнд нийцүүлэн бүх хүнд хэцүү бэрхшээлийг шууд даван туулах тэмцлийг өрнүүлэх хувьсгалт чиг шугамыг дэвшүүлсэн байна.

Солонгосын Хөдөлмөрийн Намын даргын тавьсан илтгэлийн гол агууллагыг товчлон та бүхэнд хүргэж байна.

Солонгосын Хөдөлмөрийн Намын дарга Намын төв хорооны 7 дахь удаагийн 4 дүгээр бүгд хуралдаанд дэвшүүлж байсан шийдвэрүүдийг хэрэгжүүлэхийн төлөөх бэрхшээлт тэмцлийн явцанд өөрсдийн хүчинд тулгуурлан хөгжихийг гол хүчин зүйл болгосон бидний Жүчэгийн хүч нэг шатаар бэхжүүлэгдсэн гэж дүгнэж, өөрийн хүчинд тулгуурлах тугыг улам өндөрт намируулан социалист бүтээн байгуулалтын асар их сэргэлтийн үеийг нээх тухай намын урианы дагуу манай улс орон, ард түмэн тугамдсан бэрхшээлүүдийг шууд даван туулж, урагш давших эрч хүч, маш их нөөц чадавхыг харуулсан гэж цохон тэмдэглэв.

Сүүлийн хэдэн сарын турш бидний өмнө тулгамдаж байсан бэрхшээлүүд бусдын хувьд ганц өдөр ч тэсч чадахгүйгээр бууж өгөх байсан маш хүнд, ширүүн бэрхшээлүүд нь байсан боловч бид нэгэн биеэр бат нягтарч, тууштай тэмцэлдэж байгаа манай ард түмний давшилтыг зогсоож, саатуулж чадаагүй бөгөөд улс орны хүч, батлан хамгаалах чадавхыг бэхжүүлэхэд гарамгай их амжилтуудыг тасралтгүй олж, хуримтлуулж ирсэнийг цохон тэмдэглэв.

Өнөөдрийн үүссэн нөхцөл байдал, хандлагыг задлан шинжихэд АНУ-ын бодит үнэн санаархал бол яриа хэлэлцээ хийх нэрийдлээр дэнчин тавин хугацаа өнгөрүүлж, өөрсдийн улс төрийн болон дипломат эрх ашгийг олохын зэрэгцээ хориг арга хэмжээг үргэлжлүүлж, бидний хүчийг барагдуулан сулруулах зорилготой гэж цохон тэмдэглэв.

Тиймээс бид эх орныхоо аюулгүй байдал, нэр төр, ирээдүйн аюулгүй байдлыг ямар ч зүйлээр солихгүй байхаар хатуу шийдэхэд хүрсныг дурдав.

АНУ-ын зүгээс манай орны үндсэн эрх ашгийн эсрэг шаардлагыг тавьж, дээрэлхүү байр сууриа баримталснаар БНАСАУ-АНУ хоорондын сөргөлдөөнт байдал удаашрах төлөвтэй болж , сүүлийн үед АНУ яриа хэлэлцээ хийх талаар энд тэнд очиж дахин ярих болсон нь угаасаа Солонгосын эсрэг дайсагнагч бодлогоос цуцлах, харилцаагаа хэвийн болгох, асуудлыг шийдэх санаатайгаас бус өөрөө хүнд хэцүү байдалд орсон учраас бидний зүгээс оныг дуустал тогтоож байсан хугацааг асуудалгүй өнгөрүүлж, үхлийн цохилтоос мултрах цагаа хожих гэсэн оролдлого мөн, яриа хэлэлцээ хийе гэж байгаа мөртлөө манай Бүгд найрамдах улсыг боомилж, дарж устгах зорилгоор өдөөн хатгах шинжтэй улс төр, цэргийн, эдийн засгийн башир арга улам ил тодоор хэрэгжүүлж байгаа нь ичимгүй дээрэмчин АНУ-ын хоёрдмол байдал мөн гэж цохон тэмдэглэв.

Намын дарга хэлэхдээ, бид яасан ч Америкийг БНАСАУ-АНУ хоорондын яриа хэлэлцээг бузар зорилгоор ашиглахыг зөвшөөрөхгүй бөгөөд өнөөдөр хүртэл манай ард түмний амсаж ирсэн зовлон шаналал болон дарагдсан хөгжлийн хариу төлөөсийг бүрэн төлүүлэхийн тулд цочроолтой бодит үйлдэл рүү шилжих болно гэж зарлав. Түүнчлэн бидэнд эдийн засгийн бүтээн байгуулалтад таатай орчин юунаас ч илүү хэрэгтэй байгаа нь үнэн боловч яасан ч гоёмсог хувиралд нь найдаж, өнөө хүртэл амь нас мэт сахин хамгаалж ирсэн нэр төрөө худалдаж чадахгүй гэж тэмдэглэв.

“Олон зууны турш үргэлжилсэн Солонгос-АНУ хоорондын тэмцэл одоо өөрийн хүчинд тулгуурлан хөгжих зарчим ба хориг арга хэмжээний хоорондох сөргөлдөөн болж шахагдсан бөгөөд сөргөлдөөний зургийг тод харуулахад хүрсэн байна. Цөмийн асуудал биш байлаа ч АНУ манай улс руу ямар нэг зүйлийг шалтаг болгож өдөөн хатгах байсан буюу АНУ-ын явуулж буй цэрэг, улс төрийн аюул заналхийлэл хэзээ ч дуусахгүй гэдэг ньтодорхой байна. АНУ-тай урт хугацаагаар сөргөлдөх нь илэрхий болсон өнөөгийн нөхцөл байдал нь биднийг цаашид ч дайсагнач хүчнүүдийн хориг арга хэмжээн дор байнга амьдрах болсныг зөв ойлгох, бүх талаас дотоодын хүчээ улам бэхжүүлэх хэрэгтэйг юунаас ч илүү шаардаж байна.”

Дайсагнагч талуудтай хийх хатуу ширүүн сөргөлдөөн бол байнга өөрсдийн хүч чадлыг бэхжүүлэхын төлөө чармайхыг шаарддаг бөгөөд өөрийгөө хүчтэй болгох ажлыг түрүүлж хийж байж л хэргийг манлайлж ялалтад хүрэх болно.

Түүнчлэн өөрийн хүчийг бэхжүүлэхийн үүднээс авч үзэхэд төрийн удирдлага, эдийн засгийн үйл ажиллагаа гэх мэт бусад салбарт засч залруулах асуудлууд цөөнгүй байгааг дурдав.

Намын төв хорооны удирдах гишүүд болон бүх ажилчдыг энэ удаагийн бүгд хулалдааныг далимдуулан өөрсдийн салбар, нэгжүүдэд тулгарч буй бэрхшээлүүдийг өөрсдийн үйл ажиллагаанд илэрч буй дутагдал гачигдалтай харьцуулж, задлан шинжихийг шаардсан бөгөөд өнөөгийн нөхцөл байдалд социалист хүчирхэг улс орныг бүтээн байгуулах үйлсэд оруулах өөрсдийн салбар, нэгжүүдийн хувь нэмрийн тухай сайтар нягт нямбай тооцож үзээд гутрах, ганхахгүйгээр хүнд хэцүү ажлуудаа тууштай үүрч давшихэд бэлэн байх ёстой гэж дурьдав.

Түүнчлэн зовлон, тэмцэлгүйгээр агуу их ялалтад хүрэх боломжгүй бөгөөд хувьсгалын ялалт нь зайлшгүй боловч ямар ч саад тотгор, бэрхшээлгүйгээр биелэгдэх зүйл нь биш гэж дурьдав.

Солонгосын Хөдөлмөрийн Намын дарга өнөөгийн шууд даван туулах хөдөлгөөнд гол фронт болох салбар бол эдийн засгийн фронт бөгөөд улсын эдийн засгийн үндсэн суурийг дахин шинэчилж, үйлдвэрлэлийн бүх нөөц чадавхыг дайчлан эдийн засгийн хөгжил, ард түмний амьдралд хэрэгтэй эрэлт хэрэгцээг хангалттайгаар хангах нь өнөөдөр эдийн засгийн салбарт тулгарсан ойрын хугацааны даалгавар болгон дэвшүүлэв.

Бидний сүр жавхлант шууд даван туулах хөдөлгөөнийг улс төр ба дипломат арга, цэргийн хүчээр батлан дэмжих тухай онцоллоо.

Урьд өмнө хэзээ ч байгаагүй хэтэрхий хатуу сорилт, бэрхшээлийг шууд даван туулах хөдөлгөөныг заавал ялалтад хүргэхийн тулд хүчирхэг улс төр, дипломат, цэргийн хүчний баталгаа хэрэгтэйг дурьдаж, өнөөгийн нөхцөл байдлыг харгалзан дипломат салбарыг улам бэхжүүлэх арга барил, тактикийг дэвшүүлэв.

Солонгосын хойгт бий болсон ширүүн нөхцөл байдал, өнөөгийн олон улсын харилцааны нарийн төвөгтэй байдлыг гүнзгий задлан дүгнэсний дараа тэр үндэслэлд нь тулгуурлан манай улсын тусгаар тогтнол, аюулгүй байдлыг найдвартай сахин хамгаалахын төлөө довтлогч арга хэмжээнүүдийг авах тухай үндсэн үүргүүдийг дэвшүүлэв.

АНУ сүүлийн 70 жилийн туршид манай улсыг дайсан улс, “ад хөнөөлийн тэнхлэг”, “цөмийн цохилтын бай” болгон тодорхойлж, хамгийн харгис хэрцгий, хүнлэг бус хориг арга хэмжээ авч, байнга цөмийн зэвсгээр заналхийлж ирсэн бөгөөд Солонгосын эсрэг явуулж буй АНУ-ын дайсагнасан бодлогын улмаас өнөөдөр Солонгосын хойг дахь байдал улам аюултай, хүнд үе шатанд тулгарч байна гэж тэмдэглэв.

Түүнчлэн бид нарыг Солонгос-АНУ хооронд итгэлцэлийг бий болгохын тулд цөмийн туршилт, тив алгасах балластик пуужингийн туршилтыг зогсоож, цөмийн туршилтын талбайг татан буулгах арга хэмжээг түрүүлж авч байсан өнгөрсөн хоёр жилийн туршид АНУ хариу арга хэмжээ авах байтугай ерөнхийлөгч нь биечлэн амлаж байсан том, жижиг хамтарсан цэргийн сургуулилтыг олон арван удаа явуулж, сүүлийн үеийн дэвшилтэт байлдааны зэвсэглэлүүдийг Өмнөд Солонгос руу оруулж, биднийг цэргийн хүчээр сүрдүүлж, арваас илүү удаагийн ганцаарчилсан хориг арга хэмжээнүүдийг авах замаар манай улсын тогтолцоог шахан нураах явуулагад ямар ч өөрчлөлт байхгүй гэдгээ дэлхийн өмнө дахин нотолж харуулсан гэж дурьдав.

Ийм нөхцөлд хүлээн сахих түнш ч үгүй амлалтад зөвхөн бид ганцаараа уяатай байх ямар ч шалтгаан байхгүй болсон бөгөөд энэ нь дэлхийн цөмийн зэвсгийг цомхотгох, тархалтаас урьдчилан сэргийлэхийн төлөөх бидний хүчин чармайлтанд хүйтэн ус цацаж байгаа явдал гэж дурьдав.

Солонгосын Хөдөлмөрийн Намын дарга хэлэхдээ, өнөөгийн нөхцөл байдал нь бидний урьд өмнө нь мэдэгдсэн шиг дайсагнагч хүчнүүдийг манай бие даасан байдал, аюулгүй байдалд яасан ч халдахааргүй байхуйц бидний хүчээ шаардлагатай түвшинд бэхжүүлэн өөрийгөө хамгаалж явах зам нь хичнээн хэцүү боловч биднийг зогсоож болохгүй бас эргэлзэхгүйгээр явах зам гэдгийг нотлон харуулж байгааг дурьдаж, манай намын АНУ-д хандаж явуулах улс төрийн бодлогын байр сууриа тэмдэглэв.

Түүнчлэн хэн ч халдахааргүй ялагдашгүй цэргийн хүчийг эзэмших, үргэлжлүүлэн бэхжүүлэх нь манай намын тууштай батлан хамгаалах бүтээн байгуулалтын зорилт мөн гэж дурьдаж, аливаа ямар хүчин бидний эсрэг хүч хэрэглэхээр зүрхлэн зориглохооргүй болгох нь манай намын батлан хамгаалах бүтээн байгуулалтын гол үзэл бодол, хувиршгүй тулгуур санал мөн гэдгийг илэрхийлэв.

Стратегийн зэвсэг боловсруулах төслийг улам эрчимжүүлэх хэрэгтэйг тэмдэглээд, АНУ-ын дээрэлхүү үйлдлүүдээс болж бидний гадаад орчин эдийн засаг, батлан хамгаалах салбарыг зэрэг хөгжүүлэх замаар явдаг байсан үе, эдийн засгийн бүтээн байгуулалтад бүх хүчээ төвлөрүүлдэг өнөө үед ч огт өөрчлөгдсөн зүйл байхгүй, урьдын адил дайсагнасан явуулага, цөмийн заналхийлэл улам нэмэгдсээр байгаа бодит нөхцөлд бид зөвхөн нүдэнд харагдах эдийн засгийн амжилт, аз жаргалыг авч үзэн ирээдүйн аюулгүй байдлаа орхиж болохгүй гэж шийдэмгий ярьж, удахгүй дэлхий бөмбөрцөг нь БНАСАУ-ын эзэмших шинэ стратегийн зэвсэгтэй танилцах болно гэж дурьдав.

АНУ-ын жинхэнэ санаа илчлэгдсэн өнөө үед ч АНУ-ыг хориг арга хэмжээ цуцлахыг тэсч ядан хүлээж, ямар нэгэн найдлага тавьж, эргэлзэх шаардлага огт байхгүй бөгөөд АНУ-ыг Солонгосын эсрэг дайсагнасан бодлогыг эцсээ хүртэл явуулах тохиолдолд Солонгосын хойгийг цөмийн зэвсгээс ангижруулах явдал үүрд байхгүй болно, АНУ-ыг Солонгосын эсрэг дайсагнахгүй байх хүртэл, Солонгосын хойгт байнгын тогтвортой энхтайвны тогтолцоо бүрэлдэх хүртэл улсын аюулгүй байдлын төлөө зайлшгүй, нэн тэргүүний стратегийн зэвсэглэлийг эзэмших ажлыг үргэлжлүүлэн явуулах болно гэдгээ эрс шийдэмгийгээр тунхаглав.

АНУ-ын цөмийн заналхийлэлийг дарах, бидний урт хугацааны аюулгүй байдлыг хангахуйц хүчирхэг цөмийн тогтоон барих хүчний байнгын байлдааны байдлыг найдвартай хадгалж, бидний тогтоон барих хүчийг бэхжүүлэх цар хүрээ ба чанар нь цаашид АНУ-ын Солонгост хандах байр суурьнаас болж дээшлүүлэн зохицуулагдах болно гэж мэдэгдэв. Түүнчлэн манай улсад их гүрнүүдийн эзэмшдэг туйлын зэвсэглэлүүд бий болсон нь асар их амжилт боловч энэ явцад шинжлэх ухаан, технологийн авьяаслаг боловсон хүчин бэлтгэгдсэн нь илүү баярлалууштай бөгөөд энэ нь манай нам илүү их нандигладаг амжилт юм гэв.

Батлан хамгаалах шинжлэх ухааны эрдэм шинжилгээний ажил, цэргийн үйлдвэрлэлийн салбарт өөрийн хүч, Жүчэгийн зарчимыг баримталж, нэгэнт хүрсэн үе шаттай зорилтуудыг биелүүлэхийн төлөө илүү өндөр, илүү хурдан гэх уриан дор намын батлан хамгаалах бүтээн байгуулалтын чиг шугамыг төгс төгөлдөр биелүүлэх хэрэгтэйг онцоллоо.

Намаас дэвшүүлсэн стратегийн бодлогын дагуу улс орны тусгаар тогтнол, аюулгүй байдал, ард түмний аз жаргалтай ирээдүйг баттай хангахын төлөө батлан хамгаалах бүтээн байгуулалтад үргэлжлүүлэн бүх улсын хүчин чармайлт, анхаарал, харамгүй дэмжлэгийг үзүүлэх хэрэгтэйг дурьдаж, батлан хамгаалах үйлдвэрлэлийн салбарын ажилтнууд ба эрдэмтэд өнгөрсөн гурван жилийн туршид хүнд бэрхшээлтэй тэмцлийг явуулж цөмийн дайныг тогтоон барих хүчинг эзэмшсэн тухайн үеийн сүр хүч, үлгэр дууриалалтай нам ба хувьсгалд хандах хувиршгүй үнэнч сэтгэлийг хадгалж, улс орны батлан хамгаалах хүчийг бүх талаас бэхжүүлэхийн төлөө ариун үйлсэд шамдан зүтгэхийг цохон тэмдэглэв.

Солонгосын Хөдөлмөрийн Намын дарга манай ард түмэн түүхэнд урьд өмнө байгаагүй урт хугацааны хатуу ширүүн нөхцөл, байдлын дунд өөрийнхөө хүчээр амьдрах арга, дайсан ба бэрхшээлийг ялах арга, өөрийнхөө нэр төр, эрх ашигаа хамгаалах аргыг олж эзэмшсэн гэж дурьдаж, бүсээ чангалах боловч заавал өөрийн хүчээр цэцэглэн хүчирхэгжиж, өөрийн хүчээр цэцэглэн хөгжиж, улс орны алдар нэрийг сахин хамгаалж, империализмыг ялах болно гэдэг нь бидний хатуу хувьсгалт итгэл үнэмшил гэж мэдэгдэв.

Солонгосын Хөдөлмөрийн Намын даргыг ухуулга бүхий илтгэлээ дуусгахад бүх оролцогчид эх орон, ард түмэн, хувьсгалын төлөө асар өндөр хариуцлага, хэзээ ч мянтаршгүй хувьсгалт итгэл үнэмшил, ирээдүйг харах холч мэргэн ухаанаар манай нам ба ард түмний явах хувьсглын замналыг нэвтэрхий гэрэлтүүж өгсөн намын даргад туйлын дэмжлэг, зөвшөөрлийг илэрхийлж, гал халуунаар алга ташиж, нижгэр уухайлав.

Агуу Солонгосын Хөдөлмөрийн Намын чиг удирдлагын дор социалист хүчирхэг гүрнийг бүтээн байгуулах, шинэ ялалтыг урагшлуулах түүхэн шилжилтийн үед хуралдсан Солонгосын Хөдөлмөрийн Намын төв хорооны 7 дахь удаагийн 5 дугаар бүгд хуралдаан нь урьд өмнө хэзээ ч тохиолдоогүй хүнд хэцүү бэрхшээлийг шууд даван туулж, улсын тусгаар тогтнол болон дээд эрх ашгийг эцсээ хүртэл хамгаалах, өөрийн хүчээр хүчирхэгжих зарчимын тугийг өндрөөр мандуулан Жүче хувьсгалын үйлсийн ялалтын гэрэлт замыг нээх мөхөшгүй их хөтөлбөрийг дэвшүүлснээр манай намын түүх болон бие даасан хүчирхэг улс орныг бүтээн байгуулах үйлсийн түүхэнд онцгой ач хобогдолтой явдал болсон.

“БНАСАУ-ын соёл, эрдэм шинжилгээний төв”

Зарим аймагт өвөлжилт хүндэрсэнтэй холбогдуулан Булган, Хөвсгөл, Завхан, Увс аймгуудын нөхцөл байдалтай газар дээр нь танилцах, орон нутагт тулгамдсан асуудлыг шийдвэрлэх, цагийн байдалд үнэлэлт, дүгнэлт өгөх үүрэг бүхий Монгол Улсын Шадар сайд, Улсын онцгой комиссын дарга Ө.Энхтүвшин, Онцгой байдлын ерөнхий газрын тэргүүн дэд дарга, бригадын генерал Г.Ариунбуян нараар ахлуулсан Шуурхай бүлэг орон нутагт ажиллаж байна.

Шуурхай бүлгийн бүрэлдэхүүнд Монгол Улсын Шадар сайдын ахлах зөвлөх Л.Саянаа, НҮБ-ын Монгол дахь суурин төлөөлөгч Топан Мишра, Дэлхийн эрүүл мэндийн байгууллагын Монгол дахь суурин төлөөлөгч Сергей Диордица болон Эрүүл мэндийн яам, ХХААХҮЯ, ОБЕГ-ын холбогдох удирдах албан тушаалтнууд багтаж байгаа бөгөөд өнөөдөр Орхон, Булган аймагт ажиллалаа.

Орхон аймгийн хувьд мал бүхий 1100 орчим малчин өрхөд 135 мянган толгой мал өвөлжиж байна. Энэ жил 8000 тонн хадлан тэжээл бэлтгэсэн. 580 мянган толгой мал төллөх юм байна. Сумдын хэмжээнд цас ихтэй байгаагаас хаваржилт хүндрэх төлөвтэй, аймгаас бэлтгэсэн аюулгүйн нөөцийг хэрэглэж дууссан тул мал төллөх үеэр малчдад улсын нөөцөөс өвс олгох хүсэлтэй байгаагаа аймгийн Онцгой комиссын гишүүд Шадар сайдад уламжилж байлаа.

Булган аймгийн хувьд 2019-2020 онд 16 сум, 1 тосгон, 75 багийн 8,5 мянган малчин өрхөд 3,6 сая мал өвөлжиж хаваржиж байна.

Рашаант, Гурванбулаг, Дашинчилэн, Баяннуур, Бүрэгхангай, Хишиг-Өндөр, Могод сумдад Өвөрхангай, Архангай, Дундговь, Төв аймгийн буюу нийт 4 аймгийн 19 сумын 423 малчин өрхийн 340,9 мянган толгой мал отроор өвөлжиж байна.

Өвс тэжээлийн нөөц дуусч байгаа тул 500 тонн өвс, 100 тонн тэжээлийн дэмжлэг үзүүлэх, отроор ирсэн айлуудад эрүүл мэндийн болон малын хулгай зэрэг гэмт хэргийн дуудлага, үйлчилгээ үзүүлэхэд түлш, шатахууны зардал ихээр гарч байгаа тул 20 сая төгрөгийн санхүүгийн дэмжлэг үзүүлэх, Дулааны станцыг улсын төсвийн хөрөнгө оруулалтаар худалдан авч, орон нутгийн мэдэлд ажиллуулах, Сайхан сумын нутагт орших Илчит металл ХХК-ийн нүүрсний уурхайн үйл ажиллагааг сэргээж, тогтвортой ажиллах нөхцлийг бүрдүүлэхэд дэмжлэг үзүүлэх зэрэг санал, хүсэлтийг аймгийн удирдлагын зүгээс тавилаа.

Мөн коронавирусийн халдвараас урьдчилан сэргийлэх чиглэлээр аймаг, орон нутгаас авч хэрэгжүүлж буй арга хэмжээ, нөхцөл байдлын талаар мэдээллийг шуурхай бүлгийн бүрэлдэхүүнд танилцууллаа.

Шадар сайд, Улсын онцгой комиссын дарга Ө.Энхтүвшин, аймгийн Засаг дарга сум, багийн Засаг дарга болон холбогдох албан тушаалтнуудад цаг үеийн асуудлаар тухай бүр үүрэг чиглэл өгч, хоорондоо уялдаа холбоотой ажиллаж, нэгдсэн удирдлагаар хангаж ажиллах,

• Гамшгийн улмаас учирсан хохирлыг арилгах, хойшлуулшгүй сэргээн босгох үйл ажиллагаатай холбоотой зардлыг эхний ээлжинд Засаг даргын нөөц хөрөнгөөс зарцуулах, малчдад шаардлагатай өвс, тэжээлийг өөрсдийн дотоод нөөц бололцоогоо ашиглан худалдан авах ,
• Малчдад төрийн болон эрүүл мэндийн тусламж үйлчилгээг тухай бүр шуурхай хүргэх арга хэмжээг холбогдох мэргэжлийн байгууллагуудтай хамтран зохион байгуулах,
• Аймаг, орон нутгийн хүн амд шинэ коронавирус болон шувууны томуугийн H5N1 халдвараас урьдчилан сэргийлэх, эрүүл ахуйн дэглэмийг баримтлах талаар зөвлөгөө, мэдээлэл өгөхөд онцгой анхаарч ажиллах,
• Шинэ коронавирусийн халдвараас урьдчилан сэргийлэх талаар ухуулга, сурталчилгаа зохион байгуулах, томуу, томуу төст өвчний дэгдэлт их байгаатай холбогдуулан олон нийтэд хандсан зөвлөгөө, зөвлөмж, сэрэмжлүүлэх мэдээллийг орон нутгийн хэвлэл мэдээллийн хэрэгслээр тогтмол өгөх,
• ХӨСҮТ-өөс гаргасан стандартын дагуу аймаг, орон нутагтаа оёдлын цех, үйлдвэрүүдтэй хамтран ажиллаж, амны хаалт үйлдвэрлэх,

Халдвараас урьдчилан сэргийлэх, тэмцэх арга хэмжээнд шаардагдах санхүүжилтын асуудлыг тухай бүр шуурхай шийдвэрлэж Засаг даргын нөөц хөрөнгөөс гаргах зэрэг үүрэг, чиглэлийг аймаг, орон нутгийн удирдлагуудад өглөө гэж Онцгой байдлын ерөнхий газраас мэдээллээ.

НӨАТ-ын урамшууллын 2020 оны хоёрдугаар сарын сугалааны тохирлын нэвтрүүлэг энэ сарын 16-ны Ням гарагт 19:15 цагт Боловсрол телевизээр орон даяар шууд явагдана.

Энэ удаагийн сугалааны супер шагнал 30 сая төгрөг байна.