Month: February 2020

Цаг үеийн нөхцөл байдалтай холбогдуулан өнөөдөр НОБГ-ын Гамшгаас урьдчилан сэргийлэх хэлтсийн дарга, хурандаа Г.Нэргүй, нийслэлийн Мэргэжлийн хяналтын газрын хэлтсийн дарга Н.Шинэ-Оргил, НЭМГ-ын Нийгэм эрүүл мэндийн бодлогын хэлтсийн дарга О.Энхзаяа нар мэдээлэл хийлээ.

Яаралтай түргэн тусламжийн төвд нийт зургаан өрхөөс дуудлага ирж, эмнэлгийн тусламж үйлчилгээг авсан байна. НОБГ-ын Гамшгаас урьдчилан сэргийлэх хэлтсийн дарга, хурандаа Г.Нэргүй “Нийслэлийн Эрүүл мэндийн төвүүдэд агаар дахь хорт хийн агууламжийг тодорхойлох багаж, хордлогын үед хүний бие дэх агаарын хий хэмжигч тоног төхөөрөмжүүдийг суурилуулж дууслаа. Коронавирусын халдвар, томуу томуу төст өвчний тархалт, шувууны томуу өвчнөөс урьдчилан сэргийлэх ажлыг эрчимжүүлэх үүднээс нийслэл, дүүргийн албан хаагчид хуваарийн дагуу явган эргүүл хийж ажиллана. Явган эргүүлүүд хотын төв болон гэр хорооллын гудамжаар явж иргэдэд амны хаалтаа зүүх, олон нийтийн газар нус, шүлсээ хаяхгүй байх, ил задгай бие засахгүй байхыг сануулж ажиллах юм” гэв.

Өнөөдрийн байдлаар нийтийн эзэмшлийн гудамж талбайд ил задгай биеэ засч, нус шүлсээ хаясан 200 гаруй иргэнд Зөрчлийн тухай хуулиар холбогдох арга хэмжээг авч ажиллажээ.

Нийслэлийн Мэргэжлийн хяналтын газрын хэлтсийн дарга Н.Шинэ-Оргил “Автотээврийн шалган нэвтрүүлэх товчоодод нийслэлийн Цагдаагийн газар, Мэргэжлийн хяналтын байцаагч нар 24 цагаар хяналт тавьж ажиллаж байгаа. Өнгөрсөн амралтын өдрүүдэд Улаанбаатар хот руу түүхий нүүрс нэвтрүүлэх гэсэн зөрчил гараагүй” хэмээн мэдээллээ. Өнгөрсөн сарын мөн энэ үетэй харьцуулахад томуу, томуу төст өвчлөл 2.1 хувиар буурсан үзүүлэлттэй байна. Дүүргийн болон Эрүүл мэндийн нэгдсэн төвүүд уртасгасан цагаар ажиллаж, хэвтэн эмчлүүлэгчдийн ачаалал хэвийн байгаа аж. Коронавирусын халдвар Монгол Улсад бүртгэгдээгүй байгааг Нийслэлийн Эрүүл мэндийн газрын Нийгэм эрүүл мэндийн бодлогын хэлтсийн дарга О.Энхзаяа албан ёсоор мэдэгдлээ. Тэрбээр “Дэлхийн 25 улсад бүртгэгдээд байгаа коронавирусын халдвараас урьдчилан сэргийлэх арга хэмжээг авч ажиллаж байна. Өнөөдрийн байдлаар ХӨСҮТ-д гурав, Дорнодод 1, Замын-Үүдэд нэг иргэн шинжилгээний хариугаа хүлээж байна” гэв.

Коронавирусын халдвараас урьдчилан сэргийлэх арга хэмжээг авч хувийн ариун цэврээ сайтар хангаж, онцын шаардлаггүй тохиолдолд олон нийтийн газраар зорчихгүй байхыг албаныхан зөвлөлөө.

Зудын эрсдэлийн үнэлгээгээр Завхан аймгийн Нөмрөг, Баянтэс, Тосонцэнгэл, Баянхайрхан, Их-Уул, Түдэвтэй, Тэлмэн, Тэс, Асгат зэрэг 9 сум цагаан зудтай, Отгон, Сонгино, Цагаанчулуут, Завханмандал, Эрдэнэхайрхан зэрэг таван сум зудархуу байгаа юм.

Тиймээс нөхцөл байдалтай газар дээр нь танилцах, орон нутагт тулгамдсан асуудлыг шийдвэрлэх, цагийн байдалд үнэлэлт, дүгнэлт өгөх зорилгоор Монгол Улсын Шадар сайд, Улсын онцгой комиссын дарга Ө.Энхтүвшин, Онцгой байдлын ерөнхий газрын тэргүүн дэд дарга, бригадын генерал Г.Ариунбуян нараар ахлуулсан Шуурхай бүлэг өнөөдөр Завхан аймгийн Тосонцэнгэл суманд ажиллалаа.

Энэ үеэр аймгийн Онцгой комиссыг хуралдуулан өвөлжилтийн нөхцөл байдал, шинэ коронавирусийн халдвараас урьдчилан сэргийлэх талаар авч хэрэгжүүлж байгаа арга хэмжээний талаар мэдээлэл сонсож, Монгол Улсын Шадар сайдын зүгээс холбогдох албан тушаалтнуудад цаг үеийн асуудлаар хоорондоо уялдаа холбоотой ажиллаж, аймаг, орон нутгийн хүн амд шинэ коронавирус болон шувууны томуугийн H5N1 халдвараас урьдчилан сэргийлэх, эрүүл ахуйн дэглэмийг баримтлах талаар зөвлөгөө, мэдээлэл өгөхөд онцгой анхаарах, ХӨСҮТ-өөс гаргасан стандартын дагуу аймаг, орон нутагтаа оёдлын цех, үйлдвэрүүдтэй хамтран ажиллаж, амны хаалт үйлдвэрлэх, халдвараас урьдчилан сэргийлэх, тэмцэх арга хэмжээнд шаардагдах санхүүжилтын асуудлыг тухай бүр шуурхай шийдвэрлэж Засаг даргын нөөц хөрөнгөөс гаргах зэрэг үүрэг, чиглэл өглөө.

Завхан аймгийн хувьд 24 сум 116 баг, 73 мянган хүн амтайгаас 9000 гаруй нь малчин өрх, 3,8 сая малтай. Энэ өвөл 4.4-62.2 мм-ийн хэмжээтэй хур тунадас 42 удаа орсон бол хамгийн хүйтэндээ Баянтэс суманд-48 градус болж хүйтэрсэн байна.

Аймгийн аюулгүйн нөөцийн 144 тн өвс, 123 тн тэжээл, мөн Улсын нөөцөөс 75 тн тэжээлийг малчин иргэдэд хөнгөлттэй үнээр олгосон. Одоогийн байдлаар ихэнх сумын аюулгүйн нөөц, малчдын бэлтгэсэн өвс, тэжээл дуусч байгааг аймгийн Засаг дарга онцолсон.

Шинэ коронавирусийн халдвараас урьдчилан сэргийлэх халдвар, хамгааллын дэглэмийг сахиулах, ард иргэдэд мэргэжил аргазүйн зөвлөгөө өгөх “Ажлын хэсэг”-ийг байгуулан ажиллаж байна. Нийт аймгийн Засаг даргын нөөц хөрөнгөөс 100 сая төгрөгийг зарцуулжээ.

Түүнчлэн аймгийн Засаг дарга Д.Батсайхан, шуурхай бүлгээс 950 тн өвс, 950 тн тэжээл, Завханмандал, Ургамал сумдад түргэн тусламжийн автомашин, Онцгой байдлын газар, Тэлмэн суманд шуурхай албаны автомашинуудыг шийдвэрлэж өгөхийг хүслээ гэж Онцгой байдлын ерөнхий газраас мэдээллээ.

2020 оны эхний сард 3,474 гэмт хэрэг бүртгэгдэж, өмнөх оны мөн үеэс 9.2 хувиар буурчээ.

Ингэж буурахад:

• Өмчлөх эрхийн эсрэг гэмт хэрэг 6.4 хувиар,
• Хүний бэлгийн эрх чөлөө, халдашгүй байдлын эсрэг гэмт хэрэг 70.3 хувиар,
• Залилах гэмт хэрэг 15.3 хувиар,
• Хулгайлах гэмт хэрэг 5.5 хувиар,
• Хүний эрүүл мэндийн халдашгүй байдлын эсрэг гэмт хэрэг 6 хувиар,
• Хүний амьд явах эрхийн эсрэг гэмт хэрэг 13 хувиар,
• Гэр бүлийн хүчирхийлэл үйлдэх гэмт хэрэг 63.8 хувиар буурсан нь голлон нөлөөлсөн байна.

Харин хөдөлгөөний аюулгүй байдал, тээврийн хэрэгслийн ашиглалтын журмын эсрэг гэмт хэрэг 13.4 хувиар, мал хулгайлах гэмт хэрэг 5.4 хувиар, хүрээлэн байгаа орчны эсрэг гэмт хэрэг 27.5 хувиар тус тус өсжээ.

Мөн хүүхэд оролцсон хэрэг 18 болж, 38.5 хувиар, эмэгтэй хүн оролцсон хэрэг 234 болж, 23.8 хувиар өссөн байна.

Гэмт хэргийн улмаас нийт 14.3 тэрбум төгрөгт хүрч, 847.7 сая төгрөгийн хохирлыг нөхөн төлүүлсэн нь өмнөх оны оны үеэс 5.1 тэрбум төгрөгөөр буурсан үзүүлэлт байна.

Хэргийн улмаас хохирсон 3.4 мянган хүний 134 нь 18 хүртэлх насны хүүхэд, 1.4 мянга нь эмэгтэйчүүд байгаа бөгөөд хэргийн улмаас 830 хүн гэмтэж, 211 хүн нас барсан нь өмнөх оны мөн үеэс гэмтсэн хүн 10.1 хувиар, нас барсан хүн 2.9 хувиар өсжээ.

Өнгөрсөн сард гэмт хэрэгт холбогдсон нийт 529 яллагдагчийн:

• 0.6 хувь нь 14-15 насных,
• 3 хувь нь 16-17 насных,
• 46.1 хувь нь 18-29 насных,
• 32.9 хувь нь 30-39 насных,
• 11.9 хувь нь 40- 49 насных,
• 4.7 хувь нь 50-59 насных,
• 0.8 хувь 60, түүнээс дээш насных байна гэлээ

“Шинэ коронавирусийн халдвараас урьдчилан сэргийлэх тухай” Барилга, хот байгуулалтын сайдын 2020 оны 02 дугаар сарын 13-ны өдрийн 38 дугаар тушаал гарсан.

Энэ тушаалын дагуу салбарын хэмжээнд өндөржүүлсэн бэлэн байдал цуцлагдах хүртэлх хугацаанд нийтийг хамарсан хэлэлцүүлэг, уулзалт, хурал, зөвлөгөөний арга хэмжээг зохион байгуулахгүй байхыг салбарын байгууллагын удирдлагуудад үүрэг болгоныг анхаарч, хэрэгжүүлж ажиллахыг Та бүхэнд зөвлөж байна.

Өндөржүүлсэн бэлэн байдлын зэрэгт шилжсэнтэй холбогдуулан Онцгой байдлын ерөнхий газрын даргын 2018 оны А/274 дүгээр тушаалаар батлагдсан “Засаг захиргаа, нутаг дэвсгэрийн нэгж, төрийн болон орон нутгийн захиргааны байгууллага, хуулийн этгээдийг ажлын тусгай горимд шилжүүлэх, ажиллах журам”-ын дагуу өөрийн байгууллага, нэгжийн хүрээнд төлөвлөгөө баталж, холбогдох арга хэмжээг авч ажиллахыг хүсье.

Өчигдөр буюу энэ сарын 16-нд 03:00 цагийн орчимд Сүхбаатар аймгийн Баруун-Урт суманд иргэн “Б” архи согтууруулах ундааны зүйл хэтрүүлэн хэрэглэсэн үедээ “Toyota Mark-II” маркийн автомашиныг жолоодож зам тээврийн осол гаргаж, улмаар ослын газрыг хэргийн газраас зугтжээ.

Энэ хэрэгтэй холбоотойгоор жолооч нар согтууруулах ундааны зүйл хэрэглэсэн үедээ тээврийн хэрэгсэл жолоодохыг таслан зогсоох, иргэдийг энэ төрлийн дуудлага мэдээллийг цагдаагийн байгууллагад мэдэгдэж гарч болзошгүй аюулаас урьдчилан сэргийлж хамтран ажиллахыг Тээврийн цагдаагийн газраас зөвлөлөө.

Шинэ коронавирусийн аюулаас урьдчилан сэргийлэх, халдвар хамгааллыг нэмэгдүүлэх зорилгоор нийслэлээс нийтийн тээврийн ариутгал, халдваргүйжүүлэлтийг эрчимжүүлэх, цэвэрлэгээ үйлчилгээг сайжруулах чиглэлийг НТҮГ, НМХГ, нийтийн тээврийн үйл ажиллагаа эрхэлдэг аж ахуйн нэгжүүдэд өгсөн.

Энэ хүрээнд Нийслэлийн Зам, тээврийн асуудал хариуцсан төслүүдийн удирдагч Б.Отгонсүхээр ахлуулсан ажлын хэсэг нийтийн тээврийн ариутгал, цэвэрлэгээ хэрхэн хийгдэж байгааг тогтмол шалгаж, зөвлөмж хүргүүлэн ажиллаж байна. Энэхүү нийслэлээс өгсөн үүрэг чиглэлийн дагуу Сутайн буянт ХХК, ЭмСИД ХХК, Автотерминал ХХК, Тэнүүн Огоо ХХК, Эс Энд Эй ХХК зэрэг нийтийн тээврийн үйлчилгээ эрхэлдэг аж ахуйн нэгжүүд амралтын өдрүүдэд иж бүрэн цэвэрлэгээ хийж, мэргэжлийн байгууллагаар бүрэн ариутгал, халдваргүйжүүлэлт хийлгэлээ. Иргэд, зорчигчид ч мөн цэвэрлэгээ үйлчилгээ, ариутгалын ажилд сэтгэл хангалуун байгаагаа нийслэлийн засаг даргын тамгын газарт ирүүлсэн байна.

Энгийн үед өдөртөө 600 гаруй мянган зорчигчийг давтагдсан тоогоор тээвэрлэдэг байсан бол карантины үед 358 мянган зорчигчдод тогтмол үйлчилж байна. Нийтийн тээврүүдэд халдвараас урьдчилан сэргийлэх зөвлөмжүүд тавигдаж эхэлжээ. Энэ сарын 13-аас эхлэн төрийн болон нутгийн захиргааны байгууллагуудыг өндөржүүлсэн бэлэн байдлын зэрэгт /хэсэгчлэн/ шилжүүлсэн. Тиймээс нийтийн тээврийн ариутгал, халдваргүйжүүлэлт, цэвэрлэгээ үйлчилгээг тогтмол хийлгэж, зөвлөмж өгч ажиллахыг Нийслэлийн Зам, тээврийн асуудал хариуцсан төслүүдийн удирдагч Б.Отгонсүх НТҮГ, НМХГ, ЗАА –д үүрэг болголоо.

Бурхан Халдун ууланд зорчиж байсан таван иргэний нэг нь нас барсан тул тусламж хүсэн өчигдөр оройн 22:18 цагт Онцгой байдлын байгууллагад дуудлага өгчээ. Улаанбаатар хотоос Хэнтий аймгийн Өмнөдэлгэр сумын Баянзүрх багийн нутаг Бурхан Халдун ууланд буюу аймгийн төвөөс 400 км, сумын төвөөс баруун хойд зүгт 200 км-т Ланд-200 загварын автомашинтай 5 иргэнээс иргэн Э /35 настай, эрэгтэй/ нас барсан тусламж хэрэгтэй байна гэсэн дуудлагыг хоёрдугаар сарын 16-ны өдрийн 22:18 цагт хүлээн авсан байна.

Дуудлагын дагуу Хэнтий аймгийн Цагдаагийн газрын 3 алба хаагч, 1 автомашинтай 02:15 цагт Биндэр сумаас, аймгийн Онцгой байдлын газрын Эрэн хайх, аврах салбарын 6 алба хаагч, 1 автомашинтай 06:00 цагт тус тус эрэн хайх, аврах ажиллагааг эхлүүлжээ.