Month: November 2019

БОАЖЯ-наас хэрэгжүүлж буй Төр, хувийн хэвшлийн хамтын ажиллагааны хүрээнд Орон нутагт хуванцар сав нягтруулан шахах, бутлагч төхөөрөмж суурилуулж, хог хаягдлын зохистой менежментийг дэмжих төслийн хүрээнд 8 аймагт хуванцар хог бутлагч, пресллэгч машиныг БОАЖ-ын сайд Н.Цэрэнбат хүлээлгэж өглөө. Увс, Говь-Алтай, Баянхонгор, Орхон, Сэлэнгэ, Төв, Хэнтий, Дорноговь аймгуудын БОАЖГ-уудын дарга нар нь энэхүү машинуудыг хүлээж авсан бөгөөд төсөлд шалгарсан “Мог пластик” ХХК-ийнхан менежментийг нь хариуцаж ажиллах юм байна.

Бутлагч машин нь 1 цагт 300 кг хуванцарыг бутлах хүчин чадалтай бол преслэгч нь 60 тоннын даралтаар цаас, хуванцар, гялгар уут, лааз, овор хэмжээ ихтэй хог хаягдлыг шахах хүчин чадалтай юм байна. Эдгээр машинаар буталж, овор хэмжээг нь багасгасан хогийг УБ-т үйл ажиллагаа явуулж байгаа хуванцар дахин боловсруулдаг үйлдвэрүүдийн түүхий болгон нийлүүлэх юм.

Улаанбаатарт хуванцар дахин боловсруулах 13 үйлдвэр байдаг бөгөөд жилд 30 мянган тонн хогийг дахин боловсруулах хүчин чадалтай ч түүхий эдийн дутагдлаас болоод бүрэн хүчин чадлаараа ажиллаж чаддаггүй. Харин энэхүү машинуудыг 8 аймагт хүлээлгэж өгснөөр түүхий эд тодорхой хэмжээнд нэмэгдэнэ гэж тооцоолж байна. Нөгөөтэйгүүр иргэдийг хогоо ангилж хаях дадалд сургах томоохон түлхэц болно гэж тооцоолж байгаа юм.

Улаанбаатарт ус, ундааны сав дахин боловсруулах “Мог пластик”, “Од пластик”, “Сан-Оргиу”, “Пластик центр”, “Ганган-Анд”, “Жин хургуй”, “Ти Эм Эл” зэрэг компаниуд үйл ажиллагаа явуулж байна.

Нийслэлийн Баянзүрх дүүргийн Засаг даргын Тамгын газрын Хүнс, худалдаа үйлчилгээний хэлтсээс “Жижиглэн худалдааны газар, түүний үйлчилгээ-Ерөнхий шаардлага MNS5021-1:2019”, “Хоол үйлдвэрлэл, үйлчилгээний газарт тавих шаардлага MNS4946:2019” Монгол улсын шинэчлэгдсэн стандартуудыг танилцуулах сургалтыг амжилттай зохион байгууллаа.

Тус сургалтад дүүргийн Засаг даргын Тамгын газрын Тохижилт, нийтийн аж ахуйн хэлтэс, дүүрэг дэх Цагдаагийн газар, Онцгой байдлын хэлтэс, Мэргэжлийн хяналтын хэлтэс, Эрүүл мэндийн төв, Улаан загалмайн нийгэмлэг болон дүүргийн дүүргийн нутаг дэвсгэрт худалдаа, нийтийн хоолны чиглэлээр үйл ажиллагаа явуулдаг нийт 482 аж ахуйн нэгж, иргэн хамтран оролцсон байна.

Дашрамд, тус стандартууд нь ‘’Стандарт, хэмжил зүйн газрын даргын 2019 оны 7 дугаар сарын 31-ний өдрийн С/33, С/34 дүгээр тогтоол’’-аар батлагдсан аж

Чингэлтэй дүүргийн долдугаар хороо, Хувьсгалчдын 11-15 дугаар гудамжны 200 орчим айл өрх инженерийн шугам сүлжээ, халаалт дулаан, цэвэр, бохир усны шугаманд холбогдлоо. Гэр хороололд хэсэгчилсэн болон бие даасан инженерийн хангамжийг нэвтрүүлэх “Дэд бүтцийн төв” төсөл тус дүүрэгт амжилттай хэрэгжиж өнөөдөр нээлтээ хийсэн юм. Нээлтийн ажиллагаанд Улсын Их Хурлын дарга Г.Занданшатар, Нийслэлийн Засаг дарга бөгөөд Улаанбаатар хотын Захирагч С.Амарсайхан болон холбогдох албаныхан оролцлоо.

УИХ-ын дарга Г.Занданшатар нээлтийн ажиллагааны үеэр хэлсэн үгэндээ “Өнөөдөр нийслэлчүүдийн хувьд нэг том дэвшил, нэг том бүтээн байгуулалтын эхлэл тавигдаж байгаад баяртай байна. Утааг бууруулах ажлыг эрчимтэй өрнүүлсний үр дүнд энэ өвөл бид утаагүй сайхан өвөлжих гэж байгаа нь том дэвшил юм. Үүний тод илрэл энэхүү бүтээн байгуулалт өрнөснөөр 200 орчим айл яндангүй болж байна гэсэн үг. Хүн бүр дор бүрнээ чин сэтгэлээсээ чармайн зүтгэж чадвал нийслэл хот, улс эх орноо хөгжүүлж чадахын эхлэлийг үүнээс харж байна” хэмээлээ.

Нийслэлийн Засаг дарга бөгөөд Улаанбаатар хотын Захирагч С.Амарсайхан “Чингэлтэй дүүргийн долдугаар хороонд дэд бүтэц хөгжсөн, орон сууцанд амьдарч буй мэт ая тухтай, сайхан орчныг бүрдүүлсэн, агаарын бохирдлын эсрэг авч хэрэгжүүлсэн томоохон ажлын нэг дэд бүтцийн төвийн нээлт болж байна. Ирэх хавраас иргэдийг орон сууцжуулах “Орлогод нийцсэн орон сууц” хөтөлбөр хэрэгжиж эхлэнэ гэдгийг дуулгахад таатай байна.

Мөн энэ мэтчилэн дэд бүтцийн төвүүдийг ашиглалтад оруулахаар төлөвлөгдсөн. Одоо айл өрхүүд гаднах тохижилтондоо анхаарч, хашаандаа ногоон байгууламжийг байгуулан ажиллах байх аа. Та бүхний идэвхи, хүчин зүтгэлээс хэрхэн сайхан орчинд амьдрах бүх зүйл хамаарна. Та бүхэндээ баяр хүргэе” гэсэн юм.

Дэд бүтцийн төв ашиглалтад орсноор яндангийн тоо багасч, тэр хэрээр агаар, хөрсний бохирдол буурч, газрын үнэлгээ нэмэгдэн, иргэд өөрсдийн өмчлөлийн газартаа ая тухтай амьдрах нөхцөл бүрдэж байна.

ОБЕГ-ын харьяа Үндэсний аврах бригад сүүлийн үеийн дэвшилтэд технологи бүхий “Шуурхай удирдлага, зарлан мэдээллэх төв”-тэй болж, өнөөдөр нээлтээ хийлээ.

Нээлтийн арга хэмжээнд ОБЕГ-ын дарга, хошууч генерал Т.Бадрал, НОБГ-ын дарга, хурандаа Ж.Чүлтэмсүрэн, Үндэсний аврах бригадын захирагч, хурандаа Д.Намсрай болон даргын зөвлөлийн гишүүд, алба хаагчид оролцсон юм.

Хошууч генерал Т.Бадрал хэлсэн үгэндээ, “Онцгой байдлын байгууллага 2017 оноос Гамшгийн шуурхай удирдлага, зарлан мэдээллийн үндэсний болон бүсийн төвүүдийг байгуулсан. Үүнтэй холбогдуулан харьяа анги, байгууллага, салбарууд нэгдсэн удирдлага зохион байгуулалтаар хангагдах төвүүдийг байгуулан ажиллаж байна. Үндэсний аврах бригадын алба хаагчид гамшгийн голомтод олон хоногоор үүрэг гүйцэтгэдэг. Энэ удирдлагыг холбоо, мэдээлэлгүйгээр төсөөлөх аргагүй. Цаг үеэ олсон, техникийн содон шийдлээр “Шуурхай удирдлага, зарлан мэдээллийн төв”-тэй болж байгаад баяртай байна. Та бүхэнд ажил, хөдөлмөрийн амжилт хүсье” гэлээ.

Шуурхай удирдлага зарлан мэдээллийн төвийг алба хаагчдын санаачлагаар өрнүүлж, сүүлийн үеийн техник, технологиор тохижуулан үйл ажиллагааг нь эхлүүлээд байна.

Ингэснээр Онцгой байдлын ерөнхий газар, бүсийн төвүүдийн шуурхай удирдлага, зарлан мэдээллийн төв болон аймгуудын Онцгой байдлын газартай нэгдсэн сүлжээнд холбогдон мэдээ, мэдээллийг түргэн шуурхай авах, дамжуулах, гамшгийн аюулаас урьдчилан сэргийлэх, аюулт үзэгдэл, ослын үед шуурхай удирдлага зохицуулалтаар хангагдах боломжтой боллоо.

Үндэсний аврах бригад нь Монгол Улсад ихэвчлэн тохиолддог ой, хээрийн гал түймэр, ган, зуд, үер, хүчтэй цасан болон шороон шуурга, газар хөдлөлт, хүн, мал, амьтны гоц халдварт өвчин, ус, уулын болон цацраг, химийн хорт бодисын ослын хор уршгийг арилгах, эрэн хайх, аврах ажиллагааг зохион байгуулахад төв, орон нутгийн Онцгой байдлын анги, байгууллагад дэмжлэг үзүүлж, байнгын үүрэг гүйцэтгэн ажилладаг юм гэж Онцгой байдлын ерөнхий газраас мэдээллээ.

Монгол Улсаас Андоррын Хант Улсад хавсран суух Онц бөгөөд Бүрэн эрхт Элчин сайд А.Баттөр 11 дүгээр сарын 8-ны өдөр Андоррын Хант Улсын Хамтарсан эрх баригч, Урхелийн Хамба, Эрхэмсэг гэгээнтэн Хуан-Энрик Вивес и Сисилиад Итгэмжлэх жуух бичгээ өргөн барив.

Энэ үеэр Элчин сайд А.Баттөр Монгол Улсын Ерөнхийлөгч Халтмаагийн Баттулгын мэндчилгээг уламжилж, цаашид Монгол-Андоррын харилцаа, хамтын ажиллагааг бүхий л салбарт харилцан ашигтайгаар хөгжүүлэх сонирхолтой байгаагаа илэрхийллээ.

Урхелийн Хамба, Эрхэмсэг гэгээнтэн Хуан-Энрик Вивес и Сисилиа Монгол Улсын Ерөнхийлөгчид хариу мэндчилгээ дэвшүүлж, шинээр Андоррын Хант Улсад Элчин сайдаар томилогдсон А.Баттөрд ажлын өндөр амжилт хүссэн юм.

Андоррын Хант Улсын Хамтарсан эрх баригч Урхелийн Хамбад Итгэмжлэх жуух бичгээ өргөн барихтай холбогдуулан тус улсын Гадаад хэргийн сайд Мария Убах Фонт Элчин сайд А.Баттөрийг хүлээн авч уулзаж хоёр улсын хамтын ажиллагааг эдийн засаг, аялал жуучлал, соёлын салбарт хөгжүүлэх талаар санал солилцов.

Андоррын Хант Улс нь Монгол Улстай 2011 оны 11 дүгээр сарын 21-ний өдөр дипломат харилцаа тогтоосон бөгөөд тус улсын төрийн тэргүүний албыг Бүгд Найрамдах Франц Улсын Ерөнхийлөгч болон Испанийн Хаант Улсын Каталон мужийн Урхелийн Хамба нар хамтран хашдаг. Нийт 468 мкв талбай бүхий газар нутагтай, 80 мянга гаруй хүн амтай тус улс нь татварын хөнгөлөлттэй нөхцөл, аялал жуучлалын таатай орчноороо жилдээ 10 гаруй сая жуулчдыг татдаг байна.

Монгол, Швейцарын Гадаад харилцааны яам хоорондын улс төрийн тав дахь удаагийн зөвлөлдөх уулзалт өчигдөр Берн хотноо зохион байгуулагдав. Зөвлөлдөх уулзалтыг монголын талаас Гадаад харилцааны яамны Төрийн нарийн бичгийн дарга Д.Даваасүрэн, швейцарын талыг Швейцарын Гадаад хэргийн яамны Ази, Номхон далайн асуудал хариуцсан Туслах нарийн бичгийн дарга Рафаэль Нагели ахалж оролцлоо.

Зөвлөлдөх уулзалтаар талууд Монгол, Швейцарын харилцаа, хамтын ажиллагааг улс төр, эдийн засаг, хөрөнгө оруулалт, хөдөө аж ахуй, байгаль орчин, боловсрол, соёл зэрэг салбарт өргөжүүлэн хөгжүүлэх талаар болон хөгжлийн хамтын ажиллагаа, олон талт хамтын ажиллагааны асуудлаар дэлгэрэнгүй санал солилцов. Мөн бүс нутгийн аюулгүй байдал, түүний дотор Зүүн хойд Азийн асуудлаар хоёр орны санаачлан хэрэгжүүлж буй Улаанбаатарын яриа хэлэлцээ болон Церматын дугуй ширээний уулзалтын хүрээнд хамтран ажиллахын чухлыг талууд онцолжээ.

Зөвлөлдөх уулзалтын дараагаар Гадаад харилцааны яамны Төрийн нарийн бичгийн дарга Д.Даваасүрэн, Швейцарын Гадаад хэргийн яамны Төрийн нарийн бичгийн дарга Паскал Баерисвилтэй уулзаж, хоёр орны харилцаа, хамтын ажиллагааны талаар санал солилцов. Энэ жил хоёр орны хооронд дипломат харилцаа тогтоосны 55 жилийн ой тохиож буй юм.

Гадаад харилцааны сайд Д.Цогтбаатар АНУ-ын Мянганы сорилтын корпорацын Дэд ерөнхийлөгч Энтони Велчерийг 11 дүгээр сарын 11-ний өдөр ГХЯ-нд хүлээн авч уулзаж, Монгол Улсын Засгийн газар болон АНУ-ын Мянганы сорилтын корпорац (МСК)-ын хооронд 2018 оны 7 дугаар сард байгуулсан Усны Компакт гэрээний хэрэгжилтийн явц байдлын талаар ярилцав.

Уулзалтын үеэр талууд Усны Компакт гэрээ нь Улаанбаатар хотын усны хангамжийг нэмэгдүүлэх, монголын ард түмний аж амьдрал, эдийн засгийн өсөлт, улмаар хүрээлэн буй орчин, экологийн тогтвортой байдлыг хангахад чухал ач холбогдолтой болохыг тэмдэглээд, төслийн хэрэгжилттэй холбоотой асуудлаар мэдээллээ шуурхай солилцож, нягт хамтран ажиллаж, төслийг амжилттай хэрэгжүүлэхийн төлөө байгааг харилцан нотоллоо.

АНУ-ын Засгийн газрын 350 сая ам.долларын тусламжаар Улаанбаатар хотын усны эх үүсвэрийг нэмэгдүүлэх, саарал ус дахин боловсруулах үйлдвэр барих зэрэг томоохон бүтээн байгуулалтын ажил хийгдэх юм.