Month: November 2019

Нийслэлийн Хан-Уул дүүргийн 18 дугаар хороо, “Хүннү 222” хорооллын барилгын талбай дээр гал түлж утаа гаргасан тохиолдол гарчээ. Тодруулбал, Нийслэлийн шуурхай албаны төв штабын утсанд ирүүлсэн иргэний гомдлын дагуу Хан-Уул дүүрэг дэх мэргэжлийн хяналтын хэлтэс, дүүргийн шуурхай штабтай хамтран газар дээр нь хяналт шалгалт хийжээ.

Шалгалтын үеэр шөнө хүйтэн хоносон учраас барилгын бетоныг хөлдөөхгүй байх зорилгоор “Ногоон гандирс” ХХК-ийн талбайн даамал Г нь барилгын дээвэр дээр гэрээсээ шахмал түлш авчирч гал түлсэн болох нь тогтоогдсон байна.

Байгаль орчин аялал жуулчлалын сайд, Нийслэлийн Засаг дарга бөгөөд Улаанбаатар хотын захирагчийн хамтарсан А/433-А/820 тоот тушаал, захирамжаар батлагдсан “Агаарын чанарыг сайжруулах бүсэд мөрдөх журам”-ыг хэрэгжүүлээгүй гэдэг үндэслэлээр Зөрчлийн тухай хуулийн 7.4 дүгээр зүйлийн 1.3 дахь заалтын дагуу Г-д торгууль ногдуулжээ.

Нийслэлийн Засаг дарга бөгөөд Улаанбаатар хотын захирагчийн аравдугаар сарын 4-ний өдрийн 3/1388 дугаартай албан бичгийн дагуу автобусны цэвэрлэгээ үйлчилгээг сайжруулах, иргэдийг ая тухтай, цэвэр орчинд зорчих нөхцөл бололцоогоор хангах, нийтийн тээврийн үйлчилгээний стандартыг дээшлүүлэх ажлын хүрээнд “Зорчигч тээвэр гурав” ОНӨААТҮГ-с “BUS SERVICE” цэвэрлэгээний үйлчилгээг нэвтрүүлжээ.

Уг ажлын хүрээнд эцсийн цэгүүд болох Ч:25 Тоосгоны эцэс, Ч:28 Сэлхийн эцэс, Ч:29 Сэлбийн чиглэлүүдэд “BUS SERVICE” үйлчилгээг явуулж байна. Энэ үйлчилгээ нь нийтийн тээврийн шугаманд яваа өөрийн автобусанд чийгтэй цэвэрлэгээ, халдвараас сэргийлэх ариутгалын үйлчилгээг зохион байгуулж иргэд та бүхэнд цэвэрхэн автобусаар үйлчлэх зорилготой ажиллаж байна.

Өнөөдөр Хан-Уул дүүргийн Засаг дарга Ж.Алдаржавхлан, Засаг даргын нэгдүгээр орлогч Г.Батсайхан нар Хан-Уул дүүргийн Тохижилт үйлчилгээний төвд хог тээвэрлэлтийн таван автомашин, зам засвар, шинэчлэлийн хоёр ковш, грейдер машины түлхүүрийг гардуулан өглөө.

Сүүлийн арван жилийн хугацаанд Хан-Уул дүүргийн Тохижилт үйлчилгээний төв нь парк шинэчлэл хийгээгүй хог тээвэрлэх зориулалттай 18 ширхэг автомашины ихэнх нь ашиглалтын хугацаа дууссан, эвдрэл гэмтэл ихтэй, ажлын бүтээмж нь муудсан байсан.Өмнө нь ашиглаж байсан хог тээвэрлэлтийн машинууд нь оруулж ирсэн тухайн улсдаа олон жил явсан автомашинуудыг ашиглаж байсан бөгөөд эдгээр найман тонны даацтай хог тээвэрлэлтийн цоо шинэ автомашинууд нь 00 километртэй орчин үеийн стандартын шаардлага хангасан гэдгээрээ онцлог аж.

Дүүргийн нутаг дэвсгэрт жил ирэх тусам орон сууцны хороолол, аж ахуй нэгж байгууллага, хүн амын тоо ихээр нэмэгдэж, хог ачиж тээвэрлэхэд автомашин техникийн хэрэгцээ шаардагдаж байсан. Эдгээр орчин үеийн стандарт нийцсэн хог тээвэрлэлтийн таван автомашин, зам засвар шинэчлэлийн хоёр ковш, грейдертэй болсноор Эко дүүрэг болох зорилт дэвшүүлсэн Хан-Уул дүүрэг хог тээвэрлэлтийн асуудлаа бүрэн шийдвэрлэсэн байна.

Хятад улсаас Европыг зорьсон “China Railway Express” ачааны галт тэрэгний эхний цуваа 2019 оны 11 сарын 6-ны өдөр Туркийн нийслэл Анкара хотын төмөр замаар дамжин өнгөрчээ.

Турк улс галт тэрэгний эхний цувааг ёслол төгөлдөр угтан авсан бөгөөд “Турк улс сүүлийн жилүүдэд тээврийн дэд бүтцийг сайжруулснаар Ази, Европын хооронд тасралтгүй холболт бий болгоход хувь нэмэр оруулсан” гэж тус улсын гадаад хэргийн яамны мэдэгдэлд дурдсан байна.

Аравдугаар сарын 23-ны өдөр Завхан аймгийн Тосонцэнгэл сумын иргэн Ө, А нар нь тус аймгаас Улаанбаатар хотруу автомашинаар таван ширхэг тарваганы тулам, 65 ширхэг бугын эвэр тээвэрлэж байсныг Өвөрхангай аймгийн Хархорин сум дахь цагдаагийн алба хаагчид илрүүлэн аймгийн Мэргэжлийн хяналтын газраас Зөрчлийн хэрэг нээн шалгаж байна.

Эдгээр иргэд ямар нэг тусгай зөвшөөрөл, гарал үүслийн бичиг, дагалдах тодорхойлолтгүй байсан бөгөөд хууль бусаар агнасан амьтны гаралтай мах, түүхий эд худалдан авсан, хууль бусаар ан амьтан агнасан байж болзошгүй аж.

Баян-Өлгий аймгийн Мэргэжлийн хяналтын газраас хийсэн шинжилгээгээр Улаанбаатар хотын нэр бүхий компаниас иргэн А-д нийлүүлсэн цагаан будаа нь хэвийн бус амт, үнэртэй, бохирдолттой, стандартын шаардлага хангахгүй, хүнсэнд хэрэглэх боломжгүй нь тогтоогдлоо.

Иймд холбогдох хуулийн дагуу 33.9 тонн цагаан будааг нийлүүлсэн компани руу нь буцаалт хийлгүүлжээ.

Байгаль орчин, аялал жуулчлалын яам, НҮБ-ын хөгжлийн хөтөлбөр, “Монголын унаган байгалийн хүлцэл тогтворжилтыг хангах нь” төсөлтэй хамтран Даян дэлхийн Байгаль орчны сангийн санхүүжилтээр “Цөлжилт, газрын доройтлыг бууруулах аргачлал, цөлжилтийн мониторингийн судалгааны арга зүйд суралцуулах нь” сэдэвт сургалт зохион байгууллаа. Сургалтад аймаг нийслэлийн Байгаль орчин аялал жуулчлалын газрын Цөлжилт, газрын доройтол, ой хариуцсан мэргэжилтнүүд, Ус цаг уур орчны шинжилгээний төвийн байгаль орчны шинжилгээний лабораторийн эрхлэгч, инженерүүд оролцлоо.

Энэхүү сургалтыг Цөлжилт, газрын доройтлыг бууруулах чиглэлээр батлагдсан хууль тогтоомж танилцуулах шинээр боловсруулагдаж буй журам аргачлал хэлэлцүүлэх, цөлжилтөд нэрвэгдэж буй газар нутгийн бэлчээр, байгалийн нөөцийг зохистой ашиглах, хамгаалах, цөлжилтийг үнэлэхэд хийж буй хяналт шинжилгээний ажлын чанарыг сайжруулах зорилгоор зохион байгууллаа.