Month: February 2020

Categories
мэдээ цаг-үе

Орчин үеийн компанийн соёл бясалгалын өрөөтэй эсэхээр хэмжигдэнэ

-БАЯСАЛГАЛААР ДАМЖУУЛЖ ХҮНИЙ ЧАДАМЖИЙГ НЭМЭГДҮҮЛЭХЭД ДЭЛХИЙ НИЙТ АНХААРЧ БАЙНА-

Сүүлийн үед компаниуд ажлын байран дээрээ бясалгалыг нэвтрүүлж ажилчдадаа бясалгал хийх боломж олгодог болжээ. Ингэснээр ажилчдынх нь сэтгэл санаа тогтворжиж амар амгалан болох агаад ажлын чадамж нэмэгдэж, үр дүнд анхааран ажилладаг болох нь тогтоогджээ. Томоохон бизнесмэнүүд энэхүү зүй тогтлыг ухаалгаар олж харан, ажил хэрэг болгосноор бизнес нь илт сайжирсан гэсэн сэтгэгдлүүд интернэтэд хөвөрч байгааг олж үзэж болно. Баясалгал нь өөрийн ухаан билгээ зөв зүйлд төвлөрүүлэх хамгийн шилдэг арга төдийгүй оюун санааны дээд дасгал хэмээн дэлхий нийтээрээ хошуурцгааж байна. Зөвхөн оффис ч гэлтгүй томоохон их дээд сургууль, түүгээр ч барахгүй дунд сургуульд хүртэл бясалгалын танхимуудыг нээх болжээ. Өдөрт тогтмол хугацаанд бясалгал хийдэг хүүхдийн тархи сэргэгээр ажиллаж, өөрийн дуртай, хийхийг хүссэн зүйлдээ цаг хугацаа, энергиэ зарцуулснаар илүү их амжилт олдог хэмээн бясалгал нэвтрүүлсэн сургуулийн багш нар онцолжээ.

Компани дээрээ бясалгал хийх боломжтой болсон ажилчдаас судалгаа авахад судалгаанд оролцогчдын 91 хувь нь соёл, ёс зүйд эерэгээр нөлөөлсөн гэж мэдэгджээ. Түүнчлэн 88 хувь нь хамтрагчдаа санал болгохыг зөвлөсөн бол 66 хувь нь стрессээс ангижирсан, эсвэл стрессээ удирдаж чаддаг болсон гэж, 63 хувь нь ажил дээрээ өөрсдийгөө удирдах чадвартай болсон гэсэн байна. Харин 60 хувь нь анхаарлаа төвлөрүүлж, шийдвэр гаргах чадвар нэмэгдсэн гэсэн бол 46 хувь нь инноваци, бүтээлч байдал нэмэгдсэн гэжээ.

“Apple” компанийн захирал агсан Стив Жобс бясалгалын соёлыг ажилчдынхаа дунд нэвтрүүлж байжээ. Ингэхдээ тэрээр зэн баясалгалыг сонгосон бөгөөд ажилчдадаа бясалгалын өрөө бэлдэн өгч, өдөр бүр 30 минутын бясалгал хийх боломж олгожээ. Мөн “Google”, “Yahoo” компаниуд ч ажилчдадаа бясалгал санал болгодог аж. P&G компанийн захирал хүмүүст спорт заалнаас илүү бясалгалын танхим хэрэгтэй хэмээн үзээд ийм өрөөнүүд олноор нь тохижуулсан байна. Тэрээр ажилчдадаа “Таны амьдралд тулгарч байгаа асуудлуудыг биеийн дасгал хөдөлгөөнөөр биш, оюун санааны дасгалын хүчээр ухаалаг шийдэж болно шүү” гэж хэлдэг гэнэ.

“Nike” компани саяхнаас бясалгалын тусгай хөтөлбөрийг ажилчдадаа санал болгожээ. Тэдний зүгээс зохион бүтээгч хүмүүс оюун санаагаа тогтвортой байлгаж, саруул ухаанаар сэтгэх нь сайн бүтээл төрөн гарах суурь байх болно хэмээн мэдэгдсэн. Америкийн томоохон энтертайнмент компани болох HBO саяхнаас гэгээрлийн тухай цуврал киногоо цацаад буй. Тэгвэл энэ киноны зарим зураг авалтыг өөрсдийн компанийн байранд байх спорт заал болон бясалгалын танхимуудад авсан аж. Алдарт Офра Уинфри ч өөрийн 400 ажилчинтайгаа өдөр бүр бясалгал хийдэг гэнэ. Бясалгал тогтмол хийдэг болсноор ажилчид нь маш их хүсэл эрмэлзэлтэй болж, суурь өвчнүүдээсээ салан, нойр хоолондоо ч сайжирч хувийн амьдралд нь маш их эерэг өөрчлөлт гарсан талаар онцолжээ.

Ийнхүү соёлтой орнуудын толгойлогч компаниуд бясалгалыг бүтээмжтэй ажиллахын гол түлхүүр гэж үзээд, өдөр тутмын ажлынхаа нэг хэсэг болгон, компанийн соёлын шинэ хандлагыг хөгжүүлж байна.

Бясалгал гэж юу вэ?

Бясалгал нь хувь хүний ухамсраа удирдах, сэтгэлийн амар амгаланг олох, бусдыг болон ертөнцийн мөн чанарыг ойлгон танихын тулд үйлддэг оюун санааны дасгал юм. Бид өдөр тутамдаа янз бүрийн асуудлуудтай тулгарахдаа гарах арга замаа өөр өөрийнхөөрөө хайж олдог шүү дээ. Энергийн урсгалыг өөрт ашигтайгаар, эрчим хүч, баяр баясал болгон авах уу эсвэл зовлон, өвчин болгож өөртөө наах уу гэдгийг хүн ухамсраараа, сэтгэлээрээ шийдвэрлэж байдаг. Зөв, эерэг, ухаалаг шийдвэр гаргаж, тайван, аз жаргалтай амьдрахад бясалгал тусалдаг болох нь тогтоогдчихсон. Бясалгал нь эрт дээр үеэс олон шашны уламжлалд байсаар ирсэн бөгөөд ихэвчлэн гэгээрэх, өөрийгөө танин мэдэхүйн нэг арга болжээ. Бясалгалын хамгийн эртний бичвэр Энэтхэгийн Вээдийн шастирт ул мөрөө үлдээсэн байдаг “Даяттри”-гийн тарни юм. МЭӨ VI-V зуунд Хятадад Күнзийн шашнаар дамжин хөгжжээ. Мөн хиндүизм, жайнизм болон эртний буддын шашны улбаагаар Энэтхэгт дэлгэрсэн байдаг. МЭ 100 оны орчмоос зэн урсгалын бясалгал номлол Хятадад чан, Солонгост сеон, Вьетнамд тянь нэрээр түгсээр 653 он гэхэд Сингапурт баясалгалын анхны танхим нээгдэж байсан түүхтэй аж. Азийн олон орноор бясалгалын хэлбэрүүд ийнхүү түгсэн нь торгоны замтай холбоотой гэнэ.

Улмаар XIX зууны сүүл үеэс дэлхийд соёлын хувьсгал өрнөж, харилцаа холбоо нэмэгдсэнтэй холбоотойгоор барууны орнуудад хүчтэй дэлгэрч, Азиас гаралтай бясалгалын практикийг өрнөдөд дамжуулж эхэлжээ.

1893 онд Чикаго хотод зохиогдсон Дэлхийн шашны парламент нь бясалгалын тухай өрнөдийн мэдлэгийг дээшлүүлсэн чухал үйл явдал байв. Барууны үзэгчид анх удаа Азийн сүнслэг сургаалыг хүлээн авсан нь энэ юм. Үүнээс хойш буддын сургаал дээр суурилсан бясалгалын янз бүрийн хэлбэрүүдийг хүмүүс сонирхох болж, ашрамууд (бясалгал номлол хийх ариун дагшин газар) нээгдэж, Харвардын сургуульд бясалгалын тухай лекцүүд тавигдаж, зэн сургаалыг зааж эхэлсэн байна.

Хиндүизм

Хиндү шашны хэв маягтай бясалгалын олон хэлбэр байдаг. Орчин үеийн болон уламжлалт хиндү шашинд Йог болон Диян нь хүн өөрийн мөнхийн сүнсийг ухамсарлаж хайрлах арга юм гэж үздэг. Материас ангид, мөнхөд орших сүнсээ хөгжүүлье гэвэл йог хийх бясалгах шаардлагатай гэсэн ухаан. Орчин үед Хатха йогийг бясалгалын нэг хэлбэр хэмээн үзэж хүмүүс олноороо хичээллэх болжээ.

Жайнизм

Жайнизм бясалгал нь хүн өөрийгөө ухамсарлаж, сэтгэлээ бүрэн эрх чөлөөнд хүргэх буюу аврагдах зорилготой. Жайнизм нь пиндаста-диян, падаста-диян, рапаста-диян, рапатита-диян, савиря-диян гэх мэт бясалгалын аргыг ашигладаг. Жайнизмд Мантрагийн баялаг уламжлал ч байдаг. Мантра аялгуу нь жайн лам нар болон дагалдагчдын өдөр тутмын амьдралын чухал хэсэг юм.

Буддизм

Бясалгалын үндсэн арга нь эртний Буддын шашны бичвэрүүдэд хадгалагдан үлдсэн бөгөөд багш-шавийн барилдлагаар дамжин олширч, төрөлжиж ирсэн. Ертөнц даяар хамгийн өргөн тархсан тул буддист биш хүмүүс ч энэ төрлийн бясалгалуудаар тогтмол хичээллэдэг гэсэн судалгаа байдаг аж. Теравада уламжлалаар оюун ухаанаа хөгжүүлэх тавин арга, төвлөрлийг хөгжүүлэх дөчин арга гэхчлэн байхаас гадна төвөд уламжлалын мянга мянган төрлийн харааны бясалгал байдаг аж.

Будда эрүүл мэндийн бясалгалаас үүдэлтэй оюун санааны хоёр чухал чанарыг тодорхойлжээ. Эдгээр нь амар амгалангийн бясалгал буюу самади, бодит үнэнийг байгаагаар нь харах бясалгал буюу випашня. Самади бол өөрийн сэтгэлийг амар амгалангийн төлөв рүү чиглүүлэх арга бол випашня нь ертөнцийн аливаа үйл хэргийг бодит байдлаар нь олж харан, цэцэн цэлмэгээр хүлээж авах үйл юм.

Даогийн бясалгал

Энэ нь Хятадын уламжлалт анагаах ухаан, тулааны урлагт суурилсан бясалгал юм. Энэхүү бясалгал нь гурван түвшинтэй бөгөөд олон жил бясалгасан бясалгагчид махан биеийн хэмжүүрээс халин гарч сүнслэг байдлаар оршин, сансрын энергиэр биеэ дүүргэн орчлонгийн уудамд аялдаг гэлцдэг.

Бясалгахын ач тус буюу хэрхэн бясалгаж эхлэх вэ?

Гүнзгий түвшинд бясалгагчид хэзээ ч, хаана ч бясалгах чадвартай байдаг бол эхлэн бясалгагчдад орчин хамгийн чухал нөлөөтэй гэнэ. Бясалгаж эхлэхийн өмнө өөрийгөө тайвшруулж, элдэв бодлуудыг санаанаасаа авч хаях нь таны хийх эхний алхам юм. Сэтгэл тайван байх нөхцөлийг бүрдүүлсэн газрыг сонгох нь чухал. Магадгүй лаа асаасан, анхилуун үнэртэй, бурхны хөрөг дүртэй орчин танд төсөөлөгдөж байгаа байх. Тусгай ийм өрөө бэлдэж болох ч гэлээ алба үгүй, хамгийн гол нь цэвэр цэмцгэр газарт л бясалгаж эхэлбэл санаа бодол будилж, үймцэхгүй гэнэ. Эмх замбараагүй орчинд сэтгэл санаа дагаад замбараагүй болдог. Мөн бясалгалын эхэн үед аниргүй орчинг сонгох нь зүйтэй. Хотын шуугиантай амьдралд бид оройн цагаар хүмүүсийг унтаж амарсны дараа юм уу өглөө эрт, хөл хөдөлгөөн эхлээгүй үеийг сонгон бясалгавал илүү үр дүнтэй байх гэнэ. Ингээд өөрийн биед эвтэй байхаар, булчингууд сул байхаар бодож сууна. Зэнгийн төрлийн зарим бясалгалд огт хөдөлж болохгүй гэдэг. Бусад бясалгалд бол чилсэн хөлөө хөдөлгөж амраах зэрэг нь нэг их асуудал биш байдаг аж. Бурхны шашинд хөгжим даган бясалгахыг сайшаахгүй. Учир нь гадаад орчны, зохиомол амар амгалангаар бясалгах нь хуурмаг зүйл болох магадлалтай. Ингэхийн оронд өөрийн дотоод амар амгаланг чагнаархах нь жинхэнэ утгаараа оюуны их тайвшралыг олдог гэнэ. Анх эхэлж буй хүмүүс 3-5 минут бясалгахад хангалттай. Үүнээс удаан хугацаанд анхаарал сарниж, бясалгалыг үр дүнгүй, хэцүү болгох аюултай аж. Мөн өдөр бүр тогтмол хийх хэрэгтэй. Хамгийн гол нь өөрийгөө хүчлэлгүй гэхдээ бас тууштайгаар бясалгаж байж дараагийн түвшин рүү ахидаг байна. Дараахь гурван зарчмыг байнга санахад илүүдэхгүй.

Сэтгэл одоо цагт байвал бясалгал

Сэтгэл тайван, эргэлзээгүй, хүлээлтгүй байвал бясалгал

Сэтгэл сэтгэл гэгдэхээ больж, анхны буюу өөрийн эх төлөвтөө шилжихийг бясалгал гэнэ.

Бясалгал үйлдэгч алдартнуудын заримаас:

• Билл Гейтс (Microsoft компанийн тэргүүн)

• Уилл Смит (Холливуудын алдарт жүжигчин

• Коби Брайнт (Тэрээр өөрийн бэлтгэлийг жигд байлгахын тулд өглөө бүр бясалгадаг байжээ)

• Майкл Жордан (Сагсан бөмбөгч), Пил Жексон (Майкл Жорданы дасгалжуулагч)

• Женифер Лопез (Опрагийн шоун дээр тэрээр өдөр бүр бясалгал хийх нь надад одын амьдралаар тэнцвэртэй амьдрах боломж, олгодог хэмээн ярьж байжээ)

• Арнольд Шварцнейгер

• Жеорж Лукас (Тэрбумтан, “Оддын дайн”, “Юрийн галавын цэцэрлэг”, “Индиана Жонс” кинонуудын зохиолч )

• Клинт Ийствүүд (Холливуудын алдарт кино найруулагч тэрбээр 40 орчим жил бясалгалаар хичээллэжээ)

• Жессика Альба (Холливуудын жүжигчин)

• Кетти Перри (Бясалгал түүний амьдралыг орвонгоор нь өөрчилсөн гэдэг)

• Жефф Вейнэр (LinkedIn-ий тэргүүн)

• Эрик Риперт (Дэлхийн хамгийн алдартай тогооч. Өглөө бүр нэг цаг бясалгах нь өдрийн турш аз жаргал болон амар амгаланд байр тавьж өгөхийг надад заадаг гэсэн байна)

А.МӨНХЗУЛ

Categories
онцлох-нийтлэл туслах-ангилал

М.Баттуул: Гадуур явахдаа маскаа байнга зүү, гараа тогтмол угаа

Сүхбаатар дүүргийн X хороо “Энэр-Ази” өрхийн эрүүл мэндийн төвийн их эмч М.Баттуултай ярилцлаа.

-Танай хороо хэдэн хүн амтай вэ. Үүнээс хэдийг нь бага насны хүүхэд эзэлдэг вэ?

-Сүхбаатар дүүргийн X хороо дан байшин хороололтой. Нийт 10438 иргэнтэй. Түүний 1438 нь 0-5 насны хүүхдүүд байна.

-Шинэ коронавирус урд хөршид илэрснээр манай улс хөл хорио тогтоосон. Хөл хорионоос хойших үеийн томуу, томуу төст өвчний идэвхжил хэр байгаа вэ?

-Ерөнхий боловсролын сургуулийн улирлын амралт дөнгөж дуусаад долоо хоног хичээллээд л хөл хорионы үе эхэлсэн шүү дээ. Тэр үед бага ангийн хүүхдүүд дунд томуу, томуу төст өвчний идэвхжил их байсан. Цэцэрлэг ч хөл хорио тогтоогоогүй байсан. Хүүхдүүдийн дунд ханиад хатгаа их, үзлэг ихтэй үе байлаа. Харин хөл хорио эхэлснээс хойш үзлэг харьцангуй багассан. Гэхдээ том хүний ханиад, хатгаа их байгаа. Хурдан хүндэрнэ. Эхний 3-4 хоног маш өндөр халуурдаг. Вирусийн гаралтай ханиад болохоор вирусийн эмэндээ дарагддаг. Гэсэн ч маш хурдан хүндэрдэг болохоор дүүргийн эмнэлэгт хэвтэн эмчлүүлэх нь их байгаа.

-Сүүлийн үед бага насны хүүхдүүдийг гэрээр үзэж байгаа гэсэн. Танай өрхийн эмнэлэг хүүхдүүдийг яаж үзэж байна вэ?

-Манай эмнэлэг байнга гэр эргэлтийг хийдэг. Эмч нар хуваагдаад амбулаторидоо хоёр эмч үлдээд, хоёр эмч айлуудаар явж гэрээр үзлэг хийж байна. Мөн өөрийн заавал үзэх ёстой дүүргийн эмнэлэгт хэвтэж эмчлүүлсэн, 103 дуудаж үзүүлсэн, нярай хүүхдүүд болон асаргаанд байдаг ахмад настнуудаа өдрөөр эргэж үздэг. Биднийг 80 хувиас дээш гэрийн үзлэг хий гэж заасныг биелүүлэн ажиллаж байгаа.

-Хөл хорионы үеэр иргэд хэр зөвлөгөө мэдээлэл авахаар ирж байна. Урьдчилан сэргийлэх зорилгоор иргэд хандаж байна уу?

-Телевиз, радио, сошиалаар урьдчилан сэргийлэх мэдээлэл их явж байгаа болохоор яг зөвлөгөө мэдээлэл авъя гэж зорьж ирэх хүн байхгүй. Гэхдээ бид үзүүлж, эмчлүүлж байгаа иргэддээ байнга зөвлөгөө мэдээлэл өгч ажиллаж байна. Маскаа байнга зүү, гараа тогтмол угаа, аньс, чацаргана, аарц гээд дархлааг дэмжих аминдэмтэй эрүүл хоол хүнсийг сонго гэх мэтээр.

-Томуу, томуу төст өвчний идэвхжил хөл хорионы үеэр багассан гэж байна. Сүүлийн үед үйлчлүүлэгчид ихэвчлэн ямар шалтгаантайгаар ирж үйлчлүүлж байна вэ?

-Сарын эхэн үед эрүүл мэндийн даатгалын хөнгөлөлттэй эм өрхийн эрүүл мэндийн төвөөр бичигддэг. Тиймээс ахмад настнууд даатгалын хөнгөлөлттэй эмээ бичүүлэхээр үзүүлэх тохиолдол их байна. Томуу, томуу төст өвчний шалтгаанаар хандах тохиолдол нэгдүгээр сар гарснаас хойш багассан. Ид идэвхжлийн үед маш их дараалал үүсдэг үе шигээ биш байна л даа.

-Эрүүл мэндийн сайд Сар шинийн баярыг цуцлах санал гаргасан. Сар шинээр идэвхжил хэр нэмэгддэг вэ?

-Эрсдэл ихтэй. Энэ жил шинэ төрлийн коронавирус илэрсэн гээд хөл хорио тогтоочихсон байгаа болохоос өмнөх жилд Цагаан сарын дараа томуу, томуу төст өвчин маш их нэмэгдсэн. Ер нь ямар нэгэн баярын дараа өвчлөл нэмэгддэг. Яагаад гэвэл монголчууд бие биенийдээ их зочилдог. Энэ үеэр өвчлөл үүсэх нь нэмэгддэг. Миний хувьд ч гэсэн золголтыг гэр гэртээ хийсэн нь зөв санагдаж байгаа. Үнэхээр шаардлагатай л гэж үзвэл төрсөн аав ээжтэйгээ цөөн хүнтэй үед нь золгох, гэр бүлийнхээ хүрээнд л золголтоо хийгээсэй гэж бодож байна. Түүнээс нутаг орны өндөр настан гэж хэсдэгээ ганц удаа өнжөөсэй гэж л хүсч байна.

-Хөл хорионы үеэр танд иргэдэд өгөх нэмэлт зөвлөгөө байна уу?

-ДЭМБ-аас гаргаж байгаа коронавирусийн эсрэг зөвлөмжийг маш сайн баримтлах хэрэгтэй. Хоёр л зөвлөмж байгаа шүү дээ. Гадуур явахдаа байнга маскаа зүү, гараа тогтмол угаа. Үүнийгээ дагаад байвал эрсдэл багатай өнгөрөх байх гэж найдаж байна.


Categories
мэдээ нийгэм

Амны хаалтыг хэрхэн зөв хэрэглэх вэ

Амны хаалт нь амьсгалын замаар гадагшилж буй халдвар үүсгэгчийг хязгаарлах үүрэгтэй. Өөрөөр хэлбэл амьсгалын замын халдварт өвчнөөс урьдчилан сэргийлэх, тархалтыг бууруулах арга хэмжээний нэг нь амны хаалт хэрэглэх явдал юм.

Амьсгалын замын өвчлөл хүн амын дунд тархалт их, дэгдэлт бүртгэгдэж байгаа үед өөрийгөө болон ойрын хүрээний хүмүүсээ халдвараас сэргийлэх зорилгоор амны хаалтыг дараах тохиолдолд хэрэглэнэ.

Үүнд:

  • Хөл хөдөлгөөн ихтэй олон нийтийн газарт (дэлгүүр, зах, үзвэр үйлчилгээ гэх мэт)
  • Нийтийн тээврээр үйлчлүүлэхдээ
  • Амьсгалын замын халдварын шинж илэрсэн үед
  • Өвчтөн асарч байгаа үед
  • Цэвэрлэгээ үйлчилгээ хийхэд
  • Эрүүл мэндийн байгууллагаар үйлчлүүлэхэд
  • Олон нийттэй харьцдаг үйлчилгээний ажилтан
  • Эрүүл мэндийн байгууллагын ажилтан

Амны хаалт хэрэглэхэд анхаарах зүйлс:

  • Зөв зүүх,
  • Зөв тайлах,
  • 2 цаг тутамд болон бохирдсон тухай бүр солих,
  • Зүүсэн амны хаалтны гадна хэсэгт аль болох гар хүрэхгүй байх,
  • Нэг удаагийн амны хаалтыг бохирдсон тохиолдолд шууд хаях,
  • Амны хаалт сольсны дараа гараа заавал савандаж угаах эсвэл спиртэн суурьтай гар халдваргүйжүүлэгч хэрэглэх,
  • Даавуун амны хаалтыг солих бүртээ 40-өөс дээш хэмийн халуун усанд савандаж угааж, индүүдэх,
  • Өдөрт дунджаар 4-5 ширхэг амны хаалт сольж хэрэглэх,
  • Амны хаалт чийгтэй болсон даруйд шинээр солих,
  • Цэвэр болон бохирдсон амны хаалтыг хольж болохгүй
  • Амны хаалтанд тавигдах шаардлага:
  • Ам, хамар, эрүүг бүтэн далдлах,
  • Чихэнд тогтоогч нь сунамтгай резинэн материал байх,
  • Хамрын хэлбэр гаргасан байх,

– Хэмжээ нь насанд хүрэгчид болон хуухдэд зориулсан сонголттой байх,

– Материал нь угаахад агшихгүй, будаггүй, харшил өгөхөөргүй хөвөн даавуу байх,

– Гадна материал нь ус нэвтрүүлдэггүй, амьсгалахад тохиромжтой байх,

Материалын сонголтоос шалтгаалан 3-4 давхар байна.

Хэмжээ: насанд хүрэгчид дунджаар урд хэсгийн өндөр -12,5 см, чихний хэсгийн өндөр 6,0 см, дээд талын урт-22 см, доод талын урт 20 см, хамрын хэсэгт 2,5 см, эрүүний хэсэгт З см байхаар тохируулж хийх хэрэгтэй.


Categories
мэдээ нийгэм

Өчигдөр Замын-Үүд боомтоор хил нэвтрэн орж ирсэн 104 иргэнийг тусгаарлан ажиглалт хийж байна

Эрүүл мэндийн яамнаас шинэ коронавирусийн халдварын талаар мэдээлэл хийлээ.

Сүүлийн 24 цагт шинээр 2,009 тохиолдол нэмэгдэж, нийт өвчлөлийн тоо 68,584 болсон байна. Харин халдварын улмаас нас барсан хүний тоо 142-оор нэмэгдэж нийт 1666-д хүрчээ. Эдгэрсэн хүний тоо 1,324 тохиолдлоор нэмэгдэж 9,425 болжээ.

Өчигдрийн байдлаар шинэ коронавирусийн халдвар БНХАУ-аас гадна 25 улсад бүртгэгдсэн байсан бол өнөөдөр Египет улсад шинээр бүртгэгдсэн байна. Тус улсад бүртгэгдсэн тохиолдол нь БНХАУ-д аяласан гэдэг өгүүлэмжтэй байгаа аж.

Манай улсад өнөөдрийн байдлаар шинэ коронавирусийн халдвар гараагүй байгаа. Гэхдээ тодорхой хэмжээний хүмүүсийг ажиглалтадаа авч хянаж байгаа аж.

ХӨСҮТ-ийн захирал Д.Нямхүү “2020 оны хоёрдугаар сарын 14-нд тусгаарлагдсан таван тохиолдлын шинжилгээний хариу бүгд сөрөг гарсан. ХӨСҮТ-д нэг, Налайх дүүрэгт нэг, Завхан аймагт тусгаарлагдсан тохиолдлууд бүгд шинэ коронавирусээр халдварлагдаагүй нь тогтоогдлоо. Харин 2020 хоёрдугаар сарын 15-нд ХӨСҮТ-д хоёр, Замын-Үүдэд нэг, нийт гурван тохиолдлыг тусгаарлан, үзлэг шинжилгээ хийж байна” гэлээ.

ХӨСҮТ-ийн Тандалт судалгааны албаны дарга А.Амбасэлмаа “Өчигдөр буюу хоёрдугаар сарын 15-ны өдөр Замын-Үүд боомтоор Монгол Улсын 104 иргэн хил нэвтрэн орж ирсэн. Тэдгээр хүмүүст холбогдох байгууллагууд эрүүл мэндийн үзлэг хийж, асуумж авч, тусгаарлан ажиглалт хийж байна” гэв.

Categories
мэдээ нийгэм

НӨАТ-ын сугалааны тохирол өнөөдөр явагдана

НӨАТ-ын урамшууллын энэ сарын сугалааны тохирлын нэвтрүүлэг өнөөдөр буюу Ням гаригт 19.15 цагт Боловсрол телевизээр орон даяар шууд цацагдана. Иргэн та 2020 оны нэгдүгээр сарын 01-31-ний өдөр хүртэлх хугацаанд худалдан авалт хийсэн цахим төлбөрийн баримтаа 2020 оны хоёрдугаар сарын 15-ны өдрийн 23.59 минутаас өмнө Цахим төлбөрийн баримтын системд бүртгүүлснээр НӨАТ-ын урамшууллын сугалаанд хамрагдан азтан болох боломжтой.

Өнгөрсөн оны НӨАТ-ын урамшууллын буцаан олголтын мөнгийг энэ сарын 10-наас эхлэн иргэдийн данс руу шилжүүлж дууссан. Энэ удаа 912 мянган иргэн 148 тэрбум төгрөгийг буцаан авав. Цаашид Сангийн яам НӨАТ-ын урамшууллын буцаан олголтыг улирал бүр олгох бөгөөд 2020 оны I улирлын буцаан олголтын мөнгийг дөрөвдүгээр сард иргэдийн дансанд шилжүүлэхээр төлөвлөжээ.

Categories
мэдээ цаг-үе

Мөнхийн өрсөлдөгчид мэт боловч бие биедээ тусалж чаддаг Том ба Жерри

Хүүхэлдэйн киноны түүхэнд хамгийн алдартай, цаг хугацаа улиран одсон ч хүн бүрийн ой дурсамжаас үл алсрах “Том ба Жерри” цуврал 80 нас хүрч байна. Анх 1940 онд зураач Уильям Ханна, Жозеф Барбера нар “MGM” киноны студид муур, хулгана хоёрын тухай богино хэмжээний цувралууд бүтээж эхэлсэн юм. Тухайн үед уг киног хэн ч сонирхохгүй хэмээн салбарынхан нь үл тоож байжээ. Тэгвэл уг цуврал дэлхийн хамгийн алдартай хүүхэлдэйн кино болоод зогсохгүй уг алдар хүндээ одоо ч хадгалсаар явна. Хамгийн сүүлд буюу таван жилийн өмнө BBC телевизийн гаргасан судалгаагаар “Том ба Жерри” цуврал тэргүүлсэн хэвээр байв. Анхны анги хоёрдугаар сарын 20-нд гарахад муурийг Жаспер, хулганыг Жинкс хэмээн нэрлэж байжээ. Хоёр дахь ангиас Том болон Жерри хэмээн өөрчилсөн байна. Кино гарсан цагаасаа эхэлж хүүхэд, залуусын хамгийн дуртай цуврал болж, 1940-1958 оны хооронд 114 анги бүтээсэн байна.

“Том ба Жерри”-ийн цуврал нийт Оскарын шагналыг долоон удаа хүртсэн, Уолт Диснейгийн шилдэг симфони ангилалд хамгийн олон шагнал хүртсэн юм. Уг бүтээлд хөгжмийг маш чадварлаг, гайхамшигтайгаар ашигласан хэмээн дүгнэдэг. Кинонд жазз, сонгодог, поп хөгжмийн урсгалууд бүгд бий. Үйл явдлын хэмнэл, сэтгэл хөдлөл зэрэг бүхий л үйл явцыг хөгжмөөр чадварлаг илэрхийлсэн байдаг. Тийм ч учраас Том, Жерри хоёр ярьдаггүй. Тэд нэг л удаа ярьсан нь 1992 онд бүтээгдсэн бүрэн хэмжээний кинон дээр юм. Мөн Том цувралуудын турш нэг удаа үхэж байгаагаар гардаг.

Зарим улс орон “Том ба Жерри”-г шүүмжилж, хүчирхийллийг хэт их харуулсан хэмээн гаргахаас хүртэл татгалзаж байв. Учир нь Жерри хөөрхий Томыг алх, сүхээр цохих, сүүлийг нь шатаах, бүр тэсрэх бодис, галт зэвсэг ашиглаж хариугаа авдаг. Үүний хариуд Том зүгээр суулгүй Жерриг хөргөгчинд хөлдөөж, гольфийн бөмбөгийн оронд цохихоос гадна хачиртай талхны дунд хийж, эсвэл сүмс цацаад идэх гэж хэдэн зуун удаа оролдсон байдаг. Нэг талаар үүнийг хүчирхийлэл хэмээн харж болох ч дээрх үйл явдлууд хөгжилтэй байдлаар өрнөж, ямар ч цус гаргаж байгаагүй онцлогтой. Тийм ч учраас өнгөрсөн 80 жилийн хугацаанд “Том ба Жерри”-г үзсэнээр хүүхдийн сэтгэхүй, хүмүүжилд нөлөөлсөн гэх ч тохиолдол, баримт гарч ирээгүй юм.

Том, Жерри хоёр мөнхийн өрсөлдөгчид боловч хэн хэнд нь аюул тулгарсан үед бие биенийхээ төлөө байж чаддаг нь гайхамшигтай. Тухайлбал, өнчин охин Робин Стралингийг харгис, хомхой халамжлагчаас нь аварч, үхсэнд тооцогдож байсан эцгийг нь олж өгөхийн тулд Том, Жерри хоёр найзалдаг. Мөн Вонка хэмээх хүүгийн хүсэл мөрөөдлийг биелүүлэхийн тулд Том, Жерри хоёр хамтран мөнгө цуглуулж, дайснуудтай “мөр зэрэгцэн” тэмцдэг.

Categories
мэдээ нийгэм

Ирэх долоо хоногийн теле хичээлийн хуваарь

Монгол Улсын Засгийн газар, Улсын Онцгой комиссоос цэцэрлэг, сургуулийн болон олон нийтийг хамруулсан үйл ажиллагааг энэ сарын 27-ноос гуравдугаар сарын 2-н хүртэл түр хугацаагаар зогсоох шийдвэр гаргасан. Ингэснээр цэцэрлэг, ерөнхий боловсролын сургуулиудад телевизээр, их, дээд сургуулиудад дотоод цахим сүлжээгээр хичээл зааж байгаа.

Ерөнхий боловсролын сургуулийн 1-12-р ангийн сурагчдад зориулсан теле хичээлийн ирэх долоо хоногийн хуваарийг хүргэж байна.


Categories
мэдээ нийгэм

Цагаан сарын үзэсгэлэн худалдааг зогсоож байна

Ерөнхийлөгч Х.Баттулгын 2020 оны хоёрдугаар сарын 12-ны өдрийн аравдугаар зарлигын дагуу Цагаан сарын баярын үзэсгэлэн худалдааг зогсоож байна. Одоогоор Баянзүрх, Хан-Уул, Баянгол, Сүхбаатар, Сонгинохайрхан, Багануур дүүргүүдийн 30 байршилд цагаан сарын үзэсгэлэн худалдааны үйл ажиллагааг зогсоож, сурталчилгааны хаягт самбарыг татан буулгажээ.

Ерөнхийлөгч Х.Баттулгын зарлигт “Цагаан сарын баярт зориулсан олон нийтийг хамруулсан үзэсгэлэн худалдаа, мэдээллийн хэрэгслээр явуулах реклам, сурталчилгааг даруй зогсоох, хэвлэл мэдээллийн хэрэгслээр шинэ коронавирусийн халдвараас урьдчилан сэргийлэх иргэдийн үүрэг, хариуцлага уг халдварын хор хөнөөлийг ухуулан ойлгуулах ажлыг хэвлэл мэдээллийн байгууллагуудтай хамтран зохион байгуулах” хэмээн үүрэг болгосон билээ.

Categories
мэдээ нийгэм

Зам, тээврийн хөгжлийн яам тоон гарын үсгийн технологийг нэвтрүүллээ

Зам, тээврийн хөгжлийн яам, Үндэсний дата төв, Монгол Улсын үндэсний суурь гэрчилгээжүүлэх байгууллагатай хамтран яамны нийт 120 албан хаагчдад тоон гарын үгийн гэрчилгээ олгож албан хэрэг хөтлөлтийн үйл ажиллагаандаа тоон гарын үсгийн технологийг нэвтрүүллээ. Цаашид албан хэрэг хөтлөлт, дотоод удирдлагын системээ “Эйбл софт” ХХК-тай хамтран хөгжүүлж, салбарын хэмжээнд тоон гарын үсгийн технологи ашиглан цаасгүй технологид шилжихээр бэлтгэл ханган ажиллаж байна.

Зам, тээврийн хөгжлийн яам 2020 онд Цахим яам болох зорилтын хүрээнд зам, тээврийн салбарын хяналт, шинжилгээ, үнэлгээ, шагнал, тусгай зөвшөөрлийн програмуудыг ашиглалтад оруулахаар хуваарийн дагуу ажиллаж байна. Зам, тээврийн салбарын хяналт, шинжилгээ, үнэлгээний програм 75 хувь, шагналын програм 50 хувийн гүйцэтгэлтэй байгаа бол тусгай зөвшөөрлийн програм 40 хувийн гүйцэтгэлтэй байгаа юм. Эдгээр програмуудыг мөн тоон гарын үсгийн технологи дэмжин ажиллах боломжтойгоор хөгжүүлж байгаа ба тоон гарын үсгийн технологид бүрэн шилжсэнээр цаг хугацаа, цаас, тээврийн зардлыг бууруулж, ажлын бүтээмжийг нэмэгдүүлэх чухал ач холбогдолтой юм.

Categories
мэдээ нийгэм

394 мянган ам.метр талбайд ариутгал хийв

Нийслэлийн Онцгой комисс цаг үеийн нөхцөл байдалтай холбогдуулан өнөөдөр өргөтгөсөн хуралдаанаа хийлээ.Хуралдааны эхэнд томуу, томуу төст өвчлөлийн талаар болон коронавирусын эсрэг урьдчилан сэргийлэх талаар авч хэрэгжүүлсэн арга хэмжээний талаар нийслэлийн Эрүүл мэндийн газрын дарга Л.Төмөрбаатар мэдээлэл өглөө.

Нийслэлийн Эрүүл Мэндийн Газрын дарга Л.Төмөрбаатар “Монгол улсад өнөөдрийн байдлаар коронавирусын халдвартай тохиолдол бүртгэгдээгүй. Нийслэлийн Засаг Даргаас өгсөн үүрэг чиглэлийн хүрээнд шаардлагатай арга хэмжээнүүдийг авч ажиллаж байна.Хоёрдугаар сарын 15-ны өдрийн байдлаар дэлхий нийтэд коронавирусын 64161 тохиолдол бүртгэгдэж,1485 хүн нас барсан, 6891 хүн эдгэрсэн дүн мэдээтэй байна. БНХАУ-ын Ухань хотоос ирсэн оюутнуудаас авсан давтан шинжилгээний дүн сөрөг гарсан. Нийслэлийн харьяа Эрүүл мэндийн байгууллага иргэдийн хөдөлгөөнийг хязгаарлах үүднээс 24 цагаар зөвлөгөө өгөх утас ажиллуулж байна” гэв.

Нийслэлийн мэргэжлийн хяналтын газрын дарга Л.Эрдэнэчулуун “Монгол Улсын Ерөнхийлөгчийн аравдугаар зарлигийн хүрээнд өндөржүүлсэн бэлэн байдалд шилжин ажиллаж байна.Харин арга хэмжээ авах багийг НМХГ-т байгуулаад явж байна. НМХГ-аас нийт байцаагчдын 60 хувьд нэг удаагийн хамгаалах хувцас хэрэглэлээр хангаад байна.НМХГ-аас 380 хүнд сургалт зохион байгуулж, нийт байцаагч нарт зааварчилгааг ХӨСҮТ-өөс хүргүүлсэн. Шалган нэвтрүүлэх товчоодод хяналт шалгалт зохион байгуулж байна. Нийслэлийн хэмжээнд 7950 аж ахуй нэгжид ариутгал халдваргүйтгэлийг хийж байна. Нийслэлийн Засаг Даргын 168 дугаар захирамжийн хүрээнд сүм хийдийн удирдлагуудад хурал цуглаан зохион байгуулахгүй байх мэдэгдлийг хүргүүллээ. 889 аж ахуй нэгжийн баар, караоке зэрэгт хяналт хийж зөрчил тухай бүрт хариуцлага тооцон ажиллалаа.Нийслэлийн хэмжээнд олон нийтийг хамарсан үзэсгэлэн худалдаа бүрэн зогссон гэж” мэдэгдлээ.

Улаанбаатар хотын ерөнхий менежер бөгөөд Захирагчийн ажлын албаны дарга Т.Гантөмөр үргэлжлүүлэн нийслэлд хийгдэж байгаа ариутгал халдавргүйтгэлийн ажлын явцын талаар мэдээлэл өглөө.“Нийслэлийн хэмжээнд худалдаа үйлчилгээ,хоол үйлдвэрлэл, зах худалдааны төв гээд нийт 394 мянган метр квадрат талбайд ариутгалыг хийлээ. Холбогдох журмын дагуу 37 тусгай зөвшөөрөл бүхий аж ахуй нэгжүүд ариутгалыг хийж байна. Мэргэжлийн байгууллагаас ариутгалын бодисыг шинжилсэн. Мөн нийслэлийн хэмжээнд эрсдэл бүхий цэгүүдээс 58 мянган тонн хур хогийг төвлөрсөн хогийн цэгрүү зөөвөрлөх ажлыг хийж гүйцэтгэлээ.Мөн төмөр хайс хашлага тэмдэг тэмдэглэгээг угаах ажлыг зохион байна”гэв.

Ийнхүү урьдчилан сэргийлэх чиглэлээр авч хэрэгжүүлж байгаа арга хэмжээнүүдийн талаарх мэдээллийг сонссоны дараа Нийслэлийн Онцгой Комиссын Дарга С.Амарсайхан үүрэг чиглэл өглөө.

Өнөөдрийн байдлаар Монгол улсад энэхүү вирус илрээгүй байгаа ч бид санаа амарч болохгүй. Өглөө болгон нас баралт нэмэгдэж байна. Нийслэлд гарч байгаа шийдвэрүүдийг хэрэгжүүлэх тал дээр Дүүргүүдийн онцгой комиссын дарга нар онцгой анхаарах шаардлагатай байна.Төр засгаас сар шинийн баярыг тэмдэглэхгүй байх уриалга, зөвлөмж гаргасан ч үүнд хяналт тавих иргэдийн хөдөлгөөнийг хязгаарлах чиглэлд онцгой анхаарах хэрэгтэй. Хүн олноор цугладаг гэр болон амралтын газруудад хяналт тавьж ажиллана. Урьдчилан сэргийлэх тал дээр нийтийн тээврийг хүртэл зохицуулалт хийх ажил явагдана. Айл хэсэхгүй байх аав ээжээ эрсдэлд оруулахгүй байх чиглэлд зохицуулалт хийгдэж байна гэж ойлгох хэрэгтэй. Нийслэлийн нутаг дэвсгэрийн бүх шатанд эрсдэлийг таслан зогсоох шаардлагатай арга хэмжээг авах зорилгоор захирамж гарч ажиллаж байна. Дэлхийд хурдацтай тархаж байгаа цар тахлаас бид сонор сэрэмжтэй байж иргэдээ хамгаалах,хүнд нөхцөл байдлыг даван туулна.Энэ хүнд нөхцөл байдалд нийслэлийн иргэд ч гэсэн хариуцлагатай байх шаардлага тулгарч байна. Нийслэлийн нийтийн тээврийн үйлчилгээний газарт амны хаалт зүүгээгүй бол үйлчлэхгүй байхаар болсон. Урин дулаан цаг ирж байгаа энэ үед элдэв төрлийн нян, бактери нэмэгдэх эрсдэлтэй тиймээс ариутгал халдваргүйтгэлийг шуурхай хийж бэлэн байдлыг хангаж ажиллах үүрэг даалгаврыг НОК-ын гишүүдэд өглөө.Мөн хуралдааны төгсгөл Халдварт өвчнөөс урьдчилан сэргийлэх ажлын хүрээнд иргэдийн хувийн ариун цэврийг сайтар хангаж, нийтийн эзэмшлийн гудамж талбайд болон олон нийтийн дунд нус цэрээ хаяж, ил задгай бие засахгүй байхыг нийслэлчүүдэд хандан уриаллаа.