Дотоод хэргийн их сургууль (ДХИС)-ийн сонсогчдыг өндөржүүлсэн бэлэн байдлын 2 дугаар зэрэгт шилжүүлэн ажиллуулж байна.

Короновирусын тархалтаас урьдчилан сэргийлэх зорилгоор, цагдаа дотоодын цэргийн ангийн бие бүрэлдэхүүнийг ЦЕГ-ын дарга, дотоодын цэргийн командлагчийн тушаалаар 2 дугаар сарын 13-наас эхлэн өндөржүүлсэн бэлэн байдлын хоёрдугаар зэрэгт шилжүүлэн ажиллуулж байна.

Нийслэл Улаанбаатар хотод оршин суух хаягтай Дотоод хэргийн их сургуулийн 164 сонсогч, 2 дугаар сарын 20-ноос эхлэн нийтийн хэв журам сахиулах, замын хөдөлгөөний зохицуулалтад нэмэгдлээр ажиллуулж эхэллээ.

Нийслэлийн Өмчийн ашиглалт, удирдлагын газар, нийслэлийн Цагдаагийн удирдах газар, нийслэлийн Онцгой байдлын газар, нийслэлийн Мэргэжлийн хяналтын газрын төлөөлөл өнөөдөр “Урт цагаан” үйлчилгээний төвийн үйл ажиллагааг зогсоох асуудлаар нийслэлийн Хэвлэл мэдээллийн төвд мэдээлэл хийлээ.

Иргэдийн ажиллаж амьдрах нөхцөл эрүүл мэндэд сөрөг нөлөөгүй, аюулгүй байдлыг хангасан байх шаардлага зөрчигдөж, ашиглалтын шаардлага хангахгүй болох нь холбогдох мэргэжлийн байгууллагуудын дүгнэлтээр тогтоогдсон учраас Нийслэлийн өмчийн гуравдугаар байр буюу Урт цагаан үйлчилгээний төвийн үйл ажиллагааг өнөөдрөөс эхэлж зогсоох захирамжийг нийслэлийн Засаг дарга гаргажээ. Нийслэлийн Өмчийн ашиглалт, удирдлагын газрын дарга Ш.Үнэнбат “Урт цагааны үйлчилгээний төвийн ашиглалтын ам метр талбайг 9000 төгрөгөөр 30 аж ахуйн нэгж, хувь хүн түрээсийн гэрээ байгуулан өнөөдрийг хүртэл ажилласан. Эдгээр хүмүүс 300-400 хүнд дамлан өндөр үнээр түрээслүүлж нийслэлийн өмч ашиглалтын газартай байгуулсан гэрээгээ ноцтой зөрчиж байна. Мөн түрээслэгчид гэрээнд зааснаар тухайн объектод засвар хийх онцгой эрхтэй. Гэвч өнөөдрийг хүртэл засвар хийгээгүй. Цаашид эдгээр 30 аж ахуйн нэгжийн гэрээг сунгахгүй, харин 400 гаруй түрээслэгчийг хохироохгүй байх тал дээр анхаарна. Өнөөдрөөс эхэлж урт цагааны үйлчилгээний төвийн үйл ажиллагааг бүрэн зогсоож, цагдаагийн байгууллагынхан хяналт тавьж ажиллана.Харин Урт цагааны барилгыг нураах эсэх асуудлыг НИТХ-аар шийдэгдэнэ” хэмээн хэллээ. Нийслэлийн Мэргэжлийн хяналтын газрын Дэд бүтцийн хяналтын хэлтсийн дарга Н.Гантулга “Урт цагаан үйлчилгээний төв нь насжилт өндөртэй ашиглалтын шаардлага хангахгүй, галын эрсдэл үүссэн объект. Энэ байранд ажиллаж байгаа түрээслэгчдийн үйл ажиллагааг зогсоох талаар нийслэлийн Мэргэжлийн хяналтын газраас гурван удаа дүгнэлт гаргаж байсан. Тус барилга байгууламж нь цахилгаан хангамжийн хувьд ч өндөр эрсдэлтэй. Мөн ус дулаан хангамжийн хувьд ч ашиглалтын шаардлагаас хэтэрсэн. Бид өнөөдөр хөрөнгө мөнгийг бус иргэдийнхээ аюулгүй байдлыг хангах асуудлыг нэгдүгээрт тавих хэрэгтэй” гэв.

Нийслэлийн өмчийн гуравдугаар байр болох Урт цагааны барилга нь 1958 онд анх баригдсанаасаа хойш ганц ч удаа засвар хийгдэж байгаагүй байна.

Нийслэлийн ИТХ-ын Тэргүүлэгчдийн өнөөдрийн хурлаар нийтийн тээврийн салбарт үүссэн өр, авлагын тухай авах зарим арга хэмжээний тухай асуудлыг хэлэлцэв. Танилцуулгыг Нийслэлийн Засаг Даргын Хөгжлийн бодлогын асуудал хариуцсан нэгдүгээр орлогч Ж.Батбаясгалан танилцуулав. Танилцуулгад дурдсанаар 2020 оны хоёрдугаар сарын байдлаар 8.1 тэрбум төгрөгийн өр авлага үүссэн байгаа нь нийтийн тээврийн салбарыг хүнд байдалд оруулж байгаа аж. Тухайн өр, төлбөр нь хэд, хэдэн хүчин зүйлээс шалтгаалан үүсжээ. Тухайлбал, нийтийн тээврийн хэрэгслүүд хуучирсан эвдрэл гэмтэл ихтэй, дизель түлшний онцгой албан татвар, валютын ханш өссөн, хуучин “Цахилгаан тээвэр” ОНӨААТҮГ-ын 2012 онд хийсэн гэрээний дагуу троллейбусны зохиогчийн эрхийн төлбөрт 2018 оны Хан-Уул дүүргийн анхан шатны шүүхийн 0727 тоот шүүхийн шийдвэр, Нийслэлийн давж заалдах шатны шүүхийн 1,306 тоот магадлалаар 1.8 тэрбум төгрөг төлж барагдуулснаас дээрх өр хуримтлагдсан аж.

Хэлэлцэж буй асуудалтай холбогдуулан Тэргүүлэгчид асуулт санал хэлэв. Тэргүүлэгчдийн олонх нь нийтийн тээврийн компаниудын менежментийг шүүмжилж байв. Улмаар 2012 оноос хойш өр төлбөр хуримтлагдтал явсан байдлыг цаашид засаж залруулан нийтийн тээврийн хэвийн үйл ажиллагааг хангах шаардлагатай гэж үзэв.

Нийслэлийн ИТХ-ын Тэргүүлэгч Ж.Эрдэнэбат: -Зорчигч тээврийн компаниудын авлага хэр байна вэ, нийтийн тээврийн компаниуд дампуурах хэмжээнд хүрчихсэн юм биш биз. Санхүүгийн зохистой харьцааны тооцоолол байгаа юу, өргөн барьсан төслийг дэмжиж байна. Зориулалт, зарцуулалтыг өөрчлөх бус зөвхөн батлагдсан төсвийн хүрээнд зохицуулалт хийх гэж байгаа учраас шийдвэрлээд явах нь зүйтэй.

Нийслэлийн Засаг Даргын Тамгын Газрын Санхүү,төрийн сангийн хэлтсийн дарга Ц.Ганхүү: -Улаанбаатар хотод үйлчилгээнд явж байгаа 1,000 гаруй автобусын 80 хувь нь ашиглалтын шаардлага хангахгүй байгаа. Энэ онд нийтийн тээвэрт 100 хувь парк шинэчлэл хийхээр төсөв суулгасан. Хуучин автобуснууд сэлбэг хэрэгсэлдээ их хэмжээний хөрөнгө зарцуулж байгаа. Нийтийн тээврийнхэн тэвчиж болох зардлаа хэмнээд, төсөвт ачаалал үүрүүлэхгүй байхаар төлөвлөж байна.

Нийслэлийн ИТХ-ын Тэргүүлэгч П.Батчимэг: -Нийтийн тээврийн салбарт үүссэн өр авлага их байна. Энэ үүссэн 8.1 тэрбум төгрөгийн өрийг хэн хариуцах ёстой вэ?

Нийслэлийн ИТХ-ын дарга Р.Дагва: -Өмчит үйлдвэрийн газрын дарга, удирдлага хариуцна. 2012, 2013 оноос эхлэлтэй. Нийтийн тээвэрт смарт картыг нэвтүүлсэнээс үүдсэн өр их бий.

“Нийслэлийн зорчигч тээврийн нэгтгэл” ОНӨААТҮГ-ын Ерөнхий нягтлан бодогч С.Түмэн-Ундармаа: -Зорчигч тээврийн нэгтгэл 2014 онд нэгдэхдээ дөрвөн тэрбум төгрөгийн өртэй нэгдсэн. Смарт системд шилжихэд 2015 онд өрийн хэмжээ 2.5 тэрбум болтлоо буурсан. 2016 онд 6.2 тэрбумын өртэй хүлээж авсан. 2017 онд энэ өрийг дөрвөн тэрбум болтол бууруулсан. Бидний өөрсдийн үйл ажиллагаанаас хамаарахгүй гэнэтийн өр төлбөрийн асуудал үүсэн тул өнөөдөр асуудлыг танилцуулж байна. Гэнэтийн өр төлбөр гэдэг нь цахилгаан тээврийн шүүхийн асуудал, смарт картын системд шилжсэнээр орлого буурсан нь өнөөдрийн энэ өр үүссэн.

Нийслэлийн Засаг Даргын Хөгжлийн бодлогын асуудал хариуцсан нэгдүгээр орлогч Ж.Батбаясгалан: -Нийтийн тээвэр бол үнийг нь хүчээр барьж ачааллыг нуруун дээрээ авч яваа салбар. Үнэ тарифын асуудалтай үүссэн өр төлбөрийн асуудлыг өнөөдөр ярьж байна. Бид буруу хайхаас илүүтэй асуудлаа шийдвэрлээд явах нь зүйтэй.

Нийслэлийн ногоон бүсэд оршин суугч айл өрхөд түлээний зориулалтаар нийт 19,200 куб метр гишүү мөчир, улинги бэлтгүүлэн, нийслэлийн төсөвт 154 сая төгрөгийн орлого төвлөрүүлжээ

Нийслэлийн ИТХ-ын дарга Р.Дагва: -Энэ өмчит үйлдвэрийн газрын дарга нар ойлго. Айлын эрх хүүхэд шиг зориуд ийм асуудал үүсгээд дараа нь урвайгаад суудаг. Ардаа нэг том шантаажтай. Та нар шийдэхгүй бол ажил хаяна гэж айлгадаг. Өөрсдөө менежмент үйл ажиллагаагаа сайжруулдаггүй. Үүний ард нийслэлийн 1.5 сая хүн хохирох ёсгүй. Тиймээс өнөөдөр асуудлыг шийднэ. Хэлэлцэж буй асуудалтай холбогдуулан Тэргүүлэгчид саналаа хэлж, нийслэлийн 2020 оны төсөвт батлагдсан машинт цагийн зардлын санхүүжилтээс урьдчилан санхүүжүүлэхээр боллоо.

Мөн Тэргүүлэгчдийн хурлаар нийслэлийн ойгоос бэлтгэх модны дээд хэмжээ батлах тухай асуудлыг хэлэлцэв. Нийслэлийн Байгаль орчны газрын дарга Э.Баттулгын танилцуулснаар 2016-2019 нийт 1,137 га талбайд цэвэрлэгээний ажил, цэвэрлэгээний огтлолтыг явуулж нийт 27,400 куб метр модыг бэлтгэжээ.

Нийслэлийн ногоон бүсэд оршин суугч айл өрхөд түлээний зориулалтаар нийт 19,200 куб метр гишүү мөчир, улинги бэлтгүүлэн, нийслэлийн төсөвт 154 сая төгрөгийн орлого төвлөрүүлсэн байна. Харин энэ онд нийслэлийн ногоон бүсийн 230 га газраас 5,100 куб метр мод бэлтгэхээр төлөвлөснийг нийслэлийн ИТХ-ын Тэргүүлэгчдийн хурлаар дэвжив.

Тэргүүлэгчдийн хурлын төгсгөлд Сонгуулийн саналын хуудас устгах ажлын хэсэг байгуулах асуудлыг хэлэлцэн, шийдвэрлэлээ.

365 мянган тонн сайжруулсан шахмал түлш үйлдвэрлэжээ

Нийслэлийн ИТХ-ын ээлжит XXXII хуралдаанаар уламжлал ёсоор Засгийн газрын 62 дугаар тогтоолын хэрэгжилтийг хангах хүрээнд хэрэгжүүлж буй ажлын явцыг сонслоо. 2019-2020 оны халаалтын улиралд айл өрхүүдийг 600.0 мянган тонн сайжруулсан түлшээр хангана гэж тооцоолсноос одоогийн байдлаар 365.162 тонн түлш үйлдвэрлэн, иргэдэд нийлүүлжээ.

Шахмал түлшний үнийг тонн тутам 150,000 төгрөг, борлуулалтын тонн тутамд 15,000 төгрөгийн урамшуулал олгох тухай Орчны бохирдлыг бууруулах үндэсний хорооны 19/12 дугаар тогтоол, Нийслэлийн Засаг даргын А/987 дугаар захирамжаар түлш борлуулагч иргэдийн ажлын байрыг баталгаажуулах, түлшний үнийн хөөрөгдлөөс сэргийлэх нөхцөлийг бүрдүүлэн ажилласан байна. Түүнчлэн 2019 оны арванхоёр дугаар сарын 25-ны байдлаар 1,897,961,708 төгрөгийн урамшуулал олгосон ажээ.

Сайжруулсан шахмал түлшнээс авсан 31 дээжийг дотоодын тав, гадаадын гурван лабораторид шинжлүүлэхэд хүний эрүүл мэнд, байгаль орчинд ноцтой сөрөг нөлөө үзүүлэх эрсдэлтэй химийн элемент, эрдэс илрээгүй, ахуйн хэрэгцээнд аюулгүй гэж гарсан тухай нийслэлийн Агаар орчны бохирдлын асуудал хариуцсан төслүүдийн удирдагч Д.Мөнхжаргал онцлов.

Агаарын чанарын тухайд 2020 оны нэгдүгээр сард PM10 тоосонцор 120 мкг/м3-ээр буюу 48 хувиар буурсан, PM2 тоосонцор 91 мкг/м3-ээр буюу 47 хувиар тус тус буурсан байна. Харин хоёрдугаар сарын 10-16-ны өдрүүдийн агаар бохирдуулагч PM10, PM2 тоосонцрын дундаж агууламжийг өмнөх оны мөн үеийн дундаж агууламжтай харьцуулахад РМ10 тоосонцор 192мкг/м3-ээр буюу 45.2 хувиар, РМ2.5 тоосонцор 175 мкг/м3-ээр тус тус буурсан үзүүлэлттэй байна. Угаар мэдрэгч төхөөрөмжийн тухайд нийт зургаан дүүргийн 41 хороонд 69,980 мэдрэгчийг иргэдэд тараажээ.

Нийслэлийн Агаар, орчны бохирдлын асуудал хариуцсан төслүүдийн удирдагч Д.Мөнхжаргал: “Сайжруулсан шахмал түлшний хүрэлцээ хэвийн байгаа бөгөөд нийслэлийн хэмжээнд борлуулалтын 398 цэг ажиллаж байна. Хангамжийн 10 бааз, 17 дундын бөөний төвд савлах төхөөрөмж байршуулж, 1,000 гаруй ажилтныг бүртгэлжүүлж ажиллуулж байгаа гэв.

Мөн сайжруулсан шахмал түлш худалдан авсан иргэдэд НӨАТ-ын баримт өгөх асуудлыг судалж, Засгийн газрын хуралдаанд оруулахаар төлөвлөж байгаагаа дуулгасан. Харин нийслэлийн ИТХ-ын дарга Р.Дагва: “Жилдээ 1.2 сая тонн түүхий нүүрс хэрэглэдэг байсан нийслэлчүүдийг энэ жил 600 мянга орчим тонн сайжруулсан түлшээр хангасан явдал бол амжилт. Бидний ажлыг хамгийн их дэмжиж ажилласан хүн бол нийслэлийн 1.5 сая иргэн байсан. Бид нийслэлчүүдийнхээ дэмжлэгтэйгээр утааны асуудлаасаа салж чадлаа. Цаашдаа энэ ажлаа улам сайжруулахын тулд төлөөлөгчдөөс гарч байгаа түлшний хүрэлцээний асуудал, угаар мэдрэгчийн асуудал зэрэг бусад асуудлыг сайтар судалж, сайжруулж ажиллаарай” гэв.

Цагдаагийн байгууллагад 2018 онд “Эрүүгийн хуулийн тусгай ангийн 18.7 зүйл “Мөнгөн тэмдэгт, үнэт цаас, төлбөр тооцооны хэрэгсэл хуурамчаар бэлтгэх, ашиглах” нийт 185 гэмт хэрэг бүртгэгдсэн бол 2019 онд нийт 165 хэрэг бүртгэгдэж нь урьд оныхоос 37 хувиар буурсан үзүүлэлттэй байна. 2019 онд бүргэгдсэн энэ төрлийн гэмт хэрэгт судалгаа хийхэд 158 ширхэг хуурамч үндэсний мөнгөн дэвсгэрт бүргэгдсэнээс 147 ширхэг 20,000 төгрөгийн дэвсгэрт, 7 ширхэг 10,000 төгрөгтийн дэвсгэрт, 3 ширхэг 5000 төгрөгийн дэвсгэрт, гадаад вальют 90 ширхэг бүргэгдсэн байна.

Энэ төрлийн гэмт хэргээс урьдчилан сэргийлэх, таслан зогсоох зорилгоор Эрүүгийн цагдаагийн албаны ЦЕГ-ын урьдчилан сэргийлэх хэлтэс, Эдийн засгийн гэмт хэрэгтэй тэмцэх газар, Монголбанк хамтран “Хуурамч-Мөнгө” хэсэгчилсэн арга хэмжээг улсын хэмжээнд 2020 оны 02 дугаар сарын 13-ны өдрөөс зохион явуулж байна.

Энэ төрлийн гэмт хэрэг нь иргэдийн хайхрамжгүй байдал болон гар дээрээс их хэмжээний мөнгийг хүлээн авах, холбогдох техник хэрэгсэлээр шалгаагүйгээс иргэд уг гэмт хэргийн холбогдогч, хохирогч болгох эрсдэл өндөр байдаг.

Хураагдсан хуурамч мөнгөн дэвсгэртийн судалгаагаар 58% нь 2006 онд үйлдвэрлэгдсэн 20,000 төгрөгтийн дэвсгэрт байгаа нь тогтоогдсон. Уг 2006 онд үйлдвэрлэгдсэн 20,000 төгрөгтийн дэвсгэрт нь тухайн үеийн техник хэрэгсэлийн дутмагтай холбогдон хамгаалалтын систем бага байсан нь “Мөнгөн тэмдэгт, үнэт цаас, төлбөр тооцооны хэрэгсэл хуурамчаар бэлтгэх, ашиглах” гэмт хэрэг үйлдэгч этгээдүүдэд боломж олгож байсан.

Монголбанкны ерөнхийлөгчийн 2020 оны 01 дүгээр сарын 31-ны өдрийн А/25 дугаар “Шинэчилсэн 20.000 төгрөг, 50 төгрөгийн дэвсгэртийг гүйлгээнд гаргах, 2006 онд хэвлэгдсэн 20000 төгрөгийн дэвсгэртийг гүйлгээнээс хасах тухай” тушаалаар хамгаалалт өндөртэй мөнгөн дэвсгэрт гүйлгээнд гарсанаар энэ төрлийн гэмт хэргийн гаралт буурна гэж үзэж байна.

Баян-Өлгий аймгийн Онцгой комисс хуралдаж, аймаг, сумын төвөөс гарах, орох хөдөлгөөнийг 2020 оны хоёрдугаар сарын 23-ны өдрийн 08:00 цагаас 27-ны өдрийн 08:00 цаг хүртэл түр зогсоох тухай аймгийн Засаг даргын А/113 дугаар захирамж гаргажээ.

Их эргэн сэргэлтийн үндэсний нам /ИЭСҮН/-ыг улсын бүртгэлд бүртгүүлэх тухай хүсэлтийг Улсын Дээд шүүх 2020 оны хоёрдугаар сарын 21-ний өдөр хянан хэлэлцлээ.

Хүсэлтэд хавсаргасан баримт нь Улс төрийн намын тухай хууль, Хуулийн этгээдийн улсын бүртгэлийн тухай хууль болон бусад хуульд заасан шаардлагыг хангаагүй гэж үзэж, Дээд шүүх уг намыг улсын бүртгэлд бүртгэхээс татгалзав.

Монгол Улсын Үндэсний аюулгүй байдлын зөвлөлөөс гаргасан зөвлөмжийн дагуу Монгол Улсын Их Хурал Иргэний тэтгэвэр барьцаалсан зээлийн төлбөрийг төрөөс нэг удаа төлөх тухай хуулийг 2020 оны 1 дүгээр сарын 10-ны өдөр баталсан билээ. Энэхүү хуульд “Эрдэнэс Монгол” ХХК өөрийн охин компани болох “Эрдэнэс Силвер Ресурс” ХХК-ийн эзэмшилд буй Салхитын мөнгө, алтны ордыг эдийн засгийн эргэлтэд оруулах, түүнээс олсон орлогоос төрд ногдох өгөөжийг барьцаалсан үнэт цаас гаргах замаар Монгол Улсын иргэний тэтгэвэр барьцаалсан зээлийн тодорхой хэсгийг төлөхөөр заасан юм.

“Эрдэнэс Монгол” ХХК дээрх хуулийн хэрэгжилтийг хангах хүрээнд богино хугацаанд шуурхай ажиллаж, “Эрдэнэс” бондыг дотоодын санхүүгийн зах зээл дээр хаалттай хүрээнд арилжаалж, үнэт цаасаар босгосон хөрөнгийг Монгол Улсын иргэний тэтгэвэр барьцаалсан зээлийн төлбөрийг төрөөс нэг удаа төлөхөд зарцуулж байгаа юм.

“Эрдэнэс бонд” үнэт цаасаар босгосон хөрөнгөөр 228.493 иргэн 6.0 сая төгрөг болон түүнээс доош дүнтэй зээлийн төлбөрөөс бүрэн чөлөөлөгдөж (үүний 43.892 иргэн 1.0 сая төгрөг хүртэлх зээлтэй), 194.807 иргэн 2021 оны 5 дугаар сарын 21-ний өдөр мөнгөжих 1.0 сая төгрөгийн үнэт цаас эзэмших замаар нийт 423.300 тэтгэвэр авагч иргэн байгалийн баялгийн өгөөжөөс хүртэнэ.

“Эрдэнэс Монгол” ХХК өнөөдөр арилжааны банкуудтай “Иргэний тэтгэвэр барьцаалсан зээлийн төлбөрийн үүргийг үнэт цаасаар (Эрдэнэс бонд) төлөх тухай гэрээ”-нд гарын үсэг зурав. Ингэснээр Монгол Улсын иргэний тэтгэвэр барьцаалсан зээлийн төлбөрийг төрөөс нэг удаа бүрмөсөн тэглэж, тэтгэвэр авагчид тэтгэврээ бүрэн авах баталгаатай боллоо.

Монгол Улсын Их Хурлын дарга Г.Занданшатар энэ үеэр ахмадуудын зээлийг тэглэх тухай хуулийг хэрэгжүүлэх ажилд чин сэтгэл, зүтгэл гарган ажилласан Уул уурхай, хүнд үйлдвэрийн яам, Хөдөлмөр, нийгмийн хамгааллын яам, УИХ-ын Эдийн засгийн болон Нийгмийн бодлого, боловсрол, соёл, шинжлэх ухааны байнгын хороо, “Эрдэнэс Монгол”, “Эрдэнэс силвер ресурс” компани, Монголбанк, Хөгжлийн банк, нийгмийн хариуцлагаа ухамсарлан, бодлогын арга хэмжээг дэмжиж оролцож буй арилжааны нийт банкуудын удирдлагад талархал илэрхийлээд, “Хулгана жилийн босгон дээр байгалийн баялаг ард түмний мэдэлд байх Үндсэн хуулийн нэмэлт, өөрчлөлтийн үзэл санаа амьдралд бодитоор хэрэгжиж байгаа жишээ нь энэ юм. Үүнээс улбаалан тэтгэврийн шинэчлэл хийгдэх болно. Энэ чиглэлээр УИХ-аас Н.Учрал гишүүнээр ахлуулсан Ажлын хэсэг байгуулан ажиллуулж байна. Монгол Улсын Үндсэн хуулийн шинэ нэмэлт, өөрчлөлтөөр газрын хэвлийн баялгийн үр өгөөжийг Үндэсний баялгийн санд төвлөрүүлж тэгш, шударга хүртээхээр тусгасны дагуу “Эрдэнэс Монгол” ХХК Үндэсний баялгийн сангийн тухай хуулийн төслийг боловсруулж байгаа. Ийнхүү хөгжлийн бодлого, төлөвлөлт, ахмадуудын нийгмийн хамгааллын бодлогын шинэчлэлийн томоохон алхмууд хулгана жилийн босгон дээр хийгдэж байгаад баяртай байна” гэв.

Зам, тээврийн хөгжлийн сайд Б.Энх-Амгалан Бүгд Найрамдах Казахстан Улсаас Монгол Улсад суугаа Онц бөгөөд Бүрэн эрхт Элчин сайд Ж.Ж.Адилбаевыг хүлээн авч уулзлаа. Уулзалтаар хоёр орны зам, тээврийн салбарын харилцаа хамтын ажиллагааны асуудлаар ярилцаж, санал солилцов.

Б.Энх-Амгалан сайд Монголын агаарын тээврийн “Хүннү эйр” ХХК 2019 оны 07 дугаар сард Улаанбаатар- Алма Ата -Улаанбаатар чиглэлд нислэг үйлдэхээр томилогдсон бөгөөд дээрх чиглэлд 2020 оны 03 дугаар сарын 28-ны өдрөөс эхлэн зуны цагийн хуваариар, 98 хүний суудалтай Embrear ERJ-190 маягийн агаарын хөлгөөр нислэг үйлдэхээр төлөвлөж байгааг дурдав. Үүнд Казахстаны эрх бүхий байгууллагаас тус компанид нислэг үйлдэхтэй холбоотой зөвшөөрлийг зохих журмын хүрээнд олгоход дэмжлэг үзүүлэхийг хүслээ.

Мөн тэрбээр монголын талын улс хоорондын автотээвэрлэгч компани Казахстаны Алма Ата, Талдыкорган, Семей, Усть-Каменогорск хотуудын авто вокзалтай гэрээ байгуулах, казахстаны хилээр зорчигч тээврийн автобусыг шуурхай нэвтрүүлэх асуудлыг шийдвэрлэхэд анхаарч ажиллах шаардлага хэрэгцээ байгааг онцлов.

Элчин сайд Ж.Ж.Адилбаев Б.Энх-Амгалан сайдын саналыг зохих байгууллагад уламжлахаа мэдэгдээд тус улс агаарын нээлттэй зарчим нэвтрүүлсэн учир “Хүннү эйр” зэрэг монголын авиа компаниуд Алма Ата хотын нисэх буудалд буусан тохиолдолд Казахстан Улсын бүх хотууд руу нислэг үйлдэх боломжтойг онцлов. Мөн Монголын зам, тээврийн салбарт үйл ажиллагаа эрхлэх сонирхолтой казахстаны тээврийн салбарын компаниудад дэмжлэг үзүүлж ажиллахыг Зам, тээврийн сайд Б.Энх-Амгалангаас хүслээ. Хоёр тал автотээвэр, төмөр замын салбарын хамтын ажиллагааг цаашид өргөжүүлэхээр тохиролцов.

Уулзалтын төгсгөлд, ирэх 04 дүгээр сард Монгол Улсад зохион байгуулагдах Монгол-Казахстаны засгийн газар хоорондын комиссын хуралдаанаас өмнө хоёр улсын зам, тээврийн салбарт хамтран ажиллах төслүүдийг тодорхойлж, харилцан шийдвэр гаргуулж, хамтран ажиллахаар тогтлоо.