Month: December 2019

Польшийн Сеймийн дэд маршал хатагтай Малгожата Гошевскагийн Монгол Улсад хийх албан айлчлал өнөөдрөөс эхэлж байна. Түүний Монголд хийж буй айлчлал нь хоёр орны хооронд дипломат харилцаа тогтоосны 70 жилийн ойг угтан зохиож буй “Монгол дахь Польшийн жил” гэсэн арга хэмжээг нээж байгаа болно.

---

-Эрхэм хатагтай таны энэ удаагийн Монгол дахь айлчлал ямар зорилготой вэ?

-Польш-Монголын харилцааг цаашид эрчимжүүлэх шаардлага байна. Уг нь Польш улс нь Монголыг Европтой холбох хаалга, Монгол нь Польшийг Азитай холбох гүүр болж болох байсан бололцоог аль аль тал алдсан. Энэ алдаагаа засах хэрэгтэй. Хойтон жил манай хоёр орон дипломат харилцаа тогтоосны 70 жилийн ойгоо тэмдэглэнэ. Энэ ойг тохиолдуулан Польш улс олон арга хэмжээ явуулахаар төлөвлөж байна. Польшийн парламентын дэд даргын хувьд хоёр орны парламентын хэлхээ холбоог улам гүнзгийрүүлэн хөгжүүлэх үүрэг надад ноогдож байна. Өнөөдөр Монголын УИХ-д Монгол Польшийн бүлэг идэвхтэй ажиллаж байна, Польшийн Сеймд ч Польш Монголын бүлэг олон жилийн турш байсаар ирлээ.

Улаанбаатар дахь айлчлалын үеэрээ би парламент болон Гадаад харилцааны яам хийгээд бусад байгууллагынхантай уулзах болно. Монголд ардчилсан өөрчлөлт эхэлсний 30 жилийн ойг тохиолдуулан хойшдын хамтын ажиллагааныхаа тухай ярилцах болно. ХХ зууны наяад оны үед Польшийн Эв санааны нэгдэл нь Монгол дахь ардчилсан өөрчлөлтийг дэмжин тусалж байсныг дурсахад сайхан байна. Монголын ардчилсан хүчний олон төлөөлөгч 1989 оноос хойш Польшид ирж туршлага судлан, Монгол дахь ардчилсан өөрчлөлтөд дэмжлэг хайж байлаа. Ийнхүү Монгол нь ардчилсан тогтоцтой Азийн цөөхөн орны нэг болсон юм.

Өдгөө Польш нь коммунист тогтолцооноос үлдсэн уламжлалыг даван туулж, аж ахуйн хувьд маш хурдтай хөгжиж буй ардчилсан орон болсон ба Европын холбоо болон НАТО-ын гишүүн, АНУ-ын ойрын холбоотон болчихоод байна.

Бид Монголын сүүлийн 30 жилд олсон их ололт болон ухаалаг гадаад харилцааг нь биширэхийн зэрэгцээ Иракт байдал тогтворжуулах олон улсын ажиллагаанд манай цэргүүд хамтран ажилласанд ихэд талархдаг юм.

-Хатагтай маршал аа, Польш Монголын шинжлэх ухааны хамтын ажиллагаа ямархуу түвшинд явна?

-Одоо Польшид 200 монгол оюутан суралцаж байгаа. Польш улс жилд 20 монгол оюутны зардлыг даадаг. Үүнд би маш баяртай байгаа.

Монгол Улсын Их сургууль польш хэлний сургалттай төдийгүй тэд Лодзын Их сургууль, Краковын Ягеллоны их сургууль, Катовиц дахь Селезийн Их сургуультай холбоо тогтоон хамтарч ажиллаад олон жил болж байна. 2019 онд МУИС-ийн ректор Я.Төмөрбаатар Варшавт айлчлахдаа МУИС, Варшавын Их сургууль хоёрын хамтын ажиллагааны протоколд гарын үсэг зурсан явдалд би хувьдаа их баярладаг юм. Хоёр орны хооронд дипломат харилцаа тогтоосны 70 жилийн ойд зориулсан шинжлэх ухааны хамтарсан бага хурлыг дээрх хоёр Их сургууль зохион байгуулахаар тохирсон. Эхнийх нь 2020 оны дөрөвдүгээр сард Улаанбаатарт, дараагийнх нь мөн оны арваннэгдүгээр сард Варшав хотноо болох юм.

Миний хувьд надтай дотно хамтарч ажиллаж байсан манай ерөнхийлөгч асан Лех Качински 2010 онд Смоленскт онгоцны ослоор харамсалтайгаар нас барсан. Түүнийг 2008 онд Монголд зочлоход нь МУИС хүндэт доктор цол олгосон нь тун таатай сэтгэгдэл төрүүлсэн юм.

-Танаас Польш Монголын эдийн засгийн хамтын ажиллагааны талаар асуумаар байна…

-Манай хоёр орны худалдааны эргэлт 2018 оны байдлаар 60 сая доллар орчимд байгаа. 2019 оны эхний найман сарын бадлаас үзэхэд харилцан худалдаа өсөх хандлагатай байна. Гэхдээ манай харилцаа бололцоот түвшиндээ хүрэхгүй байгааг зориуд тэмдэглэе. Гэвч Монголтой хийж буй худалдаагаар Польш нь Европын холбоон дотроо хоёрдугаарт ордог юм шүү. Польшийн хөрөнгө оруулалт худалдааны агентлагийн гадаад товчоог 2019 оны долдугаар сард Улаанбаатарт нээсэн явдал нь цаашдын хамтын ажиллагаанд тус дөхөм болно гэж бодож байна. Манай хоёр орны эдийн засгийн харилцаа тун удахгүй 100 сая еврогийн түвшинд хүрнэ гэдэгт эргэлзэхгүй байна. Польш улс Монголд 50 сая еврогийн хөнгөлөлттэй зээл олгохоор 2017 онд шийдсэн нь дажгүй дэмжлэг болох буй за.

– Польш Монголын цэргийн хамтын ажиллагааны талаар хэдэн үг хэлээч…

-Монгол цэргүүд Польшид их нэр хүндтэй шүү. 2004 онд Ирак дахь Чарли цэргийн баазад террористууд халдлага үйлдэх гэж байхад нь монгол цэргийн эрэлхэг үйлдлийн хүчээр түүнийг таслан зогсоосон, хэрэв эс зогсоосон бол олон польш цэрэг амь насаа алдах байсан юм. Үүнийг бид бүгд мэднэ, их ч талархдаг. Монголтой хамтарч ажиллахыг манай цэргийн байгууллагууд болон цэргийн үйлдвэрүүд сонирхсон хэвээр. Зөвлөлтийн хуучин зэвсэгийг шинэчлэх засах талаар польшууд сүрхийд тооцогдоно. Монголын арми тийм зэвсэгтэй байсаар байгаа шүү дээ. Бид орчин үеийн зэвсэг ч бас үйлдвэрлэдэг. Манай Цэргийн академийн 2019-1920 оны сургалтад монголчууд дахин хамрагдах болсонд бид их баяртай байгаа.

С.ГИЙХ

Монголын уул уурхайн үндэсний ассоциацийн ерөнхийлөгч асан, “ДАТ консалтинг” компанийн гүйцэтгэх захирал Н.Алгаатай ярилцлаа.

---

-УИХ Засгийн газарт Оюу толгойтой хэлэлцээр хийх эрхийг нь өгөөд удаагүй байна. Хоёр талын хийсэн гэрээг сайжруул, чадахгүй бол цуцал гэсэн утгатай чиглэл өгчихлөө. Гэрээ цуцлах асуудал яригдлаа гэхэд ямар нөхцөл байдал үүсэх вэ. Наад зах нь хөрөнгө оруулагч тал арбитрт хандаж таарна…?

-Наад захын энгийн жишээ гэхэд л энэ төсөл зогсвол бараа бүтээгдэхүүн нийлүүлдэг Монголын 600 компани бизнесээ алдана. Монголын компаниуд дотор жижиг дунд компаниудаас гадна далд уурхайн нэвтрэлт, бүтээн байгуулалтад оролцож яваа компани ч бий. далд уурхайн нэвтрэлт дээр гадны компанитай хамтарч ажиллаж байгаа хэсгийн хувьд төсөл зогслоо гэхэд гадагшаа гараад ажиллах хэмжээний чадвар суучихсан. оюу толгойн монголчуудад өгч байгаа маш том давуу тал гэвэл энэ. Англи хэлээр, олон улсын стандартаар ажлаа явуулдаг учраас далд уурхайн бүтээн байгуулалтад оролцож яваа монголчууд дэлхийн хаана ч очоод ажиллаж чадна. Харин Монголын эдийн засагт юу ч үлдэхгүй гэсэн том эрсдэл бий. Гэрээ хэлцлийг цуцаллаа гэхэд хамгийн түрүүнд зарга эхэлнэ. Монголын Засгийн газрын тухайд Арбитрын шүүх дээр очоод унах нь тодорхой.

Арбитрын шүүхээс эцсийн шийд гарахад хугацаа орно. Тэр хооронд манай эдийн засаг элгээрээ хэвтэх нь бодитой үнэн. Заргалдаад явчихвал “Рио тинто” эргэж ирэхгүй нь ойлгомжтой. За тэгээд “Рио тинто” Монголын Засгийн газраас мөнгөө нэхэмжлээд заргаа авлаа гэж бодъё. Гэрээ нь цуцлагдлаа гэхэд лиценз нь цуцлагдахгүй. Гэрээ цуцлагдвал Оюу толгой оруулсан хөрөнгөө Арбитрын шүүхэд хандаж нэхэмжлээд авна. Тэгээд лицензтэйгээ үлдэнэ. Лиценз цуцлах асуудал яриагүй учраас лицензээ худалдаж таарна аа даа. Би танаас нэг зүйл асууя. Тэд лицензээ хэнд худалдах вэ?

-Хятад л хамгийн боломжит хувилбар байх даа.

-Харин тийм. Өрнөдийнхнөөс хэн ч авахгүй. Донр орнууд ямар үйл ажиллагаа явуулах юм бүү мэд. Бүгд нүүр буруулах байх. Тэгэхээр Орос, Хятад хоёр тунаж үлдэж таарна. Оюу толгойн зэсийн баяжмалын гол зах зээл нь Хятад. Тэгэхээр оросууд худалдаж авна гэдэг юу л бол. Оросууд авлаа гэхэд Хятадад зарах байлгүй дээ. Оросууд өөрсдөө хэрэгжүүллээ гэхэд баахан орос орж ирж ажиллах байх.

Эрдэнэт үйлдвэр ашиглалтад орох үед 90 хувь нь орос байсан юм. Арван жилийн дараа 70 хувь нь орос хэвээрээ л байсан. 2010-аад онд гучин хувь нь оросууд ажиллаж явсан санагдаж байна. Өөрөөр хэлбэл 30 жилийн дараа л сая нэг монголчууд дийлэнх боллоо. Гэтэл өнөөдөр Оюу толгойн нийт ажилчдын 95 хувь нь монголчууд. Орос, Хятад энэ төсөлд ороод ирвэл монголчуудыг ингэж их хувиар ажилд авахгүй. “Рио тинто”-гийн хувьд лицензээ Орост зарахгүй нь ойлгомжтой.

-Яагаад?

-Орос барууны хоригт байгаа шүү дээ. “Рио тинто”-гийн нэгтгэлд Австрали, Англи, Америк, Канад бий. Тэд зөвшөөрөхгүй. Тэгэхээр Хятадад зарах магадлал илүү өндөр.

-Хятадад лицензээ зарлаа гэхэд Оюу толгой төслийн хэрэгжилт цаашид яаж үргэлжлэх бол?

-Оюу толгойн лицензийг Хятадууд авлаа гэхэд менежмэнтийг нь “Рио тинто” хийх магадлал хамгийн бодитой хувилбар гэж бодож байна. Энэ тохиолдолд байдал өнөөдрийнхөөс нэг их өөрчлөгдөхгүй. Гэхдээ асуудал иймдээ тултлаа маш их хугацаа орно. Эцсийн шийд гарах хүртэл дөрөв, таван жил зарцуулбал Монголын эдийн засаг яах вэ гэдэг хамгийн том асуулт. Оюу толгойгүй дөрөв, таван жил болвол эдийн засаг элгээрээ хэвтэнэ.

-Таван толгойн IPO-г он гараад хийнэ гэж ярьж байгаа. Оюу толгойн асуудал он гарсаны дараа шийдлээ олохгүй удвал юун IPO болох байх, тийм үү?

-Оюу толгой гол индикатор болох нь ойлгомжтой. Таван толгойн IPO-гийн хувьд Хонконг хамгийн бололцоотой хувилбар. Хонконгт гарахын тулд хийх ёстой хэдэн алхам бий. Нягтлан бодох бүртгэл тунгалаг байх ёстой. Компанийн засаглал сайжрах учиртай. Улс төрөөс хараат бус, мерит зарчим дээр үндэслэсэн уул уурхайн менежмэнт явагдах ёстой болчихож байгаа юм. Хонконгийн зах зээл дээр очлоо гэхэд хувьцааны үнэ гэж чухал зүйл байна. Дэлхийн улсуудад мөрддөг стандарт жишгээр Таван толгойн хувьцааг үнэлбэл маш бага тоо гарна. Бүх эрсдэлийг тооцсоны эцэст гарсан үнийн дүн нь хувьцааны ханш болно. Засгийн газрын тогтоосон 50 цент тэг зууны, тэг мянганы төчнөөн цент гэж буурч үнэлэгдэх өндөр эрсдэлтэй.

-Таван толгойн хувьцаа олон улсын зах зээл дээр дэлхийн жишгээр үнэлэгдвэл тун бага ханшаар арилжаалагдана гэж та сая ярилаа. Ашигт малтмалыг үл хөдлөх хөрөнгө шиг яг таг үнэлдэг жишиг лав л Австралид байдаг гэж сонссон. Дэлхий даяар хэрэглэдэг жишиг үү, эсвэл ганц Австралид хэрэгжиж байна уу?

-Үнэлгээний хувьд гэж яривал бизнесийг үнэлдэг, үл хөдлөх хөрөнгийг үнэлдэг. Ашигт малтмалын нөөц, ордыг яг хөрөнгө шиг үнэлдэг стандарт манайд өнөөхөндөө хэвшээгүй. Уул уурхай эрчимтэй хөгжиж байгаа газарт лиценз шилжүүлэхээс эхлээд татвар төлөх хүртэл маш олон харилцаа өрнөдөг. Ашигт малтмалын лиценз, ордын тухайд худалдаж авах ч юм уу үнэлүүлэх гэж байгаа, хэрэг маргааны шатанд яваа гэх мэт асуудал гардаг. Энэ тохиолдолд чөлөөт зах зээлийн бодит үнэд дөхүүлж үнэлдэг стандарт дэлхийд бий. Тэр нь таны асуусанчлан Австралид хэрэгждэг. Канад, Өмнөд Африкийн бүгд найрамдах улсад ч хэрэгждэг. Сүүлд Америк бас ийм үнэлгээ хийж байгаа. Яг үүнтэй төстэй стандарт маягийн зүйл бусад улсад мөн бий.

-Манайд лиценз шилжүүлэлт их байдаг. Лиценз шилжихтэй холбоотойгоор татвараа бага төллөө гэх мэт маргаан бараг хэвшил болчихсон. Таны яриад байгаа үнэлгээг нэвтрүүлчихвэл энэ асуудал шийдэгдэх нь ээ?

-Тэгнэ. Лиценз шилжүүлсэн тохиолдолд татварынхан татвар авахын тулд хэдээр худалдсан бэ гэж мөрддөг л дөө. Өндөр үнээр худалдчихаад татвараа бага төлж байна гэх мэт асуудал үүсдэг. Үүнийг нь үнэлдэг арга, кодексийг дэлхийн улс орнууд бий болгочихсон гэсэн үг. Энэ кодексийг нэвтрүүлэх эрэлт манайд их бий. Наад зах нь хөрөнгийн бирж дээр геологи уул уурхайн компаниуд хувьцаат компани болж гарахад зайлшгүй хэрэгтэй. Нийтэд зориулж худалдах хувьцааны үнэ та бид хоёрын ярьж суугаа энэ үнэлгээгээр тогтоогдох юм. Урт нэртэй хууль гарсаны дараахь процесс байна. Нөхөн олговор олгож чадахгүй асуудал үүссэн. Компаниуд гаргасан зардлаа гээд баахан тоо бичээд өгчихсөн. Засгийн газар хариуд нь хэлэлцээрт орох ямар ч боломжгүй нөхцөлд орсон л доо.

-Компаниудын нэхсэн мөнгөний хэмжээг бодитоор үнэлж чадахгүй байсан болохоор уу?

-Яг тийм. Компаниудын нэхсэн мөнгөний хэмжээ хэр үнэн болох, бодит өртөг зардал нь яг хэд гэдгийг үнэлж мэдэхгүй байсан учраас асуудал үүссэн. “Эрдэнэс Таван толгой”-н 1072 хувьцааны үнэлгээ ч бодитой биш. Засгийн газар 1072 хувьцааг 900 гаруй төгрөгөөр үнэлээд компанийн балансад биччихсэн. Худлаа үнэ шүү дээ. Түүнийг нь үнэлдэг арга сая миний онцолж хэлсэн стандарт байх жишээний. Уул уурхайн салбарт 2000-2011 он хүртэл лицензийн шилжилт их хийгдсэн. Ялангуяа хайгуулын лиценз. Энэ тохиолдолд мэдээллээ худалдсан үнээс татвар авна гэдэг. Тэгэхээр мэдээлэл нь ямар үнэтэй вэ гэсэн асуулт гарч ирнэ ээ дээ. Гаргасан зардал, хүрсэн мэдээллээр нь хэмжиж таарна. Зардлыг нь тодорхой, бодитой гаргаж ирэх боломж мөн л сая ярьсан үнэлгээнд бий.

-Таны ярихыг сонсох нь ээ, манайд маш хэрэгтэй арга санагдлаа. Дэлхийд жишиг болсон энэ үнэлгээг манай улс хэр сонирхож байгаа юм бол?

-СЗХ, Монголын компаниуд 2012 оноос нэлээд судалсан юм билээ. Мэргэшсэн нягтлан бодогчдын холбоотой хамтраад дэлхийд жишиг болсон гурван стандартын дагуу кодекс бий болгох гэж оролдож байгаа. Гадны олон төслийн дэмжлэг ч орж ирэх байх.

-Хайгуулын анхан шатанд яваа ордыг үнэлж болох уу?

-Болно. Үйлдвэр ажиллах явцад, үйлдвэрлэл эхлэхээс өмнө ч үнэлэх боломжтой.

-Лицензийн маргаан гараад үнэлгээ хийлгэлээ гэж бодъё. Тооцож гаргаад ирсэн үнэ нь зохиомол байх эрсдэл бий юү?

-Тийм зүйл байхгүй. Жинхэнэ чөлөөт зах зээлийн үнээр үнэлгээг нь хийнэ. Нэг жишээ хэлье. “Сентерра” Монголоос гарахдаа Гацууртын ордыг Бороотой нь хамт бараг 35 сая ам.доллараар худалдчих шиг боллоо. 60 гаруй тонн алттай орд шүү дээ. 35 сая гэдэг нь зах зээлийн үнэ. Худалдаж авсан нөхөр “Бороо гоулд” шиг асуудал бэрхшээлийг туулна. Ашиглахад бэлэн болсон хэрнээ яг ашиглах хүртлээ зургаа, долоон жилийг алдах эрсдэл байна. Нэгдүгээрт гадаадын хөрөнгө оруулалттай, стратегийн ач холбогдолтой орд учраас Засгийн газарт хувиа тохирох хүндрэлтэй байсан болов уу. Хоёрдугаарт нь Ноён уул тойрсон иргэний хөдөлгөөний эсэргүүцэл байна. Өөрөөр хэлбэл энэ ордын хувьд зах зээлийн үнэ нь хөрсөн доорх алт биш. Тэр ордод хөрөнгө оруулаад борлуулахад хэр хэмжээний эрсдэл туулж, ямар цаг хугацаа зарж ашиглах чадахгүй удах вэ гэдэг л үнэлгээ буурах гол шалтгаан болдог.

-Тэгэхээр улс төрийн эрсдэл үнэлгээний том шалгуур болдог байх нь…?

-Тэгж ойлгож болно. Ер нь бүх нөхцөл байдлыг харгалзаж байж үнэлдэг. Таны хэлсэн улс төрийн нөхцөлөөс гадна уул геологийн нөхцөл, татварын орчин гэх мэт бүгдийг тооцож үздэг. Ашиглахад тээг болж мэдэх бүх нөхцөлийг судалж, тооцдог гэсэн үг. Тэр бүгдийг нь үнэлдэг стандарт л даа. Монгол 2011 оноос хойш хайгуулын лиценз бараг л олгохгүй, ер нь их удаан олгож байна.

Монголд хөрөнгө оруулалтыг хайгуулын салбар л татаж байсныг өнгөрсөн түүхээс харж болно. 100 хувь эрсдэлтэй мөнгийг гаднаас хайгуулын салбар босгосоор ирсэн нь бодитой үнэн. Австрали, Торонтогийн гэх мэт хөрөнгийн биржээс гадны хөрөнгө оруулагчдаас босгосон мөнгө Монголд зарцуулагдсан. Хайгуул хийх хэрээр мэдээлэл нь илүү тодорхой болж, нөөцийн боломж нь ихэсч, тэр хэрээр босгох мөнгө нь томорч байсан. Хайгуул ер нь ийм зарчмаар явдаг. Оюу толгойн хөрөнгө оруулалтаас бусад том мөнгө дан хайгуулаар дамжиж орж ирсэн. Хайгуулыг дагаад шатахуун нийлүүлэлт, хоолны үйлчилгээ гэх мэт олон салбарын бизнес цэцэглэдэг онцлогтой.

Монголд хайгуул идэвхжих үед эдийн засаг энэ мэтээр тэлж, тэтгэгдэж байсан. Харин одоо тийм зүйл байхгүй. Хөрөнгө оруулах боломжтой уул уурхайн төсөл гэвэл Таван толгой л байна. Таван толгойгоос өөр хөрөнгө татах төсөл өнөөхөндөө алга. Хайгуул байхгүй учраас тэр л дээ. Хайгуул хөгжиж байж л уул уурхайн дараагийн том төслүүд хэрэгжих үүд нээгдэнэ. Одоо хэрэгжиж яваа том төсөл гэвэл Оюу толгой л байна. Асгат гэж том төсөл бий гэж ярьж байна. Асгатын хувьд олборлох нөхцөл хүнд. Ордын эрсийн бүтэц нь маш нийлмэл. Алт, мөнгө, зэсийн алиных нь орд болох, яг юу ялгаж авах нь тодорхой бус.

-Асгат “Эрдэнэс Монгол”-д очсон. Ашиглана, том төсөл болгож хөдөлгөнө, ойрын хугацаанд эдийн засгийн эргэлтэд оруулна гээд байгаа шүү дээ. Тийм боломж байхгүй хэрэг үү?

-Ямар ч боломж байхгүй. Хэн хөрөнгө оруулах юм бэ. Асгатын мөнгөний ордыг саяын үнэлгээний стандартаар үнэлбэл өчүүхэн тоо гарна. Бүх эрсдэлийг тооцоод үзвэл маш багаар үнэлэгдэнэ.

-Лиценз олголт ямархуу янзтай байна вэ?

-Энэ парламент бүрдсэн эхний жил буюу 2016 оны өвөл төсөв хэлэлцэж байхад өргөдлөөр өгдөг байсныг болиулчихсан. Одоо зөвхөн сонгон шалгаруулалтаар олгож байгаа. Сонгон шалгаруулалтаар олгож байгаа гэдэг ч лиценз олголт хэвийн үргэлжилж яваа гэхэд хэцүү. Жилд нэг хоёр удаа олгох гэж оролдож байна. Шалгаруулалт зарлана, зарлахаар нь орон нутгийн удирдлага нь татгалзана. Орон нутгаас санал авах гэхээр уул уурхайгүй аймаг болно гэх мэтээр гэдийчихдэг.

Энэ тохиолдолд лиценз олгогдох боломжгүй. Товчхондоо манайх холбооны улс шиг болчихоод байна л даа. Гэтэл засгийн зарласан лицензийн талбай хуулиараа орон нутгийн иргэдийн өмч биш. Нийтийн өмч. Монголын нийт ард түмний өмч. Зүй нь нийтийн өмчийн нэг хэсгийг төр мэдэх ёстой. Холбооны улс биш учраас төр л мэдэж шийдвэр гаргах учиртай. Хоёрдугаарт сонгон шалгаруулалтаар олгодог журам нь мөнгөн дээр суурилсан байна. Аль өндөр үнэ өгсөн нь авч байна. Нэг үгээр хэлбэл лиценз олголт зогсоогүй ч маш удааширсан.

-Энэ янзаараа явбал хайгуулын лиценз гэсэн ойлголт байхгүй болж мэдэх нь ээ?

-Санал нэг байна. 2010-аад онд дөрөв, таван мянган хайгуулын лиценз, мянга гаруй ашиглалтын лиценз байсан юм. Гэтэл өнөөдөр 1200 хайгуулын лиценз, 1600 ашиглалтын лиценз байна. Дөрөв дахин их байсан хайгуулын лицензийн тоо ашиглалтын лицензээсээ доогуур орчихсон гэсэн үг. 1600 ашиглалтын лицензийн тухайд бүгдэд нь үйл ажиллагаа явуулж байгаа гэж хэлэхэд хэцүү. Нүүрс, хайрга, дайрга, жонш гэх мэт бүх ашигт малтмалаа оруулаад тооцвол 400 хүрэхтэй үгүйтэй үйлдвэр байж магадгүй. Бодит байдал ийм л байна. 2006 оны хуульд 2014 онд орсон өөрчлөлтөөр хайгуулын тусгай зөвшөөрөл олгох хугацаа 12 жил болсон. Дахиж сонгогдохгүйгээр дуусгавар болно гэсэн үг. Ингээд тооцохоор 2004 оны лиценз хуулийн дагуу дуусгавар болчихсон. 2004 оноос хойших гээд харахаар гурав, дөрвөн жилийн дараа хайгуулын тусгай зөвшөөрлийн тал хувь нь алга болохоор байна.

Хан-Уул дүүргийн дөрөвдүгээр хорооны “Цэц До” өрхийн эмнэлгийн эмч Э.Энхбилэгтэй ярилцлаа.

---

-Өөрийгөө манай уншигчдад танилцуулахгүй юу. Хэзээнээс өрхийн эмчээр ажиллаж эхэлсэн бэ?

-Би 2014 онд Анагаах ухааны дээд сургуулийг хүний их эмчийн мэргэжлээр төгссөн. 2015-2017 оныг хүртэл Баянзүрх дүүргийн 27 дугаар хорооны өрхийн эмчээр ажиллаж байгаад энэ оны тавдугаар сараас Хан-Уул дүүргийн дөрөвдүгээр хорооны өрхийн эмчээр ирсэн. Хуучин сургуулиа төгсөхөд хуваарилдаг байсан. Одоо бол өөрсдөө сонголтоо хийгээд ажилладаг болсон. Би хотод амьдардаг болохоор хотдоо ажиллахаар шийдсэн л дээ.

-Анагаах ухааныг заасан багш нарынхаа тухай ярихгүй юу?

-Намайг төгсөхөөс өмнө манайх дээд сургууль байсан. Төгссөний дараа их сургууль болж өөрчлөгдсөн. Ангийн багш маань зүрхний Баасанжав гээд сайн багш байсан. Зүрхээр дагнасан маш сайн эмч. Манайх чанга хатуу дэглэмтэй. Нэг л хичээл дээр унавал шууд улирна. Манай ангиас 2-3 хүүхэд улирсан. Нэг ангийг цөөхөн хүүхэд төгсдөг. Манайх 15 оюутантай төгссөн. Сургалт сайтай. Олон сайн багштай. Хүүхдийн Сарантуяа, эх барих, эмэгтэйчүүдийн Лхагвасүрэн багш. Одоо Өргөө амаржих газрын зөвлөх эмч хийдэг гэх зэргээр маш олон сайн багш нартай.

-Өрхийн эмч байхын давуу тал нь юу вэ?

-Маш өргөн хүрээний мэдлэгтэй болдог. Ганц өвчнөөр дагнахгүй. Дотор, хүүхэд, насанд хүрэгчид, чих хамар хоолой гээд бүхий л өвчнийг үзнэ. Маш их зүйл сурч мэдэх боломжтой. Мэдлэгийн хүрээ их тэлнэ. Анагаах сургуульд онол, онол гэж явж байгаад өрх дээр ажиллахаар практик дээр гардан ажиллаж сурна.

-Эсрэгээрээ бас сул тал байдаг байх даа?

-Мэдээж байлгүй яахав. Бид нарийн мэргэжил эзэмшээгүй. Хүүхдэд үзлэг хийлээ гэхэд анагаахын сургуулийг төгсчихөөд хоёр жил нэмж сурч хүүхдийн мэргэжлийн эмч болдог. Илүү өргөн хүрээний мэдлэг шаардана. Анхны тусламж үзүүлэх л үүрэгтэй шүү дээ бид. Анхны тусламж үзүүлж, үзлэг хийгээд цаашдаа ямар чиглэлээр нарийн мэргэжлийн эмчид үзүүлэх вэ гэдгийг дамжуулах л үүрэгтэй. Гэтэл хүмүүс хүүхдээ үзүүлээд тийшээ очоод нарийн үзүүл гэхээр “Та нар эмчлэх ёстой. Өрхийн эмч нар юу ч мэддэггүй” гээд байдаг. Гэтэл бидний өргөн хүрээний үзлэг хийдэг, бүх өвчлөлийг үздэг гэдгийг ерөөсөө ойлгодоггүй.

-Сүүлийн үед утаа багаслаа гэж яриад байгаа. Энэ нь өрхийн эмнэлэгт хэр мэдэгдэж байна. Өмнөх жилийн өдий үетэй харьцуулахад томуу, томуу төст өвчний шалтгаанаар үзүүлэх өвчтөний тоо хэр байна вэ?

-Есдүгээр сард сургууль, цэцэрлэг цуглаад аравдугаар сарын эхэн үеэс ханиад томууны өвчлөлийн үе эхэлдэг. Энэ жилийн хувьд аравдугаар сар дулаахан байсантай холбоотой юу энэ төрлийн өвчлөл бага байлаа. Арваннэгдүгээр сараас өвчлөл нэмэгдэж байгаа нь мэдэгдэж байна. Халуурал, ханиалгатай, бөөлжиж гүйлгэх тохиолдол нэмэгдэж байгаа. Өмнө нь ганц хоёр хоног халуураад шууд хатгаа болдог ханиад элбэг байсан. Одоо бол халуурах нь бага, шууд хатгаа болохгүй вирусийн гаралтай ханиад их байна. Нянгийн гаралтай үрэвсэл гэхээс илүү. Тэгэхээр чиглэлийнх нь дагуу вирусийн гаралтай эмчилгээ хийчихвэл 2-3 хоногтоо гайгүй болж байгаа. Өнгөрсөн баасан гаригаас Хан-Уул дүүргийн нэгдсэн эмнэлэг том хүн авахгүй, хүүхэд их байна. Хүүхэд эрс ихэсчихлээ гэж байсан. Арваннэгдүгээр сарын 26-наас хойш том хүн авахгүй гэсэн. Тэгэхээр хүүхдийн тасгийн ачаалал их байгаа байх.

-Хан-Уул дүүргийн дөрөвдүгээр хороо шинэ суурьшлын бүс болчихсон. Хүн ам маш ихээр нэмэгдэж байгаа онцлогтой. Үүнийг дагаад өрхийн эмнэлгийн ачаалал бас нэмэгдэж байгаа юу?

-Ачаалал маш их байна. Үндсэн оршин суугч нь 14 мянга гаруй байдаг юм байна лээ. Түр оршин суугч нь бараг 10 мянга. Замын урд талд маш их шинэ барилгууд баригдсан. Тэгээд хүмүүсээс “Яагаад та нар хаягандаа шилжиж ирэхгүй байгаа юм бэ” гэхээр “Ордер нь гараагүй” гэдэг. Яагаад ордер нь гардаггүйг асуухаар авто замын урд талын хэсэг Богд хан уулын дархан цаазат газарт ордог. Дархан цаазат газарт барилга барьсан болохоор ордер нь гардаггүй. Тэгээд түр оршин суугчаар бүртгүүлдэг юм байна лээ. Вива ситид түрээсийн оршин суугчид маш ихтэй. Ихэнх нь түр оршин суугч. Манай өрхийн эмнэлэг магадлан итгэмжлэхэд ороогүй. Тэгэхээр түр оршин суугч ч байсан үздэг. Хэрэв магадлан итгэмжлэхэд орчих юм бол тухайн харьяаллынхаа хүний тоогоор санхүүжилт орж ирдэг. Тиймээс үндсэн хаягтай иргэддээ л үйлчилнэ.

-Өрхийн эмнэлэг хэдэн эмч, сувилагчтай вэ. Бүх иргэддээ хүрэлцдэг үү?

-Манайх зургаан эмчтэй. Гурван сувилагчтай. Уг нь нэг эмчид нэг сувилагч ногдох ёстой. Гэтэл хоёр эмчид нэг сувилагчтай. Анх ирээд би “Яагаад гуравхан сувилагчтай байгаа юм бэ” гэхэд “Манайх гурван сувилагчийн орон тоотой л анх байгуулагдсан” гэсэн. Гэхдээ зар тавиад сувилагч авъя гэхээр ирдэггүй. Ямар сайндаа бид тэтгэвэртээ гарсан сувилагчаа гуйж ажиллуулж байна. Ачаалал их, хүмүүсийн хэл ам их байдаг гээд өрхийн сувилагчаар ажиллах сонирхол бага байдаг бололтой.

-Дуудлагаар хэр явдаг вэ?

-Дуудлагаар их явна. Манайх байр ихтэй болохоор нярай хүүхэд их байдаг. Нярай ихтэй болохоор ачаалал их. Өдөрт нэг эмч дуудлагаа хариуцаад явдаг. Долоо хоногтоо нэг удаадаа заавал дуудлагаа хариуцаж явна. Яг миний хариуцаж байгаа хэсэгт найман хэвтрийн хүн бий. Тэднийгээ дуудлагаар явах замдаа эргээд үзчихдэг юм.

-Өрхийн эмчийн гол зорилго нь юу байдаг вэ. Хүмүүс үүнийг нь сайн мэддэггүй санагдах юм?

-Уг нь бол өрхийн эмчийн гол үүрэг нь урьдчилан сэргийлэх. Олон улсад тэгж л явдаг. Гэтэл манай улсад өрхийн эмч урьдчилан сэргийлэх ажлаа хийж чаддаггүй. Өвчтөнтэйгөө л ноцолдоод байж байдаг. Эрүүл мэндийн урьдчилан сэргийлэх ажлаа хийж чадахгүй өрхийн эмнэлгээр үйлчлүүлж байгаа бүх хүмүүс өвчтэй хүмүүс л ирдэг. Цахим жороор хөнгөлөлттэй эм бичих болсноос хойш маш их ачаалал үүсэх болсон. Хөнгөлөлттэй эмний программ нь болдоггүй. Урьд нь цаасан дээр бичээд л гаргачихдаг байсан. Улс даяараа ганц эмийн программтай. Сарын эхэнд бүх орон нутаг, аймаг сум, дүүрэг ганц программаараа уншуулна. Тэгэхээр ачааллаа дийлэхгүй маш удаан уншдаг. Программын компанид нь хандахаар бид ажиллаж байна л гэдэг. Гэтэл хүмүүс “Танай өрхийн компьютер муу, сүлжээ интернэт нь тасардаг” гээд байдаг. Программ гэдэг юмыг ойлгохгүй биднийг л буруутгаад байдаг. Урьд нь нэг өвчтөнд программ уншуулаад эм бичиж өгөхөд 15 минут болдог байсан. Одоо таван минут болсон. Бас харьцангуй сайжраад байгаа.

Дээд түвшний хүмүүс нь программаар эм бичдэг болсон дэвшилтэт технологи гээд сайхан зүйл ярьдаг. Яг цэг дээр нь ажиллахаар маш их цаг орно. Гацна, заримдаа уншихгүй буцаана. Юу болж байгааг мэддэггүй. Тэр бүрт нь хүмүүс уурлана, зарим нь загнана. Хүмүүс чинь бас эм бичүүлэхээр орж ирэхдээ ээждээ, аавдаа, өөртөө, нөхөртөө гээд хэд хэдэн эрүүл мэндийн даатгал бариад ороод ирнэ. Тэр бүрт нь таван минут гэхээр хүмүүс ойлгохгүй. Байн байн хаалгаар шагайна. Ямар удаан үздэг юм бэ гээд хэл ам хийнэ. Эрүүл мэндийн яамнаас нэг хүнийг 15 минут үзэх ёстой гээд цаг гаргачихсан. Минутаараа бодвол өдөрт өрхийн эмч 32 хүн үзэх ёстой. Гэтэл өнөөдөр ганцхан би л гэхэд 56 хүн үзчихсэн байна. Өнгөрсөн баасан гаригт 67 хүн үзсэн байх жишээтэй. Нэг хүн үзэхэд хөнгөлөлттэй эмийн хамт 15 минутад үзэж амждаггүй. Миний бодлоор минутгүй болчихвол амар санагддаг. Хүмүүс цагаа хараад л 15 минут болчихлоо гээд хаалга онгойлгоод байдаг. Дээрээс нь дүүргийн нарийн мэргэжлийн эмч нар нь үзчихээд өрхийн эмчээрээ хөнгөлөлтөө бичүүл гээд явуулчихдаг. Тэр нь бас бидэнд ачаалал нэмнэ.

-Хүмүүс өөрсдөө урьдчилан сэргийлье, жилдээ нэг удаагийн үзлэгтээ хамрагдъя гээд ирэх хүмүүс байдаг уу?

-Байхгүй. Өвдсөн хойноо л өвдчихлөө гэж ирнэ. Ер нь бол өвчин тусаад удсан хойноо ирдэг. Жишээ нь, халуураад гурав хоносны дараа ирнэ. Хүндэрсэн хойноо л ирнэ үү гэхээс урьдчилан сэргийлэх үзлэгт оръё гэж ер ирдэггүй.

-Өрхийн эмч нарт сургалт ордог уу?

-Сургалт маш сайн орно. Эрүүл мэндийн хөгжлийн төвөөс, Өрхийн эмч нарын холбооноос сургалт сайн явуулдаг. Нэг өрхийн эмч жилдээ зургаан багц цагийн сургалтад суусан байх ёстой гэдэг шаардлага цаанаасаа тавьдаг. Түүний дагуу сургалт сайн орно. Урьдчилан сэргийлэх үзлэг хагас сард нэг удаа дүүргийн эрүүл мэндийн төвөөс ирж хийдэг.