Month: February 2020

Categories
мэдээ улс-төр

Чай Вэньрүй: Эв санааны нэгдлээ илэрхийлж, гар сунган тусалж буй Монголын төр засаг, ард түмэнд чин сэтгэлийн талархал илэрхийлье

Монгол Улсын Их Хурлын дарга Г.Занданшатарт өнөөдөр Бүгд Найрамдах Хятад Ард Улсаас Монгол Улсад суугаа Элчин сайд Чай Вэньрүй бараалхав.

Итгэмжлэх жуух бичгээ Монгол Улсын Ерөнхийлөгчид барьсан Элчин сайдад Улсын Их Хурлын дарга Г.Занданшатар баяр хүргээд, Монголыг сайн мэддэг, Монголд олон жил ажилласан, хуучны танил хүрэлцэн ирсэнд таатай байгаагаа илэрхийллээ.

Ноён Элчин сайд, цаг гарган хүлээн авч уулзаж буй Улсын Их Хурлын даргад талархал илэрхийлээд Бүгд Найрамдах Хятад Ард Улсын Бүх Хятадын Ардын Төлөөлөгчдийн Их Хурлын Байнгын Хорооны дарга Ли Жаньшугийн мэндчилгээг уламжиллаа. Сүүлийн жилүүдэд БНХАУ Монгол Улсын сайн хөршийн харилцаа, хамтын ажиллагаа тасралтгүй, амжилттай хөгжиж ирснийг тэрбээр тэмдэглээд БНХАУ үүнд ихээхэн сэтгэл хангалуун байгааг дуулгав.

Бүгд Найрамдах Хятад Ард Улсын дарга Си Зиньпин 2013 онд Монгол Улсад айлчилснаар манай хоёр улс “Иж бүрэн стратегийн түншлэл”-ийн харилцаа тогтоосон. Ингэснээр манай хоёр улсын найрсаг харилцаа, хамтын ажиллагаа шинэ шатанд гарсан юм. БНХАУ Монгол Улстай “Иж бүрэн стратегийн түншлэл”-ийн харилцааг баяжуулах, гүнзгийрүүлэх бодлогыг тууштай баримталж байгааг ноён Элчин сайд хэлээд “Миний бие Элчин сайдаар ажиллах хугацаандаа төр засгийн энэхүү гадаад бодлогыг ёсчлон баримталж Монгол Улсын холбогдох байгууллагуудтай элэгсэг дотноор хамтран ажиллахад бэлэн байна” гэлээ. Мөн тэрбээр БНХАУ, Монгол Улсын хооронд дипломат харилцаа тогтоосны 70, “Найрсаг харилцаа, хамтын ажиллагааны гэрээ”-ний 25жилийн ойтохиож хоёр тал жилийн туршид олон арга хэмжээг утга төгөлдөр, амжилттай зохион байгуулсан нь хүмүүнлэгийн солилцоог бэхжүүлэх, иргэд хоорондын харилцан ойлголцлыг нэмэгдүүлэхэд тустай болсон гэж үзэж байгаагаа хэлсэн юм. Цаашид хоёр улсын харилцаа, хамтын ажиллагааг бүх чиглэлээр идэвхжүүлэхийн чухлыг тэмдэглээд, ялангуяа эдийн засгийн харилцан ашигтай, харилцан хүртээмжтэй хамтын ажиллагааг чухалчилж байгаагаа ноён Элчин сайд Чай Вэньрүй хэллээ. Энэ хүрээнд чөлөөт худалдааны хэлэлцээрийг хэрэгжүүлэх үйл ажиллагааг хамтран урагшлуулна гэдэгт итгэлтэй байна гэв.


Улсын Их Хурлын дарга Г.Занданшатар хэлэхдээ “Бүгд Найрамдах Хятад Ард Улсын Бүх Хятадын Ардын Төлөөлөгчдийн Их Хурлын Байнгын Хорооны дарга Ли Жаньшуд бидний мэндчилгээ, эв санааны нэгдлийг албан ёсоор уламжилж өгөхийг хүсч байна” гэв. Арваад жилийн өмнө миний бие Гадаад харилцааны сайдаар ажиллаж байх үед ноён Чай Вэньрүй Та БНХАУ-ын Элчин сайдын яаманд ажиллаж байсан. Тэр үед Монгол Улс, БНХАУ-ын хооронд “Стратегийн түншлэл”-ийн харилцаа тогтоох тунхаг бичгийг байгуулахад гар бие оролцож байсныг дурсахад таатай байна гэлээ.

Үргэлжлүүлэн Улсын Их Хурлын дарга Г.Занданшатар “Айл хүний амь нэг, саахалт хүний санаа нэг” гэж Монголын зүйр үг бий. Энэ цаг үед Монгол Улс, төр засаг, түүний дотор Улсын Их Хурал халдварт вирусээс иргэдээ болон дэлхий дахиныг хамгаалах, учирсан хор уршгийг богино хугацаанд даван туулахаар тэмцэж буй БНХАУ-ын ард иргэдтэй эв санааны нэгдэлтэй байна. Хүн төрөлхтний өмнө тулгарч буй энэхүү сорилт, бэрхшээлийг бид хамтдаа давж гарах болно. Тэр дундаа БНХАУ сорилт, бэрхшээлийг богино хугацаанд амжилттай давна гэдэгт итгэлтэй байна гэлээ. ДЭМБ-аас манай улсыг эрсдэл өндөртэй орны тоонд оруулж, бэлэн байдалд байхыг сануулсан. Тиймээс өчигдөр Засгийн газар хуралдаж Монгол Улс, БНХАУ-ын хоорондох бүх боомтуудаар ирэх иргэдийн хөдөлгөөнийг хязгаарлах шийдвэр гаргаад байна. Энэ талаар “Хилийн боомт, тэдгээрийн дэглэмийн тухай хэлэлцээр”-ийн дагуу Хятадын талд албан ёсоор мэдэгдэж байгаа болно. Өвчний тархалтаас урьдчилан сэргийлэх зорилгоор манай талаас авч хэрэгжүүлж буй арга хэмжээг зөвөөр ойлгоно гэдэгт итгэж байна гэв.


Элчин сайд хэлэхдээ “Бүгд Найрамдах Хятад Ард Улсын дарга Си Зиньпин биечлэн удирдаж, Засгийн газрын тэргүүн Ажлын хэсгийг ахалж корона вирусийн халдвар, тархалттай тэмцэж байна. Бид ард нийтийн амь нас, эрүүл мэндийг хамгаалах асуудлыг эн тэргүүнд тавьж, улсын хэмжээнд халдвараас урьдчилан сэргийлэх нэгдсэн тогтолцоо бүрдүүлэн, эрчимтэй ажиллаж байна. Халдварыг дотооддоо хязгаарлах, гадагшаа тархаахгүй байхад онцгой анхаарч, арга хэмжээ авч байгаа нь үр дүнтэй байна” гэлээ. Түүнчлэн уг асуудлаар олон улсын түвшинд нээлттэй, ил тод хамтран ажиллаж байгааг тэмдэглэн хэлэв. Мөн Монгол Улсад нэг ч тохиолдол илрээгүйд нэн баяртай байгаагаа ноён Элчин сайд Чай Вэньрүй илэрхийлсэн.

ДЭМБ-аас БНХАУ-ын Засгийн газар олон улсад жишиг болохуйц арга хэмжээ авч хэрэгжүүлж буйг өндрөөр үнэлснийг тэрбээр дуулгав. Түүнчлэн Монгол Улсын Засгийн газраас урьдчилан сэргийлэх чиглэлээр авч хэрэгжүүлсэн арга хэмжээг бүрнээ дэмжиж байгаагаа илэрхийлээд, цаашид шинжлэх ухааны үндэслэл, бодит байдалд нийцүүлэн хорио цээрийн дэглэмийг зөөлрүүлнэ гэдэгт найдаж байгаагаа хэлсэн юм. Мөн тэрбээр “Монгол Улсын зүгээс манай улс, ард түмэнтэй эв санааны нэгдэлтэй байгаагаа илэрхийлсэн явдалд бид туйлын их баярлаж, талархаж байна. Монголын ард түмэн гар сунган тусалж буйд Засгийн газар болон ард түмнийхээ нэрийн өмнөөс чин сэтгэлийн талархлаа илэрхийлье” гэлээ.

Ноцтой цаг үед нийгмийн эрүүл мэндийг хамгаалах үүднээс авч хэрэгжүүлсэн хорио цээрийн дэглэм нь эдийн засаг, ачаа тээвэр, бизнесийн хамтын ажиллагаанд брхшээл,саад учруулж буй хэдий ч хамтын ажиллагааны цар хүрээгээ хэрхэвч сааруулж болохгүй гэдгийг Элчин сайд Чай Вэньрүй тэмдэглэн хэлсэн.


Бодит эх сурвалжаас нөхцөл байдлын талаарх мэдээллийг тухай бүр хүлээн авч, нааштай үр дүн гарч байгаад баяртай байгаагаа Улсын Их Хурлын дарга Г.Занданшатар хэлсэн. Монгол Улс урьдчилан сэргийлэх шуурхай арга хэмжээ авч ажиллаж байгаа бөгөөд цаашид цаг үеийн бодит нөхцөл байдалд нийцсэн, зайлшгүй шаардлагатай арга хэмжээг Монгол Улсын төр засгаас хойшлуулалгүй авч хэрэгжүүлэх болно гэлээ.

Уулзалтын төгсгөлд Улсын Их Хурлын дарга хоёр орны харилцаа, хамтын ажиллагааг өргөжүүлэх, бэхжүүлэх чиглэлээрх Элчин сайдын санаачилгыг хууль тогтоох дээд байгуулага бүх талаар дэмжин ажиллахаа илэрхийлээд “Та амаргүй бэрхшээл тулгарсан, онцлогтой цаг үед Элчин сайдаар томилогдон ирлээ. Хүн төрөлхтний өмнө тулгараад буй энэхүү бэрхшээл, сорилтыг бид эв санааны нэгдэлтэйгээр даван туулж чадна гэдэгт итгэлтэй байна. Танд ажлын өндөр амжилт хүсье” гэв.

Categories
онцлох-нийтлэл туслах-ангилал

Л.Мөнхтүшиг: Уханиас оюутнуудаа авчрах асуудалд Гадаад харилцааны яам маш ухаалгаар ажилласан

– САЙДЫН ЗҮГЭЭС УХАНЬ ДАХЬ ОЮУТНУУДЫГ НИЙТЭД ИЛ ТОД БИШ, ЧИМЭЭГҮЙХЭН АВЧРАХЫГ ҮҮРЭГДЭЖ БАЙВ –


Гадаад харилцааны яамны Консулын газрын захирал Л.Мөнхтүшигтэй ярилцлаа.

-Коронавирусийн голомтоос иргэдээ эх оронд нь авчирсан улс орнуудын нэн тэргүүнд манайх орж байгаа юм билээ. Энэ ажлыг зохион байгуулах үйл явц анх хэрхэн эхэлсэн юм бэ?

-Коронавирус хүнээс хүнд халддаг болох нь нэгдүгээр сарын 2-ны үед тодорхой болсон. Иймд бид нэн даруй БНХАУ-д байгаа монголчууддаа мэдээлэл өгөх, илүү өндөржүүлсэн бэлтгэлтэй ажиллах чиглэлийг өгсөн. Засгийн газар нэгдүгээр сарын 26-ны өдөр ээлжит бус хуралдаан зарлаж, Гадаад харилцааны яаманд хоёр чухал чиглэл өгсөн. Нэгдүгээрт, Уханиас буюу коронавирусийн голомтоос монголчуудаа авчрах, хоёрдугаарт, хилийн хөдөлгөөнд хязгаарлалт хийх, энэ тухай гадны улсуудад дипломат шугамаар мэдэгдэж шийдвэрлэх үүрэг өгсөн юм. Гэхдээ энэ асуудлыг зөвхөн Засгийн газрын хуралдаан дээр ярьсан юм биш. Нэгдүгээр сарын 23-наас Уханьд хөл хорио тогтоож, гадагш хөдөлгөөн хориглосон юм. Үүнтэй холбоотойгоор манай Бээжин дэх Элчин сайдын яам тэнд байх бүх монгол оюутнуудыг бүртгэлжүүлж, нарийн тоог нь авч, эх орондоо буцах хүсэлтэй байгаа эсэхийг нь судалж, аюулгүй байдлаа хэрхэн хангаж байгаа, цаашид хэрхэн сэргийлэх талаар заавар зөвлөгөөг өгч ажиллаж байв. Засгийн газрын хуралдаанд оролцохоос өмнө бид Монголын авиа компаниудад хандаж Ухань руу нислэг үйлдэхэд гарах зардал, үүнтэй холбоотой бэлтгэл ажлуудын талаар анхан шатны мэдээллийг аваад эхэлсэн. Засгийн газрын хуралдаанд бэлтгэлтэй, мэдээлэлтэй оролцсон гэсэн үг .

-Засгийн газрын шийд гарсан даруйд иргэдээ авах асуудлаар БНХАУ-ын талтай холбогдсон уу?

-Тийм. Нэгдүгээр сарын 26-нд буюу ням гаригт шийдвэр албажсан даруйд бид Хятадын талд иргэдээ авах хүсэлтэй байгаагаа дипломат шугамынхаа нот бичгээр мэдэгдсэн. Тухайн үед нөхцөл байдал амаргүй, хөл хориотой холбоотойгоор Япон, Солонгосоос иргэдээ авах тухай ч яригдаж байв. Мөн Уханьд байх оюутнуудын ар гэрээс бидэнд маш их хүсэлт тавьж байсан. Бид нэгдүгээр сарын 27-нд иргэдээ авах хүсэлтийг тавьж, БНХАУ-ын Гадаад яамтай тасралтгүй ажилласан. Нарийн тоо нь гараагүй ч иргэдээ авах хүсэлт илгээсэн олон орон байсан л даа. “Олон орон хүсэлт илгээсэн байгаа. Хөл хориотой нөхцөл байдал үүссэн учир амаргүй байгаа шүү, ойлгоорой. Гэхдээ танай оюутнуудад туслахыг хичээх болно” гэдгийг Хятадын тал хэлж байлаа.

Ерөнхий сайдын зүгээс нислэгийг МИАТ компанийг хариуцахыг үүрэгдсэн юм. Бид энэ нэгдүгээр сарын 27-ноос эхлээд нислэгийн хэд хэдэн хувилбарыг гаргаж, Хятадын талд хүргүүлсэн. Зөвшөөрөл гарлаа л бол явах баг, бүрэлдэхүүнийг бэлэн байлгахад анхаарч байсан хэрэг.

-Нислэгийн бүрэлдэхүүнийг хэрхэн шилж сонгосон бол?

-МИАТ компани нислэгээ хариуцаж байгаа боловч тэрхүү хөл хорио тогтоосон газар дээр онгоцны багтай хамтраад оюутнуудыг онгоцонд суулгах үүссэн асуудлуудыг зохицуулах баг томилох шаардлагатай болсон. Иймд даваа гаригт Гадаад харилцааны яаманд шуурхай ажлын хэсэг байгуулагдаж явах багийн хүмүүсээ тодорхой болгосон. Яамнаас Консулийн газрын гуравдугаар нарийн бичгийн дарга Т.Бат-Орших хэмээх хятад хэлтэй залуугаар ахлуулсан гурван хүнтэй багийг томилсон. Дээрээс нь ЭМЯ, ХӨСҮТ-тэй холбогдон багийн бүрэлдэхүүнд хоёр эмчийг оролцуулж нисэх багаас гадна нийт таван хүнтэй тусгай баг бүрдүүлсэн. Бид бүх бэлтгэлийг бүрэн хангасан.

Онцолж хэлэхэд, Ухань хот маань өөрөө хөл хориотой байсан учраас оюутнуудыг онгоцны буудал руу яаж хүргэх, тэр хугацаанд өвчнөөс хэрхэн сэргийлэх гэх мэт олон амаргүй асуудлууд үүсч байсан. Энэ үед Бээжин дэх Элчин сайдын яам, Консулын хэлтэс, нийт баг бүрэлдэхүүн цаг наргүй ажилласан. Ухань дахь Хятадын Ардын засгийн ордны Гадаад харилцааны албаар дамжуулан тэнд байгаа автобусны түрээсийн компанитай холбогдож, зардал мөнгийг нь шийдэн хөлсөлсөн юм. Тэнд нийт 250 гаруй монгол оюутан суралцдагаас Хятадын Цагаан сарын амралт таарч 33 хүн л үлдсэн байв. Бид бүгдээс нь “Та эх орондоо буцах хүсэлтэй байна уу” гэдгийг бичгээр асууж, хүсэлтийг баталгаажуулсан юм.

-Гадаад харилцааны сайд БНХАУ-ын Гадаад харилцааны сайдад захидал илгээсэн. Захидалд юун тухай өгүүлсэн бэ?

-Тухайн үед Ерөнхийлөгч Х.Баттулга, Гадаад харилцааны сайд Д.Цогтбаатар нар Норвеги улсад ажлын айлчлалтай, эзгүй байсан. Гэсэн ч яамнаас хүсэлт тавьчихсан байсны дагуу Д.Цогтбаатар сайд БНХАУ-ын Гадаад харилцааны сайд Ван И-д захидал илгээсэн. “Энэ хэцүү үед Хятадын ард түмэн, Хятадын Засгийн газрын зүгээс гаргаж байгаа хүчин чармайлтыг үнэхээр ойлгож, хүндэтгэж байна. Хятадын ард түмэн энэ хүнд өвчнийг ялан дийлнэ гэдэгт итгэлтэй байна. Манай иргэдийн ар гэрийнх нь хүсэлтийг хүндэтгээд бидний иргэдээ авахыг хүсэлтийг шуурхай шийдвэрлэж өгнө үү” гэдгийг захидалдаа дурдсан. Магадгүй энэ захидал тун чухал үүрэг гүйцэтгэсэн болов уу. Бид энэ бүгдийг олон нийтэд мэдээлээгүй. Учир нь дипломат алба гэдэг төрийн тусгай алба. Бидний хийж буй ажлаас ярих боломжтой нь байдаг ч огт ярьж болохгүй зүйлс ч олон бий. Тэр утгаараа бид Засгийн газраас өгсөн үүргийг биелүүлж, өндөржүүлсэн бэлтгэлтэй ажилласан.

-Хятадын талаас хэдийд иргэдээ авах боломжтой болсон гэдгийг хэлсэн юм бэ?

-Нэгдүгээр сарын 31-ны өдөр буюу баасан гаригт Хятадын Гадаад харилцааны яамнаас холбогдож “Та бүхэн маргааш нислэг хийх боломжтой юу” гэж асуусан. Бид тэр даруй бэлтгэл хангаж байтал “Боломжтой бол өнөө шөнөдөө ирээд иргэдээ авч болно” гэсэн. Бидэнд нэгэнт ийм хугацаа өгсөн учир явах багийн бүрэлдэхүүнийг бэлэн болгож, тэр шөнөдөө ниссэн. Энд зөвхөн Ухань явах нислэг, тусгай багтай холбоотой зохицуулалтуудыг ярьж байна. Онц, ноцтой гоц халдварт өвчний голомтоос иргэдийг авчирч байгаа гэдэг утгаараа үүнд төрийн бүхий л байгууллагууд оролцсон.

-БНХАУ бол бидний мөнхийн хөрш. Энэ хүнд үед найрсаг харилцаандаа сэв суулгахгүйгээр иргэдээ авч чадсан нь Монголын дипломат бодлогын эв дүй, чадавхыг харуулсан үйл явдал боллоо гэж харж байна. Тухайн үед Хятадын талаас “Бид чадна. Та бүхэн бидэнд итгэ” гэж байсан гэдэг нь үнэн үү?

-Хятадын Гадаад яамнаас Бээжинд суугаа гадны бүхий л Элчин сайдын яамны төлөөллийг урьж, хуралдсан. Хятадын Засгийн газрын зүгээс коронавирусийн тархалтын эсрэг ямар арга хэмжээ авч байгаа талаар дэлгэрэнгүй танилцуулж, иргэдээ голомтоос авъя гэсэн орнуудад хандаж “Тэвчээртэй байгаарай. Бидэнд итгэж болно. Хэрвээ үнэхээр иргэдээ авна гэвэл бид боломжоороо тусална” гэдгээ илэрхийлж байв. Гэхдээ бид цаашид нөхцөл байдал яаж ч эргэхийг мэдэхгүй байсан учир ар гэрийнх нь хүсэлтийн дагуу оюутнуудыг авчрах үйл ажиллагааг амжилттай хэрэгжүүлсэн.

Таны хэлсэнчлэн бид мөнхийн хөрш, 4700 гаруй км-ийн хуурай замын хилтэй. БНХАУ нийтдээ 14 улстай хиллэдэг. Тэр дотроос манай улсын хил хамгийн урт нь. Тэгэхээр бид иж бүрэн стратегийн түвшинд харилцдаг хөрш улстайгаа аль болох ойлголцож, зовох цаг нь тусалж, дэмжиж хандах нь маш чухал. Үүн дээр Гадаад харилцааны яам маш ухаалгаар, бүхий л нөхцөл, хүчин зүйлийг олон талаас нь харж, олон нийтийн айсан, эмээсэн сэтгэл зүйг давж ажилласан.

-Уханиас оюутнуудыг авчрах үйл явц нийгэмд ил тод өрнөсөн. Гэхдээ энэ асуудлыг нууцлах ёстой байсан гэх юм. Энэ хэр бодитой мэдээлэл вэ. Нууцлах ёстой шаардлага нь юу байв?

-Гадаад харилцааны сайдын зүгээс Ухань хотоос оюутнуудаа авч ирэх үйл ажиллагааг аль болох олон нийтэд ил тод биш, чимээгүйхэн хэрэгжүүлэхийг үүрэгдэж, анхааруулж байсан. Учир нь энэ нь дэлхий нийтийг хамарсан онц ноцтой нөхцөл байдал. Оюутнууд маань ч суралцдаг газраа улсаараа түрий барьж, сүр дуулиан болж, Хятадын талдаа, бусад орны оюутнуудын сэтгэл зүйд сөргөөр нөлөөлөх вий гэдэг талаас нь бодсон. Тиймдээ ч энэ үйл ажиллагааг аль болох олон нийтэд мэдээлэхгүйгээр, чимээгүйхэн хийх үүргийг сайд өгсөн. Тухайн үед манай яамны зүгээс тодорхой процессийн талаар л хэвлэлийн мэдээ гаргаж байв.

-Дээр дурдсан оюутнуудыг түрээсийн автобусаар онгоцны буудал дээр авчирсан уу?

-Түрээсийн автобус хөлсөлж зургаан их, дээд сургуульд тархсан байсан оюутнуудыг хуваарь гаргаж, зохион байгуулалттайгаар онгоцны буудалд авч ирсэн. Эндээс онгоц нисэхэд л тэнд эхний оюутнуудыг авч эхэлсэн юм. Бүх оюутнууд онгоцны буудалд ирснээс авахуулаад хилээр гарсны дараа хүртэл эрүүл мэндийг үзлэгт орсон. Оюутнуудыг авчрах тухай ярихад иргэд дургүйлхэж байсан. Угтаа оюутнууд сургууль дээрээ өдөр бүр үзлэгт хамрагдаж байсан. Оюутнуудыг авчрах тухай аль болох олон нийтэд мэдээлэхгүй байх зорилгын цаана эдгээр 33 иргэдийн аюулгүй байдлыг хангах асуудал байсан юм. Тэдгээр оюутнуудын нэр, ус, хувийн мэдээллийг задалбал янз бүрийн нөхцөл байдал үүсч болзошгүй гэж үзсэн хэрэг. Учир нь тэднийг авчрахын өмнөхөн Хятадын хил нээгдэхэд орж ирсэн монголчуудыг Чойр хотод авчрахад янз бүрийн асуудал үүссэн тохиолдол гарсан талаар Цагдаагийн байгууллагаас мэдээлсэн юм. Анзаарсан бол 33 иргэнийг авчрахдаа аль болох царайг нь тод харуулахгүйг хичээж, аюулгүй байдлыг хангах үүднээс хувийн мэдээллүүдийг нь нууцалсан.

Энэ үйл явдал нь манай улсын гадны оронд онц ноцтой нөхцөл байдал үүссэн үед өөрийн иргэдээ эх орондоо нүүлгэн шилжүүлсэн анхны тохиолдол. Тэр утгаараа энэ нь бидэнд туршлага, гарын авлага болж үлдэнэ гэж бодож байна.

-ОХУ манайхаас долоо хоногийн дараа иргэдээ авсан юм билээ. Тэд хэрхэн иргэдээ авчирсан талаар асууж лавласан зүйл бий юү?

-Манай улсаас өмнө Япон, Австрали, АНУ гэх мэт улсууд иргэдээ авсан. Энэ бол уралдаан биш ч манай улс иргэдээ авсан эхний 10 улсын тоонд орсон. МИАТ-ийн онгоц Ухань хотын онгоцны буудал дээр буухад олон улсын онгоц цөөнгүй буучихсан, иргэдээ авахаар ирсэн байв. Энгийн бус хөл хориотой үе, дээрээс нь олон орны иргэд байсан учир бүртгэл хийгдэхэд багагүй хугацаа орж, Улаанбаатарт буух төлөвлөсөн цагаасаа дөрвөн цагаар хоцорч ирсэн. Бид онгоц газардсанаас нисэх хүртэл бүхий л хугацаан дахь мэдээллийг авч байлаа. Иргэдээ гадны иргэдээс аль болох тусдаа байлгаж, болзошгүй эрсдэлээс хамгаалж ажилласан. Арай ахмад оюутнаараа ахлуулж, үүрэгжүүлж, бүх мэдээллийг өгч, зохион байгуулалттай ажилласан юм. Ний нуугүй хэлэхэд, манайхыг иргэдээ авчирсны дараа зарим орноос манай Бээжин дэх Элчин сайдын яаманд хандаж, “Та бүхэн энэ ажлыг яаж хурдан шуурхай зохион байгуулж чадав” гэх зэргээр туршлага судалсан зүйл бий.

-Хятадын хил нээгдсэнээс хойш манай улсын хичнээн иргэд эх орондоо ирсэн бэ?

-Нэгдүгээр сарын 28-нд Хятадын Цагаан сар дуусч, хил нээсний дараагаас өнөөдрийг хүртэлх хугацаанд зөвхөн хуурай замаар буюу Хятадтай хиллэдэг боомтуудаар 6000 монгол иргэн орж ирсэн. Үүнээс 3900 орчим иргэнийг Эрээн дэх Консулын газар, Хөх хот дахь консулын газар маань ХХЕГ, Онцгой комисс, салбар комиссуудтай хамтран газар дээр нь шийдвэрлэж, эх орондоо буцахад нь дэмжлэг үзүүлж ажилласан. Мөн энэ үеэр Консулын газруудад Хятадад олон жил хууль бусаар амьдарсан, хөдөлмөрлөсөн, визний хугацаа хэтрүүлсэн маш олон тооны иргэд хандсан юм. Бид онцгой нөхцөл байдлыг харгалзаад эдгээр иргэдийн асуудлыг нааштайгаар шийдвэрлэх хүсэлтийг Хятадын талд тавьж ажилласан. Энэ хүрээнд 50 гаруй иргэнийг 520 мянга гаруй юанийн торгуулиас чөлөөлүүлж чадсан. Үүнийг монгол төгрөгөөр илэрхийлбэл 200 гаруй сая төгрөг шүү дээ. Энэ хэмжээний төлбөр хураамжийг чөлөөлүүлж чадсанаар иргэдийн нуруун дээрх ачааг хөнгөлсөн гэж бодож байна. Бид энэ бүхэнд Хятадын талд талархал илэрхийлсэн.

-Бүжинлхам гэх охиныг Уханиас БНСУ-руу зугтсан гэх мэдээлэл гарсан. Энэ үнэн үү?

-Олон нийтийн сүлжээгээр л тарж буй үндэслэлгүй, ташаа мэдээлэл шүү. Энэ талаар Сөүл дэх Элчин сайдын яамнаас ч тодруулга авсан. Эрээнээр вирусийн халдвартай 37 иргэн гарсан байна гэх ташаа мэдээлэл ч гарсан. Бид өөрсдөө энэ тал дээр их болгоомжтой хандах ёстой. Коронавирус туссан цөөнгүй иргэд Эрээнээс орж ирэх нь гэх худал мэдээлэл ч гарсан. Эрээнд коронавирусийн нэг л тохиолдол гарсан. Тэрээр Бээжингээс Москвагийн чиглэлд Монгол Улсаар дамжин өнгөрөхөөр төлөвлөж байсан хятад иргэн юм. Түүнийг Эрээнээс Замын-Үүд рүү гарахаас нь өмнө Хятадын тал илрүүлж тусгаарласан. Тэрээр 14 хоног эмнэлэгт хэвтэж эмчлүүлээд бүрэн эдгэрээд гарсан. Хятадын тал энэ халдварыг гадны улс оронд тараахгүй байх үүргийг ДЭМБ-ын өмнө хүлээсэн. Энэ үүргээ маш сайн хэрэгжүүлсэн онцгой чухал жишээ нь энэ юм. Гэтэл манайхан олон нийтийн хэрэгслээр ташаа мэдээлэл түгээж, эргээд хоёр улсын найрсаг харилцаанд сөргөөр нөлөөлж болзошгүй нөхцөл байдал үүсгэж байна. Ор үндэслэлгүй мэдээллийг тарааж, ард иргэдийг Хятадын эсрэг турхирч байгаа нь өөрөө хортой үр дагавартай гэдгийг ойлгох хэрэгтэй. Манайх руу хятад иргэд ихээр орж ирж байна гэдэг ч худал мэдээлэл. Энэ хугацаанд хятад иргэд манай хилээр орсон нь гарснаасаа бага байна.

Categories
мэдээ нийгэм

Д.Чойжамц: Энэ жил хөгшчүүдэд гайгүй зурагдсан бөгөөд залууст хатуу, нялхаст анхаарууштай

Монголын бурхан шашинтны төв Гандантэгчэнлин хийдээс цаг үеийн асуудлаар сүсэгтэн олон, ард иргэдэд хандсан мэдээлэл хийж байна.

МБШТ Гандантэгчэнлин хийдийн тэргүүн их хамба лам, гавж Д.Чойжамц “XVII дугаар жарны Төмөр хулгана жил гарч байна.

Сар шинэ бол цаг хугацааны үргэлжлэл юм. Урьд нь ямар жамаар, ямар амжилт гаргаж явсны үргэлжлэл юм. Жаргалтай, сайхан амьдралын суурь шалтгаанаа тавьж чадсан бол олон жил дажгүй байна гэж бодох хэрэгтэй. Шашин номын талаас сүсэг бишрэлтэй хүмүүс олон бий. Иймд үүнийг тооцож, харгалзаж үзэх ёстой билээ.

Энэ ёсоор манайхан зурхайг хэрэглэж, он тооллоо тооцоолж, өдөр гаригаа тодорхойлдог уламжлал ч байдаг. Цагаан сарын баяраар хуучин жилийнхээ хамгийн сүүлчийн өдрийг буюу битүүний өдрийг сайхан тэмдэглэж, идээ будаагаа засаж, урьд хань нөхөд, найз нөхдөө урьж ёсолдог. Энэ өдөр бол 365 хоногийн хамгийн сүүлийн өдөр учраас бид өнгөрсөнд ямар байснаа дүгнэдэг цаг.

Мөн амьд сэрүүн байснаа тэмдэглэж, шинэ жилдээ цэвэр оръё гэсэн утгатай. Жилийн эхний өдрийг элбэг дэлбэг хангалуун тэмдэглэх нь тэр жилдээ энэ байдлаа алдахгүй байх санааг агуулдаг. Монголчуудын олон оны турш шүтэж ирсэн энэ шашин бол бие биенээ хайрладаг энэрдэг, нигүүсэлдэг, харьцаа сайхан байх жаргалтай амьдралын эх үүсвэр мөн.

Энэ жил хөгшчүүдэд гайгүй зурагдсан бөгөөд залууст хатуу, нялхаст анхаарууштай. Энэ жил дээдсүүдэд ширүүн, жилийн дунд талд бүр ширүүн тиймээс ажилж хөдөлмөрлөж байгаа хүмүүс зөв сайхан ажил хийхгүй бол энэ жил хэцүү байх зурлага харагдаж байна.

Жилийн дунд үед урьд жилээр бороо хур бага байна. Гэхдээ тариа ногооноо бүтэн авч чадна. Зурхайгаар магадлаад өөрийгөө зөв авч чадвал бие хэл сэтгэл гурваа зөв авч яваа хүнд энэ мэдэгдэхгүй.

Монголын ард түмний мянган жил тэмдэглэсэн уламжлалт баярыг Засгийн газар цуцална гэвэл хүмүүст эвгүй байж магадгүй. Эвтэйхэн үгээр хэлэх хэрэгтэй.

Ийм цаг үе ирж ханиад томуу гарна гэж хэлсэн ихэс дээдэс, хувилгаан хутагт, далдын мэдлэгтнүүдийн номууд дотор заалттай байгаа номуудыг унших, үрэл, утлагыг хийж ард түмэнд зүүлгэх нь бидний ажил. Бид ийм ажил хийдэг. Бид зааврын дагуу хөдөлж байгаа. Бидэнтэй ижил шашинтай улсуудад ямар арга хэмжээ авч байгааг судалж байна. Юу ч гэсэн бид сүсэгтэй улс учраас үрэл утлагуудыг хийж тараах, гандан хийдэд ирж буй хүмүүст арцаар уугиулах ажлуудыг хийнэ. Энэ бол шашны ажил, хэнээр ч заалгахгүй хийнэ” гэв.

Categories
мэдээ нийгэм

Хөдөлмөрийн баатрууд ажил амьдралын туршлагаа хойч үедээ өвлүүлэх зорилготой төсөл хэрэгжүүлэх саналтай байгаагаа илэрхийллээ

Нийслэлийн Засаг дарга бөгөөд Улаанбаатар хотын захирагч С.Амарсайхан өнөөдөр Монгол Улсын Хөдөлмөрийн баатруудын холбооны төлөөлөл болох барилгын цэрэг, цахилгаан инженерлэл, спортын салбараас төрөн гарсан Хөдөлмөрийн баатар Д.Түмэн, Д.Сэдбазар, З.Ойдов нарыг албан өрөөндөө хүлээн авч уулзлаа.

Уулзалтын эхэнд Хөдөлмөрийн баатруудын зүгээс Улс орныхоо хөгжил, бүтээн байгуулалтанд өндөр амжилт гарган ажиллаж, төр түмэндээ үлгэр дуурайлал болсон баатруудын ажил амьдралын баялаг туршлагыг залуу хойч үедээ өвлүүлэн үлдээх зорилгоор оюутан залуус, олон нийтэд хандсан зөвлөх, сургах үйлчилгээ бүхий сургалтын төслийг хэрэгжүүлэх саналтай байгаагаа Хотын даргад илэрхийллээ.

Хотын дарга С.Амарсайхан “Улс эх орны хөгжил дэвшилд оюун санаа, хүч хөдөлмөр, сэтгэл зүрхээрээ үнэ цэнэтэй хувь нэмэр оруулсан, шалгарсан манлайлагчид болох Хөдөлмөрийн баатрууд та бүхэнтэйгээ уулзаж байгаагаа баяртай байна. Та бүхний гаргаж байгаа санал санаачлага, зөвлөмж зөвлөгөөг залуу хойч үеийнхэн бидэнд ус агаар мэт хэрэгтэй байна. Тиймээс та бүхний гаргасан санаачлагыг гаргаж байгаад талархал илэрхийлье. Та бүхний гаргасан санаачлагыг Хотын удирдлагуудын зүгээс боломжтой бүхий л хэлбэрээр дэмжин ажиллах болно. Хэдийгээр та бүхний ажиллаж хөдөлмөрлөж байсан цаг үеийг одоогийнхтой харьцуулахад мэдээлэл технологийн хөгжил дэвшлийн хувьд ялгаатай ч бидэнд дутагдаж байгаа зүйл олон байна. Ялангуяа хөдөлмөрийн үнэ цэнийг залууст хүргэх, хүн хөдөлмөрлөж зүтгэж байж сайхан амьдардаг, улс орон хөгждөг гэдгийг ойлгох асуудал чухал юм. Монгол түмний соёл уламжлал, үнэт зүйлс, өвөг дээдэс ах захаа хүндлэх зэрэг асуудлын хүрээнд орхигдсон суларсан олон жишээг та бүхнийхээ дэмжлэгтэйгээр залуу үеийнхэнд сэргээн ухамсарлуулах, таниулах шаардлага байна. Мэргэжил, гадаад хэл, техник технологитай харилцах тал дээр залууст олон давуу тал байгаа боловч ёс зүй, үнэт зүйл, сахилга бат, хөдөлмөрт хандах хандлагыг дээшлүүлэх тал дээр анхаарах зүйл байгаа. Бүх зүйлийг төр засгаас хариуцах ёстой мэтээр харж, эрхээ мэддэг атлаа үүргээ тэр бүр ухамсарлахгүй байгаа явдал иргэдийн дунд цөөнгүй бий. Саяхан нийслэлийн Засаг даргын зөвлөлийн хуралдаанаар сургууль цэцэрлэгийн сурагчдын хичээлийн цагийн өмнөхөн хотын соёл, зөв дадал зуршлын тухай мэдээллийг багш нарын тусламжтайгаар өгдөг байхаар бэлтгээд байна. Хүн болох багаасаа гэдэг учраас хүүхэд багачуудыг өсөж тониж байгаа цаг үеэс зөв хүмүүжилтэй иргэн болгон төлөвшүүлэхийг зорьсон шийдвэрийг гаргасан. Бидний хэрэгжүүлэхээр зорьж байга азорилго, та бүхний санал санаачлага сайхан нийцэж байгаа учраас та бүхэнтэй хамтран ажиллах боломжтойг дурьдахад таатай байна” хэмээлээ.

Хөдөлмөрийн баатруудын зүгээс “Хотын дарга бидний хэдэн ахмадуудыг хүлээн авч уулзаж, урмын сайхан үг хэлж, зорьсон ажлыг маань дэмжихээ илэрхийлсэнд бид талархалтай байна. Таны ярьж хэлж байгаачлан хүүхэд залуусын нас биений онцлогт тохирсон хөдөлмөрийн үнэ цэнэ, амьдрах арга ухаан, харилцааны соёл, эелдэг найрсаг харилцааны тухай мэдээллийг их дээд сургууль, коллежуудад сургалт, яриа таниулга хэлбэрээр зохион байгуулах төслийг бид боловсруулсан. Хөдөлмөрийн баатруудын холбооны төслийг танд гардуулан өгч, хамтран ажиллах болсондоо талархаж байна” гэв.

Уулзалт ярианы төгсгөлд Хөдөлмөрийн баатрууд, Хотын дарга С.Амарсайхантай улс төр нийгмийн өнөөгийн нөхцөл байдал, олныг хамарсан аюулт өвчний талаар авч хэрэгжүүлж байгаа арга хэмжээний талаар санал солилцон, халуун дотно яриа өрнүүллээ. Хөдөлмөрийн баатрууд засаг төрөөс олон нийтийг хамарсан халдварт өвчин гарч болзошгүй байгаатай холбогдуулан сар шинийн баярыг тэмдэглэн өнгөрүүлэхгүй байх шийдвэр гаргасныг бүрэн дэмжиж байгаагаа илэрхийлж, өвчин тахалгүй эрүүл саруул байвал хэдийд ч сар шинээ тэмдэглэж, золголтоо хийж болно гэдгээ хэлж байлаа.

Categories
мэдээ нийгэм

Монголбанкны Ерөнхийлөгч ОУВС-гийн хуралд оролцлоо

Монголбанкны Ерөнхийлөгч Б.Лхагвасүрэн албаны хүмүүсийн хамт 2-р сарын 12-оос 13-ны ѳдрүүдэд Токио хотноо зохион байгуулагдсан Олон улсын валютын сангийн Ази Номхон далайн бүсийн оффис, Японы Олон улсын Хамтын ажиллагааны байгууллага (ЖАЙКА)-ийн Тавдугаар хуралд оролцлоо. Уг хурал нь “Хөгжиж буй Ази: Төсвийн зохистой удирдлагыг хэрэгжүүлж тогтвортой, хүртээмжтэй өсөлтөд хүрэх нь” сэдвийн дор болж өнгөрсөн ба Ази Номхон далайн орнуудын тѳв банк болон сангийн яамны удирдлагууд, эрдэмтэн судлаач нар оролцлоо.

Хурал “Тогтвортой хөгжлийн зорилтууд болон хүртээмжтэй өсөлтөд хүрэх нь”, “Хүртээмжтэй, тогтвортой өсөлтийг дэмжихийн зэрэгцээ төсвийн болон өрийн тогтвортой байдлыг хангах нь” гэсэн 2 дэд сэдэвтэй өрнөсөн бөгөөд Монголбанкны Ерөнхийлөгч Б.Лхагвасүрэн эхний хэлэлцүүлэгт оролцов.

Түүнчлэн, хуралд оролцсон тѳлѳѳлѳл Японы Сангийн яам, ОУВС болон ЖАЙКА-ийн тѳлѳѳллүүдтэй албан уулзалтууд хийн, Монгол Улсын эдийн засгийн байдал, хэрэгжүүлж буй бодлогын талаар танилцуулж, цаашдын хамтын ажиллагаагаа бэхжүүлэх чиглэлээр санал солилцов.

Categories
мэдээ нийгэм

​ Үндэсний Статистикийн хороо статистикийн мэдээллээ цахимаар хүргэнэ

Монгол Улсын Засгийн газраас “COVID-19” коронавирусийн халдварт өвчнөөс сэргийлэх зорилгоор “Гамшгаас хамгаалах өндөржүүлсэн бэлэн байдлын зэрэгт” хэсэгчлэн шилжүүлсэн.

Энэхүү шийдвэрийн дагуу Үндэсний Статистикийн хорооноос энэ оны 2 дугаар сарын 17-ны өдөр хийх “Монгол Улсын эдийн засаг, нийгмийн байдал” статистикийн мэдээллийн хэвлэлийн бага хурлыг цахим хэлбэрээр хийхээр боллоо.

Иймд Үндэсний Статистикийн хорооны албан ёсны цахим хуудас 1212.mn болон facebook-ийн “Үндэсний Статистикийн хороо” хуудсаар дамжуулан статистик мэдээллээ Даваа гарагийн 10:00 цагаас хүлээн авах боломжтой аж.

Categories
мэдээ нийгэм

0-12 насны хүүхэдтэй ажилтан, албан хаагчдыг богиносгосон цагаар ажиллуулахаар болжээ

Монголын үйлдвэрчний эвлэлийн холбооны Ерөнхийлөгчийн зөвлөлийн хурлаас Ерөнхий зөвлөлийн ажлын албаны ажилтнууд, харьяа газрууд, гишүүн байгууллагуудад хандаж коронавирусийн халдвараас хүн амыг урьдчилан сэргийлэх зорилгоор холбогдох газруудаас гарсан шийдвэрийг үндэслэн 0-12 насны хүүхэдтэй ажилтан, албан хаагчдыг гуравдугаар сарын 2-ныг хүртэл богиносгосон цагаар буюу 09:00-15:30 цагийн хооронд ажиллуулахаар болжээ.

Мөн өчигдрөөс Улсын Онцгой комиссоос хэсэгчлэн өндөржүүлсэн бэлэн байдалд шилжсэнтэй холбогдуулан уг арга хэмжээг илүү өргөн хүрээнд зохион байгуулах, зарим алба, хэлтсийн ажилчдыг гэрээр ажиллах боломжоор хангах, ажлын уялдаа холбоог сайжруулах болон хөдөлмөрлөх эрхтэй холбоотой санал, гомдол хүлээн авах жижүүрийн шуурхай утас ажиллуулах шийдвэр гаргасан байна.

Иймд коронавирусийн нөлөөгөөр үүссэн нөхцөл байдалтай уялдуулан нийт албан байгууллага, аж ахуйн нэгжүүдийг ч ийнхүү тодорхой зохицуулалт, арга хэмжээ авахыг уриалжээ.

Categories
мэдээ нийгэм

“Хорт хавдартай өвчтөний сувилахуйн тусламж үйлчилгээг сайжруулах сургалт”-ыг зохион байгууллаа

Чусонь Их Сургуулийн “Тэргүүлэх Их Сургууль Бэлтгэх Олон Улсын Хамтын Ажиллагаа Төсөл”(Төслийн ахлагч Ким Жинь Хый) нь БНСУ-ын Хавдар судлалын үндэсний төвтэй хамтран Монголын төрөлжсөн лавлагаат төв эмнэлгүүдийн сувилахуйн албаны дарга нарыг урин “Хорт хавдартай өвчтөний сувилахуйн тусламж үйлчилгээг сайжруулах сургалт”-ыг өнгөрсөн 2 сарын 3-аас 6-ны өдрийн хооронд зохион байгуулсан.

БНСУ-ын Хавдар судлалын үндэсний төвд 3 өдөр үргэлжилсэн “Хорт хавдартай өвчтөний сувилахуйн тусламж үйлчилгээг сайжруулах сургалт”-нд Монголын сувилагчдын нийгэмлэгийн тэргүүн(Д.Нямсүрэн), Нийслэлийн эрүүл мэндийн төвийн сувилахуйн асуудал хариуцсан мэргэжилтэн(Ц.Сонгиносүрэн) нараас гадна Монголын төрөлжсөн лавлагаат төв эмнэлгүүдийн 11 сувилахуйн албаны дарга нар болон Монголын Үндэсний Их Сургуулийн 4 багш оролцсон. Уг сургалтыг БНСУ-ын Хавдар судлалын үндэсний төвийн сувилахуйн албаны дарга (Ким Ми Ёнь) ба 11 лектор удирдан явуулсан.

“Хорт хавдрын тухай ойлголт”, “Элэгний хорт хавдартай өвчтөний сувилахуй”, “Ходоод гэдэсний замын хорт хавдартай өвчтөний сувилахуй”, “Уушгины хорт хавдартай өвчтөний сувилахуй”, “Эмэгтэйчүүдийн хорт хавдартай өвчтөний сувилахуй”, “Цусны хорт хавдартай өвчтөний сувилахуй”, “Хорт хавдартай өвчтөний ди стрессийн менежмент”, “Хорт хавдартай хүүхдийн сувилахуй”, “Хорт хавдартай өвчтөний өвчин намдаах эмчилгээ”, “ Хорт хавдрын үед хэрэглэх эм, гаж нөлөөг зохицуулах”, “Туяа эмчилгээ хийлгэж буй өвчтөний сувилахуй”, “Хорт хавдраас эдгэрсэн үйлчлүүлэгчийн сувилахуй ” гэсэн сэдвүүдээр сургалт явагдсан байна.

Энэ удаагийн сургалтаар дамжуулан Монголын төрөлжсөн лавлагаат төв эмнэлгүүдийн сувилахуйн албаны дарга нар хорт хавдрын төрлөөр өвчтөний сувилахуйн тусламж үйлчилгээг сайжруулах, хорт хавдартай өвчтөнг хянах арга зам болон хорт хавдрын бүртгэлийн материалыг бүрдүүлэх тухай суралцаж болох юм.

Уг сургалтанд оролцсон Монголын сувилагчдын нийгэмлэгийн тэргүүн Д. Нямсүрэн нь “Энэ удаагийн “Хорт хавдартай өвчтөний сувилахуйн тусламж үйлчилгээг сайжруулах сургалт”-аар дамжуулан хорт хавдар болон хорт хавдрын төрлөөр нь өвчтөнг сувилах стратеги, хорт хавдартай өвчтөнг дэмжих бодлого болон хорт хавдрын бүртгэлийн тухай сурч чадсан бөгөөд БНСУ-ын хорт хавдрын менежментийн төсөл маш боловсронгуй хөгжсөн бөгөөд сувилахуйн үйл ажиллагааны чадварыг газар дээрээс нь харж сонсох боломжтой байлаа. Уг хөтөлбөрийг бэлтгэх гэж хичээл зүтгэл гарган ажилласан бүх хүмүүст баярлалаа” гэж хэлсэн.

Сургалтын хөтбөрийг зохион байгуулсан төслийн ахлагч Ким Жинь Хый профессор (Чусонь Их Сургуулийн Сувилахуйн тэнхим) нь “Энэ удаагийн сургалт нь Монголын сувилахуйн боловсролыг дээшлүүлэх төслийн нэг хэсэг бөгөөд БНСУ-ын Хавдар судлалын үндэсний төвтэй хамтран зохион байгуулсан. Монголын төрөлжсөн лавлагаат төв эмнэлгүүдийн сувилахуйн албаны дарга нар уг сургалтаар дамжуулан сурсан мэдсэн зүйлээ Монголын бүх хэсэгт хүргэж, Монголын хорт хавдартай өвчтөнүүд болон тэдний гэр бүлийн төлөө идэвхтэйгээр ашиглаасай гэж хүсэж байна” хэмээн дамжуулсан.

Categories
мэдээ нийгэм

Хүнсний хомсдол үүсэхгүй учраас хүнсний нөөц бүрдүүлэх шаардлагагүй

Засгийн газрын хуралдаанаас засаг захиргаа, нутаг дэвсгэрийн нэгж, төрийн болон нутгийн захиргааны байгууллага, хуулийн этгээдийг өчигдрөөс гамшгаас хамгаалах өндөржүүлсэн бэлэн байдлын зэрэгт /хэсэгчлэн/ шилжүүлсэн. Өндөржүүлсэн бэлэн байдлын үед хэрхэн ажиллах талаар ОБЕГ-аас мэдээлэл хийв.

Энэ үеэр Засгийн газрын Хэвлэл мэдээлэл, олон нийттэй харилцах албаны дарга Ц.Ганзориг “Хүнсний захуудыг хаагаагүй, орон нутгийн замыг хязгаарлаагүй. Хүнсний хомсдол үүсэх асуудал байхгүй. Хомсдол үүсэхгүй учраас хүнсний нөөц бүрдүүлэх шаардлагагүй” гэлээ.

Categories
мэдээ нийгэм

Зориулалтын бус саванд савласан сүү, цагаан идээ худалдан авахгүй байхыг анхаарууллаа

МХЕГ-ын даргын даргын баталсан 2020 оны нэгдүгээр сарын 17-ны өдрийн “Нийтийг хамарсан баяр ёслол, цаг үеийн шаардлагаар зохион байгуулж буй арга хэмжээнд урьдчилан сэргийлэх хяналт шалгалт хийх тухай” удирдамжийн хүрээнд хийсэн шалгалтын явцад илэрсэн зөрчилтэй холбогдуулан хоёр иргэнд торгууль шийтгэвэр ногдуулан барагдуулж ажиллалаа.