Month: November 2019

Онцгой байдлын ерөнхий газраас Япон Улсын Олон улсын хамтын ажиллагааны байгууллагатай хамтран “Монгол Улсын Газар хөдлөлтийн гамшгаас хамгаалах чадавхыг бэхжүүлэх төсөл”-ийг 2017-2019 онд амжилттай хэрэгжүүлж, хаалтын ажиллагааг өнөөдөр зохион байгууллаа.

Хошууч генерал Т.Бадрал хэлсэн үгэндээ, “Төслийг хэрэгжүүлэхэд байгууллага, хоорондын уялдаа, холбоог сайжруулах, төслийн үйл ажиллагааг удирдлага, зохицуулалтаар хангах үүднээс Монгол Улсын Шадар сайдын ажлын алба, төсөл хамтран хэрэгжүүлэгч байгууллагуудаас бүрдсэн Хамтарсан зохицуулах хороо, төслийн хэрэгжилтийг хангаж ажиллах 3 үндсэн хэсгийн 10 дэд ажлын хэсгийг байгуулж, Японы талаас 18 мэргэжилтэн, Монголын талаас 6 байгууллагын 47 ажилтан, албан хаагч хамтран ажилласан байна. Мөн төслийг үр дүнтэй хэрэгжүүлэх, газар орон дээр танилцах, туршлага судлах, мэдлэг, ойлголт өгөх зорилгоор Япон Улсад 4 удаагийн сургалт зохион байгуулж, 44 хүн, 10 дэд ажлын хэсгээс Онцгой байдлын байгууллага, гамшгаас хамгаалах алба, төрийн захиргааны байгууллага, боловсролын байгууллагын ажилтан албан хаагчдад нийт 35 удаагийн сургалт зохион байгуулж, 1065 хүнийг хамрууллаа. Энэхүү төслийг хэрэгжүүлэх явцад ажлын хэсгийн гишүүд та бүхний мэдлэг, чадвар, туршлага нэмэгдэхийн зэрэгцээ төслийн үр дүнг цаашид өөрийн салбартаа үргэлжлүүлэн хэрэгжүүлэх итгэл, сэтгэл дүүрэн байгаа гэдэгт итгэж байна” хэмээн онцолсон юм.

Харин Хидэаки Мацүмото “Монгол Улсын Газар хөдлөлтийн гамшгаас хамгаалах чадавхыг бэхжүүлэх төсөл”-ийг гурван жилийн хугацаанд хамтран хэрэгжүүллээ. Энэ хугацаанд Монгол Улсын газар хөдлөлтийн гамшгаас хамгаалах үйл ажиллагааны үндэс суурийг тавьж, цаашдын хөгжилд нь ихээхэн хувь нэмэр оруулсан болов уу гэж бодож байна. Гамшгаас урьдчилан сэргийлэх чиглэлээр орон нутгийн болон төрийн захиргаанаас гамшгаас хамгаалах төлөвлөгөө, газар хөдлөлт тэсвэрлэлтийн үнэлгээний аргачлал, гамшгийн мэдээллийн систем, гамшгаас хамгаалах боловсрол сургалт, Нийслэлийн иргэдийн гамшгийн сургалт, аргазүйн төвийн сургалтын материал зэрэг Монгол Улсын газар хөдлөлтийн гамшгаас хамгаалах үйл ажиллагааг цаашид хөгжүүлэх арга хэрэгслүүдийг уг төслөөр боловсруулсан зэргийг онцлон дурдмаар байна” гэлээ.

Төслийн хүрээнд гамшгаас хамгаалах төлөвлөлтийг боловсронгуй болгох, газар хөдлөлтийн гамшгийн эрсдэлийг үнэлэх, гамшгийн үед байгууллага хоорондын хамтын ажиллагаа, үүрэг, оролцоог хангах, мэдээллийн санг бүрдүүлэх чиглэлээр 8 заавар, дүрэм журам боловсруулж, 11 байгууллагатай санамж бичгийг байгуулсан байна. Мөн Монгол Улс анх удаа гамшгаас хамгаалах “Цагаан ном”-ыг Монгол-Англи хэл дээр гаргаж олны хүртээл болгосон.

Гамшгаас хамгаалах үйл ажиллагаанд дэвшилтэт технологийг нэвтрүүлж, интернетэд суурилсан гамшгийн орон зайн мэдээллийн системийг байгуулж, гамшгийн мэдээллийн нэгдсэн санг бүрдүүлсэн.

Барилга болон дэд бүтэц, инженерийн шугам сүлжээний газар хөдлөлт тэсвэрлэлийн үнэлэх, барилгыг хүчитгэх аргачлал, дүрмийг боловсруулж батлуулж, өрөгт болон цутгамал төмөр бетон, угсармал барилгыг хүчитгэлийн зураг төслийг боловсруулсан юм.

Мөн хүүхэд багачуудад гамшгаас хамгаалах боловсрол олгох зорилгоор “Аюулгүй амьдрах ухаан” сургалтын хөтөлбөр боловсруулж батлуулан сургуулийн өмнөх болон бага, суурь, бүрэн дунд боловсрол олгох сургалтын хөтөлбөрт оруулж, 2019-2020 оны хичээлийн жилээс эхлэн мөрдөж эхлээд байна.

Түүнчлэн Олон нийтийн гамшгаас хамгаалах боловсролын дээшлүүлэх “Бэлэн бай” сургалтын багц, “Хэн, хэзээ ч, хаана, бэлэн” буухай тэмцээний гарын авлагыг боловсрууллаа. Мөн гамшгаас урьдчилан сэргийлэх, сургалт сурталчилгааны багийг байгуулж, гамшгаас хамгаалах сургалтын нэгдсэн төлөвлөгөөг боловсруулсан юм.

Төслийн хүрээнд барилга, байгууламжийн газар хөдлөлтийн тэсвэржилтийг хэмжих 5 нэр төрлийн 5 багц багаж, тоног төхөөрөмж, газар хөдлөлтийн чичирхийллийг биеэр мэдрэх тоног төхөөрөмжийг Монгол Улсад нийлүүлжээ.

Улаанбаатар хотод түүхий нүүрс оруулахыг хориглосон Засгийн газрын шийдвэр өнгөрсөн тавдугаар сарын 15-аас хэрэгжиж байгаа билээ. Уг шийдвэрийн хэрэгжилтэнд нийслэлийн Цагдаагийн газраас 36 өндөрлөг цэгүүдэд болон шалган нэвтрүүлэх товчоонд хяналт тавьж ажиллаж байна. Нийслэлийн Цагдаагийн газрын Урьдчилан сэргийлэх хэлтсийн дарга Л.Амармөрөн “Аравдугаар сарын 04-ний өдрөөс хойш түүхий нүүрстэй холбоотой 188 зөрчил илрүүлж 503,9 тонн нүүрсийг холбогдох байгууллагуудад шилжүүлэн ажиллаж байна” гэлээ. Мөн Улаанбаатар хотод түүхий нүүрс нэвтрүүлэхээс урьдчилан сэргийлэх чиглэлээр 24 цагаар үүрэг гүйцэтгэж байгаа талаар дуулгалаа.

Нийслэлд түүхий нүүрс тээвэрлэсэн болон хэрэглэсэн тохиолдолд зөрчлийн тухай хуулийн 7 дугаар зүйлийн 4.1.3-т зааснаар иргэнийг 300 мянга, аж ахуйн нэгжийг гурван сая хүртэлх төгрөгөөр торгох аж.

Нийслэлийн Байгаль орчны газраас нийслэлийн Засаг даргын 2019 оны А/1033 дугаар захирамжаар Улаанбаатар хотын нутаг дэвсгэрээс хар шороо олборлохыг 2020 оны 01 дүгээр сарын 01-ний өдрөөс эхлэн гурван жилийн хугацаатайгаар хориглосон шийдвэрийг иргэд олон нийт, мэргэжлийн байгууллагуудад сурталчлан таниулах уулзалтыг 2019 оны аравдугаар сарын 30-ны өдөр “Цэнгэг усны нөөц, байгаль хамгаалах төв”-д зохион байгууллаа.

Улаанбаатар хотын гудамж талбай, цэцэрлэгийн хөрс ерөнхийдөө үржил шимгүй, хөрсний бохирдолд их хэмжээгээр өртсөн байгаа учраас жил бүрийн ногоон байгууламжийн зориулалтаар шинээр мод, сөөг, зүлэг тарихдаа үндсэн хөрсийг заавал үржил шимтэй хар шороон хөрсөөр солих, нэмж хөрсөөр хучих, тарилтын өмнө ба дараа нь нэмэгдэл шим бордоо хийх гэсэн уламжлалт тариалалтын аргыг хэрэгжүүлж ирсэн бол цаашид их хэмжээний хар шороон хөрсийг дэвсэх технологийг өөрчилж, хог хаягдал, органик зүйлээс гарган авсан хиймэл хөрс, бордоог ашиглах шаардлага үүсч байна.

Хар шороог ногоон байгууламжид ашиглагч байгууллагуудын зүгээс хар шороог хориглосноор түүнийг орлох бүтээгдэхүүний нөөц нь Улаанбаатар хотын ногоон байгууламжид цэцэрлэгжүүлэлт, зүлэгжүүлэлтэд хүрэлцэх эсэх талаар тодруулж байсан бол, хүнсний хаягдал, үртэс, сангас, бууц, малын яс, лагаас бордоо гаргагч аж ахуйн нэгжүүдийн зүгээс тухайн бүтээгдэхүүнийг ашиглагчид маш цөөн, бүтээгдэхүүнийг худалдан авагч байхгүй учраас нийт ажиллах хүчин чадлынхаа 10 хувь хувиар л ажиллаж байгаа талаар дурьдаж цаашид экологид ээлтэй, байгаль орчныг хамгаалах арга хэмжээний хүрээнд үндэсний бордоо үйлдвэрлэгч аж ахуйн нэгж, байгууллагын үйл ажиллагаа, зах зээлийн орчинг уян хатан болгоход анхаарч ажиллах шаардлагатай талаар санал хэллээ.

Төрийн байгууллагаас худалдан авах ажиллагаа, сонгон шалгаруулалтад оролцоход хүндрэлтэй, импортын хямд үнэтэй бордоонд дарагдаж, зах зээлд бараа бүтээгдэхүүн нийлүүлэхэд хүндрэлтэй байдаг бөгөөд уулзалтад оролцогч аж ахуйн нэгж, байгууллага, мэргэжлийн байгууллагууд олон жилийн судалгаа шинжилгээнд тулгуурлан органик гаралтай бордоо үйлдвэрлэн ажиллаж байгааг дотоодын үйлдвэрлэл үйлчилгээг дэмжиж, бодлогын хувьд тодорхой шийдвэр гаргавал бордоо үйлдвэрлэгч аж ахуйн нэгж, байгууллагууд жил бүр Улаанбаатар хотын ногоон байгууламжийн хэрэгцээнд нийцэхүйц 10000 м.куб орчим бордоо, хөрсийг үйлдвэрлэж гаргах боломжтой юм.

Арга хэмжээнд бордоо үйлдвэрлэгч аж ахуйн нэгж, байгууллагын төлөөлөл төв цэвэрлэхийн лагаас бордоо гаргаж авах, туршилт судалгааны үр дүн хийсэн ажлын талаар “Эко тайхи” ХХК мэдээлэл хийж 2019 оны есдүгээр сард ДЦС-IV ТӨХК-ийн үнсэн далангийн доор 200 м.кв талбайг лагийн бордоогоор хучиж, зүлэгжүүлэх ажлыг туршилтын хугацаанд амжилттай хэрэгжүүлж, гарсан үр дүнг танилцууллаа.

Тус уулзалтад Төв аймгийн Баянчандмань суманд үйл ажиллагаа явуулдаг “Монгол экологийн бордоо” ХХК, Барилга хот байгуулалтын яамны захиалгаар туршилт, судалгаа хийж буй “Эко тайхи” ХХК, “МБОИЗ” ТББ, “Хот тохижилтын газар” ОНӨТҮГ, “Үндэсний цэцэрлэгт хүрээлэн”, дүүргийн байгаль орчны мэргэжилтнүүд харилцан мэдээлэл солилцон үүсч болох хүндрэл эрсдэлийн талаар санал солилцлоо.

Өчигдөр бага насны хүүхэд гарцгүй газраар зам хөндлөн гарах үедээ машинд мөргүүлж гэмтжээ.

Тодруулбал, 2019 оны 11 дүгээр сарын 4-ний 18:00 цагийн орчимд БЗД-ийн 97 дугаар сургуулийн зүүн замд Тoyota Land-Cruiser маркийн автомашины жолооч А нь явган зорчигч 5 настай А-г гарцгүй газраар ахын хамт зам хөндлөн гарах үед мөргөж гэмтээжээ.

ГХЯ-ны Төрийн нарийн бичгийн дарга Д.Даваасүрэн 2019 оны 11 дүгээр сарын 4-ний өдөр Монгол Улсын Сангийн сайд, Санхүүгийн хяналт, шалгалтын Улсын Ерөнхий байцаагч Ч.Хүрэлбаатарын тушаалаар ХШҮДАГ-ын захирал Б.Баярсайханд Санхүүгийн хяналт, шалгалтын Улсын ахлах байцаагч, мөн газрын дэд захирал Л.Эрдэнэдаваа, мэргэжилтэн Д.Лхагвасүрэн нарт Санхүүгийн хяналт, шалгалтын Улсын байцаагчийн эрх олгосон үнэмлэх, тэмдэг гардуулан өгөв.

Санхүүгийн хяналт, шалгалтын Улсын байцаагч нь Монгол Улсын хууль тогтоомжид заасан төрийн санхүүгийн хяналт, шалгалтын талаарх бүрэн эрхийг эдэлж, салбарын санхүүгийн зөрчлийн асуудлаар хариуцлага хүлээлгэх эрх бүхий албан тушаалтанд тооцогддог байна.

Гадаад харилцааны асуудал эрхэлсэн төрийн захиргааны төв байгууллагын албан тушаалтнуудад Санхүүгийн хяналт, шалгалтын Улсын байцаагчийн эрхийг анх удаа олгож буй ажээ.