Month: December 2019

Сайжруулсан шахмал түлштэй холбоотой цаг үеийн асуудлаар өнөөдөр НОБГ-ын Гамшгаас урьдчилан сэргийлэх хэлтсийн дарга, хурандаа Г.Нэргүй, нийслэлийн Мэргэжлийн хяналтын газрын дэд дарга С.Даваасүрэн, Агаарын бохирдолтой тэмцэх газрын мэргэжилтэн Г.Даваажаргал, ЦУОШГ-ын Цаг уур, орчны шинжилгээний хэлтсийн ахлах мэргэжилтэн Ш.Нямдаваа нар мэдээлэл хийлээ.

НОБГ-ын Гамшгаас урьдчилан сэргийлэх хэлтсийн дарга, хурандаа Г.Нэргүй “Өнгөрсөн хугацаанд холбогдох мэргэжлийн байгууллагууд онцгой комиссоос өгсөн үүрэг даалгаврын дагуу 24 цагаар жижүүрлэн төвийн зургаан дүүрэгт ажиллаж байна. Нэмэлтээр нийслэлийн Цагдаагийн удирдах газар, Онцгой байдлын газар, Мэргэжлийн хяналтын газар хамтран өнгөрсөн баасан гаригаас эхлэн шөнийн цагаар хөдөлгөөнт эргүүл хийж байна. Хөдөлгөөнт эргүүлийн гол зорилго нь шахмал түлшний хэрэглээ, түгээлт, борлуулалт, хангалт ямар шатанд байна вэ гэдэгт хяналт тавьж байгаа юм. Хяналт тавьж ажилласаны үр дүнд дуудлагын тоо эрс буурсан. Хүнд хэлбэрээр хордсон гэх дуудлага байхгүй болсон” хэмээлээ.

Нийслэлийн Мэргэжлийн хяналтын газрын дэд дарга С.Даваасүрэн “Арванхоёрдугаар сарын 12-15-ны өдрүүдэд товчоодод хийсэн хяналт шалгалтаар 36 автомашинаар 702 тонн түүхий нүүрс дамжин өнгөрсөн байна. Түүхий нүүрсний зөвшөөрөлтэй аж ахуйн нэгжүүдэд нийлүүлэхээр 98 автомашинаар 3109 тонн түүхий нүүрс Улаанбаатар хотод нэвтрэн орж ирсэн. Энэ хугацаанд түүхий нүүрс нийлүүлэх зөвшөөрөлтэй газраас бусад өөр уурхайгаас нүүрс нэвтрүүлсэн зөрчил илэрсэн. Дулаан үйлдвэрлэх тусгай зөвшөөрөлтэй “Ану сервис” компани нь Багануурын уурхайгаас нүүрс тээвэрлэхээр зөвшөөрлийн бичгэндээ бичилт хийлгэсэн боловч Налайхын уурхайгаас хоёр тээврийн хэрэгслээр 47.45 тонн нүүрс тээвэрлэснийг цагдаагийн байгууллага, мэргэжлийн хяналтын байгууллага илрүүлж, хураан авсан. Мөн нүүрс тээвэрлэх зөвшөөрөлгүй “Бат хүнс” компани Налайхын 18 тонн нүүрсийг тээвэрлэснийг илрүүлсэн. Нийт 70 тонн нүүрсийг хураан авч “Амгалан” дулааны цахилгаан станцад төвлөрүүлж, Улсын орлого болгож байна” гэв.

ЦУОШГ-ын Цаг уур, орчны шинжилгээний хэлтсийн ахлах мэргэжилтэн Ш.Нямдаваа “Цаг уур, орчны шинжилгээний газар Монгол Улсын хэмжээнд агаарын чанарын хяналт шинжилгээ, дүн мэдээг нэгтгэн гаргаж, төлөв байдлыг тодорхойлж ажилладаг. Улаанбаатар хотод нийт 15 цэгт агаарын чанарын хяналт шинжилгээг хийдэг. Арваннэгдүгээр сарын нэгдсэн төлөв байдлаар хотын хэмжээнд агаар дахь PM2.5 тоосонцор 42 хувиар, PM10 тоосонцор 43 хувиар багассан үзүүлэлттэй байна” гэсэн мэдээллийг өглөө.

Монгол Улсад худалдааны салбар үүсч хөгжсөний 98 жилийн ойн хүрээнд зохион байгуулж байгаа худалдаа эрхлэгчдийн “Их Хүрээ-2019” үндэсний чуулган Төрийн ордонд эхэллээ. Чуулганд төрийн болон төрийн бус байгууллага, олон улсын байгууллага, худалдаа, үйлдвэрлэл эрхлэгч, нийлүүлэгчдийн төлөөлөл болох 800 гаруй хүн оролцож байна.

Үндэсний чуулганыг нээж Монгол Улсын Ерөнхий сайд У.Хүрэлсүх үг хэлэв. Тэрээр хууль ёсоор үйл ажиллагаа явуулж, татвараа төлөн, ажлын байр бий болгож, баялаг бүтээж байгаа худалдаа, үйлчилгээ, бизнес эрхлэгчдийг Засгийн газар ямагт дэмжинэ гэдгийг хэлэв. Бизнес эрхлэхэд тулгарч байгаа хүндрэл бэрхшээл, төрийн байгууллага, албан тушаалтантай холбоотой хүнд суртал, дарамт шахалт, авлига, хээл хахуулийг ил тод, нээлттэй ярьж, хэлж, мэдэгдэж байхыг мөн хүсэв. Худалдаа, үйлчилгээ эрхлэгчид ч хэрэглэгчийн эрх ашгийг дээдлэх, иргэдийн эрүүл мэнд, байгаль, хүрээлэн буй орчинд эрсдэл учруулахаас зайлсхийх ёстойг тэмдэглэлээ.

Үндэсний чуулганд оролцогсод худалдаа, үйлчилгээний салбарын хөгжил, шинэчлэл, хандлага, хөрөнгө оруулалт, хүний нөөц, татварын шинэчлэл зэрэг сэдвээр илтгэл сонсон хэлэлцэж байна. Мөн Монголын жижиглэн худалдаа эрхлэгчдийн холбоо, Монголын эмэгтэйчүүдийн холбоо хамтран ажиллах Санамж бичигт гарын үсэг зурах юм. Чуулганаас энэ салбарын хөгжлийн бодлогыг боловсруулах, хууль эрх зүйн орчинг сайжруулах, үндэсний сүлжээний боловсронгуй тогтолцоо бүрдүүлэх, ажлын байр бий болгох, хөдөлмөр эрхлэх нөхцөлийг баталгаажуулах, мэргэжлийн шатлал, зэрэг дэв, цалин урамшууллын оновчтой систем бүрдүүлж хэрэгжүүлэхтэй холбоотой зөвлөмж гаргах юм байна.

Монгол Улс 150 орчим оронтой 10 гаруй тэрбум ам.долларын гадаад худалдаа хийж байгаа бөгөөд дотоод худалдааны салбарын борлуулалт 2018 оны байдлаар 21.6 их наяд төгрөг болжээ. Засгийн газар гадаад зах зээлд экспортлох боломжтой, тэргүүлэх ач холбогдол бүхий бараа, бүтээгдэхүүний судалгаа, маркетингийг дэмжих “Монгол экспорт” хөтөлбөр батлан хэрэгжүүлж байна гэж Засгийн газрын Хэвлэл мэдээлэл, олон нийттэй харилцах хэлтсээс мэдээллээ.

2018 оны 10 сар, 2019 оны 9, 10 дугаар саруудад амины орон сууцуудаар орон байрны хулгайн гэмт хэрэг үйлдэж байсан этгээдүүдийг илрүүлэн саатуулжээ.

Урьдчилсан байдлаар 1991 онд төрсөн эрэгтэй Ш, 1987 оны эрэгтэй Б нар үгсэн хуувилдаж, зохион байгууллалттайгаар хулгай хийж бусдад их хэмжээний хохирол учруулсан хэргийг ЭЦА-ны Хулгайлах гэмт хэрэгтэй тэмцэх хэлтэс, Хан-Уул дүүргийн цагдаагийн газрын алба хаагчид илрүүлэн шалгаж байна.

Тэд бусдын орон байранд нэвтрэн орсон 40 удаагийн үйлдлийг мөрдөн шалгах явцад мэдүүлээд байна.

Дипломат төлөөлөгчдийн газрын тэргүүн нарын зөвлөгөөн ГХЯ-нд болж байна.

Зөвлөгөөнийг нээж Гадаад харилцааны сайд Д.Цогтбаатар хэлсэн үгэндээ “Манай улс 192 улстай дипломат харилцаа тогтоож, НҮБ-ын гишүүн бүх улстай дипломат харилцаатай болоход хоёрхон улс үлдэв. Мөн олон улсын 70 гаруй байгууллагад элсч, хоёр талын 1222 гэрээ хэлэлцээр байгуулж, 287 олон талт олон улсын гэрээнд нэгдэв. Хилийн чанадад оршин суугаа 175 мянга гаруй монгол иргэний эрх ашгийг хамгаалах, тэднийг дэмжиж, бүхий л тусламжийг үзүүлж ажиллах, эх орныхоо хөгжил дэвшилд хувь нэмэр оруулах нөхцөлийг бүрдүүлэхэд анхаарав. Дэлхийн 16 улсад монгол хэл, соёлын 48 сургууль байгуулж, 2016-2019 онд гадаадын 14 улстай визгүй зорчих хэлэлцээр байгууллаа” хэмээн онцоллоо.

Дэлхийн тэргүүлэх их сургуулиудын нэг АНУ-ын Харвардын их сургуульд монгол судлалын үйл ажиллагааг дэмжин хөгжүүлэх чиглэлээр БСШУСЯ тус сургуультай Хамтран ажиллах тухай санамж бичиг байгууллаа. Санамж бичигт БСШУС-ын сайд Ё.Баатарбилэг, Харвардын их сургуулийн Гадаад харилцаа эрхэлсэн дэд захирал Марк Эллиотт нар гарын үсэг зурав.

Санамж бичгийн дагуу Харвардын их сургуульд монгол судлалыг хөгжүүлэх шат дараалсан арга хэмжээ авч хэрэгжүүлнэ. Уг үйл ажиллагааг Монгол Улсын талаас МУИС-ийн Шинжлэх ухааны сургуулийн захирал, Монгол судлалын үндэсний зөвлөлийн нарийн бичгийн дарга Д.Заяабаатар хариуцан ажиллах юм.

Харвардын их сургууль нь монгол судлалын эртний уламжлалтай бөгөөд АНУ-ын нэрт монголч эрдэмтэн, монгол сурвалж бичиг, үсэг бичгийн дурсгалын талаар хийсэн цуврал судалгаагаар дэлхийн монгол судлалд нэрээ дуурсгасан Фрэнсис Вүүдмэн Кливез энд ажиллаж байжээ. Түүнээс хойш уг сургуульд монгол судлалын далайцтай үйл ажиллагаа тасалдаад байсан юм. Энд сонирхуулахад Ф.В.Кливезийн номын сан христийн нэгэн сүмд өнөө хир хадгалагдаж байгаа бөгөөд түүнийг судалгааны эргэлтэд оруулах асуудлыг уулзалт ярилцлагын үеэр талууд хөндлөө. Сүүлийн жилүүдэд Чин гүрний үеийн түүх, манж судлалаар мэргэшсэн профессор Марк Эллиоттын идэвхтэй санаачилга, уйгагүй хичээл, Монгол Улсын БСШУСЯ-ны дэмжлэгээр Харвардын их сургуульд монгол судлал дахин сэргэх сайхан боломж бүрдэж байна.

Монгол Улсад худалдааны салбар үүсч хөгжсөний 98 жилийн ойн хүрээнд зохион байгуулж байгаа “Их Хүрээ-2019” худалдаа эрхлэгчдийн үндэсний чуулган Төрийн ордонд эхэллээ. Чуулганд төрийн болон төрийн бус байгууллага, олон улсын байгууллага, худалдаа, үйлдвэрлэл эрхлэгч, нийлүүлэгчдийн төлөөлөл болох 800 гаруй хүн оролцож байна.

Үндэсний чуулганыг нээж Монгол Улсын Ерөнхий сайд У.Хүрэлсүх үг хэлэв. Тэрбээр хууль ёсоор үйл ажиллагаа явуулж, татвараа төлөн, ажлын байр бий болгож, баялаг бүтээж байгаа худалдаа, үйлчилгээ, бизнес эрхлэгчдийг Засгийн газар ямагт дэмжинэ гэдгийг хэлэв.

Бизнес эрхлэхэд тулгарч байгаа хүндрэл бэрхшээл, төрийн байгууллага, албан тушаалтантай холбоотой хүнд суртал, дарамт шахалт, авлига, хээл хахуулийг ил тод, нээлттэй ярьж, хэлж, мэдэгдэж байхыг мөн хүсэв.

Худалдаа, үйлчилгээ эрхлэгчид ч хэрэглэгчийн эрх ашгийг дээдлэх, иргэдийн эрүүл мэнд, байгаль, хүрээлэн буй орчинд эрсдэл учруулахаас зайлсхийх ёстойг тэмдэглэлээ.

Үндэсний чуулганд оролцогсод худалдаа, үйлчилгээний салбарын хөгжил, шинэчлэл, хандлага, хөрөнгө оруулалт, хүний нөөц, татварын шинэчлэл зэрэг сэдвээр илтгэл сонсон хэлэлцэж байна.

Мөн Монголын жижиглэн худалдаа эрхлэгчдийн холбоо, Монголын эмэгтэйчүүдийн холбоо хамтран ажиллах Санамж бичигт гарын үсэг зурах юм.

Чуулганаас энэ салбарын хөгжлийн бодлогыг боловсруулах, хууль эрх зүйн орчинг сайжруулах, үндэсний сүлжээний боловсронгуй тогтолцоо бүрдүүлэх, ажлын байр бий болгох, хөдөлмөр эрхлэх нөхцөлийг баталгаажуулах, мэргэжлийн шатлал, зэрэг дэв, цалин урамшууллын оновчтой систем бүрдүүлж хэрэгжүүлэхтэй холбоотой зөвлөмж гаргах юм байна.

Монгол Улс 150 орчим оронтой 10 гаруй тэрбум ам.долларын гадаад худалдаа хийж байгаа бөгөөд дотоод худалдааны салбарын борлуулалт 2018 оны байдлаар 21.6 их наяд төгрөг болжээ.

Засгийн газар гадаад зах зээлд экспортлох боломжтой, тэргүүлэх ач холбогдол бүхий бараа, бүтээгдэхүүний судалгаа, маркетингийг дэмжих “Монгол экспорт” хөтөлбөр батлан хэрэгжүүлж байна.

Амьтны тухай хуулийн хэрэгжилтийг хангах, амьтны хэвийн өсөх, үржих нөхцөл алдагдахаас сэргийлэх, зохих эрхийн бичиг, зөвшөөрөлгүй загас барих, агнах зөрчлийг таслан зогсоох зорилгоор Хэрлэн голын загасны ичээ бүхий газруудад хөдөлгөөн мэдрэгч автомат камер суурилуулжээ.

Камераар илэрсэн зөрчлийг холбогдох байгууллага шалгаж байна.

Шинэ жилийн баяр болох гэж буйтай холбогдуулан Эрүүл мэндийн яамнаас зөвлөмж гаргажээ. Зөвлөмжид салют буудуулахаас зайлсхийх, согтууруулах ундаа хэтрүүлэн хэрэглэхгүй байх, согтсон нэгнээ гэрт нь хүргэж өгөх, машиндаа архи уухгүй, удаан суухгүй байх, хүүхдэд бэлэг сонгохдоо чихэрлэг зүйлсээс зайлсхийх, аль болох жимс жимсгэнэ, оюун ухаан хөгжүүлэх тоглоом, тараг зэргийг худалдан авч өгөхийг дурдсан байна. Мөн хүнсний бүтээгдэхүүнийг баталгаатай газраас худалдан авах, хоолоо бүрэн гүйцэд сайтар боловсруулж идэх, түргэн муудах бүтээгдэхүүнийг хөргөгчинд хадгалах хэрэгтэйг сануулжээ.