Month: November 2019

БНАСАУ-ын Пёньян хотноо Монголын үлэг гүрвэлийн олдвороор тусгай үзэсгэлэн гаргахад шаардагдах хөрөнгийг Засгийн газрын нөөц сангаас гаргахаар болжээ.

Нийслэлийн Засаг даргын Хүний хөгжил, нийгмийн бодлого хариуцсан орлогч Ш.Анхмаа, Нийслэлийн иргэдийн Төлөөлөгчдийн Хурлын төлөөлөгч Ц.Байгалмаа нарын төлөөлөгчид энэ сарын 24-25-ны өдрүүдэд Япон Улсын Мияконожо хотод зохион байгуулагдсан Улаанбаатар, Мияконожо хотуудын хооронд найрамдалт харилцаа тогтоосны 20 жилийн ойн арга хэмжээнд оролцов. Арга хэмжээний хүрээнд албан уулзалт, хурал, 20 жилийн хамтын ажиллагааны дурсгалын самбарын нээлт, хамтарсан урлагийн тоглолт зэрэг үйл ажиллагаа зохион байгуулагдлаа.

Нээлтийн үйл ажиллагаанд Ш.Анхмаа мэндчилгээ дэвшүүлж, нийслэл Улаанбаатар хотын түүх, хөгжлийн талаар илтгэл тавьж, Мияконожо хотын иргэдэд танилцуулга хийсэн юм.

Улаанбаатар, Мияконожо хотууд нь 1999 онд найрамдалт харилцаа тогтоосон түүхтэй. Өнгөрсөн 20 жилийн хугацаанд талууд удирдлагуудын харилцан айлчлал, соёл, урлаг, боловсрол, залуучууд солилцоо, хөдөө аж ахуй, сэргээгдэх эрчим хүч, спорт зэрэг олон салбарт урт хугацааны, бодит найрамдалт харилцаа, хамтын ажиллагааг өргөжүүлсээр байна. Мияконожо хот нь хөдөө аж ахуй, эрчимжсэн мал аж ахуйг хөгжүүлж, цайны ургамал, жимс жимсгэнэ тариалалтаараа улсдаа тэргүүлэх байр суурь эзэлдэг байна.

Улаанбаатар, Мияконожо хотуудын найрамдалт харилцаа, хамтын ажиллагааг өргөжүүлэхэд үнэтэй хувь нэмэр оруулсан тус хотын дарга Икэда Такахиса, хурлын дарга Эноки Томоюки, Мияконожо Коосэн сургуулийн захирал Иваса Кэнжи, Монгол Мияаконожо найрамдлын нийгэмлэгийн ерөнхий нарийн бичгийн дарга, Монголд салхин сэнс, сэргээгдэх эрчим хүчийг санаачлан нэвтрүүлсэн Кавасаки Кэйчи нарт нийслэл Улаанбаатар хотын 380 жилийн ойн медаль гардуулав.

Төр, нийгмийн нэрт зүтгэлтэн, Үндсэн хуулийн эхийг баригч, Монгол Улсын Хөдөлмөрийн баатар, Ардын багш, Гавьяат хуульч, доктор, профессор Бяраагийн Чимидийн мэндэлсний 85 жилийн ойн хүрээнд “Үндсэн хуулийн эхийг баригч – Б.ЧИМИД” олон улсын эрдэм шинжилгээний хурал өнөөдөр (2019.11.28) Төрийн ордонд эхэллээ.

Энэ удаагийн олон улсын эрдэм шинжилгээний хурлыг анх удаа Монгол Улсын Их Хурлын дарга Г.Занданшатарын ивээл дор зохион байгуулж байгаа юм.

Тус хурлыг УИХ-ын Тамгын газар, Хууль зүйн үндэсний хүрээлэн, “Чимид” сан, Монгол Улсын Их Сургууль, Монголын хуульчдын холбоо, Ханнс-Зайделийн сан зэрэг байгууллагууд хамтран зохион байгуулж байна.

Уг хурал нь олон улсын хэмжээнд хийгдэж буй хоёр дахь удаагийн эрдэм шинжилгээний хурал бөгөөд Монгол, Америкийн Нэгдсэн Улс (АНУ), Холбооны Бүгд Найрамдах Герман Улс (ХБНГУ), Оросын Холбооны Улс (ОХУ), Бүгд Найрамдах Хятад Ард Улс (БНХАУ), Бүгд Найрамдах Солонгос Улс (БНСУ), Япон зэрэг долоон улсын эрдэмтэн, судлаачид оролцож илтгэл хэлэлцүүлж байна.

УИХ-ын дарга Г.Занданшатар орон нутагт албан томилолттой байгаа учир түүний илгээлтийг УИХ-ын дэд дарга Я.Санжмятав уншиж танилцуулав.

УИХ-ын дарга Г.Занданшатар илгээлтдээ, “Энэхүү олон улсын эрдэм шинжилгээний хурал нь Монгол төрийн түүхэн, чухал үйл явдалдтай давхцан зохион байгуулагдаж байгаагаараа онцлог юм. УИХ 14 хоногийн өмнө 1992 оны ардчилсан Үндсэн хуульд суурь үзэл баримтлалынх нь хүрээнд улс төр, эдийн засаг, нийгмийн хэрэгцээ шаардлагад үндэслэсэн нэмэлт, өөрчлөлт орууллаа. Уг нэмэлт, өөрчлөлтийг Анхдугаар Үндсэн хуулиа баталж, Бүгд Найрамдах засаглалыг тунхагласан өдөр буюу 11 дүгээр сарын 26-ны өдөр Монгол Улсын Ерөнхийлөгч Х.Баттулга нотлон баталгаажууллаа.

Ийнхүү Үндсэн хуульд 2000 онд оруулсан долоон өөрчлөлтийг засан сайжруулах, засаглалын хяналт-тэнцэл, тогтвортой байдлын тогтолцоог бүрдүүлэх, парламентыг хариуцлагажуулж, шүүхийн хараат бус байдлыг хангах, нутгийн удирдлага, засаг захиргааны эрх зүйн үндсийг тогтоох зэрэг чиглэлээр сүүлийн 10 гаруй жил, гурван парламент дамжин өрнөсөн санал санаачилгыг өнөөгийн парламент үндэсний хэмжээний зөвшилцөл ойлголцлын хүрээнд бодит ажил хэрэг болгож чадлаа.

Үндсэн хуулийн энэхүү нэмэлт, өөрчлөлт өмнө нь УИХ-д өргөн мэдүүлж байсан хэд хэдэн төсөл болон эрдэмтэн, судлаачдын дүгнэлт, судалгаа, ард иргэдийн санал бодолд суурилсан. Түүнчлэн Б.Чимид агсан “Улс төрийн явцуу бүлэглэлүүдийн албан тушаал, эрх ямбын өрсөлдөөний золиос болсон өөрчлөлтийг жам ёсны хэмээн андуурч хууртагдан, Үндсэн хуулийн үнэт зүйл болсон гол зарчмаасаа хазайхад хүрүүзэй гэж л болгоомжилмоор байдаг юм” гэж хэлснийг марталгүй санаж, мөрдлөг болгосон. Үндсэн хуулийнхаа үнэт зүйлийг хөндөлгүйгээр жам ёсны өөрчлөлт оруулсан гэж үзэж болно. Монгол Улс 1992 онд ардчилсан Үндсэн хуулиа баталж, дагаж мөрдсөөр даруй 27 жил болоод байна. Ард Их Хурлын депутат, Улсын Бага Хурлын гишүүн, нарийн бичгийн дарга Б.Чимид агсан Үндсэн хуулийн эхийг баригч төдийгүй, Үндсэн хуулийн агуулга, үзэл санааг тайлбарлан таниулах, түүний дархлааг сахин хамгаалахад нэн чухал хувь нэмэр оруулсан нь та бидний эрхэмлэх учиртай үнэт өв мөн билээ” хэмээн дурджээ.

Мөн Монгол Улсын Ерөнхийлөгч Х.Баттулга, Монгол Улсын Ерөнхий сайд У.Хүрэлсүх нар энэхүү хуралд зориулан өөрсдийн мэндчилгээг хүргүүлсэн байлаа. Түүнчлэн Монгол Улсын анхны Ерөнхийлөгч, академич П.Очирбат үг хэлж, Б.Чимид агсантай хамтран ажиллаж байсан үеийн дуртгалаасаа хуваалцав.

“Чимид” сангийн тэргүүн Ч.Батцогт, “Энэхүү эрдэм шинжилгээний хурал түүний үйл хэргийг үргэлжлүүлэх зорилготойгоор үр хүүхдүүд бидний санаачилгаар, анд нөхөд, эрдэмтэн шавь нарын дэмжлэгтэйгээр 2013 оноос эхлэн зохион байгуулж ирсэн. Ардчилсан нийгмийн байгууллын үнэт зүйл болох Үндсэн хуулийн үзэл санааг түгээн дэлгэрүүлэх, Үндсэн хуульт ёсыг бэхжүүлэх, хууль дээдлэх үзэл дадлыг нийт иргэн, төрийн байгууллага, улс төрчид, хууль тогтоогчдод, залуу үеийнхэнд хэвшүүлэх, олон нийтийн энэ чиглэлээр соён гэгээрүүлэх, хууль зүйн шинжлэх ухааныг хөгжүүлэх зорилгоор 2010 онд “Чимид” санг байгуулсан” гэдгээ тэмдэглээд Б.Чимид агсантай хамтран ажиллаж байсан эрдэмтэн судлаачид, анд нөхөд, шавь нарт нь талархал илэрхийлэв.

Мөн Улсын Их Хурлын гишүүн, Б.Чимидийн нэрэмжит анхны шагналтан, Гавьяат хуульч, Хууль зүйн шинжлэх ухааны доктор, профессор Д.Лүндээжанцан “Дэлхий нийтийн Үндсэн хуулиудын нийтлэг зарчим ба Монгол загвар” сэдвээр илтгэл тавьж, Монгол Улсын Үндсэн хуульд оруулсан нэмэлт, өөрчлөлтийн талаар танилцууллаа.

Дашрамд тэмдэглэхэд, Монгол Улсын Их Хурал 1992 оны Ардчилсан Үндсэн хууль баталсан өдрийг тохиолдуулан, Үндсэн хуулийг баталж, монгол төрийн хууль тогтоох эрх зүйн үндсийг тогтооход ихээхэн хувь нэмэр оруулсан Хөдөлмөрийн баатар Б.Чимидийн нэрэмжит шагналыг тухайн жил хууль зүйн шинжлэх ухааны салбарт томоохон хувь нэмэр оруулахуйц бүтээл туурвисан хүмүүст олгодог. Тодруулбал,

– Монгол Улсын гавьяат хуульч, Хууль зүйн шинжлэх ухааны доктор, профессор Данзангийн Лүндээжанцан “Монгол Улс дахь төрийн эрх мэдлийн хуваарилалт” бүтээлээр,

– Монгол Улсын гавьяат хуульч, Хууль зүйн шинжлэх ухааны доктор, профессор Ишийн Дашнямын “Монгол Улсын төр эрх зүйн түүх” бүтээлээр,

– Монгол Улсын Их Сургуулийн Хууль зүйн сургуулийн Нийтийн эрх зүйн тэнхимийн эрхлэгч, хууль зүйн шинжлэх ухааны доктор, профессор Должингийн Баярсайханы “Эрх зүйн онол” бүтээлээр,

– Монгол Улсын шинжлэх ухааны гавьяат зүтгэлтэн, Хууль зүйн шинжлэх ухааны доктор, профессор, академич Содовсүрэнгийн Нарангэрэл “Монголын эрх зүйн эх толь бичиг” бүтээлээр,

– Монгол Улсын Их Сургуулийн Хууль зүйн сургуулийн Нийтийн эрх зүйн тэнхимийн профессор, хууль зүйн ухааны доктор Хаянхярваагийн Сэлэнгэ “XIII зууны Монголын төр эрх зүйн үзэл санаа, түүний үнэт зүйл” бүтээлээр тус тус дээрх шагналыг хүртсэн юм.

Цагдаагийн ерөнхий газрын даргын тушаалаар Тээврийн цагдаагийн албаны Урьдчилан сэргийлэх хэлтсийн дарга томилогдсон байна.

Тус хэлтсийн дарга, хурандаа Э.Бөхбат өнгөрсөн есдүгээр сард үүрэгт ажлаасаа түдгэлзүүлэх өргөдлөө өгсөн юм. Тэгвэл түүний оронд цагдаагийн хошууч Э.Энхболд томилогджээ.

Эх сурвалжийн мэдээлснээр түүнийг өнгөрсөн долоо хоногт томилсон байна. Э.Энхболд нь Тээврийн цагдаад олон жил ажилласан туршлагатай нэгэн аж.

Засгийн газрын өнөөдрийн /2019.11.28/ хуралдаанаар хэд хэдэн асуудлыг хэлэлцэн шийдвэрлэлээ. Гамшгаас хамгаалах тухай хуулийн 12.3, Галын аюулгүй байдлын тухай хуулийн 5.3, Төрийн хяналт шалгалтын тухай хуулийн 10.3-т заасны дагуу Онцгой байдлын ерөнхий газрын даргад “Гамшгаас хамгаалах болон гал түймрийн улсын хяналтын ерөнхий байцаагчийн эрх” олголоо.

Өвөлжилтийн нөхцөл байдал хүндэрсэнтэй холбогдуулан өнөөдрийн байдлаар Архангай аймгийн 1000 өрхийн 388,3 мянган мал, Булган аймгийн 1630 өрхийн 482,7 мянган мал, Дундговь аймгийн 1000 өрхийн 780,000 мал, Өвөрхангай аймгийн 1440 өрхийн 1,2 сая мал, Төв аймгийн 600 өрхийн 425,0 мянган мал буюу нийт 5670 өрхийн 3,2 сая мал Архангай, Булган, Говьсүмбэр, Хэнтий, Сүхбаатар, Төв зэрэг бусад аймгуудад отор нүүдэл хийж байна.

Үүнтэй холбогдуулан Архангай, Булган, Дундговь, Өвөрхангай, Төв, Завхан, Хөвсгөл аймгуудад отор нүүдэл хийж байгаа малчид, иргэдэд төрийн үйлчилгээ үзүүлэх, отрын штаб байгуулах, цаг үеийн шинжтэй бусад асуудлыг шийдвэрлэхэд зориулж дээрх аймаг тус бүрт 50 сая нийт 350 сая төгрөгийг,

Дундговь, Өвөрхангай, Төв аймагт улсын нөөцөөс үнэгүй олгох 1710 тонн өвс, үнийг нь 50 хувь хямдруулан олгох 1370 тонн тэжээл, тэдгээрийг буцаан нөхөн бүрдүүлэх зардалд 954,7 сая төгрөгийг,

Мөн өвөлжилт хүндрэх эрсдэлтэй байгаа Булган, Дундговь, Өвөрхангай, Төв, Хөвсгөл аймгуудын малчид, иргэдэд төрийн үйлчилгээг хүртээмжтэй хүргэх зорилгоор улсын нөөцөөс “Шуурхай албаны автомашин” олгох, Дундговь, Өвөрхангай, Төв, Завхан, Хөвсгөл аймгуудад өвс, тэжээлгүйн улмаас өлдөж, доройтсон малд хүчит тэжээл, малын эм биобэлдмэл өгөх, тэдгээрийг буцаан нөхөн бүрдүүлэх зардалд 410,3 сая төгрөг буюу 1,7 тэрбум төгрөгийг тус тус Засгийн газрын хуралдаанаар шийдвэрлүүллээ.

Нийслэлийн Эрүүл мэндийн газраас Дэлхийн эрүүл мэндийн байгууллага /ДЭМБ/-ын санхүүжилтээр энэ сарын 18-наас 24-нд “Антибиотикийн талаарх мэдлэг, хандлагыг дээшлүүлэх дэлхийн долоо хоног”-ийн хүрээнд “Нянгийн тэсвэржилтийг бууруулахад эм зүйчдийн үүрэг” сэдэвт сургалтыг зохион байгууллаа.

Нийтийн үйлчилгээтэй эмийн сангийн эрхлэгч, эм зүйч, эм найруулагч зэрэг нийт 80 хүн хамрагдсан тус сургалтад ЭМЯ, НЭМГ, МХЕГ, НМХГ, ЭМХТ, Монголын эм зүйн байгууллагуудын нэгдсэн “Эм холбоо”-ны холбогдох мэргэжилтнүүд нянгийн тэсвэржилтийн талаар ДЭМБ-аас өгч буй мэдээлэл, нянгийн эсрэг эмийг жороор олгож буй байдалд хийсэн хяналт шалгалтын дүн, эмийн сангийн тайлан, эмийн бүртгэлийн өнөөгийн байдал, бүртгэлийн шинэчилсэн журмын тухай, эмийн гаж нөлөө, зохистой хэрэглээ, шинэ эмийн мэдээллийг хүргэсэн юм.

Энэхүү сургалт нь эм зүйч, эм найруулагч нарт антибиотикийг хэтрүүлэн эсвэл буруу хэрэглэснээс үүдэн хүн болон амьтны эрүүл мэндэд тулгамдсан асуудлуудыг үүсгэх, нян антибиотикт тэсвэртэй болох, эмчилгээ үр дүнгээ өгч чадахгүйд хүрэх, эмчилгээний хугацаа уртсах зэрэг олон аюулыг дагуулж байгаа өнөө үед иргэд төдийгүй эм зүйчдийн мэдлэг, хандлагыг өөрчлөх тун чухал алхам болж байна.

Нийт эмийнхээ 70 орчим хувийг импортоор авдаг, эмчилгээнд хэрэглэж буй эмийн 30 орчим хувийг нянгийн эсрэг үйлдэлтэй эм, антибиотик эзэлж байгаа манай улсын хувьд антибиотикийн талаарх хүн амын мэдлэгийг дээшлүүлэх, зохистой хэрэглээг дэмжих, тэсвэржсэн нянгийн тархалтыг бууруулахад эдгээр ажлууд нь чухал ач холбогдолтой юм.