Month: November 2019

Гадаад харилцааны дэд сайд Б.Батцэцэг Холбооны Бүгд Найрамдах Ардчилсан Этиоп Улсаас Монгол Улсад суух Элчин сайд Тэсхомэ Тога Чанакаг Итгэмжлэх Жуух бичгээ барихтай нь холбогдуулан хүлээн авч уулзав.

Элчин сайд Тэсхомэ Чанака Итгэмжлэх Жуух бичгийнхээ хувийг Дэд сайдад гардуулж, Монгол, Этиопын харилцаа, хамтын ажиллагааг хөгжүүлэх боломжийг эрэлхийлж ажиллахаа илэрхийлэв.

Дэд сайд Б.Батцэцэг Монгол, Этиоп хоёр улс нь Далайд гарцгүй хөгжиж буй орнуудын хувиар ДГХБО-ын Олон улсын судалгааны төвийг байгуулахад хамтран ажиллаж ирснийг тэмдэглэж, цаашид олон улсын энхийг сахиулах үйл ажиллагаанд идэвхтэй оролцогч орнууд тул энэ чиглэлээр хамтран ажиллаж туршлагаасаа хуваалцах боломжтойг онцлов.

Монгол Улс нь Этиоп Улстай 1967 оны 1 дугаар сарын 24-ний өдөр дипломат харилцаа тогтоосон юм.

2019 оны 11 дүгээр сарын 6-ны өглөө буюу өнөөдөр 08:00 цагийн орчимд Баянзүрх дүүргийн 13 дугаар хорооны нутаг дэвсгэрт “Тоёота Приус” маркийн машины жолооч тээврийн хэрэгслээ гараашаас гаргаад өөд газарт тавьчихаад, буцаж хаалгаа хаах үед машин нь өнхөрч, тухайн иргэнийг ханатай хавчин амь нас нь эрсдсэн харамсалтай осол гарчээ. Талийгаач залуу нь 25 настай байжээ.

Иймд жолооч та бүхэн тээврийн хэрэгслээ уруу болон өөд газар байрлуулахгүй байх, хэрэв байрлуулсан тохиолдолд карданаа татах зэргээр аюулгүй байдлаа сайн хангаж болгоомжтой байхыг Тээврийн цагдаагийн албанаас онцгойлон анхаарууллаа.

Мөн Сонгинохайрхан дүүргийн нутаг дэвсгэрт бага насны хүүхдийг дайрч, амь насыг нь хохироосон хэрэг гарчээ. Тодруулбал, тус дүүргийн нутаг дэвсгэрт өнөөдөр 13.20 цагийн орчимд “Приус-30” маркийн автомашины жолооч осол гаргаж, замын хажууд явсан охиныг дайрчээ. Ослын улмаас охин газар дээрээ амиа алдсан бөгөөд цагдаа нар ослын газар ажиллаж байна. Харин жолооч биедээ хөнгөн гэмтэл авсан юм байна. Энэ хэргийг СХД-ийн Замын цагдаагийн хэлтэс шалгаж байна. Иймд жолоочид замын хөдөлгөөнд оролцохдоо анхаарал болгоомжтой байхыг цагдаагийн байгууллагаас сэрэмжлүүлж байна.

Барилга, хот байгуулалтын дэд сайд Б.Мөнхбаатар өнөөдөр АНУ-ын ЭСЯ-ны Дэд тэргүүн, ноён Грегори Мэй болон Эдийн засаг, худалдааны хэлтсийн Худалдааны ахлан мэргэжилтэн ноён Майкл Ричмонд тэргүүтэй албаны хүмүүсийг хүлээн авч уулзлаа.

Уулзалтын үеэр БХБ-ын дэд сайд Б.Мөнхбаатар Монгол Улсын Засгийн газраас БНХАУ-ын талтай гэрээ байгуулан хэрэгжүүлж байгаа шинээр баригдах “Төв цэвэрлэх байгууламж” төслийн явц болон Гэр хорооллын дахин төлөвлөлтийн талаарх мэдээллийг ноён Грегори Мэйгт өгөхийн сацуу хамтын ажиллагааны санал тавьж, ярилцсан юм.

Энэ удаагийн уулзалтаар БХБ-ын дэд сайд Б.Мөнхбаатар салбарын хэмжээнд тулгамдаж буй хэд, хэдэн асуудлуудаар АНУ-аас туршлага судлах сонирхолтой байгаагаа илэрхийлэв.

Үүнд: АНУ нь сэргээгдэх эрчим хүчний болон цахилгаан эрчим хүчний бие даасан эх үүсвэр бүхий амины орон сууцны хорооллын бүтээн байгуулалт, төслийн хэрэгжилтийн талаар ихээхэн туршлагатай улс юм. Гэр хорооллын дахин төлөвлөлтөөс гадна дагуул хотуудыг хөгжүүлэх, байгуулах, орон нутгийн дэд бүтцийг сайжруулах, бие даасан эрчим хүчний эх үүсвэр бүхий төлбөрийн чадварт нийцсэн амины орон сууцны хорооллын жишиг төслийг хэрэгжүүлэх чиглэлд хамтран ажиллах сонирхолтой байна гэдгээ илэрхийллээ.

Мөн АНУ нь моргейжийн зах зээлийг олон жилийн туршид хөгжүүлж, эрсдэл, уналтыг даван туулж ирсэн арвин туршлагатай улс учраас моргейжийн зээлийн санхүүжилтийн систем, зээлийн төлбөрийн нөхцлүүд, үүнтэй холбоотой дүрэм журмууд болон хот төлөвлөлт, бүтээн байгуулалтын менежмент, төлөвлөлтийг хэрэгжүүлэх механизмын талаар туршлага судлах шаардлагатай байгаа талаар ноён Грегори Мэйгтэй ярилцах үеэрээ уламжилсан юм.

Түүнчлэн Улаанбаатар хот болон зарим суурин газруудын хуучин барилгуудыг нураан шинээр барих, сэргээн засварлах, хүчитгэх шаардлагатай барилга байгууламжуудын жагсаалт гарсантай холбогдуулан хуучин, шинэ барилгыг нэмж хүчитгэхтэй холбоотой норм дүрэм хомс тул ийм барилга байгууламжийн норм, дүрэм, зураг төсөл төлөвлөх, хүчитгэлийн шийдлийн талаар инженер техникийн ажилтнуудыг сургалтад хамруулах талаар санал солилцов.

Нийслэлийн Шуурхай Удирдлагын төвийн утсанд иргэнээс ирүүлсэн мэдээллийн дагуу Сонжин Групп ХХК-ийн Сонжин гранд зочид буудлын хогийн цэгийн байдалд хяналт шалгалт хийлээ.

Шалгалтаар тус компани нь хог хаягдлаа шатаасан зөрчилд Монгол Улсын Зөрчлийн тухай хуулийн дагуу торгууль оногдуулж, зөрчлийг арилгуулахаар эрх бүхий албан тушаалтны 14/68 дугаартай албан даалгавар хүргүүлж биелэлтэд хяналт тавин ажиллаж байна.

Гадаад сургууль төгссөн залуучуудыг эх орондоо хөдөлмөр эрхлэхэд нь дэмжлэг үзүүлэх зорилготойгоор “Карьер Экспо-2019” хөдөлмөрийн яармагийг зохион байгуулах гэж байна. Тус хөдөлмөрийн яармаг үзэсгэлэнг Хөдөлмөр нийгмийн хамгааллын яам, нийслэлийн Хүүхэд залуучуудын хөгжлийн газар, нийслэлийн Хөдөлөмөр эрхлэлтийн газар, “Гадаадад төгсөгчдийн нэгдсэн зөвлөл” хамтран зохион байгуулах бөгөөд өнөөдөр нийслэлийн ЗДТГ-ын Хэвлэлийн мэдээллийн төвд сэтгүүлчдэд мэдээлэл өглөө.

Өнгөрөгч онд зохиогдсон “Эх орондоо хөдөлмөр эрхэлцгээе” уриатай хөдөлмөрийн үзэсгэлэн яармагт 1100 гаруй гадаадад сургууль төгссөн мэргэжилтэй залуус хамрагдаж, 510 орчим залуус сонирхсон ажлын байранд бүртгүүлснээс 70 залуу шууд ажилд орсон байна.

Энэ жилийн хөдөлмөрийн үзэсгэлэн яармаг Монголын Үндэсний Худалдаа аж үйлдвэрийн их танхимд арваннэгдүгээр сарын 09-ний өдрийн 12.00-16.00 цагийн хооронд зохион байгуулагдана.

Өнөөдрийн байдлаар Монгол Улсын хэмжээнд 50 орчим үндэсний томоохон хэмжээний аж ахуй нэг, байгууллагын 500 гаран нээлттэй ажлын байр зарлагдах бөгөөд 15-34 насны ажил идэвхитэй хайж буй залуус хамрагдах боломжтой.

Нийслэлийн Гэр бүл, хүүхэд залуучуудын хөгжлийн газрын орлогч дарга Н.Мандуул ”Энэ жилийн “Карьер экспо-2019” хөдөлмөрийн яармагийн онцлог нь төр хувийн хэвшлийн түншлэлийг оролцуулж, гадаадын их дээд сургууль төгссөн залуучуудын нэгдсэн зөвлөлтэй хамтран төрийн байгууллагууд ажиллаж байгаагаараа онцлог болж байна. Түүнчлэн гадаадад дотоодын сургууль төгссөн гэж ялгалхгүй, ажил хайж буй амьдралаа дээшлүүлэх хүсэлтэй бүх залуучуудад “Карьер экспо-2019” арга хэмжээ нээлттэй. Бид мэргэжлийн боловсролын үнэлгээний төвтэй хамтарч дотоод гадаадад сургууль төгссөн мэргэжлийн үнэмлэхгүй ч, ур чадвар өндөр, гүйцэтгэл сайтай залууст мэргэжлийн боловсролын үнэмлэхийг олгохоор шийдвэрлэсэн.Тиймээс залуус үзэсгэлэн яармагт өргөнөөр оролцож, ур чадвараа үнэлүүлснээр шалгалт өгч, сурахгүйгээр мэргэжлийн үнэмлэхтэй болох боломжтой юм” хэмээн уриаллаа.

Мөн нийслэлийн Хөдөлмөр эрхлэлтийн газар, төвийн зургаан дүүргийн Хөдөлмөр халамж үйлчилгээний хэлтэст бүртгэлтэй 3000 орчим ажлын байрны танилцуулга тараагдахын дээр Монгол Улсын Засгийн газар, Дэлхийн банктай хамтран хэрэгжүүлж буй хөдөлмөр эрхлэлтийг дэмжих төслийн хүрээнд хэрэгжих цогц сургалтын талаар танилцуулах аж. Уг сургалтын хүрээнд дөрвөн сарын хугацаатай ур чадвар эзэмшүүлэх найман мэргэжлээр иргэдийг бүртгэх юм.

МХЕГ-ын даргын баталсан 01/33 тоот Ундны усны чанар аюулгүй байдалд тандалт судалгаа, хяналт шинжилгээ хийх удирдамжийн дагуу ХУД-ийн 14 дүгээр хороонд байрлах сургууль, цэцэрлэгийн цогцолборын гүний худгийн хангамжийн системийн усанд шинжилгээ хийлээ.

Шинжилгээгээр гэдэсний бүлгийн нян илэрсэн, бичил биетний ерөнхий тоо стандартад заасан хэмжээнээс 2,1 дахин их гарсан тул Зөрчлийн хэрэг нээн ХУД-ын Прокурорын тогтоолоор хэсгийн усан хангамжийн үйл ажиллагааг зогсоолоо.

Зөрчил шалган шийдвэрлэх ажиллагаа үргэлжилж байна.