Month: February 2020

Өмнөд хөршид дэгдсэн шинэ коронавирус дэлхий нийтэд тахлын хэмжээнд хүрэх аюул тулгараад байгаа юм. Монгол Улсад одоогоор бүртгэгдээгүй ч халдвар тархах өндөр эрсдэлтэй орны тоонд багтаж буй. Иймд урьдчилан сэргийлэх арга хэмжээний хүрээнд Монголын эмэгтэйчүүдийн холбоо эхний ээлжинд 10,000 амны хаалт оёж, эмч, эмнэлгийн ажилчид, цагдаа, онцгой байдлын алба, асрамжийн газар, сэтгүүлчдэд үнэ төлбөргүй тараахаар ажиллаж байна.

Энэхүү маск нь элдэв харшил өгөхгүй, цэвэр даавуун материалаар хийсэн /хүүхдийн өлгийний даавуу/, амьсгалахад хүндрэл учруулахгүй, олон удаа угааж, индүүдэн хэрэглэх боломжтой юм.

Нийгмийн хариуцлагын хүрээнд, хайртай хүмүүсийнхээ төлөө, эрүүл нийгмийн төлөө сайн дураараа амны хаалт оёх иргэд МЭХ-той холбогдоно уу.

Жич: Гэрээрээ оёж болно.

Хайртай хүмүүсийнхээ төлөө гараа сайн савандаж угааж, амны хаалтаа тогтмол зүүхийг МЭХ-ноос уриалж байна.

ОБЕГ-ын дэд дарга, хурандаа Ц.Ганзориг БНСУ-ын Чангвон хотын Чангшин их сургууль болон Галын газарт энэ сарын 16-17-ны өдрүүдэд айлчлаад ирлээ.

Энэ үеэр Гамшгаас хамгаалах салбарт хоёр улсын хооронд гурван талт харилцаа хамтын ажиллагааг өргөжүүлэн хөгжүүлэх зорилгоор “Харилцан ойлголцлын санамж бичиг”-ийг байгууллаа.

Санамж бичгийн хүрээнд гал болон гамшгаас урьдчилан сэргийлэх чиглэлийн магистр, докторын сургалтад оюутан солилцох, сургалт, семинар, мэргэжилтнүүдийн уулзалтын талаар харилцан мэдээлэл солилцох, боловсролын үйл ажиллагаа, сургалтыг сайжруулах чиглэлээр сургагч багш, суралцагч, техникийн мэргэжилтнүүд мэдээлэл солилцох, харилцан айлчлал зохион байгуулах, техник, технологи, багаж хэрэгсэл нийлүүлэхэд хамтран ажиллах юм.

Мөн Чангвон хотын захирагч Хо Сонг Моотой уулзаж найрсаг, хамтын ажиллагагаа бэхжүүлэн хөгжүүлэх, гал түймэртэй тэмцэх салбарт олон улсын туршлага солилцох, гал түймэр унтраах, гамшгаас урьдчилан сэргийлэх чиглэлийн техник, технологи, багаж хэрэгсэл нийлүүлэх талаар санал солилцлоо. Уулзалтын үеэр БНСУ-ын Чангвон хотын захиргаанаас ОБЕГ-т дөрвөн ширхэг гал унтраах үндсэн албаны автомашиныг дагалдах техник хэрэгслийг хамт хандивлаж, гал унтраах технологи, ажиллагааны чиглэлээр сургалтын хөтөлбөрийг хэрэгжүүлэхээр тохиролцсон юм.

Түүнчлэн Онцгой байдлын удирдлагын салбарт хамтран ажиллахаар Онцгой байдлын ерөнхий газар болон БНСУ-ын Чангвон хотын хоорондын харилцан ойлголцлын санамж бичигт гарын үсэг зурлаа гэж Онцгой байдлын ерөнхий газраас мэдээллээ.

Монгол улсын Засгийн газрын ээлжит хурал өнөөдөр хуралдаж, шинэ төрлийн корона вирусын халдвараас урьдчилан сэргийлэх зорилгоор Гамшгаас хамгаалах өндөржүүлсэн бэлэн байдлын хугацааг 2020 оны гуравдугаар сарын 30-ныг хүртэлх хугацаанд сунгасан билээ.

Дээрх хугацаанд олон нийтийг хамарсан арга хэмжээ зохион байгуулахыг хориглосон тул 2020 оны гуравдугаар сарын 6-нд зохион байгуулагдахаар төлөвлөөд байсан Монголын үндэсний олимпийн хороо (МҮОХ)-ны Гишүүдийн ээлжит бус чуулганыг цуцалж, хугацааг хойшлуулсныг мэдэгджээ.

Тус хурлын товыг МҮОХ-ны дүрмийн дагуу Гишүүдийн саналыг үндэслэн МҮОХ-ны Гүйцэтгэх зөвлөл хурлаар хэлэлцэж зарлах ажээ. МҮОХ-ны Гишүүдийн ээлжит бус чуулганаар МҮОХ-ны Гүйцэтгэх зөвлөл дэх сул орон тоог сонгох сонгууль явуулах гэж байгаа юм. Сул орон тоонд ерөнхийлөгч, дэд ерөнхийлөгчийн сонгууль багтаж байна.

Шинэ коронавирусийн халдвараас урьдчилан сэргийлэх зорилгоор бүх төрлийн сургалтын байгууллагын үйл ажиллагааг III сарын 30-ныг хүртэл түр зогсоох шийдвэр Засгийн газрын өнөөдрийн хуралдаанаас гарсан. Үүнтэй холбоотойгоор Монгол Улсад IELTS-ийн шалгалтыг албан ёсоор зохион байгуулдаг ESP төв гуравдугаар сарын 5, 7, 14, болон 21-ний шалгалтуудыг цуцалж байгаагаа аж. Тухайн шалгалтуудад бүртгүүлсэн хүмүүс “ESP” төвд хандан шалгалтын өдрөө нэмэлт төлбөргүйгээр шилжүүлэх болон төлбөрөө бүрэн буцаан авах хүсэлт гаргах боломжтой аж.

Мэргэжлийн хяналтын ерөнхий газраас шинэ коронавирусийн эрсдлээс сэргийлэхээр хийж буй хяналт шалгалтын талаар өнөөдөр мэдээлэл хийлээ.

МХЕГ-ын Эрүүл мэндийн хяналтын хэлтсийн дарга Д.Баярболд: “БНХАУ-д бүртгэгдсэн шинэ коронавирусийн халдвар дэлхийн олон орон бүртгэгдэж ДЭМБ–аас нийгмийн эрүүл мэндийн ноцтой байдал үүссэнийг зарласан.

2020 оны нэгдүгээр сарын 6-ны өдрөөс эхлэн Мэргэжлийн хяналтын байгууллага өнөөдрийг хүртэл өндөржүүлсэн бэлэн байдалд ажиллаж байна.

Улсын хилийн боомтуудад хилийн мэргэжлийн хяналтын улсын байцаагчид зорчигсдын эрүүл мэндэд хяналт тавьж сэжигтэй тохиолдлуудыг илрүүлж эрүүл мэндийн байгууллагад мэдэгдэж хамтран ажиллаж байна. Өнөөдрийн байдлаар нийт 138 сэжигтэй тохиолдол илрүүлж, Эрүүл мэндийн байгууллагад мэдэгдэж тусгаарлах арга хэмжээ авхуулсан. Мөн бусад байгууллагатай хамтран нөхцөл байдлын эрсдлийн үнэлгээг таван удаа хийсэн.

Мэргэжлийн хяналтын байгууллагаас шинэ коронавирусийн халдвараас сэргийлэхийн тулд 21 аймагт улсын хэмжээнд хяналт шалгалт хийж байна. Улсын онцгой комиссоос гаргасан шийдэрийн дагуу хоёрдугаар сарын 12-ны өдрөөс өндөржүүлсэн бэлэн байдал, тусгай горимоор системийн хэмжээнд шилжин ажиллаж эхэлсэн.

Энэхүү арга хэмжээний хүрээнд улсын хэмжээнд 2,200 мэргэжлийн хяналтын алба хаагч өндөржүүлсэн бэлэн байдалд шилжсэн. Түүнчлэн халдварт өвчний тохиолдол бүртгэгдсэн үед хилийн боомт болон шаардлагатай газруудад дайчлан ажиллуулах улсын байцаагчдын нэрийг гарган, МХЕГ–ын даргын тушаалаар үүрэгжүүлсэн. Нийгмийн эрүүл мэндийн ноцтой байдал, гамшиг үүссэн тохиолдолд 1,465 улсын байцаагчийг дайчлан ажиллуулахаар бэлэн байдлыг хангаад байна” гэлээ.

Мөн тэрбээр “Шинэ коронавирусийн халдвараас сэргийлэх зорилгоор хот хоорондын 569 автобусанд цэвэрлэгээ халдваргүйтэл хийсэн. Мөн 229 шашны байгууллагад хурал зохион байгуулахгүй байх мэдэгдэл хүргэсэн. Цагаан сарын үеэр шашны байгууллагын хурал номд оролцохгүй байх, Ерөнхийлөгчийн зарлигийг дагахыг зөвлөж байна.

Эрүүл мэндийн байгууллагуудын бэлэн байдлыг хангуулахаар үзлэг шалгалтыг хийхэд бэлэн байдал хангагдаагүй 24 эмнэлэгт албан шаардлага хүргэн ажиллалаа. Түүнээс гадна 1,735 үйлчилгээний газарт хяналт хийхэд 54 хувь нь үйлчлүүлэгчдээ бие засах болон гар угаах нөхцөлийг бүрдүүлжээ. Үлдсэн 46 хувьд зөрчлөө арилгах зөвлөмж өгсөн. Хэдийгээр одоогийн байдлаар сургалтын байгууллагын үйл ажиллагааг зогсоосон ч энэ хугацаанд олон хоног үйл ажиллагаа явуулахгүй бол эрүүл ахуйн нөхцөл шаардлага хүнсний аюулгүй байдалтай холбоотой эрсдэл үүсдэг. Үүнээс урьдчилан сэргийлэх чиглэлээр боловсролын байгууллагуудад зөвлөмж өгөөд байна.

Цагаан сарын үеэр дулаан цахилгаан, ариутгалын системийн аюулгүй байдлыг хангуулах чиглэлээр дэд бүтцийн хяналт хийгдэж байна” гэдгийг нэмж хэлсэн юм.

Шинэ коронавирусийн халдвараас урьдчилан сэргийлэх үүднээс өндөржүүлсэн бэлэн байдалд шилжиж, цагаан сарыг тэмдэглэхгүй байх шийдвэр гарсан. Уг шийдвэртэй холбогдуулан сар шинээр орон нутгийн замын хөдөлгөөнийг хязгаарлах асуудлыг шийдвэрлэнэ хэмээн ОБЕГ-аас мэдэгдэгдсэн. Одоогийн байдлаар зургаан аймгийн Онцгой комисс хуралдаж, Засаг дарга нар захирамж гарган сар шинийн өдрүүдээр тухайн аймаг, сумд орох, гарах хөдөлгөөнийг хязгаарлахаа мэдэгдээд байна. Увс, Архангай, Дундговь, Говь-Алтай, Ховд аймгийн Онцгой комисс хуралдаж, энэ сарын 21-27-ныг хүртэл аймаг, сумын төвөөс гарах, орох иргэд, автомашины хөдөлгөөнийг хязгаарлаад байна. Мөн Дорноговь аймгийн Засаг дарга захирамж гаргаж, Хамарын хийд, Хан Баянзүрх хайрхан чиглэлийн тээврийн хэрэгслийн хөдөлгөөнийг гуравдугаар сарын 2-ныг дуустал хязгаарлахаар шийдвэрлэжээ. Харин нийслэл рүү орох, гарах хөдөлгөөнийг хязгаарлах эсэхийг Улсын онцгой комисс хэлэлцэн шийдвэрлэнэ.