Month: December 2019

Нийслэлийн Мэргэжлийн хяналтын газраас аж ахуйн нэгж байгууллагуудад шалгалт хийжээ.

Мах боловсруулах үйлдвэрүүд хадгалах хугацаа, хэрэглэх хугацаа дууссан хиам, хиаман бүтээгдэхүүн зайдсыг хүнсний худалдааны сүлжээнээс буцаан аваад нохой, гахайн хоолны зориулалтаар аж ахуйн нэгж, байгууллага, иргэдийн гар дээр худалдаалж, авсан иргэд цааш нь худалдаалж байгаа зөрчил тогтоогдсон учир Монгол Улсын Зөрчлийн тухай хуулийн 6.15 дугаар зүйлийн 5.1 дэх заалтыг үндэслэн зөрчлийн хэрэг үүсгэн шалгаж эхлээд байгаа аж.

Нийслэлийн прокурорын газраас УИХ-ын гишүүн Н.Номтойбаяр, түүний зөвлөх нарт хилийн хориг тавих санал хүргүүлснийг Сүхбаатар дүүргийн Эрүүгийн хэргийн анхан шатны шүүх өнөөдөр нээлттэй хэлэлцлээ. Тодруулбал, Нийслэлийн прокурорын газраас Н.Номтойбаярыг Эрүүгийн хэрэг хянан шийдвэрлэх тухай хуулийн 14.5 дугаар зүйлийн нэг дэх хэсэгт зааснаар эрүүгийн хэрэг хянан шийдвэрлэх ажиллагаанд саад учруулахгүй байх зорилгоор Т.Есөнтөмөр, Б.Эрдэнэбат нартай уулзахыг хориглох хязгаарлалт тогтоолгох таслан сэргийлэх арга хэмжээ авахуулах тухай санал хүргүүлсэн.

Харин Сүхбаатар дүүргийн Эрүүгийн хэргийн анхан шатны шүүх прокурорын саналыг хүлээн авахаас татгалзсан байна.

Нигери, Монгол Улсын иргэдэд холбогдох хар тамхины хэргийн шүүх хурал өчигдөр Чингэлтэй дүүргийн Эрүүгийн хэргийн анхан шатны шүүхэд боллоо.

Шүүхээс Эрүүгийн хуулийн тусгай ангийн 18.5 дугаар зүйлийн 3 дахь хэсэгт зааснаар, мөн хуулийн тусгай ангийн 20.7 дугаар зүйлийн 2 дахь хэсэгт тус тус зааснаар Холбооны Бүгд Найрамдах Негири улсын иргэн Адекола Олавасен Азеез-д 6 жил, Анози Дарлингтон Дон-д 3 жил, Монгол Улсын иргэн У.Ариунзулд 3 жилийн хорих ял тус тус оноож шийдвэрлэлээ.

Тэд Монгол Улсад англи хэлний сургалтын төвд ажиллаж байсан бөгөөд бүлэглэн сэтгэцэд нөлөөт, мансууруулах бодис хууль бусаар хил нэвтрүүлж, хадгалсан, тээвэрлэсэн, худалдсан гэмт хэрэг үйлдсэн юм. У.Ариунзул нь дээрх гэмт хэргийг үйлдэхэд дэмжлэг үзүүлж, хамтран оролцсон аж.

Шинэ жилийн баяртай холбоотойгоор нийслэлийн 330 аж ахуйн нэгж, томоохон худалдааны төв, зах, сүлжээ дэлгүүр, хүнсний ресторан, эвэнт холлууд, мах, гурилан бүтээгдэхүүний үйлдвэрүүдэд НМХГ-аас хяналт шалгалт хийжээ. Шалгалтаар 532 зөрчил илрүүлсэн байна. Шалгалтын хүрээнд таван аж ахуй нэгж, 12 иргэнд нийт 11 сая 400 мянган төгрөгийн торгууль ногдуулжээ.

Шалгалтын явцад 127 бүтээгдэхүүнээс дээж авч шинжилжээ. Шинжилгээгээр чанарын шаардлага хангаагүй бүтээгдэхүүнийг хураасан байна.

НМХГ-аас дараах зүйлийг анхааруулж байна. Үүнд:

• Хүүхдэд бэлэг сонгохдоо хаяг шошгыг нь анхаарч, бэлгэд багтаж буй бүтээгдэхүүний гарал үүсэл, үйлдвэрлэсэн он сарыг нь сайн харж сонголтоо хийх
• Мөн түргэн гэмтдэг бүтээгдэхүүн буюу баярын торт сонгох үйлдвэрлэсэн он сар, орц найрлага, хадгалалтын горим зэргийг нь харах
• Түүнчлэн ил задгай худалдаалж буй бүтээгдэхүүн худалдан авахгүй байх
• Шинэ жилийн баярын арга хэмжээ зохион байгуулж буй аж ахуйн нэгжүүд өөрсдийн хүчин чадалд тохирсон захиалга авах шаардлагатай бөгөөд хүчин чадлаа хэтрүүлэн захиалга авсан тохиолдолд эрүүл ахуй, үйлдвэрлэлийн технологи алдагдаж, хордлого үүсэх магадлалтайг анхаарууллаа.

Томуугийн улирал эхэлж байгаатай холбогдуулан Эрүүл мэндийн яамнаас ДЭМБ-д хүсэлт тавьсны дагуу 5000 хайрцаг Осельтамивир эмийг хүлээн авч өвчлөл өндөр байгаа нийслэлийн дүүргүүдийн хүүхдийн эмнэлэг, амаржих газрууд, ЭХЭМҮТ, ХӨСҮТ-д Эрүүл мэндийн сайдын 2019 оны А/555 дугаар тушаалаар хуваарилсныг өчигдөр хүлээлгэн өглөө.

Осельтамивир эмийг анх манай улсад 2009 онд томуугийн А хүрээний H1N1 вирусийн эсрэг эмчилгээнд хэрэглэж эхэлсэн. Уг эм нь ДЭМБ-ын Зайлшгүй шаардлагатай эмийн 20 дахь загвар жагсаалт болон манай улсын Зайлшгүй шаардлагатай эмийн жагсаалтад орсон, томуу, томуу төст өвчний эмнэлзүйн удирдамжид заагдсан вирусийн эсрэг үйлчилгээтэй эм юм.

Дэлхийн эрүүл мэндийн байгууллага нь эрүүл мэндийн тусламж үйлчилгээний хүртээмжийг нэмэгдүүлэх талаар манай улсад дэмжлэг үзүүлэн нягт хамтран ажилладаг бөгөөд Осельтамивир эмийг хуваарилснаар томуу, томуу төст өвчний үед тусламж үйлчилгээний бэлэн байдлыг хангах, эмийн хүртээмжийг нэмэгдүүлэхэд чухал ач холбогдолтой арга хэмжээ болж байна.

Үндэсний статистикийн хорооноос мэдээлснээр, Улаанбаатар хотод 2019 оны арваннэгдүгээр сард ХДХВ/ ДОХ-ын гурван тохиолдол илэрчээ. Ингэснээр манай улсын хэмжээнд бүртгэгдсэн нийт тохиолдол 284 болсон байна.

2018 онд дэлхий даяар ДОХ-ын халдвартай 37.9 сая хүн байснаас 79%-ийг шинжилгээнд, 62%-ийг эмчилгээнд хамруулж, 53%-ийн вирусийг нь дарангуйлсан буюу бусдад халдвар тараах эрсдэлгүй болгожээ.

Мөн халдварт өвчнөөр өвчлөгчид 2019 оны эхний 11 сард 39.6 мянга болжээ. Энэ нь өмнөх оны мөн үеэс 2045 (5.5%)-аар нэмэгдэхэд

салхин цэцгээр өвчлөгчид 2389 (35.8%)-өөр,

тэмбүүгээр өвчлөгчид 739 (13.5%)-өөр,

гонококкт халдвараар өвчлөгчид 143 (3.0 %)-аар,

сүрьеэгээр өвчлөгчид 119 (3.7%)-өөр,

мөөгөнцрөөр өвчлөгчид 82 (5.2%)-оор өссөн нь голлон нөлөөлсөн байна.

Гар, хөл, амны өвчнөөр өвчлөгчид 933 (33.2%)-аар, цусан суулгаар өвчлөгчид 677 (11.5%)-гоор, трихомониазаар өвчлөгчид 39 (1.0%)-өөр буурчээ.

Сүхбаатар дүүргийн Эрүүгийн хэргийн анхан шатны шүүхэд УИХ-ын гишүүн Н.Номтойбаярт холбогдох шүүх хурал эхлээд байна. Нийслэлийн прокурорын газраас УИХ-ын гишүүн Н.Номтойбаярыг Төрийн ордонд амиа алдсан УИХ-ын гишүүн асан Г.Батхүүтэй холбоотой асуудлаар мэдүүлэг өгөхдөө худал мэдээлэл өгсөн үндэслэлээр хилийн хориг тогтоох саналыг ирүүлээд байгаа юм.

УИХ-ын гишүүн асан Г.Батхүү өнгөрөгч тавдугаар сард Төрийн ордны хоёр давхрын гонхноос учир битүүлэг байдлаар унаж харамсалтайгаар амиа алдсан билээ. Дээрх хэргийг Цагдаагийн ерөнхий газар, Авлигатай тэмцэх газрын хамтарсан ажлын хэсэг шалгаж байгаа.

Энэ хэрэгт гэрчийн мэдүүлэг өгсөн УИХ-ын гишүүн Н.Номтойбаярыг “худал мэдүүлэг өгсөн” гэх үндэслэлээр Нийслэлийн прокурорын газраас яллагдагчаар татсан. Үүнтэй холбогдуулан УИХ-ын гишүүн Н.Номтойбаяр өчигдөр мэдээлэл хийж, яллагдагчаар татаж байгааг хүлээн зөвшөөрөхгүй хэмээн мэдэгдсэн. Тэгвэл Нийслэлийн прокурорын газраас Н.Номтойбаяр, түүний зөвлөх нарт хилийн хориг тавих санал ирүүлснийг Сүхбаатар дүүргийн Эрүүгийн хэргийн анхан шатны шүүх өнөөдөр нээлттэй хэлэлцэнэ.

Эрүүгийн хуулийн 21.2 дугаар зүйл “худал мэдүүлэх”

1.Гэрч, хохирогч мөрдөн шалгах ажиллагааны үед, шүүхэд үнэн зөв мэдүүлэг өгөхөө илэрхийлж, баталгаа гаргасны дараа зориуд худал мэдүүлэг өгсөн бол гурван сараас хоёр жил хүртэл хугацаагаар эрх хасаж дөрвөн зуун тавин нэгжээс таван мянга дөрвөн зуун нэгжтэй тэнцэх хэмжээний төгрөгөөр торгох, эсхүл хоёр зуун дөчин цагаас долоон зуун хорин цаг хүртэл хугацаагаар нийтэд тустай ажил хийлгэх, эсхүл нэг сараас нэг жил хүртэл хугацаагаар зорчих эрхийг хязгаарлах ял шийтгэнэ.

Мэргэжлийн хяналтын ерөнхий газрын Зөвлөгөө, мэдээллийн төвөөр энэ оны 01.01-12.06 хүртэл хугацаанд аж ахуй нэгж, байгууллага, иргэдээс ирүүлсэн 14014 албан бичиг, 552 өргөдөл гомдол хүлээн авч иргэдэд үйлчиллээ.

Хариутай албан бичгийн 97.9% -ийг хугацаанд нь шуурхай шийдвэрлэсэн бөгөөд үлдсэн нь шийдвэрлэх шатанд байна. Ирүүлсэн албан бичгийн 76.5 хувь нь ЭИХХЦХГ, БОГУУХГ, ДБХГ болон Тамгын газарт хандсан байв.

Иргэдээс ирүүлсэн 552 өргөдөл, гомдлын 97.5%-ийг шийдвэрлэж, бусад өргөдөл, гомдлын дагуу хяналт шалгалтын ажил хийгдэж байна. Өргөдөл, гомдлын 68.7 хувийг ЭИХХЦХГ болон Тамгын газарт хандаж ирүүлжээ.