Month: February 2020

Аргын тооллын хоёрдугаар сарын 18, Ангараг гариг. Билгийн тооллын 25, цагаагчин туулай өдөр. Өдрийн наран 7:55 цагт мандан, 18:18 цагт жаргана. Эл өдөр элдэв үйлд хянуур хандах хэрэгтэй ба ан гөрөө хийх, мал адгуус муулах, угаал үйлдэх, мал аж ахуйн үйл, удирдлагын суудалд суух, огторгуйн үүдийг боох, их хүмүүнтэй уулзахад сайн. Газар хагалах, ус булгийн эх малтах, балгадын суурь тавих, нохой худалдан авахад муу.

Өдрийн сайн цаг нь хулгана, бар, туулай, морь, хонь, тахиа болой.

Үс шинээр үргээлгэх буюу засуулахад тохиромжгүй.

Нийслэлийн Эрүүл мэндийн газрын дарга Л.Төмөрбаатар шинэ коронавирусын халдвараас сэргийлэх чиглэлээр авч хэрэгжүүлж буй зарим ажлын талаар өнөөдөр мэдээлэл хийлээ. Тухайлбал:

• Коронавируст /Ковид-19/ халдварын талаарх иргэдэд зориулсан мэдээлэл, зөвлөмж, сэрэмжлүүлгийг телевиз, хэвлэл мэдээллийн байгууллага, олон нийтийн цахим сүлжээгээр тогтмол түгээн ажиллаж байна.
• Коронавируст /Ковид-19/ халдвараас сэргийлэх гарын авлага 100,000 ш, зурагт хуудас 3000 ширхэгийг боловсруулан хэвлүүлж, авто тээврийн шалган нэвтрүүлэх товчоодоор нэвтэрч байгаа иргэдэд мэдээлэл, зөвлөмжийг хүргэж эхлээд байна.
• Коронавируст /Ковид-19/ халдварын сэжигтэй тохиолдолд нийслэлийн хэмжээнд мөрдөх шуурхай мэдээлэх журмыг шинэчлэн баталсан.
• Нийслэлийн Түргэн тусламжийн төвийн Баянзүрх, Чингэлтэй, Хан-Уул, Сонгинохайрхан, төв салбаруудад коронавируст /Ковид-19/ халдварын үед дуудлагаар үйлчлэх түргэн тусламжийн хоёр багийг томилон, ажиллуулах бэлэн байдлыг хангаад байна.
• 2020 оны 01 дүгээр сарын 20-ноос эхлэн тосгон, Өрхийн эрүүл мэндийн төвүүдийн нийт үзлэгийн 60-аас доошгүй хувийг гэрийн эргэлтэд шилжүүлж, бага насны болон суурь өвчтэй хүүхдүүд, өндөр настан, жирэмсэн эх, архаг хууч өвчтэй хэвтрийн болон хөгжлийн бэрхшээлтэй иргэдэд үзүүлэх тусламж, үйлчилгээг гэрээр үзүүлэх зохион байгуулалтын арга хэмжээг авч ажиллаж байна.
• Короновируст /Ковид-19/ халдвараас сэргийлэх, зөвлөгөө мэдээлэл өгөх утсыг дүүргийн Эрүүл мэндийн төв, өрх, тосгоны Эрүүл мэндийн төв, хүүхдийн сэргээн засах төвүүдэд, мөн лавлагаа мэдээлэл өгөх утсыг дүүргийн нэгдсэн эмнэлэг, амаржих газар, төрөлжсөн мэргэжлийн төвүүдэд тус, тус нээн ажиллуулж байна.
• Эрүүл мэндийн байгууллагуудад Коронавируст /Ковид-19/ халдварын сэжигтэй тохиолдол илэрсэн үед шуурхай хэрэгжүүлэх үйл ажиллагааны талаарх зөвлөмжийг холбогдох тушаал, зааврын дагуу боловсруулан гаргаж, харьяа эрүүл мэндийн байгууллагууд, хувийн хэвшлийн эрүүл мэндийн байгууллагуудад хүргүүлэхэд бэлэн болоод байна.

Шинэ коронавирус өвчнөөс урьдчилан сэргийлэх, бэлэн байдлыг хангах ажлын хүрээнд НМХГ-ын албан хаагчид өндөржүүлсэн бэлэн байдалд ажиллаж байна. Албан хаагчдын аюулгүй байдлыг хангах, ажиллах нөхцөл боломжийг сайжруулах үүднээс ариутгасан бээлий, амны хаалт, нүдний хамгаалалт, халат, спиртэн суурьтай гар халдваргүйжүүлэгч зэрэг нэг удаагийн хувийн хамгаалах хэрэгслээр 500 албан хаагч хангагдлаа.

Сар шинийн баяртай холбоотой үзэсгэлэн худалдаа болон урамшуулалт худалдаа, хаяг реклам зэрэг худалдаа үйлчилгээг зогсоох талаар Ерөнхийлөгчийн 10 дугаар зарлигийн хүрээнд Сүхбаатар дүүргийн хэмжээнд 2020 оны 02 дугаар сарын 16-ны өдөр нийт 38 газар хяналт тавьж ажиллалаа.

Хяналт шалгалтаар 14 дүгээр хороо 9 Эрдэнэ төв, Тэрхийн эх худалдааны төв болон 12 дугаар хорооны Сансар худалдааны төвүүдийн гадна байршуулсан сар шинийн баяртай холбоотой сурталчилгааны самбар, хэвлэмэл хуудсыг буулгаж ажиллалаа.

Улсын Их Хурлын дарга Г.Занданшатар өнөөдөр (2020.02.17) нийслэлийн зарим эм ханган нийлүүлэх төв болон эмийн сангууд, “Бөмбөгөр” худалдааны төвөөр орж, амны хаалт, ариутгагч бодисын хүрэлцээ хангамж, махны үнэ ханшийн байдалтай танилцлаа.

Чингэлтэй дүүргийн нутаг дэвсгэрт үйл ажиллагаа явуулж буй дөрвөн эмийн сангаар ороход хоёр эмийн санд нь нэг удаагийн амны хаалт, гар ариутгагчийн нөөц байхгүй, дууссан байлаа. Шүүлтүүртэй даавуун амны хаалт 3500 төгрөгөөр зарагддаг байсан бол өнөөдрийн байдлаар 4000 төгрөгөөр зарагдаж байна. Нийлүүлэлт хангалтгүй байгаа. Харин эм, тарианы борлуулалт хэвийн байгааг эмийн сангийнхан хэлж байсан юм.

Үргэлжлүүлэн УИХ-ын дарга Г.Занданшатар Бөмбөгөр худалдааны төвөөр орж, худалдаа эрхлэгчидтэй уулзлаа.

Буруу ташаа мэдээллийн улмаас иргэд хүнсээ ихээр худалдан авч, нөөцлөх асуудал гарсан. Үүнтэй холбоотойгоор өргөн хэрэглээний барааны үнэ ханшийг хөөрөгдөх, зохиомлоор өсгөх байдал гарсныг худалдаа эрхлэгчид хэлж байсан юм.

“Худалдан авалт өмнөх жилтэй харьцуулахад бага байна. Жилийн жилд сар шинийн баярын өмнө барааны үнэ нэмэгддэг. Нийлүүлэлт багассан учраас үхрийн махны үнэ өссөн. Сүүлийн хоёр жилд адууны махны үнэ өсөх хандлагатай байгаа. Цаанаасаа мах үнэтэй ирдэг болсон. Гадуур янз бүрийн цуурхал яриа гарснаас болсон уу, өнгөрсөн амралтын хоёр өдөр худалдан авалт их байсан” гэж Бөмбөгөр худалдааны төвийн худалдагч П.Жаргалбуян хэллээ.

Худалдаа, үйлчилгээний төвүүдээр үйлчлүүлж байгаа иргэд амны хаалттай байдаг болсныг ч тэд хэлж байлаа.

“Өнгөрөгч амралтын өдрүүдэд Үндэсний статистикийн газар болон бусад холбогдох байгууллагууд зах, худалдааны төвүүдээр судалгаа хийж үзсэн. Супермаркетуудын хувьд үнийн өсөлт харьцангуй бага байсан бол бөөний худалдааны төвүүд дээр өсөлттэй харагдлаа. Зохиомол хомсдол үүсгэж, өргөн хэрэглээний барааны үнийг хөөрөгдөх байдлыг зогсоох талаар Хүнс, хөдөө аж ахуй, хөнгөн үйлдвэрийн яам, Шударга өрсөлдөөн хэрэглэгчийн төлөө газарт тодорхой арга хэмжээ авахыг чиглэл болгосон” гэж УИХ-ын дарга Г.Занданшатар хэллээ.

Тэрбээр, “Энэ цаг үед иргэд маань тайван амгалан, ухамсартай байх хэрэгтэй. Хүн төрөлхтний өмнө тулгарч байгаа сорилт, бэрхшээлийг “Нэг нь нийтийн төлөө, нийт нь нэгийн төлөө” сэтгэлээр давж гарах ёстой. Мах, маск, гурил зэргийг бөөндөж авах хэрэггүй. Үүнээс болж зохиомол хомсдол, зохиомол эрэлтийг үүсгэж байна. Хүнсний бүтээгдэхүүний гадаад дотоод нийлүүлэлтээ зохицуулж байгаа учраас хомсдол үүсэхгүй, хангамж хүрэлцээтэй байгаа. Харин амны хаалт, ариутгалын бодисын хүрэлцээ, нийлүүлэлтийг нэмэгдүүлэх шаардлагатай байна. Дөрвөн том үйлдвэр болон өрхийн үйлдвэрлэгчтэй гэрээ байгуулж, амны хаалтны нийлүүлэлтийг нэмэгдүүлж байгаа. Үнэ өссөн байна. Үүнийг гэрээгээр зохицуулж, үйлдвэрлэгч, нийлүүлэгчдийн үнийг нэмэгдүүлэхгүй байх тал дээр анхаарч ажиллана. Иргэд, үйлдвэрлэгчид, аж ахуйн нэгжүүд хүчээ нэгтгэж, хямарч бухимдалгүй, ухамсартай байвал ямар ч бэрхшээлийг давж чадна. Хүн бүр эрүүл ахуй, ариун цэврээ чанд сахих хэрэгтэй.

Уламжлалт сар шинийн баяраараа айл хэсэхгүй, цахимаар шинэлэг байдлаар золголт хийж, золголтын мөнгөө мобайлаар шилжүүлэх байдлаар зохицуулах нь зөв. Сар шинийн өдрүүдээр хийгдэж байгаа гүйлгээнээс шимтгэл авахгүй байх талаар Төвбанк болон банкуудын холбооныхонтой уулзаж, чиглэл өгсөн” гэв.

Түүнчлэн Сар шинийн баярыг цуцалж байгаа хэрэг биш, үүссэн нөхцөл байдлаас шалтгаалаад нэг жил өнжиж байна гэж ойлгох хэрэгтэй. Энэ хэцүү өвчинд ахмад настан илүү өртөмтгий байгаа учраас очиж золгоогүй нь үл хүндэтгэсэн хэрэг болохгүй. Харин ч хүндэлж, хайрлаж байгаагийн илрэл гэдгийг ч тэрбээр онцлон тэмдэглэсэн юм.

“Эрдэнэс-Тавантолгой” ХК-ийн Төлөөлөн Удирдах Зөвлөл хувьцаа эзэмшигчдэдээ ногдол ашиг өгөх шийдвэрийг өнөөдөр гаргажээ.

Уг шийдвэрийн дагуу нэгж хувьцаанд 90 төгрөг олгох бөгөөд 1,072 ширхэг хувьцаатай иргэнд 96,480 төгрөг оногдох юм байна.

Компанийн тухай хуулийн дагуу Төлөөлөн удирдах зөвлөлөөс гаргасан шийдвэрийг энэ оны тавдугаар сарын 1-ний дотор Хувьцаа эзэмшигчдийн хурлаар хэлэлцүүлэх ажээ. Мөн Санхүүгийн зохицуулах хорооны ногдол ашиг хуваарилах шинэ журмын дагуу 2020 онд Үнэт цаасны төвлөрсөн хадгаламжийн төвөөр дамжуулан хувьцаа эзэмшигчдэд ногдол ашгийг олгох юм. Харин иргэд хувьцааны дансаа баталгаажуулсан байх ёстой.

Мөн ЭТТ нэгдсэн бүртгэлийн аппликейшнийг танилцууллаа. Уг аппликейшнийг татаж авснаар иргэд хувьцааныхаа тоо ширхэгийг шалгах, хянах, мэдээ мэдээлэл авах, санал өгөх зэргээр ашиглаж, цаашдаа ЭТТ компанитай хувьцаа эзэмшигчийн зүгээс холбогдох, хөрөнгийн зах зээлд оролцох бүрэн боломжтой болох юм.

Монгол Улсын Их Хурлын гишүүн, Хүнс, хөдөө аж ахуй, хөнгөн үйлдвэрийн сайд Ч.Улаан 2020 оны 2 дугаар сарын 14-15-ны өдрүүдэд Бүгд Найрамдах Австри Улсад ажлын айлчлал хийв.

Хүнс, хөдөө аж ахуй, хөнгөн үйлдвэрийн сайд Ч.Улаан Вена хотноо ажиллах үеэрээ мөн Дэлхийн банкны Хөрөнгө оруулалтыг дэмжих нэгжийн удирдлагуудтай уулзаж, хөдөө аж ахуйн салбар руу чиглэсэн гадаадын шууд хөрөнгө оруулалтыг дэмжих, үндэсний жижиг, дунд үйлдвэрүүдийг хөгжүүлэх, тэдгээрийн өрсөлдөх чадварыг сайжруулах асуудлаар хамтран ажиллах талаар санал солилцов. Үүнээс гадна айлчлалын үеэр Австрийн бяслагны жижиг загвар үйлдвэр, хөдөө аж ахуйн сургалт, судалгааны төвийн үйл ажиллагаатай танилцлаа.

Гадаад харилцааны яамны хүсэлтийн дагуу Улсын Онцгой комиссын шийдвэрээр Монгол Улсын иргэдийг БНХАУ-ын Эрээн хотоос Дорноговь аймгийн Замын-Үүдийн автозамын шалган нэвтрүүлэх боомтоор энэ сарын 15-ны өдөр гурван автобусаар татан авч, 104 зорчигч, 3 жолооч хилээр нэвтрүүлэв.

Энэ үеэр Мэргэжлийн хяналтын байгууллага чиг үүргийн дагуу хяналт тавин зорчигчдын биеийн дулааныг хэмжин асуумж тандалт хийж, тээврийн хэрэгсэл, ачаа тээшинд ариутгал халдваргүйтгэл хийлээ. Зорчигчдыг автобуснаас 5, 5-аар нь буулган ариутгал, халдваргүйтгэл хийсэн бөгөөд биеийн дулааныг тус бүр 4 удаа хэмжиж, халдварт өвчний сэжигтэй нэг зорчигчийг илрүүлэн тусгаарлаад байна. Тэрээр БНХАУ-ын Эрээн хотод хувиараа ажил хийдэг, өнгөрсөн сард хилээр нэвтрээд буцаж гарсан, Эрээн хотын худалдааны төвөөс түүхий загас авч идсэн гэх өгүүлэмжтэй байгаа аж. Замын-Үүд сумын Онцгой комиссын шийдвэрээр бусад 103 хүнийг түр хяналтад авчээ.

Улсын Дээд шүүхийн хяналтын шатны эрүүгийн хэргийн шүүх хуралдаанаар М.Сономпилд холбогдох хэргийг шүүгдэгч, түүний өмгөөлөгчдийн гаргасан гомдлын дагуу өнөөдөр хянан хэлэлцлээ.

Анхан болон давж заалдах шатны шүүхээс М.Сономпилийг хахууль авсан гэмт хэрэг үйлдсэн гэм буруутайд тооцож, Эрүүгийн хуулийн 22.4 дүгээр зүйлийн 4-т зааснаар 4 жил хорих ял оногдуулж, уг ялыг нээлттэй хорих байгууллагад эдлүүлэхээр шийдвэрлэсэн юм.

Дээд шүүхээс анхан болон давж заалдах шатны шүүхийн шийдвэрийг хэвээр үлдээлээ.

М.Сономпил нь 2012 онд УИХ-ын гишүүн, мөн Батлан хамгаалахын сайдаар ажиллаж байсан юм.

Нийслэлийн нийтлэг үйлчилгээний газар нь шинэ коронавирусийн халдварт өвчнөөс урьдчилан сэргийлэх зорилгоор Нийслэлийн Засаг захиргааны байруудад ажиллаж буй төрийн албан хаагчид, үйлчилгээ авч буй иргэдэд тогтмол амны хаалт зүүх шаардлага тавьж, халуун хэмжигчээр халууныг шалган нэвтрүүлж байна. Мөн Нийслэлийн засаг захиргааны байруудын нийтийн эзэмшлийн талбай, ариун цэврийн өрөөнд гар ариутгагч спиртэн суурьт халдваргүйжүүлэлтийн уусмалыг байршуулан ажиллаж байна. Тус халдвараас урьдчилан сэргийлэх цаасан зөвлөмжийг нийтийн эзэмшлийн талбайд ил тод байршуулан, дэлгэцээр урьдчилан сэргийлэх зөвлөгөөг видео хэлбэрээр тогтмол хүргэн ажиллаж байна.

Түүнчлэн онцгой дэглэм тогтоосон, өндөржүүлсэн бэлэн байдалд шилжсэн энэ үед цэвэрлэгээ үйлчилгээндээ онцгой анхаарч Нийслэлийн засаг захиргааны байрууд, Нийслэлийн үйлчилгээний нэгдсэн төвүүдийн цэвэрлэгээ үйлчилгээний давтамжийг нэмэгдүүлэн ариутгалын бодис бүхий уусмалаар халдваргүйжүүлж байна.

Мөн мэргэжлийн байгууллагатай хамтран 2020 оны 02 дугаар сарын 14, 15-ны өдрүүдэд Нийслэлийн засаг захиргааны бaйруудын нийтийн эзэмшлийн 8873.6 м2 талбайд ариутгал, халдваргүйжүүлэлтийг хийлээ.